ប្រាសាទតាក្របី ឬប្រាសាទតង្វាយមានទីតាំងស្ថិតនៅ ភូមិឈើស្លាប់ ឃុំគោកខ្ពស់ ស្រុកបន្ទាយអំពិល មានចម្ងាយប្រមាណ៨៥គីឡូម៉ែត្រពីទីរួមខេត្តឧត្តរមានជ័យ។

កេរ្តិ៍ឈ្មោះប្រាសាទនេះចាប់ផ្ដើមល្បីល្បាញខ្លាំង នៅក្នុងសង្គ្រាមរវាងកម្ពុជា-និងថៃ ដណ្តើមប្រាសាទព្រះវិហារ ដោយកាលនោះថៃបានឆ្លៀតដាក់ពង្រាយកងទ័ព និងមានការវាយប្រយុទ្ធគ្នាដណ្តើមប្រាសាទតាក្របីយកមកគ្រប់គ្រង។

ថ្វីបើបច្ចុប្បន្ននេះ សង្គ្រាមបានស្ងាត់យ៉ាងណាក្តី គេនៅតែពិបាកក្នុងការកែប្រែប្រាសាទតាក្របីឱ្យទៅជាតំបន់ទេសចរណ៍ ក៏ព្រោះថាប្រាសាទនេះ នៅចម្ងាយត្រឹម១៥ម៉ែត្រប៉ុណ្ណោះ ពីព្រំដែនថៃ ហើយជាតំបន់ទាហានគ្រប់គ្រង មានការដាក់ពង្រាយកងទ័ពរាងៗខ្លួនរវាងកម្ពុជា និងថៃ។

បើយោងតាមប្រវត្តិសាស្ត្រ ប្រាសាទតាក្របីកសាងឡើងក្នុងសតវត្សទី១១ និង ១២ ដើម្បីឧទ្ទិសដល់ព្រះឥសូរ ដោយមានឈ្មោះដើមថា ប្រាសាទព្រះដង្វាយ ស្ថិតនៅក្នុងដែនអធិបតេយ្យភាពរបស់កម្ពុជា៕

“ប្រុងពលី” គឺជាពិធីមួយ ដែលគេតែងប្រារព្ធឡើងដើម្បីជាការសែនព្រេន បួងសួង សុំសេចក្តីសុខសប្បាយ ពីម្ចាស់ទឹកម្ចាស់ដី។ ខណៈដែលពិធីនេះទៀតសោតគឺតែងលេចឡើងស្ទើរតែគ្រប់ពិធីសំខាន់ៗទាំងអស់ក្នុងសង្គមខ្មែរ មិនថាពិធីមង្គលការ ឡើងផ្ទះ និងពិធីបញ្ចុះសីមាជាដើម។

អ្នកដែលរស់នៅភ្នំពេញឬតាមខេត្តនានា គេតែងហៅកិច្ចខាងលើនេះថា «ក្រុងពាលី»,ឬ «សែនក្រុងពាលី» ដោយពន្យល់ថាក្រុងពាលីជាម្ចាស់ទឹកម្ចាស់ដី។ ប៉ុន្តែបើនៅខេត្តសៀមរាប គេតែងហៅកិច្ចនេះថា «ប្រុងពលី»។ ខណៈដែលកិច្ច“ប្រុងពលី ឬក្រុងពាលី” នេះគេធ្វើឡើងខុសៗគ្នាទាំងរបៀបនៃការធ្វើ និងការជ្រើសរើសពេលវេលា ឧទាហរណ៍សព្វថ្ងៃមានអ្នកខ្លះរហូតដល់ទៅធ្វើកិច្ចនេះពេលព្រឹកទៀតផងដែលពីមុនមកពុំដែលមាននោះទេ។

