ប្រទេសកូរ៉េខាងត្បូង ៖ ប្រទេសកូរ៉េខាងត្បូងបានបង្ហោះដ្រូនរាប់ពាន់គ្រឿងនៅលើអាកាស ដែលរំលេចទៅដោយពន្លឺភ្លើងពណ៌យ៉ាងស្រស់ស្អាត និងប្លែកភ្នែក នៅក្នុងកម្មវិធីមួយឈ្មោះថា «Drone X កូរ៉េខាងត្បូង» និងមានអ្នកចូលរួមទស្សនារាប់រយនាក់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១១ ខែឧសភា ឆ្នាំ២០២៤ ។

រូបភាពមេអំបៅ និងយន្តហោះមានពណ៌យ៉ាងស្រស់ស្អាតនៅលើអាកាសទាំងនេះ បានកើតឡើងដោយសារការបង្ហោះដ្រូនរាប់ពាន់គ្រឿងក្នុងកម្មវិធីបង្ហាញដ្រូននៅប្រទេសកូរ៉េខាងត្បូង ។ UVify ជាក្រុមហ៊ុនកូរ៉េខាងត្បូងមានជំនាញផ្នែកបង្ហោះគ្រឿងយន្តគ្មានមនុស្សបើក (ឬដ្រូន) អាចបង្កើតកំណត់ត្រាពិភពលោក ក្នុងការបង្ហោះដ្រូនជាអក្សរ និងរូបភាពផ្សេងៗយ៉ាងស្រស់ស្អាតបំផុត កាលពីដើមខែឧសភា ឆ្នាំ២០២៤ ។

ក្រុមហ៊ុន UVify បានបង្ហោះដ្រូនលើអាកាស សរុបចំនួន៥.២៩៣គ្រឿង ក្នុងកម្មវិធី «Drone X កូរ៉េខាងត្បូង» ដែលមានចំនួនច្រើនជាងក្រុមហ៊ុនចិនជាម្ចាស់កំណត់ត្រាពិភពលោកចាស់ ដែលបានបង្ហោះដ្រូនត្រឹមតែ៥.១៦៤គ្រឿង កាលពីឆ្នាំ២០២១ ។ ការបង្កើតកំណត់ត្រាពិភពលោកថ្មីរបស់កូរ៉េខាងត្រូវ ក៏ត្រូវបានកត់ត្រាចូលក្នុង Guinness Book ផងដែរ ។

ក្នុងកម្មវិធី «World Drone Light Show» នៅទីក្រុងអ៊ីនឆន ប្រទេសកូរ៉េខាងត្បូង គេបានយកដ្រូនចំនួន៤.៥០០គ្រឿង មកបង្ហាញជារូបភាពផ្សេងៗចម្រុះពណ៌ ដូចជា ៖ រូបមេអំបៅ និងយន្តហោះ ដែលធ្វើឱ្យអ្នកចូលរួមទស្សនារាប់រយនាក់រំភើប និងភ្ញាក់ផ្អើលយ៉ាងខ្លាំង ។ គេបានអនុញ្ញាតឱ្យសាធារណជនចូលទស្សនាជាលើកដំបូង កាលពីថ្ងៃទី៩ ខែឧសភា ឆ្នាំ២០២៤ ។

ដ្រូនរាប់ពាន់គ្រឿងនេះបានបង្ហោះរួមគ្នានៅលើអាកាសជាមួយដ្រូនផ្កាភ្លើងជាច្រើនគ្រឿងរបស់ក្រុមហ៊ុនកូរ៉េខាងត្បូងមួយទៀត ។ ការបង្ហោះដ្រូនដ៏ច្រើនសន្ធឹកសន្ធាប់នេះ គឺជាផ្នែកមួយក្នុងការបើកកម្មវិធី «Korea Drone Expo» ដែលបានរៀបចំឡើងរហូតដល់ថ្ងៃទី១១ ខែឧសភា ឆ្នាំ២០២៤ ៕

