ក្លឹបហាត់ប្រាណមួយកន្លែងកំពុងតែផ្ទុះនូវការចាប់អារម្មណ៍យ៉ាងខ្លាំងក្នុងចំណោមមហាជន ដោយប្រទះឃើញថា អ្នកដែលបានមកហាត់ប្រាណនៅទីនោះគ្រប់ៗគ្នាសុទ្ធតែបានស្លៀកសំពត់បត់ខ្មែរ ជាហេតុនាំឲ្យមានមតិលើកឡើងព្រោងព្រាត ថាគួរតែស្លៀកបែបនេះឬបែបនោះទើបត្រឹមត្រូវ។
កាលពីថ្ងៃទី ២៥ ខែកក្កដា គណនីមួយដែលមានឈ្មោះថា Son Dara គឺបានដាក់បង្ហោះខ្លឹមសារមួយឃ្លាថា «ស្រីៗ (some)ទៅហាត់ប្រាណ ស្លៀកពាក់អោយល្មមៗបានហើយ គ្មានអាណាគេទៅប៉ះ (ប៉ាន់) យើងទេ តែសូមផ្តល់តម្លៃដល់ខ្លួននិងអាណិតដល់ភ្នែករបស់មនុស្សប្រុសខ្លះផង។ កន្លែងហាត់ប្រាណមិនមែនជាកន្លែងបង្ហាញទម្រង់ (ប៉ាន់) លើគោកទេ»។
ជាការឆ្លើយតបឬក៏យ៉ាងណា? កាលពីថ្ងៃទី ២៦ ខែកក្កដា គណនីមួយទៀតដែលមានឈ្មោះថា Seak Himeng គឺបានបង្ហោះវីដេអូខ្លីមួយ ដែលបង្ហាញពីសកម្មភាពខ្លះៗរបស់សិស្សក្នុងក្លឹបហាត់ប្រាណមួយកន្លែង។ ដោយសង្កេតឃើញថា ក្រុមអ្នកហាត់ប្រាណស្រីៗមានគ្នាប្រមាណនឹង ៥នាក់ កំពុងតែមមាលញឹកក្នុងការធ្វើចលនាហាត់ប្រាណ ដោយធ្វើការលើកដុំដែកនៅលើដៃទាំងសងខាង។ អ្វីដែលជាទីចាប់អារម្មណ៍ខ្លាំងបំផុតនោះ អ្នកហាត់ប្រាណគ្រប់គ្នាទីនោះសុទ្ធតែបានស្លៀកសំពត់បត់យ៉ាងសមសួន ព្រមជាមួយនឹងការពាក់អាវហាត់ប្រាណដែលគេនិយមពាក់ជាទូទៅ។
យ៉ាងណាមិញ តាមរយៈវីដេអូនេះ មនុស្សជាច្រើនហាក់មានចម្ងល់ជាពន់ពេក ព្រោះថាជាធម្មតា នៅពេលហាត់ប្រាណ គេតែងក្រឡេកឃើញតែអ្នកដែលពាក់ខោអាវកីឡា អាវរឹបរាង ឬខោអាវយឺតទូទៅ ដើម្បីងាយស្រួលដល់ការហាត់ ក៏ដូចជាក្នុងការលេងឧបករណ៍កីឡាផ្សេងៗ។ ដោយឡែក អ្នកហាត់ប្រាណស្រីៗមួយក្រុមនេះ បានស្លៀកសំពត់បត់ដើម្បីហាត់ប្រាណទៅវិញ ទើបបានបង្កឲ្យមានការចាប់អារម្មណ៍និងមតិលើកឡើងព្រោងព្រាត។
ជាមួយគ្នានោះ មតិមួយបានលើកឡើងថា«សំពត់ហូលបែបខ្មែរមិនគួរយកមកហាត់ប្រាណបែបនោះទេ!!(វាខុស)។ អាវកាក់ & ស្បែកជើង នុង វាសមនឹងខោរឹបរាងបានត្រូវ!! គួរពិចារណាពីវប្បធម៍ សំលៀកបំពាក់ផង»។ អ្នកខ្លះថា«ចូលចិត្តយកអ្វីដែលជាវប្បធម៌របស់ខ្មែរ ទៅប្រើក្នុងន័យឌឺដងផ្លែផ្កាគ្នាម៉េស ជ្រុលចឹងមិនយកហូលទាំងក្បិនទៅ ឈ្លោះតែគ្នាឯងរឿងប៉ាន់ រឿងដបសោះ តែទៅទាញយករបស់វប្បធម៌ទៅបញ្ឈឺឌឺដងលេងសើច»។
អ្នកខ្លះទៀតថា«សំពត់បត់ស្លៀកសំរាប់កម្មវិធីផ្សេងៗ បើយកមកស្លៀកអញ្ចឹងមិនមែនអោយតំលៃហូលផាមួងខ្មែរទេ គឺមើលងាយហូលផាមួងខ្មែទៅវិញទេ»។ ស្របពេលម្នាក់ទៀតថា«ពេលខ្ញុំហាត់ប្រាណខ្ញុំពាក់ខោគេនរឹបតែអាវរាងវែង ព្រោះដូចរអៀសខ្លួនម៉្យាងស្រួលហាត់ ឃើញគេពាក់អាវចេញដើមទ្រូង ខោរឹបឡើងចេញលើគោក ខ្ញុំអៀនជំនួសតែសរសើរ ពេលខ្លះដល់មនុស្សប្រុសនិយាយក៏ត្រូវដែរ គេមិនមែនអោយស្លៀកហូល ផាមួងទេ ឈុតហាត់ប្រាណគេមានធម្មតាៗពាក់តើ»។
យ៉ាងណាមិញ គណនី Seak Himeng ក៏បានបញ្ជាក់បន្ថែមទៀតថា «វីដេអូនៃការផុសនេះមិនបានឌឺដងអ្វីទេ ដោយសារបងៗដែលមកហាត់នាំគ្នាកាត់ឈុតសម្រាប់ទៅវត្តជុំគ្នា ហើយក៏យកមកស្លៀកមើលនៅក្លឹបបន្ទាប់ពីហាត់ចប់។ហើយក៏មិនបានគិតទៅលើការឌឺនរណាគេដែរ»៕
