បច្ចុប្បន្នវិស័យភាពយន្តកាន់តែចម្រើនខ្លាំងពីមួយថ្ងៃទៅមួយថ្ងៃមិនថាបច្ចេកទេសថត ក៏ដូចជាសាច់រឿងនិពន្ធ ឬបច្ចេកទេសដឹកនាំរឿងនោះទេគឺមួយចំនួនធំសុទ្ធតែទទួលបានការគាំទ្រពីសំណាកអ្នកទស្សនា។ ការទទួលបានការចាប់អារម្មណ៍ពីអ្នកទស្សនានេះហើយជាដើមហេតុដែលធ្វើឱ្យភាពយន្តទាំងនោះទទួលបានប្រាក់ចំណូលច្រើនពីការគាំទ្រ ជាក់ស្តែងដូចជារឿង Exhuma ដែលបានចាក់បញ្ចាំងកាលពីពេលថ្មីៗនេះ បានក្លាយជាភាពយន្តកូរ៉េដែលជាប់ចំណាត់ថ្នាក់លេខ ១ ទទួលបានប្រាក់ចំណូលច្រើនជាងគេបំផុតក្នុងតារាង Box Office ឆ្នាំ ២០២៤ របស់កូរ៉េខាងត្បូង។ ដូច្នេះអត្ថបទនេះនឹងនាំប្រិយមិត្តមកស្គាល់ភាពយន្តល្បីៗទាំង ៥ ដែលរកចំណូលបានច្រើនជាងគេបំផុតនៅក្នុងប្រទេសកូរ៉េខាងត្បូងប្រចាំឆ្នាំ ២០២៤៖

១.Exhuma៖ ប្រិយមិត្តភាគច្រើនប្រាកដជាស្គាល់ និងបានមើលរឿងដ៏គួរឱ្យរន្ធត់នេះហើយ ដែលសម្តែងដោយតារាល្បីៗជាច្រើនដួងដូចជា Choi Min-sik, Kim Go-eun, Yoo Hae-jin និង Lee Do-hyun ។ ខ្សែភាពយន្តនេះរួមបញ្ចូលនៅអាថ៌កំបាំង ដោយធ្វើដំណើរការនៃការជីកកកាយផ្នូរដ៏អាក្រក់មួយ ដែលបញ្ចេញនូវផលវិបាកដ៏គួរឱ្យភ័យខ្លាចដែលកប់នៅក្រោម។ Exhuma បានបញ្ចាំងជាលើកដំបូងនៅក្នុងផ្នែកវេទិកានៅឯមហោស្រពភាពយន្តអន្តរជាតិទីក្រុងប៊ែកឡាំងនៅថ្ងៃទី១៦ ខែកុម្ភៈ ឆ្នាំ ២០២៤។ វាត្រូវបានចេញផ្សាយនៅក្នុងរោងភាពយន្តកូរ៉េខាងត្បូងនៅថ្ងៃទី ២២ ខែកុម្ភៈ ដោយ Showbox។ ដូច្នេះភាពយន្តនេះរកចំណូលបាន ៧៣ លានដុល្លារអាមេរិកនៅ Box Office ទូទាំងប្រទេសកូរ៉េ ខណៈនៅទូទាំងពិភពលោករកបាន ៩៥ លានដុល្លារ ដែលធ្វើឱ្យវាក្លាយជាភាពយន្តកូរ៉េខាងត្បូងដែលរកចំណូលបានខ្ពស់បំផុតក្នុងឆ្នាំ ២០២៤។

២.Wonka៖ Wonka គឺជាខ្សែភាពយន្តបែបកំប្លែងរបស់បរទេសដែលត្រូវបានចាក់បញ្ចាំងកាលពីឆ្នាំ ២០២៣ ហើយវាក្លាយជារឿងដ៏ល្បីល្បាញខ្លាំងនៅទូទាំងពិភពលោក ដោយរកចំណូលបាន ២៤ លានដុល្លារក្នុងប្រទេសកូរ៉េ និង ១៦៤.៧ លានដុល្លារនៅក្នុងតារាង Box Office ពិភពលោកឆ្នាំ ២០២៤។ រឿងនេះនិយាយអំពី Willy Wonka ដែលជាតួអង្គក្នុងប្រលោមលោកឆ្នាំ ១៩៦៤ ដោយពណ៌នាពីថ្ងៃដំបូងរបស់គាត់គឺជាសូកូឡា។

