ក្រុមហ៊ុន Carbon Collect ធ្វើការផ្នែកអភិវឌ្ឍបច្ចេកវិទ្យាស្រូបកាបូនឌីអុកស៊ីត ដែលជាមូលហេតុធ្វើឱ្យមានការបំភាយឧស្ម័នផ្ទះកញ្ចក់ បានផលិតដើមឈើមេកានិច (Mechanical Tree) សម្រាប់ស្រូបកាបូនពីខ្យល់ ។ ដើមឈើនេះមានសមត្ថភាពស្រូបយកកាបូនលើសដើមឈើពិតប្រាកដរហូតដល់១.០០០ដង ហើយវាជាវិធីកាត់បន្ថយកំដៅផែនដីផងដែរ ដែលចេះតែកើនឡើងពីមួយឆ្នាំទៅមួយឆ្នាំ ។

ការផលិតដើមឈើមេកានិច គឺជាការសហការគ្នារវាងក្រុមហ៊ុន Carbon Collect ជាមួយលោកសាស្ត្រាចារ្យ Klaus Lackner មកពីសាកលវិទ្យាល័យ Arizona នៅសហរដ្ឋអាមេរិក ។ លោក Klaus Lackner បានចំណាយពេលវេលាអស់ជាច្រើនឆ្នាំ ដើម្បីស្រាវជ្រាវបច្ចេកវិទ្យាស្រូបកាបូន បន្ទាប់មក ក៏ឈានដល់ការផលិតដើមឈើមេកានិច ដែលមនុស្សគ្រប់គ្នាបានឃើញ ។ បច្ចេកវិទ្យាស្រូបកាបូបនេះ ត្រូវបានប្រើប្រាស់រួចហើយនៅសាកលវិទ្យាល័យ Arizona ។

ដើមឈើមេកានិច មានកម្ពស់ប្រមាណ១០ម៉ែត្រ គឺមានតម្រងស្របកាបូនពីខ្យល់ ហើយបង្គោលរបស់វាអាចពង្រីក ឬបន្ថយទំហំដោយស្វ័យប្រវត្តិ ។ វាបានចំណាយពេលស្រូបកាបូន ចាប់ពី៣០នាទី ទៅ១ម៉ោងក្នុង១លើក ហើយនៅពេលដើមឈើនេះស្រូបកាបូនពេញហើយ បង្គោលស្រូបកាបូននឹងបន្ថយទំហំបន្តិចម្តងៗ និងបញ្ចេញកាបូនទាំងនេះ ។ បន្ទាប់មក បង្គោលដើមឈើនឹងពង្រីកទំហំម្តងទៀតដើម្បីដំណើរការជាថ្មី ។

ក្រុមហ៊ុន Carbon Collect អះអាងថា ដើមឈើមេកានិចអាចស្រូបកាបូនពីខ្យល់បានល្អជាងដើមឈើពិតប្រាកដ រហូតដល់១.០០០ដងឯណោះ ។ ទោះយ៉ាងណា បើប្រៀបធៀបវាជាមួយដើមឈើពិតប្រាកដ ដើមឈើនេះមានតួនាទីត្រឹមតែស្រូបកាបូនប៉ុណ្ណោះ ប៉ុន្តែវាពុំអាចបញ្ចេញអុកស៊ីសែនមកក្រៅដូចដើមឈើពិតប្រាកដទេ ។

ក្រុមហ៊ុនបញ្ជាក់ទៀតថា បច្ចេកវិទ្យាដើមឈើមេកានិចខុសគ្នាពីបច្ចេកវិទ្យាស្រូបកាបូនផ្ទាល់ពីខ្យល់ នៅត្រង់វាពុំចាំបាច់ប្រើប្រាស់កង្ហារបឺតខ្យល់ចូលក្នុងម៉ាស៊ីន ។ ប៉ុន្តែវាបានស្រូបខ្យល់ធម្មជាតិ ដែលធ្វើឱ្យការចំណាយដើមទុនកាន់តែថោក ។ បច្ចុប្បន្ន ដើមឈើមេកានិចស្ថិតក្នុងការសាកល្បងនៅឡើយ ហើយក្រុមហ៊ុនមានគម្រោងពង្រីកបច្ចេកវិទ្យានេះឱ្យមានសមត្ថភាពស្រូបកាបូនរហូតដល់១.០០០តោនក្នុង១ថ្ងៃ នាពេលអនាគត ៕

