ប្រទេសអង់គ្លេស ៖ សមាជិករដ្ឋសភាអង់គ្លេសបានសម្រេចចិត្តអនុម័តច្បាប់ហាមឃាត់ការនាំចេញបសុសត្វរស់ទៅក្រៅប្រទេស ដើម្បីកាត់បន្ថយការសម្លា.ប់ សត្វ ព្រោះពួកគេយល់ឃើញថា ការដឹកជញ្ជូនសត្វតាមផ្លូវឆ្ងាយ គឺជាការធ្វើទារុ.ណកម្ម សត្វយ៉ាងឃោ.រឃៅ ។ នេះជាភាពជោគជ័យមួយ ខណៈអ្នកស្រឡាញ់សត្វបានព្យាយាមធ្វើយុទ្ធនាការកុំឱ្យសម្លា.ប់សត្វ អស់រយៈពេល៥០ឆ្នាំ មកហើយ ។

កាលពីថ្ងៃទី១៥ ខែឧសភា ឆ្នាំ២០២៤ សារព័ត៌មាន AFP រាយការណ៍ថា គណបក្សអភិរក្សនិយម ដែលជាគណបក្សរបស់រដ្ឋាភិបាលអង់គ្លេស បានស្នើហាមនាំចេញបសុសត្វរស់ទៅក្រៅប្រទេស ខណៈគណបក្សនេះធ្លាប់ស្នើហាមនាំចេញបសុសត្វរស់ លើកដំបូងកាលពីឆ្នាំ២០១៧ ។ ពួកគេនិយាយថា វាបានជំរុញឱ្យមានការសម្លា.ប់ សត្វកាន់តែច្រើនឡើងៗ និងជាការធ្វើទារុណក.ម្ម សត្វ ។

លើសពីនេះ គណបក្សអភិរក្សនិយ ក៏បានស្នើឱ្យអង់គ្លេសដកខ្លួនចេញពីសមាជិកសហភាពអឺរ៉ុប (EU) ផងដែរ ដោយសារច្បាប់ពាណិជ្ជកម្មរបស់សហភាពអឺរ៉ុប បានធ្វើឱ្យប្រទេសជាសមាជិកទាំងអស់ពុំអាចហាមឃាត់ការនាំចេញបសុសត្វរស់ទៅក្រៅប្រទេស ។

សេចក្តីព្រាងច្បាប់សុខុមាលភាពសត្វ បានហាមឃាត់ការនាំចេញសត្វគោ, ពពែ, ជ្រូក និងសេះ ដើម្បីសម្លាប់ រួមទាំងការចិញ្ចឹមសត្វទុកសម្លាប់ ។ សេចក្តីព្រាងច្បាប់នេះមានគោលបំណងលើកកម្ពស់សុខុមាលភាពសត្វក្នុងកសិដ្ឋាន ដោយបញ្ឈប់ការដឹកជញ្ជូនសត្វធ្វើដំណើរផ្លូវឆ្ងាយ និងលំបាកទៅកាន់ប្រទេសផ្សេងៗ ដោយសារក្នុងអំឡុងពេលដឹកជញ្ជូន សត្វទាំងនេះមានសភាពណែនចង្អៀត, បាក់កម្លាំង និងខ្វះខាតទឹកយ៉ាងខ្លាំង ។

លោកស្រី Emma Slavinski នាយិកាគោលនយោបាយការពារសត្វ មកពីអង្គការសប្បុរសធម៌សត្វ និយាយថា ការអនុម័តច្បាប់ខាងលើ គឺជាភាពជោគជ័យយ៉ាងពិសេសមួយ ដែលអ្នកស្រឡាញ់សត្វបានព្យាយាមធ្វើយុទ្ធនាការកុំឱ្យសម្លាប់សត្វ អស់រយៈពេល៥០ឆ្នាំ ។

លោកស្រីនិយាយថា ៖ «កាលពីឆ្នាំ១៩៩០ ប្រទេសអង់គ្លេសបាននាំចេញសត្វទៅក្រៅប្រទេស ស្មើរហូតដល់ជាង១លានក្បាល ហើយនេះជាការលក់ដូរគួរឱ្យស្អប់ខ្ពើមបំផុត ដោយសារការដឹកជញ្ជូនសត្វទៅក្រៅប្រទេស ត្រូវចំណាយពេលជាច្រើនថ្ងៃ ។ ដូច្នេះ វាធ្វើឱ្យសត្វរងទុក្ខវេទនាយ៉ាងខ្លាំង ហើយយើងរំពឹងថា ករណីបែបនេះនឹងមិនកើតឡើងទៀតទេ នាពេលបច្ចុប្បន្ន» ។