វីដេអូចែកចាយពីបណ្តាញសង្គមប្រទេសចិន គឺបានបង្ហាញឲ្យឃើញរបៀបដែលក្រុមយុវជនជនជាតិចិនបាននឹងកំពុងវឹកហាត់យ៉ាងខ្លាំង ដើម្បីបានក្លាយខ្លួនទៅជា Influencer ឬអ្នកដែលមានឥទ្ធិពលលើបណ្តាញសង្គម។ ទន្ទឹមនឹងនោះ ដោយសង្កេតឃើញថាសព្វថ្ងៃនេះ ផ្នែកឧស្សាហកម្មរបស់ប្រទេសចិនកំពុងតែមានការរីកចម្រើនខ្លាំង នេះគឺអាចដោយសារតែមានការចូលរួមចំណែកយ៉ាងសកម្មពី Influencer ជំនាញនៅក្នុងប្រទេសនេះផងដែរ។

មហាវិទ្យាល័យជាច្រើននៅឯប្រទេសចិន បច្ចុប្បន្ននេះគឺមានបង្រៀនវគ្គបណ្តុះបណ្តាលឲ្យក្លាយជា«អ្នកមានឥទ្ធិពលលើប្រព័ន្ធផ្សព្វផ្សាយសង្គម» ជាពិសេសគឺបណ្តាញសង្គម Douyin ឬ TikTok ដែលនឹងជួយសិស្សានុសិស្សទទួលបានផ្លូវឆ្ពោះទៅរកអាជីពរកប្រាក់ចំណេញយ៉ាងច្រើនកាក់កបពីប្រព័ន្ធផ្សព្វផ្សាយសង្គម។

សិស្សានុសិស្សនឹងត្រូវបានវឹកហាត់ឲ្យរៀនវគ្គសិក្សាកម្រិតដំបូងលើជំនាញដូចជា ការកាត់តវីដេអូខ្លី ទីផ្សារប្រព័ន្ធផ្សព្វផ្សាយសង្គម ពាណិជ្ជកម្មអេឡិចត្រូនិក ការនិយាយជាសាធារណៈ មានទាំងការ Live លក់ផលិតផល ដែលមានទំនាក់ទំនងយ៉ាងជិតស្និតជាមួយនឹងប្រព័ន្ធផ្សព្វផ្សាយសង្គម។

តាមរយៈការផ្តល់ជូននូវវគ្គសិក្សាទាំងនេះ ប្រព័ន្ធអប់រំឧត្តមសិក្សារបស់ចិនឥឡូវនេះគឺជាផ្នែកនៃកម្លាំងជំរុញនៃជំនាញវិជ្ជាជីវៈមួយចំនួនដែលប្រមូលផ្តុំទៅដោយក្រុមអ្នកមានទេពកោសល្យនៅលើប្រព័ន្ធផ្សព្វផ្សាយប្រទេសចិន ឥឡូវនេះកំពុងចាក់ចូលទៅក្នុងសេដ្ឋកិច្ចឌីជីថល ធ្វើឲ្យប្រទេសនេះកាន់តែរីកចម្រើន។

ទីផ្សារដែលមានឥទ្ធិពលលើប្រព័ន្ធផ្សព្វផ្សាយសង្គមគឺជាមធ្យោបាយតែមួយគត់ដើម្បីរកប្រាក់ពីភាពល្បីល្បាញតាមអ៊ីនធឺណិត ដែលឥឡូវនេះជាការអនុវត្តជាទូទៅនៅជុំវិញពិភពលោក។ អ្វីដែលជាភាពលេចធ្លោនិងខុសប្លែកពីគេរបស់ប្រទេសចិនលើវិស័យនេះ គឺត្រង់ថា ចិនបាននឹងកំពុងបណ្តុះបណ្តាល Influencer ទៅលើគ្រប់ផ្នែកគ្រប់ជំនាញទាំងអស់ តាមរយៈការផលិតខ្លឹមសារ និងវិធីសាស្រ្តរកប្រាក់របស់ពួកគេ ដែលកត្តាទាំងនេះហើយនឹងជួយជំរុញខ្សែសង្វាក់តម្លៃឧស្សាហកម្មរបស់ចិន។

