ប្រទេសថៃ ៖ បើតាមការផ្សព្វផ្សាយក្នុងបណ្តាញសង្គម TikTok កាលពីថ្ងៃទី១៩ ខែមិថុនា ឆ្នាំ២០២៤ ឱ្យដឹងថា នាយកដ្ឋានប៉ូលិសអន្តោប្រវេសន៍ថៃបានបញ្ជាឱ្យមន្ត្រីនៅក្រោមបង្គាប់ចាត់វិធានការក្តៅលើពលករបរទេស ដែលលួចចូលមករស់នៅប្រទេសថៃខុសច្បាប់ និងដណ្តើមការងាររបស់ពលរដ្ឋថៃ ។ ការចាត់វិធានការនេះ គឺតាមរយៈការចុះត្រួតពិនិត្យនៅតាមកន្លែងប្រកបអាជីវកម្មតូច-ធំ ជាពិសេស កន្លែងលក់ចំណីអាហារតាមផ្លូវ ។

លោក ណាផាត់ផុង ខូស៊ីតសុរិយៈម៉ានី នាយកការិយាល័យប៉ូលិសអន្តោប្រវេសន៍ខេត្តឈុនបុរី បានបញ្ជាឱ្យប៉ូលិសផ្នែកស៊ើបអង្កេតខេត្តឈុនបុរី ចុះត្រួតពិនិត្យអាផាតមិន គ្មានឈ្មោះមួយកន្លែង ដែលមានទីតាំងស្ថិតនៅឃុំណងព្រឺ ស្រុកបានឡាមុំ ខេត្តឈុនបុរី ក្រោយពីទទួលបានសេចក្តីរាយការណ៍ថា មានពលករបរទេសយ៉ាងច្រើនមកស្នាក់នៅក្នុងអាផាតមិន នេះ ។

បើតាមសេចក្តីរាយការណ៍ឱ្យដឹងថា មានពលករបរទេសលួចចូលមកប្រទេសថៃដោយខុសច្បាប់ ហើយពួកគេតែងតែអុកឡុករំខានដល់ពលរដ្ឋថៃរស់នៅក្នុងបរិវេណនេះ ។ ក្រោយការចុះត្រួតពិនិត្យអាផាតមិន សមត្ថកិច្ចឱ្យដឹងថា អាផាតមិន នេះមានកម្ពស់៣ជាន់ និងមានជនជាតិមីយ៉ាន់ម៉ាចំនួន៥៥នាក់ និងឥណ្ឌា២នាក់ ។

តាមរយៈការត្រួតពិនិត្យឯកសារ គឺជនបរទេសទាំងនេះមានឯកសារត្រឹមត្រូវតាមច្បាប់ចំនួន៣២នាក់ រីឯជនជាតិមីយ៉ាន់ម៉ា២៥នាក់ គ្មានឯកសារជាប់ខ្លួនទេ ។ ហេតុនេះ សមត្ថកិច្ចក៏បានចាប់ខ្លួនជនជាតិមីយ៉ាន់ម៉ាទាំង២៥នាក់ និងចោទប្រកាន់ពីបទលួចលូចប្រទេសថៃដោយខុសច្បាប់ ព្រមទាំងចាប់ខ្លួនលោក វិជីត មីសេតធី អាយុ៤៨ឆ្នាំ ជាម្ចាស់អាផាតមិន ពីបទពុំបានជូនដំណឹងទៅការិយាល័យប៉ូលិសអន្តោប្រវេសន៍ អំពីការស្នាក់នៅរបស់ជនបរទេសក្នុងរយៈពេល២៤ម៉ោង ។

