ប្រទេសឥណ្ឌូណេស៊ី ៖ ភ្ញៀវទេសចរចិនម្នាក់បានស្លាប់យ៉ាងអាណោចអាធ័ម ក្រោយពីនាងធ្លាក់ចូលក្នុងរណ្តៅភ្នំភ្លើងនៅប្រទេសឥណ្ឌូណេស៊ី ខណៈពេលនាងកំពុងតែថតរូបភាពថ្ងៃរះជាមួយស្វាមី ។ នេះបើតាមការចុះផ្សាយរបស់សារព័ត៌មានបរទេស នៅថ្ងៃទី២៤ ខែមេសា ឆ្នាំ២០២៤ ។

សារព័ត៌មានក្នុងស្រុករាយការណ៍ថា នារីឈ្មោះ Huang Lihong អាយុ៣១ឆ្នាំ បានធ្លាក់ចូលក្នុងរណ្តៅភ្នំភ្លើង «ខាវ៉ាអ៊ីចៀន» ស្ថិតនៅទីក្រុង Banyuwangi ប្រទេសឥណ្ឌូណេស៊ី កាលពីថ្ងៃទី២០ ខែមេសា ឆ្នាំ២០២៤ ។ នាង និងស្វាមីឈ្មោះ Zhang Yong បានឡើងទៅលើភ្នំភ្លើងជាមួយមគ្គុទ្ទេសក៍ទេសចរឥណ្ឌូណេស៊ី ដើម្បីទៅទស្សនាភាពស្រស់ស្អាតរបស់ថ្ងៃរះនៅលើកំពូលភ្នំភ្លើង ។

ក្នុងអំឡុងពេលនាងកំពុងថតរូបភាពនៅលើភ្នំភ្លើងនោះ ស្រាប់តែនាងដើរទាក់សំពត់ និងជំពប់ជើងដួលធ្លាក់ចូលក្នុងរណ្តៅភ្នំភ្លើងនៅចំពោះមុខស្វាមីរបស់នាង ។ រូបថតមួយសន្លឹកដែលបានផ្សព្វផ្សាយក្រោយកើតហេតុការណ៍នេះបង្ហាញថា ស្ត្រីរងគ្រោះបានឈរនៅលើគែមភ្នំភ្លើង និងលើកជើងម្ខាង ហើយគេបានឃើញឧស្ម័នស្ពាន់ធរអណ្តែតឡើងមកនៅខាងក្រោយខ្នងនាង ។

សារព័ត៌មានក្នុងស្រុករាយការណ៍ថា ក្រោយពីនាងធ្លាក់ចូលក្នុងរណ្តៅភ្នំភ្លើង ក្រុមភ្នាក់ងារជួយសង្គ្រោះបានចំណាយពេលអស់ជាង២ម៉ោង ដើម្បីយកសពរបស់នាងចេញមក ។ គេបានបញ្ជូនសពនាងទៅកាន់កោះបាលី បន្ទាប់មក ដឹកសពតាមយន្តហោះទៅប្រទេសចិន ។

Dwi Putro Sujihato ជាមន្ត្រីការិយាល័យការពារធនធានធម្មជាតិនៅទីក្រុង Banyuwangi ប្រទេសឥណ្ឌូណេស៊ី ប្រាប់ថា ភ្ញៀវទេសចរទាំងអស់គួរតែប្រុងប្រយ័ត្នពីសុវត្ថិភាពគ្រប់ពេលវេលា នៅពេលពួកគេឡើងលើភ្នំភ្លើង «ខាវ៉ាអ៊ីចៀន» ។

ភ្នំភ្លើង «ខាវ៉ាអ៊ីចៀន» ជាតំបន់ទេសចរណ៍ពេញនិយមសម្រាប់ភ្ញៀវទេសចរនៅប្រទេសលោកខាងកើត ក្រោយពីទស្សនាវដ្តី National Geographic បានផ្សព្វផ្សាយពី Api Biru (ឬអណ្តាតភ្លើងពណ៌ខៀវ) ដែលជាបាតុភូតកម្រកើតឡើង ។ អណ្តាតភ្លើងនេះកើតពីប្រតិកម្មចំហេះរបស់អាស៊ីតស៊ុលហ្វួរិក ទើបធ្វើឱ្យភ្ញៀវទេសចរនៅលើពិភពលោក ចង់ធ្វើដំណើរមកកាន់ភ្នំនេះ ដើម្បីបានឃើញពន្លឺនេះដោយផ្ទាល់ភ្នែក ៕

