ប្រទេសអៀរឡង់ ៖ បើនិយាយពីទីក្រុងដែលបានបាត់បង់ពីផែនទីពិភពលោក មនុស្សភាគច្រើននឹងនឹកឃើញដល់ទីក្រុងដ៏ល្បីឈ្មោះមួយ គឺ Atlantis ដែលទស្សនវិទូក្រិកបុរាណតែងតែលើកយកមកនិយាយមុនគេ ។ ប៉ុន្តែកាលពីបុរាណ មានទីកន្លែងមួយគួរឱ្យចាប់អារម្មណ៍មិនចាញ់ទីក្រុង Atlantis គឺកោះឈ្មោះ Hy-Brasil ឬហៅខ្លីៗថា កោះ Brasil ដែលគេជឿថា កោះនេះស្ថិតនៅទិសខាងលិចប្រទេសអៀរឡង់ ។

គេបាននិយាយថា កោះ Brasil បានបង្ហាញក្នុងផែនទីពិភពលោក លើកដំបូងកាលពីឆ្នាំ១៣២៥ ហើយក៏ក្លាយជារឿងដំណាលរបស់អ្នកធ្វើដំណើរតាមកប៉ាល់នាសម័យនោះ ។ មនុស្សភាគច្រើនជឿថា កោះនេះជាទីតាំងរបស់មនុស្សមានអរិយធម៌ទំនើប និងមានទ្រព្យសម្បត្តិយ៉ាងច្រើនមហាសាល ។

តាមធម្មតា កោះ Brasil ពុំបានបង្ហាញឱ្យមនុស្សទូទៅឃើញឡើយ ហើយគេពុំដឹងថា តើកោះនេះត្រូវបានលិចទៅក្រោមបាតសមុទ្រ ឬមានអ័ព្ទក្រាស់គ្របដណ្តប់គ្រប់ពេលវេលានោះទេ ។ ម្យ៉ាងទៀត កោះនេះនឹងបង្ហាញរូបរាងឱ្យគេឃើញតែម្តងប៉ុណ្ណោះក្នុងរយៈពេល៧ឆ្នាំ ប៉ុន្តែបើអ្នកណាម្នាក់អាចឡើងទៅលើកោះនេះបាន អ្នកនោះនឹងត្រឡប់មកវិញជាមួយកំណប់យ៉ាងច្រើនជាប់ខ្លួន ។

បើតាមឯកសារបញ្ជាក់ថា អ្នកមានសំណាងបានឃើញកោះមួយនេះញឹកញាប់បំផុត គឺអ្នកនិពន្ធម្នាក់ឈ្មោះ លោក T. J. Westropp ដែលអះអាងថា ខ្លួនបានឃើញកោះអាថ៌កំបាំងនេះ ចំនួន៣លើក ។ លោក T. J. Westropp និយាយថា ពេលឃើញកោះនេះលើកទី៣ កាលពីឆ្នាំ១៨៧២ លោកបាននាំម្តាយ និងមិត្តភក្តិជាច្រើននាក់ឡើងទៅលើកោះនេះទៀតផង ។

កាលពីសម័យបុរាណ មានមនុស្សជាច្រើនបានព្យាយាមស្វែងរកកោះនេះ ហើយនាពេលបច្ចុប្បន្ន ក៏មានអ្នកបុរាណវិទូ និងអ្នកស្រាវជ្រាវផ្នែកភូមិសាស្ត្រជាច្រើននាក់បានព្យាយាមស្វែងរកការបកស្រាយថា ការពិត តើកោះនេះមានដើមកំណើត និងប្រវត្តិដូចម្តេចខ្លះ? ហេតុអ្វីបានជាកោះកម្របង្ហាញរូបរាងឱ្យមនុស្សទូទៅឃើញ? ប៉ុន្តែគ្មានភស្តុតាង១០០% បញ្ជាក់ថា កោះនេះមានពិតប្រាកដទេ ។

