សហរដ្ឋអាមេរិក៖ ថ្មីៗនេះមហាសេដ្ឋីរបស់ពិភពលោក Elon Musk បាននិយាយថា ខ្លួននឹងសហការជាមួយ Samsung ដើម្បីផលិតទូរស័ព្ទដំបូងបង្អស់របស់ខ្លួនដែលមានឈ្មោះថា X” ក្នុងពេលឆាប់ៗនេះ។
យោងតាម Business Insider ការគ្រោងបង្កើតស្មាតហ្វូនដំបូងរបស់ខ្លួនភា្លមៗបែបនេះ គឺបានកើតឡើងនៅពេល Musk បានរិះគន់ Apple ចំពោះការនាំយកគំរូ AI របស់ OpenAI ទៅកាន់ iPhones, iPads, និង Macs… ដោយមហាសេដ្ឋីរូបនេះបាននិយាយថា Apple នឹង “មិនដឹងថាមានអ្វីកើតឡើងនៅពេលដែលប្រគល់ទិន្នន័យឱ្យទៅ OpenAI” កាន់កាប់នោះទេ។

Musk បាននិយាយថា “ប្រសិនបើ OpenAI ត្រូវបានរួមបញ្ចូលនៅកម្រិតប្រព័ន្ធប្រតិបត្តិការរបស់ឧបករណ៍ Apple នោះផលិតទាំងអស់របស់ក្រុមហ៊ុននេះនឹងត្រូវបានហាមឃាត់នៅក្នុងក្រុមហ៊ុនរបស់លោក ដោយសារវាគឺជាការរំលោភលើសុវត្ថិភាពរបស់ក្រុមហ៊ុនលោកដែលមិនអាចទទួលយកបាន។ នេះមិនមែនជាលើកទីមួយទេដែល Musk បានលើកឡើងអំពីការបង្កើតទូរស័ព្ទថ្មីនេះ។ នៅឆ្នាំ ២០២២ នៅពេលដែល Apple គំរាមដកកម្មវិធី Twitter ចេញពី App Store លោកក៏បាននិយាយផងដែរថា លោកនឹងបង្កើតគំរូស្មាតហ្វូនដើម្បីប្រកួតប្រជែងជាមួយ iPhone ។

យោងតាម Business Insider ប្រសិនបើ Musk ផលិតស្មាតហ្វូនថ្មីរបស់ខ្លួនដោយដាក់ឈ្មោះឧបករណ៍ថា X គឺមិនគួរឱ្យភ្ញាក់ផ្អើល និងមិនគួរឱ្យចាប់អារម្មណ៍ឡើយ។ ទោះជាយ៉ាងណាមហាសេដ្ឋីរូបនេះគឺមានចំណង់ចំណូលចិត្តយ៉ាងខ្លាំងចំពោះអក្សរ X។ នៅឆ្នាំ ១៩៩៩ លោកបានបង្កើតក្រុមហ៊ុនសេវាកម្មហិរញ្ញវត្ថុនិងការទូទាត់ X.com ហើយបន្ទាប់មកនៅឆ្នាំ ២០០២ លោកក៏បានបន្តបើកក្រុមហ៊ុនអវកាស SpaceX ។

នៅចុងឆ្នាំ ២០២២ បន្ទាប់ពីបានកាន់កាប់ Twitter នៅពេលនោះលោកក៏បានបើកដំណើរការ X Corp ហើយបន្ទាប់មកបានប្តូរឈ្មោះបណ្តាញសង្គម Twitter ទៅជា X។ ហើយនៅដើមខែកក្កដា ឆ្នាំ ២០២៣ Musk ក៏បានប្រកាសក្រុមហ៊ុន xAI ជាមួយនឹងមហិច្ឆតាក្នុងការអភិវឌ្ឍន៍ជម្រើសជំនួស ChatGPT ទៀតផង៕

ប្រទេសវៀតណាម ៖ កាលពីថ្ងៃទី១៣ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា នាពេលថ្មីៗនេះ នាយករដ្ឋមន្ត្រីវៀតណាម លោក Pham Minh Chinh បានបញ្ជាទៅកាន់ក្រសួងហិរញ្ញវត្ថុឱ្យធ្វើការរឹតបន្តឹង និងតាមដានអ្នកមានឥទ្ធិពលទាំងអស់នៅក្នុងប្រទេស ។

