ទីក្រុងឆ្លាតវៃគឺជាទីក្រុងដែលអនុវត្តបច្ចេកវិទ្យាទំនើបៗដើម្បីបង្កើនអត្ថប្រយោជន៍ដល់បរិស្ថានជាតិ និងកាត់បន្ថយគុណវិបត្តិនៃទីក្រុងសម្រាប់មនុស្ស។ យោងតាមរបាយការណ៍ ទីក្រុងឆ្លាតវៃភាគច្រើនគឺពឹងផ្អែកលើការខិតខំប្រឹងប្រែងរួមបញ្ចូលជាមួយយុទ្ធសាស្រ្តច្នៃប្រឌិតថ្មី ដើម្បីទាក់ទាញ និងរក្សាទេពកោសល្យ ជ្រើសរើសការជំរុញការវិនិយោគនិរន្តរភាព និងដោះស្រាយបញ្ហាដែលជាប់ពាក់ព័ន្ធជាមួយវិសមភាពភូមិសាស្រ្តយ៉ាងឆាប់រហ័ស។ ដូច្នេះក្នុងចំណោមទីក្រុងឆ្លាតវៃទាំង ១០ នៅលើពិភពលោកមាន ៧ នៅអឺរ៉ុប ទោះជាយ៉ាងណាមិនមានទីក្រុងណាមួយនៅសហរដ្ឋអាមេរិកនោះទេ។

នេះបើយោងតាម IMD ដែលជាមជ្ឈមណ្ឌលសម្រាប់កម្មវិធីឃ្លាំមើលទីក្រុងឆ្លាតវៃនៃការប្រកួតប្រជែងពិភពលោក ដោយសហការជាមួយអង្គការ World Smart Sustainable Cities Organization (WeGO) ដែលមានទីស្នាក់ការនៅទីក្រុងសេអ៊ូល ប្រទេសកូរ៉េខាងត្បូង។ របាយការណ៍នេះបានចាត់ចំណាត់ថ្នាក់ទីក្រុងឆ្លាតវៃចំនួន ១៤២ នៅទូទាំងពិភពលោក ដោយផ្អែកលើទិន្នន័យដែលបានវិភាគដោយអ្នកស្រាវជ្រាវ ក៏ដូចជាការឆ្លើយតបការស្ទង់មតិពីអ្នកស្រុកចំនួន ១២០ នាក់នៅក្នុងទីក្រុងនីមួយៗ។ ការសិក្សានេះផ្តល់នូវទិដ្ឋភាពទូទៅអំពីរបៀបដែលហេដ្ឋារចនាសម្ព័ន្ធ និងបច្ចេកវិទ្យាដែលមាននៅក្នុងទីក្រុង និងគុណភាពជីវិតរបស់ប្រជាពលរដ្ឋ។ ដូច្នេះខាងក្រោមនេះគឺជាទីក្រុងឆ្លាតវៃបំផុតទាំង ១០ នៅលើពិភពលោកសម្រាប់ឆ្នាំ ២០២៤៖

១.ទីក្រុង Zurich ប្រទេសស្វីស
២.ទីក្រុង Oslo ប្រទេសន័រវេស
៣.ទីក្រុង Canberra ប្រទេសអូស្ត្រាលី
៤.ទីក្រុង Geneva ប្រទេសស្វីស
៥.ប្រទេសសិង្ហបុរី
៦.ទីក្រុង Copenhagen ប្រទេសដាណឺម៉ាក
៧.ទីក្រុង Lausanne ប្រទេសស្វីស
៨.ទីក្រុងឡុងដ៍ ប្រទេសអង់គ្លេស
៩.ទីក្រុង Helsinki ប្រទេសហ្វាំងឡង់
១០.ទីក្រុង Dhabi សហព័ន្ធអារ៉ាប់រួម។

