Shaolin Kung Fu គឺជាក្បាច់គុនដ៏គួរឱ្យចាប់អារម្មណ៍បំផុតមួយរបស់ប្រទេសចិន និងល្បីទូទាំងក្នុងពិភពលោក ដែលមានអាយុកាលប្រមាណ ១៥០០ឆ្នាំ។ ទោះជាយ៉ាងណា មនុស្សជាច្រើនគឺបានលើកឡើងជាចម្ងល់ថា ហេតុអ្វីបានជាអ្នកហ្វឹកហាត់ក្បាច់គុណនេះ រមែងជាព្រះសង្ឃទៅវិញ? តើក្បាច់គុណនេះមានលក្ខណៈវិសេសអ្វីខ្លះដែលគួរតែស្វែងយល់? ស្របពេលដែលរឿងរ៉ាវប្រវត្តិសាស្រ្តទាក់ទងនឹងវប្បធម៌ចិន ពិតជាបានចងភ្ជាប់ជាមួយនឹងក្បាច់គុណបុរាណចិនមួយនេះ។

ប្រវត្តិសាស្រ្តនៃ Shaolin Kung Fu ត្រូវបានកំណត់លក្ខណៈដោយទេវកថា រឿងព្រេង និងព្រឹត្តិការណ៍ប្រវត្តិសាស្ត្រ។ វាជាសិល្បៈក្បាច់គុនមួយដែលបានវិវឌ្ឍន៍ជាច្រើនសតវត្សមកហើយ ហើយបានក្លាយជាប្រពៃណីវប្បធម៌ និងខាងវិញ្ញាណរបស់ជនជាតិចិន ពិសេសក្បាច់គុណនេះ គឺមានទំនាក់ទំនងយ៉ាងស៊ីជម្រៅជាមួយនឹងព្រះពុទ្ធសាសនា។ ថ្វីត្បិតតែ Shaolin Kung Fu មានទំនៀមទម្លាប់យូរយារណាស់មកហើយក៏ដោយ វាក៏បានវិវត្តន៍ទៅតាមពេលវេលា បង្កើតបានជាស្ទីលនិងបច្ចេកទេស បំបែកក្បាច់ថ្មីៗជាហូរហែរ។

ក្បាច់គុណ Shaolin Kung Fu គឺមានដើមកំណើតមកពីវត្តពុទ្ធសាសនាមួយក្នុងខេត្ត Henan ដែលបច្ចុប្បន្នគេស្គាល់ថាជាប្រាសាទ Shaolin ។ យោងទៅតាមរឿងព្រេង ព្រះសង្ឃឥណ្ឌា Bodhidharma បានធ្វើដំណើរទៅកាន់ប្រទេសចិនក្នុងសតវត្សទី ៥ ដើម្បីផ្សព្វផ្សាយព្រះពុទ្ធសាសនា។ ព្រះសង្ឃអង្គនេះ ត្រូវបានគេជឿជាក់ថា ជាអ្នកបង្រៀនមូលដ្ឋានគ្រឹះនៃក្បាច់គុណ Shaolin នៅឯប្រាសាទ Shaolin ។

កំណត់ត្រាដំបូងនៃក្បាច់គុណ Shaolin Kung Fu មានតាំងពីរជ្ជកាលរាជវង្សថាង ៦១៨-៩០៧ នៃគ.ស. ដែលកាលគ្រានោះព្រះសង្ឃនៃប្រាសាទសៅលីនបានបណ្តុះភាពល្បីល្បាញនៃក្បាច់គុននេះជាបន្តបន្ទាប់។ ក្បាច់គុណនេះក៏ទទួលបានភាពល្បីល្បាញកាន់តែខ្លាំងឡើងទូទាំងសកលលោក ក្នុងសម័យរាជវង្សមីង ១៣៦៨-១៦៤៤ នៃគ.ស រហូតដល់មានការបង្ហាត់បង្រៀនដោយអ្នកមានអំណាចយសសក្តិជាច្រើនផងដែរ។