ពាក្យថា «ប្រុង» ដែលប្រើក្នុងកិច្ចពិធីមានន័យថា «រៀបចំ», «ធ្វើឲ្យមានសណ្តាប់» ជាដើម។ ឯ«ពលី»គឺសំដៅដល់ការបូជា ការថ្វាយ ការលះបង់ ឬវត្ថុជាគ្រឿងបូជា។ល។ ដូច្នេះហើយប្រុងពលី គឺមានន័យថាជាការរៀបចំពិធីបូជា បួងសួង សុំសេចក្តីសុខចម្រើន និងបណ្តេញនូវអព្វមង្គល។

ចំពោះពាក្យក្រុងពាលីវិញ៖ “ក្រុង” មានន័យថា “ស្តេច ឬម្ចាស់” រីឯ “ពាលី” គឺទាក់ទងនឹងរឿងទេពកថាព្រហ្មញ្ញសាសនា ដែលទេពកថានោះមានយក្សមួយឈ្មោះ “ពាលី” ដើរអួត ក្អេងក្អាង ថាខ្លួនខ្លាំង ដល់ភ្នាល់ចាញ់ព្រះនារាយណ៍ទៅក៏អត់ដីនៅ ព្រះនារាយណ៍ក៏ឲ្យទៅនៅក្រោមដី ព្រោះយក្សនោះខូចពេក។ ចំណែករឿងមួយទៀតក្នុងព្រះពុទ្ធសាសនាវិញ “ពលី” នោះ គឺពលីនាងគង្ហីង ជានិមិត្តរូបនៃដី ដោយកប់ពែ ដែលមានរូបស្នងធ្វើពីម្សៅអង្ករ ទៅក្នុងដីជម្រៅប្រមាណជាងមួយចំអាម។ ដូច្នេះ កាលណាដែលគេនិយាយពីក្រុងពាលី គឺអាចជាការឧទ្ទិសទៅដល់យក្ស ឬក៏នាងគង្ហីងនោះ។

តាមអត្ថន័យដែលបានរៀបរាប់ខាងលើនេះឃើញថា ប្រុងពលី និងក្រុងពាលី ជាពាក្យដែលមានទំនាក់ទំនងគ្នា ក្នុងពិធីបន់ស្រន់ សុំការអនុញ្ញាតធ្វើពិធីផ្សេងៗពីម្ចាស់ទឹកម្ចាស់ដី។ ប្រុងពលី សំដៅដល់ពិធីការ ខណៈក្រុងពាលី សំដៅដល់អ្នកទទួលផលពីពិធីការនោះ។ ជារួមមក កាលបើយើងនិយាយពីពិធី គប្បីហៅថា ពិធីប្រុងពលី តែបើចង់ប្រើពាក្យថា ក្រុងពាលី គប្បីប្រើថា ពិធីសែនក្រុងពាលី ព្រោះពាក្យថា សែន ក៏សំដៅដល់សកម្មភាពបូជា ថ្វាយ លះបង់ ដូចនឹងពាក្យថា ពលី ជាភាសាបាលីដែរ៕

នាពេលបច្ចុប្បន្ន បារីអេឡិចត្រូនិច ឬផលិតផល អេចន៍ ធី ភី (HTPs-Heated Tobacco Products) បានវាយលុកជាខ្លាំងចូលទៅកាន់គ្រឹះស្ថានសិក្សាសាធារណៈ និងឯកជន ដែលភាគច្រើនសិស្សលង់តាមការអូសទាញតាមបណ្តាញសង្គម ឬការតាមរយៈការផ្សព្វផ្សាយផ្សេងៗទៀតនៅក្នុងមជ្ឈដ្ឋានរស់នៅផ្ទាល់។