ចំណែកក្រុមធ្វើការពាក់ព័ន្ធនឹងសុខុមាលភាពសត្វ (Compassion in World Farming) បញ្ជាក់ថា ការអនុម័តច្បាប់របស់រដ្ឋសភាអង់គ្លេសលើកនេះចាត់ទុកថា ពិតជាមានសារៈសំខាន់ណាស់សម្រាប់សត្វទាំងអស់ដែលចិញ្ចឹមក្នុងកសិដ្ឋាន ដូចជា ៖ គោ, ក្របី, សេះ, ជ្រូក, មាន់ និងទា ជាដើម ៕

បរទេស៖ ប្រទេសចិនដែលធ្លាប់ជាដៃគូពាណិជ្ជកម្មដ៏ធំបំផុតរបស់អាល្លឺម៉ង់អស់រយៈពេលប្រាំបីឆ្នាំជាប់ៗគ្នា ស្រាប់តែត្រូវប្រគល់តំណែងនេះទៅឱ្យសហរដ្ឋអាមេរិកវិញនៅក្នុងត្រីមាសទីមួយនៃឆ្នាំ២០២៤។
យោងតាម Reuters ផ្អែកលើទិន្នន័យផ្លូវការពីការិយាល័យស្ថិតិអាល្លឺម៉ង់បង្ហាញថា ក្នុងត្រីមាសទីមួយ ចំណូលនាំចូល-នាំចេញសរុបរបស់ប្រទេសអាល្លឺម៉ង់ជាមួយសហរដ្ឋអាមេរិកមានចំនួន ៦៣ ពាន់លានអឺរ៉ូ (ប្រមាណ ៦០ ពាន់លានដុល្លារ)។ ទន្ទឹមនឹងនេះ តួរលេខនេះសម្រាប់ប្រទេសចិនមានត្រឹមតែជាង ៦០ ពាន់លានអឺរ៉ូប៉ុណ្ណោះ។ ដូច្នេះហើយ អាមេរិកបានវ៉ាដាច់ចិន ដើម្បីក្លាយជាដៃគូពាណិជ្ជកម្មធំជាងគេរបស់អាល្លឺម៉ង់។

នៅឆ្នាំ ២០២៣ ប្រទេសចិននៅតែជាដៃគូពាណិជ្ជកម្មកំពូលរបស់អាល្លឺម៉ង់សម្រាប់រយៈពេល ៨ ឆ្នាំជាប់ៗគ្នា ជាមួយនឹងចំណូលទ្វេភាគីឈានដល់ ២៥៣ ពាន់លានអឺរ៉ូ។ ទោះជាយ៉ាងណាក៏ដោយ តួលេខនេះគឺត្រឹមតែពីរបីរយលានអឺរ៉ូប៉ុណ្ណោះដែលខ្ពស់ជាងសហរដ្ឋអាមេរិក។ Vincent Stamer សេដ្ឋវិទូនៅ Commerzbank បានពន្យល់អំពីការផ្លាស់ប្តូរនៃត្រីមាសទីមួយថា “ការនាំចេញរបស់អាល្លឺម៉ង់ទៅកាន់សហរដ្ឋអាមេរិកកំពុងកើនឡើង ដោយសារសេដ្ឋកិច្ចអាមេរិកបច្ចុប្បន្នមានភាពរស់រវើកជាង ហើយការផ្លាស់ប្តូររចនាសម្ព័ន្ធក៏ជាហេតុផលផងដែរ។

លោកបានបន្ថែមថា “បច្ចុប្បន្នប្រទេសអាឡឺម៉ង់មានបំណងចង់កាត់បន្ថយការពឹងផ្អែករបស់ខ្លួនលើទីផ្សារចិន ដោយសារតែភាពខុសគ្នាខាងនយោបាយ និងទង្វើរបស់ចិនដែលខ្លួនបានចោទប្រកាន់ថា “ការប្រកួតប្រជែងមិនយុត្តិធម៌”។ ទោះជាយ៉ាងណាក៏ដោយ ទីក្រុងប៊ែរឡាំងមិនទាន់ដាក់ចេញនូវគោលនយោបាយច្បាស់លាស់ជាច្រើនដើម្បីកាត់បន្ថយការពឹងផ្អែកទេ។ នៅក្នុងត្រីមាសទីមួយ ការនាំចេញរបស់ចិនទៅកាន់ប្រទេសអាល្លឺម៉ង់បានធ្លាក់ចុះ ១២% បើធៀបនឹងរយៈពេលដូចគ្នាកាលពីឆ្នាំមុន។

