យោងតាមរបាយការណ៍ទីក្រុងដែលមានទ្រព្យសម្បត្តិច្រើនជាងគេបំផុតនៅលើពិភពលោកឆ្នាំ ២០២៤ ដោយអ្នកឯកទេសផ្នែកចំណាកស្រុកទ្រព្យសម្បត្តិអន្តរជាតិ Henley & Partners បានលើកឡើងថា បច្ចុប្បន្ននេះនៅក្នុងប្រទេសសិង្ហបុរី មានចំនួនមហាសេដ្ឋីរហូតដល់ទៅ ២៤៤,៨០០នាក់ឯណ្ណោះ។

ប្រជាជនសឹង្ហបុរីមានត្រឹមតែជាង ៦ លាននាក់ប៉ុណ្ណោះ។ នេះមានន័យថាមនុស្សប្រហែល ៤ នាក់ក្នុងចំណោម ១០០ នាក់ដែលរស់នៅក្នុងប្រទេសសិង្ហបុរីគឺជាមហាសេដ្ឋី – ដោយនេះគឺមិនគិតពីចំនួនកំពូលមហាសេដ្ឋី (អ្នកដែលមានទ្រព្យសម្បត្តិសុទ្ធយ៉ាងហោចណាស់ ១០០ លានដុល្លារ) នៅក្នុងប្រទេសនេះនោះទេ។

យោងតាមលោក Henley & Partners បានឱ្យដឹងថា “ទីក្រុងសិង្ហបុរីបានជាប់ចំណាត់ថ្នាក់លេខ ៤ នៅលើពិភពលោក បន្ទាប់ពីការកើនឡើងដ៏គួរឱ្យកត់សម្គាល់ប្រមាណ ៦៤ ភាគរយនៃចំនួនមហាសេដ្ឋី ត្រឹមរយៈពេល ១០ ឆ្នាំចុងក្រោយនេះ។

លោកបន្តទៀតថា “សិង្ហបុរីគឺជាគោលដៅកំពូលមួយលើពិភពលោកសម្រាប់ការធ្វើចំណាកស្រុករបស់មហាសេដ្ឋី។ ម៉្យាងវិញទៀត វាក៏ត្រូវបានចាត់ទុក ថាជាទីក្រុងដែលងាយស្រួលប្រកបអាជីវកម្មបំផុតនៅលើផែនដីនេះទៀតផង។ សេដ្ឋីប្រហែល ៣,៤០០ នាក់គឺបានផ្លាស់ប្តូរទៅរស់នៅទីក្រុងនេះកាលពីឆ្នាំ២០២៣ ដែលធ្វើឲ្យសិង្ហបុរីបច្ចុប្បន្ន ប្រមូលផ្តុំទៅដោយសេដ្ឋីស្នាក់នៅប្រមាណ ២៤៤,៨០០ នាក់, សេដ្ឋីប្រាក់រយលានមានប្រមាណ ៣៣៦នាក់, និងសេដ្ឋីប្រាក់ពាន់លានប្រមាណ ៣០នាក់។”

របាយការណ៍នេះបានចុះបញ្ជីទីក្រុងញូវយ៉ក សហរដ្ឋអាមេរិក គឺជាទីក្រុងជាប់លេខ១ ទូទាំងពិភពលោក ដែលមានមហាសេដ្ឋីច្រើនជាងគេបំផុតចំនួន ៣៤៩,៥០០នាក់, មហាសេដ្ឋីប្រាក់រយលាន ៧៤៤នាក់ ,និងមហាសេដ្ឋី ប្រាក់ពាន់លាន ៦០នាក់ ។

