មហោស្រពខ្សាច់ ដែលគេហៅថា ពិធីបុណ្យ Haeundae តែងប្រារព្ធឡើងជារៀងរាល់ឆ្នាំនៅលើឆ្នេរខ្សាច់ ទីក្រុងជាប់មាត់សមុទ្រមួយកន្លែងនៃប្រទេសកូរ៉េខាងត្បូង ដែលនឹងមានដាក់តាំងបង្ហាញរូបចម្លាក់ខ្សាច់របស់បុគ្គលល្បីៗនិងសំណង់អច្ឆរិយៈនានាទូទាំងពិភពលោក ក្នុងនោះក៏មានប្រាសាទអង្គរវត្តរបស់ខ្មែរផងដែរ។ ចំពោះឆ្នាំ២០២៤នេះ ពិធីបុណ្យខ្សាច់ Haeundae នឹងប្រារព្ធឡើងនៅថ្ងៃទី ២៤ ដល់២៧ ខែឧសភាឆាប់ៗនេះ។

ពិធីបុណ្យខ្សាច់ Haeundae Sand Festival ដែលមានទីតាំងនៅតាមបណ្តោយឆ្នេរ Haeundae ទីក្រុង Busan ប្រទេសកូរ៉េខាងត្បូង។ ពិធីបុណ្យនេះ ត្រូវបានគេប្រារព្ធឡើងតាំងពីឆ្នាំ ២០០៣មកម្លេះ ហើយឥឡូវនេះត្រូវបានគេចាត់ទុកថាជាពិធីបុណ្យខ្សាច់ដ៏ធំបំផុតមួយរបស់ពិភពលោក។ វាគឺជាព្រឹត្តិការណ៍ដ៏ពិសេសមួយ មិនគួរមើលរំលងចំពោះអ្នកដែលស្រលាញ់ខាងសិល្បៈ ការតាំងពិព័ណ៍ មាត់សមុទ្រ និងឆ្នេរខ្សាច់។

តាមរយៈព្រឹត្តិការណ៍នេះជារៀងរាល់ឆ្នាំ គឺបានទាក់ទាញភ្ញៀវទេសចររាប់លាននាក់ ព្រោះតែវាជាទិដ្ឋភាពដ៏ពិសេសមួយកម្របានឃើញនិងអមជាមួយនឹងឆ្នេរខ្សាច់ដ៏ស្រស់ស្អាតនិងទឹកសមុទ្រដ៏ខៀវស្រងាត់ថ្លាឆ្វង់របស់ប្រទេស។ ជាមួយគ្នានេះ វិចិត្រករល្បីៗជាច្រើនប្រទេសនឹងមកបង្ហាញខ្លួនបញ្ចេញស្នាដៃឆ្លាក់រូបចម្លាក់ដ៏ពិបាកនិងគួរឲ្យស្ងើចសរសើរនៅលើវាលខ្សាច់ Haeundae នេះ ។ រូបចម្លាក់ទាំងនោះទៀតសោតជារឿយៗគឺមានទំហំធំ និងមានកំពស់រាប់សិបម៉ែត្រ ហើយចំណាយពេលជាច្រើនថ្ងៃដើម្បីបញ្ចប់។

ក្រៅតែពីការដាក់បង្ហាញនូវចម្លាក់ប្រណិតៗលើឆ្នេរខ្សាច់ហើយ អ្វីដែលជាការទាក់ទាញសម្រាប់ពិធីបុណ្យមួយនេះគឺនឹងការប្រគុំតន្រ្តីនិងការសម្តែងនានា ដែលមានការអញ្ជើញចូលរួមពីសិល្បៈករ សិល្បៈការនីមកពីទូទាំងពិភពលោកផងដែរ ដើម្បីញាំងឲ្យបរិយាកាសកាន់តែមានភាពសប្បាយរីករាយ។ បន្ថែមពីនេះ ក៏រួមមាននូវសកម្មភាពសប្បាយៗជាច្រើនទៀតដូចជាការពិព័ណ៌អាហារគ្រប់មុខទាំងម្ហូបប្រពៃណីកូរ៉េនិងម្ហូបអន្តរជាតិ ហាងស្រានិងភេសជ្ជៈ និងការប្រឡងប្រជែងនានាផងដែរ៕

