ជិតដល់រដូវកាលចូលឆ្នាំហើយ សម្រាប់នារីណាដែលចង់ផ្លាស់ប្តូរពណ៌សក់ ប៉ុន្តែស្ទាក់ស្ទើមិនដឹងជ្រើសរើសពណ៌អ្វីឱ្យស័ក្តិសម ទាន់សម័យនោះ អ្នកអាចមកមើលពណ៌សក់រដូវក្តៅទាំង ៨ ដូចខាងក្រោម ដែលជាពណ៌កំពុងពេញនិយមខ្លាំងនាពេលសម័យថ្មីនេះ និងជាពណ៌ដែលទាក់ទាញបំផុតសម្រាប់ស្ត្រីក្នុងឆ្នាំ២០២៤។ ដូច្នេះខាងក្រោមនេះគឺជាពណ៌សក់រដូវក្តៅទាំង ៨ ដែលស័ក្តិសមបំផុតសម្រាប់នារីទាន់សម័យ៖

១.ពណ៌ថ្ងៃលិច៖ ពណ៌ថ្ងៃលិចគឺជាពណ៌ក្រហមរួមបញ្ចូលជាមួយពណ៌ទឹកក្រូច នៅពេលដែលអ្នកឃើញពណ៌នេះហើយ អ្នកនឹងនឹកដល់ថ្ងៃលិចនារដូវក្តៅ ដែលជាពណ៌កំពុងពេញនិយមខ្លាំងនាពេលបច្ចុប្បន្ននេះ។

២.ពណ៌ទង់ដែង៖ ពណ៌នេះមានអារម្មណ៍ដូចជាសក់របស់អ្នកកំពុងត្រូវពន្លឺថ្ងៃ ហើយមើលទៅស្រដៀងនឹងពណ៌មាសស្រាល ប្រែទៅជាពណ៌ទង់ដែងងងឹត ដែលមើលទៅគួរឱ្យទាក់ទាញខ្លាំងណាស់។

៣.ពណ៌សូកូឡា៖ ពណ៌សូកូឡា ឬពណ៌ត្នោតគឺជាពណ៌ដែលស័ក្តិសមបំផុតសម្រាប់នារីសុភាព ដែលមិនចូលចិត្តលេងពណ៌សក់ខ្លាំង ដោយពណ៌នេះមិនរើសសម្បុរនោះទេ មិនថាអ្នកមានសម្បុរបែបណា ពណ៌សូកូឡាលាបត្រូវទាំងអស់។

៤.ពណ៌ផ្កាឈូកស្រាល៖ ពណ៌ផ្កាឈូកស្រាល ឬគេហៅថាពណ៌ peach គឺជាពណ៌ដែលកំពុងពេញនិយមខ្លាំងនារដូវក្តៅនេះ វាបង្ហាញពីភាពទាន់សម័យ និងភាពស៊ិចស៊ី ដែលធ្វើឱ្យស្ត្រីកាន់តែទាក់ទាញជាងមុន។

៥.ពណ៌ខៀវលាយស្វាយ៖ សម្រាប់នារីដែលមិនចង់លាបពណ៌សក់ខ្លាំងពេកអាចទទួលបានពណ៌សក់ដ៏ស្រស់ស្អាតនេះជាមួយនឹងពណ៌ខៀវបែកស្វាយ ដែលបង្ហាញពីភាពស្រស់ស្អាតនិងទន់ភ្លន់។

៦.ពណ៌ប្រផេះលាយផ្កាឈូក៖ នៅពេលដែលអ្នករួមបញ្ចូលសក់ពីពណ៌នេះចូលគ្នា គឺមើលទៅពិតជាឡូយមិនធម្មតា និងទាន់សម័យកាលសម្រាប់រដូវក្តៅ។

៧.ពណ៌លឿងមាស៖ គឺជាពណ៌ដ៏ពេញនិយមខ្លាំងសម្រាប់ឆ្នាំ ២០២៤ នារដូវក្តៅនេះអ្នកអាចលាបពណ៌លឿងមាស ដែលធ្វើឱ្យអ្នកមើលទៅកាន់តែទាក់ទាញ និងទាន់សម័យ។