ចំណែកចំណាត់ថ្នាក់ទី ២ បានទៅ The Bay Area សាន់ហ្រ្វាន់ស៊ីស្កូ សហរដ្ឋអាមេរិក មានមហាសេដ្ឋីចំនួន ៣០៥,៧០០នាក់ ,មហាសេដ្ឋីប្រាក់រយលាន ៦៧៥នាក់ និងមហាសេដ្ឋីប្រាក់ពាន់លាន ៦៨ នាក់។ ទីក្រុងតូក្យូប្រទេសជប៉ុនជាប់ចំណាត់ថ្នាក់លេខ៣ មានមហាសេដ្ឋីរស់នៅ ២៩៨,៣០០នាក់ ,មហាសេដ្ឋីប្រាក់រយលាន២៦៧នាក់ និងមហាសេដ្ឋីប្រាក់ពាន់លាន១៤ នាក់) ផងដែរ៕

ប្រទេសអង់គ្លេស ៖ វាមិនចម្លែកទេ ដែលយន្តហោះមួយចំនួនប្រកាសពន្យារពេលការហោះហើរដោយសារអាកាសធាតុ និងមានបញ្ហាបច្ចេកទេស ។ ប៉ុន្តែករណីនេះខុសគេ និងធ្វើឱ្យមហាជនរិះគន់អាកាសយានិកម្នាក់យ៉ាងខ្លាំង ហើយសួរថា តើអាកាសយានិកអាចធ្វើបែបនេះបាន មែនទេ? ការហោះហើរត្រូវបានពន្យារពេលអស់ជាង១ម៉ោង ដោយសារអាកាសយានិកធ្វើបែបនេះ ។ វាធ្វើឱ្យប៉ះពាល់ដល់អ្នកដំណើរទាំងអស់ ហើយតើខាងក្រុមហ៊ុនអាកាសចរណ៍បានគិតពីអារម្មណ៍អ្នកដំណើរដែរឬទេ?

ហេតុការណ៍នេះបានកើតឡើងនៅប្រទេសអង់គ្លេស គឺដោយសារអាកាសយានិករូបនេះពុំព្រមចេញដំណើរតាមកាលវិភាគហោះហើរ ព្រោះរវល់ទៅតម្រង់ជួរទិញភីហ្សាឱ្យបុគ្គលិកបម្រើការក្នុងយន្តហោះ ។ អាកាសយានិកនិយាយថា មិនចង់ឱ្យបុគ្គលិកបរិភោគសានវេចត្រជាក់ ទើបខាងយន្តហោះប្រកាសពន្យារពេលធ្វើដំណើរ និងសុំឱ្យអ្នកដំណើរយោគយល់ ។

ក្រុមហ៊ុនអាកាសចរណ៍អង់គ្លេស EasyJet បានកំណត់ការហោះហើរចេញពីទីក្រុង Lisbon ប្រទេសព័រទុយហ្គាល់ ទៅកាន់ទីក្រុង Manchester ប្រទេសអង់គ្លេស ដោយត្រូវចំណាយពេលធ្វើដំណើរជិត៣ម៉ោង ។ ប៉ុន្តែយន្តហោះនេះបានពន្យារពេលធ្វើដំណើរអស់ជាង១ម៉ោង ដោយសារក្នុងយន្តហោះគ្មានអាហារក្តៅៗឱ្យបុគ្គលិកបរិភោគ ទើបអាកាសយានិកទៅតម្រង់ជួរទិញភីហ្សាយកមកឱ្យបុគ្គលិក ។

អ្នកដំណើរទាំងអស់បានរង់ចាំរហូតដល់អាកាសយានិកត្រឡប់មកពីហាងភីហ្សាវិញ ហើយអាកាសយានិកក៏បាននិយាយប្រាប់អ្នកដំណើរតាម Intercom ថា លោកសម្រេចចិត្តពន្យារពេលហោះហើរ ព្រោះត្រូវដោះស្រាយរឿងអាហារឱ្យបុគ្គលិក ។ ហេតុនេះ លោកចុះពីយន្តហោះ និងឆ្លងកាត់កន្លែងត្រួតពិនិត្យលិខិតឆ្លងដែនដើម្បីទិញភីហ្សា ។