៣. The Roundup: Punishment៖ គឺជាខ្សែភាពយន្តកូរ៉េបែបឧក្រិដ្ឋកម្មវគ្គ ៤ ដែលកំពុងល្បីល្បាញខ្លាំងក្នុងឆ្នាំ ២០២៤ ដឹកនាំដោយ Heo Myung-haeng និងតារា Ma Dong-seok, Kim Mu-yeol, និង Park Ji-hwan។ ខ្សែភាពយន្តនេះត្រូវបានចេញផ្សាយជាលក្ខណៈល្ខោននៅថ្ងៃទី២៤ ខែមេសា ឆ្នាំ២០២៤ ហើយទទួលបានប្រាក់ចំណូល ២១ លានដុល្លារនៅក្នុងតារាង Box Office របស់កូរ៉េខាងត្បូង។

៤.Dune Part Two៖ Dune វគ្គ២ គឺជាខ្សែភាពយន្តបែបប្រឌិតបែបវិទ្យាសាស្ត្ររបស់អាមេរិកឆ្នាំ 2024 ដែលត្រូវបានដឹកនាំ និងផលិតដោយ Denis Villeneuve ដែលសហការនិពន្ធរឿងជាមួយ Jon Spaihts ។ ខ្សែភាពយន្តនេះរកចំណូលបាន ១៦ លានដុល្លារនៅក្នុងតារាង Box Office របស់កូរ៉េខាងត្បូង។

៥. Citizen of a Kind៖ Citizen of a Kind គឺជាខ្សែភាពយន្តឧក្រិដ្ឋកម្មរបស់កូរ៉េខាងត្បូងឆ្នាំ ២០២៤ ដឹកនាំដោយ Park Young-ju ដែលសម្តែងដោយ Ra Mi-ran, Gong Myung, និង Yeom Hye-ran។ រឿងនេះគឺត្រូវបានផ្អែកលើរឿងពិតរបស់ Kim Seong-ja ដែលជាម្ចាស់ហាងបោកអ៊ុតនៅ Hwaseong, Gyeonggi ដែលចាប់បានប្រធានអង្គការបន្លំសំឡេងក្នុងឆ្នាំ ២០១៦។ Citizen of a Kind ត្រូវបានចេញផ្សាយនៅថ្ងៃទី ២៤ ខែមករា ឆ្នាំ ២០២៤ ដោយរកចំណូលបាន ១២ លានដុល្លារអាមេរិក ក្នុងតារាង Box Office របស់កូរ៉េខាងត្បូង៕

ប្រទេសថៃ ៖ នៅថ្ងៃទី២៩ ខែមេសា ឆ្នាំ២០២៤ សារព័ត៌មានថៃរាយការណ៍ថា អាកាសធាតុក្តៅខ្លាំងនៅប្រទេសថៃបានជំរុញឱ្យតម្លៃដូងកើនឡើងខ្ពស់ក្នុងប្រវត្តិសាស្ត្រ ជាពិសេស ដូងខ្ចី ។ បើគិតមកដល់ថ្ងៃទី២៩ ខែមេសា នេះ ដូងខ្ចី១ផ្លែមានតម្លៃលក់រាយស្មើនឹង៥០បាត (ឬស្មើប្រមាណ៥.០០០រៀល) ។

ចំណែកដូងខ្ចីពូជដូងក្រអូប ដែលលក់រាយនៅតាមហាងផ្សេងៗ គឺមានតម្លៃចាប់ពី៦៥បាត ទៅ៨៥បាតក្នុង១ផ្លែ (ឬស្មើប្រមាណពី៦ពាន់៥រយ ទៅ៨ពាន់៥រយរៀលក្នុង១ផ្លែ) ។ ហេតុនេះ តម្លៃដូងកើនឡើងខ្ពស់បានធ្វើឱ្យប៉ះពាល់ដល់អាជីវករទិញដូងយកទៅធ្វើនំ, ការ៉ែម និងកិនយកខ្ទិះដូងលក់ ព្រមទាំងអ្នកទិញដូងខ្ចីផឹកនៅពេលព្រឹកដើម្បីកាត់បន្ថយភាពចាស់ ។