ក្បាច់គុន Shaolin ត្រូវបានគេចាត់ទុកជាទម្រង់នៃលំហាត់ចាំបាច់សម្រាប់ព្រះសង្ឃ ដោយសារមានការអង្គុយក្នុងសមាធិយូរ និងជាទម្រង់នៃសមាធិខាងវិញ្ញាណក្នុងខ្លួន ដោយសង្កត់ធ្ងន់លើវិន័យ និងការផ្តោតអារម្មណ៍ ដើម្បីហ្វឹកហាត់ក្បាច់គុន។ ម្យ៉ាងវិញទៀត ជម្លោះនយោបាយជាច្រើនដែលបានកើតឡើងនៅក្នុងប្រទេសចិនក្នុងរយៈពេលជាច្រើនឆ្នាំបានបង្ខំឱ្យព្រះសង្ឃ Shaolin ប្រើក្បាច់គុនជាមធ្យោបាយដើម្បីការពារខ្លួន និងវត្ត។ នៅទីបំផុត ព្រះសង្ឃភាគច្រើនបានស្ម័គ្រចិត្តផ្តល់ជាជំនួយយោធាទៅកាន់រដ្ឋ ពិសេសនៅក្នុងរជ្ជកាលរាជវង្សថាង និងរាជវង្សមីង។

ទោះយ៉ាងណា ក្បាច់គុណ Shaolin Kung Fu ក៏ត្រូវបានបំភ្លេចចោល និងហាមឃាត់ក្នុងអំឡុងពេលបដិវត្តន៍វប្បធម៌ ចន្លោះឆ្នាំ ១៩៦៦ ដល់ ១៩៧៦។ លុះឆ្នាំ ១៩៨០ ក្រោមការដឹកនាំរបស់លោក តេង ស៊ាវពីង ដោយមើលឃើញអំពីគុណតម្លៃនៃវប្បធម៌ទំនើប ក្បាច់គុណនេះក៏ត្រូវបានគេជីកកកាយឡើងវិញ។

គួរបញ្ជាក់ថា សារៈសំខាន់នៃ Shaolin Kung Fu គឺលើសពីសិល្បៈក្បាច់គុន។ វារួមបញ្ចូលគ្នានូវការគ្រប់គ្រងរាងកាយ ការការពារខ្លួន រួមមានបច្ចេកទេសជាច្រើនទាំងការវាយ ទាត់ រារាំង ស្កាក់ និងបច្ចេកទេសក្តាប់ លំហាត់សម្រាប់ការស៊ូទ្រាំ ភាពបត់បែន និងល្បឿន។ បន្ថែមពីនេះ វាក៏រួមបញ្ចូលនូវលំហាត់ផ្លូវចិត្តដូចជាការធ្វើសមាធិ ដែលជួយធ្វើឱ្យចិត្តស្ងប់ និងបង្កើនការផ្តោតនិងគ្រប់គ្រងអារម្មណ៍ ក៏ដូចជាមានឥទ្ទិពលលើការគិតពិចារណា ដែលអាចមានប្រយោជន៍ក្នុងគ្រប់វិស័យនៃជីវិត៕

ប្រទេសចិន ៖ ក្នុងមួយឆ្នាំៗ ពលរដ្ឋចិនបានដាក់ពាក្យលែងលះរាប់លានគូដោយសារការរស់នៅមិនចុះសម្រុងគ្នា ហើយរូបថតអាពាហ៍ពិពាហ៍របស់គូស្វាមី-ភរិយាជាច្រើនសន្ធឹក ត្រូវបានគេប្រមូលទុកក្នុងបន្ទប់ក្រោមដំបូលអគារ ឬបោះចោលក្នុងធុងសំរាម ។ ហេតុនេះ ក្រុមហ៊ុនមួយបានផ្តល់ជម្រើសថ្មីទៅកាន់គូស្វាមី-ភរិយាទាំងនេះអាចបំផ្លា.ញ រូបថតអាពាហ៍ពិពាហ៍របស់ខ្លួន ឬកែច្នៃវាជាថាមពលអគ្គិសនី ។

