កាលពីវេលាម៉ោង៩ និង៣០នាទីយប់ ថ្ងៃទី២១ ខែឧសភា ឆ្នាំ២០២៦ សណ្ឋាគារថៃដ៏ល្បីមួយកន្លែងឈ្មោះ «JA Plus Hotel» កម្ពស់៨ជាន់ ស្ថិតនៅឃុំណាក្លឿ ស្រុកបាងឡាមុង ខេត្តឈុនបុរី ត្រូវបានអគ្គិភ័យឆាបឆេះយ៉ាងសន្ធោសន្ធៅ ដោយចាប់ផ្តើមពីដំបូលអគារឆេះរាលដាលទៅជាន់ខាងក្រោម បណ្តាលឱ្យមនុស្សរងរបួសចំនួន៤នាក់ (ក្នុងនោះ៣នាក់ថប់ដង្ហើមនឹងផ្សែងភ្លើង និងម្នាក់ទៀតរលាកខ្លួនព្រោះរត់កាត់អណ្តាតភ្លើង) ។ តាមការសន្និដ្ឋានកាលពីយប់ថ្ងៃទី២១ គឺអាចបណ្តាលមកពីទុស្សេខ្សែភ្លើង ប៉ុន្តែមូលហេតុពិតប្រាកដ និងទំហំការខូចខាត មិនទាន់ប្រកាសជាផ្លូវការទេ ។

មុនពេលទាក់ទងទៅសមត្ថកិច្ច បុគ្គលិកសណ្ឋាគារបានព្យាយាមប្រើប្រាស់បំពង់ពន្លត់អគ្គិភ័យដើម្បីទប់ស្កាត់ដែរ ប៉ុន្តែដោយសារភ្លើងឆេះខ្លាំងពេក ទើបមិនអាចគ្រប់គ្រងបាន ។ ក្រុមពន្លត់ភ្លើង ក្រុមសង្គ្រោះបន្ទាន់ និងរថយន្តបាញ់ទឹកជាង១០គ្រឿង ត្រូវបានបញ្ជូនមកកាន់កន្លែងកើតហេតុភ្លាមៗ ដើម្បីជម្លៀសភ្ញៀវជាប់គាំងក្នុងសណ្ឋាគារ ជាង២៤០នាក់ (មានទាំងជនជាតិថៃ និងបរទេស) ដោយចំណាយពេលប្រមាណ១ម៉ោង ទើបអាចគ្រប់គ្រងស្ថានការណ៍បានទាំងស្រុង នាម៉ោង១០ និង៤៨នាទីយប់ ។

បើតាមអាជ្ញាធរក្នុងតំបន់ គឺភ្លើងបានចាប់ផ្តើមឆាបឆេះដំបូងចេញពីភោជនីយដ្ឋាន និងអាងហែលទឹកលើដំបូលសណ្ឋាគារនាម៉ោងជាង៩យប់ បន្ទាប់មក ក៏ឆេះរាលដាលចុះមកដល់ជាន់ទី៧ នៃសណ្ឋាគារយ៉ាងឆាប់រហ័ស ដោយសារខ្យល់បក់ខ្លាំងនៅជាន់លើ ផ្សែងភ្លើងក៏ឆេះតាមច្រកជណ្តើរចុះមកក្រោម ធ្វើឱ្យបុគ្គលិកសណ្ឋាគារពិបាកក្នុងការប្រើប្រាស់បំពង់ពន្លត់អគ្គិភ័យឱ្យទាន់ពេលវេលា ។

នៅព្រឹកថ្ងៃទី២២ ខែឧសភានេះ អាជ្ញាធរទីក្រុងប៉ាតាយ៉ាបានសម្រេចផ្អាកការប្រើប្រាស់សណ្ឋាគារនេះជាបណ្តោះអាសន្ន ដើម្បីរង់ចាំការវាយតម្លៃការខូចខាត និងសុវត្ថិភាព ខណៈម្ចាស់សណ្ឋាគារបានរៀបចំកន្លែងស្នាក់នៅជំនួស និងផ្តល់សំណងដល់ភ្ញៀវដែលរងផលប៉ះពាល់ទាំងអស់ ។ សមត្ថកិច្ចបានសហការជាមួយមន្ត្រីជំនាញ ដើម្បីបន្តការស៊ើបអង្កេតរកមូលហេតុយ៉ាងលម្អិត និងប្រកាសឱ្យដឹងនាពេលក្រោយ ។