ជាមួយគ្នានេះ និយតករទីផ្សារការងាររបស់ចិនបានព្យាករណ៍ថា នៅឆ្នាំ ២០២៥ តម្រូវការសម្រាប់ទេពកោសល្យក្នុងការផ្សាយពាណិជ្ជកម្មតាមប្រព័ន្ធអេឡិចត្រូនិចអាចឡើងដល់ ៤០ លាននាក់ផងដែរ៕

សម្រាប់អ្នកដែលចូលចិត្តការផ្សងពេ្រងបែបប្លែកៗ រន្ធត់ចិត្ត យើងគឺសូមណែនាំឧទ្យានជាតិភ្នំភ្លើងហាវ៉ៃ ដែលជាបទពិសោធន៍នៃការធ្វើដំណើរផ្សងព្រេងដ៏គួរឲ្យទាក់ទាញបំផុត។ អ្នកទេសចរណ៍នឹងបានឃើញពីដ៏អស្ចារ្យពីឧទ្យានភ្នំភ្លើងនេះ ក៏ដូចជាអាចយល់ដឹងពីរបៀបដែលភ្នំភ្លើងដំណើរការទាំងលំហូរ និងការផ្ទុះរបស់វា ដែលការធ្វើដំណើរនេះនឹងប្រព្រឹត្តិជាមួយនឹងមគ្គុទ្ទេសក៍ជំនាញ។

ដំណើរកម្សាន្តទៅមើលកម្អែរភ្នំភ្លើងនេះ គឺមិនអនុញ្ញាតឲ្យអ្នកដំណើរទៅជិតទីតាំងកម្អែរភ្នំភ្លើងដោយផ្ទាល់នោះទេ ព្រោះថាវាអាចនឹងគ្មានសុវត្ថិភាព ប៉ុន្តែផ្ទុយទៅវិញ អ្នកគឺត្រូវមើលពីតំបន់មើលរំលង (ពីចម្ងាយ) ដោយប្រើប្រាស់កែវយឺត និងកាមេរ៉ា វីដេអូកម្រិតខ្ពស់ ដើម្បីផ្តិតយកនូវនឹងរូបភាពដ៏អស្ចារ្យនៃបន្ទុះភ្នំភ្លើងនៅទីនោះ។

ឧទ្យានជាតិភ្នំភ្លើងហាវ៉ៃ ត្រូវបានបង្កើតឡើងជាឧទ្យានជាតិទី ១១ របស់សហរដ្ឋអាមេរិក និងជាឧទ្យានដែលមានវត្តមានភ្នំភ្លើងនូវពាសពេញផ្ទៃដីជាង ៣២០,០០០ ហិចតា ហើយអ្នកទេសចរណ៍ក៏អាចធ្វើដំណើរទៅកាន់ឧទ្យាននេះបានយ៉ាងងាយស្រួលបំផុត។

ឧទ្យានជាតិភ្នំភ្លើងហាវ៉ៃ លាតសន្ធឹងពីនីវ៉ូទឹកសមុទ្រដល់កំពូលភ្នំភ្លើងសកម្មដ៏ធំបំផុតរបស់ផែនដីក្នុងកម្ពស់ ១៣,០០០ ហ្វីត។ ជាមួយនឹងផ្លូវឡើងភ្នំជាង ១៦០គីឡូម៉ែត្រ ដែលនាំឲ្យអ្នកផ្សងព្រេងគ្រប់ៗរូបត្រូវចំណាយពេលច្រើនថ្ងៃដើម្បីទៅដល់ឧទ្យានជាតិភ្នំភ្លើងហាវ៉ៃ ដោយធ្វើការឆ្លងកាត់ព្រៃទឹកភ្លៀង វាលខ្សាច់ តំបន់លំហូរកម្អែភ្នំភ្លើង។