បើទោះជាវប្បធម៌ចិនបានហាមឃាត់ការបំផ្លាញរូបភាពរបស់មនុស្សនៅមានជីវិតក្តី ប៉ុន្តែរោងចក្ររបស់លោក លីវ វៃ ទទួលបានអតិថិជនចាប់ពី៥នាក់ ទៅ១០នាក់ក្នុង១ថ្ងៃ ដែលបានស្នើឱ្យរោងចក្រនេះបំផ្លាញរូបថតអាពាហ៍ពិពាហ៍របស់ពួកគេ ។ ក្នុងចំណោមរូបថតអាពាហ៍ពិពាហ៍របស់គូស្វាមី-ភរិយាលែងលះគ្នាទាំងនេះ មានទាំងរូបថតទំហំធំថតនៅក្បែរជញ្ជាំង, រូបថតតុបតែង និងរូបដាក់ក្នុងអាល់ប៊ុមតូច-ធំផងដែរ ហើយរូបថតភាគច្រើនបិទជាប់នឹងផ្លាស្ទិក ។

ឃ្លាំងមួយកន្លែងស្ថិតនៅភាគខាងជើងប្រទេសចិន លោក លីវ វៃ បានប្រមូលរូបថតអាពាហ៍ពិពាហ៍ចាស់ៗរបស់គូស្វាមី-ភរិយាដែលបានចែកផ្លូវគ្នា ដាក់ក្នុងម៉ាស៊ីនកម្ទេចឯកសារ ដើម្បីកែច្នៃជាប្រភពថាមពលអគ្គិសនី ។

នៅពេលរៀបអាពាហ៍ពិពាហ៍ កូនកំលោះ និងកូនក្រមុំបានថតរូបទុកជាអនុស្សាវរីយ៍នៅសួនច្បារសាធារណៈ, វត្តអារ៉ាម និងតំបន់ប្រវត្តិសាស្ត្រជាច្រើនកន្លែង ។ ប៉ុន្តែដោយសារចិនជាប្រទេសមានពលរដ្ឋលែងលះគ្នារាប់លានគូក្នុង១ឆ្នាំៗ ទើបធ្វើឱ្យរូបថតអាពាហ៍ពិពាហ៍ជាច្រើនសន្លឹកត្រូវប្រមូលទុកនៅក្រោមដំបូលអគារ ឬបោះចោលក្នុងធុងសំរាម ។

លោក លីវ វៃ អាយុ៤២ឆ្នាំ បាននិយាយពេលលោកស្ថិតក្នុងរោងចក្រ ដែលស្ថិតនៅឆ្ងាយពីទីក្រុងប៉េកាំងប្រមាណ១២០គីឡូម៉ែត្រថា ៖ «យើងសង្កេតឃើញថា ការប្រកបអាជីវកម្មប្រចាំថ្ងៃ គឺពុំទាន់មានក្រុមហ៊ុនណាធ្វើអាជីវកម្មខាងបំផ្លាញរូបថតអាពាហ៍ពិពាហ៍ទេ ។ ម្យ៉ាងទៀត អ្នកមានបទពិសោធន៍ខាងផ្នែកនេះមានចំនួនតិចណាស់ ខណៈមនុស្សខ្លះទៀតអាចមើលរំលងអាជីវកម្មនេះ» ។

ក្រោយពីទទួលបានរូបថតអាពាហ៍ពិពាហ៍ជាច្រើនមក បុគ្គលិកនឹងបែងចែករូបថតទាំងនេះ និងបាញ់ថ្នាំពណ៌បិទបាំងមុខមនុស្សដើម្បីការពារភាពឯកជន មុនពេលបំផ្លាញវាដោយវិធីផ្សេងៗ ។ ក្នុងអំឡុងពេលបំផ្លាញរូបថតក្នុងម៉ាស៊ីន លោក លីវ វៃ នឹងកត់ត្រា ព្រមទាំងថតជាវីដេអូផ្ញើទៅអតិថិជន ដើម្បីបញ្ជាក់ជាលើកចុងក្រោយ ។

លោក លីវ វៃ និយាយថា តាំងពីលោកប្រកបអាជីវកម្មផ្នែកនេះកាលពីឆ្នាំ២០២៣ លោកបានផ្តល់សេវាកម្មដល់អតិថិជនប្រមាណ១.១០០នាក់ ហើយអតិថិជនភាគច្រើនមានអាយុក្រោម៤៥ឆ្នាំ ក្នុងនោះអតិថិជន២នាក់ ក្នុងចំណោម៣នាក់ ជាស្ត្រី ។

