មនុស្សមួយចំនួនមានការងឿយឆ្ងល់ថាតើការជិះរថយន្តអគ្គិសនីអាចប្រឈមនឹងគ្រោះថ្នាក់ដល់អាយុជីវិតដែរឬទេ នៅពេលដែលយើងបើកក្នុងអាកាសធាតុភ្លៀងផ្គររន្ទះបែបនេះ? ខណៈអ្នកខ្លះជឿថាការជិះរថយន្តអគ្គិសនីគឺអាចបណ្តាលឱ្យឆក់។ ទោះជាយ៉ាងណាបើយោងតាម Get Green Now ការជិះរថយន្តអគ្គិសនីពេលមេឃភ្លៀងមិនបណ្តាលឱ្យឆក់នោះទេ ហើយក៏មិនបណ្តាលឱ្យមានគ្រោះថ្នាក់ដល់ជីវិតដែរ។ រថយន្តអគ្គិសនីគឺដូចគ្នាទៅនឹងរថយន្តសាំង នៅពេលជួបនឹងភ្លៀងផ្គររន្ទះ ពួកគេគឺមានសុវត្ថិភាពខ្លាំងណាស់ក្នុងការធ្វើដំណើរនៅអាកាសធាតុមានព្យុះ។

យានជំនិះគ្រប់ប្រភេទ រួមទាំងរថយន្តអគ្គិសនី ត្រូវបានរចនាឡើងតាមគោលការណ៍ទ្រុង Faraday ដែលជាវាលអេឡិចត្រូម៉ាញេទិកសរុបនៅខាងក្នុងរថយន្តគឺសូន្យ។ រចនាសម្ព័ន្ធបិទជិតរបស់រថយន្ត វ៉ុលត្រូវបានបង្កើតតែលើផ្ទៃ ហើយបន្ទាប់មកបែកខ្ញែកស្មើៗគ្នាទៅនឹងដី។ លើសពីនេះ រថយន្តអគ្គិសនីក៏ត្រូវបានបំពាក់ដោយមុខងារត្រួតពិនិត្យវ៉ុលផងដែរ នេះនឹងជួយរកឃើញវ៉ុលលើស ប្រសិនបើរថយន្តត្រូវរន្ទះបាញ់ វ៉ុលនឹងការពារថ្មដោយស្វ័យប្រវត្តិ ការពារហានិភ័យនៃការដាច់សៀគ្វី និងភ្លើង ដូច្នេះហើយរថយន្តទាំងអស់មិនងាយនឹងរន្ទះបាញ់ទេ។

ទោះបីជារថយន្តអគ្គិសនីមិនមានគ្រោះថ្នាក់អំឡុងពេលបើកក្នុងអាកាសធាតុព្យុះភ្លៀងក៏ដោយ ក៏មនុស្សមួយចំនួននៅតែឆ្ងល់ថាតើវាមានសុវត្ថិភាពក្នុងការសាកថ្មពេលមានព្យុះឬទេ? សម្រាប់ចម្លើយនោះគឺ ស្រដៀងគ្នាទៅនឹងការបើកបរដែរ។ ការសាកថ្មរថយន្តអគ្គិសនីនៅផ្ទះ ឬនៅស្ថានីយ៍សាកថ្មសុទ្ធតែត្រូវបានធានាផងដែរនូវសុវត្ថិភាពខ្ពស់ ទោះបីជាស្ថិតក្នុងស្ថានភាពភ្លៀងធ្លាក់ខ្លាំង ឬរន្ទះក៏ដោយ។ ស្ថានីយ៍សាកថ្ម និងប្រព័ន្ធសាកថ្មត្រូវបានរចនាឡើងជាមួយនឹងមុខងារការពាររន្ទះ។