បទពិសោធន៍នៃការមើលឃើញភ្នំភ្លើង Kilauea & Lava នៅក្នុងឧទ្យានជាតិភ្នំភ្លើងហាវ៉ៃនេះ គឺអាចមើលឃើញស្ទើរតែជារៀងរាល់ឆ្នាំ ដែលមានការផ្ទុះឡើងដែលស្ថិតនៅតាមក្រហូងថ្មនីមួយៗ នឹងផ្តល់ឲ្យអ្នកទេសចរណ៍មើលឃើញពន្លឺភ្លើងច្រាលចេញពីក្នុងរណ្តៅភ្នំភ្លើង ក៏ដូចជាកម្អែររលាយចេញពីមាត់រណ្ដៅភ្នំភ្លើង។

ទោះជាយ៉ាងណា ដោយសារតែសកម្មភាពភ្នំភ្លើងតែងតែមានផ្លាស់ប្តូរនៅលើកោះនេះ វាជារឿងធម្មតាទេដែលលំហូរកម្អែភ្នំភ្លើងថ្មីលេចឡើង ឬបាត់រៀងរាល់ពីរបីឆ្នាំម្តង។ នៅឆ្នាំ ២០២៣ មិនមានផ្ទៃសកម្មហូរចេញក្រៅមាត់រណ្ដៅដែលត្រូវបានគេមើលឃើញនោះទេ។ យ៉ាងណាមិញ ក៏នូវតែមានការផ្ទុះឡើងតិចៗជាប់ជានិច្ចនៅក្នុងរណ្ដៅភ្នំភ្លើង Halema’uma’u ដែលផ្តល់ឱ្យអ្នកឃើញពន្លឺពេលរាត្រី និងកម្អែលភ្នំភ្លើងរលាយនៅក្នុងរណ្ដៅនេះផងដែរ៕

ប្រទេសហ្វីលីពីន ៖ បើនិយាយពីការរៀបចំទុកដាក់សាកស.ព ដែលពលរដ្ឋរស់នៅប្រទេសផ្សេងៗបានអនុវត្តនោះ គឺការដុតស.ព រួចប្រមូលធាតុដាក់ក្នុងកោដ្ឋ និងបញ្ចុះស.ពទាំងមូលក្នុងក្តារមឈូស រួចកប់ក្នុងដី ។ រីឯអ្នកខ្លះបានឮពីវិធីប្លែកជាងនេះ គឺនៅប្រទេសឥណ្ឌាមានប្រពៃណីបណ្តែតសពតាមទន្លេគង្គា ។ ប៉ុន្តែសម្រាប់ពលរដ្ឋរស់នៅប្រទេសនេះមិនបានទុកដាក់សាកស.ពតាមវិធីខាងលើទេ គឺពួកគេបានយកសាកស.ពទៅទុកនៅកន្លែងមួយស្ងប់ស្ងាត់ និងប្លែកបំផុតលើពិភពលោក ដែលមនុស្សគ្រប់គ្នាពុំបានដឹង ។

ពលរដ្ឋរស់នៅខេត្ត Sagada ប្រទេសហ្វីលីពីន បានរៀបចំទុកដាក់សពខុសប្លែកពីប្រទេសផ្សេងទៀត ហើយការរៀបចំបែបនេះចាត់ទុកថា គឺជាពិធីដ៏ពិសេសមួយរបស់ពួកគេផងដែរ វាជាការយកក្តារមឈូសទៅដាក់តម្រៀបគ្នានៅតាមល្អាងថ្ម ឬច្រាំងថ្មភ្នំ ។ ពលរដ្ឋរស់នៅខេត្ត Sagada បានរៀបចំទុកដាក់សពបែបនេះអស់រយៈពេលជាង២ពាន់ឆ្នាំហើយ ។