អាកាសយានិកនិយាយថា ៖ «ខ្ញុំពុំអាចឱ្យបុគ្គលិកបម្រើការក្នុងយន្តហោះបរិភោគសានវេចត្រជាក់២ដុំបានទេ ហើយខ្ញុំបានសួរអ្នកដំណើរថា តើពួកគេអាចរង់ចាំបានអត់ ព្រោះខ្ញុំចង់ទិញភីហ្សាឱ្យបុគ្គលិក ដោយពុំចាំបាច់ឈរតម្រង់ជួរទិញតាមលេខរៀង ។ ប៉ុន្តែអ្នកដំណើរឆ្លើយថា អត់បានទេ ទើបខ្ញុំរត់ទៅតម្រង់ជួរទិញភីហ្សា ដែលមានអតិថិជនឈរមុខខ្ញុំចំនួន១០០នាក់ ។ ខ្ញុំសូមអរគុណ សម្រាប់ការអត់ធ្មត់របស់អ្នកដំណើរទាំងអស់» ។

អ្នកដំណើរខឹងយ៉ាងខ្លាំងចំពោះឥរិយាបថ និងការបកស្រាយគ្មានប្រយោជន៍របស់អាកាសយានិក ក្នុងនោះអ្នកដំណើរម្នាក់និយាយថា ៖ «យន្តហោះពន្យារពេលហោះហើរធ្វើឱ្យមានភាពរញ៉េរញ៉ៃនៅអាកាសយានដ្ឋាន Lisbon ហើយបញ្ហានឹងមិនបញ្ចប់ត្រឹមនេះទេ ។ អ្នកដំណើរបានអង្គុយរង់ចាំអស់ជាង១ម៉ោង ហើយសំខាន់ យើងពុំអាចប្រើប្រាស់បន្ទប់ទឹកលើយន្តហោះបាន ហើយគ្មានភេសជ្ជៈចែកឱ្យផឹកទេ» ។

ចំណែកអ្នកនាំពាក្យរបស់ក្រុមហ៊ុនអាកាសចរណ៍ EasyJet និយាយថា មានអារម្មណ៍សោកស្តាយយ៉ាងខ្លាំងចំពោះហេតុការណ៍នេះ ដែលបណ្តាលឱ្យប៉ះពាល់ដល់អ្នកដំណើរទាំងអស់ ដោយសារក្រុមហ៊ុនពុំបានត្រៀមអាហារគ្រប់គ្រាន់សម្រាប់បុគ្គលិក និងអាកាសយានិក ៕

ប្រទេសជប៉ុន ៖ សារព័ត៌មានបរទេសរាយការណ៍ថា នៅខែឧសភា ឆ្នាំ២០២៤ ផ្លូវថ្មី១ខ្សែនៅប្រទេសជប៉ុនបានក្លាយជាប្រធានបទមួយក្តៅគគុក ដោយសារមហាជនរិះគ.ន់ ថា ផ្លូវនេះពុំអាចឱ្យពលរដ្ឋធ្វើដំណើរឆ្លងកាត់បាន បើទោះជាធ្វើរួចរាល់ក្តី ។ គេពុំទាន់ដឹងថា តើអាជ្ញាធរជប៉ុនមានវិធានការដោះស្រាយបែបណាទេ ដើម្បីឱ្យផ្លូវនេះអាចបើកដំណើរការជាសាធារណៈ ។

ផ្លូវថ្មីនេះពុំអាចដំណើរការបាន ដោយសារនៅចំណុចមួយត្រង់ពាក់កណ្តាលផ្លូវមានម៉ុងខ្មោចប្រមាណ២០០ ហើយបញ្ហានេះធ្វើឱ្យមហាជនរិះគន់ថា អាជ្ញាធរពុំបានរៀបចំគម្រោងមុនពេលធ្វើផ្លូវ និងចាត់វិធានការដកហូតដីរបស់រដ្ឋាភិបាល ។