គួរបញ្ជាក់ដែរថា នេះគឺជាលើកដំបូងហើយដែលមិនមានទីក្រុងណាមួយរបស់សហរដ្ឋអាមេរិកជាប់ក្នុងបញ្ជីកំពូលៗទាំងនេះ។ ទោះជាយ៉ាងណាយោងតាមរបាយការណ៍ទីក្រុងដែលជាប់ចំណាត់ថ្នាក់ខ្ពស់បំផុតនៅសហរដ្ឋអាមេរិកនៅឆ្នាំនេះគឺទីក្រុងញូវយ៉កនៅលំដាប់ទី ៣៤ តាមពីក្រោយដោយទីក្រុង Boston នៅទី ៣៦ និង Washington DC នៅទី ៥០។ ខណៈពេលដែលទីក្រុងនៅអឺរ៉ុបគ្រប់គ្រងបញ្ជី ទីក្រុងនៅអាស៊ីមួយចំនួនក៏ជាប់ក្នុងបញ្ជីទីក្រុងឆ្លាតវៃផងដែរ ដូចជាសិង្ហបុរីនៅលំដាប់លេខ ៥, ទីក្រុងប៉េកាំងនៅទី ១៣, តៃប៉ិនៅទី១៦, សេអ៊ូលទី១៧ និងសៀងហៃនៅលំដាប់ទី១៩៕

ប្រទេសមីយ៉ាន់ម៉ា ៖ មន្ត្រីការិយាល័យឧតុនិយមមីយ៉ាន់ម៉ាលើកឡើងកាលពីថ្ងៃទី២៨ ខែមេសា ឆ្នាំ២០២៤ ថា អាកាសធាតុនៅទីក្រុងស្ថិតនៅតំបន់កណ្តាលមីយ៉ាន់ម៉ាបានកើនឡើងខ្ពស់រហូតដល់៤៨,២អង្សារសេ តាំងពីមីយ៉ាន់ម៉ាបានកត់ត្រាទិន្នន័យកាលពី៥៦ឆ្នាំមុន ។ ហេតុនេះ ធ្វើឱ្យពលរដ្ឋស្លាប់ដោយសារដាច់សរសៃឈាមខួរក្បាល ចាប់ពី៣នាក់ ទៅ៤នាក់ក្នុង១ថ្ងៃ ជាពិសេស ពលរដ្ឋនៅទីក្រុង Mandalay ។

កាលពីថ្ងៃទី៣០ ខែមេសា ឆ្នាំ២០២៤ Eleven Media Group បានរាយការណ៍ដោយដកស្រង់បទសម្ភាសន៍ជាមួយមន្ត្រីសប្បុរសធម៌នៅទីក្រុង Mandalay ថា ដោយសារនៅតំបន់ជាច្រើនរបស់មីយ៉ាន់ម៉ាក្តៅខ្លាំងពេក ទើបធ្វើឱ្យជាច្រើនថ្ងៃមកនេះ ពលរដ្ឋស្លាប់ដោយសារដាច់សរសៃឈាមខួរក្បាល (Heat Stroke) ចាប់ពី៣នាក់ ទៅ៤នាក់ ។

មន្ត្រីសប្បុរសធម៌បានបញ្ជូនអ្នកជំងឺប្រុសម្នាក់ដែលសន្លប់ដោយសារកំដៅថ្ងៃខ្លាំងទៅកាន់មន្ទីរពេទ្យនៅជិតបំផុត កាលពីថ្ងៃទី២៩ ខែមេសា ប៉ុន្តែគ្រូពេទ្យពុំអាចជួយសង្គ្រោះជីវិតអ្នកជំងឺទាន់ពេលវេលាទេ ដោយសារគាត់បានស្លាប់នាពេលមុននេះ ។

នៅថ្ងៃដដែល នៅទីក្រុង Pyay មន្ត្រីសប្បុរសធម៌បានបញ្ជូនអ្នកជំងឺប្រុសម្នាក់ទៀតដែលសន្លប់ក្នុងផ្ទះទៅកាន់មន្ទីរពេទ្យនៅទីក្រុង Pyay ប៉ុន្តែពុំមានសេចក្តីរាយការណ៍ថា អ្នកជំងឺនេះមានអាការៈបែបណាទេ ។

គេហទំព័ររាយការណ៍ពីអាកាសធាតុរបស់មីយ៉ាន់ម៉ាឈ្មោះ MMweather Page ឱ្យដឹងថា Mandalay គឺជាទីក្រុងមួយរបស់មីយ៉ាន់ម៉ា ដែលគេរាយការណ៍ថា មានអាកាសធាតុក្តៅខ្លាំងបំផុតលើពិភពលោក ជាពិសេស នៅថ្ងៃទី២៩ ខែមេសា ឆ្នាំ២០២៤ ។