លោកបន្តថា អតីតប្តី-ប្រពន្ធភាគច្រើនមិននិយាយពីរឿងរ៉ាវការលែងលះរបស់ខ្លួនទេ ហើយអ្នកខ្លះសម្រេចចិត្តបញ្ចប់ជីវិតគូដោយបំផ្លាញរូបអាពាហ៍ពិពាហ៍ ព្រោះពួកគេចង់លុបចោលការចងចាំផ្សេងៗ ដោយសាររូបទាំងនេះជាឧបសគ្គក្នុងការសម្រេចចិត្តជ្រើសរើសគូជីវិតថ្មី ។ រីឯអ្នកខ្លះទៀតរក្សាទុករូបរបស់ខ្លួនអស់ជាច្រើនឆ្នាំ និងសម្រេចចិត្តបោះវាចោល ពេលពួកគេរៀបការថ្មី ឬធ្វើចិត្តបានពេលគូជីវិតស្លាប់ ។

ការកម្ទេចរូបអាពាហ៍ពិពាហ៍ក្នុងម៉ាស៊ីន មិនអាចឱ្យអតិថិជនទទួលបានរូបទាំងនេះមកវិញទេ ហើយពួកគេនឹងមានអារម្មណ៍សោកស្តាយ ដែលសម្រេចចិត្តកម្ទេចរូបរបស់ខ្លួន ទើបលោក លីវ វៃ ថតវីដេអូទុកជាលើកចុងក្រោយក្នុងអំឡុងពេលបុគ្គលិករបស់លោក ប្រមូលរូបទាំងនេះដាក់ចូលក្នុងម៉ាស៊ីនបំផ្លាញឯកសារ ។

បន្ទាប់ពីបំផ្លាញរូបថតរួច កម្ទេចកំទីរូបថតទាំងអស់នឹងបញ្ជូនទៅកាន់រោងចក្រផលិតប្រេងឥន្ធនៈនៅតំបន់ក្បែរគ្នា ដើម្បីយកវាទៅកែច្នៃជាមួយសំរាមផ្សេងៗ និងផលិតជាថាមពលអគ្គិសនី ៕

បរទេស៖ អ្នកប្រដាល់ជនជាតិអ៊ីរ៉ង់ម្នាក់ឈ្មោះ Ali Heibati ត្រូវបានហាមប្រាមមិនឱ្យប្រកួតអស់មួយជីវិតដោយសារទង្វើដ៏ចម្រូងចម្រាសជាច្រើន រួមទាំងការយកជើងទាត់ ring-girl ដែលជានារីកាន់ស្លាកដើរបង្ហាញនៅលើសង្វៀន។
យោងតាម Fox Sports ដែលបានចុះកាលពីពេលថ្មីៗនេះ បានឱ្យដឹងថា មុនពេលការប្រកួតនៅទីក្រុងមូស្គូប្រទេសរុស្សី កាលពីល្ងាចថ្ងៃទី១៩ ខែមេសាកន្លងទៅអ្នកប្រដាល់បង្គល់ក្រហម Heibati ស្រាប់តែទាត់នារីម្នាក់ឈ្មោះ Maria នៅពេលនាងដើរកាត់ ហើយកាន់សញ្ញាដែលបង្ហាញថាតង់ទីមួយជិតចាប់ផ្តើម។ ភ្លាមនោះអាជ្ញាកណ្តាលក៏បានធ្វើអន្តរាគមន៍ និងព្រមានលោក Heibati អំពីអាកប្បកិរិយារបស់គាត់។ ទោះជាយ៉ាងណាម៉ារីយ៉ាបានងាកមើល និងបង្ហាញពីការមិនសប្បាយចិត្តរបស់នាងចំពោះទង្វើអសីលធម៌របស់កីឡាកររូបនេះ។

