មាសគឺជាលោហៈធាតុម៉្យាងដែលមានតម្លៃ និងទាក់ទាញចំណាប់អារម្មណ៍បំផុតទៅកាន់មនុស្សទូទាំងពិភពលោក។ នៅក្នុងប្រទេសកម្ពុជាយើងតាំងពីបុរាណកាលបន្តរហូតមកដល់បច្ចុប្បន្ន មាសបាននឹងកំពុងស្ថិតនៅក្នុងដួងចិត្តរបស់ប្រជាជនខ្មែរស្ទើរគ្រប់ៗគ្នា ដោយអ្នកខ្លះបានទិញមាសដើម្បីធ្វើជាគ្រឿងអលង្ការពាក់លម្អកាយ ខ្លះទិញមាសទុកដើម្បីបម្រុងទុកក្នុងគ្រាមានអាសន្ន និងទិញមាសទុកសម្រាប់វិនិយោគបង្កើននូវប្រាក់ចំណេញជាដើម។

បើទោះជាបីជាមាសគឺជាវត្ថុមានតម្លៃស្រាប់ក៏ពិតមែន យ៉ាងណាមិញប្រសិនបើបងប្អូនមិនដឹងក្បួនក្នុងការទិញឬក៏លក់មាសឲ្យបានត្រឹមត្រូវតាមកាលទេសៈនោះទេ ប្រាកដណាស់ថាអាចនឹងឡុងចុងជាក់ជាមិនខាន មិនថាតិចក្តីឬច្រើនក្តី។ ដូច្នេះហើយ ខាងក្រោមនេះគឺជាវិធីសាស្រ្ត ៤យ៉ាង ក្នុងការទិញ-លក់មាសឲ្យចំណេញ បើយោងតាមការបញ្ជាក់ពីអ្នកជំនាញ៖

១ តាមដានហាងឆេងមាសជាប្រចាំ៖ ជារៀងរាល់ថ្ងៃ តម្លៃមាសគឺតែងតែមានការប្រែប្រួល ពិសេសគឺតម្លៃហាងឆេងមាសនៅក្នុងស្រុក ដូច្នេះអ្នកត្រូវតែកត់សម្គាល់ពីតម្លៃមាស បើថ្ងៃខ្លះហាងឆេងមាសឡើងថ្លៃខ្លាំងពេក គឺអ្នកមិនត្រូវទិញមាសចូលនោះទេ។ ដោយឡែកសម្រាប់ថ្ងៃខ្លះ មាសចុះថោកខ្លាំង នេះហើយជាឱកាសល្អដែលអ្នកត្រូវតែទិញមាសចូល ដើម្បីទុកលក់វិញ បង្កើនប្រាក់ចំណេញទ្វេដង។ បន្ថែមពីនេះ អ្នកត្រូវតែទិញនៅហាងណាដែលគួរឲ្យទុកចិត្តបានផងដែរ ដើម្បីជៀសវាងពីការកេងប្រវ័ញ្ចផ្សេងៗ។

២ តាមដានពីវិបត្តិសកលលោក៖ អ្នកត្រូវតែតាមដានស្ថានការណ៍ពិភពលោកជាប្រចាំ ជាពិសេសគឺទៅលើផ្នែកសេដ្ឋកិច្ច ភូមិសាស្រ្តនយោបាយ គ្រោះធម្មជាតិ សង្គ្រាម អតិផរណា និងយល់ដឹងពីចរារចរណ៍រូបីយប័ណ្ឌដុល្លារនៅលើទីផ្សារជាដើម ព្រោះថាទាំងនេះវានឹងជះឥទ្ធិពលទៅលើតម្លៃមាសសកល។

៣ ត្រូវប្រាកដថាលុយដែលយកទៅទិញមាសនោះ គឺជាលុយដែលមិនចាំបាច់ក្នុងការចាយវាយភ្លាមៗ៖ ជាការពិតណាស់ តម្លៃមាសគឺតែងមានការឡើងចុះ ប្រែប្រួលទៅវេលា ដូច្នេះហើយមិនប្រាកដថាមាសដែលទិញភ្លាម លក់វិញភ្លាមនឹងចំណេញភ្លាមៗនោះទេ។ ផ្ទុយទៅវិញ ពេលខ្លះ ដើម្បីឲ្យតម្លៃមាសកើនឡើង អ្នកគឺត្រូវតែរងចាំក្នុងរយៈពេលយូរឬឆាប់មិនទៀត។ អ៊ីចឹងហើយ ការដែលយកលុយចាំបាច់ប្រើប្រាស់ទៅទិញមាសទុកនោះ វាមិនមែនជាការបង្កើនប្រាក់ចំណេញទេ តែគឺជាការខាតទៅវិញផងក៏ថាបាន។

