កន្លងមក មាន YouTuber ថៃមួយចំនួនបានមកថតរូបភាព ឬវីដេអូនៅប្រទេសកម្ពុជា ដើម្បីបង្ហោះក្នុងបណ្តាញសង្គមរបស់ពួកគេ ហើយរូបភាព ឬវីដេអូទាំងនេះភាគច្រើនពុំបាននិយាយពីចំណុចល្អនៅកម្ពុជាឡើយ ដោយសារពួកគេថតយកតែមួយជ្រុងតូចទៅបង្ហោះ ឬនិយាយប្រាប់ពិភពលោក ឱ្យមើលមកកម្ពុជាក្នុងផ្លូវមិនល្អ ។ ប៉ុន្តែពេលពលរដ្ឋខ្មែរយើងទៅលេងប្រទេសថៃម្តងៗ យើងតែងតែសរសើរ និងថតរូបភាពស្អាតៗពីស្រុកគេមកបង្ហោះក្នុងបណ្តាញសង្គម ។

ជនជាតិថៃ និង YouTuber ថៃខ្លះបានមកដល់ទឹកដីកម្ពុជា ប៉ុន្តែពួកគេចូលចិត្តចាប់កំហុសរឿងតូចតាច ដូចជា ៖ ការហាលសម្លៀកបំពាក់របស់ពលរដ្ឋខ្មែរ និងការបោះចោលសំរាម និងភ្លេចគិតថា ប្រទេសថៃខ្លួនឯង ក៏មានការចោលសំរាមផ្តេសផ្តាសជាច្រើនកន្លែង ។ ជាក់ស្តែង មាន YouTuber ថៃម្នាក់ឈ្មោះ «BACKPAEGER แบกเป้เกอร์» បានមកខេត្តសៀមរាប ប្រទេសកម្ពុជា នៅខែមេសា ឆ្នាំ២០២៤ ប៉ុន្តែបែរជានិយាយរិះគន់ពីសង្ក្រាន្តនៅខេត្តសៀមរាប និងប្រៀបធៀបសង្ក្រាន្តកម្ពុជា និងសង្ក្រាន្តថៃ និងធ្វើឱ្យអ្នកលេងបណ្តាញសង្គមថៃរិះគន់តាមដែរ ។

ទោះយ៉ាងណា មាន YouTuber ថៃ ដែលមាន Page ឈ្មោះ «TripTH ทริปไทยแลนด์» បានធ្វើដំណើរទៅតាមបណ្តាខេត្ត-ក្រុងជាច្រើនរបស់កម្ពុជា និងថតវីដេអូផ្សព្វផ្សាយអំពីតំបន់ទេសចរណ៍ និងម្ហូបអាហារខ្មែរទៅកាន់ពិភពលោក ហើយធ្វើឱ្យអ្នកលេងបណ្តាញសង្គមខ្មែរកោតសរសើរ និងអរគុណ YouTuber ថៃទាំង២នាក់នេះ ។

ក្នុងវីដេអូនីមួយៗរបស់ YouTuber ថៃ ដែលមាន Page ឈ្មោះ «TripTH ทริปไทยแลนด์» តែងតែបង្ហាញពីសកម្មភាពលក់ម្ហូបអាហារ, ផ្លែឈើ និងនំចំណីខ្មែរជាច្រើនមុខ ព្រមទាំងការសាកសួរទៅកាន់អាជីវករខ្មែរប្រកបដោយទឹកមុខរីករាយផងដែរ ។ ក្នុងចំណោមវីដេអូទាំងនេះ YouTuber ថៃទាំង២នាក់បានធ្វើដំណើរទៅកាន់ខេត្តក្រចេះ ប្រទេសកម្ពុជា និងនិយាយពាក្យខ្មែរខ្លះៗ ដូចជា ៖ ជម្រាបសួរ, អរគុណ, ប៉ុន្មាន និងឆ្ងាញ់ ទៅកាន់អាជីវករលក់បន្លែម្នាក់ ហើយពួកគេនិយាយថា ពលរដ្ឋខ្មែរគួរឱ្យស្រឡាញ់ទៀតផង ។

អ្នកលេងបណ្តាញសង្គមខ្មែរម្នាក់បានបញ្ចេញមតិទៅកាន់ YouTuber ថៃខាងលើ ដែលមាន Page ឈ្មោះ «TripTH ทริปไทยแลนด์» ថា ៖ «កម្ពុជាសូមស្វាគមន៍ អរគុណ ដែលធ្វើជាមិត្តជាមួយយើង អរគុណ សម្រាប់ការបង្ហាញនូវអ្វីដែលជាការពិតនៃប្រទេសកម្ពុជាយើងខ្ញុំ ។ ពួកយើងតែងតែចង់បង្កើតមិត្ត មិនថាជាតិសាសន៍ណាក៏ដោយ សូមស្វាគមន៍មកកាន់មាតុភូមិខ្មែរដោយក្តីរីករាយ» ។

អ្នកលេងបណ្តាញសង្គមខ្មែរម្នាក់ទៀតនិយាយថា ៖ «អរគុណ សម្រាប់ការមកកាន់ទឹកដីកម្ពុជា និងការជួយផ្សព្វផ្សាយពីប្រទេសខ្ញុំដ៏សែនល្អ» ។ រីឯអ្នកលេងបណ្តាញសង្គមខ្មែរខ្លះទៀតនិយាយថា គេលើកឡើងពីចំណុចល្អៗនៅប្រទេសរបស់យើង ។ ហេតុនេះ យើងគួរតែនាំគ្នាសរសើរអ្នកធ្វើល្អ ដោយសារការបង្ហោះវីដេអូរបស់គេមិនបង្កជម្លោះ ឬរើសអើងជាតិសាសន៍ ៕

យោងតាមរបាយការណ៍របស់សាកលវិទ្យាល័យ Stanford បង្ហាញថា បើទោះជាបច្ចុប្បន្ន បច្ចេកវិទ្យា AI កាន់តែរីកចម្រើនខ្លាំង និងឆ្លាតជាងមុនក្តី ប៉ុន្តែពុំអាចប្រៀបធៀបជាមួយមនុស្សបានទេ ។ ទោះយ៉ាងណា របាយការណ៍នេះបញ្ជាក់ថា ចាប់ពី៣ឆ្នាំ ទៅ៥ឆ្នាំទៀត បច្ចេកវិទ្យា AI នឹងអាចដណ្តើមការងាររបស់មនុស្ស ។

