ប្រទេសអង់គ្លេស ៖ បុរសអង់គ្លេសម្នាក់បានរត់កាត់ទ្វីបអាហ្វ្រិកពីទិសខាងត្បូង ទៅកាន់ទិសខាងជើងដំបូងគេនៅលើពិភពលោក ហើយលោកបានចំណាយពេលវេលារត់អស់ជិត១ឆ្នាំ និងឆ្លងកាត់ឧបសគ្គជាច្រើននៅតាមផ្លូវ ។ ប៉ុន្តែដោយសារលោកបានតាំងចិត្តថា នឹងសម្រេចគោលដៅឱ្យបាន ទើបលោកអាចឆ្លងផុតនូវឧបសគ្គទាំងនេះ ។

បុរសរូបនេះឈ្មោះ Russ Cook អាយុ២៧ឆ្នាំ រស់នៅទីក្រុង Worthing ប្រទេសអង់គ្លេស ។ លោកបានរត់ទៅដល់ចំណុចគោលដៅនៅទីក្រុង Bizerte ប្រទេសទុយនីស៊ី កាលពីថ្ងៃទី៧ ខែមេសា ឆ្នាំ២០២៤ ។ វាជាការបញ្ចប់ការរត់ក្នុងចម្ងាយផ្លូវ ស្មើនឹង១ម៉ឺន៦ពាន់គីឡូម៉ែត្រ និងឆ្លងកាត់ប្រទេសចំនួន១៦ នៅទ្វីបអាហ្វ្រិក ។

លោក Russ Cook បានចំណាយពេលរត់ក្នុងចម្ងាយផ្លូវដ៏វែងឆ្ងាយ រហូតដល់ចំនួន៣៥២ថ្ងៃ ។ លោកត្រូវបានគេកត់ត្រាថា គឺជាមនុស្សដំបូងគេនៅលើពិភពលោក ដែលបានរត់ឆ្លងកាត់ទ្វីបអាហ្វ្រិក ចាប់ពីទិសខាងត្បូង ទៅទិសខាងជើងដោយជោគជ័យ ។

លោក Russ Cook ហៅខ្លួនឯងថា «Hardest Geezer» បានចាប់ផ្តើមរត់ពីតំបន់ Cape Agulhas នៅអាហ្វ្រិកខាងត្បូង កាលពីខែមេសា ឆ្នាំ២០២៣ ហើយលោកបានប្រាប់ខ្លួនឯងតាំងពីមុនពេលចាប់ផ្តើមបំពេញភារកិច្ចនេះថា ជីវិតរបស់លោកគ្មានអ្វីដែលគួរឱ្យសោកស្តាយឡើយ ។

លោកមានគោលបំណងរៃអង្គាសប្រាក់ដើម្បីផ្តល់ឱ្យអង្គការសប្បុរសធម៌ ហើយក្នុងអំឡុងពេលរត់នោះ លោកអាចប្រមូលប្រាក់បានជិត៧សែនផោន ។ លោកបានកត់ត្រា និងបង្ហោះរូបភាពផ្សេងៗពីការរត់របស់ខ្លួនក្នុងបណ្តាញសង្គម X, Instagram និង Youtube ហើយមានអ្នកចូលទស្សនារូបភាពទាំងនេះរាប់លាននាក់ ។

លោកប្រាប់ថា លោកជួបបញ្ហាជាច្រើននៅតាមផ្លូវ ដូចជា ៖ ផ្លាស់ប្តូរគម្រោង, ជួបចោរប្លន់, មានបញ្ហាសុខភាព និងបញ្ហាទិដ្ឋាការ ជាដើម ។ នៅពេលលោករត់បានចំនួន២០០ថ្ងៃ លោកក៏កាត់បន្ថយចម្ងាយផ្លូវរត់តាមការណែនាំរបស់គ្រូពេទ្យនៅប្រទេសហ្គេរីយ៉ា ។ ប៉ុន្តែនៅពេលលោកឈប់សម្រាកដើម្បីត្រួតពិនិត្យរាងកាយ គឺរកពុំឃើញថា លោកបាក់ឆ្អឹងទេ ។ ហេតុនេះ លោកបានប្រើថ្នាំបំបាត់ការឈឺចាប់កម្រិតខ្លាំង រួចហើយរត់បន្តទៀត ។