៤ ទិញមាសដែលមិនមានថ្លៃឈ្នួល៖ បើចង់ចំណេញខ្លាំងក្នុងការទិញមាសទុក អ្នកគឺត្រូវតែទិញមាសដុំនិងមាសសន្លឹក ដោយមិនគួរទិញមាសជាគ្រឿងអលង្ការទេ ព្រោះអាចនឹងអស់ថ្លៃឈ្នួលច្រើន ហើយឱកាសនូវក្នុងការចំណេញក៏មានកាន់តែតិច។ ប៉ុន្តែបើអ្នកទិញមាសដុំនិងមាសសន្លឹក វានឹងមិនគិតថ្លៃឈ្នួលទេ ដូច្នេះនៅពេលដែលអ្នកលក់វិញក្នុងកាលៈទេសៈមួយសមស្រប តម្លៃមាសអ្នកនឹងកើនឡើងទ្វេដង ឱកាសនៃការចំណេញក៏កប់ក្តោងផងដែរ៕

តារាចម្រៀង លីម តិចម៉េង បានបង្ហោះសំណេរមួយនៅលើបណ្តាញសង្គមទាក់ទងនឹងសកម្មភាពអវិជ្ជមានរបស់អ្នកប្រើប្រាស់បណ្តាញសង្គមមួយចំនួនដែលចូលចិត្តចែករំលែកតែរឿងបំពុលឬរឿងជប៉ុនកូនកាត់ចែករំលែកដាច់ដៃចោល ។ តារាចម្រៀងរូបនេះលើកឡើងទៀតថា រឿងណាល្អៗមិនសូវមានអ្នកចែករំលែកនោះទេដោយរូបគេបានស្នើឱ្យចូលរួមជាមួយខ្លួនចែករំលែករឿងណាល្អៗក្នុងសង្គមដើម្បីជាគំរូដល់អ្នកជំនាន់ក្រោយ។

នាពេលបច្ចុប្បន្នមនុស្សស្ទើរតែពេញមួយប្រទេសទៅហើយដែលមាន Smart Phone ប្រើនិងមានបណ្តាញទំនាក់ទំនងសង្គមដូចជា ហ្វេកប៊ុក និងទិកតុកជាដើម។ យ៉ាងណាមិញ អ្នកមួយចំនួនប្រើប្រាស់បណ្តាញសង្គមនៅមានកម្រិតមិនទាន់យល់ដឹងទៅលើផ្នែកនេះដែលភាសាអង់គ្លេសហៅថា « Media literacy » ចំណេះដឹងពីប្រព័ន្ធផ្សព្វផ្សាយ។ អ្នកប្រើប្រាស់មួយចំនួនមិនទាន់ស្វែងយល់ព័ត៌មានណាជាព័ត៌មានពិតឬក្លែងក្លាយនៅឡើយទេ ដោយសារតែមានជនដែលកើបចំណូលពីអនឡាញ ឬ MMO បានប្រើប្រាស់ព័ត៌មានក្លែងក្លាយ ហើយអ្នកមួយចំនួនមិនបានដឹងនិងបានចែករំលែកបន្តទៀត។

សកម្មភាពមួយចំនួនទៀតរបស់អ្នកប្រើប្រាស់បណ្តាញសង្គមនោះគឺបានចែករំលែករឿងអវិជ្ជមាននៅលើគណនីរបស់ខ្លួន និងបានបញ្ចេញមតិទៅលើរឿងទាំងនោះ ខណៈរឿងផ្សេងទៀតដែលជាភាពវិជ្ជមាន មិនបានចែករំលែកនោះទេដោយអូសរំលងទៅវិញ។

មានអ្នកចែកចាយរឿងអវិជ្ជមាននៅលើបណ្តាញសង្គមនេះដែរ តារាចម្រៀង លីម តិចម៉េង ម្ចាស់ពាន Cambodian Idol រដូវកាលទី៤ បានចេញមកបង្ហោះសំណេរមួយចំៗតែម្តងថារឿងល្អមិនសូវមានអ្នកចែករំលែកតែបើរឿងបំពុលវិញស៊ែរដាច់ដៃចោល។