Human-Centered Artificial Intelligence (HAI) គឺជាភ្នាក់ងារស្រាវជ្រាវពីបច្ចេកវិទ្យា AI របស់សាកលវិទ្យាល័យ Stanford បានបង្ហាញរបាយការណ៍សន្ទស្សន៍ AI ប្រចាំឆ្នាំ២០២៤ ដូចខាងក្រោមនេះ ៖

១-AI មានសមត្ថភាពលើសមនុស្ស ប៉ុន្តែមិនមែនគ្រប់យ៉ាង ៖
ការសាកល្បងលើប្រធានបទចំនួន៩ របស់ភ្នាក់ងារស្រាវជ្រាវពីបច្ចេកវិទ្យា AI បង្ហាញថា AI មានសមត្ថភាពលើសមនុស្សជាច្រើនផ្នែក ហើយ AI មានសមត្ថភាពលើសមនុស្សយូរមកហើយសម្រាប់ផ្នែកមួយចំនួន ដូចជា ៖ ការចាត់ថ្នាក់រូបភាព, ការអានអត្ថបទ, ការផ្តល់ហេតុផលពីរូបភាព និងការបកស្រាយអត្ថបទភាសាអង់គ្លេស ជាដើម ។

ទោះយ៉ាងណា នៅមានការងារជាច្រើនទៀតដែលបច្ចេកវិទ្យា AI ធ្វើអន់ជាងមនុស្ស ជាពិសេស ការងារដែលមានលក្ខណៈស្មុគស្មាញ ដូចជា ៖ ការផ្តល់ហេតុផលផ្អែកលើការវិនិច្ឆ័យ ឬការដោះស្រាយលំហាត់គណិតវិទ្យាក្នុងអំឡុងពេលប្រកួត ។

២-ការស្រាវជ្រាវ AI បានកើនឡើងយ៉ាងឆាប់រហ័ស ៖
គេសង្កេតឃើញថា ការស្រាវជ្រាវពីបច្ចេកវិទ្យា AI បានកើនឡើងយ៉ាងឆាប់រហ័សក្នុងរយៈពេលប៉ុន្មានឆ្នាំចុងក្រោយនេះ ។ នៅឆ្នាំ២០២០ មានប្រធានបទស្រាវជ្រាវប្រមាណ៨ម៉ឺន៨ពាន់ប្រធានបទ ហើយនៅឆ្នាំ២០២២ មានប្រធានបទស្រាវជ្រាវរហូតដល់២៤ម៉ឺនប្រធានបទ ។

៣-បច្ចេកវិទ្យា AI អាចដណ្តើមការងារមនុស្ស ប៉ុន្តែភាគច្រើនជាការងារផ្នែកវិទ្យាសាស្ត្រ ៖
បើតាមលទ្ធផលស្ទង់មតិរបស់ Ipsos ទៅកាន់ពលរដ្ឋលើពិភពលោក អំពីប្រធានបទ «តើបច្ចេកវិទ្យា AI នឹងផ្តល់ផលប៉ះពាល់ដូចម្តេចខ្លះ?» បង្ហាញថា អ្នកឆ្លើយតបការស្ទង់មតិ ៦៦% ប្រាប់ថា AI នឹងប៉ះពាល់ដល់ជីវិតពួកគេ គិតចាប់ពី៣ឆ្នាំ ទៅ៥ឆ្នាំទៀត ។ រីឯអ្នកឆ្លើយតប ៥២% ទៀតប្រាប់ថា ពួកគេបារម្ភពីសមត្ថភាពរបស់ AI អាចធ្វើឱ្យប៉ះពាល់ដល់ផ្នែកផ្សេងៗ ។

បើទោះជាមនុស្សលើពិភពលោក ព្រួយបារម្ភអំពីបច្ចេកវិទ្យា AI ក្តី ប៉ុន្តែការស្រាវជ្រាវពីវិទ្យាសាស្ត្រកម្រិតខ្ពស់បានទទួលប្រយោជន៍យ៉ាងច្រើនពី AI កាលពីឆ្នាំ២០២៣ ។ លើសពីនេះ មានការសិក្សាស្រាវជ្រាវជាច្រើនទៀត ដែលបានប្រើប្រាស់បច្ចេកវិទ្យា AI ដើម្បីទទួលបានលទ្ធផលកាន់តែឆាប់រហ័ស ដូចជា ៖

-AlphaDev អាចរកដំណោះស្រាយបញ្ហាលើសពីសមត្ថភាពមនុស្ស
-FlexiCubes ជាការបង្កើតរូបភាព 3D
-GraphCast ជាកម្មវិធីព្យាករអាកាសធាតុ និង
-GNoME ជួយស្វែងរកវត្ថុថ្មីៗ ។

ក្រៅពីនេះ នៅមានការសិក្សាស្រាវជ្រាវជាច្រើនទៀត ក៏បានប្រើប្រាស់បច្ចេកវិទ្យា AI ផងដែរ ដើម្បីពន្លឿនការប្រមូលលទ្ធផលស្រាវជ្រាវឱ្យកាន់តែឆាប់រហ័សជាងមុន ៕

ព្យុះបោកបក់យ៉ាងខ្លាំងនិងទឹកជំនន់ជន់លេចនៅឯទីក្រុងកំពូលអភិជនឌូបៃកាលពីពេលថ្មីៗនេះ បានបង្កឲ្យមានការលើកឡើងជាសំនួរថា តើហេតុការណ៍ដ៏គ្រោះ.ថ្នាក់នេះ វាពិតជាបានជាប់ទាក់ទងនឹងការបណ្តុះពពក បង្កើតភ្លៀងសិប្បនិម្មិតរបស់ប្រទេសនេះមែនដែរឬទេ? ទោះជាយ៉ាងណា អ្នកឧតុនិយមនិងអ្នកជំនាញអាកាសធាតុមួយចំនួនគឺបានច្រានចោលទាំងស្រុងជុំវិញករណីនេះដោយលើកឡើងថា ព្រោះតែការប្រែប្រួលអាកាសធាតុ និងការឡើងកម្តៅផែនដី ទើបបណ្តាលឲ្យមានភ្លៀងធ្លាក់ខ្លាំងនិងជន់លេចបែបនេះ។