ទន្ទឹមនឹងនេះដែរ ទំនិញអាល្លឺម៉ង់ដែលនាំចេញទៅកាន់ប្រទេសចិនបានថយចុះត្រឹមតែ ១% ប៉ុណ្ណោះ នេះបើយោងតាមលោក Juergen Matthes នៅវិទ្យាស្ថានស្រាវជ្រាវសេដ្ឋកិច្ច IW (អាល្លឺម៉ង់)។ លោក Matthes បាននិយាយថា សេដ្ឋកិច្ចរបស់ប្រទេសចិនកំពុងដំណើរការអាក្រក់ជាងការព្យាករណ៍។ ទន្ទឹមនឹងនោះសេដ្ឋកិច្ចរបស់សហរដ្ឋអាមេរិកកំពុងដំណើរការកាន់តែល្អប្រសើរដោយការនាំចេញរបស់អាល្លឺម៉ង់ទៅកាន់សហរដ្ឋអាមេរិកមាន ១០% ខណៈការនាំចេញរបស់អាល្លឺម៉ង់ទៅកាន់ប្រទេសចិនមានត្រឹម ៦% ប៉ុណ្ណោះ៕

នៅលើបណ្តាញសង្គមថ្មីៗនេះ គឺកំពុងតែមានការចាប់អារម្មណ៍យ៉ាងខ្លាំងទៅកូនមាន់ចម្រុះពណ៌ភ្លឺៗស្អាតៗ គួរជាទីចាប់ចិត្តក្នុងចំណោមនារីៗនិងកុមារតូចៗ។ ប៉ុន្តែយ៉ាងណាមិញ មនុស្សភាគច្រើននៅតែមិនទាន់ជ្រាបនៅឡើយនោះទេថា តើកូនមាន់ទាំងនោះគឺជាការបង្កាត់ពូជបែបថ្មីឬក៏មានវិធីសាស្រ្តកែច្នៃអ្វី ទើបធ្វើពួកវាមានគ្រប់ពណ៌ល្អៗបែបនេះ?

តាមពិតទៅ កូនមាន់ពណ៌ស្រស់ស្អាតទាំងនេះ គឺត្រូវបានបង្កើតឡើងតាមរយៈវិធី ២ យ៉ាង៖
១ ការចាក់ថ្នាំជ្រលក់ពណ៌ចូលទៅក្នុងស៊ុត៖ ដំណើរការនៃការចាក់ថ្នាំពណ៌ចូលទៅក្នុងស៊ុតគឺ នៅរយៈពេលពី ១៦-១៨ ថ្ងៃនៃការភ្ញាស់។ បន្ទាប់ពីចាក់រួច គឺគេយកក្រមួនទៅបិទនៅលើរន្ធដែលចាក់នោះដើម្បីកុំឲ្យមានប្រហោង ហើយក៏ដាក់ស៊ុតចូលក្នុងកន្លែងភ្ញាស់វិញជាការស្រេច។
២ ការបាញ់ថ្នាំពណ៌កូនមាន់៖ បន្ទាប់ពីកូនមាន់កើតមក គេក៏ត្រូវបាញ់ថ្នាំជ្រលក់ពណ៌ទៅលើកូនមាន់។ ទោះជាយ៉ាងណា បើប្រើប្រាស់ថ្នាំបាញ់ពណ៌ទាំងនោះទៅលើកូនមាន់ហួសកម្រិតពេកអាចនឹងបង្កឲ្យមានការពុលផងដែរ។

ទោះជាយ៉ាងណា ការផ្តល់ពណ៌ទៅលើកូនមាន់គឺអាចបង្កគ្រោះថ្នាក់ដល់សុខភាពពួកវា ដោយផ្អែកលើវិធីសាស្ត្រដែលគេប្រើដើម្បីជ្រលក់ មិនថាជាការចាក់ឬលាបថ្នាំពណ៌នោះទេ។ បញ្ហាសុខភាពទាំងនេះអាចមានឥទ្ធិពលរយៈពេលវែង ដែលអាចកាត់បន្ថយអាយុជីវិតរបស់កូនមាន់ឬក៏អាចស្លាប់ភ្លាមៗតែម្តង។ ដោយសារថ្នាំជ្រលក់ គឺមានផ្ទុកនូវសារធាតុដែលអាចពុលដល់កូនមាន់ និងសូម្បីតែមនុស្ស។ ខណៈសព្វថ្ងៃនេះ កូនមាន់លាបពណ៌មិនសូវមានប្រជាប្រិយភាពទេ ដោយសារការធ្វើបែបនេះបានក្លាយជារឿងខុសច្បាប់នៅក្នុងប្រទេសនិងរដ្ឋមួយចំនួន។

