បឹង Hillier គឺជាបឹងទឹកប្រៃមានពណ៌ផ្កាឈូក ដែលមានទីតាំងស្ថិតនៅភាគខាងលិចប្រទេសអូស្ត្រាលី ទោះជាយ៉ាងណា វាក៏ត្រូវបានគេចាត់ទុកថាបឹងដ៏ចម្លែកមួយ និងនៅតែស្ថិតក្នុងភាពអាថ៌កំបាំងនៅឡើយថា ហេតុអ្វីបានជាវាមានពណ៌បែបនេះ?

ក្នុងឆ្នាំ ១៨០២ អ្នករុករកជនជាតិអង់គ្លេសម្នាក់គឺបានរកឃើញ បឹង Hillier គឺជាបឹងមួយក្នុងចំណោមបឹងពណ៌ផ្កាឈូកទាំងប្រាំនៅរដ្ឋ Victoria ប្រទេសអូស្ត្រាលី ខណៈបឹងចម្លែកៗចំនួន៤ផ្សេងទៀតគឺរួមមាន Crosbie, Becking, Hardy និង Kenyon។ យ៉ាងណាមិញ បើទោះបីជាគេបានរកឃើញបឹងមានបាតុភូតចម្លែកបែបនេះជាច្រើនរយឆ្នាំទៅហើយ ប៉ុន្តែការពិតនៅក្រោយបឹងទាំងនេះនូវតែមិនទាន់មានអ្នកដឹងនៅឡើយនោះទេ។

កាលពីឆ្នាំ២០២២ អ្នកវិទ្យាសាស្រ្តមួយក្រុមក្នុងប្រទេសអូស្រា្តលីក៏បានធ្វើការពិសោធន៍ទៅលើគំរូទឹកនៅក្នុងបឹង Hillier នេះផងដែរ។ ក្រុមការងារបានធ្វើដំណើរការពិសោធន៍ ដើម្បីកំណត់អត្តសញ្ញាណសត្វដែលរស់នៅក្នុងបឹងផ្កាឈូកនោះ គឺឃើញថាមានពពួកបាក់តេរីសារាយ ឬមេរោគ ប្រភេទ extremophiles ជាង ៥០០ ដែលកំពុងរស់នៅ និងបន្តពូជនៅក្នុងបឹង។

អ្នកវិទ្យាសាស្រ្តមួយចំនួនជឿជាក់ថា បឹងពណ៌ផ្កាឈូកនេះទំនងជាកើតឡើងដោយបាតុភូតធម្មជាតិដ៏អស្ចារ្យ ដោយកម្រ និងស្មុគ្រស្មាញក្នុងការសិក្សាស្រាវជ្រាវបំផុត។ ស្របពេលដែលមនុស្សជាច្រើនបានប៉ាន់ស្មានថា វាប្រហែលជាមកពីកំហាប់អំបិលខ្ពស់ខ្លាំងពេកនៃបឹងនេះ ខណៈដែលកាំរស្មី UV ឆ្លុះមកទឹកកាន់តែក្តៅ ទើបបណ្តាលឲ្យមីក្រូសារពាង្គកាយដែលរស់ក្នុងបឹងនោះបំប្លែងខ្លួន បង្កើតបានជាបឹងឲ្យមានពណ៌ផ្កាឈូកបែបនេះ។

ទោះជាយ៉ាងណា ទឹកបឹងទំនងជាមិនបង្កគ្រោះថ្នាក់ដល់ស្បែកមនុស្សទេ ខណៈបឹងនេះត្រូវបានគេប្រើដើម្បីទាញយកអំបិលអស់រយៈពេលជាច្រើនឆ្នាំផងដែរ។ សព្វថ្ងៃនេះ បឹង Hillier គឺត្រូវបានគេទុកចោលនិងមិនអនុញ្ញាតិឲ្យភ្ញៀវទេសចរចូលទស្សនានោះទេ៕