រីឯគេហទំព័រ El Dorado Weather បញ្ជាក់ថា ទីក្រុងចំនួន១៥ ដែលមានអាកាសធាតុក្តៅខ្លាំងបំផុតលើពិភពលោក កាលពីថ្ងៃទី២៩ ខែមេសា ក្នុងនោះមានទីក្រុងចំនួន៧ ស្ថិតនៅមីយ៉ាន់ម៉ា រួមមាន ៖

១-ទីក្រុង Chauk មានសីតុណ្ហភាព ៤៨,២អង្សាសេ
២-ទីក្រុង Magway មានសីតុណ្ហភាព ៤៦,១អង្សាសេ
៣-ទីក្រុង Nyaung-U មានសីតុណ្ហភាព ៤៦អង្សាសេ
៤-ទីក្រុង Minbu មានសីតុណ្ហភាព ៤៥,៥អង្សាសេ
៥-ទីក្រុង Sagaing មានសីតុណ្ហភាព ៤៥,៥អង្សាសេ
៦-ទីក្រុង Mandalay មានសីតុណ្ហភាព ៤៤,៨អង្សាសេ និង
៧-ទីក្រុង Monywa មានសីតុណ្ហភាព ៤៤,៨អង្សាសេ ៕

ដើមឈើទាលអាយុកាលជិត ២០០ ឆ្នាំ ដាំដោយ វីរបុរសឧកញ៉ា សឺង គុយ ឬចៅហ្វាយគុយ កំពុងបង្ហាញខ្លួននៅលើដែនដីកម្ពុជាក្រោម ស្ថិតទិសខាងត្បូងនៃទីរួមខេត្តព្រះត្រពាំង ដែលបានប្ដូរឈ្មោះថាខេត្តត្រាវិញ (Tra Vinh)។

ដើមឈើទាលឧកញ៉ា សឺង គុយ បច្ចុប្បន្នគឺមានទំហំប្រមាណ ៧ ឱប និងមានកម្ពស់ ២៥ ម៉ែត្រ ដោយឫសស្រាក់គ្នា បែកមែកសាខាពាសពេញដើម ផ្តល់នូវម្លប់យ៉ាងត្រឈឹងត្រឈៃ ដល់មនុស្ស សត្វ ជ្រកកោន។

លោកឧកញ៉ា សឺង គុយ បានដាំដើមឈើទាលនេះបញ្ច្រាសចុង (គឺមានន័យថាដាំយកចុងចុះក្រោម គល់ឡើងលើ) កាលពីឆ្នាំ ១៨៤១ មុនពេលដែលលោកឧកញ៉ាលះបង់ជីវិតនៅលើដែនមាតុភូមិកម្ពុជាក្រោម។ ក្នុងពេលដាំឈើទាលបញ្ច្រាសនេះ វីរបុរសឧកញ៉ា សឺង គុយ បានផ្សងថា បើជាតិសាសនាខ្មែរនៅគង់វង្ស សូមឱ្យមែកឈើទាលនេះដុះលូតលាស់ឡើង ។

ទីឋានប្រវត្តិសាស្ត្រទាក់ទងនឹងពលិកម្មរបស់លោកវីរបុរសឧកញ៉ា សឺង គុយ ដែលកុលបុត្រខ្មែរគួរចងចាំ គោរពបូជា រួមមាន ៣ កន្លែងផ្សេងទៀត ទីមួយ គឺចេតិយដីកប់យុទ្ធភណ្ឌនៅវត្តចេតិយ។ ទី២ គឺ ទីលានប្រយុទ្ធទទួលជ័យជម្នះលើសត្រូវ នៅវត្តផ្នោរដូង និងទី៣ ខឿនចេតិយ ជាទីបញ្ចុះសពរបស់លោកឧកញ៉ា នៅវត្តពោធិសាលរាជកំពង់ ទីរួមខេត្តព្រះត្រពាំង ។

បច្ចុប្បន្ននេះ គឺមានភ្ញៀវទេសចរចម្រុះជាតិសាសន៍ មកអុជធូបបន់ស្រន់នៅទីតាំងដើមឈើទាលនេះជាហូរហែផងដែរ៕