ម្ចាស់បទ «អូន១៨» បានបង្ហោះថា «រឿងល្អៗគេមិនសូវមើលឃើញ មិនសូវចាប់អារម្មណ៍ទេ មិនសូវចែករំលែក(share)ទេ តែបើរឿងណាបំពុល រឺ រឿងជប៉ុនកូនកាត់វិញ ចែករំលែក(share) ដាច់ដៃចោល។ សូមបងប្អូនដែលប្រើប្រាស់បណ្តាញសង្គមទាំងឡាយហើយចែករំលែករឿងល្អៗដល់មនុស្សជំនាន់ក្រោយ កុំបាក់ទឹកចិត្តសូមបន្តដំណើរជាមួយខ្ញុំនេះគ្រាន់តែជាឧបសគ្គតូចមួយលើផ្លូវរបស់យើងតែប៉ុណ្ណោះ»។

គួរបញ្ជាក់ថា លីម តិចម៉េង ជាតារាចម្រៀងជើងថ្មីដែលជារឿយៗចេញមកនិយាយពីសង្គមដោយមិនខ្លាចបាត់បង់ប្រជាប្រិយភាពរបស់ខ្លួនឡើយ។ តារាចម្រៀងរូបនេះក៏ត្រូវបានទស្សនិកជនកោតសរសើរពីទឹកចិត្តរបស់គេដែលលះបង់ប្រាក់រាប់ពាន់ រាប់ម៉ឺនដុល្លារមិនផ្សព្វផ្សាយល្បែងអនឡាញ ខណៈតិចម៉េង បាននិយាយថាមិនដើម្បីអាហារ៣ពេលរូបគេក្បត់គុណធម៌ មនសិការខ្លួនឯងឡើយ៕

ប្រទេសចិន ៖ ចិនជាប្រទេសផលិតរថយន្តអគ្គិសនីដ៏ច្រើនបំផុតនៅលើពិភពលោក កំពុងតែធ្លាក់ចូលក្នុងវិបត្តិយ៉ាងធ្ងន់ធ្ងរ និងក្លាយជាឧបសគ្គដល់ការរីកចម្រើនផ្នែករថយន្តអគ្គិសនី ខណៈប្រទេសនេះបានផលិតរថយន្តអគ្គិសនីច្រើនសន្ធឹកសន្ធាប់លើសតម្រូវការ ។ ម្យ៉ាងទៀត ការប្រកួតប្រជែងតម្លៃរថយន្តអគ្គិសនីបានធ្វើឱ្យប៉ះពាល់ដល់ក្រុមហ៊ុនផលិតរថយន្តអគ្គិសនីខ្នាតតូច ហើយពួកគេត្រូវសម្របខ្លួនក្នុងទីផ្សារដែលផ្លាស់ប្តូរយ៉ាងឆាប់រហ័ស ។

រយៈពេលជាច្រើនឆ្នាំមកនេះ រដ្ឋាភិបាលចិនបានគាំទ្រឧស្សាហកម្មរថយន្តអគ្គិសនីជាបន្តបន្ទាប់ និងធ្វើឱ្យទីផ្សាររថយន្តអគ្គិសនីរីកចម្រើនយ៉ាងខ្លាំងនៅប្រទេសចិន ហើយធ្វើឱ្យក្រុមហ៊ុនចិនខ្លះឈានទៅពង្រីកទីផ្សារក្នុងពិភពលោកទៀតផង ដូចជា ៖ ក្រុមហ៊ុន BYD បានពង្រីកទីផ្សារពិភពលោក និងប្រកួតប្រជែងជាមួយក្រុមហ៊ុន Tesla ។

បើទោះជាទីផ្សាររថយន្តអគ្គិសនីចិនរីកចម្រើនខ្លាំងក្តី ប៉ុន្តែវាពុំបានរីកចម្រើនសម្រាប់រថយន្តគ្រប់ម៉ាកទេ ។ អ្នកជំនាញយល់ឃើញថា ក្រុមហ៊ុនតូចៗដែលផលិតរថយន្តអគ្គិសនី នឹងពុំអាចដំណើរការល្អទៅថ្ងៃមុខទេ ខណៈមានការប្រកួតប្រជែងតម្លៃខ្លាំងក្នុងទីផ្សារ ។