គួរបញ្ជាក់ថា បច្ចុប្បន្ន អាជ្ញាធរថៃបានរឹតបន្តឹង និងចាប់ខ្លួនពលករបរទេសធ្វើការខុសច្បាប់ ឬគ្មានឯកសារត្រឹមត្រូវគ្រប់ទីកន្លែង ជាពិសេស ចុះចាប់នៅតាមកន្លែងលក់ដូរតាមចិញ្ចើមផ្លូវ ដើម្បីចាត់វិធានការតាមផ្លូវច្បាប់ ។

អាជ្ញាធរបានសំណូមពរឱ្យពលរដ្ឋទាំងអស់រាយការណ៍មកសមត្ថកិច្ចជាបន្ទាន់ បើពួកគេឃើញពលករបរទេសធ្វើការខុសច្បាប់នៅកន្លែងណាមួយ ។ រីឯម្ចាស់អាជីវកម្មជនជាតិថៃ ដែលទទួលយកពលករបរទេសមកធ្វើការខុសច្បាប់ ក៏ត្រូវប្រឈមនឹងការដាក់ទោសដូចគ្នាដែរ ៕

បរទេស៖ កាលពីថ្ងៃទី១៦ ខែមិថុនា ឆ្នាំ២០២៤ នេះកីឡាកររបស់ពិភពលោក Messi បានសម្ពោធភេសជ្ជៈថ្មីរបស់ខ្លួនជាលើកដំបូងដែលជាភេសជ្ជៈផ្តល់ជាតិទឹកជំនាន់ក្រោយមានឈ្មោះថា Más+ ។ ភេសជ្ជៈនេះរួមបញ្ចូលគ្នានៃសារធាតុអេឡិចត្រូលីត វីតាមីន និងសារធាតុរ៉ែ ដែលមានតុល្យភាពជាមួយនឹងរសជាតិធម្មជាតិ គ្មានជាតិផ្អែម គ្មានជាតិគីមី និងគ្មានជាតិកាហ្វេអ៊ីនឡើយ។ Más+ គឺជាភេសជ្ជៈដែលបង្កើតឡើងដោយ Messi និង The Más+ Next Generation Beverage Co. រួមជាមួយនឹងអ្នកច្នៃប្រឌិតរសជាតិពី The Mark Anthony Group ។

Messi បានជ្រើសរើសឈ្មោះ Más+ ដោយសារឈ្មោះនេះមានភាពស៊ីសង្វាក់គ្នាជាមួយនឹងអាជីពរបស់លោក និងរបៀបរស់នៅរបស់លោក។ ភេសជ្ជៈ Más+ មានបួនរសជាតិគឺទីមួយ Más+ Orange d’Or រសជាតិក្រូចស្រស់ត្រូវបានបំផុសគំនិតដោយ Messi ឈ្នះពាន Ballon d’Or ៨ ដង និងទីពីរ Más+ Berry Copa Crush ត្រូវបានបំផុសគំនិតដោយពានរង្វាន់ Copa del Rey ចំនួនប្រាំពីររបស់ Messi ជាមួយក្រុម Barcelona និងការឈ្នះពានរង្វាន់ Copa America របស់លោកជាមួយប្រទេសអាហ្សង់ទីន។ Berry Copa Crush មានការលាយបញ្ចូលគ្នាដ៏ស្រស់ស្រាយនៃរសជាតិផ្លែប៊ឺរី និងផ្លែ cherry ដ៏ផ្អែមល្ហែម។

សម្រាប់ទីបីវិញនោះគឺ Más+ Limón Lime League ដែលមានរសជាតិផ្លែឈើស្រស់ និងរសជាតិក្រូចឆ្មារ។ វាត្រូវបានបំផុសគំនិតនៅពេលដែល Messi បានចំណាយពេលលេងនៅ UEFA Champions League ជាពេលដែលគាត់ឈ្នះបីដង។ រីឯទីបួនវិញគឺភេសជ្ជៈ Más+ Miami Punch ត្រូវបានបំផុសគំនិតដោយទីក្រុង Miami ដែលជាទីក្រុងរបស់កីឡាករនិងក្រុមគ្រួសាររបស់លោករស់នៅបច្ចុប្បន្ន។ Más+ Miami Punch មានរសជាតិផ្លែប៊ឺរី ជាមួយនឹងផ្លែម្នាស់ដ៏ស្រទន់។