ក្រៅពីនេះ ក្រសួងហិរញ្ញវត្ថុ ក៏ត្រូវតាមដាន និងប្រមូលពន្ធពីអ្នកលក់ផលិតផលអនឡាញតាមបណ្តាញសង្គមផ្សេងៗផងដែរ ជាពិសេស ផ្តោតលើអ្នកមានប្រាក់ចំណូលស្មើនឹង១០០លានដុងក្នុង១ឆ្នាំ (ឬស្មើជិត៤ពាន់ដុល្លារអាមេរិក) ។

លោក Pham Minh Chinh នាយករដ្ឋមន្ត្រីវៀតណាមបញ្ជាក់ថា អ្នកលក់ផលិតផលអនឡាញទាំងអស់ ដែលរកប្រាក់ចំណូលបានជិត៤ពាន់ដុល្លារអាមេរិកក្នុង១ឆ្នាំ ពួកគេនឹងត្រូវបង់ពន្ធឱ្យរដ្ឋ ស្របតាមច្បាប់ប្រាក់ចំណូលផ្ទាល់ខ្លួនរបស់ប្រទេសវៀតណាម ។

លើសពីនេះ ក្រៅពីតម្រូវឱ្យអ្នកលក់ផលិតផលអនឡាញទាំងអស់បង់ពន្ធឱ្យរដ្ឋហើយ អ្នកផលិតមាតិកាយ៉ាងច្រើននៅប្រទេសវៀតណាម ក៏ត្រូវបានរដ្ឋាភិបាលស្នើឱ្យពួកគេបង់ពន្ធឱ្យរដ្ឋដូចគ្នាដែរ ។

នាយករដ្ឋមន្ត្រីវៀតណាមថ្លែងថា រដ្ឋាភិបាលនឹងប្រមូលពន្ធពីអ្នកបង្កើតមាតិការទាំងអស់នៅប្រទេសវៀតណាម (គឺរួមទាំងការប្រមូលពន្ធក្នុងរយៈពេលកន្លងមក) ដោយសារពួកគេពុំបានជូនដំណឹងអំពីប្រាក់ចំណូលផ្ទាល់ខ្លួនទៅមន្ត្រីរដ្ឋាភិបាល ។

ការប្រកាសប្រមូលពន្ធពីអ្នកលក់ផលិតផលអនឡាញនេះ គឺក្រោយពីរដ្ឋាភិបាលវៀតណាមរកឃើញថា បច្ចុប្បន្ន ការលក់ផលិតផលតាមអនឡាញនៅវៀតណាមបានកើនឡើងរហូតដល់២៥% ក្នុង១ឆ្នាំ និងដើរតួនាទីយ៉ាងសំខាន់ក្នុងការផ្លាស់ប្តូរឌីជីថល ។ ប៉ុន្តែការបង់ពន្ធឱ្យរដ្ឋាភិបាលផ្នែកពាណិជ្ជកម្មអេឡិចត្រូនិក បែរជាពុំកើនឡើងតាមភាគរយនេះទេ ៕

ប្រទេសតួកគី ៖ កាលពីថ្ងៃទី១២ ខែមិថុនា ឆ្នាំ២០២៤ គេហទំព័រ dailymail.co.uk រាយការណ៍ថា យន្តហោះក្រុមហ៊ុនអាកាសចរណ៍ Mavi Gok Airlines ជើងហោះហើរ 4M413 របស់ប្រទេសតួកគី រៀបនឹងចេញដំណើរទៅហើយ ស្រាប់តែអ្នកដំណើរសុំចុះវិញអស់ដោយសារអាកាសធាតុក្តៅខ្លាំងពេក និងរអ៊ូរទាំថា ក្រុមហ៊ុនអាកាសចរណ៍ពុំបានជួយអ្វីពួកគេទេ ។

ក្នុងយន្តហោះមានអាកាសធាតុខ្លាំងបែបនេះ ដោយសារខូចម៉ាស៊ីនត្រជាក់ក្នុងអំឡុងពេលយន្តហោះត្រៀមធ្វើដំណើរចាកចេញពីប្រទេសតួកគី ទៅអាល្លឺម៉ង់ ។ ហេតុនេះ ធ្វើឱ្យអ្នកដំណើរអង្គុយក្នុងយន្តហោះក្តៅខ្លាំងអស់ជាង១ម៉ោង ទម្រាំអាកាសយានិកសម្រេចចិត្តបើកយន្តហោះត្រឡប់ទៅកាន់អគារអ្នកដំណើរវិញ ។