បរទេស៖ ភ្នំភ្លើងខ្ពស់ជាងគេបំផុតមួយរបស់ពិភពលោកនៅអង់តាក់ទិកបានធ្វើឱ្យអ្នកវិទ្យាសាស្ត្រមានការងឿងឆ្ងល់ជាយូរណាស់មកហើយ ដោយសារភ្នំភ្លើងនេះបានបញ្ចេញធូលីមាសដ៏មានតម្លៃ និងឧស្ម័នជាច្រើនប្រភេទជារៀងរាល់ថ្ងៃ នេះបើយោងតាមរបាយការណ៍របស់ New York Post ដែលបានចុះផ្សាយនៅថ្ងៃទី២២ ខែមេសា ឆ្នាំ២០២៤។
ភ្នំភ្លើង Erebus កម្ពស់ ៣,៧៩៤ ម៉ែត្រដែលជាភ្នំភ្លើងសកម្មមួយក្នុងចំណោមភ្នំភ្លើងសកម្មចំនួន ១៣៨ របស់អង់តាក់ទិក ត្រូវបានគេស្គាល់ថាជាភ្នំភ្លើងបញ្ចេញឧស្ម័នដែលមានផ្ទុកមាសគ្រីស្តាល់ប្រហែល ៨០ ក្រាមក្នុងមួយថ្ងៃ មានតម្លៃជិត ៦,០០០ ដុល្លារអាមេរិក។

បើយោងតាមអ្នកជំនាញនៅ New Mexico Institute of Mining and Technology បានពន្យល់ថា មាសអាចមានប្រភពមកពីថ្មភ្នំភ្លើង នៅពេលដែលកម្អែភ្នំភ្លើងកម្ពស់ ៣,៧៩៤ ម៉ែត្របានបញ្ចេញឧស្ម័នក្តៅ ដោយដឹកធូលីមាសចូលទៅក្នុងអាកាស។ ដូច្នេះភ្នំភ្លើង Erebus ត្រូវបានគេគិតថាជាភ្នំភ្លើងសកម្មបំផុតនៅភាគខាងត្បូងរបស់ពិភពលោក។ ទោះជាយ៉ាងណាធូលីមាសនេះគ្រាន់តែជាវត្ថុដ៏មានតម្លៃមួយក្នុងចំណោមវត្ថុជាច្រើនដែលកំពុងត្រូវបានបញ្ចេញចេញពីភ្នំភ្លើង Erebus ។

លោក Conor Bacon អ្នកស្រាវជ្រាវនៅឯ Earth Observatory នៃសកលវិទ្យាល័យ Columbia ក្នុងទីក្រុងញូវយ៉ក បាននិយាយថា “Erebus… បាននិងកំពុងផ្ទុះជាបន្តបន្ទាប់ចាប់តាំងពីឆ្នាំ ១៩៧២ មកម្លេះ” ដោយលោកបានបន្ថែមថា Erebus មានបឹងកម្អែភ្នំភ្លើងមួយនៅលើកំពូលភ្នំរបស់វា។ បឹងកម្អែបែបនេះពិតជាកម្រណាស់ ដោយសារលក្ខខណ្ឌពិសេសចាំបាច់ដើម្បីធានាថាផ្ទៃខាងលើមិនត្រជាក់។

Bacon ប៉ាន់ស្មានថា ការរកឃើញធូលីមាសរបស់ភ្នំភ្លើង Erebus ដែលបានបញ្ចេញជារៀងរាល់ថ្ងៃនៅអង់តាក់ទិក គឺបានប្រើប្រាស់ឧបករណ៍ត្រួតពិនិត្យអចិន្ត្រៃយ៍មួយចំនួនប៉ុណ្ណោះ ដែលភាគច្រើនរួមមានឧបករណ៍វាស់ស្ទង់រញ្ជួយ ដើម្បីរកមើលសកម្មភាពរញ្ជួយដែលទាក់ទងនឹងភ្នំភ្លើង។ ហើយពេលខ្លះទៀត អ្នកស្រាវជ្រាវក៏បានដាក់ពង្រាយបណ្តាញឧបករណ៍យ៉ាងទូលំទូលាយបន្ថែមទៀតដើម្បីធ្វើការសិក្សាឱ្យបានជាក់លាក់ ហើយបានដឹងថាធូលីមាសត្រូវបានគេរកឃើញនៅក្នុងអាកាសជុំវិញតំបន់ភ្នំភ្លើងចម្ងាយប្រហែល ១,០០០ គីឡូម៉ែត្រពីភ្នំ៕