ខ្សែប្រយុទ្ធវ័យ ៣៦ ឆ្នាំដែលជាស្ថាបនិកភេសជ្ជៈ Más+ បាននិយាយថា ភេសជ្ជៈនេះគឺមានជាតិទឹកច្រើនដែលជាតិទឹកគឺចាំបាច់បំផុតសម្រាប់សុខុមាលភាពទូទៅ។ ដូច្នេះមនុស្សគ្រប់គ្នាសមនឹងទទួលបានភេសជ្ជៈដែលមានគ្រឿងផ្សំល្អ គុណភាពខ្ពស់ និងរសជាតិដ៏ស្រស់ស្រាយទាំងនេះ។ គួរបញ្ជាក់ដែរថា បច្ចុប្បន្នភេសជ្ជៈថ្មីរបស់ Messi គឺមានលក់គ្រប់ទីកន្លែងនៃទីផ្សារសហរដ្ឋអាមេរិក ទោះជាយ៉ាងណាភេសជ្ជៈនេះគឺមិនទាន់មានលក់នៅក្នុងទីផ្សារអាស៊ីយើងទេ៕

ប្រទេសឥណ្ឌា ៖ ការត្រៀមខ្លួនរង់ចាំសេចក្តីស្លា.ប់ គឺជារឿងសំខាន់បំផុតសម្រាប់ពលរដ្ឋឥណ្ឌា ហើយសណ្ឋាគារមួយនេះសាងសង់ឡើងសម្រាប់ទទួលអ្នកត្រៀមខ្លួនស្លា.ប់តែប៉ុណ្ណោះ គឺមិនមែនសម្រាប់ឱ្យមនុស្សទូទៅស្នាក់នៅទេ ។ សណ្ឋាគារនេះមានទីតាំងនៅមិនឆ្ងាយប៉ុន្មានពីកំពង់ផែ «Manikarnika Ghat» ស្ថិតក្នុងទីក្រុង Varanasi ដែលមានការរៀបចំពិធីដឹងគុណព្រះ និងបូជាសាកស.ព នៅក្បែរនោះ ។

នៅពេលមានសមាជិកគ្រួសារឈឺធ្ងន់ដល់ដំណាក់កាលចុងក្រោយ បងប្អូនសាច់ញាតិនឹងដឹកអ្នកជំងឺធ្ងន់មកកាន់សណ្ឋាគារខាងលើ ដើម្បីឱ្យអ្នកដែលស្លាប់បានទៅកាន់សុគតិភព និងទៅកាន់ឋានដ៏ខ្ពង់ខ្ពស់ ។ ពួកគេមានជំនឿថា អ្នកមករង់ចាំសេចក្តីស្លាប់នៅទីនេះ នឹងបានទៅឋានសួគ៌ឆាប់រហ័សជាងអ្នកដែលពុំបានមករង់ចាំសេចក្តីស្លាប់ ។

សណ្ឋាគារនេះឈ្មោះ «The Death Hotels of Varanasi» បានទទួលអ្នកមករង់ចាំសេចក្តីស្លាប់ ជាពិសេស អ្នកកាន់សាសនាហិណ្ឌូ ដែលមានចិត្តលះបង់ចំពោះព្រះ ។ ពួកគេយល់ឃើញថា សេចក្តីស្លាប់ គឺគ្រាន់តែជាការដើរមួយជំហានប៉ុណ្ណោះ និងពុំគួរឱ្យភ័យខ្លាចឡើយ បើទោះជាមនុស្សមួយចំនួនបានធ្វើដំណើរពីកន្លែងឆ្ងាយៗ ប៉ុន្តែពួកគេមានគោលដៅមួយ គឺត្រូវធ្វើដំណើរទៅដល់ទីក្រុង Varanasi មុនពេលផុតដង្ហើម ។

