ប្រទេសឥណ្ឌា ៖ អណ្តូងទឹក «Rani ki vav» ឬមានឈ្មោះមួយទៀតថា អណ្តូងទឹកម្ចាស់ក្សត្រី «The Queen’s Stepwell» ត្រូវបានចុះបញ្ជីជាសម្បត្តិបេតិកភណ្ឌពិភពលោក របស់ប្រទេសឥណ្ឌា កាលពីថ្ងៃទី២២ ខែមិថុនា ឆ្នាំ២០១៤ ។ អណ្តូងទឹកនេះមានលក្ខណៈជាកាំជណ្តើរ និងមានរូបចម្លាក់បុរាណនៅតាមជញ្ជាំងអណ្តូង ។

អណ្តូងទឹកម្ចាស់ក្សត្រីនេះ គឺស្ថិតនៅក្បែរទន្លេសុរ៉ាសាវ៉ាឌី រដ្ឋគុថារ៉ាជ បានសាងសង់ឡើងនៅចុងសតវត្សរ៍ទី១១ ដោយម្ចាស់ក្សត្រីព្រះនាម អ៊ុថាយ៉ុមទី ដើម្បីរំលឹកដល់ព្រះមហាក្សត្រ និងត្រូវជាស្វាមីរបស់ព្រះនាងដែលបានសោយទីវង្គត ។

ក្រោយមក នៅឆ្នាំ១៩៨៦ ក្រុមអ្នកបុរាណវិទ្យានៅប្រទេសឥណ្ឌាបានចាប់ផ្តើមជីកកកាយ និងស្រាវជ្រាវអណ្តូងទឹកម្ចាស់ក្សត្រី «The Queen’s Stepwell» ជាថ្មី ។ ពេលនោះ គេបានឃើញរូបចម្លាក់ម្ចាស់ក្សត្រី អ៊ុថាយ៉ុមទី ហើយគេក៏បានជួសជុលអណ្តូងបុរាណជាថ្មីនៅឆ្នាំ១៩៨៧ ។

បើតាមអក្សរសិល្ប៍របស់ឥណ្ឌាបញ្ជាក់ថា អណ្តូងទឹកមានលក្ខណៈជាកាំជណ្តើរនេះបានសាងសង់នៅឆ្នាំ១០៦៣ ហើយឥណ្ឌាបានចំណាយពេលរហូតដល់២០ឆ្នាំ ទើបអាចសាងសង់អណ្តូងរួចរាល់ ។ មនុស្សទូទៅដឹងថា ម្ចាស់ក្សត្រី អ៊ុថាយ៉ុមទី បានបញ្ជាឱ្យគេសាងសង់អណ្តូងទឹកនេះសម្រាប់រំលឹកដល់ព្រះមហាក្សត្រ ព្រះនាម ភីម៉ា ទី១ (ដែលបានសោយរាជ្យចាប់ពីឆ្នាំ១០២២ ដល់ឆ្នាំ១០៦៤) ។

ប៉ុន្តែអ្នកជំនាញបញ្ជាក់ថា អណ្តូងទឹកនេះអាចសាងសង់នៅឆ្នាំ១០៣២ ។ អណ្តូងទឹកមានប្រវែង៦៤ម៉ែត្រ, ទទឹង២០ម៉ែត្រ និងជម្រៅចុះក្រោម២៧ម៉ែត្រ ហើយត្រូវបានគេរកឃើញនៅឆ្នាំ១៩៦០ ។ គេសន្និដ្ឋានថា កាលពីបុរាណ គេប្រើប្រាស់អណ្តូងនេះសម្រាប់ស្តុកទឹកពីប្រភពទឹកក្រោមដី និងបានជួសជុលកែលម្អជាបន្តបន្ទាប់ រហូតដល់រយៈពេលជាង៣.០០០ឆ្នាំ ។

បច្ចុប្បន្ន អណ្តូងនេះបានក្លាយជាស្ថាបត្យកម្មដ៏ស្រស់ស្អាតបំផុត ខណៈនៅតាមជញ្ជាំងអណ្តូងមានក្បូរក្បាច់ និងរូបចម្លាក់ល្អឯកផ្សេងៗ ដូចជា ៖ ព្រះវិស្ណុ និងស្រីទេពអប្សរ ។ រីឯនៅបរិវេណជិតបាតអណ្តូង គឺមានរូបចម្លាក់ទំហំធំ ដូចជា ៖ ព្រះព្រហ្ម, ព្រះសិវៈ និងព្រះវិស្ណុ ជាដើម ។