បន្ទាប់មកការប្រកួតបានប្រព្រឹត្តទៅជាធម្មតា ប៉ុន្តែបានបញ្ចប់យ៉ាងឆាប់រហ័ស។ នៅពេលដែលកីឡាករបង្គល់ខៀវ បានផ្តួលកីឡាករបង្គល់ក្រហម Heibati ក្នុងទឹកទី ១ ដោយជោគជ័យ ហើយអាជ្ញាកណ្តាលបានប្រកាសថាបង្គល់ខៀវជាអ្នកឈ្នះដោយបច្ចេកទេស ភ្លាមនោះបង្គល់ក្រហមមិនអស់ចិត្តក៏បានដាល់បង្គល់ខៀវដោយកណ្តាប់ដៃជាបន្តបន្ទាប់នៅពីក្រោយខ្នង ប៉ុន្តែត្រូវបានអាជ្ញាកណ្តាលហាមឃាត់។ នៅពេលវេលាដដែលនោះលោក Heibati ហាក់មានកាយវិការមិនសមរម្យ និងបង្កការរំខានយ៉ាងខ្លាំងនៅក្នុងកម្មវិធី ដោយបញ្ចេញមតិមិនល្អទៅលើអាជ្ញាកណ្តាល អ្នករៀបចំកម្មវិធី និងបុគ្គលិកនៅទីនោះ ធ្វើឱ្យមហាជនជាច្រើនមិនពេញចិត្តក៏បាននាំគ្នាចូលទៅក្នុងសង្វៀនវាយតប់គ្នាបង្កភាពចលាចលពេញកម្មវិធី។

បន្ទាប់ពីមានសកម្មភាពដ៏ចម្រូងចម្រាសនេះលោក Heibati ក៏បានបង្ហោះសារសុំទោសជាសារធារណៈនៅលើបណ្តាញសង្គម ដោយលោកបានសរសេរថា “ខ្ញុំមានការភ័យយ៉ាងខ្លាំង ខ្ញុំសុំទោសអ្នករាល់គ្នាដែលបានបញ្ចេញកាយវិការមិនសមរម្យ ជាពិសេសខ្ញុំចង់សុំទោស Maria (ដែលជានារីកាន់សញ្ញាបង្ហាញតង់ទីមួយ)”។ ទោះជាយ៉ាងណាក៏ដោយនៅក្នុងកម្មវិធី HFC នៅតែហាមឃាត់លោក Heibati មិនឱ្យចូលរួមក្នុងការប្រកួតនេះអស់មួយជីវិត។ HFC បានប្រកាសថា សកម្មភាពរបស់លោក Heibati លើសពីបទដ្ឋានអាកប្បកិរិយា និងសីលធម៌ ហើយនឹងផ្ទេរប្រាក់រង្វាន់ទាំងអស់របស់អ្នកប្រយុទ្ធនេះទៅឱ្យ Maria ។ គួរបញ្ជាក់ដែរថា Heibati ធ្លាប់ប្រកួតប្រដាល់សេរី យោងតាម Tapology ការប្រឈមមុខជាមួយបង្កល់ខៀវ Osipyan គឺជាការប្រកួត MMA អាជីពដំបូងរបស់អ្នកប្រដាល់រូបនេះ៕

លោកអ្នកប្រាកដជាចង់ដឹងហើយថា តើឧស្សាហកម្មអ្វីខ្លះដែលអាចនាំឱ្យអ្នកមានឱកាសក្លាយជាមហាសេដ្ឋីលឿនបំផុត? ជាការពិតណាស់ ដើម្បីក្លាយជាមហាសេដ្ឋីមិនមែនជារឿងងាយស្រួលនោះទេ ការងារនីមួយៗគឺសុទ្ធតែពិបាក ទោះជាយ៉ាងណាមហាសេដ្ឋីភាគច្រើនទូទាំងពិភពលោកតែងតែវិនិយោគលើវិស័យទាំងនេះ ដោយសារឧស្សាហកម្មទាំងនេះគឺមានអត្រាជោគជ័យខ្ពស់បំផុតក្នុងការក្លាយជាមាន។ ដូច្នេះប្រសិនបើអ្នកផ្តោតតែលើអាជីពតែមួយ ឬការងារតែមួយកន្លែង គឺមិនអាចនាំអ្នកឱ្យជោគជ័យបានលឿននោះទេ អ្នកគួរតែវិនិយោគលើវិស័យឧស្សាហកម្មខ្លះទើបអាចមានឱកាសក្លាយជាអ្នកមានលឿនបំផុត។ ខាងក្រោមនេះគឺជាឧស្សាហកម្មដែលអ្នកគួរតែវិនិយោគ៖