សារព័ត៌មានរាយការណ៍ថា ហេតុការណ៍នេះបានកើតឡើងកាលពីថ្ងៃទី៦ ខែមិថុនា កន្លងមក ពេលនោះ យន្តហោះ Boeing 737-800 របស់ក្រុមហ៊ុនអាកាសចរណ៍ Mavi Gok Airlines កំពុងត្រៀមហោះហើរចេញពីអាកាសយានដ្ឋាននៅទីក្រុង Antalya ប្រទេសតួកគី ទៅអាល្លឺម៉ង់ ។ ប៉ុន្តែស្រាប់តែម៉ាស៊ីនត្រជាក់ខូច និងធ្វើឱ្យសីតុណ្ហភាពក្នុងយន្តហោះកើនឡើងរហូតដល់៥២អង្សារសេ ។

លោក Dominic Janssen ជនជាតិអាល្លឺម៉ង់ ដែលបានធ្វើដំណើរក្នុងយន្តហោះនេះ បានផ្តល់សម្ភាសន៍ជាមួយសារព័ត៌មានអាល្លឺម៉ង់ក្រោយកើតហេតុថា ពេលលោកដើរចូលក្នុងយន្តហោះឃើញថា អាកាសធាតុក្តៅខ្លាំងខុសពីធម្មតា ហើយភរិយារបស់លោកបានយកកង្ហារឡើងយន្តហោះមកបក់ឱ្យកូនអាយុ៥ខែ ។ លោកថា ៖ «កូនលោកនៅតែយំខ្លាំងៗឥតឈប់ ហើយពេលអាកាសធាតុក្តៅខ្លាំង ទឹកបរិសុទ្ធសម្រាប់អ្នកដំណើរ ក៏អស់ទៀត ។ វាគ្រោះថ្នាក់ខ្លាំងណាស់សម្រាប់អ្នកដំណើរគ្រប់រូប» ។

ចំណែកអ្នកដំណើរផ្សេងទៀតនិយាយថា ពួកគេទទួលបានការសង្គ្រោះតែបន្តិចបន្តួចប៉ុណ្ណោះពីបុគ្គលិកអាកាសចរណ៍ ខណៈអាកាសយានិកនៅតែចង់បើកយន្តហោះទៅកាន់ Runway ដើម្បីត្រៀមហោះហើរ ។

ក្រោយមក គ្រូពេទ្យម្នាក់បាននិយាយភាសាតួកគីជាមួយបុគ្គលិកអាកាសចរណ៍ថា ៖ «សូមកុំឱ្យយន្តហោះចាកចេញឱ្យសោះ ពីព្រោះខ្លាចក្មេងៗស្លាប់» ទើបអាកាសយានិកបើកយន្តហោះមកកាន់អគារអ្នកដំណើរក្នុងអាកាសយានដ្ឋានវិញ ។ ប៉ុន្តែស្ថានការណ៍នៅតែយ៉ាប់ដដែល ដោយសារក្រុមហ៊ុនអាកាសចរណ៍ពុំបានជួយអ្វីអ្នកដំណើរឡើយក្រោយចុះពីយន្តហោះ សូម្បីតែទឹកបរិសុទ្ធ១ដប ក៏គ្មានដែរ ។

ចំណែកក្រុមហ៊ុនអាកាសចរណ៍តួកគីឈ្មោះ Mavi Gok Airlines លើកឡើងថា ក្រុមហ៊ុនយកចិត្តទុកដាក់លើសុវត្ថិភាពរបស់អ្នកដំណើរ និងបុគ្គលិកអាកាសចរណ៍ខ្លាំងបំផុត ។ រីឯខាង Boeing ពុំបាននិយាយអ្វីទេ ពាក់ព័ន្ធនឹងហេតុការណ៍ខូចម៉ាស៊ីនត្រជាក់ក្នុងយន្តហោះនេះ ៕

ធ្លាប់តែឃើញពន្ធ.នាគារមានទំហំធំហើយភាគច្រើនគឺគេប្រើសម្រាប់ឃុំខ្លួនអ្នកទោស ដោយឡែកអីពន្ធ.នាគារនេះវិញត្រូវបានគេប្រើសម្រាប់ឃុំខ្លួនតែអ្នកទេសចរប៉ុណ្ណោះ។ យោងតាម Oddity Central បានឱ្យដឹងថា ពន្ធនាគារនេះគឺមានឈ្មោះថា Sark មានទីតាំងនៅលើកោះ Sark ដែលជាកោះតូចបំផុតក្នុង Channel Islands រវាងប្រទេសបារាំង និងប្រទេសអង់គ្លេស ដែលមានក្រឡាពីរទំហំ ១.៨ m x ១.៨ m និង ១.៨ m x ២.៤ m និងបំបែកដោយច្រករបៀងតូចចង្អៀត។