ការរៀបចំពិធីបុណ្យសពរបស់ពលរដ្ឋរស់នៅខេត្ត Sagada គឺមនុស្សចាស់ៗក្នុងភូមិមានតួនាទីរៀបចំក្តារមឈូស និងជួយគ្នាតុបតែងមឈូស ។ ប៉ុន្តែគ្រួសារ ឬសាច់ញាតិសព ក៏អាចរៀបចំមឈូសដោយខ្លួនឯងផងដែរ បើសមាជិកគ្រួសារណាម្នាក់ឈឺធ្ងន់ គឺសាច់ញាតិនឹងធ្វើមឈូសត្រៀមទុកដាក់សពពេលអ្នកជំងឺស្លាប់ ។

ករណីសពមានសភាពហើម ហើយពុំអាចបញ្ចុះក្នុងមឈូសបាន គេនឹងវាយកម្ទេចសពឱ្យបែកឆ្អឹងដើម្បីដាក់ក្នុងមឈូស បន្ទាប់មក គេនឹងយកមឈូសនេះទៅដាក់តាមជញ្ជាំងល្អាងថ្ម ឬច្រាំងថ្មភ្នំ នៅជិតមឈូសបុព្វបុរសដែលបានចែកឋានមុន ។ ប៉ុន្តែកន្លែងដាក់សពទាំងនេះពិបាកធ្វើដំណើរចូលទៅដល់ណាស់ ព្រោះវាជាអាថ៌កំបាំងរបស់គ្រួសារសព ហើយមឈូសមួយចំនួនមានអាយុកាលរហូតដល់ជាង១០០ឆ្នាំ ឯណោះ ។

ទោះយ៉ាងណា អ្វីៗគ្រប់យ៉ាងមិនអាចនៅស្ថិតស្ថេរហូតទេ វាតែងតែមានការបែកបាក់ ខូចខាត ហើយមឈូសសពទាំងឡាយនៅតាមច្រាំងថ្មភ្នំបានខូចខាតដោយសារត្រូវកំដៅថ្ងៃ ឬត្រូវភ្លៀងរយៈពេលច្រើនឆ្នាំ ទើបបណ្តាលឱ្យឆ្អឹងសពធ្លាក់មកលើដីខាងក្រោម ។ ហេតុនេះ គេបានយកមឈូសថ្មីៗមកដាក់នៅតាមច្រាំងថ្មភ្នំ ជំនួសមឈូសចាស់ ។

ការរៀបចំទុកដាក់សពតាមវិធីនេះអាចខុសប្លែកខ្លាំងសម្រាប់អ្នករស់នៅប្រទេសផ្សេងៗ ប៉ុន្តែវាជាការព្យាយាមរបស់ក្រុមគ្រួសារសព ដែលចង់ឱ្យអ្នកស្លាប់បានទៅនៅកន្លែងមួយដ៏ស្ងប់ស្ងាត់ និងគ្មានការរំខាន ។ បើទោះជាពិបាកក្នុងការរៀបចំទុកដាក់សពក្តី ប៉ុន្តែវាជាការបង្ហាញពីសេចក្តីស្រឡាញ់ និងការគោរពរបស់គ្រួសារទៅកាន់អ្នកស្លាប់ ៕

ប្រទេសថៃ ៖ នៅថ្ងៃទី១៣ ខែឧសភា ឆ្នាំ២០២៤ សារព័ត៌មានថៃរាយការណ៍ថា កងទ័ពជើងទឹកថៃបានចាប់ទូកនេសាទខុ.សច្បាប់វៀតណាមជាច្រើនគ្រឿង និងចាប់ខ្លួនជនជាតិវៀតណាមជាច្រើននាក់ ដែលបានលួចចូលមកនេសាទខុ.សច្បាប់ក្នុងដែនទឹកប្រទេសថៃ ។ កងទ័ពជើងទឹកថៃបញ្ជាក់ថា នឹងមិនអនុញ្ញាតឱ្យជនបរទេសមករំលោភលើដែនទឹកថៃជាដាច់ខាត ។