បច្ចុប្បន្ន ក្រុមហ៊ុនផលិតរថយន្តអគ្គិសនីជាង២០០ នៅប្រទេសចិន បានប្រឈមនឹងបញ្ហាការផ្គត់ផ្គង់រថយន្តអគ្គិសនីច្រើនលើសតម្រូវការ ដែលបណ្តាលមកពីការប្រកួតប្រជែងតម្លៃ និងការលក់ធ្លាក់ចុះ ។ លើសពីនេះ ពេលសេដ្ឋកិច្ចចិនធ្លាក់ចុះ វាបានជំរុញឱ្យក្រុមហ៊ុនផលិតរថយន្តលើពិភពលោកជាច្រើនដកថយពីទីផ្សារចិនផងដែរ ។

បើតាមទិន្នន័យរបស់សមាគមរថយន្តចិនបង្ហាញថា ក្រុមហ៊ុនផលិតរថយន្តជាង១២ម៉ាកបានបាត់ពីទីផ្សារចិនកាលពីឆ្នាំ២០២៣ រួមទាំងរថយន្តអគ្គិសនីមួយចំនួនដែលធ្លាប់ទទួលបានការពេញនិយម ដូចជា ៖ WM Motor, Byton, Aiways និង Levdeo ។

ក្រុមហ៊ុនផលិតរថយន្តលំដាប់ពិភពលោកជាច្រើនបានរៀបចំគម្រោងអាជីវកម្មជាថ្មី ឬបិទអាជីវកម្មតែម្តង ដូចជា ៖ កាលពីខែតុលា ឆ្នាំ២០២៣ ក្រុមហ៊ុន Mitsubishi Motors បានប្រកាសឈប់ផលិតរថយន្តនៅចិន ។ ក្រៅពីនេះ ក្រុមហ៊ុន Honda (HMC) Hyundai និង Ford បានបញ្ឈប់បុគ្គលិក និងលក់រោងចក្រដើម្បីកាត់បន្ថយការចំណាយដើមទុន ។ នេះបើតាមរបាយការណ៍របស់ប្រព័ន្ធផ្សព្វផ្សាយរដ្ឋ ។

កាលពីខែមិថុនា ឆ្នាំ២០២៣ លោក Richard Yu គឺជា CEO របស់ Consumer Business មកពីក្រុមហ៊ុន Huawei ប៉ាន់ស្មានថា នៅឆ្នាំ២០៣០ ប្រទេសចិនអាចនៅសល់ក្រុមហ៊ុនផលិតរថយន្តអគ្គិសនីខ្នាតធំ តិចជាង៥ក្រុមហ៊ុន ៕

ទីក្រុងសេអ៊ូល ប្រទេសកូរ៉េខាងត្បូង ៖ លោក ស៊ុន ចាន់ថុល ឧបនាយករដ្ឋមន្ត្រី និងអនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃទី១៦ ខែឧសភា ឆ្នាំ២០២៤ បានដឹកនាំគណៈប្រតិភូ និងក្រុមអ្នកវិនិយោគកម្ពុជា ដែលមានអ្នកឧកញ៉ា សៀ ឫទ្ធី ជាតំណាងវិស័យឯកជន បានជួបពិភាក្សាជាមួយគណៈប្រតិភូមេដឹកនាំធុរកិច្ចកូរ៉េល្បីៗនៅ សណ្ឋាគារ LOTTE ក្នុងទីក្រុងសេអ៊ូល ប្រទេសកូរ៉េខាងត្បូង។ កិច្ចប្រជុំនេះ បានផ្តោតលើការពង្រឹងទំនាក់ទំនងសេដ្ឋកិច្ចរវាងកម្ពុជា និងកូរ៉េខាងត្បូង និងការស្វែងរកឱកាសវិនិយោគដ៏មានសក្តានុពលនៅក្នុងព្រះរាជាណាចក្រកម្ពុជា។

គណៈប្រតិភូកូរ៉េ ដែលបានចូលរួមនៅក្នុងប្រជុំពិភាក្សានោះ រួមមានតំណាងជាន់ខ្ពស់មកពីក្រុមហ៊ុនឈានមុខគេដូចជា LG Electronics, Hanshin, Daewoo E&C, EMART Group, LX International, CAMKO Motor Company និង Mastern Partners Corporation ជាដើម ខណៈដែលខាងវិស័យឯកជនរបស់កម្ពុជា ដឹកនាំដោយអ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាល WorldBridge Group។