១.ការវិនិយោគលើហិរញ្ញវត្ថុ៖ ចំនួនមហាសេដ្ឋីដែលបានវិនិយោគលើឧស្សាហកម្មហិរញ្ញវត្ថុគឺមាន ៤២៧ នាក់ស្មើនឹង ១៥% នៅក្នុងបញ្ជី។ ហើយអ្នកមានបំផុតនោះគឺមហាសេដ្ឋី Warren Buffett ជាមួយទ្រពសម្បត្តិ ១៣៣ ពាន់លានដុល្លារអាមេរិក ដែលគាត់គឺជាប្រធាន និងជានាយកប្រតិបត្តិនៃក្រុមហ៊ុនវិនិយោគ Berkshire Hathaway ជាមួយនឹងក្រុមហ៊ុនដែលមានភាគហ៊ុននៅក្នុងអាជីវកម្មជាង ៦០ ផ្សេងទៀតរួមមាន Apple, Duracell និង Dairy Queen។

២.ការវិនិយោគលើបច្ចេកវិទ្យា៖ ចំនួនមហាសេដ្ឋីដែលបានវិនិយោគលើឧស្សាហកម្មបច្ចេកវិទ្យាគឺមាន ៣៤២ នាក់ស្មើនឹង ១២% នៅក្នុងបញ្ជី។ អ្នកមានបំផុតគឺមហាសេដ្ឋី Jeff Bezos ជាមួយទ្រពសម្បត្តិ ១៩៤ ពាន់លានដុល្លារ គាត់គឺជាស្ថាបនិកក្រុមហ៊ុន Amazon ម្ចាស់ Washington Post និងក្រុមហ៊ុនអាកាសចរណ៍ Blue Origin ។

៣.ការវិនិយោគលើផលិតកម្ម៖ ចំនួនមហាសេដ្ឋីដែលបានវិនិយោគលើឧស្សាហកម្មផលិតកម្ម ៣២៨ នាក់ស្មើនឹង ១២% នៅក្នុងបញ្ជី។ អ្នកមានបំផុតគឺលោក Reinhold Wuerth ជាមួយទ្រពសម្បត្តិ ៣៣,៦ ពាន់លានដុល្លារ ដែលគាត់គឺជាប្រធានក្រុមហ៊ុនផលិតឧបករណ៍មេកានិច និងដែក Wuerth Group។

៤.ការវិនិយោគលើម៉ូដ៖ ចំនួនមហាសេដ្ឋីដែលបានវិនិយោគលើម៉ូដទំនិញប្រណិតផ្សេងៗដូចជាសម្លៀកបំពាក់ កាបូប ស្បែកជើង និងម៉ូតជាច្រើនទៀតមាន ២៨៥ នាក់ស្មើនឹង ១០% នៅក្នុងបញ្ជី។ អ្នកមានបំផុតគឺលោក Bernard Arnault ជាមួយទ្រពសម្បត្តិ ២៣៣ ពាន់លានដុល្លារ។ គាត់គឺជាប្រធាន និងជានាយកប្រតិបត្តិនៃក្រុមទំនិញប្រណីតដ៏ធំបំផុតរបស់ពិភពលោក LVMH ។ បច្ចុប្បន្នក្រុមហ៊ុននេះជាម្ចាស់ម៉ាកសម្លៀកបំពាក់ និងគ្រឿងសំអាងចំនួន ៧៥ ដូចជា Sephora, Tiffany & Co, Givenchy, Christian Dior, Dom Perignon និង Moët Hennessy។

៥.ការវិនិយោគលើអាហារ និងភេសជ្ជៈ៖ ចំនួនមហាសេដ្ឋីដែលបានវិនិយោគលើអាហារ និងភេសជ្ជៈមាន ២១០ ស្មើនឹង ៨% នៅក្នុងបញ្ជី។ អ្នកមានបំផុតគឺលោក Zhong Shanshan ជាមួយទ្រពសម្បត្តិ ៦២.៣ ពាន់លានដុល្លារ ដែលគាត់គឺជាប្រធានក្រុមហ៊ុនទឹកដប Nongfu Spring និងជាអ្នកគ្រប់គ្រងក្រុមហ៊ុនឱសថ Beijing Wantai Biological Pharmacy ផងដែរ ហើយបច្ចុប្បន្នគាត់គឺជាអ្នកមានបំផុតនៅក្នុងប្រទេសចិន៕