វិនិយោគទុនអចលនទ្រព្យ របស់ប្រទេសកាតា និងចិន បាននឹងកំពុងពិភាក្សាសាងសង់អគារខ្ពស់បំផុត នៅលើពិភពលោក ក្នុងប្រទេសថៃ។

យោងតាមការសែត Bangkok Post បានឱ្យដឹងថា៖”លោក Srettha Thavisin បានជួបជាមួយក្រុមហ៊ុនវិនិយោគមកពីមជ្ឈិមបូព៌ា និងចិនដូចជាក្រុមហ៊ុនEmaar Group, ក្រុមហ៊ុន Broad Group និងក្រុមហ៊ុន Vatone Group ហើយបានពិភាក្សាពីគម្រោងសាងសង់អគារខ្ពស់ជាងគេបំផុតនៅលើលោក”។

បច្ចុប្បន្ន អគារខ្ពស់ជាងគេស្ថិតនៅទីក្រុងឌូបៃ នៃសហព័ន្ធអារ៉ាប់រួម ដែលមានឈ្មោះថា Burj Khalifa មានកម្ពស់ ៨២៨ម៉ែត្រ ខណៈអគារខ្ពស់ជាងគេនៅក្នុងប្រទេសថៃមានឈ្មោះថា Magnolias Waterfront Residences Iconsiam មានកម្ពស់ត្រឹម ៣១៨ម៉ែត្រប៉ុណ្ណោះ។

នាយករដ្ឋមន្ត្រីថៃ លោក Srettha Thavisin សង្ឃឹមខ្ពស់ថា គម្រោងសាងសង់អគារនេះ នឹងកើតឡើងឆាប់ៗខាងមុខនេះ ដោយវានឹងក្លាយជាទិសដៅទេសចរណ៍ថ្មី ដែលជំរុញឱ្យភ្ញៀវទេសចរ សម្រុកនាំគ្នាមកកម្សាន្តប្រទេសថៃ។

តែយ៉ាងណាមិញ ជុំវិញ គម្រោងសាងសង់អគារខ្ពស់ជាងគេនៅក្នុងប្រទេសថៃនេះ មិនទាន់ត្រួវបានបញ្ជាក់លម្អិតថានឹងចាប់ផ្តើមសាងសង់ និងចំណាយថវិការអស់ប៉ុន្មាននៅឡើយនោះទេ៕

ប្រទេសថៃ ៖ ការិយាល័យឧតុនិយមថៃបានប្រកាសថា ប្រទេសថៃនឹងមានអាកាសធាតុក្តៅខ្លាំង និងមានសីតុណ្ហភាពកើនឡើងខ្ពស់រហូតដល់៤៣អង្សារសេ ។ ហេតុនេះ ការិយាល័យឧតុនិយមបានសំណូមពរឱ្យពលរដ្ឋទាំងអស់ចៀសវាងការធ្វើការនៅក្រោមកំដៅថ្ងៃរយៈពេលយូរ និងប្រយ័ត្នខ្លួនពីគ្រោះថ្នាក់ផ្សេងៗដែលបណ្តាលមកពីភ្លៀង ផ្គររន្ទះ និងខ្យល់កន្ត្រាក់នៅតំបន់មួយចំនួន ។

ការិយាល័យឧតុនិយមថៃបានប្រកាសកាលពីថ្ងៃទី២១ ខែមេសា ឆ្នាំ២០២៤ ថា ក្នុងរយៈពេល៧ថ្ងៃ គិតចាប់ពីថ្ងៃទី២១ ដល់ថ្ងៃទី២៧ ខែមេសា អាកាសធាតុក្តៅខ្លាំងនឹងគ្របដណ្តប់លើតំបន់ភាគខាងជើងប្រទេសថៃ ។ ហេតុនេះ វាធ្វើឱ្យប្រទេសថៃទាំងមូលមានអាកាសធាតុក្តៅខ្លាំង និងចុះអ័ព្ទនាពេលថ្ងៃ ។ លើសពីនេះ នឹងមានខ្យល់ពីទិសនិរតី និងខ្យល់ពីទិសខាងត្បូងបក់មកគ្របដណ្តប់លើផ្នែកខាងជើងប្រទេសថៃ ដែលធ្វើឱ្យតំបន់នេះមានភ្លៀង ផ្គររន្ទះ និងខ្យល់កន្ត្រាក់ខ្លាំង ។