៨.ពណ៌ស្វាយផ្កាឈូក៖ ពណ៌ស្វាយលាយជាមួយពណ៌ផ្កាឈូកគឺជាពណ៌រួមគ្នាយ៉ាងល្អឥតខ្ចោះ។ នៅរដូវក្តៅនេះ អ្នកអាចសាកល្បងសក់ពណ៌ស្វាយផ្កាឈូកបាន ដោយបង្ហាញថាវាពិតជាស្រស់ស្អាតទន់ភ្លន់ លើសពីនេះវាកាន់តែទាក់ទាញភ្នែកអ្នកដទៃ៕

អ្នកវិទ្យាសាស្ត្រលើកឡើងថា ការដាំដើមឈើខុសកន្លែងមានចំណែកធ្វើឱ្យពិភពលោកកាន់តែក្តៅខ្លាំងលើសមុន ហើយអ្នកវិទ្យាសាស្ត្របានបង្ហាញពីទីកន្លែងល្អបំផុតសម្រាប់ដាំដើមឈើ ដើម្បីធ្វើឱ្យពិភពលោកមានអាកាសធាតុត្រជាក់ ។

សារព័ត៌មាន AFP បានរាយការណ៍ពីទីក្រុងប៉ារីស ប្រទេសបារាំង កាលពីថ្ងៃទី២៨ ខែមីនា ឆ្នាំ២០២៤ ថា ដើមឈើទាំងឡាយបានស្រូបយកកាបូនឌីអុកស៊ីត និងជួយស្តារតំបន់ព្រៃឈើខូចខាត ហើយគេអាចដាំកូនឈើដើម្បីបង្កើនផ្ទៃដីព្រៃ ព្រមទាំងជួយប្រឆាំងនឹងការបម្រែបម្រួលអាកាសធាតុផងដែរ ។ ប៉ុន្តែការស្រាវជ្រាវមួយក្នុងទស្សនាវដ្តីឈ្មោះ «Nature Communications» បញ្ជាក់ថា ករណីខ្លះ ចំនួនដើមឈើច្រើនពេកបានធ្វើឱ្យពន្លឺព្រះអាទិត្យចាំងមកលើផ្ទៃផែនដីកាន់តែតិច និងធ្វើឱ្យផែនដីស្រូបយកកំដៅលើសមុនទៅទៀត ។

អ្នកស្រី Susan Cook-Patton អ្នកវិទ្យាសាស្ត្រជាន់ខ្ពស់ផ្នែកស្តារព្រៃឈើ ហើយលោកស្រីបានចូលរួមសរសេរការស្រាវជ្រាវមកពីអង្គការ The Nature Conservancy និយាយថា ៖ «ការដាំដើមឈើនៅតំបន់មួយចំនួន នឹងផ្តល់ផលអវិជ្ជមានសម្រាប់បរិយាកាស» ។

ការពិត បណ្តាអ្នកវិទ្យាសាស្ត្របានជ្រាបហើយថា ការស្តារតំបន់ផ្ទៃដីព្រៃឈើបណ្តាលឱ្យមានការផ្លាស់ប្តូរនៅក្នុង Albedo (ឬបរិមាណវិទ្យុសកម្មព្រះអាទិត្យ ដែលចាំងពីផ្ទៃផែនដី) ប៉ុន្តែពួកគេគ្មានឧបករណ៍ដើម្បីបកស្រាយរឿងនេះទេ ។ រីឯក្រុមអ្នកស្រាវជ្រាវដែលប្រើប្រាស់ផែនទីថ្មីអាចគិតពីការកាត់បន្ថយកំដៅពីដើមឈើ និងកំដៅកើតពី Albedo ជាលើកដំបូង ដោយក្រុមអ្នកស្រាវជ្រាវមើលឃើញថា គម្រោងដាំព្រៃឈើជាច្រើនមិនបានរួមបញ្ចូល Albedo គឺការដាំដើមឈើបានផ្តល់អត្ថប្រយោជន៍ដល់អាកាសធាតុប្រមាណពី២០% ទៅ៨០% ។

អ្នកស្រី Susan Cook-Patton អ្នកវិទ្យាសាស្ត្រជាន់ខ្ពស់ផ្នែកស្តារព្រៃឈើបន្តថា ៖ «នៅមានទីកន្លែងជាច្រើនទៀតសម្រាប់ការស្តារតំបន់ព្រៃឈើឡើងវិញ ហើយវាជាគំនិតល្អសម្រាប់ការទប់ស្កាត់បម្រែបម្រួលអាកាសធាតុ ។ ពួកយើងគ្រាន់តែព្យាយាមជួយឱ្យអ្នកទាំងអស់គ្នារកឃើញតំបន់ទាំងនេះ» ។