នៅទីបំផុត លោកក៏អាចរត់ទៅដល់ចំណុចគោលដៅចុងក្រោយ គឺនៅទីក្រុង Bizerte ប្រទេសទុយនីស៊ី ដែលជាតំបន់ខ្ពស់បំផុតនៅអាហ្វ្រិកខាងជើង ព្រមជាមួយអ្នកគាំទ្រជាច្រើននាក់ ។

លោកបញ្ជាក់ថា ការរត់នេះ គឺជាពេលវេលាដ៏លំបាកបំផុតនៅក្នុងជីវិត ។ ប៉ុន្តែលោកមានអារម្មណ៍ថា មានកិត្តិយសយ៉ាងខ្លាំង ដោយសារបានជួបមនុស្សម្នានៅគ្រប់ប្រទេស ព្រមទាំងទទួលបានក្តីស្រឡាញ់ និងការអាណិតអាសូរពីមនុស្សជាច្រើន ៕

ប្រាសាទបុរាណចំនួន ៣ នៅក្នុងប្រទេសចិនដែលមានអាយុកាលជិត ២ ពាន់ឆ្នាំ បានកំពុងទាក់ទាញភ្ញៀវទេសចររាប់ម៉ឺននាក់ ដោយសារវាជាសម្បត្តិវប្បធម៌ និងជានិមិត្តរូបនៃព្រះពុទ្ធសាសនាបុរាណចិន។ ដូច្នេះខាងក្រោមនេះគឺជាប្រាសាទព្រះពុទ្ធសាសនាបុរាណ ដែលមានអាយុកាល ២០០០ ឆ្នាំនៅក្នុងប្រទេសចិន។

១.ប្រាសាទ Bach Ma៖ ប្រាសាទ Bach Ma មានទីតាំងនៅទីក្រុង Luoyang ខេត្ត Henan ប្រទេសចិន ត្រូវបានគេនិយាយថាជាប្រាសាទដំបូងគេដែលបានសាងសង់បន្ទាប់ពីព្រះពុទ្ធបានមកដល់ប្រទេស។ ជាមួយនឹងប្រវត្តិសាស្រ្តជិត ២,០០០ ឆ្នាំ ប្រាសាទនេះត្រូវបានគេស្គាល់ថាជាកន្លែងកំណើតនៃព្រះពុទ្ធសាសនាចិន។ យោងតាមកំណត់ត្រា វត្ត Bach Ma ត្រូវបានសាងសង់ឡើងដោយអធិរាជ Han Ming ក្នុងឆ្នាំ ៦៨ នៃគ.ស ដើម្បីធ្វើជាកន្លែងស្នាក់នៅ និងជាកន្លែងដើម្បីផ្សព្វផ្សាយព្រះពុទ្ធសាសនានៅក្នុងប្រទេសចិន។