ភ្លៀងធ្លាក់ខ្លាំងនៅចន្លោះយប់ថ្ងៃចន្ទដល់ល្ងាចថ្ងៃអង្គារ នៅឯទីក្រុងឌូបៃ ក្នុងកម្រិតទឹកភ្លៀង២៥៥ មីលីម៉ែត្រ រយៈពេលតិចជាង ២៤ ម៉ោង បានធ្វើឲ្យទឹកជំនន់ជន់លិចទីក្រុងឌូបៃទាំងមូល។ ខណៈភ្លៀងលើកនេះទៀតសោត គឺជាយន្តការភ្លៀងសិប្បនិម្មិត ព្រោះថាប្រទេសអារ៉ាប់រួមតែងមានការបណ្ដុះពពកជាទៀងទាត់ដើម្បីបង្កើនកម្រិតនៃការថយចុះទឹកក្រោមដី បង្កឲ្យមានភ្លៀងធ្លាក់ ដោយសារប្រទេសនេះតែងមានអាកាសធាតុក្តៅនិងស្ងួតខ្លាំង ហើយក៏កម្រមានភ្លៀងដោយឯកឯងណាស់។ ទោះជាយ៉ាងណា ភ្លៀងលើកនេះគឺបានធ្វើឲ្យទីក្រុងឌូបៃប្រឈមុខនឹងផលប៉ះពាល់ជាអតិបរមា បើធៀបទៅនឹងប្រទេសជិតខាងផ្សេងទៀត។

យោងតាមសម្តីរបស់សាស្រា្តចារ្យម្នាក់ដែលជាប់ពាក់ព័ន្ធគម្រោងបណ្តុះពពកនៅទីក្រុងឌូបៃក៏លើកឡើងថា ការបណ្តុះពពកបង្កឲ្យមានភ្លៀងលើកនេះគឺវាមិនបានជាប់ពាក់ព័ន្ធនឹងទឹកជំនន់ជន់លិចទូទាំងប្រទេសនោះទេ។ គាត់បន្ថែមថា “ការបណ្ដុះត្រូវបានសាកល្បងនៃការវិវត្តិព្យុះដំណាក់កាលដំបូងប៉ុណ្ណោះ និងមិនសមជាខ្លាំងក្លាដល់ថ្នាក់នេះនោះទេ។

ម៉្យាងវិញទៀត ប្រព័ន្ធដំណើរការនៃការអនុវត្តគម្រោងបណ្តុះពពកនេះគឺយើងធ្វើឡើងនៅឈូងសមុទ្រអូម៉ង់ នៅទីនោះវាជាព្យុះដែលមានកម្លាំងខ្លាំងរួចទៅហើយ។ វាទំនងជាមិនសូវមានសុវត្ថិភាពទេក្នុងការបណ្ដុះប្រព័ន្ធបែបនេះ។ ព្រោះថាការដែលយើងបណ្ដុះពពកលើកនេះអាចរួមចំណែកដល់ការបង្កើនបរិមាណទឹកភ្លៀងត្រឹមតែ ២៥% ប៉ុណ្ណោះ ហើយគ្រាប់ពពកដែលប្រមូលផ្តុំក៏មិនអាចបង្កឱ្យមានភ្លៀងធ្លាក់ខ្លាំង និងទឹកជំនន់បែបនេះទេ។

សាស្រា្តចារ្យរូបនេះបានបន្តទៀតថា “ហេតុការណ៍នេះ គឺជាសញ្ញាដ៏ពិតប្រាកដនៃការប្រែប្រួលអាកាសធាតុ។ វាជាព្យុះផ្គររន្ទះដ៏ធំដែលបង្កឡើងដោយប្រព័ន្ធ synoptic ដែលកំពុងធ្វើដំណើរឆ្លងកាត់តំបន់ឈូងសមុទ្រ ព្រោះតែការឡើងកំដៅផែនដី ដែលទំនោរទៅរកភ្លៀងធ្លាក់ខ្លាំង។ ម៉្យាងវិញទៀត ការឡើងកម្តៅអាចធ្វើឱ្យពពកបរិយាកាសរក្សាសំណើមបន្ថែមទៀត និងកាន់តែធំឡើង ដែលនាំទៅដល់ការបង្កើនអាំងតង់ស៊ីតេនៃប្រព័ន្ធទឹកភ្លៀងផងដែរ៕

បរទេស៖ នៅក្នុងដំណើរទស្សនកិច្ចទៅកាន់កម្មករដែកថែបនៅរដ្ឋ Pennsylvania កាលពីថ្ងៃទី ១៧ ខែមេសា ឆ្នាំ២០២៤ លោក Joe Biden បាននិយាយថា លោកចង់ដំឡើងពន្ធនាំចូលលើអាលុយមីញ៉ូម និងដែកថែបរបស់ចិន ជាពិសេសអត្រាពន្ធថ្មីដែលបានស្នើឡើងគឺ ២២.៥% កើនឡើងបីដងធៀបនឹងអត្រាបច្ចុប្បន្ន ៧.៥%។
យោងតាមសេតវិមាន គោលនយោបាយដំឡើងពន្ធលើអាលុយមីញ៉ូម និងដែកថែបរបស់ចិន គឺជាវិធានការមួយដើម្បីការពារឧស្សាហកម្មផលិតក្នុងស្រុក។ ពួកគេនិយាយថានេះជាមធ្យោបាយមួយដើម្បីប្រយុទ្ធប្រឆាំងនឹង “ការអនុវត្តពាណិជ្ជកម្មមិនយុត្តិធម៌”។ លោក Lael Brainard ទីប្រឹក្សាសេដ្ឋកិច្ចនៅសេតវិមាន បាននិយាយថា ប្រធានាធិបតីអាមេរិកបានផ្តោតលើការវិនិយោគ និងការការពារផលិតកម្មក្នុងស្រុក និងកម្មករពីការអនុវត្តការនាំចេញមិនយុត្តិធម៌របស់ប្រទេសចិន។

លោក Lael Brainard បានបន្តទៀតថា ប្រទេសចិនស្ថិតនៅក្នុងស្ថានភាពដែលមានការផ្គត់ផ្គង់ច្រើនជាងតម្រូវការ។ បច្ចុប្បន្ននេះសាររបស់ប្រធានាធិបតី Joe Biden ត្រូវបានគាំទ្រដោយក្រុមហ៊ុនផលិតដែក និងដែកក្នុងស្រុក។ ទោះជាយ៉ាងណាក៏ដោយគោលនយោបាយនេះអាចនាំឱ្យមានហានិភ័យដល់សេដ្ឋកិច្ច ដោយសារការដំឡើងពន្ធនាំចូលមានន័យថាដែកថែប និងអាលុយមីញ៉ូមមានតម្លៃថ្លៃជាង ដែលនាំឱ្យការចំណាយកើនឡើង ប៉ះពាល់ដល់ប្រជាជនអាមេរិក និងការកើនឡើងអតិផរណា។ ទន្ទឹមនឹងនេះ លោក Jared Bernstein ដែលជាប្រធានក្រុមប្រឹក្សាសេតវិមាននៃទីប្រឹក្សាសេដ្ឋកិច្ចបាននិយាយថា ការបង្កើនពន្ធលើលោហៈដែលនាំចូលពីប្រទេសចិនគឺជាការចាំបាច់ ហើយនឹងមិនប៉ះពាល់ដល់អតិផរណាឡើយ។