ប្រទេសចិន៖ ក្នុងរយៈពេល ៣ ខែដំបូងនៃដើមឆ្នាំនេះ ការលក់ទូរស័ព្ទ iPhone នៅក្នុងទីផ្សារប្រទេសចិនបានធ្លាក់ចុះ ១៩.១% ខណៈពេលដែលគូប្រជែង Huawei កើនឡើង ៦៩.១% នេះបើយោងតាមការចុះផ្សាយរបស់ CNBC កាលពីថ្ងៃទី២៣ ខែមេសា ឆ្នាំ២០២៤។
យោងតាមប្រភពដដែលបានឱ្យដឹងទៀតថា ការដណ្តើមយកទីផ្សារចិនរបស់ Apple កាន់តែអាក្រក់ទៅៗ។ ស្ថិតិពីក្រុមហ៊ុនស្រាវជ្រាវ Counterpoint Research បង្ហាញថា ក្នុងត្រីមាសទី ១ នៃឆ្នាំ ២០២៤ ការលក់ iPhone បានធ្លាក់ចុះពីចំណាត់ថ្នាក់លេខ ១ ដល់លេខ ៣ តាមពីក្រោយ Vivo និង Honor ។ ការធ្លាក់ចុះនេះបង្ហាញពីដំណើរការលក់ទាបបំផុតរបស់ក្រុមហ៊ុន Apple នៅក្នុងប្រទេសចិនចាប់តាំងពីឆ្នាំ ២០២០ ហើយបង្ហាញពីការប្រកួតប្រជែងកាន់តែខ្លាំងឡើងពីគូប្រជែងក្នុងស្រុក។

នៅចុងត្រីមាសទីមួយនៃឆ្នាំនេះ Apple មានចំណែកទីផ្សារស្មាតហ្វូននៅក្នុងប្រទេសចិនត្រឹមតែ ១៥.៧% ប៉ុណ្ណោះ ធ្លាក់ចុះ ១៩.៧% ក្នុងរយៈពេលដូចគ្នាកាលពីឆ្នាំមុន។ ផ្ទុយពីការធ្លាក់ចុះរបស់ក្រុមហ៊ុន Apple ការលក់ទូរស័ព្ទ Huawei បានកើនឡើងរហូតដល់ ៦៩.១% ក្នុងរយៈពេលដូចគ្នានេះ។ លោក Ivan Lam អ្នកវិភាគ Counterpoint បាននិយាយថា ការកើនឡើងយ៉ាងខ្លាំងរបស់ក្រុមហ៊ុន Huawei បានជះឥទ្ធិពលដោយផ្ទាល់ទៅលើការលក់ iPhone ។ យោងតាម Reuters បានវាយតម្លៃថាការកើនឡើងរបស់ក្រុមហ៊ុន Huawei បង្ហាញពីការគំរាមកំហែងដល់តំណែងឈានមុខគេរបស់ក្រុមហ៊ុន Apple នៅក្នុងផ្នែកកម្រិតខ្ពស់។

SCMP ជឿជាក់ថាស្មាតហ្វូន Pura 70 series ដែលទើបនឹងចេញថ្មី នឹងបន្តធ្វើឱ្យ iPhone មានការលំបាកក្នុងបរិបទដែលក្រុមហ៊ុនចិនមានបំណងចង់ទទួលបានតំណែងនាំមុខគេនៅក្នុងប្រទេសកំណើតរបស់ខ្លួន។ យោងតាមអ្នកវិភាគនៅ TechInsights ទូរស័ព្ទ Pura 70 នឹងក្លាយជាដៃគូប្រកួតប្រជែងដ៏សំខាន់មួយរបស់ iPhone 15 និង iPhone 16 ។ ក្រុមហ៊ុន Huawei ត្រូវបានគេរំពឹងថានឹងនាំចេញស្មាតហ្វូនសរុបជាង ៥០ លានគ្រឿងនៅក្នុងប្រទេសចិននៅឆ្នាំនេះ ដែលជួយឱ្យទទួលបានចំណាត់ថ្នាក់លេខមួយ។

ទោះជាយ៉ាងណា លោក Ivan Lam របស់ Counterpoint មានសុទិដ្ឋិនិយមថា Apple នៅតែអាចផ្លាស់ប្តូរស្ថានការណ៍នៅប៉ុន្មានខែខាងមុខនេះ នៅពេលដែល iPhone 16 ចេញលក់។ យោងតាម Business Insider ប្រទេសចិនគឺជាទីផ្សារដ៏សំខាន់សម្រាប់ Apple បន្ទាប់ពីអាមេរិក និងអឺរ៉ុប។ មិនត្រឹមតែដោះស្រាយការកើនឡើងនៃគូប្រជែងរបស់ចិនប៉ុណ្ណោះទេ Apple ក៏កំពុងតែប្រឈមមុខនឹងស្ថានការណ៍ផ្សេងៗទៀត ដែលកាលពីខែមីនា ក្រុមហ៊ុន Apple ប្រឈមនឹងបណ្តឹងប្រឆាំងការទុកចិត្តពីក្រសួងយុត្តិធម៌នៅសហរដ្ឋអាមេរិក ហើយគណៈកម្មការអឺរ៉ុបបានពិន័យក្រុមហ៊ុនចំនួន ១.៩៥ ពាន់លានដុល្លារ៕

ប្រទេសថៃ ៖ លោក Srettha Thavisin នាយករដ្ឋមន្ត្រីថៃ និងជារដ្ឋមន្ត្រីក្រសួងហិរញ្ញវត្ថុបានអញ្ជើញធនាគារចំនួន៤ មកពិភាក្សាគ្នាមុនពេលកិច្ចប្រជុំគណៈរដ្ឋមន្ត្រី ដោយលោកស្នើឱ្យធនាគារទាំងនេះជួយកាត់បន្ថយអត្រាការប្រាក់ និងផ្តោតលើក្រុមពលរដ្ឋងាយរងគ្រោះ ។ លោកនាយករដ្ឋមន្ត្រីថៃថ្លែងថា រដ្ឋាភិបាលមើលឃើញពីទុក្ខលំបាករបស់ពលរដ្ឋ ហើយការស្នើឱ្យធនាគារកាត់បន្ថយអត្រាការប្រាក់នេះ មិនមែនជាការដាក់សម្ពាធទេ ។