លើសពីនេះ វាក៏ការពារការខូចខាតធ្ងន់ធ្ងរនៅក្នុងព្រឹត្តិការណ៍នៃបាតុភូតដូចជា សៀគ្វីខ្លី ឬការផ្ទុះភ្លាមៗអំឡុងពេលសាកថ្មផងដែរ។ ហើយកញ្ចប់ថ្មរបស់យានជំនិះអគ្គិសនីតែងតែមានទីតាំងនៅក្រោមរថយន្ត ដែលជួយកាត់បន្ថយចំណុចកណ្តាលនៃទំនាញ និងធ្វើអោយស្ថេរភាពប្រសើរឡើង។ ទន្ទឹមនឹងនេះរូបរាងរបស់រថយន្តអគ្គិសនីក៏ការពារមិនឱ្យទឹកចូលក្នុងបន្ទប់ថ្ម សំបកខាងក្រៅការពារគ្រឿងអេឡិចត្រូនិច និងចំណុចទំនាក់ទំនងសំខាន់ៗ។ ហេតុនេះអ្នកមិនចាំបាច់បារម្ភអំពីសុវត្ថិភាពរបស់រថយន្តអគ្គិសនីទៀតទេ ព្រោះវាត្រូវបានការពារយ៉ាងល្អឥតខ្ចោះ៕

ត្រីមួយប្រភេទអាចលោតផុតពីផ្ទៃទឹករហូតដល់៣០ម៉ែត្រ ប្រសិនបើមាន សត្រូ.វ ដេញធ្វើបា.ប ឬមានហេតុការណ៍អាស.ន្ន កើតឡើង ។ វានឹងប្រញាប់ហែលទឹកយ៉ាងលឿនបំផុត បន្ទាប់មក វាក៏លោតឱ្យផុតពីផ្ទៃទឹក ដោយត្រដាងព្រុយនៅសងខាងខ្លួនរបស់វាឱ្យធំ ដែលមើលទៅស្រដៀងគ្នានឹងសត្វចាប ឬយន្តហោះកំពុងចេញដំណើរ ។ ហេតុនេះ ទើបគេដាក់ឈ្មោះវាថា ត្រីហើរ (Flying Fish) ។

លើសពីនេះ ក្នុងអំឡុងពេលលោតចេញពីទឹក វានឹងលាតសន្ធឹងកន្ទុយរបស់វាព្រមគ្នា ដើម្បីគ្រប់គ្រងកម្រិតការហោះហើរ ។ រីឯរូបរាងរបស់ត្រីហើរ គឺវាមានដងខ្លួនមូលវែង, មាត់តូច, គ្មានធ្មេញ និងមានព្រុយរឹង ។ ព្រុយត្រចៀកបានលាតសន្ធឹងរហូតដល់ព្រុយខ្នង ខណៈព្រុយកន្ទុយរបស់វាមានរាងដូចសម ដោយព្រុយទាំងសងខាងមិនស្មើគ្មាទេ គឺព្រុយផ្នែកខាងក្រោមវែងជាងខាងលើ ។

ត្រីហើរ ត្រូវបានគេចាត់ទុកថា គឺជាត្រីមានទំហំតូច និងមានប្រវែងមិនលើសពី៣០សង់ទីម៉ែត្រ ។ ត្រីប្រភេទនេះភាគច្រើនរស់នៅក្នុងសមុទ្រត្រូពិច និងសមុទ្រក្នុងតំបន់ក្តៅទូទាំងពិភពលោក ហើយវាតែងរស់នៅក្នុងផ្ទៃទឹកស្ថិតនៅមិនឆ្ងាយប៉ុន្មានពីឆ្នេរសមុទ្រ ។ ត្រីហើរភាគច្រើនមានដងខ្លួនពណ៌បៃតង ឬពណ៌ខៀវស្រអាប់ ខណៈពោះវាពណ៌ប្រាក់ ។