លោក Jared Bernstein បានបញ្ជាក់ថា៖ «ប្រសិនបើយើងមិនធ្វើសកម្មភាពឥឡូវនេះ សហរដ្ឋអាមេរិកអាចប្រឈមនឹងហានិភ័យចំពោះតំបន់សំខាន់ៗនៃសេដ្ឋកិច្ច។ ដូច្នេះគិតត្រឹមខែកុម្ភៈ ឆ្នាំ ២០២៣ ការនាំចូលដែកថែបសរុបរបស់សហរដ្ឋអាមេរិកក្នុងរយៈពេល ១២ ខែមានចំនួន ៦.១ ពាន់លានដុល្លារអាមេរិក ដោយ ៣% មកពីប្រទេសចិន។ ទោះជាយ៉ាងណាបច្ចុប្បន្ននេះ អាមេរិកកត់ត្រាដែកថែបរបស់ចិនដែលនាំចូលមកក្នុងប្រទេសត្រឹមពាក់កណ្តាលកម្រិតដែកក្នុងស្រុកប៉ុណ្ណោះ។

នេះបើយោងតាមវិទ្យាស្ថានជាតិដែក និងដែកអាមេរិកបានប្រកាសថា ដែកថែបរបស់ចិនមានចំនួន ២.១% នៃដែកថែបដែលនាំចូលមកសហរដ្ឋអាមេរិក ដោយជាប់ចំណាត់ថ្នាក់ទី ៧ ក្នុងបញ្ជីនាំចូល។ សេតវិមានបានបញ្ជាក់ថា មុនពេលស្នើសុំដំឡើងពន្ធអាលុយមីញ៉ូម និងដែកថែបរបស់ចិនបីដងធៀបនឹងកម្រិតបច្ចុប្បន្ន សហរដ្ឋអាមេរិកបានធ្វើការជាមួយម៉ិកស៊ិកដើម្បីជៀសវាងស្ថានភាពដែលក្រុមហ៊ុនដែកថែបនៅក្នុងប្រទេសចិនឆ្លងកាត់ម៉ិកស៊ិកដើម្បីជៀសវាងពន្ធនាំចូលទៅកាន់សហរដ្ឋអាមេរិក៕

ក្នុងចំណោមទីក្រុងទេសចរណ៍ដ៏ល្អបំផុតទាំង ១០ នៅទូទាំងពិភពលោកមានទីក្រុងចំនួន ៣ ប៉ុណ្ណោះដែលឈ្នះពានរង្វាន់ Traveler Review Awards ប្រចាំឆ្នាំ ២០២៤ របស់ Booking.com ជាមួយនឹងការពិនិត្យពីអ្នកធ្វើដំណើរពិតប្រាកដជាង ៣០៩ លាននាក់នៅទូទាំងពិភពលោកនៅលើវេទិកានេះ ដោយបញ្ជាក់ថាគោលដៅទាំងនេះគឺជាគោលដៅដ៏ល្អបំផុតរបស់ពិភពលោកសម្រាប់ឆ្នាំ ២០២៤ ដែលអ្នកទេសចរមិនគួររំលង។ ដូច្នេះទីក្រុងទេសចរណ៍ដ៏ល្អបំផុតដែលត្រូវបានណែនាំដោយ Booking.com រួមមាន៖

១.ទីក្រុង Daylesford ប្រទេសអូស្ត្រាលី៖ សម្រាប់អ្នកដែលកំពុងស្វែងរកកន្លែងលំហែកាយ និងគេចពីភាពអ៊ូអរ ក៏ដូចជាថែរក្សាសុខភាពផ្លូវកាយ និងផ្លូវចិត្ត យើងសូមណែនាំទីក្រុងធម្មជាតិនេះដែលល្បីខាងស្ប៉ានិងមានបរិយាកាសស្ងប់ស្ងាត់បំផុត។ អ្នកទេសចរណ៍អាចធ្វើដំណើរទៅកម្សាន្តទាំងផ្លូវកាយនិងចិត្តពីភាពនឿយហត់ ដោយស្វែងយល់ពីភាពរីករាយ និងភាពសាមញ្ញនៃជីវិតដោយជួលតាក់ស៊ីពីព្រលានយន្តហោះ Melbourne តាមរយៈ Booking.com ទៅ Daylesford ក្នុងរយៈពេល ៩០ នាទី។

អ្នកក៏អាចទស្សនាបាននូវកន្លែងទេសចរណ៍ធម្មជាតិជាច្រើនដូចជាសួនរុក្ខសាស្ត្រ Wombat Hill និង Trentham Falls រីករាយជាមួយសកម្មភាពនានា រួមទាំងការប្រទះឃើញសត្វព្រៃផងដែរ។ លើសពីនេះអ្នកទស្សនាក៏អាចស្នាក់នៅ Lake Orchard Villas ដែលជាវីឡាទំនើបរបស់ទីក្រុង ដោយអ្នកដំណើរនឹងរីករាយជាមួយភាពស្ងប់ស្ងាត់ពេញមួយការស្នាក់នៅក្នុងបរិយាកាសសុវត្ថិភាពនេះ។ វីឡានីមួយៗមានកន្លែងក្រៅផ្ទាល់ខ្លួន និងបន្ទប់ទឹកដ៏ប្រណិត ជាមួយនឹងការងូតទឹកស្ប៉ាសម្រាប់មនុស្ស ២ នាក់ ភ្ញៀវអាចសម្រាកដោយការត្រាំអំបិលស្ប៉ាដែលបានផ្តល់ជូន ហើយភ្ញៀវក៏អាចដើរលេងដើម្បីស្វែងយល់ពីហាងកាហ្វេក្នុងស្រុក ឬហាងនានាជុំវិញអចលនទ្រព្យផងដែរ ឬត្រាំក្នុងទឹករ៉ែនៅ Hepburn Springs ក្បែរនោះ។