កាលពីវេលាម៉ោង៨និង៣០នាទីព្រឹក ថ្ងៃទី២៣ ខែមេសា ឆ្នាំ២០២៤ មុនពេលកិច្ចប្រជុំគណៈរដ្ឋមន្ត្រីនៅវិមានរដ្ឋាភិបាល លោក Srettha Thavisin នាយករដ្ឋមន្ត្រីថៃ បានអញ្ជើញមន្ត្រីតំណាងធនាគារចំនួន៤ មកពិភាក្សាជាមួយគ្នានៅអគារ «ថៃឃូហ្វា» ក្នុងនោះមានមន្ត្រីមកពីធនាគារកសិកនថៃ, ធនាគារក្រុងថៃ, ធនាគារក្រុងថេប និងធនាគារថៃពាណិជ្ជ ហើយការពិភាក្សាគ្នានេះ មានរយៈពេលប្រមាណ៣០នាទី ។

ក្រោយមក នៅវេលាម៉ោង៩និង៤០នាទីព្រឹកថ្ងៃដដែល លោក Srettha Thavisin បានលើកឡើងក្រោយពីការពិភាក្សាជាមួយមន្ត្រីតំណាងធនាគារថា លោកបានអញ្ជើញមន្ត្រីតំណាងធនាគារចំនួន៤ មកពិភាក្សាអំពីបញ្ហាសេដ្ឋកិច្ចទូទៅ រួមទាំងការជជែកពីភាពរឹងមាំនៃស្ថាប័នហិរញ្ញវត្ថុ តាមរយៈលទ្ធផលប្រតិបត្តិរបស់ពួកគេ ។

លោកបានជម្រាបទៅមន្ត្រីធនាគារថា ពលរដ្ឋថៃ ជាពិសេសបំផុត គឺពលរដ្ឋងាយរងគ្រោះ ( រួមមាន ៖ អ្នកជំងឺនៅមន្ទីរពេទ្យ, ជនពិការផ្នែកខួរក្បាល, អ្នកជំងឺធ្ងន់ធ្ងរ, អ្នកជំងឺផ្លូវចិត្ត, ស្ត្រីមានផ្ទៃពោះ, ជនក្រីក្រ, អ្នកទោស, កងទ័ព និងពលករបរទេស) រួមទាំងក្រុម SME ឬអាជីវកម្មខ្នាតតូច សុទ្ធតែមានបញ្ហារឿងអត្រាការប្រាក់ខ្ពស់ ។ ដូច្នេះ លោកបានស្នើសុំ និងជជែកជាមួយមន្ត្រីតំណាងធនាគារទាំង៤ ថា គួរតែពិចារណាពីការកាត់បន្ថយអត្រាការប្រាក់ ហើយមន្ត្រីទាំងនេះក៏បានសន្យាថា នឹងពិភាក្សាគ្នាបន្តទៀត ។

លោក Srettha Thavisin បន្តថា រដ្ឋាភិបាលមើលឃើញពីទុក្ខលំបាករបស់ពលរដ្ឋរឿងអត្រាការប្រាក់បង់ធនាគារ ទើបលោកអញ្ជើញមន្ត្រីធនាគារទាំង៤ មកជជែកគ្នា ហើយពួកគេក៏បានមកជួបលោកទាំងអស់គ្នា ។ លោកចង់និយាយទៅកាន់ពួកគេឱ្យមានភាពស្មើគ្នា ពីព្រោះវាមិនមែនជាការប្រកួតប្រជែងផ្នែកសេដ្ឋកិច្ច ឬប្រកួតរវាងធនាគារទេ ។ ប៉ុន្តែលោកចង់ឱ្យធនាគារទាំងនេះឯកភាពគ្នា ហើយសាកល្បងថា តើអាចជួយគ្នាបានតិច ឬច្រើនកម្រិតណា ។

ពេលអ្នកសារព័ត៌មានសួរថា ក្រោយពីការជជែកគ្នាជាមួយធនាគារទាំងនេះ តើមានការកំណត់រយៈពេលដែរឬទេថា ពួកគេនឹងឆ្លើយតបនៅពេលណា? លោក Srettha Thavisin និយាយថា ៖ «មិនបានកំណត់ពេលវេលាទេ រឿងនេះជាការផ្តល់កិត្តិយសឱ្យគ្នាទៅវិញទៅមក ។ ដូច្នេះ ខ្ញុំមិនដាក់សម្ពាធអ្វីទេ គឺខ្ញុំផ្តល់កិត្តិយសដល់មន្ត្រីតំណាងធនាគារទាំង៤រូប» ។