ចំណែកខេត្តភាគខាងត្បូងប្រទេសថៃ ចាប់ពីថ្ងៃទី២១ ដល់ថ្ងៃទី២៣ ខែមេសា នឹងមានខ្យល់ពីទិសខាងលិច និងខ្យល់ពីទិសពាយ័ព្យបក់មកគ្របដណ្តប់លើសមុទ្រ Andama និងតំបន់ភាគខាងត្បូង ខណៈខ្យល់ពីទិសខាងកើត និងអាគ្នេយ៍បក់មកគ្របដណ្តប់លើឈូងសមុទ្រថៃ និងតំបន់ភាគខាងត្បូង ។ ហេតុនេះ វានឹងធ្វើឱ្យតំបន់ភាគខាងត្បូងមានភ្លៀងធ្លាក់បន្ថែមទៀត និងភ្លៀងធ្លាក់ខ្លាំងក្នុងតំបន់មួយចំនួន ។

រីឯចាប់ពីថ្ងៃទី២៤ ដល់ថ្ងៃទី២៧ ខែមេសា ខ្យល់នៅទិសខាងកើត និងទិសអាគ្នេយ៍បានបក់មកគ្របលើឈូងសមុទ្រថៃ, តំបន់ភាគខាងត្បូង និងសមុទ្រ Andama ។ ហេតុនេះ វានឹងធ្វើឱ្យតំបន់មួយចំនួននៅខេត្តភាគខាងត្បូងប្រទេសថៃ មានភ្លៀងធ្លាក់ និងផ្គររន្ទះ ។

ការិយាល័យឧតុនិយមបានសំណូមពរឱ្យពលរដ្ឋដែលរស់នៅខេត្តភាគខាងជើងថែទាំសុខភាពរបស់ខ្លួន ដោយសារប្រទេសថៃមានអាកាសធាតុក្តៅខ្លាំង ហើយពលរដ្ឋគួរតែជៀសវាងការធ្វើការ ឬធ្វើអ្វីមួយនៅក្រោមកំដៅថ្ងៃខ្លាំងរយៈពេលយូរ ។ ក្រៅពីនេះ ពលរដ្ឋត្រូវប្រុងប្រយ័ត្នចំពោះគ្រោះថ្នាក់ដែលកើតឡើងពីភ្លៀង ផ្គររន្ទះ និងខ្យល់កន្ត្រាក់នៅតំបន់មួយចំនួនផងដែរ ៕

បរទេស៖ កាលពីពេលថ្មីៗនេះ ក្នុងដំណើរទស្សនកិច្ចការងារនៅឥណ្ឌូនេស៊ីរបស់រដ្ឋមន្ត្រីការបរទេសចិន លោក Wang Yi បាននិយាយថា ឥណ្ឌូនេស៊ី និងចិនបានកំពុងពិភាក្សាគ្នាពង្រីកផ្លូវរថភ្លើងល្បឿនលឿនដំបូងគេនៅអាស៊ីអាគ្នេយ៍ ដើម្បីជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ។
នៅថ្ងៃទី១៩ ខែមេសា ឆ្នាំ២០២៤ រដ្ឋមន្ត្រីសម្របសម្រួលកិច្ចការសមុទ្រ និងវិនិយោគឥណ្ឌូនេស៊ីលោក Luhut Binsar Pandjaitan បានឱ្យដឹងថា ក្នុងកិច្ចសន្ទនាកម្រិតខ្ពស់ ឥណ្ឌូនេស៊ី-ចិន លើកទី៤ ដែលប្រព្រឹត្តទៅនៅទីក្រុង Labuan Bajo ប្រទេសឥណ្ឌូនេស៊ី ភាគីទាំងពីរបានឯកភាពជំរុញកិច្ចសហប្រតិបត្តិការសេដ្ឋកិច្ចទ្វេភាគីដែលមានផលប្រយោជន៍ទៅវិញទៅមក ធានាបាននូវការកើនឡើង និងសមតុល្យពាណិជ្ជកម្មកាន់តែមានតុល្យភាពរវាងភាគីទាំងពីរ។