បរទេស៖ សត្វព្រៃជាច្រើនដូចជា ឆ្កែព្រៃ ជ្រូកព្រៃ ខ្លាឃ្មុំ កញ្ជ្រោងក្រហម និងដំរី បានកំពុងវាយលុកចូលទៅក្នុងទីក្រុងនានានៅជុំវិញពិភពលោក ដោយសារការប្រែប្រួលអាកាសធាតុ និងការកាប់បំផ្លាញព្រៃឈើធ្វើឱ្យពួកវាគ្មានទីជម្រក ក៏រត់ចូលក្នុងទីក្រុងដែលបណ្តាលឱ្យមានការខូចខាតហេដ្ឋារចនាសម្ព័ន្ធ និងបង្កឱ្យមានភាពចលាចល នេះបើយោងតាមការចុះផ្សាយរបស់ Worldcrunch។ ដូច្នេះខាងក្រោមនេះគឺជាទីក្រុងធំៗមួយចំនួន ដែលកំពុងប្រឈមនឹងការវាយលុករបស់សត្វព្រៃជារៀងរាល់ថ្ងៃ៖

១.ទីក្រុងឡុងដ៍ ប្រទេសអង់គ្លេស៖ ជារៀងរាល់យប់ សត្វកញ្ជ្រោងក្រហមបានចេញពីកន្លែងលាក់ខ្លួនរបស់ពួកវា ហើយចាប់ផ្តើមដើរលេងតាមដងផ្លូវក្នុងទីក្រុង ក្នុងគោលបំណងដើររកចំណីក្នុងធុងសំរាម ដោយសត្វពាហនៈនេះអាចសម្របខ្លួនបានយ៉ាងងាយដោយវាអាចស៊ីចំណីធម្មជាតិដូចជាផ្លែប៊ឺរីព្រៃ និងសត្វល្អិត បន្ថែមដោយសត្វព្រាប និងសំណល់ពីធុងសំរាម។ តាមពិតទៅកញ្ជ្រោងបានរស់នៅជាមួយមនុស្សអស់រយៈពេលរាប់ពាន់ឆ្នាំមកហើយ ដែលសព្វថ្ងៃនេះកញ្ជ្រោងរីកលូតលាស់នៅក្នុងទីក្រុងដោយមានដង់ស៊ីតេសត្វកញ្ជ្រោង ១៨ ក្បាលក្នុងទីក្រុងឡុងដ៍តែមួយគត់។

២.ទីក្រុង Coyotes ប្រទេសអាមេរិក៖ Coyotes បានក្លាយជាទីក្រុងដ៏សំបូរបែបរបស់ប្រទេសអាមេរិកក្នុងប៉ុន្មានទសវត្សរ៍ថ្មីៗនេះ ដោយសារប្រជាជននិងសត្វគោព្រៃបានរស់នៅក្នុងទីក្រុងជាមួយគ្នា។ យោងតាមការសិក្សាឆ្នាំ ២០២២ ដែលវិភាគលើរបបអាហាររបស់សត្វ បានឱ្យដឹងថាគោព្រៃដែលបានចូលក្នុងទីក្រុងភាគច្រើនវាបរិភោគអាហារដូចមនុស្សដែររួមមាន មាន់ ទា ជ្រូក និងសាច់គោ ដែលរបបអាហារទាំងនេះអាចធ្វើឱ្យវាបត់បែនបាន និងសម្របខ្លួនបានយ៉ាងល្អសម្រាប់ជីវិតនៅក្នុងទីក្រុង។

៣.ទីក្រុង Teufelssee ប្រទេសអាល្លឺម៉ង់៖ បច្ចុប្បន្នទីក្រុងនេះកំពុងប្រឈមនឹងការឈ្លានពានរបស់ជ្រូកព្រៃ ខណៈជ្រូកព្រៃបានវាយលុកនៅតាមដងផ្លូវក្នុងទីក្រុង គោលបំណងដើម្បីរកចំណីតាមធុងសំរាម ហើយពេលខ្លះទៀតពួកវាក៏ដេកក្បែរធុងសំរាមនៅជិតផ្ទះរបស់មនុស្សដែលបង្កឱ្យមានភាពអសន្តិសុខ។ នៅសហរដ្ឋអាមេរិក ជ្រូកព្រៃក៏ត្រូវបានគេចាត់ទុកថាជាប្រភេទសត្វឈ្លានពានផងដែរ ដោយសារវាបានធ្វើឱ្យមានការខាតបង់ប្រចាំឆ្នាំនៃដំណាំរបស់សហរដ្ឋអាមេរិក ដូចជាសណ្តែកដី និងពោតត្រូវបានគេប៉ាន់ប្រមាណថាមានចំនួន ២.៥ ពាន់លានដុល្លារ។