២.ទីក្រុង Grindelwald ប្រទេសស្វីស៖ Grindelwald គឺជាទីក្រុងដ៏មានមន្តស្នេហ៍មួយស្ថិតនៅលើភ្នំ Bernese Alps នៃប្រទេសស្វីស។ វាជាគោលដៅដ៏អស្ចារ្យសម្រាប់អ្នកផ្សងព្រេង និងអ្នកស្រឡាញ់ធម្មជាតិ ព្រោះភូមិសាស្ត្រនេះមានភ្នំខ្ពស់ៗ ហ៊ុព័ទ្ធដោយវាលស្មៅខៀវខ្ចី និងទឹកបៃតងថ្លានៅលើកំពូលភ្នំ។ ភូមិនេះត្រូវបានគេស្គាល់ថា ‘ច្រកផ្លូវទៅកាន់តំបន់ Jungfrau’ ដែលជាកំពូលភ្នំខ្ពស់បំផុតនៅអឺរ៉ុប។ កន្លែងនេះមានបរិយាកាសស្ងប់ស្ងាត់គឺជាការទាក់ទាញដ៏អស្ចារ្យសម្រាប់អ្នកធ្វើដំណើរដែលចូលចិត្តជិះស្គីក្នុងរដូវរងា និងអ្នកដែលចង់រីករាយជាមួយខ្យល់អាកាសបរិសុទ្ធនៅរដូវក្តៅ។

៣.ទីក្រុង Fujikawaguchiko ប្រទេសជប៉ុន៖ ទីក្រុង Fujikawaguchiko ដែលស្ថិតក្នុងខេត្ត Yamanashi ប្រទេសជប៉ុន គឺជាឋានសួគ៌សម្រាប់អ្នកធ្វើដំណើរដែលចូលចិត្តការថតរូប ជាមួយនឹងធម្មជាតិផ្តល់នូវទិដ្ឋភាពដ៏អស្ចារ្យនៃភ្នំ Fuji និងបឹង Kawaguchi ដែលផ្លាស់ប្តូរទៅតាមរដូវកាល វាអាចរីករាយពេញមួយឆ្នាំ។ លើសពីនេះ អ្នកធ្វើដំណើរអាចរីករាយនឹងបរិយាកាសស្ងប់ស្ងាត់នៃបឹង និងសកម្មភាពផ្សងព្រេងនៅក្នុងឧទ្យានជាតិ Fuji-Hakone-Izu ផងដែរ។

ទីក្រុងនេះក៏មានសកម្មភាពជាច្រើនទៀតដែលអ្នកធ្វើដំណើរអាចចូលរួមបានដូចជាការឡើងភ្នំ ជិះកង់ ជិះទូកលេង និងការនេសាទត្រីផងដែរ ។ លើសពីនេះអ្នកទេសចរណ៍អាចចូលមើលជាសារមន្ទីរវប្បធម៌ជាតិ ឧទ្យាន និងប្រាសាទ បន្ថែមពីលើការទាក់ទាញដ៏អស្ចារ្យរបស់ខ្លួន ទីក្រុង Fujikawaguchiko ក៏បានរៀបចំពិធីបុណ្យប្រចាំឆ្នាំដែលមិនគួររំលងផងដែរនោះគឺពិធីបុណ្យ Lake Kawaguchiko ពិធីបុណ្យកាំជ្រួច និងពិធីបុណ្យស្លឹកឈើជ្រុះ ដោយវាផ្តល់ឱ្យអ្នកធ្វើដំណើរនូវបទពិសោធន៍ទេសចរណ៍ធម្មជាតិដ៏អស្ចារ្យពេញមួយឆ្នាំ៕

ជំងឺភឿក ដែលជាភាសាអង់គ្លេស គេឲ្យឈ្មោះថា Albinism គឺជាជំងឺតំណរពូជមួយប្រភេទ ជាទូទៅជំងឺនេះកើតឡើងដោយសារតែរាងកាយអសមត្ថភាពផលិតជាតិ Melanin។ Melanin គឺជាសារធាតុដែលនឹងផ្តល់ពណ៌ទៅលើស្បែក សក់ និងភ្នែក។ ការដែលកង្វះសារធាតុនេះហើយ ទើបបណ្តាលឲ្យអ្នកដែលកើតភឿកគ្មានពណ៌អ្វីសោះនៅលើផងខ្លួន ក្រៅតែពីពណ៌សរក្បុស សូម្បីតែសក់ក៏ដោយ។

ជំងឺភឿកគឺជំងឺហ្សែនដែលឆ្លងពីឪពុកម្តាយទៅកូន និងអាចកើតលើគ្រប់ជាតិសាសន៍ទាំងអស់។ ជាពិសេសគឺវាឆ្លងពីម្តាយទៅកូន នៅពេលកំពុងតែពរពោះ។ ទោះជាយ៉ាងណា សម្រាប់ឪពុកម្តាយដែលមិនមែនជាអ្នកជំងឺភឿក ក៏កូនអាចនឹងមានឱកាសកើតជម្ងឺនេះបានដូចគ្នាដែរ ព្រោះថាហ្សែនអ្នកទាំង២ បាននឹងកំពុងស្ថិតនៅក្នុងលក្ខខណ្ឌកំណត់ពិសេសណាមួយ។

រោគសញ្ញានៃអ្នកជម្ងឺភឿក គឺពាក់ព័ន្ធជាពិសេសនឹងស្បែក សក់ និងពណ៌ភ្នែក ក៏ដូចជាការមើលឃើញមិនសូវជាល្អប៉ុន្មានទេ។ ដោយសភាពស្បែក និងសក់របស់ពួកគេ គឺមានពណ៌ស្រាលខ្លាំងបំផុតគឺពណ៌សស្លេក និងសក់វិញអាចមានពណ៌សឬត្នោត។ ប៉ុន្តែសម្រាប់អ្នកជម្ងឺខ្លះទៀត អាចនឹងមានសម្បុរធម្មតាស្រដៀងទៅនឹងក្រុមគ្រួសារជាទូទៅផងដែរ។

ជាមួយគ្នានេះ អ្នកជំងឺភឿកអាចប្រឈមនឹងផលប៉ះពាល់ដោយពន្លឺព្រះអាទិត្យខ្លាំងបំផុត រហូតអាចបណ្តាលឲ្យមានស្នាមជាំឬរលាកស្បែកជាដើម ក៏ដូចជាអាចវិវត្តទៅជាជំងឺមហារីកស្បែកបានយ៉ាងឆាប់រហ័ស ប្រសិនបើមិនបានទទួលការថែទាំឲ្យបានត្រឹមត្រូវ។