កាលពីថ្ងៃទី១២ ខែឧសភា កងទ័ពជើងទឹកថៃភូមិភាគ២ បានទទួលសេចក្តីរាយការណ៍ពីប្រភពក្នុងតំបន់ថា មានក្រុមទូកនេសាទបរទេសចូលមកនេសាទខុសច្បាប់ក្នុងដែនទឹកប្រទេសថៃ នៅត្រង់បរិវេណ Bearing 132 ក្បែរកន្លែងត្រួតពិនិត្យខេត្តស៊ុងក្លា ។

ហេតុនេះ លោក Phichit Srirungruang មេបញ្ជាការកងទ័ពជើងទឹកភូមិភាគ២ បានបញ្ជាឱ្យនាវាល្បាតសមុទ្រត្រួតពិនិត្យ ដោយសហការជាមួយមជ្ឈមណ្ឌលគាំពារផលប្រយោជន៍ជាតិដែនសមុទ្រ និងភ្នាក់ងារការពារដែនសមុទ្រប្រមូលកម្លាំង ព្រមទាំងនាវាល្បាតតាមឆ្នេរសមុទ្រចុះត្រួតពិនិត្យនៅតំបន់នោះជាបន្ទាន់ ។

អាជ្ញាធរថៃបានចាប់ទូកនេសាទវៀតណាមចំនួន៥គ្រឿង និងចាប់ខ្លួនជនជាតិវៀតណាមចំនួន២៥នាក់ នៅបរិវេណ Bearing ក្បែរកន្លែងត្រួតពិនិត្យខេត្តស៊ុងក្លា ហើយបញ្ជូនពួកគេមកកាន់មូលដ្ឋានទ័ពជើងទឹកខេត្តស៊ុងក្លា ដើម្បីត្រួតពិនិត្យបន្ថែម និងដាក់ទោសតាមផ្លូវច្បាប់ ។

គួរបញ្ជាក់ថា ការចាប់ខ្លួនក្រុមអ្នកនេសាទខុសច្បាប់បរទេសក្នុងតំបន់គ្រប់គ្រងរបស់កងទ័ពជើងទឹកភូមិភាគ២ ចាប់ពីខែតុលា ឆ្នាំ២០២៣ រហូតដល់ដើមខែឧសភា ឆ្នាំ២០២៤ គឺស្មើនឹង៧លើក ក្នុងនោះមានទូកនេសាទខុសច្បាប់១២គ្រឿង និងជនបរទេសចំនួន៦១នាក់ ។

ការចាប់ទូកនេសាទខុសច្បាប់នេះ ធ្វើឡើងស្របតាមគោលនយោបាយរបស់មេបញ្ជាការកងទ័ពជើងទឹក ឆ្នាំ២០២៤ និងសហការជាមួយស្ថាប័នពាក់ព័ន្ធ ។ ប្រទេសថៃបានរៀបចំនាវាល្បាតតាមសមុទ្រជាបន្តបន្ទាប់ ដើម្បីគ្រប់គ្រងផលប្រយោជន៍ជាតិផ្នែកសមុទ្រ ព្រមទាំងបង្ក្រាបការនេសាទខុសច្បាប់ក្នុងដែនទឹកថៃរបស់ទូកនេសាទបរទេស ។ ការសហការគ្នារបស់អាជ្ញាធរថៃ និងស្ថាប័នពាក់ព័ន្ធ បានធ្វើឱ្យថៃអាចចាប់ទូកនេសាទខុសច្បាប់វៀតណាមលើកនេះដោយជោគជ័យ ៕