ជឿថាប្រិយមិត្តភាគច្រើនប្រាកដជាបានដឹងហើយថា ភ្នំដែលខ្ពស់ជាងគេបំផុតនៅលើពិភពលោកនោះគឺជាភ្នំអេវឺរែស (Everest) ដែលមានកម្ពស់ ៨,៨៤៨ ម៉ែត្រស្ថិតនៅជួរភ្នំហិម៉ាល័យ។ ដោយសារភ្នំនេះនៅក្នុងប្រទេសនេប៉ាល់ និងទីបេ វាក៏ត្រូវបានគេចាត់ទុកជាភ្នំខ្ពស់បំផុតប្រចាំទ្វីបអាស៊ីផងដែរ។ ដូច្នេះហើយ តើមានភ្នំណាទៀតដែលជាប់ឈ្មោះជាភ្នំខ្ពស់បំផុត ប្រចាំទ្វីបនីមួយៗលើផែនដីយើង?

១.ទ្វីបអឺរ៉ុប៖ ភ្នំដែលត្រូវបានគេទទួលស្គាល់ថាជាភ្នំខ្ពស់ជាងគេប្រចាំទ្វីបអឺរ៉ុបនោះ គឺភ្នំអ៊ែលប្រឺស (Elbrus) ដែលមានកម្ពស់ ៥,៦៤២ ម៉ែត្រ។ វាមានទីតាំងស្ថិតនៅជួរភ្នំកាកាសឺស (Caucasus) ក្នុងតំបន់ភាគខាងត្បូងប្រទេសរុស្ស៉ី ក្បែរព្រំប្រទល់ប្រទេសហ្សកហ្ស៊ី។

២.ទ្វីបអាហ្វ្រិក៖ សម្រាប់ទ្វីបអាហ្វ្រិកវិញភ្នំដែលខ្ពស់ជាងគេគឺភ្នំកាលីម៉ាន់ចារ៉ូ (Kilimanjaro) នៅក្នុងប្រទេសតង់សានី គឺជាភ្នំខ្ពស់ជាងគេប្រចាំទ្វីបអាហ្រិ្វក ជាមួយកម្ពស់ ៥,៨៩៥ ម៉ែត្រ។ កាលីម៉ាន់ចារ៉ូ មានមាត់ភ្នំចំនួន ៣ រួមមានគីបូ (Kibo) ដែលនៅខ្ពស់ជាងគេ បន្ទាប់មកគឺម៉ាវែនហ្ស៉ី (Mawenzi) ដែលស្ថិតនៅកម្ពស់ ៥,១៤៩ ម៉ែត្រ និងស្ស៉ីរ៉ា (Shira) ដែលនៅទាបជាងកម្ពស់ ៤,០០៥ ម៉ែត្រ។ ភ្នំនេះគឺជាភ្នំដាច់តែឯង ដែលមិនស្ថិតនៅជួរភ្នំណាមួយឡើយ។

៣.ទ្វីបអូស្រ្តាលី៖ ភ្នំខ្ពស់ជាងគេប្រចាំទ្វីបអូស្រ្តាលី គឺភ្នំកូសៀស្កូ (Kosciuszko) នៅរដ្ឋញូសោតវែល (New South Wales) ដែលវាស្ថិតនៅជួរភ្នំស្នូវី (Snowy) ហើយមានកម្ពស់ ២,២២៨ ម៉ែត្រ។ ភ្នំកូសៀស្កូ គឺជាភ្នំទាបជាងគេបង្អស់ ក្នុងចំណោមភ្នំខ្ពស់ៗបំផុតប្រចាំទ្វីបទាំង ៧។

៤.ទ្វីបអង់តាក់ទិច៖ នៅទ្វីបទឹកកកនៃប៉ូលខាងត្បូងនេះ ក៏មានភ្នំខ្ពស់ជាងគេប្រចាំទីនោះផងដែរ គឺភ្នំឈ្មោះវីនសុន (Vinson) ដែលស្ថិតនៅជួរភ្នំអ៊ែលស្វស្ស (Ellsworth) និងមានកម្ពស់ ៤,៨៩២ ម៉ែត្រ។