ការស្រាវជ្រាវខាងលើបង្ហាញថា ប្រទេសជាច្រើនបានតាំងចិត្តដាំដើមឈើរាប់លានដើម ដើម្បីប្រឆាំងនឹងអាកាសធាតុក្តៅខ្លាំង ប៉ុន្តែមិនមែនគ្រប់ការព្យាយាមទាំងអស់នឹងផ្តល់ប្រយោជន៍ដល់ពិភពលោកដូចគ្នាទេ ។ ឧទាហរណ៍ នៅតំបន់ក្តៅហើយសើម ដូចជា ៖ ព្រៃអាម៉ាហ្សូនមានកន្លែងផ្ទុកកាបូនខ្ពស់ និងមានបម្រែបម្រួល Albedo កម្រិតទាប គឺវាជាកន្លែងសម្រាប់ការស្តារតំបន់ព្រៃឈើឡើងវិញ ដែលផ្ទុយនឹងតំបន់វាលស្មៅមានអាកាសធាតុក្តៅ ៕

ប្រទេសវៀតណាម ៖ កាលពីថ្ងៃទី២៩ ខែមីនា ឆ្នាំ២០២៤ សារព័ត៌មាន China Xinhua រាយការណ៍ថា ការិយាល័យគយវៀតណាមប្រកាសថា ប្រាក់ចំណូលបានពីការនាំចេញបន្លែ និងផ្លែឈើរបស់ប្រទេសវៀតណាម នៅត្រីមាសដំបូងនៃឆ្នាំ២០២៤ (គឺចាប់ពីខែមករា រហូតដល់ខែមីនា) ស្មើនឹង១.២៥០លានដុល្លារអាមេរិក ។ នេះជាលើកដំបូងហើយ ដែលប្រាក់ចំណូលការនាំចេញបន្លែ និងផ្លែឈើវៀតណាម កើនឡើងលើស១ពាន់លានដុល្លារអាមេរិកក្នុងត្រីមាសដំបូង ។

បើតាមរបាយការណ៍បញ្ជាក់ថា តួលេខនេះបានឆ្លុះបញ្ចាំងឱ្យឃើញពីការរីកចម្រើនយ៉ាងខ្លាំងក្នុងវិស័យពាណិជ្ជកម្មនាំចេញបន្លែ និងផ្លែឈើរបស់វៀតណាម នាថ្ងៃអនាគត ។ រីឯប្រាក់ចំណូលបានពីការនាំចេញបន្លែ និងផ្លែឈើ ជាពិសេស នៅខែមីនា ឆ្នាំ២០២៤ (ត្រឹមតែ១ខែប៉ុណ្ណោះ) បានកើនឡើងរហូតដល់៤៣៣លានដុល្លារអាមេរិក គឺកើនឡើងជិត៤% បើធៀបពីមួយឆ្នាំទៅមួយឆ្នាំ ។ ចំណែកប្រទេសចិន, កូរ៉េខាងត្បូង, សហរដ្ឋអាមេរិក, ថៃ និងជប៉ុន គឺជាទីផ្សារចម្បងសម្រាប់ការនាំចេញបន្លែ និងផ្លែឈើវៀតណាម ។

មន្ត្រីសមាគមបន្លែ និងផ្លែឈើវៀតណាមលើកឡើងថា ការនាំចេញបន្លែ និងផ្លែឈើកើនឡើងនៅត្រីមាសដំបូងនៃឆ្នាំ២០២៤នេះ គឺបណ្តាលមកពីការនាំចេញផ្លែទុរេនវៀតណាមខុសរដូវកាលកើនឡើង ។ រីឯការបរិភោគផ្លែទុរេនវៀតណាមកើនឡើងនៅប្រទេសថៃ បានធ្វើឱ្យថៃក្លាយជាប្រទេសនាំចូលបន្លែ និងផ្លែឈើវៀតណាម ស្ថិតក្នុងចំណាត់ថ្នាក់ទី៤ ។

ចំណែកក្រសួងឧស្សាហកម្ម និងពាណិជ្ជកម្មវៀតណាមបានព្យាករថា ការនាំចេញបន្លែ និងផ្លែឈើរបស់ប្រទេសវៀតណាម ក្នុងឆ្នាំ២០២៤ទាំងមូល នឹងកើនឡើងរហូតដល់៦.៥០០លានដុល្លារអាមេរិក ។ កាលពីឆ្នាំ២០២៣ ប្រទេសវៀតណាមបានបំបែកកំណត់ត្រាការនាំចេញបន្លែ និងផ្លែឈើក្នុងបរិមាណច្រើនបំផុត ក្នុងនោះប្រាក់ចំណូលបានពីការនាំចេញបន្លែ និងផ្លែឈើនៅឆ្នាំ២០២៣ គឺស្មើជិត៥.៦០០លានដុល្លារអាមេរិក ៕