គួរបញ្ជាក់ថា មួយរយៈនេះ ប្រទេសថៃបានកើតហេតុការណ៍គ្រោះថ្នាក់ផ្ទួនៗគ្នា គឺកាលពីថ្ងៃទី១៦ ខែឧសភា កន្លងមក កើតហេតុការណ៍សោកនាដកម្មរថភ្លើងបុកគ្នាយ៉ាងពេញទំហឹងជាមួយរថយន្តក្រុង នៅផ្លូវបំបែកឆ្លងកាត់ផ្លូវរថភ្លើង (Asok-Phetchaburi) ទីក្រុងបាងកក បណ្តាលឱ្យមនុស្សស្លា.ប់ និងរងរបួសជាច្រើននាក់ ៕

រដ្ឋាភិបាលវៀតណាមបានប្រកាសពីការអនុវត្តគោលនយោបាយផ្តល់ប្រាក់ឧបត្ថម្ភដល់ស្ត្រីដែលរៀបការរួចសម្រាលបានកូនចំនួន២នាក់ នៅមុនអាយុ៣៥ឆ្នាំ គឺស្ត្រីម្នាក់នឹងទទួលបានចំនួន២លានដុង (ឬជិត ៧៦ដុល្លារ) ចាប់ពីថ្ងៃទី១ ខែមករា ឆ្នាំ២០២៧ តទៅ ។ គោលនយោបាយនេះធ្វើឡើងដើម្បីជំរុញអត្រាកំណើត និងដោះស្រាយកង្វះខាតកម្លាំងពលកម្ម នាថ្ងៃអនាគត ។

ការផ្តល់ប្រាក់ឧបត្ថម្ភនឹងអនុវត្តចំពោះស្ត្រីរស់នៅបណ្តាខេត្ត-ក្រុងដែលមានអត្រាកំណើតទាបខ្លាំង និងស្ត្រីមកពីក្រុមជនជាតិភាគតិចដែលមានចំនួនប្រជាជនតិចតួចបំផុត ខណៈស្ត្រីរស់នៅតំបន់មានអត្រាកំណើតទាបខ្លាំង ដូចជា ៖ ទីក្រុងហូជីមិញ នឹងទទួលបានទឹកប្រាក់លើស២លានដុង (ចាប់ពី១១៤ ទៅ១៩០ដុល្លារ) ។ ថវិកាត្រូវចំណាយសម្រាប់គោលនយោបាយ គឺជាកញ្ចប់ថវិការដ្ឋបាលមូលដ្ឋានខេត្ត-ក្រុងនីមួយៗ ។

ក្រៅពីនេះ រដ្ឋាភិបាលវៀតណាមក៏មានគោលនយោបាយផ្តល់អត្ថប្រយោជន៍ជាច្រើនទៀត ដូចជា ៖ អនុញ្ញាតឱ្យស្ត្រីមានផ្ទៃពោះទទួលបានការត្រួតពិនិត្យសុខភាពមិនគិតថ្លៃ នៅមុនពេលសម្រាល និងក្រោយសម្រាល ។ រីឯទារកទើបនឹងកើត ទទួលបានការពិនិត្យស្កេនស្វែងរកជំងឺពីកំណើតដោយមិនគិតថ្លៃផងដែរ ដូចជា ៖ រកជំងឺស្លេកស្លាំង និងជំងឺបេះដូង ។ គោលនយោបាយលើកទឹកចិត្តនេះនឹងអនុវត្តជាដំណាក់កាល ដោយផ្អែកលើស្ថានភាពជាក់ស្តែងនៃអត្រាកំណើតក្នុងតំបន់ ។