ប្រទេសចិន ៖ កាលពីថ្ងៃទី៧ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា ភ្ញៀវទេសចរឡើងភ្នំជាច្រើននាក់នៅប្រទេសចិនបានជាប់លើច្រាំងថ្មភ្នំដ៏ខ្ពស់អស់ជាង១ម៉ោង ដើម្បីរង់ចាំឱ្យអ្នកឡើងភ្នំនៅខាងមុខបម្លាស់ទី ទើបពួកគេអាចបម្លាស់ទីតាមក្រោយ ។ រីឯមូលហេតុធ្វើឱ្យពួកគេជាប់លើច្រាំងថ្មភ្នំបែបនេះ ដោយសារមានភ្ញៀវទេសចរសម្រុកឡើងភ្នំច្រើននាក់ពេក ។

ហេតុការណ៍នេះបានកើតឡើងកាលពីថ្ងៃទី៤ ខែឧសភា ឆ្នាំ២០២៤ នៅភ្នំយ៉ានតាំង ស្ថិតក្នុងខេត្ត Zhejiang ។ ភ្ញៀវទេសចរឡើងភ្នំទាំងនេះបានជាប់លើច្រាំងថ្មភ្នំ ក្នុងអំឡុងពេលធ្វើដំណើរទៅកាន់កំពូលភ្នំ ។ ពួកគេត្រូវឈរនៅលើផ្លូវដ៏តូចតោងច្រាំងថ្ម និងពាក់ខ្សែសុវត្ថិភាព ព្រោះពួកគេពុំអាចធ្វើដំណើរទៅមុខបន្តទៀតបាន ។

ផ្លូវដែកឡើងភ្នំឈ្មោះថា Via Ferrata បានតភ្ជាប់រវាងដែក ខ្សែ និងច្រាំងថ្ម ដើម្បីផ្តល់ភាពងាយស្រួល និងអាចឱ្យភ្ញៀវទេសចរឡើងភ្នំយ៉ាងមានសុវត្ថិភាព ។ ភ្ញៀវទេសចរទាំងអស់ត្រូវតែពាក់ឧបករណ៍ និងខ្សែសុវត្ថិភាពការពារខ្លួនក្នុងពេលធ្វើដំណើរឡើងភ្នំ ។ មហាជនភ័យខ្លាច និងបារម្ភពីសុវត្ថិភាពរបស់ភ្ញៀវទេសចរ ក្រោយបានទស្សនាវីដេអូរួច ។

ក្រុមហ៊ុន Wenzhou Dingcheng Sports Development ដែលគ្រប់គ្រងតំបន់ទេសចរណ៍ និងថែទាំផ្លូវឡើងភ្នំ និយាយថា ក្រុមហ៊ុនបានប៉ាន់ស្មានពីចំនួនភ្ញៀវទេសចរចាប់អារម្មណ៍ឡើងភ្នំ តិចជាងភ្ញៀវទេសចរជាក់ស្តែង ។ ភ្ញៀវទេសចរយ៉ាងច្រើនបានមកទិញសំបុត្រឡើងភ្នំ ទើបធ្វើឱ្យមានការកកស្ទះនៅលើផ្លូវដែកបែបនេះ ។