លោកនាយករដ្ឋមន្ត្រីថៃបញ្ជាក់ថា បរិយាកាសនៃការពិភាក្សានេះបានដំណើរការយ៉ាងល្អ ហើយមន្ត្រីតំណាងធនាគារទាំង៤ អាចពិចារណាថា គួរតែធ្វើដូចម្តេច? លោកបានសង្កត់ធ្ងន់លើការកាត់បន្ថយអត្រាការប្រាក់សម្រាប់ពលរដ្ឋងាយរងគ្រោះ ពីព្រោះពួកគេត្រូវការជំនួយ ៕

ប្រទេសបារាំង៖ ផ្ទះចំណាស់មួយខ្នងដែលមានទំហំ ៧៧.១៨ ម៉ែត្រការ៉េ ក្នុងទីក្រុង Saint-Amand-Montrond ប្រទេសបារាំងត្រូវបានគេដាក់លក់ក្នុងតម្លៃត្រឹមតែ ១ អឺរ៉ូប៉ុណ្ណោះ (ប្រមាណ ១.០៧ ដុល្លារអាមេរិក) នេះបើយោងតាមការចុះផ្សាយរបស់ CNBC កាលពីថ្ងៃទី២៣ ខែមេសា ឆ្នាំ២០២៤។
គម្រោងលក់អចលនទ្រព្យដែលត្រូវបានគេបោះបង់ចោល ឬខូចខាតក្នុងតម្លៃប្រហែល ១ ដុល្លារនេះបានកំពុងរីកដុះដាលយ៉ាងខ្លាំងនៅទូទាំងទ្វីបអឺរ៉ុប ក្នុងគោលបំណងដើម្បីទាក់ទាញអ្នកទិញ ក៏ដូចជាលើកទឹកចិត្តដល់ការជួសជុលផ្ទះចាស់ៗ កាត់បន្ថយចំនួនផ្ទះទទេ និងជួយបញ្ច្រាសចំនួនប្រជាជនដែលធ្លាក់ចុះ ធ្វើឱ្យកណ្តាលទីក្រុងមានភាពរស់រវើកឡើងវិញ។

ដូច្នេះទីក្រុងមួយនៅកណ្តាលប្រទេសបារាំងបានកំពុងលក់ផ្ទះមួយខ្នងទំហំ ៧៧.១៨ ម៉ែត្រការ៉េ ក្នុងតម្លៃ ១ អឺរ៉ូ ដែលវាជាផ្ទះពីរជាន់មានបន្ទប់គេងពីរ ផ្ទះបាយមួយ និងបន្ទប់ទឹកមួយ។ អចលនទ្រព្យនេះក៏រួមបញ្ចូលទីធ្លាប្រហែល ១៣ ម៉ែត្រការ៉េ និងយានដ្ឋានទំហំ ១៦ ម៉ែត្រការ៉េផងដែរ ហើយវាមានទីតាំងជិតមន្ទីរពេទ្យ សាលារៀន ហាងទំនិញ និងកន្លែងលេងកីឡាទៀតផង។ ផ្ទះនេះបើកចំហសម្រាប់ជនជាតិបារាំង និងជនបរទេស ដោយមិនគិតពីថាតើពួកគេនៅលីវ មានគ្រួសារ ធ្វើការ ឬចូលនិវត្តន៍នោះទេ។ ទោះជាយ៉ាងណាក៏ដោយ នៅពេលដែលអ្នកទិញផ្ទះចំណាស់នេះគឺដាច់ខាតត្រូវតែជួសជុល ដែលតម្លៃជួសជុលប្រហែល ១៣៦ ១៥៦ ដុល្លារអាមេរិក (មួយសែនបីម៉ឺនប្រាំមួយពាន់មួយរយហាសិបប្រាំមួយដុល្លារអាមេរិក)។

អ្នកទិញក៏ត្រូវរស់នៅក្នុងផ្ទះនេះយ៉ាងហោចណាស់ ១០ ឆ្នាំ ដោយសារផ្ទះនេះត្រូវបានគេបោះបង់ចោលរយៈពេល ១២ ឆ្នាំហើយ។ យោងតាមលោក Blondieau បាននិយាយថា បច្ចុប្បន្នទីក្រុង Saint-Amand-Montrond មានប្រជាជនរស់នៅជាង ៩,០០០ នាក់ ទោះជាយ៉ាងណាគម្រោងនេះមិនតម្រូវឱ្យអ្នកដែលរស់នៅទីក្រុងនេះទិញផ្ទះទេ ព្រោះគេចង់បានមនុស្សចំណូលថ្មីដើម្បីបង្កើតជីវិតថ្មីនៅទីនេះសម្រាប់ច្រើនឆ្នាំខាងមុខ។
គួរបញ្ជាក់ដែរថា នេះជាលើកទីពីរហើយដែលទីក្រុង Saint-Amand-Montrond បានលក់ផ្ទះមួយក្នុងតម្លៃ ១ អឺរ៉ូ។ កាលពីឆ្នាំ ២០២១ យូនីតទីមួយរបស់ទីក្រុងក៏ត្រូវបានដាក់លក់ក្នុងតម្លៃ ១ អឺរ៉ូដែរហើយមានអ្នកដាក់ពាក្យជាង ៩០ នាក់។ ទីបំផុតផ្ទះបានទៅដល់គ្រួសារមួយដែលពួកគេកំពុងរស់នៅជារៀងរាល់ថ្ងៃ៕