ជុំវិញករណីនេះ ក្រសួងអប់រំក៏បានចេញសេចក្តីណែនាំ ឱ្យមានការយកចិត្តទុកដាក់ខ្ពស់នៅក្នុងការគ្រប់គ្រង នៃការចែកចាយ និងប្រើប្រាស់បារីអេឡិចត្រូនិច នៅក្នុងគ្រឹះស្ថានសិក្សាសាធារណៈ និងឯកជន ដោយស្នើឱ្យធ្វើការអប់រំផ្សព្វផ្សាយឱ្យបានទូលំទូលាយតាមគ្រប់រូបភាពពីផលប៉ះពាល់នៃការប្រើប្រាស់បារីអេឡិច ត្រូនិក (E-Cigarette/Vape) និងផលិតផល អេចន៍ ធី ភី (HTPs-Heated Tobacco Products) ដល់បុគ្គលិកអប់រំនិងអ្នកសិក្សា។

មិនតែប៉ុណ្ណោះ ក្រសួងក៏បានហាមឃាត់ការប្រើប្រាស់ ការចែកចាយ ការជួញដូរ ការផ្សព្វផ្សាយពាណិជ្ជកម្មគ្រប់រូបភាពនូវបារី អេឡិចត្រូនិក (E-Cigarette/Vape) និងផលិតផល អេចន៍ ធី ភី (HTPs-Heated Tobacco Products) ខាងក្នុងនិងជុំវិញខាងក្រៅបរិវេណគ្រឹះស្ថានសិក្សា។

អ្វីដែលចាំបាច់ គឺត្រូវមានកិច្ចសហការជាមួយមាតា បិតា ឬអ្នកអាណាព្យាបាល បុគ្គលិកអប់រំ អ្នកសិក្សា និងអ្នកពាក់ព័ន្ធ ក្នុងការ កំណត់មុខសញ្ញា ទីតាំងចែកចាយ និងជួញដូរបារីអេឡិចត្រូនិក (E-Cigarette/Vape) និងផលិតផល អេចន៍ ធី ភី (HTPs-Heated Tobacco Products) ដើម្បីរាយការណ៍ជូនអាជ្ញាធរមានសមត្ថកិច្ច ចាត់វិធានការតាមផ្លូវច្បាប់ជាធរមាន។

គួរបញ្ជាក់ថា បារីអេឡិចត្រូនិច ឬផលិតផល អេចន៍ ធី ភី ជា មិនមែនជាឧបករណ៍សម្រាប់ផ្តាច់ការជក់បារីនោះទេ ប៉ុន្តែជាផលិតផលដែលមានផលប៉ះពាល់ដល់ សង្គម ក្រុមគ្រួសារ និងបង្កគ្រោះថ្នាក់ធ្ងន់ធ្ងរដល់សុខភាព ដូចជាបង្កជំងឺមហារីក ជំងឺសួត បង្កើនហានិភ័យជំងឺ បេះដូង ធ្វើឱ្យខួរក្បាលមានដំណើរការមិនប្រក្រតីក្នុងអំឡុងពេលប្រើប្រាស់និងប៉ះពាល់យូរអង្វែងដល់ការលូតលាស់ ខួរក្បាលរបស់កុមារនិងយុវវ័យ ព្រមទាំងបង្កអន្តរាយដល់រាងកាយ៕

នៅថ្ងៃទី៦ ខែមិថុនា ឆ្នាំ២០២៤ កំពង់ផែអន្តរជាតិកំពតដំណាក់កាលទីមួយ នឹងសម្ពោធដាក់ឱ្យប្រើប្រាស់ខាងមុខនេះក្រោមអធិបតីភាពដ៏ខ្ពង់ខ្ពស់សម្តេចធិបតី ហ៊ុន ម៉ាណែត ក្រោយចំណាយពេលសាងសង់៥ឆ្នាំ តាំងពីឆ្នាំ២០១៩ ក្នុងទំហំទឹកប្រាក់សាងសង់អស់១៤០លានដុល្លារ ។

កំពង់ផែអនេះ ស្ថិតនៅភូមិគីឡូ ១២ សង្កាត់កោះតូច ក្រុងបូកគោ ខេត្តកំពត ជាគម្រោងវិនិយោគដោយក្រុមហ៊ុនកំពតផត លើផ្ទៃដី២០៧ហិកតារបស់អ្នកឧកញ៉ា វិញ ហ៊ួរ។