ថ្មីៗនេះ យោងតាមការចេញផ្សាយរបស់គេហទំព័រអន្តរជាតិ Seasia គឺបានបង្ហាញឲ្យឃើញថា សម្រាប់ឆ្នាំ២០២៤ នេះ កម្ពុជាគឺឈរលើលេខរៀងទី១១៩លើពិភពលោក និងជាប់លេខ៩លើ១១ប្រទេសនៃតំបន់អាស៊ីអាគ្នេយ៍ ដែលប្រជាពលរដ្ឋទទួលបានកម្រិតសុភមង្គលទាប។

ជាមួយគ្នានោះ សិង្ហបុរីបានជាប់ចំណាត់ថ្នាក់លេខ១ នៅអាស៊ីអាគ្នេយ៍ ដែលប្រជាពលរដ្ឋមានសុភមង្គលបំផុតក្នុងតំបន់។ តាមពីក្រោយដោយហ្វីលីពីន បន្ទាប់មកគឺ វៀតណាម ថៃ ម៉ាឡេស៊ី ឥណ្ឌូណេស៊ី ឡាវ មីយ៉ាន់ម៉ា និងកម្ពុជា។ ទោះជាយ៉ាងណា ព្រុយណេនិងទីម័រឡេសតេ គឺមិនត្រូវបានគេចាត់ថ្នាក់នោះទេ។

យោងតាមការស្រាវជ្រាវ ប្រទេសដែលមានសុភមង្គល គឺត្រូវផ្តោតលើកត្តាមួយចំនួនដូចជា៖ ផលិតផលក្នុងស្រុកសរុបសម្រាប់មនុស្សម្នាក់ GDP per Capita , ការទទួលបានការគាំពារពីសង្គម, ការរស់នៅប្រកបដោយស្តង់ដា រួមទាំងអាយុសង្ឃឹមរស់របស់ប្រជាពលរដ្ឋ(មិនសូវមានជំងឺច្រើន) និងអត្រាមានការងារធ្វើខ្ពស់, សេរីភាពនៃការជ្រើសរើសរបស់បុគ្គលម្នាក់ៗ, ភាពសប្បុរស (ប្រជាជនទូទៅដែលមានចិត្តសណ្តោសប្រណីខ្ពស់)និងកម្រិតអំពើពុករលួយនៅទូទាំងផ្ទៃប្រទេស។

ជាមួយគ្នានេះ យោងតាមស្ថិតិមួយទៀតក៏បានចេញផ្សាយថា កម្ពុជាមានភាគរយដែលប្រជាជនកំពុងជួបនឹងវិបត្តិផ្លូវចិត្តខ្ពស់ជាងប្រទេសអាស៊ានផ្សេងទៀត រហូតដល់ ១២% ប្រមាណជាង ២លាននាក់។ ប្រជាពលរដ្ឋខ្មែរបាននឹងកំពុងមានវិបត្តិផ្លូវចិត្តកាន់តែធ្ងន់ធ្ងរទៅ បណ្តាលឲ្យមានការសម្លាប់ខ្លួន ក្រោមរូបភាពផ្សេងៗស្ទើរតែជារៀងរាល់ថ្ងៃ ដែលបណ្តាលមកពីកត្តាមួយចំនួនដូចជាកត្តាសង្គម បំណុល ការរំលោភសិទ្ធមនុស្សជាដើម ដែលនេះបើយោងតាមការសិក្សាស្រាវជ្រាវ៕

បរទេស៖ ប្រាសាទមជ្ឈិមសម័យមួយត្រូវបានគេរកឃើញនៅក្រោមវីឡាឯកជនក្នុងទីក្រុង Vannes ភាគពាយព្យនៃប្រទេសបារាំង ដែលបានសាងសង់ក្នុងសតវត្សទី ១៨ ប៉ុន្តែបច្ចុប្បន្នវិឡានេះត្រូវបានគេកសាង និងជួសជុលធ្វើជាសារមន្ទីរសិល្បៈវិញ។

