ស្ថាប័ន Miss Universe Cambodia បានបង្ហាញបេក្ខភាពទី៣ជាផ្លូវការគឺជា ប្រាសាទ ដាវីន ដែលជាបេក្ខភាពមានសន្ទុះគាំទ្រច្រើនពីសំណាកអ្នកស្នេហាវិស័យបវរកញ្ញាចង់ឱ្យស្រ្តីរូបនេះតំណាងឱ្យកម្ពុជាប្រកួតនៅលើឆាកអន្តរជាតិម្តងទៀត។ ជាមួយគ្នានេះ ប្រាសាទ ដាវីន បានបង្ហាញអារម្មណ៍រំភើបចិត្តយ៉ាងខ្លាំងដោយសារតែមានការគាំទ្រពីទស្សនិកជនច្រើនខណៈរូបនាងក៏មានការតាំងចិត្តនិងធ្វើឱ្យបានល្អបំផុតដើម្បីមានឱកាសតំណាងកម្ពុជា។

យប់ថ្ងៃទី២៦ មិថុនា Miss Universe Cambodia បញ្ចេញបេក្ខភាពទី៣ គឺជាអ្នកនាង ប្រាសាទ ដាវីន មានអាយុ៣៣ឆ្នាំ បន្ទាប់ពីបេក្ខភាពទី១ មៀលីយ៉ាន បេក្ខភាពទី២ ឆន ស្រីណេត។ ក្នុងការបង្ហាញនេះស្ថាប័នបានឱ្យដឹងថា ប្រាសាទ ដាវីន បានឈានជើងដើរលើវិថីសិល្បៈតាំងពីអាយុ១៣ឆ្នាំ បានប្រឡូកយ៉ាងជោគជាំក្នុងវិស័យមួយនេះ ជាពិសេសការបង្ហាញម៉ូត។ ពីមួយពេលទៅមួយពេល នាងអភិវឌ្ឍខ្លួនទៅមុខជាលំដាប់ រហូតធ្វើឱ្យខ្លួនក្លាយជាស្ត្រីដ៏រឹងមាំ និងមានឥទ្ធិពលម្នាក់ ទាំងក្នុងការងារសិល្បៈ ការងារផ្ទាល់ខ្លួន និងការងារសង្គម។

ប្រាសាទ ដាវីន ជាតារាបង្ហាញម៉ូត ជាអ្នកជំនួញ ជាអ្នកដឹកនាំកម្មវិធី ជាម្ដាយ ជាអ្នកធ្វើការស្ម័គ្រចិត្ត ជាទូតសុច្ឆន្ទៈ -ល- ហើយនាងគឺជាឧទាហរណ៍ជាក់ស្ដែងនៃពាក្យថា «ស្ត្រីអាចធ្វើបានគ្រប់យ៉ាង»។ យ៉ាងណាក៏ដោយ នៅមានរឿងមួយទៀតដែលសុភាពស្ត្រីរូបនេះប្រាប់ថាមិនទាន់បានសម្រេច គឺការតំណាងកម្ពុជានៅលើឆាកកញ្ញាឯកចក្រវាល។

បន្ទាប់ពីប្រកាសជាផ្លូវការនេះហើយ បានធ្វើឱ្យអ្នកក្នុងចង្កោមស្នេហាវិស័យបវរកញ្ញា រំភើបចិត្តយ៉ាងខ្លាំងក្នុងការបោះជំហានរបស់ ប្រាសាទ ដាវីន លើឆាកចក្រវាល។ ជាមួយគ្នានេះដែរ ប្រាសាទ ដាវីន ក៏បានបង្ហាញអារម្មណ៍ដោយក្តីរំភើបចិត្តព្រោះតែទទួលបានការគាំទ្រពីសំណាកទស្សនិកជន។

ដាវីន បានសរសេរនៅលើបណ្តាញសង្គមថា «នាងខ្ញុំសូមអរគុណមិត្តភក្តិ បងប្អូន បណ្តាអ្នកគាំទ្រទាំងអស់ដែលបានបង្ហាញសារគាំទ្រដល់រូបនាងខ្ញុំ។ ពិតណាស់ក្នុងដំណើរឆ្ពោះទៅកាន់ការប្រកួតបវរកញ្ញាចក្កវាឡកម្ពុជានាឆ្នាំនេះ នាងខ្ញុំបានដាក់ការតាំងចិត្តខ្ពស់ និងធ្វើឱ្យបានល្អបំផុតដើម្បីមានឱកាសតំណាងឲ្យប្រទេសកម្ពុជារបស់យើង និងយកជ័យលាភីជូនបណ្តាអ្នកគាំទ្ររបស់នាងខ្ញុំទាំងអស់គ្នាដែរផងដែរ។ នាងខ្ញុំសង្ឃឹមថាបងប្អូននិងនៅតែបន្តការគាំទ្ររូបនាងខ្ញុំរហូតទៅ ហើយសារគាំទ្រល្អៗរបស់អ្នកទាំងអស់គ្នា គឺជាថាមពលវិជ្ជមានដ៏អស្ចារ្យរបស់ខ្ញុំ។ អរគុណបងប្អូន»។