ប្រទេសជប៉ុន ៖ សារព័ត៌មាន Japan Times បានរាយការណ៍ពីស្ថានការណ៍ឧស្សាហកម្មទេសចរណ៍នៅប្រទេសជប៉ុនថា តម្លៃស្នាក់នៅបន្ទប់សណ្ឋាគារជប៉ុន កាលពីខែមីនា ឆ្នាំ២០២៤ បានកើនឡើងខ្ពស់បំផុតក្នុងរយៈពេលជិត៣០ឆ្នាំមកនេះ ស្របពេលប្រាក់យ៉េនធ្លាក់ថ្លៃខ្លាំង រហូតធ្វើឱ្យប្រាក់យ៉េនមានតម្លៃថោក ។ ទោះយ៉ាងណា រដូវផ្កាសាគូរ៉ារីកមានរយៈពេលយូរ បានជួយទាក់ទាញភ្ញៀវទេសចរយ៉ាងច្រើនធ្វើដំណើរមកកម្សាន្តនៅជប៉ុន ។

យោងតាមទិន្នន័យរបស់ CoStar Group បង្ហាញថា តម្លៃបន្ទប់សណ្ឋាគារជាមធ្យមក្នុង១ថ្ងៃ នៅប្រទេសជប៉ុន ស្មើនឹង២០.៩៨៦យ៉េន (ឬស្មើប្រមាណ១៣៩ដុល្លារអាមេរិក) ដែលជាតម្លៃខ្ពស់បំផុត បើគិតចាប់ពីខែសីហា ឆ្នាំ១៩៩៧ និងកើនឡើងជិត២០% បើធៀបនឹងរយៈពេលដូចគ្នាកាលពីឆ្នាំ២០២៣ ។ ក្រៅពីនេះ ចំនួនការចូលស្នាក់នៅក្នុងសណ្ឋាគារ ក៏បានកើនឡើង៧៨% ផងដែរ ។

កាលពីខែមីនា ឆ្នាំ២០២៤ មានភ្ញៀវទេសចរធ្វើដំណើរមកប្រទេសជប៉ុនច្រើនបំផុត គឺស្មើរហូតដល់៣លាន១សែននាក់ ស្របពេលតម្លៃប្រាក់យ៉េនធ្លាក់ចុះមកកម្រិតទាបបំផុតក្នុងរយៈពេល៣៤ឆ្នាំ បើធៀបនឹងប្រាក់ដុល្លារអាមេរិក ។ ហេតុនេះ វាធ្វើឱ្យជប៉ុនក្លាយជាប្រទេសគោលដៅទាក់ទាញភ្ញៀវទេសចរបរទេស ។ រីឯភ្ញៀវទេសចរបរទេសដែលបានមកប្រទេសជប៉ុនច្រើនបំផុត រួមមាន ៖ កូរ៉េខាងត្បូង, តៃវ៉ាន់ និងចិន ដោយសារជារដូវផ្កាសាគូរ៉ារីក ។

លោកស្រី Harumi Taguchi ជាសេដ្ឋវិទូរបស់ S&P Global Market Intelligence និយាយថា កត្តាដែលជំរុញឱ្យតម្លៃបន្ទប់សណ្ឋាគារជប៉ុនកើនឡើងខ្ពស់ គឺការខ្វះខាតកម្លាំងពលកម្មនៅជប៉ុន ។ លោកស្រីនិយាយថា ៖ «ដើម្បីគ្រប់គ្រងចំនួនការស្នាក់នៅបន្ទប់សណ្ឋាគារច្រើន និងការខ្វះខាតកម្លាំងពលកម្ម គឺត្រូវដំឡើងតម្លៃបន្ទប់សណ្ឋាគារ ។ ម្យ៉ាងទៀត មានភ្ញៀវទេសចរច្រើនមកលេងជប៉ុន ទើបសណ្ឋាគារនានាដំឡើងថ្លៃបន្ទប់» ។

ប្រាក់យ៉េនជប៉ុនធ្លាក់ថ្លៃ ក៏បានជួយជំរុញដល់ការចាយវាយរបស់ភ្ញៀវទេសចរបរទេសផងដែរ ។ បើតាមទិន្នន័យរបស់ការិយាល័យទេសចរណ៍ជប៉ុនបញ្ជាក់ថា ចាប់ពីខែមករា ដល់ខែមីនា ឆ្នាំ២០២៤ ភ្ញៀវទេសចរបរទេសបានចំណាយប្រាក់សរុបកើនឡើង៥២% បើធៀបនឹងឆ្នាំ២០១៩ ហើយភ្ញៀវទេសចរបានចំណាយប្រាក់ទិញទំនិញយ៉ាងច្រើនសន្ធឹកសន្ធាប់ក្នុងអំឡុងពេលការបញ្ចុះតម្លៃ ។

លោកស្រី Harumi Taguchi បន្តថា ៖ «ប្រសិនបើភ្ញៀវទេសចរបរទេសមកកម្សាន្តនៅជប៉ុនកើនឡើងជាបន្តបន្ទាប់ វាធ្វើឱ្យតម្លៃបន្ទប់សណ្ឋាគារឡើងថ្លៃបន្តទៀត ហើយដោយសារតម្លៃប្រាក់យ៉េនធ្លាក់ថ្លៃ គឺជនបរទេសនៅតែចំណាយប្រាក់ថ្លៃបន្ទប់សណ្ឋាគារក្នុងតម្លៃថោកដដែល» ៕