២.ប្រាសាទ Linh An៖ ប្រាសាទ Linh An ស្ថិតនៅជើងភ្នំ Linh An ស្រុក Tay Ho នៃទីក្រុង Hangzhou ខេត្ត Jiangnan ប្រទេសចិន។ វត្តដ៏អស្ចារ្យនេះឈរទល់នឹងភ្នំ Phi Lai ដ៏ល្បី ហើយបែរមុខទៅបឹងខាងលិចដ៏រ៉ូមែនទិក។ វត្ត Linh An ត្រូវបានកសាងឡើងក្នុងឆ្នាំ ៣២៦ នៃគ.ស មានប្រវត្តិជាង ១៦០០ ឆ្នាំ ដែលកន្លែងនេះត្រូវបានចាត់ទុកថាជាទឹកដីដ៏ពិសិដ្ឋនៃពុទ្ធសាសនា Zen ដែលជានិកាយពុទ្ធសាសនាមហាយានមានដើមកំណើតពីបុព្វបុរសឥណ្ឌាចំនួន ២៨ ជំនាន់ ហើយបានរីករាលដាលយ៉ាងខ្លាំងនៅក្នុងប្រទេសចិន។ វត្ត Linh An ត្រូវបានគេស្គាល់ថាជាវត្តលេខ ១ ក្នុងខេត្ត Jiangnan ដោយសារប្រវត្តិសាស្ត្រដ៏យូរលង់ ទេសភាពដ៏ទាក់ទាញ និងបេតិកភណ្ឌវប្បធម៌ដ៏ជ្រាលជ្រៅបំផុត។

៣.ប្រាសាទ Shaolin៖ ប្រាសាទ Shaolin ស្ថិតនៅលើភ្នំ Songshan ដ៏អស្ចារ្យក្នុងទីក្រុង Dengfeng នៃខេត្ត Henan ប្រទេសចិន។ ប្រាសាទនេះត្រូវបានកសាងឡើងក្នុងឆ្នាំ ៤៩៥ ក្នុងរជ្ជកាលរាជវង្ស Wei ភាគខាងជើងដែលមានប្រវត្តិជាង ១,៥០០ ឆ្នាំ។ ប្រាសាទ Shaolin ត្រូវបានគេចាត់ទុកថាជានិមិត្តរូបព្រះពុទ្ធសាសនា និងជាលំយោលនៃក្បាច់គុនចិន។ វត្តទាំងមូលគឺជាសំណង់ស្ថាបត្យកម្មដ៏ធំដែលមានស្នាដៃគួរឱ្យកត់សម្គាល់ ដែលត្រូវបានទទួលស្គាល់ដោយ UNESCO ជាបេតិកភណ្ឌវប្បធម៌ពិភពលោក៕

សហរដ្ឋអាមេរិក៖ គូស្នេហ៍ជនជាតិអាមេរិកជាច្រើនបានសម្រេចចិត្តរៀបការក្នុងអំឡុងពេលនៃសូរ្យគ្រាសកាលពីម្សិលមិញថ្ងៃទី៨ ខែមេសា ដែលមានចំនួនរហូតដល់ ១៥០ គូទូទាំងប្រទេស។

បើយោងតាម GMA ដែលបានចុះផ្សាយកាលពីពេលថ្មីៗនេះបានឱ្យដឹងថា ទីក្រុង Tiffin នៃរដ្ឋ Ohio បានរៀបចំពិធីមង្គលការដ៏ធំមួយដោយទាក់ទាញគូស្វាមីភរិយាចំនួន ១៥០ គូទូទាំងប្រទេស ដើម្បីឱ្យគូរស្នេហ៍ទទួលបានអារម្មណ៍ពិសេស និងបង្កើតការចងចាំពេលវេលាដ៏ល្អបំផុតដែលមិនអាចបំភ្លេចបានចំពេលមានបាតុភូតសូរ្យគ្រាសដ៏អស្ចារ្យ ១០០ ឆ្នាំមានម្តង ធ្វើឱ្យគូស្នេហ៍ជាច្រើនទ្រាំមិនបានក៏សម្រុករៀបការនៅថ្ងៃនេះតែម្តង។

ព្រឹត្តិការណ៍សូរ្យគ្រាសបានកើតឡើងនៅថ្ងៃទី៨ ខែមេសា ឆ្នាំ២០២៤ បានគ្របដណ្តប់តំបន់ជាច្រើននៅអាមេរិកខាងជើង។ ក្នុងអំឡុងពេលនេះ សីតុណ្ហភាពនឹងថយចុះ ហើយផ្កាយនឹងអាចមើលឃើញបានយ៉ាងពេញលេញ។ គូស្នេហ៍ Zach Horrall និង Corlan McCollum បាននិយាយថា ពួកគេពិតជាមានអារម្មណ៍រំភើបខ្លាំងណាស់នៅពេលដែលពួកគេបានរៀបការក្នុងព្រឹត្តិការណ៍ដ៏អស្ចារ្យមួយនេះ។