អ្នកស្រាវជ្រាវនិយាយថា កោះនេះធ្លាប់មានពិតប្រាកដនៅលើផែនដី ប៉ុន្តែដោយសារកម្រិតទឹកសមុទ្រឡើងខ្ពស់ រួមផ្សំនឹងការបាក់ដីបានធ្វើឱ្យកោះធ្លាក់ទៅក្រោមបាតសមុទ្រ ។ រីឯមតិខ្លះទៀតនិយាយថា ដោយសារពន្លឺថ្ងៃចាំងទៅលើផ្ទៃទឹកសមុទ្រ ទើបធ្វើឱ្យមនុស្សម្នាឃើញរូបភាពខុសធម្មតា ។ ក្រោយមក នៅឆ្នាំ១៨៦០ ដោយសារភាពមិនច្បាស់លាស់ ទើបកោះនេះត្រូវបានគេលុបចេញពីផែនទីពិភពលោក ។

បើតាមរឿងតំណាលឱ្យដឹងថា នៅលើកោះ Brasil មានហ្វូងទន្សាយពណ៌ស-ខ្មៅ និងមានបុរសចំណាស់ម្នាក់រស់នៅប្រាសាទថ្ម ។ បុរសចំណាស់នេះតែងតែផ្តល់មាសប្រាក់ និងទ្រព្យសម្បត្តិយ៉ាងច្រើនទៅអ្នកណាដែលអាចធ្វើដំណើរមកដល់កោះនេះ ។ ដូច្នេះ ទើបធ្វើឱ្យអ្នកជិះកប៉ាល់តាមសមុទ្រភាគច្រើននាំគ្នាស្វែងរកកោះ ប៉ុន្តែកម្រមានអ្នកណាបានឃើញកោះនេះណាស់ ដោយសារកោះមានអ័ព្ទគ្រប់ពេលវេលា ។

អ្វីគួរឱ្យចាប់អារម្មណ៍បំផុតពាក់ព័ន្ធនឹងទីតាំងរបស់កោះ Brasil គេជឿថា កោះនេះស្ថិតនៅត្រង់ទឹករាក់កណ្តាលសមុទ្រភាគពាយ័ព្យប្រទេសអៀរឡង់ និងនៅក្បែរតំបន់ Porcupine Bank ។ បើតាមភស្តុតាងផ្នែកភូមិសាស្ត្របង្ហាញថា កាលពីមុន កោះនេះធ្លាប់មានផ្ទៃដីធំទូលាយជាងពេលបច្ចុប្បន្ន ។

បើទោះជាពេលវេលាបានកន្លងផុតទៅអស់៧០០ឆ្នាំក្តី ប៉ុន្តែគ្មានអ្នកស្រាវជ្រាវណាម្នាក់អាចបញ្ជាក់ពីប្រវត្តិរបស់កោះនេះច្បាស់លាស់ទេ ហើយវាបានក្លាយជាកោះដែលគេដំណាលបន្តគ្នារហូតមក ដែលមានរឿងរ៉ាវគួរឱ្យចាប់អារម្មណ៍ជាច្រើនកើតឡើងនៅលើកោះ ។ ប៉ុន្តែគេសង្ឃឹមថា នៅថ្ងៃណាមួយ អ្នកជិះកប៉ាល់ និងអ្នកប្រវត្តិសាស្ត្រនឹងអាចរកឃើញកោះមួយនេះ ៕

អ្នកអត្ថាធិប្បាយបាល់ទាត់ Admin ជីងចក់ បានបង្ហោះលិខិតសូមទោសជាសាធារណៈទៅកាន់សមាគមឧកញ៉ាបន្ទាប់ពីនិយាយរិះគន់ទៅកាន់អ្នកមានងារឧកញ៉ាមួយចំនួនបានប្រើប្រាស់ងារនេះទៅប្រព្រឹត្តនូវកំហុស និង ទង្វើផ្ទុយច្បាប់ដែលបណ្តាលឱ្យប្រជាពលរដ្ឋរងទុក្ខវេទនា។ Admin ជីងចក់ បានទទួលស្គាល់ថាពាក្យសម្តីនេះបានធ្វើឱ្យប៉ះពាល់ដល់កត្តិយស និង សេចក្តីថ្លៃថ្នូររបស់ឧកញ៉ាត្រឹមត្រូវ។ ទន្ទឹមនឹងការសូមទោសរបស់អ្នកអត្ថាធិប្បាយបាល់ទាត់រូបនេះដែរអ្នកលេងបណ្តាញសង្គមជាច្រើនបែរជាកោតសរសើរ Admin ជីងចក់ ដែលហ៊ាននិយាយបែបនេះ ខណៈអ្នកផ្សេងទៀតថាពាក្យសម្តីពិតគេបដិសេធគេចូលចិត្តតែពាក្យពីរោះតែក្លែងក្លាយ។