ពាក្យថា «សណ្ឋាគារ» អាចជាពាក្យដែលមនុស្សទូទៅនឹកឃើញដល់ការស្នាក់នៅបន្ទប់ប្រណីតៗ ឬមានសេវាកម្មចម្រុះ ប៉ុន្តែសម្រាប់អ្នកកាន់សាសនាហិណ្ឌូវិញ បែរជាហៅទីនេះថា «Bhawan» មានន័យថា «ផ្ទះ» ហើយផ្ទះនេះឈ្មោះថា «Kashi Labh Mukti Bhawan» ។ សណ្ឋាគារមានទីតាំងស្ថិតនៅទីក្រុង Varanasi រដ្ឋ Uttra Pradesh ។

បើធ្វើដំណើរពីកំពង់ផែ Manikarnika Ghat ទៅសណ្ឋាគារដោយថ្មើរជើង គឺត្រូវចំណាយពេលប្រមាណ១៤នាទី ប៉ុន្តែបើជិះរថយន្តវិញ គឺចំណាយពេលត្រឹមតែ៧នាទីប៉ុណ្ណោះ ។ សណ្ឋាគារនេះផ្តល់កន្លែងស្នាក់នៅដល់ពលរដ្ឋឥណ្ឌាដែលមករង់ចាំសេចក្តីស្លាប់ត្រឹមតែ២០នាក់ក្នុង១ខែ ខណៈផ្លូវចូលសណ្ឋាគារវិញតូចចង្អៀត ហើយមានការធ្វើចរាចរទៅមកទាំងមនុស្ស និងសត្វគោ ។

នៅក្បែរសណ្ឋាគារនេះមានការរៀបចំពិធីរំលឹកគុណព្រះ ដែលមានពួកព្រាហ្មណ៍ ឬបុគ្គលមានចំណេះដឹងផ្នែកសាសនាជាអ្នកចាត់ចែងពិធីទាំងមូល ។ រីឯអ្នកចូលរួមក្នុងពិធីរំលឹកគុណព្រះ ពួកគេនឹងងូតទឹកជម្រះបាប, សូត្រធម៌ថ្វាយបង្គំព្រះ និងទូងស្គរផ្តល់សញ្ញាទៅព្រះ ជាដើម ។

Bhairav Nath Shukla ជាអ្នកគ្រប់គ្រងសណ្ឋាគារនេះអស់ជាង៤០ឆ្នាំ និយាយថា សណ្ឋាគារនេះមានកម្ពស់២ជាន់ ស្មើ១០បន្ទប់ ហើយការស្នាក់នៅសណ្ឋាគារគ្មានការចំណាយប្រាក់អ្វីទេសម្រាប់ពលរដ្ឋក្រីក្រ គឺពួកគេអាចស្នាក់នៅមិនលើស១៥ថ្ងៃ ។ សណ្ឋាគារត្រូវបានសាងសង់នៅឆ្នាំ១៩០៨ និងផ្តល់សេវាកម្មនៅឆ្នាំ១៩៥០ ដែលមានម្ចាស់ដើមឈ្មោះ Hari Ram Goenka និងក្រោយមក លក់ទៅឱ្យឈ្មោះ Jai Dayal Dalmia ។

អ្នកមកស្នាក់នៅក្នុងសណ្ឋាគារមួយចំនួនមានអាការៈធ្ងន់ធ្ងរជិតស្លាប់ ប៉ុន្តែពេលសាច់ញាតិនាំមកដល់ទីក្រុង Varanasi ហើយឃើញទន្លេគង្គា ពួកគេក៏ជាសះស្បើយ មានសុខភាពរឹងមាំ និងត្រឡប់ទៅផ្ទះវិញ ។ គ្រួសារខ្លះទៀតដឹកអ្នកជំងឺចុះឡើងជាច្រើនលើក ហើយចុងក្រោយ ពួកគេក៏រង់ចាំឱ្យអ្នកជំងឺស្លាប់នៅផ្ទះ និងបូជា ទើបនាំឆ្អឹងមកបណ្តែតក្នុងទន្លេគង្គា ។