ការពិភាក្សាផ្តោតលើឱកាសវិនិយោគដ៏អំណោយផលរបស់ប្រទេសកម្ពុជា និងសក្តានុពលសម្រាប់ក្រុមហ៊ុន កូរ៉េក្នុងការបង្កើតគម្រោងផលិតកម្ម និងអភិវឌ្ឍន៍អចលនទ្រព្យថ្មីៗនៅក្នុងប្រទេសកម្ពុជា។ ជាមួយគ្នានេះ

ក្រុមហ៊ុនកូរ៉េមួយចំនួនបានបង្ហាញចំណាប់អារម្មណ៍ក្នុងការវិនិយោគលើគម្រោងថ្មី និងពង្រីកប្រតិបត្តិការដែលមានស្រាប់នៅប្រទេសកម្ពុជា។
ជាលទ្ធផលសំខាន់នៃកិច្ចប្រជុំ ក្រុមហ៊ុន WorldBridge Group ដែលជាអ្នកផ្តួចផ្តើមការជួបជុំអាហារពេលព្រឹកជាមួយនឹងក្រុមមេដឹកនាំធុរកិច្ចកូរ៉េបានប្រកាសថា ខ្លួននឹងចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយក្រុមហ៊ុន Daewoo E&C ដើម្បីអភិវឌ្ឍគម្រោងអចលនទ្រព្យនៅក្នុងព្រះរាជាណាចក្រកម្ពុជា។

ក្នុងឱកាសនោះដែរ អ្នកឧកញ៉ា សៀ ឬទ្ធី បានបង្ហាញទំនុកចិត្តលើសក្តានុពលនៃភាពជាដៃគូ ដែលមានអត្ថប្រយោជន៍ទៅវិញទៅមករវាងធុរកិច្ចកម្ពុជា និងកូរ៉េ។ អ្នកឧកញ៉ា បានសង្កត់ធ្ងន់លើសារៈសំខាន់នៃការចែករំលែកចំណេះដឹង និងការសហការគ្នាដើម្បីជំរុញការអភិវឌ្ឍសេដ្ឋកិច្ចនៃប្រទេសទាំងពីរ។

កិច្ចប្រជុំបានបញ្ចប់ដោយមានការប្តេជ្ញាចិត្តជាថ្មីពីភាគីទាំងសងខាងក្នុងការស្វែងរកមធ្យោបាយបន្ថែមទៀតសម្រាប់កិច្ចសហប្រតិបត្តិការ និងធ្វើការឆ្ពោះទៅរកភាពជាដៃគូសេដ្ឋកិច្ចដ៏រឹងមាំរវាងកម្ពុជា និងកូរ៉េខាងត្បូង ៕

ថ្ងៃនេះ KBN News ចង់ណែនាំប្រិយមិត្តទាំងអស់គ្នាមកស្គាល់អាហារចម្លែកៗ ៥ មុខដែលមើលទៅសាមញ្ញៗប៉ុន្តែសម្រាប់តម្លៃវិញថ្លៃមិនធម្មតាឡើយ ទោះជាយ៉ាងណាប្រសិនបើអ្នកចង់ភ្លក់ ឬចង់សាកល្បងបទពិសោធន៍ថ្មីនៃអាហារទាំងនេះគឺត្រូវធ្វើការសន្សំលុយ ៣-៤ ខែសិនទើបអាចមានលទ្ធភាពទិញវាបាន ព្រោះអាហារទាំងនេះមានតម្លៃថ្លៃកប់ពពក។ ដូច្នេះខាងក្រោមនេះគឺជាបញ្ជីមុខម្ហូបដែលមានតម្លៃថ្លៃជាងគេបំផុតលើលោក៖