គួរបញ្ជាក់ថា ការជ្រលក់ពណ៌កូនមាន់គឺបានប្រព្រឹត្តិទៅនៅក្នុងបុណ្យអ៊ីស្ទើរ និងត្រូវបានគេជឿថាមានតាំងពីឆ្នាំ១៨៨០មកម្លេះ។ វាត្រូវបានគេជឿថាប្រពៃណីនៃការលាបពណ៌ពង Easter បានបំផុសគំនិតការអនុវត្តនៃការជ្រលក់ពណ៌កូនមាន់។ កូនមាន់ និងស៊ុតតំណាងឱ្យជីវិតថ្មី ហើយជាទូទៅត្រូវបានផ្សារភ្ជាប់ជាមួយនឹងបុណ្យ Easter ។ ការផ្តល់ពណ៌ឲ្យកូនមាន់នេះគឺទទួលបាននូវការពេញនិយមយ៉ាងខ្លាំងក្នុងចន្លោះឆ្នាំ ១៩៦០-១៩៧០ ។ កូនមាន់អាចត្រូវបានគេលាបពណ៌ភ្លឺៗដូចជា ខៀវ បៃតង និងពណ៌ស្វាយ ដើម្បីជាការកម្សាន្តរបស់កុមារ នៅក្នុងពិធីបុណ្យនោះ និងសូម្បីតែក្នុងពិធីបុណ្យផ្សេងៗ ឬជាការផ្តល់រង្វាន់ទៅកាន់នរណាម្នាក់ផងដែរ។

យ៉ាងណាមិញ កូនមាន់លាបពណ៌ទាំងនោះភាគច្រើនគឺត្រូវបានគេបោះបង់ចោលដោយសារតែបាត់បង់ពណ៌ ឬក៏ជុះរោមពណ៌របស់វា ដោយសារតែកត្តាផ្សេងៗ។ ម្យ៉ាងវិញទៀត កូនមាន់ចម្រុះពណ៌ទាំងនោះក៏ត្រូវបានគេជឿថាអាចនឹងចម្លងរោគ ជាពិសេសគឺទៅលើកុមារ និងហាមជាដាច់ខាតក្មេងអាយុក្រោម៥ឆ្នាំ ធ្វើការប៉ះទៅលើកូនមាន់ទាំងនោះឡើយ៕

ប្រទេសស្លូវ៉ាគី ៖ ខ្មាន់កាំភ្លើ.ង បានលួចបា.ញ់ ប្រហា.រ នាយករដ្ឋមន្ត្រីប្រទេសស្លូវ៉ាគីនៅទីសាធារណៈបណ្តាលឱ្យលោករងរបួសធ្ងន់ធ្ងរ ហើយភ្នាក់ងារសង្គ្រោះបានបញ្ជូនលោកតាមឧទ្ធម្ភាគចក្រទៅកាន់មន្ទីរពេទ្យ ។ មន្ត្រីរបស់លោកនាយករដ្ឋមន្ត្រី ក៏បានចាប់ខ្លួនខ្មាន់កាំភ្លើ.ង ភ្លាមៗនៅកន្លែងកើតហេតុ ហើយគេសន្និដ្ឋានថា ករណីនេះកើតឡើងដោយសារបញ្ហានយោបាយ ទើបជំរុញឱ្យខ្មាន់កាំភ្លើ.ង ធ្វើបែបនេះ ។

កាលពីថ្ងៃទី១៥ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា ខ្មាន់កាំភ្លើងបានព្យាយាមបាញ់សម្លាប់នាយរដ្ឋមន្ត្រីស្លូវ៉ាគី លោក Robert Fico អាយុ៥៩ឆ្នាំ ក្នុងអំឡុងពេលលោកដើររាក់ទាក់ស្វាគមន៍ពលរដ្ឋ នៅបរិវេណខាងមុខមជ្ឈមណ្ឌលវប្បធម៌សហគមន៍ក្នុងទីក្រុង Handlova ស្ថិតនៅភាគកណ្តាលប្រទេស ។ លោក Robert Fico បានធ្វើដំណើរទៅចូលរួមកិច្ចប្រជុំរដ្ឋាភិបាល ស្រាប់តែមានសំឡេងកាំភ្លើងលាន់ឡើងជាច្រើនគ្រាប់ បន្ទាប់មក លោកក៏ដួលទៅលើផ្លូវភ្លាមៗ ហើយមន្ត្រីរបស់លោកបានចាប់ខ្លួនខ្មាន់កាំភ្លើងនៅកន្លែងកើតហេតុ ។

រដ្ឋមន្ត្រីក្រសួងមហាផ្ទៃស្លូវ៉ាគីថ្លែងថា លោកនាយករដ្ឋមន្ត្រី Robert Fico ត្រូវបានខ្មាន់កាំភ្លើងបាញ់ចំនួន៥គ្រាប់ បណ្តាលឱ្យលោករងរបួសធ្ងន់ធ្ងរ ។ គ្រាប់កាំភ្លើងបានចូលទៅក្នុងពោះ ហើយក្រុមគ្រូពេទ្យនឹងចំណាយពេលរាប់ម៉ោងដើម្បីវះកាត់ជួយសង្គ្រោះជីវិតលោក ។ មន្ត្រីរបស់លោកបានបញ្ជូនលោកតាមឧទ្ធម្ភាគចក្រទៅកាន់មន្ទីរពេទ្យប្រចាំតំបន់ ពីព្រោះរបួសរបស់លោកធ្ងន់ធ្ងរខ្លាំង និងពុំអាចព្យាបាលនៅមន្ទីរពេទ្យក្នុងទីក្រុង Bratislava បានទេ ។