សប្តាហ៍ទី១ ខែឧសភា ជារៀងរាល់ឆ្នាំ គឺជាថ្ងៃឈប់សម្រាកនៅប្រទេសចិន ព្រោះរដ្ឋាភិបាលចិនបានកំណត់ថ្ងៃទី១ ដល់ថ្ងៃទី៧ ខែឧសភា គឺជាថ្ងៃឈប់សម្រាកតាមច្បាប់ ។ ហេតុនេះ ធ្វើឱ្យពលរដ្ឋជាច្រើននាក់ដើរលេងនៅតាមតំបន់ទេសចរណ៍ផ្សេងៗ ។

ក្រុមហ៊ុន Wenzhou ទទួលស្គាល់ថា ការលក់ និងកក់សំបុត្រឡើងភ្នំពុំទាន់មានប្រសិទ្ធភាពគ្រប់គ្រាន់សម្រាប់ទទួលភ្ញៀវទេសចរច្រើន រួមទាំងការគ្រប់គ្រងការងារមានបញ្ហា ទើបធ្វើឱ្យភ្ញៀវទេសចរត្រូវជាប់លើច្រាំងថ្មភ្នំ ។ ក្រុមហ៊ុនបានផ្អាកការលក់សំបុត្រឡើងភ្នំជាបណ្តោះអាសន្ន ហើយពេលដោះស្រាយបញ្ហារួចរាល់ ទើបក្រុមហ៊ុនរៀបចំផែនការកំណត់ចំនួនភ្ញៀវទេសចរនាថ្ងៃអនាគត ។

ភ្នំយ៉ានតាំង មានកម្ពស់១.១៥០ម៉ែត្រ គឺជាតំបន់ទេសចរណ៍ដ៏ពេញនិយមរបស់ចិន ហើយភ្ញៀវទេសចរនឹងមកកម្សាន្តនៅភ្នំនេះក្នុងថ្ងៃឈប់សម្រាក ។ កន្លងមក ប្រទេសចិនបានស្នើសុំចុះបញ្ជីភ្នំយ៉ានតាំងជាមួយអង្គការយូណេស្កូ ធ្វើជាសម្បត្តិបេតិកភណ្ឌពិភពលោក ៕

Selena Gomez គឺជាតារាចម្រៀង អ្នកនិពន្ធបទចម្រៀង តារាសម្តែង ផលិតករ និងជាអ្នកជំនួញដ៏ល្បីល្បាញម្នាក់របស់សហរដ្ឋអាមេរិក។ នាងបានចាប់ផ្តើមអាជីពរបស់នាងជាតារាសម្តែងតាំងពីកុមារភាពមកម្លេះ ដោយសម្តែងក្នុងរឿងភាគទូរទស្សន៍កុមារ Barney & Friends។ បន្ទាប់មកនាងក៏បានប្រឡូកចូលវិស័យចម្រៀងនៅឆ្នាំ ២០០៨ ទោះជាយ៉ាងណាអ្នកគាំទ្របានសង្កេតឃើញថា រហូតមកដល់ពេលនេះ Selena នៅតែមានសម្រស់ស្រស់ស្អាតផូរផង់និងទាក់ទាញបំផុត។ មូលហេតុដែលតារាវ័យ ៣១ ឆ្នាំរូបនេះនៅតែក្មេងជាងវ័យគឺដោយសារនាងបានអនុវត្តរូបមន្តធម្មជាតិទាំងនេះ៖

១.លាងមុខជាមួយទឹកដោះគោស្រស់៖ ជារៀងរាល់ថ្ងៃ Selena Gomez តែងតែជឿជាក់លើការប្រើទឹកដោះគោស្រស់ធម្មជាតិដើម្បីសម្អាតស្បែករបស់នាង។ ទឹកដោះគោស្រស់មាន AHA និងសារធាតុរ៉ែដ៏ច្រើន ដើម្បីជួយធ្វើឱ្យស្បែកទន់ និងជំរុះកោសិកាចាស់ៗ ខណៈពេលដែលផ្តល់សំណើមដល់ស្បែក និងជួយឱ្យស្បែកកាន់តែរលោង។