បើតាមការពិនិត្យតាមចម្ការដូងជាច្រើនកន្លែងឱ្យដឹងថា កាលពីខែធ្នូ ឆ្នាំ២០២៣ ដូងលក់នៅតាមចម្ការ គឺមានតម្លៃពី៨បាត ទៅ១០បាតប៉ុណ្ណោះក្នុង១ផ្លែ ។ ប៉ុន្តែចាប់ពីខែមករា ឆ្នាំ២០២៤ មក តម្លៃចាប់ផ្តើមកើនឡើងពី១៦បាត ទៅ១៧បាតក្នុង១ផ្លែ ហើយកាលពីសប្តាហ៍ទី៤ ខែមេសា ឆ្នាំ២០២៤ ដូងលក់តាមចម្ការមានតម្លៃចាប់ពី៣៣បាត ទៅ៣៥បាតក្នុង១ផ្លែ ។

កត្តាចម្បងធ្វើឱ្យតម្លៃដូងកើនឡើងបែបនេះ ពីព្រោះនៅតំបន់ជាច្រើនប្រឈមនឹងបញ្ហាគ្រោះរាំងស្ងួតជាបន្តបន្ទាប់ ទើបបណ្តាលឱ្យប៉ះពាល់ដល់ផលដំណាំជាច្រើនប្រភេទ និងទទួលបានទិន្នផលទាប ខណៈតម្រូវការលើទីផ្សារខ្ពស់ ។ ហេតុនេះ វាធ្វើឱ្យខ្វះខាតដូងលក់នៅផ្សារ និងតម្លៃកើនឡើងជាបន្តបន្ទាប់ ខណៈចម្ការខ្លះគ្មានដូងលក់ ។

កាលពីសប្តាហ៍ទី៤ ខែមេសា ឆ្នាំ២០២៤ តម្លៃដូងបានធ្លាក់ចុះបន្តិច ដោយសារក្រុមហ៊ុននាំចេញផ្លែឈើទៅប្រទេសចិនជាច្រើនកាត់បន្ថយការទិញដូងដោយសារតម្លៃខ្ពស់ ហើយក្រុមហ៊ុនបានទិញទុរេនជំនួសវិញ ។ ហេតុនេះ វាធ្វើឱ្យតម្លៃដូងនៅតាមចម្ការធ្លាក់ចុះបន្តិច គឺនៅសល់ត្រឹមតែ២៨បាតក្នុង១ផ្លែ ។

លោក Natakrit Iamsakul នាយកក្រុមហ៊ុន Platinum Fruits ជាក្រុមហ៊ុននាំចេញផ្លែឈើដ៏ធំរបស់ថៃនិយាយថា ជាធម្មតា នៅត្រីមាសទី២ រៀងរាល់ឆ្នាំ គឺចូលដល់រដូវក្តៅ ហើយផ្លែដូងផ្តល់ទិន្នផលតិច ។ រីឯនៅឆ្នាំ២០២៤ តំបន់ជាច្រើនរបស់ថៃជួបបញ្ហាគ្រោះរាំងស្ងួតជាងឆ្នាំមុនៗ ទើបធ្វើឱ្យចម្ការដូងជាច្រើនកន្លែងនៅខេត្តរាជបុរី និងណាខនប៉ាធុម ផ្តល់ផលតិចជាងឆ្នាំមុន ។

ហេតុនេះ ការចំណាយដើមទុនសម្រាប់ចម្ការដូងបានកើនឡើងខ្ពស់ និងធ្វើឱ្យប៉ះពាល់ដល់ក្រុមហ៊ុននាំចេញផងដែរ ដែលត្រូវចំណាយដើមទុនខ្ពស់ ។ ពេលតម្លៃដូងកើនឡើងខ្ពស់ធ្វើឱ្យអតិថិជនផឹកទឹកផ្លែឈើកំប៉ុងជំនួសវិញ ។

លោក Natakrit Iamsakul បន្តថា ៖ «តម្លៃដូងនឹងកើនឡើងបន្តទៀតរហូតដល់កម្រិតខ្ពស់បំផុត ហើយបើវាកើនឡើងខ្ពស់ខ្លាំងធ្វើឱ្យការបញ្ជាទិញធ្លាក់ចុះ ។ ដូច្នេះ តម្លៃដូងនឹងមិនកើនឡើងទៀតទេ» ៕