ការសម្រេចចិត្តរៀបចំពិធីមង្គលការដែលមានរយៈពេល ៣ នាទីនិង ៤៥ វិនាទី បានធ្វើឱ្យគូស្នេហ៍ជាច្រើនមានការពេញចិត្តជាខ្លាំង ខណៈដែលកម្មវិធីនេះរៀបចំឡើងដោយឥតថ្លៃ។ មន្ត្រីក្រុង Tiffin បាននិយាយថា គូស្នេហ៍ប្រហែល ១០% ប៉ុណ្ណោះគឺជាអ្នកស្រុកនៅទីនេះ ខណៈដែលគូស្នេហ៍ជាច្រើនទៀតគឺមកពីទីក្រុងផ្សេងៗ ចម្ងាយសរុបដែលពួកគេធ្វើដំណើរទៅកាន់ទីក្រុង Tiffin ដើម្បីរៀបការត្រូវបានប៉ាន់ប្រមាណថាមាន ២៦,៧០០ គីឡូម៉ែត្រឯណោះ។

ទោះជាយ៉ាងណា នេះមិនមែនជាព្រឹត្តិការណ៍ធំខ្លាំងនោះទេ កាលពីថ្ងៃទី១០ ខែមេសា ឆ្នាំ២០២៣ គេហទំព័រនេះបានកត់ត្រាអាពាហ៍ពិពាហ៍ចំនួន ៣៦០ គូរនៃពិធីបុណ្យ “Eclipse of the Heart Day” ដែលបានប្រារព្ធរយៈពេលបីថ្ងៃរបស់ទីក្រុង។ ទោះបីជាគូស្នេហ៍រៀបការនៅថ្ងៃសូរ្យគ្រាសមានតិចជាងថ្ងៃផ្សេងៗក៏ដោយ ក៏គូស្នេហ៍ជាច្រើនមានការពេញចិត្ត និងរំភើបជាខ្លាំង ខណៈដែលសូរ្យគ្រាសដ៏អស្ចារ្យនេះ ១០០ ឆ្នាំទើបមានម្តងប៉ុណ្ណោះ៕

រយៈពេល២៧ឆ្នាំហើយ ដែលលោកយាយ Baba Vanga ហោរាសាស្រ្តដ៏ល្បីល្បាញទូទាំងសកលលោកបានចែកឋានទៅ ខណៈលោកយាយថា ពិភពលោកនឹងមកដល់ទីបញ្ចប់ក្នុងឆ្នាំ ៥០៧៨ ស្របពេលដែលព្រឹត្តិការណ៍សំខាន់ៗក៏បានលេចឡើងតាមពាក្យទំនាយរបស់លោកយាយជាបន្តបន្ទាប់។

លោកយាយ Baba Vanga ជនជាតិប៊ុលហ្គារី កើតក្នុងឆ្នាំ១៩១១ និងទទួលមរណៈភាពនៅឆ្នាំ ១៩៩៦ ក្នុងព្រះជន្ម ៨៥ឆ្នាំ។ កាលពីអាយុ១២ ឆ្នំាំ លោកយាយគឺបានជួបនៅឧបត្តវហេតុមួយដោយមិននឹកស្មានដល់ ដែលធ្វើឲ្យភ្នែកទាំង២របស់គាត់ងងឹតសូន្យឈឹងតែម្តង។ បន្ទាប់ពីនោះមក គាត់ក៏បានក្លាយទៅជាមនុស្សវិសេសម្នាក់ បើទោះបីជាភ្នែកមើលពុំឃើញអ្វីសោះក្នុងពេលកំពុងមានរស់រានជីវិតក៏ដោយ ប៉ុន្តែគាត់បែរមានភ្នែកទ័ព្វ អាចប្រមើលមើលឃើញអំពីព្រឹត្តិការណ៍សំខាន់ៗរបស់ពិភពលោកនាពេលអនាគតជាច្រើនរឿងរាប់មិនអស់។