៥.ទ្វីបអាមេរិកខាងត្បូង៖ ភ្នំអាកុងកាហ្កា (Aconcagua) ដែលស្ថិតនៅជួរភ្នំអង់ (Andes) ក្នុងខេត្តមែនដូហ្សា (Mendoza) នៃប្រទេសអាហ្សង់ទីន គឺជាភ្នំខ្ពស់ជាងគេប្រចាំទ្វីបអាមេរិកខាងត្បូង ជាមួយកម្ពស់ ៦,៩៦០ ម៉ែត្រ។ វាក៏ជាប់ឈ្មោះជាភ្នំខ្ពស់ជាងគេ នៅក្រៅទ្វីបអាស៊ី និងខ្ពស់ជាងគេបង្អស់ នៅតំបន់អាមេរិកទាំងមូលផងដែរ។

៦.ទ្វីបអាមេរិកខាងជើង៖ ភ្នំដែលខ្ពស់ជាងគេប្រចាំទ្វីបអាមេរិកខាងជើង គឺមានឈ្មោះថា ដេណាលី (Denali)។ កាលពីចន្លោះឆ្នាំ ១៩១៧-២០១៥ សហរដ្ឋអាមេរិកធ្លាប់បានហៅវាថាជា ភ្នំម៉ាកឃីនឡេ (McKinlay)។ ភ្នំនេះ ស្ថិតនៅជួរភ្នំអាឡាស្កា (Alaska) ក្នុងរដ្ឋអាឡាស្ការបស់សហរដ្ឋអាមេរិក ដោយមានកម្ពស់ ៦,១៩០ ម៉ែត្រ។

៧.ទ្វីបអាស៊ី៖ ភ្នំដែលខ្ពស់ជាងគេប្រចាំទ្វីបអាស៊ីយើងវិញ គឺភ្នំអេវឺរ៉េស (Everest) ជាមួយកម្ពស់ ៨,៨៤៨ ម៉ែត្រ ហើយក៏ជាប់ចំណាត់ថ្នាក់ជាភ្នំខ្ពស់ជាងគេបំផុតនៅលើពិភពលោកទាំងមូលផងដែរ។ ភ្នំនេះស្ថិតនៅជួរភ្នំហិមាល័យ (Himalaya) ដោយផ្នែកម្ខាងនៃភ្នំអេវឺរ៉េស គឺនៅក្នុងទឹកដីប្រទេសនេប៉ាល់ និងម្ខាងទៀតនៅក្នុងតំបន់ទីបេនៃប្រទេសចិន៕

ប្រទេសយេម៉ែន ៖ លោក Hashem Al-Ghaili គឺជាអ្នកទំនាក់ទំនងផ្នែកវិទ្យាសាស្ត្រដ៏ល្បីល្បាញនៅប្រទេសយេម៉ែន និងជាអ្នកបកស្រាយអំពីបាតុភូតវិទ្យាសាស្ត្រក្នុងបណ្តាញសង្គមផ្សេងៗ បានបង្ហាញគំនិតថ្មីមួយ គឺការបង្កើតសណ្ឋាគារដ៏ធំអណ្តែតលើអាកាសឈ្មោះ «Sky Cruise» ។ សណ្ឋាគារនេះនឹងអាចទទួលភ្ញៀវស្នាក់នៅរហូតដល់៥.០០០នាក់ ហើយផ្នែកខាងក្នុងមានសេវាកម្មគ្រប់យ៉ាង ដូចជា ៖ ក្លិបហាត់ប្រាណ និងអាងហែលទឹក ។

សណ្ឋាគារនេះអាចអណ្តែតនៅលើអាកាសបានរយៈពេលជាច្រើនឆ្នាំ តាមរយៈការប្រើប្រាស់ថាមពលនុយក្លេអ៊ែរ ។ បច្ចេកវិទ្យា AI នឹងគ្រប់គ្រងការអណ្តែតលើអាកាសរបស់សណ្ឋាគារដោយស្វ័យប្រវត្តិ ព្រមទាំងមានម៉ូទ័រយក្សយ៉ាងហោចណាស់ ជាង២០គ្រឿង ដើម្បីជួយឱ្យសណ្ឋាគារអណ្តែតលើអាកាសបាន ។ ម៉ូទ័រនីមួយៗនឹងប្រើប្រាស់ថាមពលអគ្គិសនីពីម៉ាស៊ីនប្រតិកម្មនុយក្លេអ៊ែរ ឬទទួលថាមពលពីការរលាយធាតុវិទ្យុសកម្មសម្រាប់ប្រើប្រាស់ជាថាមពលអគ្គិសនី ។