ស្របពេលដែលរដូវក្តៅស្ងួតហួតហែង ដោយសង្កេតឃើញថាឧបទ្ទវហេ.តុ.ផ្ទុះ.ឆេះៗ កាន់តែកើតមានជាញឹកញាប់ក្នុងឆ្នាំ២០២៤ដែលទើបតែបានកន្លងទៅថ្មីៗនេះនៅអាស៊ី រួមមានទាំង វៀតណាម ថៃ ឥណ្ឌូនេស៊ី និងកម្ពុជាផងដែរ ដែលជាការព្រួយបា.រម្ភមួយនៅទូទាំងទ្វីប ជាពិសេសគឺប៉ះ.ពាល់ដល់អាយុជីវិតរបស់មនុស្ស សត្វ និងបរិស្ថាន។

សោកនាដកម្មដ៏សោកសង្រេងមួយបានកើតឡើងនាល្ងាចថ្ងៃទី២៧ ខែមេសា ឆ្នាំ២០២៤ ក្នុងឧបទ្ទវហេតុផ្ទុះឃ្លាំងផ្ទុកគ្រាប់ យោធភូមិភាគទី៣ នៃខេត្តកំពង់ស្ពឺ ក្នុងប្រទេសកម្ពុជា ដែលបណ្តាលឲ្យយោធិនចំនួន២០នាក់បានបាត់បង់ជីវិត និងជាការសោកស្តាយពេញមួយប្រទេសអំពីការពលីជីវិតដល់ជាតិមាតុភូមិ។ បន្ថែមពីនេះ តាមរយៈហេតុការណ៍នេះក៏បានបណ្តាលឲ្យមនុស្សជាច្រើនទៀតបានរងរបួស និងខូចខាតផ្ទះសម្បែងរបស់បងប្អូនប្រជាពលរដ្ឋនៅជុំវិញនោះជាច្រើនខ្នងផងដែរ។

ក្រឡេកមកមើលលប្រទេសវៀតណាមវិញ កាលពីល្ងាចថ្ងៃទី២៦ ខែមេសា ឆ្នំា២០២៤នេះ យោងតាមប្រភពសារព័ត៌មានរៀតណាមគឺបានកើតមានភ្លើងឆេះដ៏សន្ធោសន្ធៅមួយនៅជួរភ្នំ Co To ខេត្ត An Giang ប្រទេសវៀតណាម ស្របពេលដែលអាកាសធាតុក្តៅខ្លាំង ស្ងួតហួតហែង និងខ្យល់ខ្លាំង ទើបពិបាកក្នុងការពន្លត់អគ្គីភ័យ ហើយភ្លើងគឺរីករាលដាលកាន់តែខ្លាំង។ តាមរយៈហេតុការគេសង្កេតឃើញថាមានការផ្ទុះថ្ម ដោយសម្មតការផ្ទុះនេះគឺអាចបណ្តាលមកពី គ្រាប់បែកដែលបន្សល់ទុកមកតាំងពីសម័យសង្គ្រាម។

នៅឯវៀតណាមដដែល កាលពីថ្ងៃទី៩ ខែមេសា ឆ្នាំ២០២៤នេះ ក៏បានរាយការណ៍អំពីករណីផ្ទុះឆេះដ៏ធំមួយរបស់រោងចក្រក្រដាស ដែលមានឈ្មោះថា Hung Loi Paper Joint Stock Company មានទីតាំងស្ថិតនៅ ខេត្ត Bac Ninh ភាគខាងជើងនៃប្រទេសវៀតណាម ដែលបណ្តាលឲ្យមនុស្សស្លាប់នឹងរងរបួសមួយចំនួន។

ដោយឡែកនៅឯប្រទេសថៃ កាលពីថ្ងៃទី២២ ខែមេសា ឆ្នាំ២០២៤ គឺបានលេចឡើងនូវករណីអគ្គីភ័យ ឆាបឆេះ និងផ្ទុះឃ្លាំងផ្ទុកសារធាតុគីមីមួយកន្លែងស្ថិតនៅក្នុងខេត្តរ៉ាក់យ៉ង ប្រទេសថៃ។ តាមការបញ្ជាក់ ក្រុមហ៊ុននេះគឺជាក្រុមហ៊ុនឧស្សាហកម្ម និងបានផ្ទុកនូវសារធាតុគីមីជាច្រើនប្រភេទផងដែរ ទើបនាំឲ្យមានការជម្លៀសប្រជាពលរដ្ឋដែលរស់នៅតំបន់ជុំវិញនោះឲ្យគេចចេញ ដើម្បីឲ្យកុំឲ្យស្រូបយកនូវឧស្ម័នគីមីទាំងនោះ។ ទោះជាយ៉ាងណា ប្រជាពលរដ្ឋប្រមាណ ៧៨នាក់ ស្ថិតនៅបរិវេននោះបានទទួលរងឥទ្ធិពលអាក្រក់ពីផ្សែងគីមី ជាហេតុនាំឲ្យកើតមានជំងឺផ្លូវដង្ហើមត្រូវបញ្ជូនទៅកាន់មន្ទីរពេទ្យភ្លាមៗ។ គិតមកត្រឹមពេលនេះ មនុស្សប្រមាណ៤នាក់កំពុងស្ថិតនៅក្នុងកម្រិតធ្ងន់ធ្ងរនៅឡើយ។