រឿងដែលលោកយាយធ្លាប់បានទាយទុកទាំងប៉ុន្មានក៏ត្រូវបានគេកត់ត្រាទុក ខណៈដែលព្រឹត្តិការណ៍មួយចំនួនធំក៏បានកើតឡើងទៅតាមពាក្យទំនាយរបស់លោកយាយពិតប្រាកដមែន។ ទើបជាហេតុនាំឲ្យពិភពលោក ចងចាំលោកយាយ Baba Vanga ថាជាហោរាសាស្រ្តដ៏មានឥទ្ធិពលមួយរូប និងរងចាំមើលហេតុការណ៍ទាំងល្អនិងអាក្រក់ដែលលោកយាយបានទស្សន៍ទាយទុក បន្តពីមួយជំនាន់ទៅមួយជំនាន់។

ព្រឹត្តិការណ៍ធំៗរបស់ពិភពលោកកាលពីពេលកន្លងទៅ ដែលលោកយាយបានទាយទុក ហើយក៏បានក្លាយជាការពិត ឈុតដូចជាពាក្យទំនាយមានដូចជា៖ ការដួលរលំរបស់សហភាពសូវៀតក្នុងឆ្នាំ១៩៩១, ការបរាជ័យនៃសេដ្ឋកិច្ចនៅអ៊ឺរ៉ុប, ភេរវកម្មអ៊ីស្លាម, ការយាងចូលទិវង្គត់របស់ម្ចាស់ក្សត្រី Diana, និងសង្គ្រាមនៅអ៊ុយក្រែនជាដើម។

យោងតាមប្រភពសារព័ត៌មានអន្តរជាតិ 7News និង NDTV News ក៏បានចុះផ្សាយអំពី ពាក្យទំនាយរបស់លោកយាយ Baba Vanga ភ្នែកទ័ព្វ សម្រាប់ឆ្នាំ២០២៤នេះផ្ទាល់តែម្តង ថានឹងកើតមានព្រឹត្តិការណ៍ធំៗទាំងល្អនិងអាក្រក់នៅលើពិភពលោកចំនួន ៧ រឿងរួមមាន៖
១ របកគំហើញផ្នែកវេជ្ជសាស្រ្ត៖ លោកយាយព្យាករណ៍ថា នៅឆ្នាំនេះរបកគំហើញដ៏វិសេសវិសាលនៃផ្នែកវេជ្ជសាស្រ្ត ក្នុងការព្យាបាលជំងឺដ៏កាចសាហាវមួយចំនួន ជាពិសេសគឺជំងឺមហារីក ជំងឺភ្លេចភ្លាំងជាដើម ត្រូវបានគេរកឃើញនិងជាការអស់បារម្ភសម្រាប់មនុស្សជាតិ។

២ ការរីកចម្រើននៃបច្ចេកវិទ្យា៖ បច្ចេកវិទ្យានឹងមានការវិវត្តន៍ឈានឡើងជាលំដាប់ រួមទាំងរបកគំហើញដ៏ធំនៃការគណនា Quantum ដែលគេហៅថា «កង់ទិច» នឹងអង្រួននៅក្នុងវិស័យឧស្សាហកម្ម ដោយសង្កត់ធ្ងន់លើប្រព័ន្ធអ៊ីនធើណែត និងផ្នែកហិរញ្ញវត្ថុ។

ទោះជាយ៉ាងណា ក៏នៅមានព្រឹត្តិការណ៍តក់ស្លុតមួយចំនួនដែលលោកយាយបានទាយទុកសម្រាប់ឆ្នាំ២០២៤នេះមានដូចជា៖