៤.ទីក្រុង Mekelle ភាគខាងកើតប្រទេសអេត្យូពី៖ សព្វថ្ងៃនៅទីក្រុង Mekelle ភាគខាងកើតនៃប្រទេសអេត្យូពី បានកំពុងប្រឈមនឹងការឈ្លានពានរបស់សត្វ Hyenas ដែលជាសត្វកាចសាហាវដ៏ល្បីល្បាញនៅក្នុងព្រៃ។ ទោះជាយ៉ាងណានៅពេលដែលវាបានចូលក្នុងទីក្រុងសត្វនេះមិនធ្វើឱ្យមានភាពចលាចលនោះទេ ដោយពួកវាគ្រាន់តែរកចំណីនៅក្នុងធុងសំរាមប៉ុណ្ណោះ។ យោងតាមការសិក្សាឆ្នាំ ២០២១ ដោយសាកលវិទ្យាល័យ Michigan បានឱ្យដឹងថា សត្វ Hyenas ផ្តល់អត្ថប្រយោជន៍ផ្នែកសុខភាព និងសេដ្ឋកិច្ចសំខាន់ៗដល់ទីក្រុងនៅអាហ្វ្រិក ដោយពួកវាបានយកចេញនូវគ្រោងឆ្អឹងសត្វផ្សេងៗចំនួន ២០៧ តោនជារៀងរាល់ឆ្នាំ នឹងការពារការចម្លងជំងឺ anthrax ជំងឺរបេង bovine ពីគោក្របី ចៀម កុំឱ្យឆ្លងដល់មនុស្ស។

៥.ទីក្រុង Kotdwar ប្រទេសឥណ្ឌា៖ សត្វដំរីតែងតែដើររើសសំរាមនៅជាយក្រុង Kotdwar ដែលជាទីក្រុងមួយនៅស្រុក Uttarakhand ភាគខាងជើងប្រទេសឥណ្ឌា។ ពួកវាតែងតែចេញពីព្រៃដើម្បីរកចំណីក្នុងទីក្រុងជារៀងរាល់ថ្ងៃ ទោះជាយ៉ាងណាយោងតាមការសិក្សានៅសាកលវិទ្យាល័យ Jawaharlal Nehru ទីក្រុងញូវដេលី បានឱ្យដឹងថា ដំរីព្រៃដែលចូលមកស៊ីចំណីក្នុងក្រុងមានសុខភាពមិនល្អនោះទេ បើប្រៀបធៀបនឹងដំរីដែលស៊ីអាហារធម្មជាតិក្នុងព្រៃគឺមានសុខភាពល្អជាង លើសពីនេះដំរីក៏អាចស្លាប់ដោយសារស៊ីកាកសំណល់ប្លាស្ទិកច្រើនពេក។

៦.ទីក្រុងមួយចំនួនប្រទេសអាមេរិក៖ នៅសហរដ្ឋអាមេរិកខ្លាឃ្មុំជាច្រើនក្បាលបានបង្កគ្រោះថ្នាក់ខ្លាំងទៅដល់មនុស្ស ខណៈពេលវាបានរត់ចេញពីព្រៃចូលក្នុងក្រុងដើម្បីរកចំណី។ យើងគ្រប់គ្នាដឹងហើយថាខ្លាឃ្មុំព្រៃគឺជាសត្វកាចសាហាវនៅពេលដែលវាឃ្លាន ប្រសិនបើមនុស្សនៅក្បែវាអាចនឹងមានគ្រោះថ្នាក់ដល់ជីវិត។ ជាទូទៅសត្វនេះតែងតែលួចចូលផ្ទះរបស់មនុស្ស ដើម្បីលួចអាហារ ទោះជាយ៉ាងណាអាជ្ញាធរគ្រប់គ្រងសត្វព្រៃកំពុងអប់រំសហគមន៍អំពីរបៀបរស់នៅដោយសន្តិភាពជាមួយខ្លាឃ្មុំ៕