២.អនុវត្តការបង្ហាប់ត្រជាក់លើស្បែក៖ ការបង្ហាប់ត្រជាក់ជាអាថ៌កំបាំងយូរមកហើយដើម្បីឱ្យស្បែកភ្លឺថ្លា រលោង និងមានសុខភាពល្អ។ បន្ថែមពីលើការលុបបំបាត់ស្នាមជាំ ដើម្បីឱ្យស្បែកស្រស់ស្អាត Selena ក៏ប្រើដុំទឹកកកដើម្បីព្យាបាលភ្នែកខ្មៅ កាត់បន្ថយការរលាកស្បែកដែលបណ្តាលមកពីមុន បង្កើនចរន្តឈាម និងជម្រុះកោសិកាងាប់។ នេះក៏ជួយឱ្យផលិតផលថែរក្សាស្បែកផ្សេងទៀតដូចជាសេរ៉ូម ឬជាតិសំណើមជ្រាបចូលជ្រៅទៅក្នុងស្បែកផ្តល់លទ្ធផលល្អប្រសើរ។

៣.ការថែរក្សាស្បែកក្នុងកម្រិតមធ្យម៖ ទោះបីជានាងរវល់យ៉ាងណាក៏ដោយ ក៏ Selena នៅតែឆ្លៀតពេលថែរក្សាស្បែក និងខ្លួននាងជារៀងរាល់ថ្ងៃ។ ទោះបីជាស្បែករបស់នាងមិនមានបញ្ហាអ្វីក៏ដោយ ក៏នាងនៅតែត្រូវថែរក្សា និងការពារវាជានិច្ច។ ក្រៅពីធ្វើតាមទម្លាប់ថែរក្សាស្បែកនៅផ្ទះ អ្នកក៏ត្រូវជួបពិភាក្សាជាមួយគ្រូពេទ្យជំនាញស្បែកម្តងម្កាលផងដែរ។

លើសពីនេះ Selena ក៏កំណត់អាហារដែលបង្កគ្រោះថ្នាក់ដល់ស្បែក ដូចជាសូកូឡា អាហារសម្រន់ដែលមានកាឡូរីខ្ពស់ និងខ្លាញ់ខ្ពស់។ ផ្ទុយទៅវិញ តារាស្រីរូបនេះ ញ៉ាំផ្លែឈើ និងបន្លែច្រើន ផឹកទឹកបន្លែបៃតង និងបន្ថែមសារធាតុចិញ្ចឹមគ្រប់ក្រុម។ នាងក៏ឧស្សាហ៍ធ្វើលំហាត់ប្រាណមានប្រយោជន៍ច្រើនសម្រាប់សុខភាពស្បែក ផ្លូវចិត្ត និងរាងកាយ។ ការធ្វើលំហាត់ប្រាណជាទៀងទាត់នឹងជួយអ្នកឱ្យប្រសើរឡើងនូវលំហូរឈាមនៅក្នុងរាងកាយនិងយកជាតិពុលចេញពីរាងកាយជួយឱ្យស្បែកក្មេងជាងវ័យ៕

បរទេស៖ យោងតាមក្រុមហ៊ុនស្រាវជ្រាវ Wood Mackenzie កាលពីថ្ងៃទី៧ ខែឧសភា បានឱ្យដឹងថាបច្ចុប្បន្នតម្រូវការប្រេងសាំងសកលបានធ្លាក់ចុះខ្លាំងនៅក្នុងឆ្នាំនេះ ដោយសារឥទ្ធិពលរថយន្តអគ្គិសនីរបស់ចិន និងអាមេរិកបានវាយលុកទីផ្សារពិភពលោក ធ្វើឱ្យតម្រូវការប្រេងសាំងធ្លាក់ចុះពាក់កណ្តាលបើធៀបនឹងឆ្នាំមុន។