ការកំណត់ឱ្យស្ត្រីយកកូន នៅមុនអាយុ៣៥ឆ្នាំ ដោយសារវ័យនេះមានសុខភាពល្អ និងមានហានិភ័យទាបក្នុងពេលសម្រាល ។ លើសពីនេះ សុខភាពទារកដែលកើតពីម្តាយមានអាយុក្រោម៣៥ឆ្នាំ មានអត្រាប្រឈមនឹងជំងឺពីកំណើត ឬពិការភាព តិចជាងទារកដែលកើតពីម្តាយអាយុច្រើន ហើយគ្រួសារនឹងមានពេលវេលាគ្រប់គ្រាន់ក្នុងការចិញ្ចឹមថែទាំកូនៗឱ្យមានអនាគត ។

គួរបញ្ជាក់ថា ការអនុវត្តគោលនយោបាយនេះ បន្ទាប់ពីវៀតណាមបានសម្រេចចិត្តលុបចោលទាំងស្រុងនូវ «គោលនយោបាយមានកូនត្រឹម២នាក់» កាលពីឆ្នាំ២០២៥ ដើម្បីផ្តល់សិទ្ធិដល់ពលរដ្ឋក្នុងការយកកូនបន្ថែមទៀតដែលជាការទប់ស្កាត់កង្វះខាតកម្លាំងពលកម្មនាថ្ងៃអនាគត ។

រដ្ឋាភិបាលវៀតណាមធ្លាប់ប្រកាសថា ប្រសិនបើគ្មានវិធានការទប់ស្កាត់ជាបន្ទាន់ទេ វៀតណាមនឹងក្លាយជាប្រទេសមានអត្រាកំណើតទាបដូចបណ្តាប្រទេសជិតខាងមួយចំនួន ដែលពិបាកនឹងស្តារឡើងវិញខ្លាំងណាស់ ។ ពេលពលរដ្ឋវ័យចំណាស់កើនឡើង រដ្ឋត្រូវចំណាយថវិកាច្រើនក្នុងការថែទាំសុខភាព ស្របពេលកម្លាំងពលកម្មវ័យក្មេងសម្រាប់ជួយជំរុញសេដ្ឋកិច្ចជាតិ បែរជាថយចុះ ៕

កាលពីថ្ងៃទី២១ ខែឧសភា ឆ្នាំ២០២៦ គណៈកម្មការទំនាក់ទំនង និងព័ត័មានចម្រុះម៉ាឡេស៊ី (MCMC) បានកំណត់ឱ្យ TikTok រឹតបន្តឹង និងលុបចោលជាបន្ទាន់នូវវីដេអូទាំងឡាយដែលមានខ្លឹមសារប្រមា.ថព្រះមហាក្សត្រ បន្ទាប់ពីពីគណនី TikTok មួយបានប្រើប្រាស់បច្ចេកវិទ្យាសិប្បនិម្មិត (AI) កាត់តរូបភាពវីដេអូដើម្បីបង្ខូចកេរ្តិ៍ឈ្មោះ ប្រមា.ថយ៉ាងធ្ងន់ធ្ងរដល់ព្រះមហាក្សត្រម៉ាឡេស៊ី ព្រះចៅស៊ុលតង់ អ៊ីប្រាហ៊ីម (Sultan Ibrahim) ។

គណៈកម្មការទំនាក់ទំនង និងព័ត័មានចម្រុះ (MCMC) បានផ្ញើលិខិតជាច្រើនលើកទៅកាន់ក្រុមហ៊ុន ByteDance នៅប្រទេសចិន ដោយសារការត្រួតពិនិត្យវីដេអូយឺតយ៉ាវ មិនអាចទប់ស្កាត់ការចែកចាយវីដេអូទាំងនោះទាន់ពេលវេលា ទើបគណៈកម្មការកំណត់ឱ្យ TikTok ត្រូវតែពង្រឹងប្រព័ន្ធគ្រប់គ្រងខ្លឹមសារ និងលុបវីដេអូមួយចំនួនជាបន្ទាន់ ។ ក្រៅពីនេះ ក៏ទាមទារឱ្យក្រុមហ៊ុនពន្យល់ជាផ្លូវការពីការគ្រប់គ្រងប្រព័ន្ធ TikTok បរាជ័យ ដោយបញ្ជាក់ថា ម៉ាឡេស៊ីមិនលើកលែងចំពោះវីដេអូបង្ហាញខ្លឹមសារប៉ះពាល់ជាតិ សាសនា និងព្រះមហាក្សត្រឡើយ ។