គួរបញ្ជាក់ថា អ្នកនាង ប្រាសាទ ដាវីន ធ្លាប់តំណាងកម្ពុជាប្រកួតកម្មវិធី Universal Woman បានជាប់លំដាប់រងទី៤ លើទឹកដីទីក្រុងឌូបៃ។ នាងក៏ជាអ្នករៀបចំកម្មវិធី Universal Women 2024 លើទឹកដីកម្ពុជា និងជា ND Mister Friendship Cambodia 2023 បានបញ្ចូន លាវ វេងហួរ ទៅប្រកួតនិងបានយកឈ្នះកម្ពុជាក្លាយជា Mister Friendship International 2023លើទឹកដីប្រទេសថៃ៕

បវរកញ្ញា ភឹម ស្រីណូ Miss Grand Cambodia 2023 បានពោលពាក្យយ៉ាងរំជួលចិត្តទៅកាន់លោកស្រី អ៊ឹម សុគន្ធា ND Miss Grand Cambodia ដែលតែងតែមើលថែ ការពារនាងរហូតមកមិនថាមានរឿងអ្វីកើតឡើងក៏ដោយ។ ភឹម ស្រីនោ ក៏បានជូនពរបេក្ខភាពទាំង២៨រូបក្នុងការប្រកួត ខណៈមិនយូរទៀតទេថ្ងៃផ្ទេរតំណែងរបស់ ភឹម ស្រីនោ នឹងមកដល់ក្នុងពេលឆាប់ៗខាងមុខនេះ។

តាមរយៈវីដេអូមួយដែលបានចែកចាយនៅលើបណ្តាញសង្គមកញ្ញា ភឹម ស្រីនោ Miss Grand Cambodia 2023 បាននិយាយទៅកាន់លោកស្រី អ៊ឹម សុគន្ធា ទាំងអួលដើមកថា លោកស្រី អ៊ឹម សុគន្ធា ជាមនុស្សស្រីមួយដែលស្អាត ឆ្អាត ពូកែ ពោរពេញដោយថាមពលជាអាយដលរបស់នាង។ នាងមានអារម្មណ៍រំភើបមែនទែនដែលជាចំណែកមួយកាន់ស្ថាប័ន Miss Grand ធ្វើឱ្យនាងបានស្គាល់លោកស្រី អ៊ឹម សុគន្ធា បានធ្វើការជាមួយគ្នាត្រឹមតែ១០ខែប៉ុន្តែនាងមានអារម្មណ៍ថាសប្បាយចិត្ត។

និយាយដោយអួលដើមក ភឹម ស្រីនោ ថា ND រូបនេះតែងតែបង្រៀននាងឱ្យជាមនុស្សស្រីរឹងមាំ ពេលនាងជាប់ភ្លាមៗនាងមានអារម្មណ៍ថាហេតុអ្វីបានជាលោកស្រី អ៊ឹម សុគន្ធា ចេញមកការពារនាងរហូត តែងតែឆាតមកលើកទឹកចិត្តនាង។ Miss Grand Cambodia 2023 រូបនេះថានាងជាមនុស្សម្នាក់ដែលមិនសូវហ៊ានបញ្ចេញសកម្មភាពច្រើនទៅកាន់ លោកស្រី អ៊ឹម សុគន្ធា នោះទេព្រោះជាមនុស្សម្នាក់អៀនសូម្បីតែតែម្តាយខ្លួនឯងក៏មិនដែលបញ្ចេញអារម្មណ៍ដែរ។
ភឹម ស្រីនោ បានបង្ហាញការស្រលាញ់ទៅកាន់អ្នកដឹកនាំកម្មវិធីបវរកញ្ញារូបនេះដោយអរគុណគ្រប់យ៉ាងដែលបានផ្តល់ឱ្យនាង។ ជាចុងក្រោយ ភឹម ស្រីនោ បានជូនពរបេក្ខភាពទាំង២៨រូបក្នុងការប្រកួតជួបសំណាងល្អរាល់គោលដៅដែលបានកំណត់ទុក។

ភឹម ស្រីនោ បានក្លាយជាម្ចាស់មកុដ Miss Grand Cambodia 2023 នៅថ្ងៃទី១៩ ខែសីហា ឆ្នាំ២០២៣ ។ នាងបានតំណាងប្រទេសកម្ពុជាប្រកួតនៅលើឆាកអន្តរជាតិដែលវៀតណាមធ្វើជាម្ចាស់ផ្ទះកាលពីខែតុលា ឆ្នាំ២០២៣ដោយរូបនាងមិនបានជាប់ចំណាត់ថ្នាក់ណាមួយឡើយ។ មិនយូរប៉ុន្មាននោះទេ ភឹម ស្រីនោ នឹងត្រូវដល់ថ្ងៃផ្ទេរតំណែង ខណៈការប្រកួតបឋម Miss Grand Cambodia 2024 នឹងរៀបចំឡើងនាថ្ងៃទី៧ កក្កដា និងថ្ងៃផ្តាច់ព្រ័ត្រនឹងព្រឹត្តិទៅនាថ្ងៃទី១២ ខែកក្កដា ឆ្នាំ២០២៤ ទីតាំងនៅឯសាលមហោស្រពកោះពេជ្រ៕