ចំពោះភ្នែកវិញ អ្នកជំងឺភឿកភាគច្រើន គឺជាចំណុចរសើប ដែលជាទូទៅភ្នែករបស់ពួកគេតែងមានពណ៌ផ្កាឈូក ខៀវខ្ចី ប្រផេះ និងត្នោតខ្ចីជាដើម ស្របពេលដែលភ្នែកនឹងងាយរងផលប៉ះពាល់នឹងពន្លឺ និងរមែងប្រឈមនឹងបញ្ហាផ្សេងៗជាច្រើនប្រភេទទៀតទាក់ទងនឹងភ្នែក។ ដូច្នេះហើយ អ្នកជំងឺភឿកគឺត្រូវតែមានពិនិត្យតាមដាន ពិគ្រោះយោបល់ជាមួយគ្រូពេទ្រឲ្យបានទៀងទាត់ ពាក់ព័ន្ធជាពិសេសគឺជំងឺស្បែក និងភ្នែកនេះផងដែរ៕

ប្រទេសថៃ ៖ កន្លងមក ប្រទេសវៀតណាមបាននាំចេញទុរេនយ៉ាងច្រើនទៅប្រទេសចិន និងវ៉ាដាច់ទុរេនថៃ ខណៈថៃធ្លាប់គ្រប់គ្រងទីផ្សារទុរេនចិនអស់រយៈពេលជាច្រើនឆ្នាំមកហើយ ។ ហេតុនេះ កាលពីដើមខែមេសា ឆ្នាំ២០២៤ ប្រទេសថៃបានកំណត់គោលដៅបង្កើនការនាំចេញទុរេនទៅចិន និងស្វែងរកយុទ្ធសាស្ត្រថ្មីៗដើម្បីទទួលបានចំណាត់ថ្នាក់ទី១ ជាប្រទេសនាំចេញទុរេនច្រើនទៅចិន ។

ស្របពេលក្រុមហ៊ុននាំចេញទុរេនថៃ និងកសិករថៃព្រួយបារម្ភថា ប្រទេសវៀតណាមកំពុងដណ្តើមចំណែកទីផ្សារទុរេននៅចិន ហើយអតិថិជនចិនងាកមកចាប់អារម្មណ៍ទុរេនវៀតណាមខ្លាំងជាងទុរេនថៃ សាស្ត្រាចារ្យផ្នែកសេដ្ឋកិច្ចនៅសាកលវិទ្យាល័យជាតិក្វាងស៊ី និយាយថា ទុរេនថៃនៅតែលក់ដាច់ដដែល ហើយអតិថិជនចិននៅតែចាប់អារម្មណ៍ទិញទុរេនថៃ បើទោះជាវៀតណាមព្យាយាមដណ្តើមទីផ្សារក្តី ។

រយៈពេលជាច្រើនឆ្នាំមកនេះ ប្រទេសចិនបាននាំចូលផ្លែទុរេនពីថៃក្នុងបរិមាណយ៉ាងច្រើន ប៉ុន្តែប្រទេសវៀតណាមបានដណ្តើ.ម ចំណែកទីផ្សារទុរេនយ៉ាងឆាប់រហ័ស ។ ដូច្នេះ ទុរេនថៃ និងទុរេនវៀតណាមបានប្រជែងគ្នាទៅវិញទៅមក ហើយធ្វើឱ្យអតិថិជនចិនអាចជ្រើសរើសប្រភេទ និងតម្លៃទុរេនបន្ថែមទៀត ហើយពូជទុរេនខុសគ្នារបស់ប្រទេសទាំងពីរបានដោះស្រាយបញ្ហាខ្វះខាតទុរេននៅចិន ពេលផុតរដូវកាលទុរេន ។ នេះបើតាមការលើកឡើងរបស់សាស្ត្រាចារ្យផ្នែកសេដ្ឋកិច្ចនៅសាកលវិទ្យាល័យជាតិក្វាងស៊ី ឈ្មោះ ហ៊ូឆៅ ។

ការនាំចេញទុរេនថៃ និងទុរេនវៀតណាមមកកាន់ប្រទេសចិនក្នុងពេលវេលាខុសគ្នា វាធ្វើឱ្យអតិថិជនចិនអាចទិញទុរេនស្រស់ក្នុងរយៈពេលកាន់តែយូរ ។ អតិថិជនចិនចូលចិត្តបរិភោគទុរេនពូជខុសៗគ្នា និងអាចធ្វើឱ្យប្រទេសចិនខ្វះពូជទុរេនខ្លះលក់នៅលើទីផ្សាររយៈពេលខ្លី ។ ហេតុនេះ ទុរេនពូជផ្សេងទៀតនឹងចូលមកទីផ្សារជំនួសដើម្បីបំពេញតម្រូវការអតិថិជន ។ សាស្ត្រាចារ្យផ្នែកសេដ្ឋកិច្ចឈ្មោះ ហ៊ូឆៅ និយាយថា ទុរេនមានគុណភាពល្អ តម្លៃសមរម្យ និងមានរសជាតិឆ្ងាញ់ នៅតែទទួលបានការចាប់អារម្មណ៍ពីអតិថិជនចិនជានិច្ច ។

ការអភិវឌ្ឍយ៉ាងឆាប់រហ័សនៃការជួញដូរតាមអនឡាញ និងប្រព័ន្ធដឹកជញ្ជូនបានគាំទ្រដល់ការលក់ទុរេននៅប្រទេសចិនយ៉ាងខ្លាំង ។ អតិថិជនចិនអាចជ្រើសរើសទិញទុរេនមកពីក្រុមបណ្តាប្រទេសអាស៊ាន តាមរយៈអនឡាញយ៉ាងងាយស្រួល ។

អតិថិជនម្នាក់និយាយថា ៖ «ទុរេនថៃមានរសជាតិឆ្ងាញ់ និងមានក្លិនក្រអូបណាស់ ហើយជារៀងរាល់ឆ្នាំ គ្រួសារខ្ញុំបានទិញទុរេនម៉ន់ថងរបស់ថៃមកបរិភោគ ។ ពេលនេះ ក្រៅពីទុរេនថៃ គឺមានទុរេនវៀតណាមឱ្យជ្រើសរើសផងដែរ វាដូចជា Bonus សម្រាប់អ្នកចូលចិត្តទុរេន» ។

