ប្រទេសចិន ៖ តំបន់ឧទ្យានជាតិចាងជៀជៀ (Zhangjiajie National Park) ដ៏ស្រស់ស្អាតអស្ចារ្យនៅលើជ្រលងភ្នំ Avatar ខេត្តហ៊ូណាន ប្រទេសចិន បានក្លាយទៅជាតំបន់ទេសចរណ៍ដ៏ពេញនិយមយ៉ាងខ្លាំងរបស់ពលរដ្ឋចិន និងភ្ញៀវទេសចរមកពីគ្រប់ទិសទី ។ .jpg)
មូលហេតុដែលធ្វើឱ្យមនុស្សភាគច្រើនហៅជ្រលងភ្នំនេះថា Avatar ពីព្រោះជ្រលងភ្នំនេះ ធ្លាប់ត្រូវបានគេប្រើប្រាស់សម្រាប់ថតភាពយន្តដ៏ល្បីល្បាញលើពិភពលោក គឺរឿង Avatar ។ ដូច្នេះ ក្រោយការចាក់បញ្ចាំងភាពយន្តនេះ ក៏បានធ្វើឱ្យមនុស្សម្នាជាច្រើននាក់ស្គាល់ និងចាប់អារម្មណ៍ទីនេះ ។
ឧទ្យានជាតិចាងជៀជៀ ឬឧទ្យានជាតិអ៊ូលីងយួន គឺជាតំបន់ទេសចរណ៍ធម្មជាតិយ៉ាងស្រស់ស្អាតបំផុតនៅប្រទេសចិន និងលើពិភពលោក ផងដែរ ។ វាជាតំបន់ទេសចរណ៍កម្រិត 5A របស់ចិន ព្រមទាំងជាតំបន់ឧទ្យានជាតិដំបូងគេរបស់ចិនផងដែរ ។ គួរបញ្ជាក់ថា តំបន់ទេសចរណ៍នៅចិន ត្រូវបានបែងចែកជា៥កម្រិត គឺចាប់ពីកម្រិត 1 ទៅ 5A ហើយ 5A គឺសំដៅដល់តំបន់ទេសចរណ៍ដ៏ស្រស់ស្អាតបំផុត ។.jpg)
លើសពីនេះ ឧទ្យានជាតិចាងជៀជៀ ត្រូវបានអង្គការយូណេស្កូចុះបញ្ជីជាបេតិកភណ្ឌពិភពលោក នៅឆ្នាំ១៩៩២ ។ ឧទ្យានជាតិនេះមានផ្ទៃដីធំល្វឹងល្ហើយ និងពោរពេញទៅដោយភ្នំថ្មស្រួចខ្ពស់ៗផុតពីដី តម្រៀបគ្នាយ៉ាងច្រើន ។ ភ្នំភាគច្រើនមានកម្ពស់ខ្ពស់រហូតដល់លើអាកាស និងធ្វើឱ្យភ្ញៀវទេសចរមកកម្សាន្តនៅទីនេះ មើលឃើញពពកទៀតផង ។
ភ្នំទាំងនេះសុទ្ធតែកើតឡើងដោយខ្លួនឯងតាមធម្មជាតិទាំងអស់ ប៉ុន្តែកាលពីអតីតកាល បរិវេណឧទ្យានជាតិនេះ គឺជាទឹកសមុទ្រ ។ នៅតាមផ្លូវធ្វើដំណើរមកកាន់ឧទ្យានជាតិនេះ ភ្ញៀវទេសចរនឹងបានឃើញសត្វស្វាជាច្រើនក្បាលចេញមកស្វាគមន៍ពួកគេ ។.jpg)
ចំណែកការធ្វើដំណើរពីផ្នែកខាងក្រោម គឺភ្ញៀវទេសចរត្រូវជិះរថយន្តរបស់ឧទ្យានជាតិឡើងលើភ្នំ ។ បន្ទាប់មក ពួកគេត្រូវប្រើប្រាស់ជណ្តើរយន្តកញ្ចក់ មានកម្ពស់៣២៦ម៉ែត្រ ឡើងទៅលើកំពូលភ្នំ ដែលវាជាជណ្តើរយន្តកញ្ចក់ដំបូងគេក្នុងតំបន់អាស៊ី ។ ពេលចុះពីជណ្តើរយន្តកញ្ចក់នេះ ភ្ញៀវទេសចរនឹងបន្តដំណើរទៅផ្នែកខាងមុខទៀតតាមការណែនាំរបស់ភ្នាក់ងារប្រចាំការនៅទីនេះ ។
Guinness World Records បានកត់ត្រាថា វាជាជណ្តើរយន្តកញ្ចក់ប្រភេទ Outdoor ខ្ពស់បំផុតលើពិភពលោក (World’s tallest full-exposure outdoor elevator) និងលឿនបំផុតលើពិភពលោក ៕