សេចក្តីរាយការណ៍ដំបូងបញ្ជាក់ថា ខ្មាន់កាំភ្លើងរូបនេះជាអ្នកនិពន្ធ និងជាសកម្មជននយោបាយ អាយុ៧១ឆ្នាំ ត្រូវបានអាជ្ញាធរចាប់ខ្លួននៅកន្លែងកើតហេតុ ប៉ុន្តែគេពុំបញ្ជាក់ពីចំណុចលម្អិតផ្សេងទៀតទេ ។ គេសន្និដ្ឋានថា ដោយសាររឿងនយោបាយទើបជំរុញឱ្យខ្មាន់កាំភ្លើងធ្វើបែបនេះ ហើយក្រោយមក អាជ្ញាធរបានត្រួតពិនិត្យ និងប្រមូលភស្តុតាង ។

លោក Robert Fico បានកាន់តំណែងជានាយករដ្ឋមន្ត្រីប្រទេសស្លូវ៉ាគី លើកទី៣ កាលពីខែតុលា ឆ្នាំ២០២៣ ក្រោយការបោះឆ្នោតនៅខែកញ្ញា ឆ្នាំ២០២៣ ។ លោកបានធ្វើជានាយករដ្ឋមន្ត្រីស្លូវ៉ាគី លើកទី១ នៅឆ្នាំ២០០៩ និងលើកទី២ នៅឆ្នាំ២០១២ ហើយលោកជាមេដឹកនាំរដ្ឋាភិបាលចម្រុះប្រកាន់ខ្ជាប់នូវលទ្ធិប្រជានិយម និងជាតិនិយម ។ នៅខែដំបូង ក្រោយពីលោកកាន់តំណែងជានាយករដ្ឋមន្ត្រី គេបានរិះគន់ពីគោលនយោបាយរបស់លោក ហើយក៏បង្កជម្លោះក្នុងសង្គម ។

នៅខែមករា ឆ្នាំ២០២៤ លោក Robert Fico បានប្រកាសផ្អាកជំនួយយោធាដល់ប្រទេសអ៊ុយក្រែន ហើយកាលពីខែមេសា ឆ្នាំ២០២៤ លោកបានបិទប្រព័ន្ធផ្សព្វផ្សាយសាធារណៈឈ្មោះ RTVS ។ ហេតុនេះ នៅខែឧសភា ពលរដ្ឋរាប់ពាន់នាក់បានតវ៉ាប្រឆាំងជាមួយលោក ព្រោះតែការបិទប្រព័ន្ធផ្សព្វផ្សាយ ។

ប៉ុន្តែមហាជនបានថ្កោលទោសការបាញ់សម្លាប់នាយករដ្ឋមន្ត្រីស្លូវ៉ាគី លោក Robert Fico ថា ជាការរំលោភលទ្ធិប្រជាធិបតេយ្យ និងជាទង្វើឃោរឃៅ ។ ដូចគ្នានេះ មេដឹកនាំពិភពលោកជាច្រើនរូបបានថ្កោលទោសការបាញ់នេះផងដែរ ក្នុងនោះប្រធានាធិបតីអាមេរិក លោក ចូ បៃដិន ថ្លែងថា លោកភ្ញាក់ផ្អើល និងបារម្ភចំពោះហេតុការណ៍នេះ ។ រីឯប្រធានាធិបតីបារាំង លោក Emmanuel Macron បានសរសេរក្នុងបណ្តាញសង្គម X ថា លោកភ្ញាក់ផ្អើលយ៉ាងខ្លាំងជាមួយហេតុការណ៍នេះ ។

ចំណែកនាយករដ្ឋមន្ត្រីអាល្លឺម៉ង់ លោក Olaf Scholz ក៏បានថ្កោលទោសការបាញ់នេះដែរ ហើយថ្លែងថា គ្មានអំពើហិង្សាក្នុងផ្នែកនយោបាយទេ ខណៈប្រធានាធិបតីរុស្ស៊ី លោក វ៉្លាឌីមៀរ ពូទីន ថ្លែងថា ឧក្រិដ្ឋកម្មលើកនេះគ្មានមូលហេតុច្បាស់លាស់ទេ ហើយវាជាទង្វើពុំសមរម្យ ៕