ចំណែកប្រទេសឥណ្ឌូនេស៊ី កាលពីថ្ងៃទី៣០ ខែមីនា ឆ្នាំ២០២៤នេះ ក៏បានកើតមាននូវហេតុការណ៍ផ្ទុះឃ្លាំងរំសេវដ៏ធំមួយនៅក្រៅក្រុង ដោយគេកំណត់អន្តសញ្ញាណបានថា វាទំនងជាកើតឡើងដោយសារតែការរក្សាទុកគ្រាប់រំសេវដែលផុតកំណត់ទើបបណ្តាលឲ្យមានអគ្គីភ័យឆាបឆេះនិងរាលដាលផ្នែកផ្សេងទៀត។ ប៉ុន្តែជាសំណាងល្អ គឺមិនមានអ្នកស្លាប់ឬរបួសដោយសារតែឧបទ្ទវហេតុនេះនោះទេ។

ទោះជាយ៉ាងណា ជុំវិញករណីផ្ទុះឆេះទាំងនេះ នៅតែមិនទាន់មានការបញ្ជាក់ថាកើតឡើងដោយសារមូលហេតុចម្បងអ្វីឲ្យជាក់លាក់នៅឡើយនោះទេ៕

កាលពីថ្ងៃទី២៧ ខែមេសា ឆ្នាំ២០២៤ សារព័ត៌មាន AFP បានរាយការណ៍ពីរបាយការណ៍របស់អង្គការសុខភាពពិភពលោកថា អត្រាការផឹកគ្រឿងស្រវឹ.ង និងជក់បា.រី អេឡិចត្រូនិករបស់យុវជនលើពិភពលោក កើនឡើងគួរឱ្យភ្ញាក់ផ្អើល ។ របាយការណ៍នេះអំពាវនាវឱ្យរដ្ឋាភិបាលប្រទេសនានាកំណត់វិធានការដោះស្រាយជាបន្ទាន់ ក្រោយពីលទ្ធផលស្ទង់មតិបង្ហាញថា យុវជនជាង២៨ម៉ឺននាក់ មានអាយុ១១ឆ្នាំ, ១៣ឆ្នាំ និង១៥ឆ្នាំ នៅទ្វីបអឺរ៉ុប, អាស៊ីកណ្តាល និងកាណាដា ប្រើប្រាស់ថ្នាំញៀន និងផឹកគ្រឿងស្រវឹង ។

មន្ត្រីអង្គការសុខភាពពិភពលោក (WHO) និយាយថា ៖ «ផលប៉ះពាល់រយៈពេលវែងដោយសារការប្រើប្រាស់ថ្នាំញៀនជាបញ្ហាសំខាន់ ហើយមេដឹកនាំប្រទេសនីមួយៗពុំគួរព្រងើយកន្តើយនឹងតួលេខនេះទេ» ។ របាយការណ៍បញ្ជាក់ថា យុវជនអាយុ១៥ឆ្នាំ ស្មើ៥៧% បានផឹកគ្រឿងស្រវឹង ហើយអត្រាការផឹកគ្រឿងស្រវឹងរបស់ក្មេងប្រុសធ្លាក់ចុះ ខណៈក្មេងស្រីកើនឡើង ។

ការិយាល័យប្រចាំតំបន់របស់អង្គការសុខភាពពិភពលោកនៅអឺរ៉ុប ដែលគ្របដណ្តប់ប្រទេសចំនួន៥៣ រួមទាំងអាស៊ីកណ្តាល បានចេញសេចក្តីថ្លែងការណ៍ថា ៖ «ការរកឃើញលើកនេះបង្ហាញឱ្យឃើញថា យុវជនទាំងនេះងាយស្រួលស្វែងរកគ្រឿងស្រវឹង និងក្លាយជារឿងធម្មតា ។ ហេតុនេះ រដ្ឋាភិបាលប្រទេសនីមួយៗគួរស្វែងរកវិធានការដោះស្រាយបន្ទាន់ដើម្បីការពារកុមារ និងយុវជនឱ្យចៀសផុតពីគ្រោះថ្នាក់ដោយសារគ្រឿងស្រវឹង» ។