កំពង់ផែនេះ ត្រូវសាងសង់ជាពីរជំហានធំៗគឺ៖

• • ជំហានទី១ ជាកំពង់ផែបម្រើដល់ការលើកដាក់ធ្យូងថ្ម ម្នាងសិលា និងវត្ថុធាតុដើមផ្សេងៗទៀត។ កំពង់ផែនេះបានបញ្ចប់ការសាងសង់នៅថ្ងៃទី២២ ខែកុម្ភៈ ឆ្នាំ២០១៨ ។ ចំណតផែជំហានទី១ នេះ មានទំហំ ៣៥០ម៉ែត្រ គុណនឹង ៣១.៥ម៉ែត្រ ទទឹងអាងសម្រាប់នាវាបង្វិលខ្លួនប្រវែង ១៤០ម៉ែត្រ និងមានជម្រៅទឹក ៦.៥ម៉ែត្រ អាចឱ្យនាវាមានចំណុះផ្ទុក ៥០០០ តោន ចូលចតបាន។ កំពង់ផែ ក៏បានបំពាក់ជញ្ជីងសម្រាប់ថ្លឹងរថយន្តចំណុះ ៧០ តោន ចំនួន មួយគ្រឿង។ កំពង់ផែជំហានទី១នេះ បានបន្តធ្វើប្រតិបត្តិការរហូតដល់បច្ចុប្បន្ន។

• • ជំហានទី២ ជាកំពង់ផែបម្រើដល់ការលើកដាក់ទំនិញទូទៅ កុងតឺន័រ និងអ្នកដំណើរ។ ក្រុមហ៊ុនបានទទួលលិខិតអនុញ្ញាតធ្វើប្រតិបត្តិការកំពង់ផែពីក្រសួងសាធារណការ និងដឹកជញ្ជូន ចុះថ្ងៃទី២៩ ខែកញ្ញា ឆ្នាំ២០២១។ កំពង់ផែនេះមានទំហំ ៤៥០ម៉ែត្រ គុណនឹង ៣០ម៉ែត្រ និងជម្រៅទឹកពី ១០ម៉ែត្រ ទៅ ១២ម៉ែត្រ អាចឱ្យនាវាមានចំណុះផ្ទុក ១០ ០០០ តោន ចូលចតបាន និងមានឃ្លាំងសម្រាប់ស្តុកទំនិញធំទូលាយទំហំ ៥០ម៉ែត្រ គុណនឹង ២០០ម៉ែត្រ និងទីលានផ្ទុកកុងតឺន័រលើផ្ទៃដីទំហំ ១០០ ហិកតា៕

បន្ទាប់ពីកំពូលតារាចម្រៀងទេពបូព្រឹក្សបានបញ្ចេញ MV ថ្មីៗក្តៅៗនៅលើបណ្តាញសង្គមកាលពីពេលកន្លងមកនេះគឺឃើញថាសន្ទុះនៃការគាំទ្រដ៏ច្រើនមហាសាលគឺបានលេចឡើងនៅក្នុងចំណោមពលរដ្ឋខ្មែរគ្រប់ៗរូប។ ទោះជាយ៉ាងណា ភាពចម្រូងចម្រាស់ផ្នែកវប្បធម៌ប្រពៃណីរវាងជនជាតិខ្មែរនិងថៃគឺនូវតែមិនទាន់រលប់បាត់នៅឡើយនោះទេ ទើបបានបង្កឲ្យមានការវែកញែក ប្រៀបធៀបរវាងនាគរាជ្យនៃប្រទេសទាំង២។