ពីង ឈៀងយៀន ជានាយកក្រុមហ៊ុនលក់ផលិតផលបរទេស និយាយថា ទុរេន គឺជាអំណោយដ៏ពិសេស ហើយអតិថិជនចិនចូលចិត្តបរិភោគទុរេនជានិច្ច ។ បច្ចុប្បន្ន ក្រុមហ៊ុនលក់ផលិតផលបរទេសបានទំនាក់ទំនង និងសហការជាមួយក្រុមហ៊ុនថៃ ដើម្បីជំរុញផលិតផលទុរេនមានគុណភាពមកកាន់ទីផ្សារចិនបន្ថែមទៀត តាមរយៈការអភិវឌ្ឍ និងជំរុញការផ្គត់ផ្គង់ជាបន្តបន្ទាប់ ។ ហេតុនេះ គេអាចរក្សាទុកទុរេនថៃឱ្យនៅស្រស់ក្នុងអំឡុងពេលដឹកជញ្ជូន, ធនាគារគុណភាព និងរសជាតិ ។

សារព័ត៌មានស៊ិនហួររាយការណ៍ថា បរិមាណការនាំចេញទុរេនថៃមកប្រទេសចិន កាលពីឆ្នាំ២០២៣ បានកើនឡើង៨១,៧% បើប្រៀបធៀបពីមួយឆ្នាំទៅមួយឆ្នាំ ហើយបច្ចុប្បន្ន ទុរេន៧០% ដែលប្រទេសចិនបាននាំចូល គឺជាទុរេនថៃ ។ រីឯការនិយមបរិភោគទុរេននៅចិនបានកើនឡើង ហើយតម្រូវការនៅលើទីផ្សារក្នុងឆ្នាំ២០២៤ នៅតែរឹងមាំដដែល ។

កន្លងមក ការធ្វើពាណិជ្ជកម្មរវាងចិន និងបណ្តាប្រទេសអាស៊ានបានកើនឡើងជាបន្តបន្ទាប់ ដោយបានដឹកជញ្ជូនផលិតផលតាមផ្លូវគោក និងផ្លូវសមុទ្រ ។ ចំណែកការនាំចេញទុរេនទៅលក់នៅប្រទេសចិនបានធ្វើឡើងតាមរយៈកិច្ចព្រមព្រៀងផ្នែកសេដ្ឋកិច្ចក្នុងតំបន់ ទើបធ្វើឱ្យការដឹកជញ្ជូនទុរេនមកចិនមានប្រសិទ្ធភាព, ងាយស្រួល និងកាន់តែឆាប់រហ័ស ៕

កូរ៉េខាងត្បូង៖ នៅថ្ងៃទី១៨ ខែមេសា ឆ្នាំ២០២៤ ការិយាល័យស្ថិតិជាតិកូរ៉េបានប្រកាសលទ្ធផលនៃការស្ទង់មតិលើប្រាក់ចំណូលរបស់ពលករបរទេសដែលកំពុងធ្វើការនៅប្រទេសកូរ៉េខាងត្បូង។
ក្នុងការស្ទង់មតិនោះលទ្ធផលបានបង្ហាញថា ៥០.៦% នៃពលករបរទេសដែលធ្វើការនៅប្រទេសកូរ៉េខាងត្បូង ទទួលបានប្រាក់ខែជាមធ្យមពី ២-៣ លានវ៉ុន (ប្រមាណ ១,៤៥០-២,២០០ ដុល្លារអាមេរិកក្នុងមួយខែ)។ រីឯ ៦២.៦% នៃពលករបរទេសគឺសុទ្ធតែពេញចិត្តនឹងការងាររបស់ពួកគេ ហើយអត្រានៃការចង់ផ្លាស់ប្តូរការងារគឺមានត្រឹមតែ ១២.៣% ប៉ុណ្ណោះ។

មូលហេតុទូទៅបំផុតដែលពលករបរទេសចង់ផ្លាស់ប្តូរការងារគឺដោយសារតែប្រាក់បៀវត្សរ៍ទាប (៣៩.២%) បន្ទាប់មកដោយសារតែការងារមានភាពលំបាក និងគ្រោះថ្នាក់ខ្លាំង (១៩.៤%)។ ជាពិសេសនៅឆ្នាំ ២០២៣ ជនបរទេសប្រហែល ១៣.៥% ដែលកំពុងស្នាក់នៅក្នុងប្រទេសកូរ៉េបានចែករំលែកថាពួកគេមានការលំបាកផ្នែកហិរញ្ញវត្ថុ ខណៈនិស្សិតអន្តរជាតិចំនួន ៨៨% ផ្សេងទៀតទទួលបានប្រាក់បៀវត្សរ៍ប្រចាំខែតិចជាង ១,៤៥០ ដុល្លារ។ បើយោងតាមទិន្នន័យដែលចេញផ្សាយដោយការិយាល័យស្ថិតិជាតិកូរ៉េនៅថ្ងៃទី ១៧ ខែមេសា ក៏បានឱ្យដឹងទៀតថា ជិត ៣០% នៃពលករបរទេសសុទ្ធតែធ្វើការលើសពី ៥០ ម៉ោងក្នុងមួយសប្តាហ៍កាលពីឆ្នាំ ២០២៣។

ដូច្នោះហើយគិតត្រឹមខែឧសភា ឆ្នាំ ២០២៣ ជនបរទេសសរុបចំនួន ១.៤៣ លាននាក់ដែលមានអាយុចាប់ពី ១៥ ឆ្នាំឡើងទៅសុទ្ធតែបានរស់នៅក្នុងប្រទេសកូរ៉េ ហើយ ៦៤.៥% នៃពួកគេគឺសុទ្ធតែមានការងារនៅទីនេះ។ ក្នុងចំណោមនោះ ៥៦.៥% នៃពលករបរទេសគឺធ្វើការពី ៤០ ទៅ ៥០ ម៉ោងក្នុងមួយសប្តាហ៍ ហើយ ២៨.៦% បាននិយាយថាម៉ោងធ្វើការប្រចាំសប្តាហ៍របស់ពួកគេមានរហូតដល់ ៥០ ម៉ោងឯណោះ និងប្រហែល ៣១.៨% នៃជនបរទេសទាំងអស់នៅក្នុងប្រទេសកូរ៉េគឺអសកម្មផ្នែកសេដ្ឋកិច្ច ហើយ ៣.៧% អត់ការងារធ្វើនៅពេលកំពុងស្វែងរកការងារ។