ប្រទេសថៃ ៖ កាលពីថ្ងៃទី១៩ ខែមេសា ឆ្នាំ២០២៤ សារព័ត៌មានថៃឈ្មោះ Dailynews រាយការណ៍ថា ពិធីបុណ្យចូលឆ្នាំថ្មី ឆ្នាំ២០២៤ មានអាកាសធាតុក្តៅខ្លាំង ទើបខេត្ត-ក្រុងនានារៀបចំកម្មវិធីកម្សាន្តពាសពេញ ដូចជា ៖ ទីក្រុងបាងកក, ឈៀងម៉ៃ, ខនគែន, សមុទ្រប្រាកាន, ឈុនបុរី និងភូកេត បានរៀបចំក្បួនដង្ហែរ និងកម្មវិធីផ្សេងៗប្រកបដោយភ្លើងចម្រុះពណ៌ ។ កម្មវិធីទាំងនេះបានទាក់ទាញភ្ញៀវទេសចរថៃ និងបរទេសមកកម្សាន្តយ៉ាងច្រើនកុះករ ខណៈសភាពាណិជ្ជកម្មថៃបង្ហាញថា ប្រាក់ចំណូលក្នុងពិធីបុណ្យចូលឆ្នាំថ្មីនេះ គឺមិនក្រោម ១២៨.៨៣៤លានបាត ។

ប្រទេសថៃបានរៀបចំពិធីបុណ្យចូលឆ្នាំថ្មីយ៉ាងអធិកអធម និងធ្វើឱ្យភ្ញៀវទេសចរនាំគ្នាមកកម្សាន្តយ៉ាងច្រើន ហើយគេមិនអាចបដិសេធបានថា អ្វីដែលតាមមកជាមួយភ្ញៀវទេសចរចៀសមិនផុតនោះ គឺបរិមាណសំរាមយ៉ាងច្រើនមហាសាលគរជាគំនរៗ ក្រោយចប់កម្មវិធីបុណ្យចូលឆ្នាំក្នុង១ថ្ងៃៗ ។ បើគិតពីបរិមាណសំរាមនៅទីក្រុងបាងកកតែមួយ ក្នុងអំឡុងពិធីបុណ្យចូលឆ្នាំ ចាប់ពីថ្ងៃទី១០ ដល់ថ្ងៃទី១៦ ខែមេសា ឆ្នាំ២០២៤ សរុបស្មើជាង៥១.៤៣៧តោន ហើយក្នុង១ថ្ងៃ មានសំរាមជាមធ្យមស្មើជាង៧.៣៤៨តោន ។

ហេតុនេះ បរិមាណសំរាមនៅក្រុងបាងកក ក្នុងអំឡុងពិធីបុណ្យចូលឆ្នាំថ្មី ឆ្នាំ២០២៤ បានកើនឡើងលើសឆ្នាំ២០២៣ ខណៈរយៈពេលដូចគ្នាក្នុងឆ្នាំ២០២៣ មានបរិមាណសំរាមនៅទីក្រុងបាងកក សរុបស្មើជាង៥០.៧៦៧តោន ហើយក្នុង១ថ្ងៃ មានសំរាមជាមធ្យមស្មើជាង៧.២៥២តោន ។ ដូច្នេះ បរិមាណសំរាមនៅក្រុងបាងកក បានកើនឡើងរហូតដល់ជាង៦៦៩តោន ឬកើនឡើង១,៣% ។

លោក Ekwaranyu Amarapal មន្ត្រីនាំពាក្យសាលាក្រុងបាងកកនិយាយថា នៅក្រុងបាងកកក្នុងអំឡុងពិធីបុណ្យចូលឆ្នាំថ្មី ជាពិសេស នៅតំបន់រៀបចំកម្មវិធីផ្សេងៗដែលមានភ្ញៀវទេសចរជាច្រើនមកចូលរួម ដូចជា ៖ បរិវេណផ្លូវខាវសាន និងបរិវេណជុំវិញ គិតចាប់ពីថ្ងៃទី១២ ដល់ថ្ងៃទី១៥ ខែមេសា ឆ្នាំ២០២៤ មានបរិមាណសំរាមសរុបស្មើនឹង១៦២តោន ។ រីឯបរិវេណផ្លូវស៊ីឡុំ សាលាស្រុកបាងរ៉ាក់រាយការណ៍ថា បរិមាណសំរាមនៅតាមផ្លូវនេះ ស្មើជាង៣៣តោន គិតចាប់ពីថ្ងៃទី១៣ ដល់ថ្ងៃទី១៤ ខែមេសា ។