ប្រទេសនានាលើពិភពលោកចាប់ផ្តើមព្រួយបារម្ភពីការបំពុលបរិស្ថានដោយសារកាកសំណល់ផ្លាស្ទិក និងពិចារណាលើកិច្ចព្រមព្រៀងកាត់បន្ថយផលិតកម្មផ្លាស្ទិកស្មើ៤០% ក្នុងរយៈពេល១៥ឆ្នាំទៀត ។ ការផលិតសម្ភារៈផ្លាស្ទិកលើពិភពលោកបានកើនឡើងខ្ពស់ជាបន្តបន្ទាប់ គឺចាប់ពី២លានតោន នៅឆ្នាំ១៩៥០ មកស្មើ៣៤៨លានតោន នៅឆ្នាំ២០១៧ ហើយគេរំពឹងថា ការផលិតសម្ភារៈផ្លាស្ទិកនឹងកើនឡើងទ្វេដងនៅឆ្នាំ២០៤០ ។

បើតាមការព្យាករបង្ហាញថា ក្នុង១ឆ្នាំៗ មានកាកសំណល់ផ្លាស្ទិកប្រមាណ១១លានតោនបានហូរទៅកាន់មហាសមុទ្រ ហើយនៅឆ្នាំ២០៤០ ទំហំនឹងការបំពុលបរិស្ថានបណ្តាលមកពីកាកសំណល់ផ្លាស្ទិកក្នុងសមុទ្រ នឹងកើនឡើង៣ដង ។

ការស្រាវជ្រាវរបស់អ្នកវិទ្យាសាស្ត្រមកពីមន្ទីរពិសោធន៍ជាតិ (Lawrence Berkeley National Lab) សហរដ្ឋអាមេរិកឱ្យដឹងថា នៅឆ្នាំ២០៥០ ការផលិតសម្ភារៈផ្លាស្ទិកនឹងស្មើពី២១% ទៅ៣១% នៃថវិកាកាបូនសកល ។ តាមការវិភាគរបស់ Beyond Plastics បង្ហាញថា កាលពីឆ្នាំ២០២១ ឧស្សាហកម្មផ្លាស្ទិកអាមេរិកបានរួមចំណែកបំផ្លាញបរិស្ថានច្រើនជាងរោងចក្រថាមពលធ្យូងថ្ម ។

ប្រទេសនានាបានព្រមព្រៀងគ្នាអនុវត្តតាមការចរចារបស់អង្គការសហប្រជាជាតិ ឆ្នាំ២០២២ នៅទីក្រុងណៃរ៉ូប៊ី ប្រទេសកេនយ៉ា ថា នឹងគោរពតាមសន្ធិសញ្ញាកាត់បន្ថយកាកសំណល់ផ្លាស្ទិក ហើយប្រទេសទាំងនេះសន្យាថា នឹងចុះកិច្ចព្រមព្រៀងស្របតាមច្បាប់អន្តរជាតិ នៅឆ្នាំ២០២៤ ។ រីឯការចរចានៅទីក្រុងអូតាវ៉ា ប្រទេសកាណាដា អំពីការកាត់បន្ថយកាកសំណល់ផ្លាស្ទិក គឺមានគោលដៅដើម្បីឱ្យប្រទេសចំនួន១៧៥ អនុម័តសេចក្តីព្រាងសន្ធិសញ្ញាកាត់បន្ថយការបំពុលបរិស្ថាន ។

Graham Forbes នាយកគម្រោងផ្លាស្ទិកលំដាប់ពិភពលោក របស់ Greenpeace សហរដ្ឋអាមេរិក និយាយថា ៖ «នេះជាជំហានដំបូងដ៏សំខាន់ដើម្បីកម្ចាត់សំរាមផ្លាស្ទិកលើពិភពលោក ។ អ្នកពុំអាចដោះស្រាយបញ្ហាការបំពុលបរិស្ថានបានទេ លុះត្រាតែអ្នកកំណត់, កាត់បន្ថយ និងកម្ចាត់ការផលិតផ្លាស្ទិក» ។

វាជាលើកទី១ ដែលប្រទេសនានាដាក់កំណត់ការផលិតសម្ភារៈផ្លាស្ទិកលើពិភពលោក គឺនឹងកាត់បន្ថយការផលិតសម្ភារៈផ្លាស្ទិកស្មើ៤០% ក្នុងរយៈពេល១៥ឆ្នាំ ដើម្បីការពារសុខភាពមនុស្ស និងការបំពុលបរិស្ថាន ៕