ក្រុមហ៊ុនស្រាវជ្រាវនេះក៏បានព្យាករណ៍ដែរថាតម្រូវការប្រេងសាំងសកលនៅឆ្នាំនេះកើនឡើងត្រឹមតែ ២៦.៥ លានបារ៉ែលក្នុងមួយថ្ងៃប៉ុណ្ណោះ ដែលជាកំណើនទាបបំផុតចាប់តាំងពីឆ្នាំ ២០២០ មក។ កំណើនបានធ្លាក់ចុះយ៉ាងខ្លាំងដោយសារតែគ្មានតម្រូវការពីប្រទេសចិន និងអាមេរិក។ អ្នកវិភាគរបស់ Woodmac លោក Sushant Gupta ចង្អុលបង្ហាញពីហេតុផលគឺការកើនឡើងនៃការជ្រៀតចូលនៃរថយន្តអគ្គិសនីនៅក្នុងទីផ្សារធំទាំងពីរនេះ។

លោកបាននិយាយថា “នៅឆ្នាំនេះ តម្រូវការប្រេងសាំងរបស់ប្រទេសចិនកើនឡើងត្រឹមតែ ១០,០០០ បារ៉ែលក្នុងមួយថ្ងៃប៉ុណ្ណោះ ដោយសារតែកម្រិតខ្ពស់នៃការប្រើប្រាស់រថយន្តអគ្គិសនី” ។ យោងតាមការព្យាករណ៍របស់សាជីវកម្មប្រេងជាតិចិន (CNPC) បាននិយាយថា ប្រទេសចិនធ្លាប់តែជាប្រទេសនាំមុខគេដែលប្រើប្រាស់ប្រេងសាំងច្រើនបំផុតលើពិភពលោក ប៉ុន្តែនៅឆ្នាំនេះប្រទេសនេះស្រាប់តែកាត់បន្ថយតម្រូវការប្រេងជាងពាក់កណ្តាលទៅវិញ។ បើយោងតាមរដ្ឋបាលព័ត៌មានថាមពលរបស់សហរដ្ឋអាមេរិកវិញ ការប្រើប្រាស់ប្រេងសាំងរបស់ប្រទេសនេះក៏បានធ្លាក់ចុះដល់ ៣៧៦ លានហ្គាឡុងក្នុងមួយថ្ងៃ (ប្រមាណ ៨.៩៤ លានបារ៉ែលក្នុងមួយថ្ងៃផងដែរ) ដែលនេះចំនួននេះទាបជាងឆ្នាំមុនៗទៅទៀត។

រីឯនៅអឺរ៉ុប តម្រូវការប្រេងសាំងក៏កើនឡើងត្រឹមតែ ២.៣% ស្មើនឹង ៥០,០០០ បារ៉ែ ឬ ២.១៩ លានបារ៉ែលក្នុងមួយថ្ងៃក្នុងឆ្នាំនេះ នេះបើយោងតាមក្រុមហ៊ុនប្រឹក្សាថាមពល FGE របស់សិង្ហបុរី។ យោងតាមលោក Woodmac ប្រាក់ចំណេញរបស់រោងចក្រចម្រាញ់ប្រេងអឺរ៉ុបនឹងស្ថិតនៅក្រោមសម្ពាធដោយសារតែតម្រូវការមិនស្ថិរភាពនៅលើទ្វីប គួបផ្សំនឹងការកើនឡើងនៃការប្រកួតប្រជែងពីរោងចក្រចម្រាញ់ប្រេង Dangote ថ្មីរបស់ប្រទេសនីហ្សេរីយ៉ា។