នៅយប់ថ្ងៃទី២៧ ខែឧសភា Admin ជីងចក់ បានបង្ហោះលិខិតសូមទោសដោយបានដាក់ចំណងជើងថា «ខ្ញុំជីងចក់ សូមធ្វើការសូមទោសទៅកាន់ សមាគមឧកញ៉ាកម្ពុជា និងលោកអ្នក ឧកញ៉ាប្រធានសមាគម ដែលមានខ្លឹមសារដូចខាងក្រោម»។ ក្នុងលិខិតនោះមានខ្លឹមសារយ៉ាងដូច្នេះថា «ខ្ញុំបាទឈ្មោះ ជឿន ចក់ ភេទប្រុស សញ្ជាតិខ្មែរ ឆ្នាំកំណើត១៩៨៨ មានទីលំនៅភូមិម្សាក្រងជើង ឃុំម្សាក្រង ស្រុកស្ទោង ខេត្តកំពង់ធំ ។ សូមគោរពជូនលោកអ្នកឧកញ៉ា ប្រធានសមាគមឧកញ៉ាកម្ពុជា
កាលពីថ្ងៃទី ២៣ ខែមីនា ឆ្នាំ ២០២៤ ដែលមានគណនីឈ្មោះ ជីង ចក់ TV (ទំព័រហ្វេសប៊ុក) បានធ្វើការផ្សាយផ្ទាល់នូវវីដេអូខ្លីមានរយៈពេល ៣នាទី និង ២២វិនាទីលើ (ទំព័រហ្វេសប៊ុក) ដោយមានខ្ញុំបាទ ឈ្មោះ ជឿន ចក់ ហៅថា ជីង ចក់ ជាអ្នកអត្ថាធិប្បាយ, វិភាគ និង រិះគន់ យ៉ាងខ្លាំងទៅលើបុគ្គលមួយចំនួនដែល មានងារជាឧកញ៉ា ដោយបានប្រើប្រាស់ងារជាឧកញ៉ាទៅប្រព្រឹត្តនូវកំហុស និង ទង្វើផ្ទុយច្បាប់ដែលបណ្តាលឱ្យ ប្រជាពលរដ្ឋរងទុក្ខវេទនា ថែមទាំងបានធ្វើឱ្យប៉ះពាល់ដល់កត្តិយស និង សេចក្តីថ្លៃថ្នូររបស់ឧកញ៉ាត្រឹមត្រូវ ដោយ ក្នុងការបកស្រាយរបស់ខ្ញុំបាទគ្រានោះ មានពាក្យពេចន៍ខ្លះពិតជាបានបង្កើតឲ្យមានកំហុសដោយអចេតនា ដែលនាំ ឱ្យប៉ះពាល់ជារួមដល់កិត្តិនាម និងសេចក្តីថ្លៃថ្នូររបស់ សមាគមឧកញ៉ាកម្ពុជា មែន ព្រោះថា ខ្ញុំបាទមិនមានការ យល់ដឹងច្បាស់លាស់ទៅនឹងពាក្យថាគោរមងារឧកញ៉ា ដែលជាគោរមងារកិត្តិយសផ្តល់ដោយព្រះមហាក្សត្រ ទ្រង់ព្រះ រាជទានដោយព្រះរាជក្រឹត្យ ទៅតាមលំដាប់ថ្នាក់ ដល់រូបវន្តបុគ្គលដែលជាប្រជាពលរដ្ឋខ្មែរមានគុណបំណាច់ក្នុងការ ចូលរួមអភិវឌ្ឍន៍ និង កសាងជាតិ ហើយងារជាឧកញ៉ាពុំមានឥទ្ធិពលអាចយកទៅប្រើប្រាស់សម្រាប់រកស៊ីបោកប្រាស់ប្រជាពលរដ្ឋបានទេ»។