យោងតាម Heritage Daily ដែលបានចុះផ្សាយនៅថ្ងៃទី២៩ ខែមីនា ឆ្នាំ២០២៤ ថាវីឡាចំណាស់មួយត្រូវបានកម្មកររាប់ស៊ិបនាក់ជួសជុលឡើងវិញដើម្បីសាងសង់ទៅជាសារមន្ទីរសិល្បៈ ស្រាប់តែអំឡុងពេលជីកដី ពួកគេក៏ប្រទះឃើញប្រាសាទដ៏អស្ចារ្យមួយស្ថិតនៅក្រោមដី ក្នុងទីក្រុង Vannes ភាគពាយព្យនៃប្រទេសបារាំង។

នៅយុគសម័យកណ្តាល ទីក្រុង Vannes គឺជាទឹកដីដែលមានប្រវត្តិដ៏សម្បូរបែប អ្នកវិទ្យាសាស្ត្រមកពីវិទ្យាស្ថានជាតិសម្រាប់ការស្រាវជ្រាវបុរាណវត្ថុវិទ្យា (Inrap) បានពិនិត្យយ៉ាងយកចិត្តទុកដាក់លើដីនៅពេលដែលវីឡាចំណាស់នេះ កំពុងត្រូវបានជួសជុលឡើងវិញ ដើម្បីត្រៀមសាងសង់សារមន្ទីរសិល្បៈ។ ក្នុងដំណាក់កាលដំបូងនៃការជីកកកាយ អ្នកស្រាវជ្រាវបានធ្វើការសិក្សាលើទីធ្លារបស់ផ្ទះវីឡា ដែលពួកគេបានរកឃើញជញ្ជាំងការពារប្រាសាទពីរកម្រិត និងគូទឹកដែលមានទីតាំងនៅជម្រៅ ៤ ម៉ែត្រពីលើកម្រិតផ្លូវ។

ប្រាសាទដែលមានអាយុកាលជាង ៦០០ ឆ្នាំនេះត្រូវបានសាងសង់ឡើងនៅចុងសតវត្សទី ១៤ ដោយលោក Jean IV ពីឆ្នាំ១៣៤៥ ដល់ឆ្នាំ១៣៧២ ក្នុងគោលបំណងបង្ហាញពីអំណាចរបស់មនុស្សជំនាន់មុន។ យោងតាមអ្នកជំនាញ ចម្លាក់ថ្មដែលនៅសេសសល់បង្ហាញថាប្រាសាទនេះមានពី ៣ ទៅ ៤ ជាន់ និងជណ្តើរជាច្រើន ដែលជាផ្នែកមួយដែលត្រូវបានអភិរក្សគួរឱ្យកត់សម្គាល់។ ក្រុមការងារក៏បានរកឃើញដាននៅលើថ្មមួយចំនួនដែលត្រូវបានកែច្នៃដើម្បីបិទបាំងជញ្ជាំងតុបតែង និងរចនាសម្ព័ន្ធជំនួយផ្សេងទៀតដូចជាបង្គន់ និងបំពង់បង្ហូរទឹកជាដើម។

បន្ទាប់មកអ្នកជំនាញក៏បានរកឃើញ វត្ថុបុរាណជាច្រើនដែលតំណាងឱ្យជីវិតរបស់ម្ចាស់ផ្ទះក្នុងសតវត្សទី ១៥ និងទី ១៦ រួមមានកាក់ កាំបិត ក្បឿង ចានឈើ ប្រដាប់ផ្ទះបាយ និងគ្រឿងអលង្ការមានតម្លៃមួយចំនួន។ ដោយសារស្ថានភាពដីនៅសល់ក្រុមការងារក៏ប្រទះឃើញវត្ថុសំខាន់ៗដូចជាសម្លៀកបំពាក់ ខ្សែស្បែកជើង ម្ជុល ចិញ្ចៀន និងសោទៀតផង។ ការជីកកកាយក៏បានរកឃើញរោងម៉ាស៊ីនកិនស្រូវដែលតភ្ជាប់ទៅតំបន់លំនៅដ្ឋានរបស់ប្រាសាទ និងមានអណ្តូងដ៏ធំមួយដែលចិញ្ចឹមដោយប្រឡាយ ក៏ដូចជាសំណល់នៃស្ពានតភ្ជាប់ប្រាសាទទៅកាន់ប្រាសាទដែលនៅសល់នៅខាងក្រោយទីក្រុងចាស់៕