បញ្ហា និងឧបសគ្គក្នុងការប្រមូលសំរាមនាអំឡុងបុណ្យចូលឆ្នាំថ្មីនេះ គឺពុំបានបែងចែកសំរាមមួយចំនួនតាមប្រភេទ ទើបបណ្តាលឱ្យសំរាមសើម ។ ហេតុនេះ ភ្នាក់ងារប្រមូលសំរាមត្រូវចំណាយពេលយូរជាងមុនដើម្បីប្រមូលសំរាម និងបែងចែកតាមប្រភេទ មុនពេលបញ្ជូនទៅឱ្យរថយន្តដឹកសំរាម ។ នៅតំបន់មួយចំនួនក្នុងក្រុងបាងកក បានរៀបចំធុងសំរាមតាមប្រភេទ និងមានភ្នាក់ងារប្រចាំការដើម្បីណែនាំពលរដ្ឋ និងភ្ញៀវទេសចរបោះសំរាមក្នុងធុងឱ្យបានត្រឹមត្រូវ ហើយសំរាមភាគច្រើនមានដូចជា ៖ ថង់ផ្លាស្ទិក, ប្រអប់ជ័រផ្លាស្ទិក ឬស្នោ, ឡាំងក្រដាស និងដបស្រាបៀរ ជាដើម ។

អាជ្ញាធរថៃនិយាយថា មិនត្រឹមតែភ្នាក់ងារប្រមូលសំរាមប៉ុណ្ណោះទេ ដែលមានតួនាទីរក្សាអនាម័យក្នុងអំឡុងពិធីបុណ្យចូលឆ្នាំថ្មី ប៉ុន្តែពលរដ្ឋគ្រប់រូបដែលបានមកដើរកម្សាន្តនៅតាមផ្លូវ និងទីសាធារណៈ ក៏ត្រូវទទួលខុសត្រូវចំពោះសំរាមផងដែរ ក្រោយពេលពួកគេបរិភោគចំណីអាហាររួច ។ រីឯការទទួលខុសត្រូវនេះ មានន័យថា ការបោះសំរាមក្នុងធុងមិនគ្រប់គ្រាន់ទេ គឺពលរដ្ឋត្រូវចេះបែងចែកសំរាមតាមប្រភេទមុនពេលបោះចោល ដើម្បីអាចសំរាមទាំងអស់ទៅកែច្នៃឡើងវិញ និងកម្ចាត់បានត្រឹមត្រូវ ។

ហេតុនេះ វាជាផ្នែកមួយនៃការជួយកាត់បន្ថយបរិមាណសំរាម និងកាត់បន្ថយការខ្ជះខ្ជាយថាមពលក្នុងការផលិតទំនិញថ្មី ពីព្រោះក្រៅពីយើងបានជួយពិភពលោកហើយ ប៉ុន្តែយើងក៏បានជួយដល់ភ្នាក់ងារប្រមូលសំរាមផងដែរ ដែលពួកគេធ្វើការផ្ទាល់ជាមួយសំរាម ៕

ទីក្រុងមួយចំនួននៅជុំវិញពិភពលោកត្រូវបានអ្នកជំនាញព្យាករណ៍ថាអាចនឹងត្រូវលិចទឹកក្នុងឆ្នាំ ២០៣០ ដោយសារឥទ្ធិពលនៃខ្យល់មូសុង និងភ្លៀងធ្លាក់ខ្លាំង រួមទាំងទឹកដីនៃទីក្រុងមានកម្ពស់ទាបជាងទីតាំងឆ្នេរសមុទ្រ និងការផ្លាស់ប្តូរអាកាសធាតុដែលរលាយទឹកកកនៅតំបន់ប៉ូល រួមទាំងព្យុះដ៏ឃោរឃៅកាន់តែច្រើនឡើង ដែលធ្វើឱ្យរំខានដល់ធម្មជាតិ។ ដូច្នេះតំបន់ដែលប្រឈមនឹងការលិចទឹក អាចនឹងខ្វះខាតស្បៀងអាហារ ដោយសារទឹកជំនន់បានបង្កការខូចខាតដល់ដំណាំ និងការរីករាលដាលជំងឺផ្សេងៗក្នុងអត្រាអិចស្ប៉ូណង់ស្យែល នេះបើយោងតាមប្រភព Worldatlas។

១.ទីក្រុង Miami សហរដ្ឋអាមេរិក៖ កម្រិតទឹកសមុទ្ររបស់ទីក្រុងម៉ៃអាមីកំពុងកើនឡើងក្នុងអត្រាលឿនបំផុតក្នុងពិភពលោក ជាមួយនឹងសញ្ញាច្បាស់លាស់នៃការកើនឡើងទឹកជំនន់ដែលបំពុលទឹកផឹក និងបណ្តាលឱ្យខូចខាតយ៉ាងធ្ងន់ធ្ងរដល់ហេដ្ឋារចនាសម្ព័ន្ធដ៏មានតម្លៃរបស់ទីក្រុង។ វាត្រូវបានគេព្យាករណ៍ថាទីក្រុងនេះអាចនឹងលិចទឹកក្នុងឆ្នាំ ២០៣០ ហើយបម្រែបម្រួលអាកាសធាតុ និងការកើនឡើងកម្រិតទឹកអាចជះឥទ្ធិពលយ៉ាងធ្ងន់ធ្ងរបំផុតនៅឆ្នាំ ២០៥០។