ក្រៅពីនេះ អណ្តូងទឹកម្ចាស់ក្សត្រី ត្រូវបានគេកោតសរសើរថា គឺជាស្ថាបត្យកម្មមានលក្ខណៈកាំជណ្តើរដ៏ពិសិដ្ឋ និងធំបំផុតនៅរដ្ឋគុថារ៉ាជ របស់ឥណ្ឌា ។ អង្គការយូណេស្កូ (UNESCO) បានចុះបញ្ជីអណ្តូងទឹកនេះជាសម្បត្តិបេតិកភណ្ឌពិភពលោក កាលពីថ្ងៃទី២២ ខែមិថុនា ឆ្នាំ២០១៤ ៕

បច្ចុប្បន្នមីហឹរកូរ៉េបានផ្ទុះការចាប់អារម្មណ៍យ៉ាងខ្លាំងពីសំណាកយុវវ័យមិនថានៅអាស៊ី អឺរ៉ុបប៉ុណ្ណោះទេ សូម្បីនៅតំបន់អាហ្វ្រិកមួយចំនួនក៏ពេញនិយមខ្លាំងដែរ។ មីកូរ៉េមានច្រើនប្រភេទ ដោយប្រភេទមីខ្លះមានរសជាតិហឹរខ្លាំង ប៉ុន្តែឆ្ងាញ់នឹងជាចំណង់ចំណូលចិត្តរបស់យុវវ័យ។ ទោះជាយ៉ាងណាយោងតាមទីភ្នាក់ងារចំណីអាហាររបស់ប្រទេសដាណឺម៉ាក បានព្រមានថា មីហឹរកូរ៉េបីប្រភេទនេះមនុស្សគួរតែជៀសវាង ព្រោះថាវាមានរសជាតិហឹរខ្លាំងពេក ដែលអាចបណ្តាលឱ្យពុលស្រួចស្រាវ។

ដូច្នេះផលិតផលមីបីប្រភេទរបស់ក្រុមហ៊ុនកូរ៉េដ៏ល្បីល្បាញ Samyang Foods គឺ Buldak 3x Spicy & Hot Chicken, 2x Spicy & Hot Chicken និង Hot Chicken Stew ត្រូវបានវាយតម្លៃថាមានកម្រិតគ្រោះថ្នាក់ខ្លាំងនៃសារធាតុ capsaicin ដែលជាធាតុផ្សំសកម្មហឹរនៅក្នុងម្ទេស នេះបើយោងតាមសេចក្តីថ្លែងការណ៍របស់អាជ្ញាធរចំណីអាហារ និងបសុព្យាបាលដាណឺម៉ាក។ ទីភ្នាក់ងារនេះបានបន្តទៀតថាផលិតផលទាំងបីនេះគឺមានរសជាតិហឹរខ្លាំងបំផុតដែលអាច “បណ្តាលឱ្យមនុស្សមានការពុលស្រួចស្រាវ” ដោយបន្ថែមថា មីទាំងនេះនឹងត្រូវបានដកចេញពីទីផ្សារដាណឺម៉ាក។

អាជ្ញាធរចំណីអាហារ និងបសុពេទ្យរបស់ប្រទេសដាណឺម៉ាកបានចេញការព្រមានពិសេសមួយសម្រាប់កុមារ ហើយបានជំរុញឱ្យឪពុកម្តាយទាក់ទងទៅមជ្ឈមណ្ឌលគ្រប់គ្រងជាតិពុលភ្លាមៗ ប្រសិនបើកូនរបស់ពួកគេមាន “រោគសញ្ញាពុលស្រួចស្រាវ” បន្ទាប់ពីទទួលទានមីហឹរទាំងនេះ។ គួរបញ្ជាក់ដែរថា ផលិតផលរបស់ក្រុមហ៊ុនកូរ៉េ Samyang Foods គឺមានភាពល្បីល្បាញខ្លាំង និងពេញនិយមនៅបរទេស ដោយប្រាក់ចំណេញរបស់ក្រុមហ៊ុនបានឈានដល់កម្រិតខ្ពស់បំផុតរហូតដល់ ១១០ លានដុល្លារក្នុងឆ្នាំ ២០២៣។ Samyang Foods បាននិយាយថានេះជាលើកទីមួយហើយដែលផលិតផលរបស់ខ្លួនត្រូវបានប្រមូលមកវិញដោយសារមានរសជាតិហឹរពេក ដោយបន្ថែមថាពួកគេនឹងព្យាយាមស្វែងយល់បន្ថែមអំពីបទប្បញ្ញត្តិនៅក្នុងទីផ្សារនាំចេញ។