កាលពីថ្ងៃទី២៦ ខែឧសភា ឆ្នាំ២០២៤នេះ នៅលើបណ្តាញសង្គមហ្វេសបុកនិងយូធូបផ្លូវការរបស់អ្នកនាងទេព បូព្រឹក្ស គឺបានបង្កឲ្យមានការចាប់អារម្មណ៍ និងស្ងើចសរសើរយ៉ាងខ្លាំងទៅលើ MV ថ្មីរបស់នាង គឺបទ«ទេវរាជ» ដែលនិពន្ធផ្ទាល់ដោយគូរស្នេហ៍ខ្លួនគឺលោកងួន ចាន់ដាវីត។ MV នៃបទចម្រៀង«ទេវរាជ»ដែលបានឆ្លុះបញ្ចាំងអំពីពង្សាវតាខ្មែរតាំងពីសតវត្សទី១នៃ សម័យនគរគោកធ្លកតរៀងមក សម័យចេតឡា សម័យអង្គរ រួមមានទាំងព្រលឹងជាតិខ្មែរ គឺរបាំអប្សរា និងប្រាសាទអង្គរវត្ត។

អ្វីដែលកាន់តែចាប់អារម្មណ៍ខ្លាំងបំផុតនោះគឺទៅលើឈុតឆាកមួយដែលអ្នកនាងទេព បូព្រឹក្ស បានគ្រងឈុតជាព្រះនាងសោមា ឬព្រះនាងនាគ កាលពីសម័យនគរភ្នំឬនគរគោកធ្លកនោះ។ បន្ថែមពីនេះ គេសង្កេតឃើញវត្តមានស្តេចនាគដ៏មានរិទ្ធិអំណាចក៏បាននឹងកំពុងបង្ហាញខ្លួនជាមួយគ្នានោះដែរ ហើយក៏បានក្លាយទៅជាប្រធានបទគួរជាទីចាប់អារម្មណ៍បំផុត។

ការបង្ហាញខ្លួននាគរាជ្យក្បាល៧យ៉ាងមានអំណាច ជាមួយនឹងបច្ចេកទេស Graphic Design ដ៏អស្ចារ្យបំផុតក្នុងប្រវត្តិសាស្រ្តនៃការបង្ហាញខ្លួននាគរាជ្យខ្មែរ ពី MV កំពូលតារាចម្រៀងស្រីរូបនេះ បានបង្កឲ្យមានការស្ងើចសរសើរពីសាធារណៈជនខ្មែរមិនដាច់ពីមាត់។ ទោះជាយ៉ាងណា បើទោះបីជាមានមតិគាំទ្រយ៉ាងច្រើនផុលផុសបែបនេះក្តី នាគរាជ្យខ្មែរលើកនេះក៏នូវតែទទួលរងនូវមតិវាយប្រហារ ដោយគេបានធ្វើការប្រៀបធៀបជាមួយនឹងនាគរាជ្យរបស់ប្រទេសជិតខាងក្នុងរឿង«ព្រះម៉ែនាគី»ដែលបានផលិតឡើងកាលពីឆ្នាំ២០១៦។

ជាមួយគ្នានេះ មហាជនមួយចំនួនក៏បានចូលទៅបញ្ចេញមតិថា«ទោះបីថៃផលិតនៅឆ្នាំ2016ក្តី ក៏នៅតែនិយាយអំពីខ្មែរដដែលហ្នឹង»។ អ្នកខ្លះថា«នាគខ្មែរយើងដែល ទេព បូព្រឹក្ស បានបង្ហាញពិតជាស្អាត មានលក្ខណៈជាខ្មែរដែលឧស្សាហ៍ឃើញនៅតាមវត្តអារាមនិងគំនូរក្នុងវិហារព្រះពុទ្ធសាសនាខ្មែរយើង ។ បើធៀបនិងរូបនាគថៃនេះមានលក្ខណៈខុសគ្នា តែថៃគេបាន update graphic នាគឲ្យមើលទៅដូចជាសត្វនាគពិតៗជាងយើង ខាងយើងនៅលក្ខណៈជាគំនូរច្រើនជាង សង្ឃឹមយើងអាច បន្ត update graphic នាគយើងឲ្យកាន់តែពិតៗ»។