គួរបញ្ជាក់ដែរថា ក្នុងចំណោមចំនួនជនបរទេសសរុបទាំងអស់ដែលបានស្នាក់នៅក្នុងប្រទេសកូរ៉េលើសពី ៣ ខែ ចំនួនពលករដែលមានសញ្ជាតិចិនមានរហូតដល់ ៣៣% ដែលស្មើនឹងសមាមាត្រច្រើនជាងគេ ហើយជនជាតិវៀតណាមមានចំនួន ១៤.១% ។ ចំណែកឯសមាមាត្រនៃជនបរទេសមកពីប្រទេសមិនមែនអាស៊ីមានរហូតដល់ ៩.៧%។ ទិន្នន័យក៏បានបង្ហាញដែរថា បច្ចុប្បន្នបុគ្គលប្រហែល ២៦៩,០០០ នាក់ដែលបានស្នាក់នៅទីនេះសុទ្ធតែធ្វើការក្នុងវិស័យមិនមែនវិជ្ជាជីវៈ៕

យោងតាមការស្រាវជ្រាវរបស់សាកលវិទ្យាល័យអន្តរជាតិបង្ហាញថា ការធ្វើលំហាត់គណិតវិទ្យាពិបាកខ្លាំងពេកនឹងធ្វើឱ្យប៉ះពាល់ដល់ក្តីសុបិនរបស់កូនសិស្ស ព្រមទាំងទំនាក់ទំនងក្នុងគ្រួសារផងដែរ ។ តើអ្នកណាខ្លះធ្លាប់ត្រូវបានឪពុក-ម្តាយស្តីឱ្យនៅពេលធ្វើលំហាត់ម្តងៗ?

ការស្រាវជ្រាវរបស់សាកលវិទ្យាល័យ South Australia និងសាកលវិទ្យាល័យ St. Francis Xavier នៅប្រទេសកាណាដា បង្ហាញថា លំហាត់គណិតវិទ្យាអាចធ្វើឱ្យប៉ះពាល់ដល់កូនសិស្ស ច្រើនជាងការផ្តល់នូវគុណសម្បត្តិ ជាពិសេស ការដាក់លំហាត់ស្មុគស្មាញខ្លាំងសម្រាប់កូនសិស្ស ។ លើសពីនេះ វានឹងធ្វើឱ្យអាណាព្យាបាលដែលជួយបង្រៀនកូននៅផ្ទះ ក៏ស្មុគស្មាញផងដែរ ។

លទ្ធផលការស្រាវជ្រាវនេះបានមកពីការសម្ភាសន៍ក្រុមគ្រួសារពលរដ្ឋកាណាដា ចំនួន៨គ្រួសារ ពាក់ព័ន្ធនឹងបទពិសោធន៍របស់ពួកគេជាមួយការធ្វើលំហាត់គណិតវិទ្យា ។ ក្រុមគ្រួសារទាំងនេះមានកូនរៀននៅថ្នាក់បឋមសិក្សា ដែលមានអាយុចាប់ពី៨ឆ្នាំ ទៅ៩ឆ្នាំ គឺជាអាយុចាប់ផ្តើមសិក្សាមុខវិជ្ជាគណិតវិទ្យាយ៉ាងហ្មត់ចត់ ។

Lisa O’Keeffe ជាសាស្ត្រាចារ្យមុខវិជ្ជាគណិតវិទ្យានៅសាកលវិទ្យាល័យ South Australia និយាយថា ៖ «លំហាត់ត្រូវបានគេទទួលស្គាល់យូរមកហើយថា វានឹងជួយពង្រឹងការរៀនសូត្ររបស់កុមារ ប៉ុន្តែបើដាក់លំហាត់គណិតវិទ្យាលំបាកខ្លាំងពេកសម្រាប់ពួកគេ បើទោះជាឪពុក-ម្តាយបានជួយបង្រៀនក្តី វានឹងធ្វើឱ្យកុមារពុំចង់ធ្វើលំហាត់គណិតវិទ្យាទេ ហើយតែងតែសួរដដែលៗថា ហេតុអ្វីចាំបាច់ធ្វើលំហាត់?» ។

ក្រៅពីនេះ ការធ្វើលំហាត់ពិបាកខ្លាំងពេក ជាពិសេស លំហាត់គណិតវិទ្យា នឹងធ្វើឱ្យប៉ះពាល់ដល់ពេលវេលាសម្រាករបស់ក្រុមគ្រួសារផងដែរ ដូចជា ៖ ពេលវេលាឪពុក-ម្តាយនៅជាមួយកូន ឬពេលចូលសម្រាកពេលយប់ ជាដើម ។ ដូច្នេះ វាធ្វើឱ្យគ្រួសារទាំងមូលមានអារម្មណ៍តានតឹង ។

មិនតែប៉ុណ្ណោះ ការសិក្សាមុខវិជ្ជាគណិតវិទ្យាដ៏ស្មុគស្មាញ នឹងធ្វើឱ្យប៉ះពាល់ដល់ផ្នែកផ្សេងៗ ដូចជា ៖ វាធ្វើឱ្យក្នុងអំឡុងពេលបង្រៀនកូន ឪពុក-ម្តាយគិតថា ខ្លួនឯងមិនឆ្លាតគ្រប់គ្រាន់ ពីព្រោះមិនអាចពន្យល់ឱ្យកូនយល់បាន ។ រីឯស្ត្រីជាម្តាយភាគច្រើនតែងតែមានអារម្មណ៍ថា មុខវិជ្ជាគណិតវិទ្យាមិនសាកសមជាមួយខ្លួនទេ ។ ការគិតបែបនេះកើតឡើងដោយសារសង្គមបានប្រកាន់ជំហរនេះ ក្នុងគោលបំណងពុំផ្តល់តម្លៃឱ្យស្ត្រី ។

ចំណែកផលប៉ះពាល់រយៈពេលវែងចំពោះកូនសិស្ស គឺវានឹងប៉ះពាល់ដល់ក្តីសុបិន និងកម្លាំងចិត្ត ដែលពួកគេចង់ធ្វើ ឬចង់ក្លាយខ្លួនជាអ្វីមួយនាថ្ងៃអនាគត ជាពិសេស ការងារ ។ ដូច្នេះ អ្នកស្រាវជ្រាវដែលសិក្សាអំពីប្រធានបទនេះបាននិយាយដូចៗគ្នាថា ការដាក់លំហាត់ងាយៗឱ្យសិស្សធ្វើ គឺជាជម្រើសដ៏ល្អបំផុត ពីព្រោះការធ្វើលំហាត់នៅផ្ទះ នឹងជួយឱ្យកូនសិស្សអាចរំលឹកមេរៀនដែលពួកគេទើបតែបានរៀនថ្មីៗ ៕