ប្រព័ន្ធផ្សព្វផ្សាយ Nippon TV រាយការណ៍ថា មូលហេតុដែលផ្លូវពុំអាចឱ្យពលរដ្ឋធ្វើដំណើរឆ្លងកាត់បាន ដោយសារគ្មានការរុះរើម៉ុងខ្មោចចេញពីផ្លូវ ។ ផ្លូវខាងលើមានប្រវែងប្រមាណ២គីឡូម៉ែត្រ ដែលតភ្ជាប់រវាងទីក្រុងតូក្យូ និងទីក្រុងសាយ៉ាម៉ា ហើយម៉ុងខ្មោចស្ថិតនៅកណ្តាលផ្លូវនេះជារបស់វត្ត Zengyo-in ដែលមានអាយុកាល៥០០ឆ្នាំ ។

ព្រះចៅអធិការវត្តនេះបានផ្តល់សម្ភាសន៍ជាមួយ Nippon TV អំពីមូលហេតុដែលគ្មានការរុះរើម៉ុងខ្មោចចេញពីផ្លូវថា ខាងវត្តយល់ព្រមឱ្យអាជ្ញាធររើម៉ុងខ្មោចចេញ ប៉ុន្តែបែរជាមានឧបសគ្គជាច្រើនទៀត ។ រដ្ឋាភិបាលបានសុំរើម៉ុងខ្មោចនៅត្រង់ចំណុចផ្លូវតែប៉ុណ្ណោះ មានន័យថា មានម៉ុងខ្មោចប្រមាណ៧០ នឹងពុំរើចេញ និងត្រូវកាត់ផ្តាច់ចេញពីបរិវេណវត្ត ។ ក្រៅពីនេះ រដ្ឋាភិបាលនឹងផ្តល់ប្រាក់សំណងសម្រាប់បរិវេណធ្វើផ្លូវប៉ុណ្ណោះ ហើយម៉ុងខ្មោចនៅសេសសល់នឹងពុំទទួលបានប្រាក់សំណងទេ ។

ពលរដ្ឋទទួលផលប៉ះពាល់ដោយសារការធ្វើផ្លូវប្រាប់ថា ការដកហូតដីចាប់ផ្តើមតាំងពី១៨ឆ្នាំមុន ហើយមានពលរដ្ឋជាង២០០គ្រួសារ ត្រូវផ្លាស់ទីលំនៅចេញពីទីនេះ ។ បុរសម្នាក់ត្រូវបានអាជ្ញាធរដកហូតដីកាលពី១៧ឆ្នាំមុន រៀបរាប់ថា លោកបានបោះបង់ផ្ទះដែលធ្លាប់រស់នៅ ហើយលោករីករាយណាស់ បើផ្លូវនេះដំណើរការដោយជោគជ័យដើម្បីជាប្រយោជន៍ដល់សាធារណជន ។ ប៉ុន្តែបែរជាមានបញ្ហាម៉ុងខ្មោច ហើយលោកសួរខ្លួនឯងថា តើលោកយល់ព្រមផ្លាស់ទីលំនៅដើម្បីអ្វី?

មហាជនបានស្នើឱ្យអាជ្ញាធររុះរើម៉ុងខ្មោចទាំងនេះទៅកន្លែងផ្សេង ប៉ុន្តែពុំមានកន្លែងណាមានផ្ទៃដីធំទូលាយសម្រាប់ធ្វើម៉ុងខ្មោចទេ ហើយមហាជនរិះគន់ថា រដ្ឋាភិបាលបរាជ័យក្នុងការចរចាជាមួយវត្ត ។ រីឯអាជ្ញាធរបញ្ជាក់ថា ជំហានដំបូង អាជ្ញាធរមានគម្រោងឱ្យពលរដ្ឋប្រើប្រាស់ផ្នែកខ្លះនៃផ្លូវនេះ ចំណែកការបើកឱ្យប្រើប្រាស់ផ្លូវទាំងមូល ពុំអាចធ្វើបាននាពេលឆាប់ៗទេ ៕