ខណៈពេលដែលតម្រូវការនៅក្នុងប្រទេសចិន សហរដ្ឋអាមេរិក និងអឺរ៉ុបលែងមានការកើនឡើងគួរឱ្យកត់សម្គាល់ដូចមុន ប្រេងសាំងនឹងទាក់ទាញតម្រូវការនៅក្នុងសេដ្ឋកិច្ចដែលមានអត្រាកំណើនទាប និងអត្រាប្រើប្រាស់រថយន្តអគ្គិសនីទាបដូចជាឥណ្ឌា និងឥណ្ឌូនេស៊ី។ ជាពិសេស វាត្រូវបានគេប៉ាន់ប្រមាណថា ការប្រើប្រាស់ប្រេងសាំងរបស់ប្រទេសឥណ្ឌានឹងឈានដល់កំណត់ត្រាថ្មីមួយគឺ ៣៩.២ លានតោន (ប្រហែល ៩០៨,០០០ បារ៉ែលក្នុងមួយថ្ងៃ) ក្នុងឆ្នាំសារពើពន្ធដល់ខែមីនា ឆ្នាំ ២០២៥ ដែលកើនឡើងប្រហែល ៥% បើធៀបនឹង ៣៧.២ លានតោនក្នុងឆ្នាំហិរញ្ញវត្ថុដល់ខែមីនា ២០២៤៕

សហរដ្ឋអាមេរិក ៖ Boston Dynamics ជាក្រុមហ៊ុនផលិតមនុស្សយន្តដ៏ល្បីឈ្មោះនៅអាមេរិកបានបង្ហាញឆ្កែយន្តថ្មីមួយឈ្មោះថា Sparkles ដែលមានរោមវែងៗ ពណ៌ស លាយផ្ទៃមេឃ ។ ឆ្កែយន្តនេះមានសមត្ថភាពពិសេស គឺវាអាចរាំតាមចង្វាក់ភ្លេងយ៉ាងរស់រវើក រហូតធ្វើឱ្យមហាជនចាប់អារម្មណ៍ខ្លាំង ក្រោយពីក្រុមហ៊ុននេះបានបង្ហាញឆ្កែយន្ត Sparkles រាំជាមួយឆ្កែយន្តមួយទៀតឈ្មោះ Spot ។

ការពិត ឆ្កែយន្ត Sparkles មិនមែនជាឆ្កែយន្តថ្មីដែលក្រុមហ៊ុន Boston Dynamics ផលិតនោះទេ ប៉ុន្តែក្រុមហ៊ុននេះបានយកឆ្កែយន្ត Spot មកតុបតែងលម្អដោយបំពាក់រោមវែងៗដើម្បីទាក់ទាញភ្នែកអ្នកទស្សនាតែប៉ុណ្ណោះ ។ ម្យ៉ាងទៀត ការបំពាក់រោមបែបនេះនឹងធ្វើឱ្យឆ្កែយន្តមានលក្ខណៈស្រដៀងគ្នានឹងឆ្កែពិតប្រាកដ ។

សមត្ថភាពពិសេសដែលធ្វើឱ្យឆ្កែយន្ត Sparkles អាចរាំតាមចង្វាក់ភ្លេងយ៉ាងរស់រវើកបែបនេះ ដោយសារក្រុមហ៊ុនបានបំពាក់នូវកម្មវិធីទំនើបមួយប្រភេទ ។ កម្មវិធីទំនើបនេះត្រូវបានប្រើប្រាស់កាលពីឆ្នាំ២០២៣ ក្នុងវិស័យសារព័ត៌មាន និងការកម្សាន្ត ហើយគេអាចប្រើប្រាស់កម្មវិធីទំនើបសម្រាប់បង្ហាត់ឆ្កែយន្តឱ្យចេះរាំតាមការបញ្ជារបស់មនុស្ស ។

ករណីមានភាពស្មុគស្មាញខ្លាំងពេក ឬឆ្កែយន្តពុំអាចរាំបានដោយសារបរិយាកាសមិនអំណោយផល កម្មវិធីខាងលើនឹងជួយឆ្កែយន្ត Spot ឱ្យព្យាយាមកម្រើកខ្លួន ឬរាំឱ្យបានល្អបំផុតអស់ពីសមត្ថភាព ។ វាដូចគ្នានឹងមនុស្សដែរ ពេលខ្លះ មនុស្សពុំអាចរាំបានល្អនៅលើឆាកទេ ពេលជួបនឹងស្ថានភាពមិនអំណោយផល ។ ការបំពាក់កម្មវិធីទំនើបក្នុងឆ្កែយន្ត គឺជាការសហការគ្នារវាងក្រុមហ៊ុន Boston Dynamics និងក្រុមរាំដ៏ល្បីឈ្មោះនៅប្រទេសកូរ៉េខាងត្បូង ។