រដ្ឋមន្ត្រី Luhut Binsar Pandjaitan និងរដ្ឋមន្ត្រីការបរទេសចិនលោក Wang Yi បានផ្តោតការពិភាក្សាលើការជំរុញការពង្រីកខ្សែរថភ្លើងល្បឿនលឿន Jakarta-Bandung ដែលចាត់ទុកថាជាខ្សែរថភ្លើងល្បឿនលឿនដំបូងគេនៅអាស៊ីអាគ្នេយ៍។ ផ្លូវនេះស្ថិតក្នុងក្របខ័ណ្ឌនៃគំនិតផ្តួចផ្តើមខ្សែក្រវ៉ាត់ និងផ្លូវរបស់ចិន (BRI) ដែលត្រូវបានសម្ពោធក្នុងខែតុលា ឆ្នាំ២០២៣ ជាមួយនឹងការវិនិយោគជាង ៧ ពាន់លានដុល្លារ។ យោងតាមការពិភាក្សារវាងប្រទេសឥណ្ឌូណេស៊ី និងចិន ខ្សែរថភ្លើងល្បឿនលឿនពីហ្សាកាតា ទៅបានឌុង អាចនឹងពង្រីកដល់ទីក្រុងស៊ូរ៉ាបាយ៉ា ក្នុងខេត្តជ្វាខាងកើតនៃប្រទេសឥណ្ឌូនេស៊ី។

បើយោងតាមអ្នកជំនាញមួយចំនួន ចម្ងាយបច្ចុប្បន្ននៃខ្សែរថភ្លើងល្បឿនលឿនពីហ្សាកាតា ទៅបានឌុងគឺ ១៤២ គីឡូម៉ែត្រ ដែលជាចម្ងាយខ្លីអាចទាក់ទងគ្នាដើម្បីបង្កើនប្រាក់ចំណេញ ខណៈពេលដែលចម្ងាយពីហ្សាកាតាទៅស៊ូរ៉ាបាយ៉ាមានជាង ៧០០ គីឡូម៉ែត្រ ដែលវាអាចបើកឱកាសសេដ្ឋកិច្ចកាន់តែច្រើន។

គួរបញ្ជាក់ដែរថា បច្ចុប្បន្នប្រទេសចិនគឺជាអ្នកវិនិយោគដ៏ធំមួយនៅក្នុងប្រទេសឥណ្ឌូនេស៊ី ជាមួយនឹងការវិនិយោគសរុបប្រហែល ៧.៤ ពាន់លានដុល្លារក្នុងឆ្នាំ ២០២៣។ បើយោងតាមក្រុមអ្នកសង្កេតការណ៍បាននិយាយថា សព្វថ្ងៃប្រទេសចិនក៏មានបំណងចង់ជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគជាមួយបណ្តាប្រទេសអាស៊ីអាគ្នេយ៍មួយចំនួនទៀត រួមទាំងគម្រោងក្រោមគំនិតផ្តួចផ្តើម BRI បន្ទាប់ពីសហរដ្ឋអាមេរិកបានលើកកម្ពស់យន្តការកិច្ចសហប្រតិបត្តិការគំរូ “ពហុភាគី” ក្នុងតំបន់ថ្មីដោយរៀបចំកិច្ចប្រជុំកំពូលលើកដំបូងរវាង សហរដ្ឋអាមេរិក ជប៉ុន និងហ្វីលីពីន នៅពាក់កណ្តាលខែមេសា ឆ្នាំ២០២៤៕

ប្រទេសចិន ៖ យោងតាមការស្រាវជ្រាវថ្មីមួយរបស់ទស្សនាវដ្តី Science Journal បង្ហាញថា ទីក្រុងធំៗជាច្រើនរបស់ចិនបានស្រុតចុះ ហើយប្រឈមនឹងការលិចទឹកនាថ្ងៃអនាគត ដោយសារការពង្រីកទីក្រុងក្នុងរយៈពេល១០ឆ្នាំកន្លងមក ។ ការពង្រីកទីក្រុងទាំងនេះ តម្រូវឱ្យប្រទេសចិនត្រូវបូមទឹកយកមកប្រើប្រាស់កាន់តែច្រើន ដើម្បីទទួលកំណើនពលរដ្ឋជារៀងរាល់ឆ្នាំ ។