កូរ៉េខាងត្បូង៖ កាលពីពេលថ្មីៗនេះ យោងតាមការចុះផ្សាយរបស់ Koreaboo បានឱ្យដឹងថា អ្នកគាំទ្រនៅក្នុងប្រទេសចិនបានកំពុងពិចារណាធ្វើពហិការមិនដាក់កម្មង់ទិញ 1st FULL ALBUM “Armageddon” ដែលជាអាល់ប៊ុមថ្មីរបស់ក្រុមចម្រៀងស្រី Aespa នៃផលិតកម្ម SM Entertainment ដោយសារមានហេតុផលសំខាន់ៗពីរ។

ប្រិយមិត្តដែលជាអ្នកគាំទ្រ K-pop ប្រាកដជាបានដឹងហើយថា ក្រុមចម្រៀងស្រី Aespa របស់ផលិតកម្ម SM គ្រោងនឹងប្រគុំតន្ត្រីនៅទីក្រុង Fukuoka Arena ប្រទេសជប៉ុននៅថ្ងៃទី៧ ខែកក្កដាខាងមុខនេះ ទោះជាយ៉ាងណាដោយសារកាលបរិច្ឆេទនេះចំថ្ងៃប្រវិត្តិសាស្រ្តដ៏ខ្មៅងងឹត “Black Day” សម្រាប់ជនជាតិចិន មានន័យថានៅថ្ងៃទី៧ ខែកក្កដានេះគឺជាថ្ងៃដែលចិនចាញ់សង្គ្រាមជាមួយជប៉ុន។

ដូច្នេះការប្រគុំតន្ត្រីរបស់តារាកូរ៉េនៅឯប្រទេសជប៉ុនចំថ្ងៃនេះ ត្រូវបានអ្នកគាំទ្រជនជាតិចិនមិនពេញចិត្តហាក់ដូចជាមិនគោរពចំពោះហ្វេនជនជាតិចិន ព្រោះកាលពីកន្លងទៅពួកគេបានទិញអាល់ប៊ុមរបស់ Aespa រាប់លានបន្ទះ ដោយពួកគេស្នើឱ្យផលិតកម្មផ្លាស់ប្តូរថ្ងៃជាបន្ទាន់។ លើសពីនេះអ្នកគាំទ្រចិនរាប់សែននាក់បានបញ្ចេញមតិព្រួយបារម្ភនៅក្នុងគណនី Weibo ថា Ningning ដែលជាសមាជិក Aespa គឺជាជនជាតិចិនប្រសិនបើនាងហ៊ានប្រគំតន្ត្រីនៅថ្ងៃទី៧ ខែកក្កដា ដែលជាថ្ងៃ “Black Day” របស់ចិននោះ Ningning នឹងប្រឈមការរិះគន់យ៉ាងធ្ងន់ធ្ងរពីអ្នកគាំទ្រចិន។

សម្រាប់ហេតុផលទីពីរវិញអ្នកគាំទ្រចិនក៏បានស្នើសុំឱ្យផលិកម្ម SM ផ្លាស់ប្ដូរសាលប្រគុំតន្រ្តី ដែលគ្រោងនឹងធ្វើនៅ Hong Kong និង Macau ចេញ ព្រោះវាអាចផ្ទុកបានចំនួនមនុស្សត្រឹមតែ ៥០០០ នាក់ និង ២៨០០ នាក់ប៉ុណ្ណោះ ដែលមិនស័ក្តិសមនឹងប្រជាប្រិយភាពដ៏ខ្លាំងក្លារបស់ aespa នៅប្រទេសចិនឡើយ។ ហេតុនេះហើយ ប្រសិនបើខាងផលិតកម្មមិនផ្លាស់ប្តូរតាមការស្នើសុំរបស់អ្នកគាំទ្រចិនទេ នោះពួកគេនឹងធ្វើពហិការមិនទិញអាល់ប៊ុមថ្មីរបស់ Aespa ទៀតឡើយ។

គួរបញ្ជាក់ដែរថា Aespa គឺជាក្រុមចម្រៀងស្រីកូរ៉េដ៏មានឥទ្ធិពលបំផុតនៅជំនាន់ទី៤ ដែលគ្រប់គ្រងដោយផលិតកម្ម SM Entertainment។ Aespa មានសមាជិក ៤ នាក់ដោយពីនាក់គឺជាជនជាតិកូរ៉េគឺ Karina និង Winter ខណៈ Giselle គឺជាជនជាតិជប៉ុន និង Ningning គឺជាជនជាតិចិន៕