អ្នកខ្លះទៀតថា«យោងតាមការសិក្សាបុរាណវិទ្យា ប្រវត្តិសិល្បៈខ្មែរបាននិយាយពន្យល់អំពីចម្លាក់នាគរបស់ខ្មែរដែលបានទទួលឥទ្ធិពលសិល្បៈឥណ្ឌា គ្រាន់តែខ្មែរយកមកកែច្នៃកែលម្អរ ដល់ចម្លាក់នាគឱ្យមានគ្រឿងអលង្ការដែលខុសពីសិល្បៈនាគឥណ្ឌា។សត្វនាគជាប្រភេទស្តេចពស់ដែលមាននៅក្នុងទេវកថាហើយមានតម្លៃនិមិត្តរូបជាច្រើន មានក្បាល 1-3-5-7-9»៕

បន្ទាប់ពីអ្នកបង្កើតមាតិកា A Dose of Cath បានកាត់វីដេអូស្រង់សម្តីមួយផ្នែករបស់ម្តាយខ្លួនតារាចម្រៀង ម៉ានិត បងប្រុស ម៉ានុត ចេញមកឆ្លើយតបទៅកាន់ A Dose of Cath យ៉ាងវែងអន្លាយប្រកបដោយសម្តីចិត្តត្រជាក់តែមុតស្រួចទៅកាន់អ្នកបង្កើតមាតិការូបនេះ។ ម៉ានិត និយាយដោយក្តីសង្ឃឹមទៅកាន់ A Dose of Cath សម្លឹងមើលឱ្យបានគ្រប់ជ្រុងជ្រោយមុននឹងបញ្ចេញមតិ និងជូនពរឱ្យនាងមានអ្នកគាំទ្រកាន់តែច្រើន និងអាចស្វែងរកអ្នកដែលស្រលាញ់នាងស្មោះស្ម័គ្រមួយនឹងមួយដូចឪពុកម្ដាយរបស់លោក។

កាលពីយប់ថ្ងៃទី២៤ ឧសភា អ្នកបង្កើតមាតិកា A Dose of Cath បានបង្ហោះវីដេអូជាង៥នាទីដោយដាក់ចំណងជើងថា «គ្រាន់តែស្តាប់ទៅហត់ណាស់ ធ្វើរឿងទាំងអស់នេះដើម្បីចងចិត្តគេ ដើម្បីផ្គាប់ចិត្តគេ»។ វីដេអូដែលរូបនាងយកមកភ្ជាប់យកមកបង្កើតចេញជាមាតិកាមួយនេះត្រូវបានគេដឹងថាជាក្រុមគ្រួសាររបស់តារាចម្រៀង ម៉ុង ម៉ានុត។ វីដេអូមួយនេះបានបង្កឱ្យមានការចាប់អារម្មណ៍យ៉ាងខ្លាំង ខណៈ ជា ស្រីនា និងលោក ជា វណ្ណារិទ្ធ ក៏បានចូលទៅបញ្ចញមតិឱ្យគោរពតាមការសម្រេចចិត្តរបស់មនុស្សម្នាក់ៗព្រោះគ្រួសារនីមួយៗរស់នៅមិនដូចគ្នាឡើយ។

ទន្ទឹមនឹងនេះតារាចម្រៀង ម៉ានិត ដែលទើបបង្ហាញខ្លួននៅកម្រាលព្រំក្រហមមហោស្រពភាពយន្តកានបានចូលទៅឆ្លើយតបនៅក្នុងវីដេអូនោះដោយសម្តីយ៉ាងត្រជាក់ទៅកាន់ A Dose of Cath ប៉ុន្តែដោយភាពមុតស្រួច ខណៈបានទម្លាយពីជីវិតម្តាយរបស់ខ្លួនមានជំងឺប៊ិះស្លាប់ថែមទៀត។