លិខិតដដែលមានអត្ថន័យទៀតថា «ខ្ញុំបាទពិតជាមានការសោកស្តាយជាពន់ពេក ដែលបានបង្កើតនូវកំហុសអចេតនាមួយនេះឡើង នៅ ក្នុងពេលវេលានេះផងដែរខ្ញុំបាទបានដឹងកំហុស ហើយសូមលំឱនកាយ លើកម្រាមដៃដប់ ដើម្បីសូមទោសជាសាធារណៈ និងជាពិសេស ដល់ លោកអ្នកឧកញ៉ាប្រធាន ចំពោះកំហុសដោយអចេតនារបស់ខ្ញុំបាទ ។ ខ្ញុំបាទសូម សន្យាថានឹងឈប់ឱ្យមានការផ្សព្វផ្សាយ ឬ និយាយប៉ះពាល់ដល់កិត្តិយស ឬ បរិហាកេរ្តិ៍ នៃគោរមងារឧកញ៉ា តទៅ ទៀតហើយ ចាប់ពីពេលនេះតទៅ ព្រមទាំងខ្ញុំបាទសូមធ្វើការលុបនូវឃ្លីបវីដេអូខ្លីដែលបានចេញផ្សាយកាលពីថ្ងៃទី ២៣-៣-២០២៤ នៅលើ (ទំព័រហ្វេសប៊ុក ជីង ចក់ TV) ចោលឱ្យអស់ រួមទាំងដំណរភ្ជាប់ទៀតផងដែរ ។ ខ្ញុំបាទសង្ឃឹមថា លោកអ្នកឧកញ៉ា ប្រធានសមាគមឧកញ៉ាកម្ពុជា ពិតជាមានក្តីមេត្តា ផ្តល់ភាពសណ្តោសអភ័យ និង ព្រមទាំងយកនូវការសូមអភ័យទោសអំពីខ្ញុំបាទ សូម លោកអ្នកឧកញ៉ាប្រធាន ទទួលនូវកាគោរពដ៏ខ្ពង់ខ្ពស់អំពីខ្ញុំបាទ»។

ទន្ទឹមនឹងការសូមទោសរបស់ Admin ជីងចក់ ដែលបានប្រើសម្តីរិះគន់ឧកញ៉ាមួយចំនួនយកងារនេះទៅប្រើប្រាស់ក្នុងរូបភាពអវិជ្ជមាន ងាកទៅកាន់អ្នកលេងបណ្តាញសង្គមជាច្រើនបានចូលទៅកោតសរសើរទៅកាន់អ្នកអត្ថាធិប្បាយបាល់ទាត់រូបនេះនិងលើកឡើងថារូបគេនៅខាងAdmin ជីងចក់។ គណនីខ្លះក៏បានសរសើរថារូបលោកហ៊ាននិយាយពាក្យពិតទៅលើបញ្ហានេះ ចំណែកឯអ្នកខ្លះទៀតលើកឡើងថា ពាក្យសម្តីពិតគេបដិសេធគេចូលចិត្តតែពាក្យពីរោះតែក្លែងក្លាយ៕

លោក ថូមីត ដែលជាពិធីករនៅក្នុងកម្មវិធី The Thomith Show ត្រូវរងមតិរិះគ.ន់ពីសាធារណជនបន្ទាប់ពីអង្គុយគងអន្ទាក់ខ្លាសម្ភាសលោក សុខ ចាន់ផល អ្នកនិពន្ធដ៏ល្បីល្បាញមួយរូបដែលត្រូវចាត់ទុកថាជារៀមច្បងនិងជាចាស់ទុំម្នាក់។ ការរិះគន់នេះដែរជំរុញចិត្តអ្នកនិពន្ធអ្នកស្រី ម៉ីនសន សុធារី បានលើកឡើងថាការអង្គុយគងអន្ទាក់ខ្លារបស់ ថូមីត មិនខុសទាស់អីទេប៉ុន្តែយើងត្រូវមើលលើភាគីគូសន្ទនារបស់យើងដែរបើទម្លាក់ជើងមកវិញកាន់តែល្អ។

ប៉ុន្មានថ្ងៃមកនេះលោក ថូមីត បានធ្វើឱ្យអ្នកលេងបណ្តាញសង្គមរសើបបញ្ចេញមតិរិះគន់បន្ទាប់ពីបង្ហាញឥរិយាបថគងអន្ទាក់ខ្លាសម្ភាសលោក សុខ ចាន់ផល ដែលអញ្ជើញជាភ្ញៀវកិត្តិយសចូលរួមចែករំលែកនូវចំណេះដឹង ការលើកទឹកចិត្ត ចំណង់ចំណូលចិត្ត បទពិសោធន៍ និងឆន្ទៈហ៊ានដើរតាមក្ដីស្រមៃជាអ្នកនិពន្ធដែលបានចាក់ផ្សាយកាលពីថ្ងៃទី១៧ ឧសភា កន្លងមកនេះ។