ប្រទេសថៃ ៖ កាលពីថ្ងៃទី២១ ខែមេសា ឆ្នាំ២០២៤ នាយកដ្ឋានគ្រប់គ្រងជំងឺនៃក្រសួងសុខាភិបាលថៃបានបង្ហាញពីស្ថានការណ៍ជំងឺកូវីដ-១៩ ថា ចំនួនអ្នកជំងឺកូវីដបានកើនឡើងក្រោយពិធីបុណ្យចូលឆ្នាំថ្មី ហើយវាដូចនឹងការរំពឹងទុកកាលពីដើមឆ្នាំផងដែរ គឺពូជកូវីដចាស់ឆ្លងរាតត្បាត ។ នាយកដ្ឋានគ្រប់គ្រងជំងឺបានណែនាំឱ្យក្រុមពលរដ្ឋដែលងាយឆ្លងជំងឺនេះប្រុងប្រយ័ត្នខ្លួន ហើយបើមានរោគសញ្ញាសង្ស័យណាមួយ គួរតែពិគ្រោះយោបល់ជាមួយគ្រូពេទ្យ ។

លោក Thongchai Keeratihatthayakorn នាយកនៃនាយកដ្ឋានគ្រប់គ្រងជំងឺនៃក្រសួងសុខាភិបាលលើកឡើងថា លោក Chonlanan Srikaew រដ្ឋមន្ត្រីក្រសួងសុខាភិបាល បារម្ភពីស្ថានការណ៍ជំងឺកូវីដកើនឡើងក្រោយពិធីបុណ្យចូលឆ្នាំថ្មី ហើយបច្ចុប្បន្ន កូវីដជាជំងឺឆ្លងដែលត្រូវប្រុងប្រយ័ត្ន និងពុំទាន់មានរបាយការណ៍ពីការផ្ទុះជំងឺនេះធ្ងន់ធ្ងរនៅឡើយទេ ។ ប៉ុន្តែដើម្បីទទួលបានទំនុកចិត្ត លោករដ្ឋមន្ត្រីក្រសួងសុខាភិបាលបានណែនាំទៅគ្រប់ខេត្ត-ក្រុងវាយតម្លៃស្ថានការណ៍ និងត្រៀមខ្លួនជាមុន ព្រមទាំងណែនាំឱ្យគ្រប់ស្ថាប័នពាក់ព័ន្ធថែទាំសុខភាពពលរដ្ឋគ្រប់រូប ។

ចាប់ពីថ្ងៃទី១៤ ដល់ថ្ងៃទី២០ ខែមេសា ឆ្នាំ២០២៤ អ្នកជំងឺកូវីដបានចូលសម្រាកព្យាបាលនៅមន្ទីរពេទ្យ ចំនួន១.០០៤នាក់ និងជាមធ្យមមានអ្នកឆ្លងជំងឺកូវីដ ចំនួន១៤៣នាក់ក្នុង១ថ្ងៃ ក្នុងនោះអ្នកជំងឺរលាកសួតធ្ងន់ធ្ងរ ស្មើនឹង២៩២នាក់, ប្រើបំពង់ខ្យល់ជួយដកដង្ហើម ចំនួន១០១នាក់ និងស្លាប់៣នាក់ ហើយអ្នកស្លាប់ទាំងអស់ជាមនុស្សចាស់ និងមានជំងឺរ៉ាំរ៉ៃ ។ ហេតុនេះ វាជាចំនួនឆ្លងកើនឡើងតាមការរំពឹងទុក ហើយអ្នកជំងឺកូវីដភាគច្រើនស្ថិតនៅទីក្រុងបាងកក, បរិវេណជុំវិញទីក្រុងបាងកក និងខេត្តទេសចរណ៍ជាច្រើនទៀត ។