២.ទីក្រុង Bangkok ប្រទេសថៃ៖ គោលដៅទេសចរណ៍ដ៏ល្បីល្បាញនៅទ្វីបអាស៊ីអាគ្នេយ៍នេះវិញក៏មិនធម្មតាដែរ ត្រូវបានអ្នកជំនាញព្យាករណ៍ថាអាចនឹងជន់លិចក្នុងឆ្នាំ ២០៣០។ សម្រាប់មូលហេតុគឺដោយសារទីក្រុងបាងកកមានកម្ពស់ខ្ពស់ជាងនីវ៉ូទឹកសមុទ្រត្រឹមតែ ១.៥ ម៉ែត្រប៉ុណ្ណោះ ហើយទីក្រុងនេះស្រុតចុះពី ២ ទៅ ៣ សង់ទីម៉ែត្រជារៀងរាល់ឆ្នាំ។ ដូច្នេះទោះបីជាទីក្រុងបានរៀបចំដោយការដំឡើងវិធានការការពារ ដូចជាសាងសង់ទំនប់ទឹកក៏ដោយ ក៏ជៀសមិនផុតពីការលិចទឹកដែរ។

៣.ទីក្រុង Ho Chi Minh ប្រទេសវៀតណាម៖ ទីក្រុងដែលមានផ្នែកនៅតាមបណ្តោយដីសណ្ដមេគង្គត្រូវបានគំរាមកំហែងយ៉ាងធ្ងន់ធ្ងរដោយទឹកជំនន់ និងព្យុះត្រូពិច។ អ្នកវិទ្យាសាស្ត្របានព្យាករណ៍ថានៅឆ្នាំ ២០៣០ ទីក្រុងនេះនឹងលិច ដោយសារទឹកជំនន់ និងខ្យល់ព្យុះ ហើយស្រុកភាគខាងកើតនៅជុំវិញដងទន្លេមេគង្គអាចនឹងគ្មានមនុស្សរស់នៅទៀតឡើយ។

៤.ទីក្រុង Kolkata ប្រទេសឥណ្ឌា៖ ទីក្រុងដ៏ធំ Kolkata ក្នុងរដ្ឋ West Bengal នៃប្រទេសឥណ្ឌាកំពុងត្រូវបានលិចទឹកយ៉ាងលឿន។ វាត្រូវបានគេព្យាករណ៍ថាទីក្រុងនេះអាចលិចមុនឆ្នាំ ២០៣០ ដោយសារតែទឹកជំនន់ដ៏ធំមួយដែលហាក់ដូចជាកំពុងមកគំរាមកំហែងផ្នែកធំនៃ Kolkata។

៥.ទីក្រុង Venice ប្រទេសអ៊ីតាលី៖ បណ្តាញផ្លូវទឹកដ៏ល្បីល្បាញនៃទីក្រុង Venice ដែលជាកន្លែងទាក់ទាញសម្រាប់ភ្ញៀវទេសចរមិនយូរប៉ុន្មានទីក្រុងនេះអាចនឹងត្រូវជនលិច ដោយសារទឹកដីស្រុត ២ មីលីម៉ែត្រជារៀងរាល់ឆ្នាំ ខណៈកំពុងប្រឈមនឹងទឹកជំនន់ជាទៀងទាត់ និងជំនោរខ្ពស់។

៦.ទីក្រុង New Orleans ប្រទេសអាមេរិក៖ ទីក្រុង New Orleans រួមជាមួយនឹងប្រវត្តិសាស្រ្តដ៏សម្បូរបែប និងវប្បធម៌ចម្រុះរបស់វា កំពុងលិចលង់ក្នុងអត្រាលឿនបំផុតមួយក្នុងពិភពលោក។ ការសិក្សាឆ្នាំ ២០១៦ របស់ NASA បានព្យាករណ៍ថា ទីក្រុងទាំងមូលអាចនឹងលិចទឹកនៅឆ្នាំ ២០៣០ ដោយសារការអភិវឌ្ឍជ្រុលហួសហេតុពេក ធ្វើឱ្យទឹកដីនៃទីក្រុង New Orleans តែងតែស្រុត ២ អ៊ីញជារៀងរាល់ឆ្នាំ និងសកម្មភាពរបស់មនុស្សក៏ធ្វើឱ្យមានការកើនឡើងនូវភាពញឹកញាប់នៃទឹកជំនន់ រួមទាំងការខួងយកប្រេង និងឧស្ម័នរបស់ទីក្រុងផងដែរ។

៧.ទីក្រុង Amsterdam ប្រទេសហូឡង់៖ ភាគច្រើននៃទីក្រុងក្នុងប្រទេសហូឡង់គឺស្ថិតនៅខាងក្រោមនីវ៉ូទឹកសមុទ្រ។ ប្រទេសនេះតែងតែជួបប្រទះនឹងទឹកជំនន់ជារៀងរាល់ឆ្នាំ ហើយក៏បានសម្លា.ប់មនុស្សរាប់ម៉ឺននាក់ គោក្របី និងសត្វដទៃទៀត ក៏ដូចជាបំផ្លាញផ្ទះ អគារ និងសំណង់ផ្សេងៗរាប់មិនអស់ ដោយសារផលប៉ះពាល់នៃការប្រែប្រួលអាកាសធាតុ។ ដូច្នេះអ្នកជំនាញបានព្យាករណ៍ថា ទីក្រុង Amsterdam ក្នុងប្រទេសហូឡង់អាចនឹងត្រូវជន់លិចនៅឆ្នាំ ២០៣០៕