ក្រៅពីនេះ របាយការណ៍បង្ហាញថា ការជក់បារីអេឡិចត្រូនិកបានកើនឡើង និងធ្វើឱ្យការជក់បារីធម្មតាធ្លាក់ចុះ ។ កាលពីឆ្នាំ២០២២ កុមារមានអាយុចាប់ពី១១ឆ្នាំ ដល់១៥ឆ្នាំ ស្មើ១៣% បានជក់បារីធម្មតាតិចតួច បើធៀបនឹងរយៈពេល៤ឆ្នាំមុន ខណៈកុមារអាយុ១៥ឆ្នាំ ស្មើ៣២% បានជក់បារីអេឡិចត្រូនិក ។

លោក Hans Kluge នាយកអង្គការសុខភាពពិភពលោក ប្រចាំតំបន់អឺរ៉ុបនិយាយថា ៖ «ការប្រើប្រាស់សារធាតុគ្រោះថ្នាក់យ៉ាងទូលំទូលាយនៅប្រទេសជាច្រើនក្នុងតំបន់អឺរ៉ុប និងតំបន់ផ្សេងទៀតបានគំរាមកំហែងយ៉ាងខ្លាំងដល់ផ្នែកសុខាភិបាល ។ ហេតុនេះ គួរបង្កើនអត្រាពន្ធគ្រឿងស្រវឹង ឬថ្នាំជក់ និងរឹតបន្តឹងច្បាប់សម្រាប់ការលក់ និងផ្សាយពាណិជ្ជកម្ម» ។

របាយការណ៍បញ្ជាក់ថា អាកប្បកិរិយាក្នុងវ័យជំទង់នឹងប៉ះពាល់ដល់សុខភាព និងបំផ្លាញអនាគតរបស់ពួកគេ ហើយការផឹកគ្រឿងស្រវឹង ឬជក់បារីតាំងពីក្មេងនឹងធ្វើឱ្យពួកគេកាន់តែញៀនខ្លាំងឡើង និងពិបាកកាត់ផ្តាច់ ។ ទោះយ៉ាងណា ការប្រើប្រាស់កញ្ឆារបស់កុមារអាយុ១៥ឆ្នាំ បានធ្លាក់ចុះស្មើ១២% និងធ្លាក់ចុះ៤% ក្នុងរយៈពេលជាច្រើនឆ្នាំកន្លងមក ៕

បរទេស៖ កាលពីពេលថ្មីៗនេះយោងតាម Money Control ដែលបានចុះផ្សាយកាលពីថ្ងៃទី២៨ ខែមេសា ឆ្នាំ២០២៤ ថាមានស្ត្រីជនជាតិកូរ៉េម្នាក់ត្រូវបានគេបោកប្រាស់ប្រាក់ជិត ៥១,០០០ ដុល្លារអាមេរិក បន្ទាប់ពីបុរសម្នាក់បានប្រើប្រាស់កម្មវិធី AI ផ្លាស់ប្តូរមុខទៅជា Elon Musk ដើម្បីសុំស្គាល់នាង និងសុំឱ្យនាងផ្ទេរប្រាក់។

យោងតាមប្រភពដដែលបានឱ្យដឹងថា ជនរងគ្រោះដែលជាជនជាតិកូរ៉េនោះមានឈ្មោះថា Jeong Ji-sun ដោយនាងបាននិយាយតាមកញ្ចក់ទូរទស្សន៍ថា មូលហេតុដែលនាងត្រូវបានគេបោកប្រាស់ប្រាក់ជិត ៥១,០០០ ដុល្លារ គឺដោយសារដំបូងមានអាខោន Instagram មួយដែលដាក់រូប Elon Musk បាន Follow ទៅនាងកាលពីថ្ងៃទី ១៧ ខែកក្កដា ឆ្នាំ ២០២៣។ ក្នុងពេលនោះអាខោនចម្លែកនោះក៏បានចាប់ផ្តើមឆាតទាក់ទងទៅនាង ហើយបានផ្ញើរូបថតលេខសម្គាល់របស់គាត់ និងរូបថតគាត់នៅកន្លែងធ្វើការឱ្យទៅនាង។ ដោយបុគ្គលនោះបាននិយាយអំពីកូនរបស់គាត់ របៀបដែលគាត់ទៅធ្វើការដោយឧទ្ធម្ភាគចក្រ ហើយនិយាយថាគាត់តែងតែទាក់ទងជាមួយអ្នកគាំទ្រដោយចៃដន្យ។

