ប្រាក់យ៉េនធ្លាក់ចុះមែន តែសេដ្ឋកិច្ចជប៉ុននៅតែរីកចម្រើនខ្លាំងដោយសារហេតុផលនេះ

ប្រទេសជប៉ុន៖ ក្នុងរយៈពេលប៉ុន្មានឆ្នាំថ្មីៗនេះប្រាក់យ៉េនជប៉ុនហាក់មានការធ្លាក់ចុះយ៉ាងខ្លាំងដោយ ១ ដុល្លារអាមេរិកដូរបានរហូតដល់ ១៦០ យ៉េន ខណៈកាលពីមុន ១ ដុល្លារអាមេរិកដូរបានត្រឹមតែ ១០០ យ៉េនប៉ុណ្ណោះ។
យោងតាម Nikkei Asia មូលហេតុដែលប្រាក់យ៉េនធ្លាក់ចុះគឺដោយសារការរក្សាអត្រាការប្រាក់របស់ Fed ខ្ពស់ក្នុងរយៈពេលយូរ ជាហេតុធ្វើឱ្យការរក្សាអត្រាការប្រាក់របស់ធនាគារជប៉ុន BoJ កាន់តែទាបក្នុងរយៈពេលយូរ បណ្តាលឱ្យទំនិញផ្សេងរបស់ប្រទេសជប៉ុនឡើងថ្លៃ។

ទោះជាយ៉ាងណាក៏ដោយ សេដ្ឋកិច្ចជប៉ុននាពេលបច្ចុប្បន្ននេះនៅតែរីកចម្រើនខ្លាំងដោយសារការបង្កើនចំនួនភ្ញៀវទេសចរបរទេសកាន់តែច្រើន ខណៈប្រាក់យ៉េនធ្លាក់ចុះភ្ញៀវទេសចរក៏ហ៊ានចំណាយច្រើនទៅលើទំនិញផ្សេងៗនៅក្នុងប្រទេសជប៉ុន ដែលជាហេតុធ្វើឱ្យសេដ្ឋកិច្ចរបស់ប្រទេសនេះរីកចម្រើនខ្លាំង។ យោងតាមប្រភពដដែលបានឱ្យដឹងទៀតថា ការចំណាយរបស់ភ្ញៀវទេសចរអន្តរជាតិនៅក្នុងប្រទេសជប៉ុនបានកើនឡើង ៥ ដងក្នុងរយៈពេលមួយទសវត្សរ៍ចុងក្រោយនេះ។

បើតាមទិន្នន័យរបស់រដ្ឋាភិបាលក៏បានបង្ហាញដែរថាការចំណាយរបស់ភ្ញៀវទេសចរបរទេសនៅក្នុងទីផ្សារជប៉ុនគឺឈានដល់ ៧.២ ពាន់ពាន់លានយ៉េន (ប្រមាណ ៤៥.១ ពាន់លានដុល្លារអាមេរិក) ក្នុងខែមករា ឆ្នាំ ២០២៤។ ជាការពិតណាស់ ទេសចរណ៍អន្តរជាតិបានដើរតួនាទីយ៉ាងសំខាន់ក្នុងសេដ្ឋកិច្ចជប៉ុន។ សព្វថ្ងៃឧស្សាហកម្មទេសចរណ៍អន្តរជាតិរីកចម្រើនលឿនជាងវិស័យផ្សេងៗ ដោយការចំណាយរបស់អ្នកទស្សនាប្រចាំត្រីមាសបានកើនឡើងជាង ៦០% ក្នុងរយៈពេល ៥ ឆ្នាំដល់ត្រីមាសទី ១ ឆ្នាំ ២០២៤ ខណៈដែលការនាំចេញវិស័យផ្សេងៗដូចជារថយន្ត និងដែកបានកើនឡើងត្រឹមតែ ៤៥% ពីឆ្នាំ ២០១៩ ដល់ឆ្នាំ ២០២៣ ហើយគ្រឿងបន្លាស់អេឡិចត្រូនិចបានកើនឡើងតិចជាង ៤០%។

ទន្ទឹមនឹងនេះដែរ ចំនួនភ្ញៀវបរទេសទៅកាន់ប្រទេសជប៉ុនបានលើសពីកំណត់ត្រាខ្ពស់ដែលបានកំណត់មុនពេលជំងឺរាតត្បាត។ ទិន្នន័យរបស់រដ្ឋាភិបាលបង្ហាញថា ចំនួនភ្ញៀវអន្តរជាតិប្រចាំខែសរុបទៅកាន់ប្រទេសជប៉ុនបានកើនឡើងដល់ ៣ លាននាក់ជាលើកដំបូងនៅក្នុងខែមីនា ហើយលើសពីចំនួននេះក្នុងរយៈពេល ៣ ខែជាប់ៗគ្នា បើប្រៀបធៀបទៅនឹងប្រទេសសេដ្ឋកិច្ចធំៗផ្សេងទៀត ការចំណាយរបស់ភ្ញៀវអន្តរជាតិនៅក្នុងប្រទេសជប៉ុនគឺបានកើនឡើងខ្លាំងផងដែរ៕