នៅក្នុងបន្ទប់នីមួយៗមានគ្រែឈើតូច និងពូកស្តើងសម្រាប់អ្នកទោសដេក។ មូលហេតុដែលគេសាងសង់ពន្ធ.នាគារនេះមកគឺដើម្បីប្រើសម្រាប់ឃុំខ្លួនអ្នកទេសចរដែលតែងបង្កបញ្ហានៅក្នុងតំបន់នេះ ព្រោះតំបន់នេះត្រូវបានចាត់ទុកថាជាកន្លែងដែលមានសន្តិភាព មិនមានចោរកម្ម ឬឧក្រិដ្ឋកម្មនោះទេ។ ដូច្នេះប្រសិនភ្ញៀវទេសចរទៅទស្សនាកម្សាន្តហើយបានបង្កបញ្ហារំខាន នោះគេនឹងចាប់ដាក់ពន្ធនាគារនេះហើយ។ ពន្ធនាគារ Sark បានដំណើរការដំបូងតាំងពីឆ្នាំ ១៨៥៦ ហើយត្រូវបានទទួលស្គាល់ដោយ Guinness World Records ថាជា “គុកតូចបំផុតរបស់ពិភពលោក”។

កោះ Sark មានផ្ទៃដីប្រហែល ៦ គីឡូម៉ែត្រការ៉េ ដែលមានប្រជាជនរស់នៅត្រឹមតែ ៦០០ នាក់ប៉ុណ្ណោះ ដូច្នេះចោរកម្ម ឬឧក្រិដ្ឋកម្មកម្រកើតមានណាស់។ សព្វថ្ងៃនេះពន្ធនាគារនៅតែដំណើរការធម្មតា ទោះបីជាមិនទៀងទាត់ក៏ដោយ ក៏ពេលខ្លះកន្លែងនេះត្រូវបានប្រើដើម្បីឃុំខ្លួនភ្ញៀវទេសចរដែលរំខាន ឬអ្នកស្រុកស្រវឹងបង្កសំឡេងខ្លាំងៗ។ ពន្ធនាគារ Sark បច្ចុប្បន្នមិនមានការផ្លាស់ប្តូរច្រើនពីការរចនាដើមឡើយ គ្រាន់តែបានបន្ថែមអគ្គិសនីប៉ុណ្ណោះ ហើយនៅតែមិនមានបង្អួចដដែល។

គួរបញ្ជាក់ដែរថា ភ្ញៀវមិនត្រូវបានអនុញ្ញាតឱ្យចូលមើលខាងក្នុងពន្ធនាគារនោះទេ ប៉ុន្តែអាចជួលកង់ជិះជុំវិញកោះ និងមើលពន្ធនាគារពីខាងក្រៅបាន។ គុកនេះត្រូវបានសាងសង់ពីឥដ្ឋតូចៗ មានទ្វារពណ៌បៃតង និងមានអក្សរ AD 1856 នៅពីលើ ដែលធ្វើឱ្យវាក្លាយជាគោលដៅពេញនិយមរបស់អ្នកទេសចរជាច្រើន។ អ្នកដែលមកលេងកោះនេះតែងទៅលេងគុកតូចបំផុតក្នុងពិភពលោកដើម្បីថតរូបអនុស្សាវរីយ៍។

Sark ដែលជាកោះដ៏ខៀវស្រងាត់គ្របដណ្តប់ដោយដើមឈើបៃតងត្រូវបានគេចាត់ទុកថាជា “រតនភណ្ឌនៃកោះ Channel” និងជាកន្លែងស្ងប់ស្ងាត់សមរម្យសម្រាប់អ្នកធ្វើដំណើរដែលកំពុងស្វែងរកកន្លែងដែលឆ្ងាយពីពិភពសម័យទំនើប។ កោះនេះមិនមានរថយន្តទេ អ្នកស្រុក និងអ្នកទេសចរធ្វើដំណើរដោយការជិះកង់ ជិះសេះ ឬត្រាក់ទ័រ។ កន្លែងនេះក៏ត្រូវបានគេចាត់ទុកថាជាកន្លែងដ៏ស័ក្តិសមបំផុតមួយក្នុងពិភពលោកដែលអាចមើលផ្កាយដ៏ស្រស់ស្អាតនាពេលនារាត្រី៕