ម៉ានិត បានចូលទៅខម្មិនលើវីដេអូរបស់ A Dose of Cath ថា «សួស្ដី Cath ខ្ញុំឈ្មោះម៉ានិត ហើយស្ត្រីនៅក្នុងវីដេអូដែលcathស្ដាប់គាត់ទៅមានអារម្មណ៍ហត់នេះជាម្ដាយរបស់ខ្ញុំ។ មាតិកាដែលអ្នកបង្កើតពិតជាល្អណាស់ ដែលភាគច្រើននិយាយពីសមភាពយេនឌ័រ និងឯករាជ្យភាពក្នុងភាពជាស្ត្រី ឬមាតិកាអំពីសុខភាពផ្លូវភេទដែលប្រជាជនខ្មែរគួរដឹង។ ខ្ញុំដឹងច្បាស់ថាខេតមិនបានមើលវីដេអូសម្ភាសម្ដាយឪពុកខ្ញុំដល់ចប់ឡើយ បើតាមស្ដាប់ការរៀបរាប់របស់អ្នក»។

តារាចម្រៀងនិងជាអ្នកនិពន្ធរូបនេះ បានបន្ថែមថា «ម្ដាយរបស់ខ្ញុំបាននិយាយអំពីវិធីចងចិត្តប្ដី ដោយមើលថែផ្ទះសម្បែង ឬម្ហូបអាហារជាដើម។ បើស្ដាប់តែមួយកំណាត់ ពិតជាមើលទៅដូចជាស្ត្រីមួយរូបនេះមិនធ្វើអ្វីសម្រាប់ខ្លួនឯងសោះ ខ្លាចប្ដីក្បត់មានស្រី ទើបប្រឹងធ្វើគ្រប់យ៉ាងដើម្បីបុរស ដូចដែលអ្នកបានរៀបរាប់ក្នុងវីដេអូខាងលើ។ ម្ដាយរបស់ខ្ញុំជាស្ត្រីដែលឆ្លងកាត់ជំងឺគ្រុនឈាមប៊ិះស្លាប់ម្ដង ការវះកាត់ពីរដងដោយសារជំងឺមហារីកស្បូន និងមហារីកសុដន់។ គាត់បានកាត់ស្បូន និងដោះមួយចំហៀងចោល។ ភាពជាស្ត្រីភាពរបស់គាត់គឺនៅសល់តែដោះមួយចំហៀង និងក្ដីស្រលាញ់ដ៏ធំធេងចំពោះស្វាមី និងកូនៗ៣នាក់។ ក្ដីស្នេហារបស់ពួកគាត់គឺសាមសិបឆ្នាំហើយ ដែលនេះជាហេតុផលដែលគេអញ្ជើញពួកគាត់ទៅស្វែងយល់ពីជីវិតអាពាហ៍ពិពាហ៍ជីវិតគូជោគជ័យរបសពួកគាត់ ទាំងដែលម្ដាយខ្ញុំនៅសល់តែសុដន់មួយចំហៀងជិត១០ឆ្នាំក្រោយនេះ។ នេះជាអ្វីដែលម្ដាយខ្ញុំសំដៅលើ ទោះបីជាគាត់ឈឺធ្ងន់ឈឺច្រើន គ្មានភាពជាស្ត្រីពេញលក្ខណៈដើម្បីបំពេញចិត្តប្ដី តែឪពុកខ្ញុំមិនដែលក្បត់ម្ដាយខ្ញុំសូម្បីម្ដង។ ព្រោះក្ដីស្រលាញ់ពិតមិនឋិតនៅលើក្ដីសុខផ្លូវភេទតែមួយមុខនោះទេ។ លើសពីនេះ ក្ដីស្រលាញ់ជាការផ្ដល់ឱ្យដោយមិនចង់បានអ្វីត្រលប់ទៅវិញ it must be earn ឯជីវិតគូគឺជាជីវិតដែលមិនអាត្មានិយម។ ភាពអាត្មានិយមក្នុងជីវិតគូ គឺឆ្ពោះទៅការចែកផ្លូវ លែងលះ និងនាំបញ្ហាដល់កូនៗ។ ការលះបង់គ្រប់យ៉ាងរបស់ម្ដាយខ្ញុំចំពោះឪពុកខ្ញុំ គឺការលះបង់ដោយភាពពេញចិត្ត ឯឪពុកខ្ញុំក៏បានលះបង់ជាច្រើនសម្រាប់គ្រួសារ និងជួយភរិយាពេញដៃពេញជើងរៀងរាល់ចុងសប្ដាហ៍នៅហាង និងមើលថែថ្នាំសង្កូវ ឈឺថ្កាត់រត់ឆ្លងប្រទេសសឹងមួយជីវិតទៅហើយ។ លទ្ធផលដែលទទួលបាន គឺជីវិតគូចិត្តស្មោះមួយនិងមួយ កូនៗធំឡើងប្រកបដោយសុខភាពកាយ និងចិត្តពេញលេញបរិបូរណ៍ នាំកិត្តិយសដល់គ្រួសារ ខ្លួនឯង និងប្រទេសជាតិ។ គ្មានអ្វីដែលបានល្អ ដោយគ្មានការលះបង់ឡើយ»។