ប្រទេសហ្វីលីពីន ៖ កូនកំលោះបានធ្វើឱ្យកូនក្រមុំរំភើបចិត្តយ៉ាងខ្លាំងក្នុងថ្ងៃរៀបអាពាហ៍ពិពាហ៍ ព្រមទាំងបង្ហាញទៅកាន់សាច់ញាតិ និងភ្ញៀវមកចូលរួមទាំងអស់ថា កូនកំលោះពិតជាអាចមើលថែ និងចិញ្ចឹមកូនក្រមុំអស់មួយជីវិតដោយកម្លាំងញើសឈាមរបស់ខ្លួន ។ វីដេអូថ្ងៃរៀបអាពាហ៍ពិពាហ៍របស់គូស្នេហ៍នេះត្រូវបានគេចែកចាយយ៉ាងច្រើនក្នុងបណ្តាញសង្គម និងសរសើរកូនកំលោះថា មានភាពទទួលខុសត្រូវ និងជាស្វាមីដ៏ល្អម្នាក់ ។

ពិធីរៀបអាពាហ៍ពិពាហ៍របស់គូស្នេហ៍១គូនេះបានធ្វើឱ្យល្បីល្បាញក្នុងបណ្តាញសង្គម និងទទួលការចាប់អារម្មណ៍នៅប្រទេសហ្វីលីពីន ដោយសារកូនកំលោះបានធ្វើឱ្យកូនក្រមុំ និងភ្ញៀវមកចូលរួមក្នុងពិធីភ្ញាក់ផ្អើលយ៉ាងខ្លាំង គឺការយកក្រដាសប្រាក់ជាច្រើនសន្លឹកមកតម្រៀបគ្នាជាផ្ទាំងយ៉ាងធំមួយ ។

តាមការចុះផ្សាយរបស់សារព័ត៌មាន Philippine Times ឱ្យដឹងថា ពិធីរៀបអាពាហ៍ពិពាហ៍នេះបានរៀបចំឡើងកាលពីថ្ងៃទី២៧ ខែមេសា ឆ្នាំ២០២៤ ហើយកូនកំលោះឈ្មោះ John Clavesillas រីឯកូនក្រមុំឈ្មោះ Jamaica Juridico ។ កាដូរបស់កូនកំលោះអាចក្រាលជាកម្រាលព្រំ និងគ្របលើខ្លួនកូនក្រមុំ ហើយវាធ្វើឱ្យពិធីនេះពោរពេញទៅដោយភាពរ៉ូមេនទិកខ្លាំងឡើង ខណៈភ្ញៀវចូលរួម និងសាច់ញាតិទាំងសងខាងនាំគ្នាសរសើរពីភាពច្នៃប្រឌិតនេះ ។

កូនកំលោះបាននិយាយទៅកាន់ប្រព័ន្ធផ្សព្វផ្សាយថា លោកធ្វើបែបនេះដើម្បីចង់បញ្ជាក់ពីការទទួលខុសត្រូវចំពោះគ្រួសារ ពីព្រោះការសម្រេចចិត្តរៀបអាពាហ៍ពិពាហ៍ជាមួយនារីណាម្នាក់ ពុំមែនចេះតែសម្រេចចិត្តនោះទេ ។ ម្យ៉ាងទៀត កាដូមួយនេះបញ្ជាក់ថា វាជាការសន្យាសម្រាប់សេចក្តីស្នេហាយូរអង្វែងរបស់ពួកគេ ។

កូនកំលោះនិយាយថា ៖ «ខ្ញុំចង់ឱ្យគ្រួសារ និងសាច់ញាតិទាំងអស់មើលឃើញថា ពួកយើងមានគម្រោងរៀបចំពិធីអាពាហ៍ពិពាហ៍យូរហើយ ហើយខ្ញុំបានសន្សំប្រាក់ទាំងនេះសម្រាប់ចិញ្ចឹមគ្រួសារនាថ្ងៃអនាគត» ។