ក្រោយការបង្ហាញឆ្កែយន្ត Sparkles នាពេលឆាប់ៗខាងមុខ ក្រុមហ៊ុនអាមេរិក Boston Dynamics នឹងបង្ហាញមនុស្សយន្តថ្មីមួយទៀតមានលក្ខណៈស្រដៀងនឹងមនុស្សពិតប្រាកដ ដែលអាចបម្លាស់ទីយ៉ាងឆាប់រហ័ស ។ ក្រុមហ៊ុននិយាយថា ការបង្ហាញវីដេអូមនុស្សយន្តថ្មី ចាប់ពីថ្ងៃទី១៨ ខែមេសា ដល់ថ្ងៃទី២ ខែឧសភា ឆ្នាំ២០២៤ មានអ្នកទស្សនារហូតដល់ជាង៥លាននាក់ ។

បន្ទាប់ពីក្រុមហ៊ុនអាមេរិកបានបង្ហាញឆ្កែយន្ត និងមនុស្សយន្តថ្មីដែលមានសមត្ថភាពពិសេស មហាជននឹងរង់ចាំតាមដានថា តើក្រុមហ៊ុននេះនឹងផលិតមនុស្សយន្តថ្មីៗមានលក្ខណៈពិសេសអ្វីខ្លះ និងអាចជួយផ្នែកឧស្សាហកម្មបានកម្រិតណា?

បរទេស៖ ភូមិ Seine-Port ដែលមានប្រជាជនរស់នៅជាង ២ ពាន់នាក់ស្ថិតនៅចម្ងាយ ៥០ គីឡូម៉ែត្រពីទីក្រុងប៉ារីសប្រទេសបារាំងបានចេញច្បាប់ថ្មីដោយដាក់កម្រិតលើស្មាតហ្វូននៅតាមទីសាធារណៈ ហាមមនុស្សមិនឱ្យប្រើប្រាស់ស្មាតហ្វូនតាមដងផ្លូវ សួនច្បារ ភោជនីយដ្ឋាន សាលារៀន និងហាងលក់ទំនិញផ្សេងៗ មូលហេតុគឺមិនចង់ឱ្យមនុស្សពឹងផ្អែកលើឧបករណ៍បច្ចេកវិទ្យាច្រើនពេកទេ។
ភូមិនេះបានបើកការបោះឆ្នោតលើបទប្បញ្ញត្តិខាងលើហើយដោយមានអត្រាមតិឯកភាពរហូតដល់ ៥៤% សម្រាប់ការមិនស្វាគមន៍ចំពោះទង្វើនៃការប្រើប្រាស់ទូរស័ព្ទដៃនៅពេលដើរ អង្គុយជាមួយមិត្តភក្តិនៅសួនច្បារ ភោជនីយដ្ឋាន និងរង់ចាំកូននៅខ្លោងទ្វារសាលា។ អ្នកដែលវង្វេង ឬមិនស្គាល់ផ្លូវច្បាស់ត្រូវបានលើកទឹកចិត្តឱ្យសួរអ្នកផ្សេងទៀតសម្រាប់ការណែនាំជាជាងការប្រើផែនទី Google ។