អ្នកនាំពាក្យក្រុមហ៊ុនបាននិយាយថា “ផលិតផលរបស់យើងត្រូវបាននាំចេញនៅជុំវិញពិភពលោក ប៉ុន្តែនេះគឺជាការប្រមូលមកវិញជាលើកដំបូងសម្រាប់ហេតុផលនេះ” ។ ក្នុងប៉ុន្មានខែថ្មីៗនេះ តម្លៃភាគហ៊ុនរបស់ Samyang Foods បានហក់ឡើងដល់ ៧០% បន្ទាប់ពីមីហឹរ Carbonara ល្បីល្បាញនៅលើ TikTok ។ ផលិតផលនេះលក់ដាច់ខ្លាំងបំផុតនៅអាមេរិក ហើយក៏មានរបាយការណ៍ថាអស់ស្តុកផងដែរ៕

Badminton Cabinet គឺជាគ្រឿងសង្ហារិមមួយក្នុងចំណោមគ្រឿងសង្ហារិម ដែលមានតម្លៃបំផុតនៅលើពិភពលោក ។ កាលពីឆ្នាំ២០០៤ គ្រឿងសង្ហារិមមួយនេះត្រូវបានគេដាក់លក់ដេញថ្លៃក្នុងតម្លៃរហូតដល់៣៦លានដុល្លារអាមេរិក ។

យើងមកមើលថា ហេតុអ្វីទើបវាមានតម្លៃខ្ពស់បែបនេះ និងមានលក្ខណៈពិសេសបែបណាខ្លះ?

Badminton Cabinet គឺជាទូរដ៏ល្អប្រណីតមួយដែលធ្វើឡើងដោយក្រុមជាងមានជំនាញជាង៣០នាក់ ហើយពួកគេបានចំណាយពេលរហូតដល់ជាង៦ឆ្នាំឯណោះ ទើបធ្វើទូរនេះរួចរាល់ តាមការកុម្ម៉ង់របស់បុគ្គលមានឥទ្ធិពលម្នាក់ឈ្មោះ Henry Somerset ក្នុងសម័យ Duke of Beaufort ។

ការធ្វើទូរនេះឡើង គឺពុំមែនសម្រាប់ទុកដាក់សម្ភារៈធម្មតាទេ ប៉ុន្តែទូរនេះសម្រាប់ទុកវត្ថុតំណាងឱ្យភាពល្អប្រណីត, ទ្រព្យសម្បត្តិស្តុកស្តម្ភ និងបង្ហាញពីអំណាចរបស់ម្ចាស់ទូរតែប៉ុណ្ណោះ ដូចជា ៖ រូបថត និងរូបចម្លាក់មានតម្លៃផ្សេងៗ ។

ក្រោយពីក្រុមជាងជំនាញបានធ្វើទូររួចរាល់ហើយ ពួកគេក៏បានយកទូរនេះទៅតម្កល់ក្នុងគេហដ្ឋានមួយឈ្មោះ «Badminton House» នៅតំបន់ Gloucestershire ។ ប៉ុន្តែក្រោយមក នៅសតវត្សរ៍ទី២០ កូនចៅក្នុងគ្រួសារនេះបានលក់វាទៅឱ្យអ្នកផ្សេងទៀត ។

ទូរមានតម្លៃរាប់លានដុល្លារអាមេរិក Badminton Cabinet បានធ្វើឡើងពីឈើមួយប្រភេទឈ្មោះ Ebony និងតុបតែងលម្អទៅដោយថ្មមានតម្លៃជាច្រើនប្រភេទ ដូចជា ៖ Amethyst quartz, Agate និង lapis lazuli ហើយវាមានកម្ពស់ខ្ពស់ជាងមនុស្សទៅទៀត ។

កាលពីឆ្នាំ២០០៤ ភ្នាក់ងារដេញថ្លៃគ្រឿងសង្ហារិម Christie’s បានធ្វើការដេញថ្លៃទូរ Badminton Cabinet ហើយអ្នកឈ្នះការប្រកួតនាពេលនោះ គឺព្រះអង្គម្ចាស់ Hans Adam II ដែលបានដេញថ្លៃទូរក្នុងតម្លៃ៣៦លានដុល្លារអាមេរិក ។

ក្រោយមក ព្រះអង្គម្ចាស់ក៏ប្រគល់ទូរនេះទៅឱ្យសារមន្ទីរ Liechtenstein នៅប្រទេសអូទ្រីស ដើម្បីតាំងបង្ហាញទៅសាធារណជនរហូតដល់ពេលបច្ចុប្បន្ន ៕