លោក John Clavesillas បានទៅធ្វើការនៅប្រទេសអូស្ត្រាលី និងជាមនុស្សសន្សំសំចៃប្រាក់ ។ លោកប្រាប់ថា លោកធ្វើការជិត១៤ម៉ោងក្នុង១ថ្ងៃ ហើយលោកបានលះបង់ពេលវេលាសម្រាកដើម្បីរកប្រាក់ចិញ្ចឹមអ្នកមានគុណ និងគ្រួសារនៅថ្ងៃមុខ ។ លោក និងប្រពន្ធមានគម្រោងយកប្រាក់ទាំងអស់នេះទៅវិនិយោគក្នុងវិស័យអចលនទ្រព្យ និងសន្សំការប្រាក់ទុកចំណាយពេលមានការចាំបាច់ ។

លោកនិយាយថា ៖ «ខ្ញុំខំប្រឹងធ្វើការដើម្បីចិញ្ចឹមអ្នកមានគុណ ព្រោះខ្ញុំបានសន្យាជាមួយខ្លួនឯងថា នឹងសងគុណលោកទាំងពីរ ។ ខ្ញុំសន្សំប្រាក់ទាំងនេះ គឺចង់ឱ្យប្រពន្ធភ្ញាក់ផ្អើលក្នុងថ្ងៃដ៏ពិសេស យើងមានសេចក្តីសុខ ព្រោះឃើញវីដេអូរបស់យើងត្រូវគេចែកចាយច្រើនក្នុងបណ្តាញសង្គម ហើយពួកគេសម្តែងក្តីរីករាយផងដែរ» ៕

Neuralink ជាក្រុមហ៊ុនអភិវឌ្ឍន៍បច្ចេកវិទ្យាផ្នែកសរសៃប្រសាទ និងខួរក្បាលរបស់បិតាបច្ចេកវិទ្យា លោក Elon Musk ដែលបានដាក់បន្ទះឈីបក្នុងខួរក្បាលមនុស្សដំបូងគេ ចាប់ផ្តើមមានបញ្ហាហើយ ។ អ្នកជំនាញក្នុងក្រុមហ៊ុននេះនិយាយថា វាបណ្តាលមកពីមានខ្យល់ក្នុងលលាដ៍ក្បាលក្នុងអំឡុងពេលវះកាត់ដាក់បន្ទះឈីប ហើយធ្វើឱ្យលោក Elon Musk ឈឺក្បាលផងដែរ ។

បញ្ហានេះបានចាប់ផ្តើមកើតឡើងចាប់តាំងពីចុងខែកុម្ភៈ ឆ្នាំ២០២៤ មកម្ល៉េះ ហើយក្រុមហ៊ុន Neuralink បានផ្សព្វផ្សាយពីបញ្ហាលម្អិតទាំងនេះក្នុងគេហទំព័ររបស់ក្រុមហ៊ុន កាលពីថ្ងៃទី៨ ខែឧសភា ឆ្នាំ២០២៤ ថា ខ្សែតភ្ជាប់ឧបករណ៍ជាមួយការគិតរបស់ខួរក្បាលអ្នកសាកល្បងនេះបានរបូតចេញពីទីតាំងដើម ទើបធ្វើឱ្យការប្រមូលទិន្នន័យធ្លាក់ចុះ ។

គេពុំទាន់ដឹងច្បាស់ថា ហេតុអ្វីទើបខ្សែតភ្ជាប់ឧបករណ៍ជាមួយការគិតរបស់ខួរក្បាលអ្នកសាកល្បងរបូតបែបនេះ ប៉ុន្តែអ្នកជំនាញរបស់ក្រុមហ៊ុន Neuralink និយាយថា បញ្ហានេះបណ្តាលមកពីមានខ្យល់ក្នុងលលាដ៍ក្បាលក្នុងអំឡុងពេលវះកាត់ដាក់បន្ទះឈីប ។