អ្នកគ្រប់គ្រងសណ្ឋាគារបន្តថា វាជាជំនឿពាក់ព័ន្ធនឹងការធ្វើដំណើរទៅកាន់លោកខាងមុខបន្ទាប់ពីសេចក្តីស្លាប់ ហើយសាកសពទាំងអស់នឹងដឹកចេញពីសណ្ឋាគារទៅកន្លែងរៀបចំពិធីបូជារួមគ្នា យ៉ាងហោចណាស់ ចំនួន១៥.០០០សព ៕

បរទេស៖ កាលពីថ្ងៃទី១៧ ខែមិថុនា ឆ្នាំ២០២៤ មានព្រឹត្តិការណ៍សាសនាដ៏ធំបំផុតមួយគឺធម្មយាត្រា Hajj បានទាក់ទាញអ្នកកាន់សាសនាឥស្លាមរាប់លាននាក់ពីទូទាំងពិភពលោកមកទីក្រុង Mecca ប្រទេសអារ៉ាប៊ីសាអូឌីត ដោយពិធីនេះតម្រូវឱ្យមនុស្សនៅខាងក្រៅវិហារអស់រយៈពេលជាច្រើនម៉ោងក្រោមពន្លឺព្រះអាទិត្យដ៏ក្ដៅគគុក។
យោងតាមទីភ្នាក់ងារព័ត៌មាន AFP បានរាយការណ៍ថា កម្តៅនៅទីក្រុង Mecca ដែលជាកន្លែងសក្ការៈរបស់សាសនាឥស្លាមក្នុងប្រទេសអារ៉ាប៊ីសាអូឌីតបានឡើងដល់កម្រិត ៥១,៨ អង្សារសេ ដែលបង្កគ្រោះថ្នាក់ដល់អាយុជីវិតមនុស្ស និងអ្នកធ្វើធម្មយាត្រាមកទីនេះ។

ជាការពិតណាស់កំដៅយូរបានបណ្តាលឱ្យអ្នកធម្មយាត្រាជាង ៥៥០ នាក់ស្លា.ប់ក្នុងនោះមាន ៣២៣ នាក់សុទ្ធតែមកពីប្រទេសអេហ្ស៊ីប។ អ្នកការទូតអារ៉ាប់ពីរនាក់ ក៏បានជូនដំណឹងដែរថា ក្នុងចំណោមអ្នកស្លាប់ទាំងអស់ មានតែមនុស្សម្នាក់ប៉ុណ្ណោះដែលបានស្លាប់ដោយសារការកកកុញនៅក្នុងហ្វូងមនុស្ស។ តាមការប៉ាន់ស្មានថា គិតត្រឹមថ្ងៃទី ១៦ ខែមិថុនា មនុស្សជាង ២ ពាន់នាក់ត្រូវបានគេបញ្ជូនទៅមន្ទីរពេទ្យដើម្បីព្យាបាលជំងឺទាក់ទងនឹងកម្ដៅ។