បើតាមមន្ត្រីគណៈកម្មការ MCMC គឺក្រុមហ៊ុន ByteDance ម្ចាស់ TikTok មិនអាចចាត់វិធានការទាន់ពេលវេលាទៅលើគណនី TikTok ដែលបង្ហោះវីដេអូប្រមា.ថព្រះចៅស៊ុលតង់ អ៊ីប្រាហ៊ីម (Sultan Ibrahim) ព្រះមហាក្សត្រម៉ាឡេស៊ីបច្ចុប្បន្ន ។ វីដេអូបង្ហាញខ្លឹមសារមិនពិតបានបង្កើតឡើងដោយបច្ចេកវិទ្យា AI និងប្រើប្រាស់រូបភាពកាត់ត នាំឱ្យប៉ះពាល់ដល់សណ្តាប់ធ្នាប់សង្គមនាពេលអនាគត ដែលជាការរំលោភច្បាប់ទាក់ទងនឹងព័ត៌មានចម្រុះ ក៏ដូចជាល្មើសច្បាប់ព្រហ្មទណ្ឌផ្សេងទៀត ។

ចំណែកក្រុមហ៊ុន ByteDance មិនទាន់ឆ្លើយតបទៅកាន់គណៈកម្មការ MCMC នៅឡើយទេ ខណៈកន្លងមក គណៈកម្មការនេះធ្លាប់បានកំណត់ឱ្យក្រុមហ៊ុន Meta របស់ Facebook ចាត់វិធានការដូចគ្នានេះដែរ ។

នាដើមឆ្នាំ២០២៦ ម៉ាឡេស៊ីបានរឹតបន្តឹងបណ្តាញសង្គមទាំងអស់ដែលមានអ្នកប្រើប្រាស់រាប់លាននាក់ក្នុងប្រទេសរបស់ខ្លួន ដោយទាមទារឱ្យមានការអនុញ្ញាតប្រតិបត្តិការច្បាស់លាស់ពីគណៈកម្មការ MCMC បើមិនដូច្នោះទេ នឹងប្រឈមចំណាត់ការច្បាប់យ៉ាងតឹងរ៉ឹង ។ រដ្ឋាភិបាលម៉ាឡេស៊ីបានស្វែងរកដំណោះស្រាយផ្លូវច្បាប់ដើម្បីចាត់វិធានការបណ្តាញសង្គមនានាដែលមិនអាចដោះស្រាយបញ្ហានេះ ព្រមទាំងបង្កើតច្បាប់សុវត្ថិភាពអនឡាញពិន័យប្រាក់បុគ្គលណាបង្ហោះខ្លឹមសារប៉ះពាល់ព្រះមហាក្សត្រ ស្មើនឹង១លានរីងហ្គីត (ឬជាង២៥ម៉ឺនដុល្លារ) ៕

តំបន់ជាច្រើននៅប្រទេសឥណ្ឌាកំពុងប្រឈមនឹងសីតុណ្ហភាពកើនឡើងខ្លាំងរហូតដល់៥០អង្សាសេឈានទៅប្រកាសអាសន្ន នាសប្តាហ៍ទី៣ ខែឧសភា ឆ្នាំ២០២៦ ជាពិសេស ភាគពាយ័ព្យ ដែលអាកាសធាតុក្តៅខ្លាំងប៉ះពាល់យ៉ាងធ្ងន់ធ្ងរដល់ជីវភាពរស់នៅ និងសុខភាពពលរដ្ឋរាប់លាននាក់ ។ តាមការព្យាកររបស់នាយកដ្ឋានឧតុនិយមឥណ្ឌា គឺសីតុណ្ហភាពអាចនឹងបន្តកើនឡើងលើស៥០អង្សាសេ នាសប្តាហ៍ខាងមុខ ។