ជនរងគ្រោះ Jeong Ji-sun បានប្រាប់សារព័ត៌មានទៀតថា ក្នុងពេលទាក់ទងតាមឆាតនោះនាងនៅតែមានអារម្មណ៍មន្ទិលក៏បានឆែកជីវប្រវត្តិរបស់ Musk ហើយក៏បានសួរអំពីបទពិសោធន៍របស់ Musk ក្នុងការជួបជាមួយប្រធានាធិបតីកូរ៉េខាងត្បូង Yoon Suk-yeol ក្នុងខែមេសា ឆ្នាំ២០២៣ បុរសក្លែងបន្លំបាននិយាយថាអ្នកទាំងពីរបានពិភាក្សាគ្នាអំពី “ការបង្កើតរោងចក្រទំនើបនៅសេអ៊ូល និងជេជូ”។ Jeong ក៏បានបន្តទៀតថា បុរសនោះថែមទាំងនិយាយថាគាត់ស្រឡាញ់នាងក្នុងអំឡុងពេលខលវីដេអូជាមួយគ្នា ដោយនាងជឿជាក់ទាំងស្រុងថាមនុស្សម្នាក់នេះពិតជា Elon Musk ។ បន្ទាប់មកអ្នកបោកប្រាស់បានឱ្យជនរងគ្រោះនូវលេខគណនីធនាគារនៅប្រទេសកូរ៉េ និងលើកទឹកចិត្តឱ្យនាងផ្ទេរប្រាក់វិនិយោគដោយបុរសនោះបាននិយាថា “គាត់រីករាយណាស់ដែលបានឃើញអ្នកគាំទ្ររបស់គាត់ក្លាយជាអ្នកមាន”។

មិនយូរប៉ុន្មាន Jeong ក៏បានផ្ទេរប្រាក់សរុបចំនួន ៧០ លានវ៉ុន (ប្រមាណជិត ៥១,០០០ ដុល្លារអាមេរិក) ទៅក្នុងគណនីបុរសនោះ មុនពេលអ្នកបោកប្រាស់បាត់ខ្លួន។ គួរបញ្ជាក់ដែរថា នេះមិនមែនជាលើកទីមួយទេ ដែលជនខិលខូចបានប្រើប្រាស់ប្រព័ន្ធបច្ចេកវិទ្យា AI ដើម្បីក្លែងបន្លំលួចយកប្រយោជន៍ពីរូបភាពបុគ្គលល្បីៗដូច Elon Musk ជាដើម។ ដូច្នេះហើយ បច្ចេកវិទ្យាកាន់តែទំនើប គឺកាន់តែគ្រោះថ្នាក់ ដោយសារបច្ចេកវិទ្យាទាំងនោះភាគច្រើនបានធ្លាក់ចូលដៃរបស់ពួកគេ Hacker ដែលធ្វើឱ្យមនុស្សជុំវិញពិភពលោកប្រឈមនឹងការបោកប្រាស់ធ្ងន់ធ្ងរ។

នេះបើយោងតាមការស្រាវជ្រាវដោយសាកលវិទ្យាល័យសេអ៊ូលបានបង្ហាញថា ករណីឆបោកចំនួន ២៨០ ត្រូវបានរកឃើញក្នុងកំឡុងខែមករា ដល់ខែមិថុនា ឆ្នាំ ២០២២ ដែលក្នុងនោះ ៧១.៤% នៃជនរងគ្រោះគឺជាស្ត្រី។ ទោះជាយ៉ាងណាក៏ដោយ ប្រព័ន្ធផ្សព្វផ្សាយកូរ៉េបានវាយតម្លៃថា ច្បាប់របស់ប្រទេសនេះនៅតែខ្វះបទប្បញ្ញត្តិដើម្បីការពារកុំឱ្យឧបទ្ទវហេតុកើតឡើងម្តងទៀត។ ជនរងគ្រោះភាគច្រើននៃការបោកប្រាស់ស្នេហាបានផ្ទេរប្រាក់តាមរយៈកាតឥណទានទៅកាន់គេហទំព័រក្លែងក្លាយដែលបង្កើតឡើងដោយឧក្រិដ្ឋជន ដែលទុកឱ្យអាជ្ញាធរគ្មានមូលដ្ឋានដើម្បីផ្អាកប្រតិបត្តិការ និងការពារការដកប្រាក់៕