យោងតាមស្ថិតិរបស់ AFP ដោយផ្អែកលើរបាយការណ៍ពីប្រទេសដែលមានពលរដ្ឋស្លាប់ ចំនួនអ្នកស្លាប់បានកើនឡើងដល់ ៥៧៧ នាក់ហើយ។ អ្នកការទូតម្នាក់បាននិយាយថា កន្លែងបញ្ចុះសពដ៏ធំបំផុតរបស់ Mecca បច្ចុប្បន្នបានទទួលសាកសពចំនួន ៥៥០ នាក់។ ដូច្នេះដើម្បីទប់ទល់នឹងអាកាសធាតុក្តៅ រដ្ឋាភិបាលអារ៉ាប៊ីសាអូឌីត បានដាក់ចេញនូវវិធានការជាច្រើន ដើម្បីគាំទ្រអ្នកធ្វើធម្មយាត្រាដូចជា ការផ្តល់ទឹកដោយឥតគិតថ្លៃ និងការរៀបចំការ៉េម រួមទាំងមានកន្លែងចែកចាយទឹកត្រជាក់ផងដែរ។

មន្ត្រីក៏បានលើកទឹកចិត្តឱ្យអ្នកធ្វើធម្មយាត្រានាំយកឆ័ត្រ និងមួក ផឹកទឹកឱ្យបានគ្រប់គ្រាន់ និងកំណត់ការប៉ះពាល់នឹងពន្លឺព្រះអាទិត្យដោយផ្ទាល់ក្នុងរយៈពេលយូរ។
គួរបញ្ជាក់ដែរថា នៅឆ្នាំនេះមានមនុស្សប្រមាណ ១.៨ លាននាក់បានចូលរួមក្នុងធម្មយាត្រា Hajj រួមទាំង ១.៦ លាននាក់មកពីបរទេស។ ដូចដែលបានកត់សម្គាល់ដោយ AFP អ្នកធម្មយាត្រាជាច្រើនបានជ្រើសរើសទៅទីក្រុង Mecca ដោយសារកន្លែងនេះជាកន្លែងសក្ការៈរបស់សាសនាឥស្លាមដ៏ធំបំផុតមួយក្នុងប្រទេសអារ៉ាប៊ីសាអូឌីត៕

ប្រទេសណាមីប៊ី ៖ បើគេធ្វើដំណើរទៅដល់វាលខ្សាច់ Namib ប្រទេសណាមីប៊ី (Namibia ស្ថិតនៅភាគខាងលិចទ្វីបអាហ្វ្រិក) គេនឹងបានឃើញស្នាមរង្វង់មូលជាច្រើននៅពាសពេញវាលខ្សាច់នេះ ។ ប៉ុន្តែគ្មានអ្នកណាម្នាក់ដឹងថា តើរង្វង់មូលទាំងនេះកើតឡើងដោយរបៀបណា ឬអ្នកណាជាអ្នកបង្កើតវាឡើង?

ចំណែកមូលហេតុធ្វើឱ្យវាលខ្សាច់នេះមានស្នាមរង្វង់មូល គឺមានមតិលើកឡើងខុសៗគ្នា ដូចជា ៖ វាជាស្នាដៃរបស់មនុស្សក្រៅភព, កើតឡើងដោយសារផ្កាយធ្លាក់ពីលើមេឃ, នាគភ្លើង ឬទេវតាចុះមករាំរបាំជារង្វង់មូល ជាដើម ខណៈអ្នកវិទ្យាសាស្ត្រព្យាយាមស្រាវជ្រាវរាប់សិបឆ្នាំ អំពីមូលហេតុបង្កើតរង្វង់មូលនេះ ប៉ុន្តែនៅតែរកពុំឃើញ ។ ម្យ៉ាងទៀត រង្វង់មូលដ៏អាថ៌កំបាំងនេះកើតឡើងតែ២កន្លែងប៉ុណ្ណោះលើពិភពលោក គឺនៅវាលខ្សាច់ប្រទេសណាមីប៊ី និងប្រទេសអូស្ត្រាលី ។