ឥរិយាបថរបស់លោក ថូមីត ជាពិធីករសម្របសម្រួលនៅក្នុងកម្មវិធីហើយអង្គុយបែបនេះធ្វើឱ្យមានមតិវែកញែកយ៉ាងច្រើនដោយមតិថា រស់នៅខ្មែរគួរគោរពទៅកាន់ចាស់ទុំជារៀមច្បង មិនអាចអង្គុយខ្វះសុជីវធម៌បែបនេះឡើយមិនមែនរស់នៅអ៊ឺរ៉ុបនោះទេ ខណៈអ្នកខ្លះក៏មានមតិយោបល់ផ្សេងៗជាច្រើនទៀត។

ជាមួយគ្នានេះដែរងាកទៅកាន់អ្នកនិពន្ធមួយរូបគឺអ្នកស្រី ម៉ីសន សុធារី ក៏បានចូលរួមជាមតិយោបល់របស់ខ្លួនដូចគ្នា។

ម្ចាស់ស្នាដៃប្រលោមលោកដ៏ល្បី «ថ្ងៃមុនស្អប់ ថ្ងៃនេះស្រលាញ់» បានសរសេរនៅលើបណ្តាញសង្គមរបស់ខ្លួននៅថ្ងៃទី២៥ ឧសភា ថា«និយាយមែន មិនខ្វះទេ សហគ្រិនជាច្រើនដែលខ្ញុំជួបសម្ភាស! ភាគច្រើនចូលចិត្តអង្គុយគងអន្ទាក់ខ្លាណាស់ ប៉ុន្តែសមឬមិនសមគឺទស្សនិកជនជាអ្នកសង្កេតខ្លួនឯង។ គំនិតខ្ញុំវិញ វាអាស្រ័យទៅលើទិដ្ឋភាពជាក់ស្ដែង ដូចករណីប្អូន Thomit ខ្ញុំគិតថា អត់ខុសទាស់អីទេ ដែលគាត់អង្គុយបែបហ្នឹងធ្វើបទសម្ភាស ប៉ុន្តែបើសិនជា គូភាគីសន្ទនារបស់គាត់ទម្លាក់ជើងធ្វើចរិតសុភាពរាបសាហើយ មិនថាគាត់ចាស់ឬក្មេងជាង ខ្ញុំគិតថា បើសិនជា ប្អូនទម្លាក់ជើងមកវិញក៏កាន់តែល្អ»។

អ្នកស្រី ម៉ីសន សុធារី បន្ថែមទៀតថា «និយាយជារួម វាមិនមែនជាទោសអីទេនៅក្នុងការអង្គុយគងអន្ទាក់ខ្លាបង្កើននូវទំនុកចិត្ត ស្វែងរកសំណួរធ្វើបទសម្ភាស ប៉ុន្តែយើងត្រូវមើលលើភាគីគូសន្ទនារបស់យើងដែរ»។

គួរបញ្ជាក់ថា កម្មវិធី The Thomith Show ជារឿយៗត្រូវបានទស្សនិកជនមួយចំនួនបញ្ចេញមតិរិះគន់ទៅលើបញ្ហាផ្សេងៗ ប៉ុន្តែក្រឡេកទៅលើភាពវិជ្ជមានវិញកម្មវិធីនេះផ្តល់ជូននូវបទពិសោធន៍ ចំណេះដឹងបន្ថែមទៀតពីភ្ញៀវកិត្តិយសដែលបានចូលរួមច្រើនផ្នែកទាំងសិល្បករ សិល្បការិនី កីឡាករបាល់ទាត់ រួមទាំងវិស័យចុងភៅនិងវិស័យផ្សេងៗជាច្រើនទៀត៕