អ្នកស្រាវជ្រាវមកពីសាកលវិទ្យាល័យនានារបស់ចិនបានសហការគ្នាធ្វើការស្រាវជ្រាវពីបញ្ហាទីក្រុងធំៗប្រឈមនឹងការស្រុតចុះ និងប្រើប្រាស់ផ្កាយរណប Sentinel-1 ដើម្បីត្រួតពិនិត្យពីបម្លាស់ទីផែនដីក្នុងទីក្រុងចំនួន៨២ នៅប្រទេសចិន ។ លទ្ធផលការស្រាវជ្រាវបង្ហាញថា ចាប់ពីឆ្នាំ២០១៥ ដល់ឆ្នាំ២០២២ តំបន់ជាង៤៥% របស់ទីក្រុងមួយចំនួនបានស្រុតចុះទៅក្រោមជាង៣មីល្លីម៉ែត្រ ហើយមានតំបន់ប្រមាណ១៦% បានស្រុតចុះរហូតដល់១០មីល្លីម៉ែត្រក្នុង១ឆ្នាំ ។

ប្រសិនបើប្រៀបធៀបនឹងចំនួនពលរដ្ឋចិន បច្ចុប្បន្ននេះ ពលរដ្ឋស្មើជាង៦៧លាននាក់នឹងប្រឈមមុខជាមួយគ្រោះថ្នាក់ ដោយសារពួកគេរស់នៅក្នុងតំបន់ស្រុតចុះ ក្នុងនោះមានតំបន់សំខាន់ៗចំនួន៥ នឹងប្រឈមជាមួយការលិចទឹកនាថ្ងៃអនាគត ដូចជា ៖ ទីក្រុងប៉េកាំង-ធានជីន, ហាប៊ីន-ឆាងឈុន, ជៀងចូ-ភីងទីងសាន, វេនចូវ-ហ្វូចូវ និងគុនមីង-ណាននីង ។

ចំណែកមូលហេតុធ្វើឱ្យទីក្រុងធំៗទាំងនេះស្រុតចុះ គឺដោយសារកត្តាមួយចំនួន ដូចជា ៖ កត្តាភូមិសាស្ត្រ, ទម្ងន់របស់អគារ, ប្រព័ន្ធដឹកជញ្ជូនសាធារណៈក្នុងទីក្រុង ព្រមទាំងការជីកយករ៉ែ និងធ្យូងថ្ម ប៉ុន្តែកត្តាចម្បងដែលអ្នកស្រាវជ្រាវលើកឡើងនោះ គឺការបាត់បង់ទឹកនៅក្រោមដី ។ គេសង្កេតឃើញថា បញ្ហានេះបានកើតឡើងនាពេលកន្លងមកក្នុងទីក្រុងនានាលើពិភពលោក ដូចជា ៖ ទីក្រុងម៉ិកស៊ីកូ, ញូវដេលី និងហ៊ូស្តុន ។

ហេតុនេះ បញ្ហាទីក្រុងស្រុតចុះ រួមទាំងបញ្ហាការបម្រែបម្រួលអាកាសធាតុដែលពិភពលោកកំពុងប្រឈម និងធ្វើឱ្យកម្រិតទឹកសមុទ្រកើនឡើង ហើយវាកាន់តែធ្វើឱ្យទីក្រុងជាច្រើននៅប្រទេសចិនប្រឈមនឹងការលិចទឹកកាន់តែខ្លាំងថែមទៀត ។ ក្នុងរយៈពេល១០០ឆ្នាំខាងមុខ បរិមាណទឹកសមុទ្ររបស់ចិនអាចនឹងកើនឡើងខ្ពស់រហូតដល់២៦% ប្រសិនបើមានការបំភាយកាបូនឌីអុកស៊ីតក្នុងកម្រិតមធ្យម ។

