ភាពចម្រូងចម្រាស់ទាក់ទងនឹងវប្បធម៌ប្រពៃណីរវាងជនជាតិខ្មែរនិងថៃនូវតែជាប្រធានបទក្តៅនៅលើបណ្តាញសង្គម ខណៈកាលពីពេលថ្មីៗនេះជនបរទេសមួយរូប បានធ្វើការស្រាយចម្ងល់ដោយផ្អែកលើសៀវភៅកំណត់ត្រាបារាំង ទៅលើរូបថតស្រ្តីជំនាន់ដើមម្នាក់ ដែលតែងតែមានការយល់ច្រឡំកន្លងមក ថាជាជាតិសាសន៍ខ្មែរឬក៏ថៃ។
យោងតាមការបង្ហោះនៅលើបណ្តាញសង្គម Tik Tok ដោយបុរសជនបរទេសម្នាក់ មានឈ្មោះថា Jeremine KC មានអ្នកតាមដាន ២.៨ លាននាក់ បានលើកឡើងអំពីរូបស្រ្តីជំនាន់ដើមម្នាក់ដែលបាននឹងកំពុងទទួលបាននូវ
ភាពល្បីល្បាញយ៉ាងខ្លាំងទាំងនៅក្នុងប្រទេសថៃនិងកម្ពុជា។ ខណៈស្រ្តីរូបនេះក៏ត្រូវបាន Website ថៃជាច្រើនចុះផ្សាយថា នាងគឺជាស្រ្តីសៀមជំនាន់ដើម ព្រោះបើមើលទៅលើការស្លៀកពាក់ និងស្តាយ៍ម៉ូតសក់ ហើយថែមទាំងថា នាងគឺជាអ្នកនិពន្ធដ៏ល្បីល្បាញរបស់សៀមក្នុងអំឡុងឆ្នាំ១៨២៥ទៀតផង។ ទោះជាយ៉ាងណា ភាគីខាងខ្មែរក៏បានអះអាងផងដែរថា ស្រ្តីក្នុងរូបនេះគឺជាជាតិសាសន៍ខ្មែរទៅវិញនោះទេ។
យោងតាមសម្តីរបស់លោក Jeremine ដែលបានសិក្សាទៅលើសៀវភៅបារាំង Le CAMBODGE និពន្ធដោយលោក Le Fauchueur ជនជាតិបារាំង ក្នុងឆ្នាំ១៨៧២ បានឲ្យដឹងថាលោក Le Fauchueur ដែលអ្នកនិពន្ធសៀភៅមួយនេះផ្ទាល់គឺធ្លាប់បានមករស់នៅប្រទេសកម្ពុជារយៈពេល៩ឆ្នាំកាលគ្រានោះ ហើយមានទំនាក់ទំនងយ៉ាងជិតស្និតជាមួយនឹងខ្សែស្រឡាយព្រះមហាក្សត្រខ្មែរ គឺព្រះបាទនរោត្តមទី១ ។
ជនបរទេសរូបនេះបានបន្តទៀតថា នៅក្នុងខ្លឹមសាររបស់សៀវភៅនេះ គឺបានសរសេររៀបរាប់អំពីទំនៀមទម្លាប់គ្រួសារស្តេចនិងប្រជាជនខ្មែរ ក៏ដូចជាមានប្រៀបធៀបរវាងជាតិសាសន៍ខ្មែរនិងសៀម។ សៀវភៅនេះបានកត់ត្រាទៀតថា កាលជំនាន់នោះ ខ្មែរមានចរិតអង់អាច ក្លាហាន ចូលចិត្តប្រើអាវុធ និងបរបាញ់សត្វក្នុងព្រៃ ខុសពីសៀមដែលជាមនុស្សខ្ជិល និងមានរូបរាងដូចជាស្គមៗ។
នៅក្នុងសៀវភៅកំណត់ត្រាបារាំងនោះទៀតសោតគឺមានរូបរបស់មនុស្សស្រីម្នាក់ ដែលបានបញ្ជាក់យ៉ាងច្បាស់ៗថានាងជា«ស្រ្តីខ្មែរ ឈ្មោះថាមីសុខ» ហើយអ្នកដែលថតរូបនេះគឺលោក Emile Gsell ថតនៅព្រះបរមរាជវាំងនៅភ្នំពេញ អំឡុងឆ្នាំ១៨៦០៕