កាលពីយប់ថ្ងៃទី២៧ ខែឧសភា ឆ្នាំ២០២៤នេះ នៅលើបណ្តាញសង្គមផ្លូវការរបស់អ្នកនាងដេត ម៉ាលីណា គឺបានធ្វើឡាយបកស្រាយអំពីវិ.បត្តិគ្រួសាររបស់ខ្លួននាពេលកន្លងមក ខណៈរហូតមកទល់ពេលនេះគឺនូវតែមិនទាន់មានដំណោះស្រាយ និងគ្មា.នយុត្តិធ.ម៌ឲ្យខ្លួនទាល់តែសោះ។

ការឡាយបកស្រាយរបស់អ្នកនាងដេត ម៉ាលីណា ដែលមានរយៈពេល៥៥នាទី និងទទួលបាននូវកម្លាំងចិត្តពីសាធារណៈជនខ្មែរយ៉ាងច្រើនរាប់មិនអស់។ ទោះជាយ៉ាងណា អ្វីដែលកាន់តែចាប់អារម្មណ៍និងក្តុកក្តួលខ្លាំងបំផុតតាមរយៈការឡាយនោះដោយសង្កេតឃើញថា នៅនាទីចុងក្រោយ បានលេចនូវវត្តមានកូនប្រុសទី២របស់ខ្លួន គឺលោកឌួង ម៉ាណាវីត មករៀបរាប់ទាំងទឹកភ្នែកហាក់ឈឺចិត្ត ត្បិតអាណិតម្តាយផង អាណិតខ្លួនឯងផង ដែលបានទទួលរងសម្ពាធពីឪពុកខ្លួន។

ជាមួយគ្នានេះ កាលពីម្សិលមិញដដែល បើយោងតាមសំណេររបស់អ្នកនាងដេត ម៉ាលីណា បានភ្ជាប់មកជាមួយនឹងសំណុំឯកសារផ្លូវច្បាប់ ទាក់ទងនឹងអតីតស្វាមីរបស់ខ្លួន ដែលមានខ្លឹមសារថា៖ «នាងខ្ញុំសូមធ្វើការបកស្រាយជូន បងប្អូនដូចខាងក្រោម នេះជាការពិត មិនបានប្រឌិត ឡើយ…កាលពីចុងឆ្នាំ២០២០ នាងខ្ញុំបានព្រមព្រៀងលែងលះជាមួយអតីតប្ដី ហើយសាលាដំបូងរាជធានីភ្នំពេញ បានចេញដីកាសម្រេចតាមការព្រៀមព្រៀង និងបែងចែកកូនទាំង ៣ (បី) នាក់ កូនទី១ ឈ្មោះ ឌួង គឹមវិសាល ,កូនទី២ ឈ្មោះ ឌួង ម៉ាណាវីត កូនទី៣ ឈ្មោះ ឌួង រាជនីគុជ បានផ្ទល់សិទ្ធិមកឲ្យខ្ញុំជាអ្នកមានសិទ្ធិអំណាចមេបាលើកូនទាំង ៣ (បី) នាក់ ព្រមទាំងផ្ទះ ហាង និងលុយចំនួន……… ជាកម្មសិទ្ធិ និងជាអ្នកគ្រប់គ្រងថែរក្សា»។

អ្នកនាងបន្តថា «ចាប់តាំងពីសាលាដំបូងរាជធានីភ្នំពេញ បានសម្រេចចូលជាស្ថាពររួចមក នាងខ្ញុំនៅតែមិនមានសិទ្ធិជួបកូនៗដដែល ព្រោះខាងឪពុកមិនព្រមប្រគល់កូនមកឲ្យនាងខ្ញុំជាអ្នកមានសិទ្ធិអំណាចមេបាលើកូនទៀត ហើយបានហាមនាងខ្ញុំគ្រប់វិធីធ្វើយ៉ាងណាគឺមិនឲ្យនាងខ្ញុំជួបកូនបាន។ ក្រោយមកនាងខ្ញុំបានដាក់ពាក្យសុំអនុវត្តលើដីកាសម្រេចដើម្បីទាមទារកូនមកនៅជាមួយវិញ ក៏នៅតែខាងឪពុកនោះមិនព្រមប្រគល់កូនមកឲ្យនាងខ្ញុំទៀត»។