ជាការពិតណាស់ការងារនីមួយៗមិនមែនងាយស្រួលរកនោះទេ ហើយទីផ្សារការងារភាគច្រើនសុទ្ធតែទាមទារកម្រិតវប្បធម៌ បរិញ្ញាបត្រ និងចំនេះជំនាញផ្សេងៗ ទើបយើងអាចមានសង្ឃឹមក្នុងការទទួលបានប្រាក់បៀវត្សរ៍ខ្ពស់។ ទោះជាយ៉ាងណាសម្រាប់ការងារមួយចំនួនដូចជា រត់តុ លាងចាន ឬការងារបូជាសព សម្រាប់ប្រទេសមួយចំនួនរួមទាំងប្រទេសកម្ពុជាយើងគឺមិនត្រូវការបរិញ្ញាបត្រឡើយ ដោយឡែកទីផ្សារការងារប្រទេសចិនវិញគឺខុសប្លែកពីគេ ដោយគ្រាន់តែធ្វើការជាបុគ្គលិកបូជាសពសោះក៏ត្រូវការចប់បរិញ្ញាបត្រ និងអនុបណ្ឌិតដែរ ដែលនេះកំពុងបង្កឱ្យមានការជជែកវែកញែកយ៉ាងក្ដៅគគុកពេញបណ្តាញសង្គមចិន។

យោងតាម China daily ដែលបានចុះផ្សាយកាលពីពេលថ្មីៗនេះ បានឱ្យដឹងថា និស្សិតបញ្ចប់ការសិក្សាចំនួន ៣ នាក់ពីសាកលវិទ្យាល័យល្បីៗត្រូវបានជួលឱ្យធ្វើជាកម្មករបូជាសពនៅមជ្ឈមណ្ឌលបុណ្យសពរបស់រដ្ឋាភិបាល។ ក្នុងនោះមានបេក្ខជនម្នាក់បានបញ្ចប់សញ្ញាប័ត្រអនុបណ្ឌិតផ្នែកទស្សនវិជ្ជាពីសកលវិទ្យាល័យចិនហុងកុង និងពីរនាក់ទៀតបានបញ្ចប់ការសិក្សាបរិញ្ញាបត្រពីសាកលវិទ្យាល័យពហុបច្ចេកទេសចិនខាងត្បូង និងសាកលវិទ្យាល័យក្វាងចូវ ដែលជាសាកលវិទ្យាល័យកំពូលចំនួន ៣៨ នៅក្នុងប្រទេសចិន។ មន្ត្រីម្នាក់មកពីការិយាល័យកិច្ចការស៊ីវិលក្វាងចូវបានប្រាប់ប្រព័ន្ធផ្សព្វផ្សាយក្នុងស្រុកថាអ្នកដែលមានសញ្ញាបត្រឧត្តមសិក្សាទើបអាចដាក់ពាក្យសុំការងារនេះបាន។

ដំណឹងនេះបានក្លាយជាប្រធានបទដ៏ក្តៅគគុកនៅលើបណ្តាញសង្គម ដោយមានអ្នកនិយមលេងអ៊ីនធឺណិតជាច្រើនបាននិយាយថា វាមិនសាកសមសោះសម្រាប់អ្នកដែលមានសញ្ញាប័ត្រផ្នែកទស្សនវិជ្ជាខ្ពង់ខ្ពស់ស្រាប់តែឱ្យមកធ្វើការក្នុងឧស្សាហកម្មដុតខ្មោចទៅវិញ។ អ្នកខ្លះថា តើវាជាការខ្ជះខ្ជាយនៃការអប់រំដែរឬទេ ខណៈដែលនិស្សិតរឿនចប់គ្មានការងារធ្វើ ហើយពេលធ្វើការមកធ្វើតំណែងនេះទៅវិញ។ ទោះជាយ៉ាងណាបច្ចុប្បន្នទីផ្សារការងារក្នុងប្រទេសចិនគឺយ៉ាប់យឺនខ្លាំងណាស់ ដូច្នេះនិស្សិតទោះបីរៀនចប់ខ្ពង់ខ្ពស់ប៉ុណ្ណាក៏ជៀសមិនផុតពីការងារតូចតាចទាំងនេះដែរ។

យោងតាមការិយាល័យស្ថិតិជាតិរបស់ប្រទេសចិន អត្រាគ្មានការងារធ្វើនៅក្នុងក្រុមអាយុ ១៦-២៤ បានកើនឡើងដល់ ១៥.៣% នៅក្នុងត្រីមាសទីមួយនៃឆ្នាំនេះ។ ហើយក្រុមអាយុ ២៥-២៩ ឆ្នាំបានកើនឡើងដល់ទៅ ៧.២% ឯណោះ។ គួរបញ្ជាក់ដែរថា ការងារបូជាសពគឺជាមុខតំណែងអចិន្ត្រៃយ៍ ហើយការងារនេះក៏ជាប់ពាក់ព័ន្ធនឹងការដឹកសាកសព និងធ្វើការវេនយប់ផងដែរ សម្រាប់ប្រាក់បៀវត្សរ៍ប្រចាំខែវិញគឺ ១០,០០០ យន់ (ប្រមាណ ១,៤០០ ដុល្លារអាមេរិក) ក្នុងមួយខែ៕