ប្រទេសចិន ៖ កាលពីថ្ងៃទី១៣ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា បុគ្គលិកហាងលក់ភេសជ្ជៈដ៏ល្បីមួយកន្លែងនៅប្រទេសចិន បានលាងជើងរបស់ខ្លួនក្នុងអាងលាងចាន និងធ្វើឱ្យមហាជនរិះគ.ន់ យ៉ាងខ្លាំងថា បើទោះជាជើងរលាកទឹកក្តៅក្តី ក៏ពុំគួរលាងនៅកន្លែងនេះដែរ ។ ប៉ុន្តែម្ចាស់ហាងភេសជ្ជៈបែរជានិយាយបែបនេះ ហើយសន្យាថា នឹងអប់រំបុគ្គលិកពីបញ្ហាអនាម័យ ។

ក្រោយរូបភាពនេះបានបង្ហោះក្នុងបណ្តាញសង្គមមិនយូរប៉ុន្មាន អ្នកលេងបណ្តាញសង្គមចិនក៏បានចែកចាយរូបភាពយ៉ាងច្រើននៅប្រទេសចិន និងក្រៅប្រទេស ។ វាធ្វើឱ្យមហាជនរិះគន់ថា ទង្វើនេះប៉ះពាល់ដល់អនាម័យក្នុងហាង និងឆ្លងមេរោគផងដែរ រហូតដល់អ្នកខ្លះលែងហ៊ានចូលហាងនេះទៀតផង ។

បើតាមរូបភាព គេបានឃើញបុគ្គលិករូបនេះស្លៀកពាក់ឯកសណ្ឋានរបស់ហាង បែរខ្នងដាក់កាមេរ៉ា និងយកជើងខាងស្តាំរបស់ខ្លួនលាងក្នុងអាងលាងចាន បន្ទាប់មក ក៏ពាក់ស្បែកជើងវិញ ។ ចាប់តាំងពីរូបភាពនេះបានបង្ហោះក្នុងបណ្តាញសង្គម វាធ្វើឱ្យមានមតិរិះគន់យ៉ាងខ្លាំងថា ៖ «អ្នកមិនអាចលាងជើងនៅទីនេះបានទេ បើទោះជាជើងរបស់អ្នករលាកទឹកក្តៅក៏ដោយ ពីព្រោះអ្នកធ្វើការក្នុងហាងភេសជ្ជៈត្រូវគិតពីអនាម័យ» ។

មន្ត្រីការិយាល័យគ្រប់គ្រងផ្សារប្រចាំទីក្រុងប៉េកាំង ក៏បានត្រួតពិនិត្យកាមេរ៉ាសុវត្ថិភាពនៅក្បែរនោះឃើញថា ហេតុការណ៍នេះបានកើតឡើងពិតប្រាកដមែន គឺបុគ្គលិកខាងលើបានលាងជើងរបស់ខ្លួនក្នុងអាងលាងដៃ ហើយទង្វើនេះបានបំពាននឹងច្បាប់សុវត្ថិភាពចំណីអាហាររបស់ចិន ។ ដូច្នេះ មន្ត្រីការិយាល័យគ្រប់គ្រងផ្សារបានបញ្ជាឱ្យហាងភេសជ្ជៈ Mixue Bingcheng ធ្វើការលាងសម្អាត និងបាញ់ថ្នាំសម្លាប់មេរោគនៅបរិវេណជុំវិញភ្លាមៗ ដើម្បីទប់ស្កាត់ការឆ្លងមេរោគ ។

បន្ទាប់មក មន្ត្រីការិយាល័យគ្រប់គ្រងផ្សារបានប្រាប់ឱ្យហាងភេសជ្ជៈ Mixue Bingcheng អប់រំអំពីបញ្ហាអនាម័យ, សុវត្ថិភាពបុគ្គលិក និងឥរិយាបថនៅកន្លែងការងារទៅកាន់បុគ្គលិកគ្រប់សាខា ។

ចំណែកម្ចាស់គ្រប់គ្រងហាងភេសជ្ជៈទទួលស្គាល់ថា បុគ្គលិករបស់ខ្លួនពិតជាបានលាងជើងក្នុងអាងលាងចានមែន ប៉ុន្តែបុគ្គលិករូបនេះគ្មានចេតនាទេ ដោយសារតែជើងរលាកទឹកក្តៅពេលកំពុងធ្វើការ ។ ម្យ៉ាងទៀត វាបន្ទាន់ខ្លាំងពេក និងរកទឹកត្រជាក់ពុំទាន់ ទើបបុគ្គលិកលាងជើងក្នុងអាងលាងចានបែបនេះ ៕