រង្វង់មូលខាងលើឈ្មោះថា «Fairy Circles» ឬ «ចិញ្ចៀនទេវតា» គឺជាបាតុភូតធម្មជាតិគួរឱ្យភ្ញាក់ផ្អើលមួយ ដែលបានកើតឡើងនៅលើវាលខ្សាច់ប្រទេសណាមីប៊ី យ៉ាងអាថ៌កំបាំង ។ រង្វង់មូលទាំងអស់សុទ្ធតែមានអង្កត់ផ្ចិតតូច-ធំស្ថិតនៅផ្នែកខាងក្នុង ដែលមានទំហំចាប់ពី២ម៉ែត្រ រហូតដល់១៥ម៉ែត្រ ។

បើគេពិនិត្យមើលក្បែរៗរង្វង់មូលនឹងឃើញថា វាមានស្មៅដុះព័ទ្ធជុំវិញ ខណៈសណ្ឋានដីផ្នែកខាងក្នុងរង្វង់មូលមានសភាពរាំងស្ងួត និងគ្មានស្មៅដុះក្នុងនោះទេ ។ គេសន្និដ្ឋានថា រង្វង់មូលអាថ៌កំបាំងទាំងនេះកើតឡើងនៅតំបន់រាំងស្ងួតតែប៉ុណ្ណោះ ដូចជា ៖ នៅលើវាលខ្សាច់ Namib ប្រទេសណាមីប៊ី ។ ប៉ុន្តែកាលពីឆ្នាំ២០១៤ មានសេចក្តីរាយការណ៍ថា បានប្រទះឃើញរង្វង់មូល Fairy Circles នៅក្រៅទ្វីបអាហ្វ្រិកជាលើកដំបូង គឺនៅជិតទីក្រុង Newman ប្រទេសអូស្ត្រាលី ។

លោក Stefan Getsin អ្នកបរិស្ថានមកពីសាកលវិទ្យាល័យ Gottingen ប្រទេសអាល្លឺម៉ង់ បានស្រាវជ្រាវពីរង្វង់មូលកើតលើខ្សាច់នេះតាំងពីឆ្នាំ២០០០ និយាយថា ការលើកឡើងថា សត្វកណ្តៀរស៊ីឫសស្មៅនោះ មិនមែនជាការពិតទេ ព្រោះបើតាមការស្រាវជ្រាវពីឫសស្មៅ គឺគ្មានស្នាមកណ្តៀរស៊ីទេ ។ ប៉ុន្តែរង្វង់មូលកើតឡើងដោយសារនៅលើខ្សាច់គ្មានទឹកគ្រប់គ្រាន់សម្រាប់ឱ្យស្មៅដុះ ។

លោកបន្តថា ៖ «នាថ្ងៃអនាគត យើងនឹងប្រឈមជាមួយគ្រោះរាំងស្ងួតកាន់តែធ្ងន់ធ្ងរ ហើយរុក្ខជាតិត្រូវតែសម្របខ្លួនជាមួយការខ្វះខាតទឹកធ្ងន់ធ្ងរ ។ ដូច្នេះ រង្វង់មូលនៅលើវាលខ្សាច់ គឺជាគំរូនៃការស្តុកទឹកសម្រាប់រុក្ខជាតិក្នុងតំបន់នេះ» ។

សំណួរសួរថា តើរង្វង់មូល Fairy Circles កើតឡើងដោយរបៀបណានោះ គឺគ្មានអ្នកស្រាវជ្រាវណាម្នាក់អាចបកស្រាយបានទេ រហូតមកដល់បច្ចុប្បន្ន ។ ចំណុចគួរឱ្យចាប់អារម្មណ៍ខ្លាំង គឺហេតុអ្វីបានជារង្វង់មូលកើតឡើងតែ២កន្លែងប៉ុណ្ណោះនៅលើពិភពលោក? ហើយតើកន្លែងទាំងពីរនេះពាក់ព័ន្ធគ្នាដូចម្តេច? ហេតុនេះ អ្វីៗគ្រប់យ៉ាងនៅតែជាអាថ៌កំបាំង ៕