ហេតុនេះ វានឹងធ្វើឱ្យសណ្ឋាគារ Sky Cruise អាចអណ្តែតនៅលើអាកាសបានរយៈពេលជាច្រើនឆ្នាំ ដោយពុំចាំបាច់ចុះមកក្រោម ។ រីឯគ្រឿងម៉ាស៊ីនដែលនឹងប្រើប្រាស់ក្នុងសណ្ឋាគារ គឺពុំបញ្ចេញកាបូនឌីអុកស៊ីតមកក្រៅទេ ហើយគំនិតថ្មីនេះត្រូវបានគេចាត់ទុកថា គឺជាការប្រើប្រាស់ថាមពលស្អាត និងពុំបញ្ចេញជាតិពុលបង្កផលប៉ះពាល់ដល់បរិយាកាស ។

ចំណែកនៅផ្នែកខាងក្នុងសណ្ឋាគារ គឺមានបន្ទប់ស្នាក់នៅ, សម្ភារៈប្រើប្រាស់, អាងហែលទឹក, ហាងលក់ទំនិញធំៗ, រោងភាពយន្ត, ភោជនីយដ្ឋាន និងបារ ។ គេអាចហៅសណ្ឋាគារនេះថា គឺជាទីក្រុងតូចមួយក៏បាន ដោយសារផ្នែកខាងក្នុងមានសេវាកម្មគ្រប់បែបយ៉ាងសម្រាប់ភ្ញៀវស្នាក់នៅ ។ លើសពីនេះ នៅតាមចំណុចជាច្រើនក្នុងសណ្ឋាគារ ភ្ញៀវនឹងអាចគយគន់ទិដ្ឋភាពដ៏ស្រស់ស្អាតលើអាកាសបាន ។

អ្នកផ្តួចផ្តើមគំនិតបង្កើតសណ្ឋាគារអណ្តែតលើអាកាស លោក Hashem Al-Ghaili និយាយថា សណ្ឋាគារនេះអាចទទួលភ្ញៀវស្នាក់នៅប្រមាណ៥.០០០នាក់ ហើយពួកគេនឹងទទួលបានអារម្មណ៍រីករាយ និងបទពិសោធន៍ថ្មីក្នុងជីវិត ។ ភ្ញៀវអាចប្រើប្រាស់សេវាកម្មគ្រប់បែបយ៉ាងនៅទីនេះ ហាក់ដូចជាពួកគេកំពុងរស់នៅក្នុងទីក្រុងតូចមួយដែរ គឺពួកគេអាចជួបជុំមិត្តភក្តិ ឬបន្ធូរអារម្មណ៍ ខណៈផ្នែកខាងក្រោយសណ្ឋាគារនឹងមានកន្លែងមើលពពកគ្រប់ជ្រុងទាំងអស់ ។

លោក Hashem Al-Ghaili ជឿជាក់ថា សណ្ឋាគារនេះនឹងលេចរូបរាងលឿនបំផុត គឺមិនលើសពី២០ឆ្នាំទេ បើគិតចាប់ពីឆ្នាំ២០២៤ ពីព្រោះសមត្ថភាពរបស់មនុស្ស រួមបញ្ចូលជាមួយបច្ចេកវិទ្យាផ្នែកវិទ្យាសាស្ត្រកាន់តែរីកចម្រើនពីមួយថ្ងៃទៅមួយថ្ងៃ វានឹងធ្វើឱ្យការបង្កើតសណ្ឋាគារអណ្តែតលើអាកាសពោរពេញទៅដោយភាពច្នៃប្រឌិត ៕