ភាគពាយ័ព្យប្រទេសឥណ្ឌាមានអាកាសធាតុក្តៅយ៉ាងខ្លាំង បន្ទាប់ពីសីតុណ្ហភាពកើនឡើងខ្ពស់ចាប់ពី៤០ ទៅ៤៧អង្សាសេ ខណៈនៅរដ្ឋ Uttar Pradesh ដែលមានមនុស្សរស់នៅច្រើនជាងគេ សីតុណ្ហភាពកើនឡើ់ងរហូតដល់ជាង៤៨អង្សាសេ បណ្តាលឱ្យប៉ះពាល់សុខភាពពលរដ្ឋ ជាពិសេស ស្ត្រីមានផ្ទៃពោះ កុមារ និងមនុស្សចាស់ ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី២១ ខែឧសភា ឆ្នាំ២០២៦ ។

មន្ទីរពេទ្យនានាបានទទួលអ្នកជំនាញជាច្រើនដែលខ្វះខាតជាតិទឹក និងដាច់សរសៃឈាមខួរក្បាល (Heatstroke) ដោយសាររាងកាយមិនអាចបញ្ចេញកំដៅទាន់ពេល ។ គ្រូពេទ្យដាស់តឿនឱ្យយកចិត្តទុកដាក់ថែទាំសុខភាព ជាពិសេស ស្ត្រីមានផ្ទៃពោះប្រឈមនឹងគ្រោះថ្នាក់ជាងមនុស្សធម្មតា ដោយសារខ្វះទឹកក្នុងខ្លួនខ្លាំងបណ្តាលឱ្យងងឹតមុខ និងដាច់សរសៃឈាមខួរក្បាល ហើយប៉ះពាល់ដល់ទារកក្នុងផ្ទៃផងដែរ ។

ក្រៅពីនេះ ហាមចេញទៅខាងក្រៅផ្ទះនៅពេលអាកាសធាតុក្តៅខ្លាំង (ចាប់ពីម៉ោង១១ព្រឹក រហូតដល់ម៉ោង៥ល្ងាច) ពីព្រោះចន្លោះពេលនេះកំដៅកើនឡើងខ្លាំង ហើយសម្រាកនៅកន្លែងមានខ្យល់ចេញ-ចូល ផឹកទឹកឱ្យគ្រប់គ្រាន់ ដើម្បីការពារកង្វះខាតទឹក និងស្លៀកពាក់ខោអាវងាយស្រួលបញ្ចេញកំដៅ ។ ប្រសិនបើមានអាការៈខុសប្រក្រតី ដូចជា ៖ វិលមុខ អស់កម្លាំង បេះដូងលោតញាប់ ក្តៅខ្លួនខ្លាំង ត្រូវបញ្ជូនទៅមន្ទីរពេទ្យភ្លាមៗ ។

គួរបញ្ជាក់ថា ប្រទេសឥណ្ឌាស្ថិតក្នុងតំបន់ត្រូពិក តែងតែប្រឈមនឹងអាកាសធាតុក្តៅខ្លាំងជាញឹកញាប់ ប៉ុន្តែរយៈពេលប៉ុន្មានឆ្នាំចុងក្រោយនេះ អាកាសធាតុនៅឥណ្ឌាកាន់តែក្តៅ និងយូរជាងមុន ដោយសារបម្រែបម្រួលអាកាសធាតុ ។ បើតាមអ្នកជំនាញអាកាសធាតុ ការកើនឡើងកំដៅខុសធម្មតានេះ ដោយសារឥទ្ធិពលនៃបាតុភូត El Nino ដ៏ខ្លាំងក្លា និងបម្រែបម្រួលអាកាសធាតុពិភពលោក ៕