Messi ជាសត្វចិញ្ចឹមមានអាយុ ៧ ឆ្នាំហើយបានបង្ហាញខ្លួនជាមួយម្ចាស់របស់ខ្លួនគឺគ្រូបង្វឹក Laura Martin និងភ្ញៀវមួយចំនួនទៀត។ បុគ្គលិកកំរាលព្រំក្រហមទុកពេលឱ្យ Messi ដើរលើកំរាលព្រំខណៈដែលពេលដែលបានឈានជើងចូល Messi ក៏បានឈប់ហើយបាន «ស្វាគមន៍» នៅចំពោះមុខអ្នកថតរូបជាបន្តបន្ទាប់។

រូបថតជាច្រើនសន្លឹករបស់ Messi ក្នុងពិធីនោះ ត្រូវបានមនុស្សជាច្រើនចែករំលែកនៅលើបណ្តាញសង្គម ទាក់ទាញការចាប់អារម្មណ៍យ៉ាងខ្លាំង ទស្សនិកជនបានសរសេរថា «ឆ្កែនេះបានឈ្នះពានរង្វាន់នៅទីក្រុង Cannes បានក្លាយជាតារាកំរាលព្រំក្រហម»។

ជាលើកដំបូង Messi បានចូលរួមនៅលើកម្រាលព្រំក្រហមក្នុងពិធីបើកមហោស្រពភាពយន្តទីក្រុង Cannes កាលពីឆ្នាំមុន សត្វឆ្កែនេះបានចូលរួមសម្តែងក្នុងរឿង Anatomy of a Fall ដែល ជាភាពយន្តដែលដឹកនាំដោយ Justine Triet និយាយអំពីស្ត្រីម្នាក់ដែលត្រូវបានចោទប្រកាន់ពីបទសម្លាប់ប្តីរបស់នាងសាក្សីតែមួយគត់គឺខ្លួនឯង ដោយមានកូនប្រុសពិការភ្នែក និងឆ្កែរបស់ពួកគេ។ ភាពយន្តនេះបានឈ្នះពានរង្វាន់កំពូល ខណៈពេលដែល Messi បានឈ្នះ Palm Dog ដែលជារង្វាន់បន្ទាប់បន្សំដែលផ្តល់ដោយភាពយន្តអន្តរជាតិចំពោះសត្វឆ្កែ ឬក្រុមសត្វឆ្កែ ជាមួយនឹងការសម្តែងដ៏ល្អ។https://blogger.googleusercontent.com/img/b/R29vZ2xl/AVvXsEgJtdR0kTYfW81hypQyooagk_7FjWBMq7y63c-k7mXgANShLs5_pT0Oo_nXKnuJ7rDHMLYmGfK4ukyScPC1KgvsavlR-HUu57a2k2xxvSULnmLTlqRKkKbUEndAzuL36poZU_oaySt05OtEDiZamIdKoPQL6-p0f2a8xZGY5Y8lzGdI5RjofBwrASFihTI/s1115/image_2024-05-15_11-50-21.png

អ្នកដឹកនាំរឿងបាននិយាយថា Messi គឺជាផ្នែកមួយដែលមិនអាចខ្វះបាននៃខ្សែភាពយន្តនេះ។ ក្នុងឈុតខ្លះបានថតពីទស្សនៈសត្វជាតួអង្គដូចអ្នកដទៃទៀត ហើយវាពិតជាសំខាន់ណាស់សម្រាប់រឿងនេះ។
ក្នុងមួយឆ្នាំកន្លងទៅ Messi បានចូលរួមក្នុងកម្មវិធីភាពយន្តមួយចំនួនផ្សេងទៀត រួមទាំង កម្មវិធី Oscars ផងដែរ។ មហោស្រពភាពយន្តទីក្រុង Cannes លើកទី៧៧ឆ្នាំ២០២៤ ប្រព្រឹត្តទៅចាប់ពីថ្ងៃទី ១៤ ដល់ថ្ងៃទី ២៥ ខែឧសភា ឆ្នាំ២០២៤ នៅប្រទេសបារាំងដោយមានតារាល្បីៗជាច្រើនដួងចូលរួមក្នុងនោះក៏មានខាងកម្ពុជាផងដែរ៕

បច្ចុប្បន្ននេះដោយសង្កេតឃើញថា ការធ្វើចំណាកស្រុករបស់ជនជាតិខ្មែរទៅកាន់ប្រទេសថៃ ដើម្បីស្វែងរកប្រាក់ចំណូល បាននឹងកំពុងកើនឡើងយ៉ាងខ្លាំង ជាពិសេសគឺនៅតាមបន្ទាត់ព្រំដែនកម្ពុជា-ថៃ ដែលបានបន្សល់ទុកត្រឹមតែសភាពស្ងាត់ជ្រងំតាមភូមិនីមួយៗនៅទីនោះ គឺមានតែមនុស្សចាស់និងក្មេងៗប៉ុណ្ណោះ។