សហរដ្ឋអាមេរិក ៖ កាលពីថ្ងៃទី១៩ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា គណៈកម្មការគ្រប់គ្រងប្រចាំទីក្រុងសេនហ្វ្រេនស៊ីស្កូ រដ្ឋកាលីហ្វ័រញ៉ា សហរដ្ឋអាមេរិក បានបោះឆ្នោតជាឯកច្ឆ័ន្ទប្រកាសប្រើប្រាស់ភាសាវៀតណាមជាភាសាផ្លូវការនៅទីក្រុងសេនហ្វ្រេនស៊ីស្កូ និងមានសេវាកម្មបកប្រែភាសាផងដែរ ។ ការប្រកាសនេះ ដើម្បីផ្តល់ភាពងាយស្រួលដល់ពលរដ្ឋវៀតណាមរស់នៅក្នុងទីក្រុង ស្មើជាង៦.០០០នាក់ ។

កាសែតអាមេរិកឈ្មោះ The San Francisco Chronicle រាយការណ៍ថា ការសម្រេចចិត្តដាក់បញ្ចូលភាសាវៀតណាមជាភាសាផ្លូវការនេះ គឺដើម្បីឱ្យសហគមន៍ជនអន្តោប្រវេសន៍អាចទទួលយកសេវាកម្មផ្សេងៗរបស់រដ្ឋាភិបាលអាមេរិក ។ ក្រៅពីនេះ អាជ្ញាធរទីក្រុងសេនហ្វ្រេនស៊ីស្កូ នឹងត្រូវបកប្រែសេចក្តីប្រកាសរបស់រដ្ឋាភិបាលទៅជាភាសាវៀតណាមផងដែរ ។

ការបកប្រែសេចក្តីប្រកាសជាភាសាវៀតណាមនេះ គឺសម្រាប់ផ្តល់ភាពងាយស្រួលដល់សហគមន៍ជនជាតិវៀតណាមរស់នៅទីនេះ ដូចគ្នានឹងភាសាចិន, អេស្ប៉ាញ និងហ្វីលីពីន ហើយមនុស្សគ្រប់គ្នាអាចទទួលយកសេវាកម្មផ្សេងៗ តាមរយៈការអានភាសារបស់ខ្លួន ។

យោងតាមទិន្នន័យផ្នែកភាសារបស់ទីក្រុងសេនហ្វ្រេនស៊ីស្កូបង្ហាញថា មានអ្នករស់នៅទីក្រុងសេនហ្វ្រេនស៊ីស្កូ ប្រមាណ៦.៨០០នាក់ និយាយភាសាវៀតណាមជាភាសាទី១ ទើបធ្វើឱ្យសេវាកម្មផ្សេងៗក្នុងទីក្រុងនេះត្រូវបកប្រែពីភាសាអង់គ្លេសទៅជាភាសាវៀតណាម ដូចជា ៖ ការបកប្រែខ្លឹមសារក្នុងគេហទំព័រ និងការជូនដំណឹងផ្សេងៗរបស់រដ្ឋាភិបាល ។

កាលពីឆ្នាំ២០២៣ លោក Shamann Walton ជាមន្ត្រីគណៈកម្មការគ្រប់គ្រងប្រចាំទីក្រុងសេនហ្វ្រេនស៊ីស្កូ ធ្លាប់បានស្នើឱ្យដាក់បញ្ចូលភាសាវៀតណាមជាភាសាផ្លូវការក្នុងតំបន់ចំនួន១០ ដោយសារលោកយល់ឃើញថា ទីក្រុងនេះត្រូវបន្ថែមភាសាផ្សេងទៀតក្រៅពីភាសាអង់គ្លេស ដើម្បីឱ្យសហគមន៍ជនអន្តោប្រវេសន៍អាចចូលរួមក្នុងសកម្មភាពផ្សេងៗរបស់រដ្ឋាភិបាល ។