៣ ឧក្រិដ្ឋកម្មបច្ចេកវិទ្យា៖ ស្របពេលដែលមានការវិវត្តិនៃបច្ចេកវិទ្យា លោកយាយក៏បានទាយថា ការឆបោកតាមរយៈប្រព័ន្ធអ៊ីនធើណែតនឹងមានការកើនឡើងខ្លាំង ទាំងពួក Hacker បណ្តាញកុំព្យូទ័រ ចោះចូលគ្រប់គ្រងទិន្នន័យ និងគណនីធនាគារផ្សេងៗ ដែលនឹងគំរាមកំហែងដល់សន្តិសុខពិភពលោកកាន់តែធ្ងន់ធ្ងរសម្រាប់ឆ្នាំ២០២៤នេះ។

៤ វិបត្តិសេដ្ឋកិច្ច៖ លោកយាយ Baba Vanga បានលើកឡើងថា មនុស្សជាតិនៅទូទាំងពិភពលោកបានប្រឈមមុខនឹងវិបត្តិហិរញ្ញវត្ថុក្នុងឆ្នាំ២០២៣ ហើយវាគឺកាន់តែបន្តធ្ងន់ធ្ងរឡើងនៅឆ្នាំ២០២៤ ស្របពេលដែលវិបត្តិសេដ្ឋកិច្ចសកលលោកកាន់តែអាក្រក់ទៅៗ។ ជាមួយគ្នានេះក៏នៅមានភាពតានតឹងខ្លាំងផ្នែកភូមិសាស្រ្តនយោបាយ និងការផ្លាស់ប្តូរអំណាចពីលោកខាងលិចទៅលោកខាងកើត តួយ៉ាងការប្រជែងអំណាចគ្នារវាងមហាអំណាចសេដ្ឋកិច្ចពិភពលោកអាមេរិកនិងចិនបច្ចុប្បន្នកំពុងតែឡើងកម្តៅខ្លាំង។

៥ គ្រោះធម្មជាតិកាន់តែអាក្រក់ទៅៗ៖ ពិភពលោកកំពុងតែផ្លាស់ប្តូរ ភាពចលាចល និងគ្រោះមហន្តរាយបរិស្ថានបន្តកើនឡើង។ លោកយាយបានព្យាករណ៍ថា គន្លងរបស់ផែនដីនឹងផ្លាស់ប្តូរតាមរបៀបដែលអាចផ្លាស់ទីវាទៅជិតព្រះអាទិត្យ ធ្វើឱ្យផ្ទាំងទឹកកករលាយ កម្រិតទឹកសមុទ្រកើនឡើង ឬសូម្បីតែកម្រិតវិទ្យុសកម្មកើនឡើង។

៦ ការវាយប្រហារភេរវកម្មកើនឡើង៖ លោកយាយព្យាករណ៍ថានឹងមានការកើនឡើងនៃការប្រើប្រាស់អាវុធបំផ្លិចបំផ្លាញដោយអះអាងថា “ប្រទេសមហាអំណាចណាមួយ” នឹងធ្វើការសាកល្បងអាវុធ និងការវាយប្រហារ បណ្តាលឲ្យមានកើនឡើងនៃអំពើភេរវកម្មនៅទ្វីបអឺរ៉ុប។

៧ ការប៉ុនប៉ងធ្វើឃាតមេដឹកនាំរុស្សី (លោកវ្លាដឺមៀល ពូទីន)៖ ស្របពេលដែលសង្រ្គាមរវាងរុស្សីនិងអ៊ុយក្រែននៅតែបន្តក្តៅគគុក បើតាមពាក្យទំនាយរបស់លោកយាយថា មេដឹកនាំរុស្សីរូបនេះនឹងមានអ្នកលួចធ្វើឃាត ហើយអ្នកដែលធ្វើឃាតគឺជាបុរសជនជាតិរុស្សីផ្ទាល់តែម្តង៕