ចំណែកមូលហេតុធ្វើឱ្យមានការឆ្លងជំងឺកើនឡើង គឺដោយសារភាគច្រើនអ្នកជំងឺមានរោគសញ្ញាដូចគ្នានឹងជំងឺគ្រុនផ្តាសាយ ទើបមិនបានប្រុងប្រយ័ត្ន និងការពារខ្លួន ។ យោងតាមការតាមដានជំងឺកូវីដកំពុងឆ្លងរាតត្បាតនៅប្រទេសថៃ និងបានបង្ហាញទិន្នន័យពីនាយកដ្ឋានវិទ្យាសាស្ត្រវេជ្ជសាស្ត្របង្ហាញថា វាជាពូជកូវីដបំលែងពីអូមីក្រុង ដោយអ្នកជំងឺនឹងមានរោគសញ្ញាស្រដៀងនឹងគ្រុនផ្តាសាយ ដូចជា ៖ ក្តៅខ្លួន, ក្អក, ឈឺក, ឈឺតាមដងខ្លួន, ឈឺក្បាល និងហៀរសំបោ ។ ប៉ុន្តែពុំទាន់រកឃើញថា ពូជកូវីដបំលែងពីអូមីក្រុងនេះ ធ្ងន់ធ្ងរជាងពូជអូមីក្រុងចាស់ទេ ។

លោក Thongchai Keeratihatthayakorn នាយកនៃនាយកដ្ឋានគ្រប់គ្រងជំងឺនៃក្រសួងសុខាភិបាលបន្តថា បច្ចុប្បន្ន ជំងឺកូវីដដូចគ្នានឹងជំងឺប្រចាំតំបន់ ហើយមានអ្នកឆ្លងជំងឺនេះជារៀងរាល់ឆ្នាំ ប៉ុន្តែការឆ្លងតិច ឬច្រើន គឺអាស្រ័យលើពេលវេលា ។ វាមានរោគសញ្ញាស្រដៀងនឹងជំងឺផ្លូវដង្ហើមទូទៅ ដូចជា ៖ គ្រុនផ្តាសាយធំ និងគ្រុនផ្តាសាយធម្មតា ហើយមន្ទីរពេទ្យគ្រប់ទីកន្លែងបានត្រៀមខ្លួនទាំងផ្នែកគ្រូពេទ្យ និងគ្រែអ្នកជំងឺ ខណៈមន្ទីរពេទ្យមានបទពិសោធន៍ព្យាបាលអ្នកជំងឺយ៉ាងល្អ ។

ពលរដ្ឋទូទៅគួរថែទាំអនាម័យផ្ទាល់ខ្លួន និងពាក់ម៉ាស់នៅពេលស្ថិតនៅទីប្រជុំជនដែលមានមនុស្សច្រើន ដូចជា ៖ ការធ្វើដំណើរនៅទីសាធារណៈ, នៅមន្ទីរពេទ្យ និងមជ្ឈមណ្ឌលថែទាំមនុស្សចាស់ ។ ក្រៅពីនេះ ត្រូវលាងសម្អាតដៃឱ្យបានញឹកញាប់ បើមានរោគសញ្ញាស្រដៀងនឹងគ្រុនផ្តាសាយ គួរពិនិត្យ ATK នៅផ្ទះ និងចៀសវាងនៅជិតក្រុមងាយឆ្លងជំងឺកូវីដ ។ បើលទ្ធផលធ្វើតេស្តកូវីដវិជ្ជមាន ត្រូវពាក់ម៉ាស់ដើម្បីការពារការឆ្លងទៅអ្នកដទៃ និងប្រញាប់ទៅជួបគ្រូពេទ្យពេលពិបាកដកដង្ហើម ។

ចំណែកក្រុមងាយឆ្លងជំងឺកូវីដ រួមមាន ៖ អ្នកមានអាយុ៦០ឆ្នាំឡើងទៅ, ស្ត្រីមានផ្ទៃពោះ និងអ្នកមានជំងឺប្រចាំកាយ ដូចជា ៖ ជំងឺផ្លូវដង្ហើមរ៉ាំរ៉ៃ, ជំងឺបេះដូង-សរសៃឈាម, ជំងឺតម្រងនោមរ៉ាំរ៉ៃ, ជំងឺដាច់សរសៃឈាមខួរក្បាល, ជំងឺធាត់, ជំងឺមហារីក និងជំងឺទឹកនោមផ្អែម ប្រសិនបើមានរោគសញ្ញាស្រដៀងនឹងគ្រុនផ្តាសាយ និងលទ្ធផលធ្វើតេស្តកូវីដវិជ្ជមាន គួរតែពាក់ម៉ាស់ និងទៅជួបគ្រូពេទ្យជាបន្ទាន់ដើម្បីព្យាបាល ព្រមទាំងកាត់បន្ថយអាការៈធ្ងន់ធ្ងរ ៕