មន្ត្រីនៅភូមិ Seine-Port ក៏បានអនុម័តបទប្បញ្ញត្តិស្តីពីការប្រើប្រាស់ឧបករណ៍អេឡិចត្រូនិកនៅក្នុងផ្ទះផងដែរ។ ដោយបទប្បញ្ញត្តិនោះចែងថា កុមារមិនគួរមើលទូរស័ព្ទនៅពេលព្រឹក នៅក្នុងបន្ទប់ដេក មុនពេលចូលគេង ឬអំឡុងពេលញ៉ាំអាហារឡើយ។ ហើយគ្រួសារដែលមានកុមារអាយុក្រោម ១៥ ឆ្នាំនឹងចុះហត្ថលេខាលើកិច្ចព្រមព្រៀងជាលាយលក្ខណ៍អក្សរថាពួកគេនឹងអនុញ្ញាតឱ្យកូនរបស់ពួកគេលើកទូរស័ព្ទនៅពេលដែលទូរស័ព្ទរោទ៍ប៉ុណ្ណោះ។ អភិបាលក្រុង Vincent Paul-Petit បាននិយាយថា គាត់ចង់ការពារភូមិពី “ការឈ្លានពាន” នៃឧបករណ៍បច្ចេកវិទ្យា។ គាត់ជឿថា មនុស្សជាច្រើនញៀននឹងស្មាតហ្វូន ហើយមិនអាចមើលអ្វីផ្សេងក្រៅពីស្មាតហ្វូនបានឡើយ។

ដូច្នេះប្រសិនបើនរណាម្នាក់មានទម្លាប់មើលទូរស័ព្ទតាមដងផ្លូវ ពួកគេអាចបញ្ចប់ទម្លាប់នេះភ្លាម ហើយចេញទៅនិយាយសួស្តីជាមួយមនុស្សនៅក្នុងសង្គមដើម្បីបង្កើតទំនាក់ទំនងជាក់ស្តែងវិញ។ Ludivine អាយុ ៣៤ ឆ្នាំ ជាគិលានុបដ្ឋាយិកាផ្នែកសរសៃឈាមបេះដូង បាននិយាយថា នាងគាំទ្រនឹងបទប្បញ្ញត្តិខាងលើ។ Ludivine បានបន្តថា “ជាការពិតណាស់ប្រសិនបើគ្មានច្បាប់ថ្មីនេះមនុស្សនឹងចំណាយពេលច្រើនលើទូរស័ព្ទរបស់ពួកគេ” ដូច្នេះបទប្បញ្ញត្តិនេះជាដំណោះស្រាយដ៏ល្អដើម្បីលើកកម្ពស់ការយល់ដឹងអំពីផលប៉ះពាល់របស់វា។

ទោះជាយ៉ាងណាក៏ដោយ Angélique da Silva អ្នកគ្រប់គ្រងភោជនីយដ្ឋានមួយ នៅភូមិ Seine-Port បាននិយាយថា នាងមិនមានលទ្ធភាពកំណត់ការប្រើប្រាស់ស្មាតហ្វូនរបស់អតិថិជននោះទេ ទោះបីជានាងយល់ពីសារៈសំខាន់របស់វាក៏ដោយ។ Angélique da Silva បាននិយាយថា “ក្មេងជំនាន់ក្រោយមិនយល់ស្របទេ ពីព្រោះពួកគេធំឡើងជាមួយនឹងបច្ចេកវិទ្យាមិនដូចពួកយើង”។ ប្រឈមនឹងស្ថានភាពបែបនេះ លោកអភិបាលក្រុងមានគម្រោងរៀបចំក្លឹបកុន ឬក្លឹបសៀវភៅ និងក្លឹបកីឡាសម្រាប់យុវវ័យដើម្បីកុំឱ្យពួកគេប្រើប្រាស់បច្ចេកវិទ្យាច្រើនពេក។ ចុះប្រិយមិត្តទាំងអស់គ្នាគិតយ៉ាងមិចដែរ ប្រសិនបើប្រទេសយើងហាមឃាត់មិនឱ្យប្រើប្រាស់ស្មាតហ្វូននៅតាមដងផ្លូវ សួនច្បារ ភោជនីយដ្ឋាន និងហាងលក់ទំនិញផ្សេងៗ?