វាជាត្រីមានលក្ខណៈពិសេសខុសប្លែកពីត្រីផ្សេងៗ ហើយវាតែងតែប្រមូលផ្តុំគ្នាជាហ្វូង ព្រមទាំងស្វែងរកចំណីនៅជិតផ្ទៃទឹក ។ ត្រីហើរមានភាពរហ័សរហួន ប៉ុន្តែពេលវាផ្អើល ឬចង់គេចពីហេតុការណ៍អាក្រក់ វានឹងលោតចេញពីទឹកឡើងទៅលើក្នុងកម្ពស់រហូតដល់៣០ម៉ែត្រ គឺស្រដៀងនឹងយន្តហោះកំពុងហោះឡើង ឬដូចសត្វស្លាប ។

ទោះយ៉ាងណា វាអាចលោតផុតពីទឹកបានខ្ពស់ ឬទាប គឺអាស្រ័យលើទំហំដងខ្លួន និងពេលវេលា ។ វាប្រើប្រាស់ព្រុយត្រចៀកដែលមានទំហំធំខ្លាំង ដើម្បីជួយឱ្យវាអាចលោតឡើងលើបានខ្ពស់ ខណៈត្រីខ្លះទៀតក៏មានព្រុយធំនៅរន្ធគូទផងដែរ ។ គេបានប្រទះឃើញត្រីហើរប្រមាណ៥០ប្រភេទក្នុងទឹកសមុទ្រទូទាំងពិភពលោក ។

ត្រីហើរអាចលោតបានជាមធ្យម គឺចាប់ពីកម្ពស់៧ម៉ែត្រ ទៅ១០ម៉ែត្រ និងមានល្បឿនប្រមាណ៦៥គីឡូម៉ែត្រក្នុង១ម៉ោង ។ វាអាចនៅស្ងៀមលើអាកាសបានយូរបំផុតចំនួន១០វិនាទី ។ ក្រោយពីបន្តពូជរួច វាបានបញ្ចេញពងនៅក្រោមស្មៅ ឬកាកសំណល់អណ្តែតតាមទឹក ដើម្បីឱ្យកូនៗរបស់វាញាស់នៅទីនេះ ៕

សហរដ្ឋអាមេរិក ៖ នៅថ្ងៃទី៦ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ពលរដ្ឋរស់នៅរដ្ឋចំនួន២៥ របស់សហរដ្ឋអាមេរិកបានឆ្លងមេរោគ «Salmonella» ពីផ្លែតាសក់ និងបណ្តាលឱ្យមានរោគសញ្ញាពុលចំណីអាហារ ។ អាជ្ញាធររាយការណ៍ថា មានអ្នកឆ្លងជំងឺនេះយ៉ាងហោចណាស់ ចំនួន១៦២នាក់ ក្នុងនោះមនុស្ស៥៤នាក់មានអាការៈធ្ងន់ធ្ងរត្រូវបញ្ជូនទៅព្យាបាលនៅមន្ទីរពេទ្យ ។

មន្ត្រីមកពីមជ្ឈមណ្ឌលគ្រប់គ្រង និងបង្ការជំងឺរបស់អាមេរិក ព្រមទាំងមន្ត្រីសុខាភិបាលរបស់រដ្ឋចំនួន២៥ ក៏ដូចជាមន្ត្រីនៅក្រុងវ៉ាស៊ីនតោន បានបង្កើនការស្វែងរកប្រភពផ្ទុះឡើងនៃមេរោគ Salmonella ពាក់ព័ន្ធនឹងផ្លែតាសក់ ក្រោយពីអ្នកឆ្លងមេរោគនេះមានរោគសញ្ញាពុលអាហារចំនួន១៦២នាក់ ក្នុងនោះមនុស្ស៥៤នាក់ត្រូវបញ្ជូនទៅមន្ទីរពេទ្យ ។

ចំណែកលទ្ធផលការស្រាវជ្រាវជំហានដំបូងបង្ហាញថា មេរោគនេះទំនងជានៅលាយឡំជាមួយផ្លែតាសក់របស់ក្រុមហ៊ុន Fresh Star Produce ។ ហេតុនេះ អាជ្ញាធរបានប្រកាសប្រមូលផ្លែតាសក់មកវិញ ដែលគេបានដាក់លក់នៅរដ្ឋចំនួន១៤ កាលពីដើមខែមិថុនា ឆ្នាំ២០២៤ ។