គួរបញ្ជាក់ថា ទីក្រុងសេនហ្វ្រេនស៊ីស្កូសម្បូរទៅដោយសហគមន៍ជនអន្តោប្រវេសន៍ចម្រុះជាតិសាសន៍រស់នៅ ។ ហេតុនេះ ទើបសេវាកម្មផ្សេងៗក្នុងទីក្រុងនេះបានបកប្រែពីភាសាអង់គ្លេសទៅជាភាសារបស់ជនអន្តោប្រវេសន៍ ៕

ប្រទេសវៀតណាម ៖ បុរសចំណាស់ម្នាក់រស់នៅប្រទេសវៀតណាមរៀបរាប់ថា លោកបានទុកក្រចកអស់រយៈពេល៣៣ឆ្នាំ ហើយលោកស្រឡាញ់ និងថែទាំវាខ្លាំងណាស់ ពុំហ៊ានឱ្យបាក់ទេ ។ ជារៀងរាល់ថ្ងៃ ភរិយារៀបចំខ្លួនឱ្យលោកទាំងអស់ ដូចជា ៖ ស្លៀកពាក់ និងងូតទឹក ជាដើម ហើយលោកនឹងលក់វាទៅឱ្យអ្នកចាប់អារម្មណ៍ ក្នុងតម្លៃជាង២៧ម៉ឺនដុល្លារអាមេរិក ។

កាលពីថ្ងៃទី១៩ ខែមិថុនា ឆ្នាំ២០២៤ សារព័ត៌មានវៀតណាមរាយការណ៍ថា លោក Luu Cong Huyen អាយុ៦៦ឆ្នាំ ជាវិចិត្រករ រស់នៅខេត្តណាំឌិញ គឺជាបុរសដែលមានក្រចកវែងបំផុត ដោយសារលោកបានទុកវាអស់រយៈពេល៣៣ឆ្នាំ ។ លោក Luu ស្រឡាញ់ក្រចកខ្លាំងណាស់ បើទោះជាពេលខ្លះ លោកធ្លាក់ពីទីខ្ពស់មកក្រោមបាក់ឆ្អឹងឆ្អែង ក៏លោកនៅតែបារម្ភពីក្រចកដែរ ។

រយៈពេលជាច្រើនឆ្នាំមកនេះ លោក Luu ពុំធ្លាប់លាងដៃរបស់ខ្លួនទេ ពីព្រោះខ្លាចបាក់ក្រចក ទើបគេឃើញក្រចករបស់លោកពោរពេញទៅដោយពណ៌ និងកំទេចដីក្នុងនោះ ។ បើទោះជាបច្ចុប្បន្ន ក្រចករបស់លោកវែងខ្លាំងក្តី ក៏លោកបានធ្វើការយ៉ាងមានជំនាញពុំចាញ់អ្នកមានក្រចកខ្លីទេ គឺលោកបានគូរគំនូរចំណាយពេលត្រឹមតែ១នាទីប៉ុណ្ណោះ ហើយលោកក៏បានបង្កើតស្នាដៃសិល្បៈជាច្រើនទៀតក្នុងសហគមន៍ ។

នៅពីក្រោយភាពជោគជ័យរបស់លោក គឺលោកបានអរគុណភរិយាយ៉ាងខ្លាំងដែលបានជួយថែទាំលោកយ៉ាងល្អ ។ ជារៀងរាល់ថ្ងៃ ភរិយាបានចេញទៅធ្វើការខាងក្រៅជាមួយលោក ហើយពេលត្រឡប់មកផ្ទះវិញ ភរិយាក៏បានចម្អិនអាហារ និងធ្វើការងារផ្ទះសព្វគ្រប់ ខណៈលោកវិញអង្គុយស្ងៀមៗ ។ លោកប្រាប់ថា បើពេលយប់ លោក និងភរិយាពុំបានសម្រាកក្នុងបន្ទប់ជាមួយគ្នាទេ ព្រោះខ្លាចបាក់ក្រចក ។