«អ្វីដែរខ្ញុំអយុត្តិធម៌បំផុតមកលើរូបនាងខ្ញុំនោះគឺថា កូនខ្ញុំមិនបានទទួលយកមកគ្រប់គ្រងផង មិនទាន់បានជួបមុខកូនៗជាទីស្រឡាញ់ផង ក៏ត្រូវបានខាងឪពុករូបនោះបានប្ដឹងទាមទារកូនទាំង ៣ (បី) នាក់ជាអ្នកមានសិទ្ធិអំណាចមេបាវិញ ដោយគាត់ទាំងមានប្រពន្ធថ្មីរួចទៅហើយនោះ? តើមានឪពុកណាអមនុស្សធម៌យ៉ាងដូច្នេះ? តើការចេញដីកាសម្រេចដែលបានសម្រេចកូនទាំង ៣ (បី) នាក់ ប្រគល់សិទ្ធិអំណាចមេបាទៅឪពុកដែលមានគ្រួសារថ្មីនោះ តើចៅក្រម នៅសាលាដំបូងរាជធានីភ្នំពេញ ដែលបានសម្រេចមានបាន ពិនិត្យ សួរនាំកូនៗរបស់នាងខ្ញុំថាចង់ទៅរស់នៅក្រោមដំបូលផ្ទះជាមួយឪពុកដែលមានប្រពន្ធថ្មីនោះ ដែរឬទេ?»

«នាងខ្ញុំបង្ហោះសារនេះគឺដើម្បីឲ្យបានដឹងដល់ថ្នាក់ដឹកនាំ ជាពិសេសនៅសាលាឧទ្ធរណ៍ភ្នំពេញ មុនសម្រេចសុំឲ្យពិនិត្យ និងពិចារណា តាមភស្ដុតាងដែរនាងខ្ញុំបានដាក់ជូនផង ខ្ញុំសង្ឃឹមថានៅសាលាឧទ្ធរណ៍ភ្នំពេញ ពិនិត្យ និងសម្រេចប្រគល់កូនៗទាំង ៣ (បី) នាក់ មកឲ្យនាងខ្ញុំមានសិទ្ធិអំណាចមេបាលើកូនទាំង ៣ (បី) នាក់ វិញ ខ្ញុំនឹកកូនខ្លាំងណាស់។

អ្នកនាងក៏បន្តទៀតថា«ខ្ញុំបែកកូនភឺលនិងកូនឌុបតាំងពីថ្ងៃ 09.06.2023, ដល់ពេលនេះ ជិត1ឆ្នាំហើយប៉ុន្មានថ្ងៃទៀត1ឆ្នាំគត់ តើកូនខ្ញុំភ្លេចមុខខ្ញុំជាម្ដាយហើយមើលទៅ អារម្មណ៍ម្ដាយនិងយាយបែកកូនពីរនាក់អស់រយះពេល 1ឆ្នាំយូរណាស់ពិបាកចិត្តណាស់និងមិនដឹងពេលណាបានជួបកូនវិញខ្ញុំខំសម្តែងធ្វើរឹងមាំធម្មតាឡាយលក់ធម្មតា អ្នកធ្វើម្ដាយគេគឺយល់អារម្មណ៍នេះថាវាឈឺចាប់ប៉ុនណាសូម្បីតែសំលេងក៌មិនដឹងនិយាយជាមួយកូនតាមណាកុំថាជួបមុខកូនខ្ញុំ។ ខ្ញុំសូមបញ្ជាក់ថាការរក្សាកូនទាំងពីរ រហូតមកដល់ពេលបច្ចុប្បន្ននេះអស់រយះពេល1ឆ្នាំ ជាសកម្មភាពនៃការមិនគោរពតាមដីកាសម្រេច ហើយចុងក្រោយនាងខ្ញុំមានតែម្រាមដៃដប់ទេ ដែលពឹងទៅលើប្រពន្ធ័ផ្លូវច្បាប់និងជួយរកយុត្តិធម៍អោយខ្ញុំអោយបានឆាប់»។

ទោះជាយ៉ាងណា ទាំងនេះគឺគ្រាន់តែការបកស្រាយរបស់អ្នកនាងដេត ម៉ាលីណាតែម្ខាង ហើយចំពោះការពិតយ៉ាងណានោះ មានតែរងចាំមើលការបកស្រាយពីសំណាក់លោកដួង ឆាយ ដែលត្រូវជាអតីតស្វាមីផងដែរ៕