១.Beluga Caviar៖ ជឿថាប្រិយមិត្តមួយចំនួនប្រាកដជាបានស្គាល់ហើយនៅពងត្រី Beluga ដែលវាមានតម្លៃរហូតដល់ ៧,០០០-១០,០០០ ដុល្លារអាមេរិកក្នុងមួយគីឡូក្រាម ឬ ២០០-៣០០ ដុល្លារក្នុងមួយអោន ត្រូវបានចាត់ទុកថាជាអាហារថ្លៃជាងគេបំផុតលើលោក។ មូលហេតុដែលអាហារនេះមានតម្លៃថ្លៃកប់ពពកគឺដោយសារត្រីBeluga sturgeon ត្រូវការចំណាយពេលរហូតដល់ ២០ ឆ្នាំដើម្បីបង្កើតពង ហើយក្នុងរយៈពេល ២០ ឆ្នាំនោះវាផលិតពងបានត្រឹមតែ ១០ ទៅ ២០ ផោនប៉ុណ្ណោះ ខណៈត្រីផ្សេងទៀតផលិតបានរហូតដល់ ៥០ ផោន រួមផ្សំនឹងគុណភាពល្អ តម្រូវការខ្ពស់ ទើបធ្វើឱ្យពងត្រីនេះមានតម្លៃថ្លៃបែបនេះ។

២.Swiftlet nests៖ Swiftlet nests គឺជាស៊ុបសំបុកបក្សីពណ៌ស ដែលជាអាហារដ៏ពេញនិយមបំផុតរបស់ជនជាតិចិនត្រូវបានគេជឿថាអាចព្យាបាលជំងឺទាំងអស់។ អាហារនេះក៏ជាប់ឈ្មោះជាអាហារថ្លៃជាងគេបំផុតលើលោកផងដែរ ដោយសារតម្លៃក្នុងមួយចានតូចគឺ ២,០០០ ដុល្លារ និងមួយចានធំមានតម្លៃរហូតដល់ ១០,០០០ ដុល្លារអាមេរិកឯណោះ។

៣.ឪឡឹកខ្មៅ៖ ផ្លែឪឡឹកសម្បកពណ៌ខ្មៅគឺជាអាហារដ៏ឆ្ងាញ់បំផុតរបស់ជនជាតិជប៉ុន ដោយមួយផ្លែមានតម្លៃរហូតដល់ ៦,៣០០ ដុល្លារអាមេរិក។ ផ្លែនេះមានសម្បកពណ៌ខ្មៅ និងសាច់ខាងក្នុងពណ៌ក្រហម ស្ទើតែគ្មានគ្រាប់ ជាមួយរសជាតិផ្អែមខ្លាំង មានប្រូតេអ៊ីនខ្ពស់ ក៏ដូចជាមានអត្ថប្រយោជន៍ជាច្រើនចំពោះសុខភាពរាងកាយរបស់មនុស្ស។ ទោះជាយ៉ាងណាសម្រាប់មូលហេតុដែលផ្លែឪឡឹកខ្មៅមានតម្លៃថ្លៃគឺដោយសារវាគឺជាផ្លែឈើកម្រ និងពិបាកថែទាំបំផុត ហើយវាមានតែនៅតំបន់ហុកកៃដូ ភាគខាងជើងនៃប្រទេសជប៉ុនប៉ុណ្ណោះ។

៤.Abalone៖ អាបាឡូនដែលយើងហៅសាមញ្ញថាជា “ខ្យងសមុទ្រ” គឺមានតម្លៃរហូតដល់ ១២០ ដុល្លារក្នុងមួយគ្រាប់ដោយសារវាជាអាហារដ៏ឆ្ងាញ់ អត្ថប្រយោជន៍ច្រើន អាចប្រើប្រាស់ជាឱសថបុរាណចិន និងជាប្រភេទសត្វកម្រ ហើយតម្រូវការខ្ពស់ទើបតម្លៃថ្លៃបែបនេះ។

៥.Matsutake៖ ផ្សិតខ្មៅ Matsutake គឺជាប្រភេទផ្សិតកម្រដោយសារវាដុះតែក្នុងព្រៃហើយវាលូតលាស់ក្នុងរយៈពេលខ្លីបំផុតគឺពីចុងរដូវក្តៅដល់ដើមរដូវស្លឹកឈើជ្រុះប៉ុណ្ណោះ ដែលធ្វើឱ្យវាក្លាយជាផ្សិតដែលមានតម្លៃថ្លៃបំផុតលើលោក។ ផ្សិតនេះមានក្លិនហឹរ ល្អចំពោះសុខភាព និងមានរសជាតិឆ្ងាញ់ប្លែក ដោយអាចលក់បានរហូតដល់ទៅ ២,០០០ ដុល្លារក្នុងមួយគីឡូក្រាម៕