ដូចប្រិយមិត្តជ្រាបរួចមកហើយថា នៅក្នុងប្រទេសវៀតណាមនាពេលថ្មីៗនេះគឺមានរឿងចម្លែកៗកើតឡើងផ្ទួនៗគ្នា ខណៈកាលពីដើមខែមិថុនាឆ្នាំនេះ គឺមានត្រីសមុទ្រទឹកជ្រៅដ៏ធំសម្បើមមួយក្បាលងា.ប់ដោយមិនដឹងមូលហេតុ ដោយត្រីប្រភេទនេះត្រូវបានគេស្គាល់ផងដែរថាជានិមិត្តរូបនៃគ្រោះមហន្តរាយ ហើយវាក៏ជាសត្វកម្រដែលមិនងាយបង្ហាញឱ្យមនុស្សយើងឃើញវានោះទេ។ មិនយូរប៉ុន្មានរំលងប្រហែលពីរបីថ្ងៃក្រោយមក ក៏មានបាតុភូតរន្ទះបា.ញ់ជាប់ៗគ្នារហូតដល់ជាង ៧ ពាន់ដងនៅក្នុងទីក្រុងហាណូយបណ្តាលឱ្យគោក្របីរាប់សិបក្បាលងា.ប់ជាបន្តបន្ទាប់។

បច្ចុប្បន្នប្រទេសនេះកំពុងជួបប្រទះនឹងគ្រោះទឹកជំនន់ធ្ងន់ធ្ងរនៅក្នុងតំបន់មួយចំនួន។ ហើយគិតត្រឹមថ្ងៃទី១៣ ខែមិថុនា ឆ្នាំ២០២៤ យោងតាម Vnexpress បានឱ្យដឹងថា សមុទ្រនៃឆ្នេរ Mun ភាគនិរតីនៃកោះ Tho Chau ទីក្រុង Phu Quoc គឺមានបាតុភូតដ៏ចម្លែកមួយបានលេចឡើងជាលើកដំបូងនៅក្នុងដែនទឹករបស់កោះនេះ នៅពេលដែលទឹកសមុទ្រស្រាប់តែប្រែទៅជាពណ៌ក្រហមដូចឈាម។ យោងតាមគណៈកម្មាធិការប្រជាជនឃុំថូចូវ ទឹកសមុទ្រប្រែពណ៌ក្រហមចាប់ពីម៉ោង ១០ ព្រឹកថ្ងៃទី១២ ខែមិថុនា បន្ទាប់មកបានរីករាលដាលដល់ពេលរសៀល ដោយគ្របដណ្តប់លើផ្ទៃដីប្រមាណ ១.០០០ ម៉ែត្រការ៉េ។

នៅថ្ងៃដដែលនោះប្រជាពលរដ្ឋក៏បានប្រទះឃើញសត្វតូចៗជាច្រើនក្បាលងាប់ ដែលភាគច្រើនជាត្រីត្រូវបានបោកបក់មកច្រាំង។ ទោះជាយ៉ាងណាមកដល់ពេលនេះ ទឹកសមុទ្រហាក់មានពណ៌ស្រាលជាងមុន និងរួមតូចក្នុងតំបន់ ហើយក៏បានរលាយបន្តិចម្តងៗផងដែរ។ លោក Do Van Dung លេខាឃុំ Tho Chau បាននិយាយថា មូលហេតុដែលបណ្តាលឱ្យទឹកសមុទ្រប្រែទៅជាពណ៌ក្រហមបែបនេះគឺដោយសារ បាតុភូតនៃការបន្តពូជសារ៉ាយហួសប្រមាណ ដែលមិនទាក់ទងនឹងចលនាទឹករលក។ បាតុភូតនេះលេចឡើងភាគច្រើននៅតំបន់សមុទ្រ ជាពិសេសច្រកសមុទ្រនៅជិតមាត់ទន្លេ និងកំពង់ផែសមុទ្រ។

ហើយជារឿយៗការប្រមូលផ្តុំសារ៉ាយអាចធ្វើឱ្យផ្ទៃទឹកក្លាយទៅជាពពុះ ឬប្រែពណ៌ ដែលអាចមានពណ៌ស្វាយ ពណ៌ផ្កាឈូក ពណ៌ខៀវ ឬក្រហម។ របាយការណ៍បាននិយាយថា “ផ្កាសារ៉ាយជាធម្មតាលេចឡើងតែក្នុងអាកាសធាតុត្រជាក់ប៉ុណ្ណោះ” នៅពេលដែលអាកាសធាតុក្តៅ និងមានពន្លឺព្រះអាទិត្យ សារ៉ាយក៏បាត់ទៅវិញដោយខ្លួនឯង។ ទោះជាយ៉ាងណាជំនោរក្រហមអាចបង្កើតជាតិពុលដល់ធម្មជាតិ បំផ្លាញអុកស៊ីហ្សែន បង្កឱ្យត្រី ក្តាម និងសត្វសមុទ្រជាច្រើនទៀតងា.ប់។ លើសពីនេះជំនោរក្រហមក៏អាចបង្កគ្រោះថ្នាក់ដល់សុខភាពមនុស្សយើងផងដែរ ប្រសិនបើសារពាង្គកាយត្រូវបានបំពុលដោយសារធាតុពុលនោះ៕