សារព័ត៌មាន Arstechnica រាយការណ៍ថា យោងតាមប្រភពព័ត៌មានជិតស្និទ្ធជាមួយក្រុមសាកល្បងរបស់ក្រុមហ៊ុន Neuralink និយាយថា ក្រោយពីកើតបញ្ហា ក្រុមហ៊ុនគ្រោងដោះឧបករណ៍នេះចេញពីខួរក្បាល ប៉ុន្តែក្រោយមក ក្រុមហ៊ុនក៏បានផ្លាស់ប្តូរ Algorithm ហើយអាចស្រង់យកទិន្នន័យបាត់បង់មកវិញបានខ្លះ ។ ក្រុមហ៊ុននេះលើកឡើងថា អ្នកសាកល្បងដាក់បន្ទះឈីបក្នុងខួរក្បាលពុំរងផលប៉ះពាល់អវិជ្ជមានទេ ។

ការដាក់បន្ទះឈីបក្នុងខួរក្បាលមនុស្សដំបូងគេនេះ បានធ្វើឡើងកាលពីថ្ងៃទី២៨ ខែមករា ឆ្នាំ២០២៤ នៅវិទ្យាស្ថានសរសៃប្រសាទ Barrow ស្ថិតក្នុងរដ្ឋអារីហ្សូណា សហរដ្ឋអាមេរិក ។ គេបានដាក់បន្ទះឈីបក្នុងខួរក្បាលរបស់លោក Noland Arbaugh អាយុ២៩ឆ្នាំ ជាអ្នកជំងឺជនជាតិអាមេរិក ដែលលោកពិការចាប់ពីកចុះក្រោម ដោយសារការជ្រមុជទឹកកាលពីឆ្នាំ២០១៦ ។

ក្រោយមក លោក Elon Musk បានសរសេរក្នុងបណ្តាញសង្គមថា លោក Noland Arbaugh បានជាសះស្បើយឡើងវិញ ហើយលទ្ធផលបឋម គឺល្អ ។ បន្ទាប់មក លោក Elon Musk ក៏បានបង្ហាញពីសមត្ថភាពរបស់លោក Noland Arbaugh ជាបន្តបន្ទាប់ ដូចជា ៖ កាលពីថ្ងៃទី២០ ខែមីនា ឆ្នាំ២០២៤ ក្នុងពេលលេងអុកតាមអនឡាញរបស់ Arbor ឃើញថា លោក Noland Arbaugh អាចលេងទុកតាមចិត្តចង់តាមរយៈការបញ្ជាពីខួរក្បាល ។

បន្ទះឈីបក្នុងខួរក្បាលនេះមានទំហំប៉ុនកាក់តូចមួយ និងស្តើងជាងសក់មនុស្ស ព្រមទាំងមានខ្សែផ្សេងៗអាចបត់បែនបាន ។ បន្ទះឈីបមានអេឡិចត្រូតសរុបចំនួន១.០២៤ បានតភ្ជាប់ជាមួយខួរក្បាល ហើយធ្វើឱ្យលោក Noland Arbaugh អាចគ្រប់គ្រងឧបករណ៍កុំព្យូទ័រ និងលេងវីដេអូហ្គេមដោយប្រើគំនិតរបស់ខ្លួន ។

បញ្ហាកើតឡើងចំពោះលោក Noland Arbaugh ពាក់ព័ន្ធនឹងបន្ទះឈីបក្នុងខួរក្បាល ក្រុមហ៊ុន Neuralink និយាយថា បានជូនដំណឹងទៅរដ្ឋបាលចំណីអាហារ និងឱសថអាមេរិករួចហើយ ដែលជាភ្នាក់ងារគ្រប់គ្រងការសាកល្បង និងបានអនុញ្ញាតឱ្យក្រុមហ៊ុនសាកល្បងដាក់បន្ទះឈីបក្នុងខួរក្បាលមនុស្ស ។ ក្រុមហ៊ុនជឿថា បញ្ហានេះបានដោះស្រាយរួចហើយ ៕