ទោះយ៉ាងណា អាជ្ញាធរអាមេរិកនឹងត្រួតពិនិត្យយ៉ាងលម្អិត ដើម្បីស្វែងរកមូលហេតុពិតប្រាកដនៃការឆ្លងមេរោគ Salmonella ។ មេរោគនេះអាចបង្កគ្រោះថ្នាក់ធ្ងន់ធ្ងរដល់អាយុជីវិត ជាពិសេស កុមារ, អ្នកមានសុខភាពខ្សោយ និងមនុស្សចាស់ ខណៈអ្នកមានរាងកាយរឹងមាំ ពេលឆ្លងមេរោគនេះនឹងកើតគ្រុនក្តៅ, រាគរូស, ក្អួតចង្អោរ, វិលមុខ និងឈឺពោះ ។ រីឯអ្នកខ្លះទៀត មេរោគនេះបានចូលក្នុងសរសៃឈាម និងកើតអាការៈធ្ងន់ធ្ងរ ។

គេបានប្រទះឃើញពលរដ្ឋអាមេរិកឆ្លងមេរោគនេះលើកដំបូង កាលពីថ្ងៃទី១១ ខែមីនា ឆ្នាំ២០២៤ ។ ក្រោយមក វាបានឆ្លងរាតត្បាតជាបន្តបន្ទាប់ រហូតដល់ពាក់កណ្តាលខែឧសភា ឆ្នាំ២០២៤ ក្នុងទីក្រុងវ៉ាស៊ីនតោន, រដ្ឋអាឡាំបាម៉ា, អាខាន់ស៊ុស, ផ្លររីដា, ម៉ាសាជូសេត, មីឈីហ្គេន, ញូវយ៉ក, មីនីសូតា, អូហៃអូ, ផេនស៊ីឡាវ៉ានៀ, ថឺននេសស៊ី, តិចសាស់, វីជីនៀ និងរដ្ឋជាច្រើនទៀត ។

ជាមួយគ្នានេះ ភ្នាក់ងារ Centers for Disease Control and Prevention (CDC) និង Food and Drug Administration (FDA) ក៏បានស្រាវជ្រាវពីការឆ្លងរាតត្បាតរបស់មេរោគ Salmonella មួយករណីទៀតដែរ ដែលមានមនុស្សឆ្លងចំនួន១៥៨នាក់ នៅរដ្ឋ២៣ ដើម្បីពិចារណាថា តើការឆ្លងមេរោគទាំងពីរករណីនេះពាក់ព័ន្ធនឹងអាហារដូចគ្នាដែរឬទេ ៕

ជាការពិតណាស់មនុស្សស្រីមួយចំនួនតែងគិតថា បុរសដែលព្យួរសោរថយន្តនៅចង្កេះខោគឺចង់បានការចាប់អារម្មណ៍ពីនារី និងដើម្បីឱ្យដឹងថាគេមានឡានជិះ។ ទោះជាយ៉ាងណាការគិតបែបនេះគឺមិនត្រឹមត្រូវនោះទេ តាមពិតការព្យួរសោរថយន្តនៅចង្កេះខោគឺមានអត្ថយោជន៍ជាច្រើន ដែលមនុស្សស្រីមិនដឹង។ ដូច្នេះនៅក្នុងអត្ថបទនេះនឹងប្រាប់អ្នកពីមូលហេតុដែលមនុស្សប្រុសចូលចិត្តព្យួរសោរថយន្តនៅចង្កេះខោ៖