ម្ចាស់បទ«មិត្តចេះប្រច័ណ្ឌ»រូបនេះលើកឡើងទៀតថា «ការគិតពីខ្លួនឯងតែម្យ៉ាង គឺមានផលល្អសម្រាប់តែខ្លួនឯង តែជីវិតយើងមិនអាចរស់នៅម្នាក់ឯងឡើយ។ នេះហើយទើបគេបង្រៀនឱ្យយើងចេះស្រលាញ់ គោរព ស្មោះត្រង់ចំពោះមនុស្សនៅជុំវិញខ្លួន មិនតែគូស្វាមីភរិយាប៉ុណ្ណោះទេ។ ការប្រឹងប្រែងរបស់ឪពុកម្ដាយខ្ញុំកន្លងមក ដើម្បីគ្រួសារបានផលហើយរាល់ថ្ងៃនេះ ម្ដាយខ្ញុំមានពេលសម្រាកគ្រប់គ្រាន់ សប្បាយចិត្ត កូនៗរឹងមាំ មានរបរនឹងនរស្របច្បាប់ និងអាចដើរលេងជុំវិញពិភពលោកដោយងាយ។ នេះគឺដោយសារតែការដាក់ទុនលះបង់កន្លងមក មើលថែផ្ទះ មើលថែកូន ធ្វើការរកលុយ អាហារល្អៗ បរិស្ថានរស់នៅល្អសម្រាប់សុខភាពគ្រួសារ ដោយរួមចំណែកពីឪពុករបស់ខ្ញុំគ្រប់ភារកិច្ច។ Everything must be earn»។

ម៉ានិត បានបន្ថែមចុងក្រោយដោយសំណេរមុតស្រួចថា «ខ្ញុំសង្ឃឹមថាអ្នកបង្កើតមាតិកាមានឥទ្ធិពលដូចខេត នឹងសម្លឹងមើលឲ្យបានគ្រប់ជ្រុងជ្រោយមុននឹងបញ្ចេញមតិ ព្រោះខ្ញុំជឿថាមនុស្សឆ្លាតដូចជាខេត ពិតជាចង់បញ្ជៀតគំនិតវិជ្ជមានដល់អ្នកមើលមាតិការបស់អ្នក។ ខ្ញុំជូនពរខេតឱ្យមានអ្នកគាំទ្រកាន់តែច្រើន និងអាចស្វែងរកអ្នកដែលស្រលាញ់ខេតស្មោះស្ម័គ្រមួយនិងមួយដូចឪពុកម្ដាយខ្ញុំ»៕