បើតាមរបាយការណ៍ថ្មីរបស់ European Central Banl បង្ហាញថា អាកាសធាតុនៅលើពិភពលោកបានផ្លាស់ប្តូរយ៉ាងខ្លាំង ជាហេតុធ្វើឱ្យតម្លៃអាហារកើនឡើង៣,២% ក្នុង១ឆ្នាំ ។ ចាប់ពីឆ្នាំ១៩៩៦ ដល់ឆ្នាំ២០២៤ របាយការណ៍នេះបានស្រាវជ្រាវពីតម្លៃអាហារ និងទំនិញផ្សេងៗក្នុង១ខែៗនៅប្រទេសចំនួន១២១ និងស្រាវជ្រាវពីសីតុណ្ហភាព និងកត្តាអាកាសធាតុដែលធ្វើឱ្យប៉ះពាល់តម្លៃអាហារផងដែរ ។

របាយការណ៍នេះបញ្ជាក់ថា ពេលអាកាសធាតុកាន់តែប្រែប្រួលខ្លាំងធ្វើឱ្យបន្លែបង្ការ, គ្រឿងផ្សំ និងទិន្នផលកសិកម្មកាន់តែពិបាកស្វែងរក ហើយមនុស្សជាច្រើនលើពិភពលោក គ្មានអាហារសម្បូរបែប និងល្អសម្រាប់សុខភាពដូចមុន ឬអាចមានអាហារ តែមិនគ្រប់គ្រាន់ ។ ហេតុនេះ វាធ្វើឱ្យតម្លៃអាហារកើនឡើងចាប់ពី០,៩% ដល់៣,២% ក្នុង១ឆ្នាំ នៅឆ្នាំ២០៣៥ ហើយគ្រួសារនីមួយៗបានចំណាយប្រាក់កាន់តែច្រើនដើម្បីទិញអាហារ ។

នៅឆ្នាំ២០៦០ តម្លៃអាហារលើពិភពលោក នឹងកើនឡើងចាប់ពី២,២% ដល់៤,៣% ក្នុង១ឆ្នាំ ហើយប្រទេសទាំងអស់នឹងប្រឈមជាមួយបញ្ហាតម្លៃអាហារកើនឡើង មិនថាប្រទេសអភិវឌ្ឍន៍ ឬប្រទេសក្រីក្រ ។ រីឯប្រទេសនៅទ្វីបអាហ្វ្រិកនឹងរងផលប៉ះពាល់ខ្លាំងជាងគេ បើទោះជាទ្វីបអាហ្វ្រិកមានចំណែកតិចតួចក្នុងការធ្វើឱ្យអាកាសធាតុពិភពលោកប្រែប្រួលក្តី ។

គណៈកម្មការ Intergovernmental Panel on Climate Change (IPCC) បានប្រៀបធៀបទ្វីបអាហ្វ្រិកខាងលិចថា ជាចំណុចក្តៅនៃបម្រែបម្រួលអាកាសធាតុ និងព្យាករថា តំបន់នេះនឹងមានសីតុណ្ហភាពកើនឡើងខ្លាំង និងមានបរិមាណទឹកភ្លៀងតិចតួច ។ ហេតុនេះ កសិករជាងពាក់កណ្តាលនៅប្រទេសហ្គាណាបានពឹងផ្អែកលើការធ្វើកសិកម្មតាមធម្មជាតិ ត្រូវប្រឈមនឹងបញ្ហាបម្រែបម្រួលអាកាសធាតុ ។

របាយការណ៍ដដែលបង្ហាញទៀតថា ពលរដ្ឋមានចំណេះដឹងពីបម្រែបម្រួលអាកាសធាតុនៅហ្គាណាបានកើនឡើង នឹងធ្វើឱ្យប្រទេសនេះមានស្បៀងអាហារគ្រប់គ្រាន់ បើទោះជាមានពលរដ្ឋតិចតួចបានសិក្សាពីអាកាសធាតុក្តៅក្តី ។ វាបញ្ជាក់ថា ពលរដ្ឋរងផលប៉ះពាល់បានយល់ច្បាស់ពីសីតុណ្ហភាពផ្លាស់ប្តូរ នឹងអាចដោះស្រាយវិបត្តិនេះ ៕