១.ជួយការពារការភ្លេចភ្លាំង៖ មនុស្សប្រុសជាច្រើនតែងមានទម្លាប់យកសោរថយន្តរបស់ពួកគេដាក់នៅជុំវិញចង្កេះខោ។ នេះគឺជាទីតាំងដែលអាចមើលឃើញយ៉ាងងាយស្រួល និងងាយស្រួលក្នុងការដោះស្រាយ ដោយរបៀបទុកដាក់បែបនេះនឹងជួយការពារការភ្លេចភ្លាំង ប្រសិនបើអ្នកទុកសោនៅកន្លែងផ្សេងទៀតនោះអ្នកនឹងភ្លេច។ ជាលទ្ធផលបុរសជាច្រើនតែងចូលចិត្តយកសោរថយន្តរបស់ខ្លួនដាក់ជាប់នឹងចង្កេះ។

២.ងាយស្រួលក្នុងការរើស និងប្រើប្រាស់៖ មិនមែនគ្រប់សោរថយន្តទាំងអស់សុទ្ធតែដូចគ្នានោះទេ ដោយសោខ្លះចាក់រថយន្តដោយផ្ទាល់ ហើយខ្លះទៀតបញ្ជា។ ការដាក់សោរថយន្តនៅចង្កេះធ្វើឱ្យអ្នកប្រើងាយស្រួលក្នុងការយក ដោយមិនចាំបាច់ចូលទៅក្នុងហោប៉ៅខោរបស់អ្នកទេ ឬការស្វែងរកវានៅក្នុងកាបូបរបស់អ្នកធ្វើឱ្យអ្នកឈឺក្បាល គ្រាន់តែដោះវាចេញពីចង្កេះខោ នោះអ្នកនឹងអាចប្រើវាបានភ្លាម។

៣.កាត់បន្ថយការខូចខាតដល់ហោប៉ៅខោ៖ សោរថយន្តមួយចំនួននៅតែជាសោដែលមានរាងស្រួច អាចធ្វើឱ្យហោប៉ៅខោខូច ឬធ្លុះ។ ដូច្នេះការព្យួរសោរថយន្តនៅចង្កេះខោ គឺអាចជួយកាត់បន្ថយការខូចខាតដល់ខោ។ លើសពីនេះទៀតវានឹងធ្វើឱ្យអ្នកមានអារម្មណ៍ស្រួល ហើយការអង្គុយក៏ងាយស្រួលដែរ។ បន្ថែមពីនេះវាក៏ជួយកាត់បន្ថយការកោស ឬការខូចខាតដែលអាចកើតមានលើសោផងដែរ។

៤.ការពារការចុចប៊ូតុងដោយចៃដន្យ៖ សោបច្ចុប្បន្នគឺជាសោបញ្ជាពីចម្ងាយ ប្រសិនបើទុកក្នុងហោប៉ៅខោ ឬកាបូបស្ពាយ អាចត្រូវបានប៉ះពាល់ដោយឧបករណ៍ផ្សេងទៀត ធ្វើឱ្យឧបករណ៍នោះប៉ះនឹងសោចុចប៊ូតុងដោយចៃដន្យ បណ្តាលឱ្យឡានបើកដោយខ្លួនឯង។ ដូច្នេះការទុកដាក់សោនៅចង្កេះរបស់អ្នកអាចការពារការចុចប៊ូតុងដោយចៃដន្យ៕

ប្រទេសហ្វីលីពីន ៖ អាជ្ញាធរហ្វីលីពីនបានជម្លៀសពលរដ្ឋរស់នៅក្បែរភ្នំភ្លើង និងលុបចោលជើងហោះហើរផងដែរ ក្រោយពីភ្នំភ្លើង Kanlaon ដែលស្ថិតនៅចំណុចកណ្តាលប្រទេសហ្វីលីពីន បានផ្ទុះជាថ្មីរយៈពេល៦នាទី កាលពីថ្ងៃទី៣ ខែមិថុនា ឆ្នាំ២០២៤ ។