បរទេស៖ ស្រារបស់ប្រទេសអេស្ប៉ាញត្រូវបានគេរក្សាទុកក្នុងកោដ្ឋមួយដោយកប់ក្នុងផ្នូររ៉ូម៉ាំងរយៈពេល ២,០០០ ឆ្នាំស្រាប់តែប្រែទៅជាពណ៌ក្រហម ទោះជាយ៉ាងណាសម្រាប់រសជាតិគឺប្រៃបន្តិចប៉ុន្តែនៅតែអាចផឹកបាន។
យោងតាម Smithsonian ដែលបានចុះផ្សាយកាលពីថ្ងៃទី១៨ មិថុនាថា អ្នកបុរាណវត្ថុវិទូបានរកឃើញកោដ្ឋកញ្ចក់មួយដែលមានទុកនៅ សារធាតុរាវពណ៌ក្រហមជិត ៥ លីត្រ ខណៈពេលកំពុងជីកផ្នូររ៉ូម៉ាំងនៅទីក្រុង Carmona ខេត្ត Seville ប្រទេសអេស្ប៉ាញ ។

បន្ទាប់ពីបានរកឃើញភ្លាម អ្នកបុរាណវត្ថុវិទូក៏បានយកទៅវិភាគក្នុងមន្ទីរពិសោធន៍ ក្រុមការងារបានសន្និដ្ឋានថា សារធាតុរាវពណ៌ក្រហមនេះគឺធ្លាប់ជាស្រា ប៉ុន្តែបានផ្លាស់ប្តូរពណ៌ដោយសារវាត្រូវបានគេរក្សាទុកជាង ២ ពាន់ឆ្នាំមកហើយ។ លោក Rafael Ruiz Arrebola ដែលជាសហអ្នកនិពន្ធនៃសកលវិទ្យាល័យ Cordoba បាននិយាយថា “នេះជាលើកទីមួយហើយដែលសារធាតុរាវដូចនេះត្រូវបានរកឃើញ”។ Rafael បានបន្តថា វាក៏ជាស្រាចំណាស់ជាងគេបំផុតមិនធ្លាប់មាននៅក្នុងប្រទេសអេស្ប៉ាញផងដែរ។

នៅក្នុងមន្ទីរពិសោធន៍ ក្រុមការងារបានរកឃើញថា អង្គធាតុរាវមាន pH 7.5 ស្រដៀងនឹងទឹក ទោះជាយ៉ាងណាក៏ដោយសមាសធាតុគីមីរបស់វាគឺស្រដៀងទៅនឹងស្រាជាង។ Rafael បាននិយាយថា ស្រាប្រែទៅជាពណ៌ក្រហមដែលមានអាយុកាលជាង ២ ពាន់ឆ្នាំនេះនៅតែអាចផឹកបាន ដោយវាមិនមានជាតិពុលឡើយ គ្រាន់តែមានជាតិប្រៃបន្តិច។

ស្រានេះត្រូវបានមនុស្សជំនាន់មុនផលិតពីទំពាំងបាយជូរពណ៌សកប់វាក្នុងផ្នូររ៉ូម៉ាំងជាមួយអ្នកស្លាប់ ដោយគេជឿថា នឹងអាចបំបាត់ការស្រេកទឹកពីមនុស្សដែលបានស្លាប់។ គួរបញ្ជាក់ដែរថា មុនពេលការរកឃើញថ្មីនេះ ស្រាដែលចំណាស់ជាងគេបំផុតក្នុងពិភពលោកនោះជាកម្មសិទ្ធិរបស់ “ពាងស្រាមួយ” នៅក្នុងផ្នូររ៉ូម៉ាំងមួយទៀតនៅជិត Speyer ប្រទេសអាឡឺម៉ង់ ដែលបានរកឃើញនៅឆ្នាំ ១៨៦៧ ដែលស្រាចំណាស់នោះត្រូវបានគេប៉ាន់ស្មានថាមានអាយុកាលប្រហែល ៨,០០០ ឆ្នាំ៕