ទោះយ៉ាងណា បញ្ហាទីក្រុងស្រុតចុះពុំមែនកើតឡើងតែនៅប្រទេសចិនមួយទេ ទីក្រុងធំៗនៅលើពិភពលោកផ្សេងទៀត ក៏ធ្លាប់ជួបបញ្ហានេះដូចគ្នាដែរ គឺទីក្រុងអូសាកា និងទីក្រុងតូក្យូរបស់ប្រទេសជប៉ុន ។ នៅសតវត្សរ៍ទី២០ គ្រោះរញ្ជួយដីនៅបរិវេណកំពង់ផែជប៉ុន បានធ្វើឱ្យតំបន់នៅក្បែរៗនោះស្រុតចុះទៅក្រោមប្រមាណ៥ម៉ែត្រ ៕

ក្នុងចំណោមទីក្រុងនីមួយៗនៅតាមបណ្តាប្រទេសជុំវិញពិភពលោកភាគច្រើនសុទ្ធតែមានការអភិវឌ្ឍ ក៏ដូចជាមានភាពសម្បូរបែប រួមទាំងមានអាកាសធាតុអំណោយផលជាដើម។ ដោយឡែកនៅទីក្រុងទាំងនេះវិញត្រូវបានគេចាត់ទុកថាជាកន្លែងរស់នៅដ៏អាក្រក់បំផុតក្នុងពិភពលោក ដោយសារបរិយាកាសនៅទីនោះអួអ័ព្ទ អាកាសធាតុមិនអំណោយផល ក៏ដូចជាទីក្រុងខ្លះត្រជាក់ពេក ហើយខ្លះទៀតក៏ក្តៅពេក ដែលធ្វើឱ្យទីក្រុងទាំងនោះជាប់ឈ្មោះជាទីក្រុងដែលពិបាករស់នៅបំផុតក្នុងពិភពលោក។ ដូច្នេះក្នុងអត្ថបទនេះយើងនឹងនាំប្រិយមិត្តមកស្គាល់ទីក្រុងចំនួន ៦ ដែលត្រូវបានចាត់ទុកថាជាកន្លែងរស់នៅដ៏អាក្រក់បំផុតលើលោក៖

១.ទីក្រុង Araouane ប្រទេសម៉ាលី៖ គឺជាទីក្រុងដែលក្តៅបំផុតនៅលើពិភពលោក និងមានប្រជាជនត្រឹមតែ ៣០០ នាក់ប៉ុណ្ណោះ។ នៅជុំវិញទីក្រុងនោះគឺពោរពេញទៅដោយវាលខ្សាច់ដ៏ក្តៅហែង និងព្យុះខ្សាច់ញឹកញាប់ ដែលធ្វើឱ្យមានធូលីធំៗ និងគ្មានភ្លៀងធ្លាក់នោះទេ។ នៅរដូវក្តៅសីតុណ្ហភាពជាមធ្យមនៅទីនេះគឺប្រហែល ៤៦ អង្សាសេ ទោះជាយ៉ាងណាក៏ដោយ ទីក្រុងនេះគឺជាមជ្ឈមណ្ឌលដឹកជញ្ជូនដ៏សំខាន់សម្រាប់ការជីកយករ៉ែអំបិល និងការដឹកជញ្ជូន ដូច្នេះមនុស្សមួយចំនួននៅតែជ្រើសរើសរស់នៅទីក្រុង Araouane។

២.ទីក្រុង Oymyakon ប្រទេសរុស្ស៊ី៖ គឺជាទីក្រុងដែលមានអាកាសធាតុត្រជាក់បំផុតនៅក្នុងពិភពលោក និងមានប្រជាជនរស់នៅប្រហែល ៥០០ នាក់ប៉ុណ្ណោះ។ សីតុណ្ហភាពរដូវរងាជាមធ្យមគឺប្រហែល -៥០ អង្សាសេហើយមានតែពន្លឺនៅពេលថ្ងៃប្រហែល ៣ ម៉ោងប៉ុណ្ណោះ។ នៅទីក្រុង Oymyakon មានវិមានអនុស្សាវរីយ៍មួយត្រូវបានសាងសង់ឡើងដោយកត់ត្រាសីតុណ្ហភាព -៧១.២ អង្សាសេក្នុងឆ្នាំ ១៩២៤។ ទោះបីជាត្រជាក់ក្នុងរដូវរងាក៏ដោយ ក៏រដូវក្តៅនៅទីនេះមានសីតុណ្ហភាពខ្ពស់រហូតដល់ ៣៤ អង្សាសេ ហើយអាហារចម្បងរបស់មនុស្សគឺត្រីដែលចាប់បានពីផ្ទាំងទឹកកក។