សារព័ត៌មាន Bloomberg រាយការណ៍ថា ភ្នាក់ងារតាមដានគ្រោះមហន្តរាយជាតិរបស់ហ្វីលីពីន បានប្រកាសដាស់តឿនពលរដ្ឋអំពីគ្រោះថ្នាក់បណ្តាលមកពីការផ្ទុះភ្នំភ្លើង Kanlaon កម្រិត២ ក្នុងចំណោម៥កម្រិត ព្រមទាំងបញ្ជាក់ថា ភ្នំភ្លើងនេះបានផ្ទុះនៅត្រង់ចំណុចកំពូលស្ថិតនៅប្រជុំកោះ Negros ។

វិទ្យាស្ថានផ្នែកភ្នំភ្លើង និងរញ្ជួយដីហ្វីលីពីនបានបញ្ជាក់ក្នុងរបាយការណ៍ចុងក្រោយ ដែលចេញផ្សាយកាលពីថ្ងៃទី៣ ខែមិថុនា ថា ការផ្ទុះភ្នំភ្លើងនេះបានបង្កើតផ្សែងភ្លើងសាយភាយឡើងទៅលើបរិយាកាស រហូតដល់ជាង៥គីឡូម៉ែត្រ ហើយវាបង្កើតកំដៅចាប់ពី២គីឡូម៉ែត្រ ទៅ៣គីឡូម៉ែត្រ ចុះពីលើភ្នំទៅទិសខាងត្បូង និងទិសអាគ្នេយ៍ ។ កំដៅនេះលាយឡំជាមួយឧស្ម័នក្តៅខ្លាំង, ផេះ និងកំទេចថ្មភ្នំភ្លើងដែលផ្ទុះចេញមក និងហូរទៅបរិវេណជុំវិញភ្នំយ៉ាងឆាប់រហ័ស ។

កន្លងមក អាជ្ញាធរហ្វីលីពីនពុំបានប្រកាសឱ្យពលរដ្ឋជម្លៀសចេញពីតំបន់ភ្នំភ្លើងទេ ប៉ុន្តែលើកនេះ ភ្នំភ្លើង Kanlaon បានផ្ទុះអស់រយៈពេល៦នាទី និងបណ្តាលឱ្យកំទេចភ្លើងធ្លាក់រាយប៉ាយនៅបរិវេណជុំវិញ ទើបអាជ្ញាធរបង្កើនការជម្លៀសពលរដ្ឋ យ៉ាងហោចណាស់ចំនួន២.៨០០នាក់ ទៅកាន់ជម្រកបណ្តោះអាសន្ន ។

សារព័ត៌មាន GMA News របស់ហ្វីលីពីនរាយការណ៍ថា លោក Jose Subasco អភិបាលក្រុងខាឡេអន បានបញ្ជាឱ្យជម្លៀសពលរដ្ឋរស់នៅក្បែរតំបន់ភ្នំភ្លើង ប្រមាណ៣គីឡូម៉ែត្រ ទៅ៤គីឡូម៉ែត្រ ។ រីឯក្រុមហ៊ុនអាកាសចរណ៍ Philippine Airlines និងក្រុមហ៊ុន Cebu Pacific បានប្រកាសលុបចោលជើងហោះហើរជាច្រើនក្នុងប្រទេស ។

គួរបញ្ជាក់ថា Kanlaon គឺជាភ្នំភ្លើងមានកម្ពស់ខ្ពស់បំផុតនៅប្រជុំកោះ Negros និងជាភ្នំខ្ពស់បំផុតនៅប្រជុំកោះ Visayas ។ វាមានកម្ពស់២.៤៦៥ម៉ែត្រ លើសកម្រិតទឹកសមុទ្រ និងជាភ្នំខ្ពស់ក្នុងលំដាប់ទី៤២ លើពិភពលោក ។ កាលពីខែធ្នូ ឆ្នាំ២០១៧ ភ្នំនេះធ្លាប់បានផ្ទុះម្តងហើយ ៕