ប្រទេសថៃជាគោលដៅដ៏ពេញនិយមនៅក្នុងតំបន់អាស៊ានសម្រាប់ពលករចំណាកស្រុកកម្ពុជា ដោយរំពឹងថា នឹងទទួលបានប្រាក់ចំណូលសមរម្យដើម្បីគ្រប់គ្រងជីវភាពគ្រួសារ។ ទោះជាយ៉ាងណា ការធ្វើចំណាកស្រុកទាំងនោះ គឺរួមមានការធ្វើជំនួញ ទាំងត្រូវច្បាប់ និងខុសច្បាប់ផងដែរ។

ការគ្រប់គ្រងចលនាប្រជាជនឆ្លងកាត់ព្រំដែនដីគោករវាងថៃ និងកម្ពុជាឲ្យមានប្រសិទ្ធភាពគឺជាការចាំបាច់។ បច្ចុប្បន្នប្រទេសថៃទទួលពលករខ្មែរប្រមាណ២លាននាក់ ដោយពាក់កណ្តាលនៃពួកគេខ្វះឯកសារ។ នេះជាញឹកញាប់នាំឱ្យមានការកេងប្រវ័ញ្ចកម្លាំងពលកម្ម និងធ្វើទុក្ខបុកម្នេញដោយអាជ្ញាធរថៃ។ នៅឆ្នាំ២០២៣ មានការចាប់ខ្លួនពលករខ្មែរយ៉ាងច្រើនដោយអាជ្ញាធរថៃ ដែលត្រូវបានគេជឿថាបានធ្វើទារុណកម្មលើជនចំណាកស្រុកខុសច្បាប់។

ទោះជាយ៉ាងណា មនុស្សជាច្រើនមានចម្ងល់ថាតើការធ្វើចំណាកស្រុកបែបនេះនឹងផ្តល់នូវផ្តល់ចំណេញអ្វីខ្លះដល់ប្រទេសទាំងសងខាង? ជាការពិត ការគ្រប់គ្រងត្រឹមត្រូវនៃគោលនយោបាយចំណាកស្រុករវាងកម្ពុជា និងថៃ គួរតែជាយុទ្ធសាស្រ្តឈ្នះ-ឈ្នះទំាងសងខាង។ ព្រោះថា កម្លាំងពលកម្មចំណាកស្រុកពីកម្ពុជាទៅថៃ បាននឹងកំពុងដើរតួនាទីយ៉ាងសំខាន់នៅក្នុងកំណើនសេដ្ឋកិច្ចរបស់ប្រទេសថៃ នៅក្នុងវិស័យសំខាន់ៗដូចជា កសិកម្ម សំណង់ នេសាទ និងផលិតកម្ម។ ជាថ្នូរនឹងការផ្ទេរប្រាក់ដែលបញ្ជូនដោយពលករចំណាកស្រុកទាំងនេះទៅកាន់គ្រួសាររបស់ពួកគេនៅក្នុងប្រទេសកម្ពុជាវិញ គឺបានរួមចំណែកយ៉ាងសំខាន់ដល់សុខុមាលភាពរបស់គ្រួសារទាំងនោះ និងសេដ្ឋកិច្ចនៃភូមិរបស់ពួកគេ។ ដោយហេតុថា ជនចំណាកស្រុកកម្ពុជាភាគច្រើននៅក្នុងប្រទេសថៃគឺមានជីវភាពក្រីក្រ ហើយការជ្រើសរើសចាកចេញដោយសារតែឱកាសការងារប្រសើរជាងមុន និងប្រាក់ឈ្នួលខ្ពស់ នេះយោងតាមការសិក្សាស្រាវជ្រាវពីមជ្ឍមណ្ឌល ARCM។

ម្យ៉ាងវិញទៀតតាមរយៈការធ្វើអន្តោប្រវេសន៍នេះ គឺជាការផ្លាស់ប្តូរប្រជាជន និងប្រជាជន ដែលមានសារៈសំខាន់សម្រាប់ទំនាក់ទំនងការទូតកម្ពុជា-ថៃឲ្យកាន់តែមានភាពស្អិតរមួត។ ការផ្តល់អាទិភាពដល់ពាណិជ្ជកម្ម និងការវិនិយោគឆ្លងព្រំដែន គឺជារឿងសំខាន់បំផុត ព្រោះថា អន្តរកម្មធុរកិច្ចនៅតាមបណ្តោយព្រំដែន ជំរុញទំនាក់ទំនងជិតស្និទ្ធរវាងប្រជាជន។

បន្ថែមពីនេះ រាជរដ្ឋាភិបាលនៃប្រទេសទាំងពីរគឺគួរតែមានកិច្ចខិតខំប្រឹងប្រែងបន្ថែមទៀត ក្នុងការលើកកម្ពស់ការផ្លាស់ប្តូរអាជីវកម្ម ប្រតិបត្តិការ និងបង្កើតឱកាសវិនិយោគនៅតាមព្រំដែនដីគោកផងដែរ៕