៣.ទីក្រុង Arica ប្រទេសឈីលី៖ គឺជាកន្លែងដែលស្ងួតបំផុតក្នុងពិភពលោក ដោយសារនៅទីនេះគ្មានទឹក និងគ្មានព្រៃឈើនោះទេ។ ជារៀងរាល់ឆ្នាំ ទីក្រុងនេះទទួលបានទឹកភ្លៀងត្រឹមតែ ០.៧៦ មីលីម៉ែត្រប៉ុណ្ណោះ ចំណែកវាលខ្សាច់ Atacama មិនមានភ្លៀងធ្លាក់អស់រយៈពេល ៥០០ ឆ្នាំមកហើយ។ ទោះបីជាមានសភាពធ្ងន់ធ្ងរក៏ដោយ ក៏ប្រជាជននៅទីនេះនៅតែមានមនុស្សរស់នៅប្រហែល ២២០,០០០ នាក់ ដែលធ្វើការជាចម្បងនៅក្នុងវិស័យកំពង់ផែ និងដឹកជញ្ជូនផ្លែឈើនៅក្នុងតំបន់ជ្រលងភ្នំ AzapaandLluta ក្បែរនោះ។

៤.ទីក្រុង La Oroya ប្រទេសប៉េរូ៖ គឺជាទីក្រុងដែលមានការបំពុលខ្លាំងបំផុតក្នុងពិភពលោក ដោយសារកម្រិតខ្ពស់នៃសារធាតុអាសេនិច សំណ និងស្ពាន់ធ័រឌីអុកស៊ីតដែលមានគ្រោះថ្នាក់ខ្លាំងនៅលើអាកាស ខណៈពេលដែលភ្លៀងអាស៊ីតក៏បានបំផ្លាញរុក្ខជាតិជុំវិញទីក្រុងនេះផងដែរ។ La Oroya គឺជាកន្លែងសម្រាប់រោងចក្រចម្រាញ់ ដែលផលិតលោហធាតុដូចជាមាស ប្រាក់ ប៊ីស្មុត កាដមីញ៉ូម និងផ្សេងៗទៀត ដូច្នេះហើយទីក្រុងនេះមានអ្នកស្រុករស់នៅប្រហែល ២៥,០០០ នាក់។

៥. កោះ Tristan de Cunha នៅអាត្លង់ទិកខាងត្បូង៖ កោះនេះត្រូវបានគេចាត់ទុកថាជា កន្លែងឯកោបំផុតក្នុងពិភពលោក ដោយសារមានប្រជាជនរស់នៅត្រឹមតែ ២៤៦ នាក់ប៉ុណ្ណោះ។ កោះនេះនៅដាច់ស្រយាល និងដាច់ដោយឡែកពីតំបន់នានា ដោយសារតំបន់តូចរបស់វាមិនគ្រប់គ្រាន់សម្រាប់ការចុះចតយន្តហោះ ហើយផ្លូវជិតបំផុតទៅកាន់ Tristan de Cunha គឺតាមទូកពីអាហ្វ្រិកខាងត្បូងក្នុងការធ្វើដំណើររយៈពេលប្រាំមួយថ្ងៃ ដែលមានប្រវែងសរុប ២,៤៣០ គីឡូម៉ែត្រ។

៦.ទីក្រុង La Rinconada ប្រទេសប៉េរូ៖ គឺជាទីក្រុងដែលមានសំរាមច្រើនបំផុតលើលោក ដែលសំរាមនោះគរលើគ្នាមានកម្ពស់រហូតដល់ ៥,១០០ ម៉ែត្រពីលើនីវ៉ូទឹកសមុទ្រ និងមានប្រជាជនរស់នៅចំនួន ៥០,០០០ នាក់។ នៅក្នុងទីក្រុង La Rinconada គឺជាអណ្តូងរ៉ែមាសដ៏ធំមួយទើបមនុស្សនៅតែអាចរស់នៅបាន មនុស្សអាចកាន់កាប់អ្វីៗគ្រប់យ៉ាងដែលពួកគេរកឃើញនៅក្នុងអណ្តូងរ៉ែមាសដែលមិនមានការគ្រប់គ្រងរបស់រដ្ឋាភិបាលទីក្រុងនោះទេ៕