ប្រទេសអ៊ីស្រាអែល ៖ កាលពីថ្ងៃទី១ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា អ្នកស្រាវជ្រាវនៅសាកលវិទ្យាល័យមួយបានប្រកាសផ្តល់ប្រាក់ចំនួន១០លានដុល្លារអាមេរិកដល់អ្នកអាចទំនាក់ទំនងជាមួយសត្វ ឬអាចនិយាយជាមួយសត្វយល់គ្នាទៅវិញទៅមក ។

ក្រុមអ្នកស្រាវជ្រាវមកពីសាកលវិទ្យា Tel Aviv University នៅប្រទេសអ៊ីស្រាអែលប្រកាសថា ពួកគេនឹងផ្តល់ប្រាក់រង្វាន់ដល់ការស្រាវជ្រាវអំពីសត្វ ឬបុគ្គលណាម្នាក់ដែលអាចរកវិធីទំនាក់ទំនងជាមួយសត្វណាមួយ មិនថា ឆ្មា, ឆ្កែ ឬសត្វផ្សេងទៀត ។

ពួកគេកំណត់ថា វិធីទំនាក់ទំនងជាមួយសត្វនេះ គឺត្រូវពិសោធន៍ឱ្យឃើញថា បុគ្គលនោះអាចទំនាក់ទំនងតាមបែប Two-way Inter-species Communication ។ បើនិយាយងាយៗ គឺត្រូវបង្ហាញឱ្យឃើញថា បុគ្គលនោះ និងសត្វអាចយល់ពីគ្នាទៅវិញទៅមក ឬដូចគ្នានឹងមនុស្សជជែកជាមួយមនុស្ស ។

ចំណែកការផ្តល់ប្រាក់រង្វាន់រហូតដល់១០លានដុល្លារអាមេរិកសម្រាប់អ្នកឈ្នះ គឺដើម្បីឱ្យយកប្រាក់នេះទៅបន្តការស្រាវជ្រាវអំពីសត្វ ឬប្រកបអាជីវកម្ម ។ ហេតុនេះ បើបុគ្គលណាម្នាក់ទទួលបានជោគជ័យក្នុងការប្រកួត គេនឹងចាត់ទុកថា គឺជាការរីកចម្រើនផ្នែកបច្ចេកវិទ្យាមួយលើពិភពលោក ។

ទោះយ៉ាងណា ពួកគេពុំបានកំណត់អ្វីច្រើនទេក្នុងការទំនាក់ទំនងជាមួយសត្វ គឺអ្នកចូលរួមប្រកួតអាចប្រើប្រាស់វិធីអ្វីក៏បាន ដើម្បីពិសោធន៍ពីការទំនាក់ទំនងជាមួយសត្វបានពិតប្រាកដ ។ លើសពីនេះ អ្នកចូលរួមប្រកួតអាចប្រើប្រាស់បច្ចេកវិទ្យា AI មកជួយបាន ហើយការផ្តល់រង្វាន់ជាប្រាក់ដ៏ច្រើនសន្ធឹកសន្ធាប់នេះ ក្នុងគោលបំណងទាក់ទងបេក្ខជនមកចូលរួមប្រកួតឱ្យបានច្រើន ។

ហេតុនេះ បើបេក្ខជនណាអាចទំនាក់ទំនងជាមួយសត្វបានមុនគេ គឺនឹងទទួលជ័យជម្នះក្នុងការប្រកួតខាងលើ ព្រមទាំងទទួលយករង្វាន់ធំផងដែរ ។ ក្រោយពីការប្រកាសស្វែងរកអ្នកមានសមត្ថភាពពិសេស វាធ្វើឱ្យមហាជនចាប់អារម្មណ៍យ៉ាងខ្លាំងពីរង្វាន់ធំ ប៉ុន្តែមតិខ្លះនិយាយថា ពួកគេជជែកជាមួយឆ្មានៅផ្ទះពុំដឹងរឿងផងថា វាត្រូវការអ្វី ៕