លោកបន្តថា ភរិយាបានជួយងូតទឹករៀបចំខ្លួនឱ្យលោក ហើយការរៀបចំខ្លួនម្តងៗបានចំណាយពេលចាប់ពី១០នាទី ទៅ១៥នាទី ជាពិសេស ត្រូវប្រយ័ត្នក្នុងពេលពាក់អាវ ។ បើថ្ងៃណា លោកប្រញាប់ទៅធ្វើការពីព្រលឹម គឺលោកត្រូវងើបរៀបចំខ្លួនតាំងពីយប់ ដោយសារវាលំបាក ។ ពេលខ្លះ លោកបានស្រែកដាក់ភរិយា ហើយភរិយាក៏ស្រែកដាក់វិញ ហើយប្រាប់ឱ្យលោកកាត់ក្រចក ដើម្បីកុំឱ្យកើតបញ្ហា ។

ភរិយារបស់លោក Luu និយាយទាំងទឹកមុខញញឹមថា ៖ «គាត់ជាស្វាមីរបស់ខ្ញុំ ទើបខ្ញុំត្រូវជួយថែទាំគាត់យ៉ាងហត់នឿយបន្តទៀត ។ អ្នកផ្សេងបបួលខ្ញុំទៅដើរលេងសម្រាកលំហែរកាយ តែខ្ញុំទៅអត់បាន ព្រោះត្រូវនៅផ្ទះមើលគាត់ ។ ខ្ញុំស្រឡាញ់គាត់ ព្រោះគាត់ជាមនុស្សឧស្សាហ៍ធ្វើការ មិនផឹកស្រា មិនជក់បារី មិនរអ៊ូរទាំ ហើយហូបអ្វីងាយៗ ។ គាត់ប្រឹងប្រែងរកប្រាក់ចិញ្ចឹមគ្រួសារ និងបញ្ជូនកូន៤នាក់ទៅសាលារៀន» ។

ភរិយាបន្តថា ស្វាមីស្រឡាញ់ក្រចកខ្លាំងណាស់ ដោយសារបានទុកវាយូរឆ្នាំ ទើបស្វាមីពុំចង់កាត់វាចេញ ។ កន្លងមក ស្វាមីធ្លាប់ធ្វើឱ្យក្រចកបាក់ ស្រាប់តែគាត់មិនសប្បាយចិត្ត និងឈឺអស់ជាច្រើនថ្ងៃ គ្មានកម្លាំងកំហែងធ្វើការបន្ត ។ ថ្ងៃមួយ គាត់កំពុងតែធ្វើការសុខៗ ស្រាប់តែធ្លាក់ពីទីខ្ពស់ប្រមាណ៦ម៉ែត្រ ពេលនោះ គាត់ក៏ប្រញាប់លើកដៃឡើងលើកុំឱ្យបាក់ក្រចក ប៉ុន្តែគាត់ពុំបារម្ភពីឆ្អឹងបាក់ទេ ។

បច្ចុប្បន្ន កូនៗបានសំណូមពរឱ្យឪពុកកាត់ក្រចកដៃចេញ ប៉ុន្តែលោកនៅតែស្រឡាញ់ក្រចកវែងបែបនេះ ។ លោក Luu និយាយថា បើមានអ្នកចាប់អារម្មណ៍ចង់ទិញក្រចកវែង លោកនឹងលក់ក្នុងតម្លៃ៧ពាន់លានដុង (ឬស្មើជាង២៧ម៉ឺនដុល្លារអាមេរិក) ។

លោកនិយាយថា ៖ «ពេលនេះ ខ្ញុំមានទម្លាប់នឹងក្រចកវែងហើយ គួរឱ្យសោកស្តាយបើកាត់វាចោល ព្រោះទម្រាំបានក្រចកវែងបែបនេះ ខ្ញុំបានចំណាយពេលមិនតិចឆ្នាំទេ ។ ការពិត ខ្ញុំបារម្ភ និងចង់កាត់វាចោលដែរ ដោយសារស្រឡាញ់ភរិយា តែពេលដឹងថា ភរិយាថែទាំខ្ញុំបានល្អគ្រប់សព្វ ទើបខ្ញុំឈប់គិតបែបនេះ» ៕