ថ្មីៗនេះតារាចម្រៀង ពេជ្រ សោភា និងម្ចាស់ពាន Beat The Best ទាំងពីររដូវកាលគឺ សួ វិចិត្រ និង លីន សោម៉ា បានដឹកដៃគ្នាអង្រួនឆាកតន្រ្តីយ៉ាងកក្រើកជាមួយនឹងបទចម្រៀងកាលពី៨ឆ្នាំ «ស្រលាញ់បងម៉ែឱ្យជិះឆ្កែ»។ អ្វីដែលកាន់តែចាប់អារម្មណ៍ សួ វិចិត្រ បានហៅ លីន សោម៉ា ជាសង្សារពេញៗមាត់តាមរយៈខម្មិនឆ្លើយឆ្លងគ្នាលើបណ្តាញសង្គម។

«ស្រលាញ់បងម៉ែឱ្យជិះឆ្កែ» ជាបទពេញនិយមរបស់តារាចម្រៀង ពេជ្រ សោភា និង ជី ដេវីត កាលពី៨ឆ្នាំមុននៅពេលអ្នកទាំងពីរចាប់ដៃគូជាមួយគ្នានៅក្នុងផលិតកម្មរស្មីហង្សមាស។ បទដ៏ល្បីល្បាញមួយនេះ ត្រូវបានតារាចម្រៀង ពេជ្រ សោភា ជ្រើសរើសយកបកបកស្រាយជាមួយសិស្សប្អូនទាំងពីររូបគឺ សួ វិចិត្រ និង លីន សោម៉ា នៅក្នុងកម្មវិធីប្រគំតន្រ្តីកាលពីពេលថ្មីៗនេះ។

តារាចម្រៀង ពេជ្រ សោភា បានបង្ហោះវីដេអូខ្លីនៅលើផេករបស់ខ្លួនពីការសម្តែងរបស់អ្នកទាំងបីទៅលើបទចម្រៀងខាងលើនេះដោយភ្ជាប់មកជាមួយចំណងជើងថា «និយាយមែនម្ចាស់ពាន ពីរនាក់នេះកូរខ្ញុំសាហាវ កូនស្រីតាមម៉ែកុំតាមខាងប្រុសម៉ែខ្លាចគេឱ្យកូន ទឹកភ្នែក»។ ការបង្ហោះរបស់ ពេជ្រ សោភា បានធ្វើឱ្យ សួ វិចិត្រ ម្ចាស់ពាន Beat the Best រដូវកាលទី១បានចូលទៅខម្មិនថា «តាមបងវិញសោម៉ា»ដោយ ពេជ្រ សោភា តបវិញថា «កូនខ្ញុំត្រូវតាមខ្ញុំ»។

ការឆ្លើយនេះមិនទាន់ចប់នោះទេ ខណៈដែល សួ វិចិត្រ បានឆ្លើយតបវិញដែរថា «កូនម៉ាក់ភាពិតមែនតែសង្សារខ្ញុំទេ»។ ចំណែក លីន សោម៉ា វិញ បានចូលឆ្លើយឆ្លងថា «តាមម៉ែវិញបានឡានជិះ» ស្របពេល សួ វិចិត្រ ថា «តាមបងវិញ»។

ទោះយ៉ាងណា ការនិយាយរបស់ សួ វិចិត្រ ម្ចាស់បទ «ជួបមនុស្សសម្តែង» ទំនងជាការលេងសើចទៅកាន់ លីន សោម៉ា ថាសង្សាររបស់ខ្លួនឱ្យស្របតាមអត្ថន័យបទចម្រៀងរបស់ពួកគេបានសម្តែងរួមគ្នាលើកដំបូង មិនមែនជាការលេបខាយពីសំណាក សួ វិចិត្រ ទៅកាន់ លីន សោម៉ា ឡើយ៕

ពិធីករ ទ្រីវ ថនដេវិដ កំពុងត្រូវបានមហាជនអ្នកលេងបណ្តាញសង្គមបញ្ចេញមតិរិះគន់ទក់សាច់ក្រោយពីតារាចម្រៀងរ៉េប នេន ទុំ ចេញវីដេអូប្រតិកម្មទៅកាន់លោកនិងផលិតករកម្មវិធី «តាម Trend» ដែលបានចោទសួរទៅកាន់ម៉ាដាម ដា ក្នុងកិច្ចសម្ភាស។ អ្នកលេងបណ្តាញសង្គមលើកឡើងស្រដៀងគ្នាភាគច្រើនពួកគេស្គាល់ នេន ទុំ ជាង ដេវិដ ខណៈការយកសំណួរពីអ្នកគាំទ្របានចោទសួរដូចនេះពុំត្រឹមត្រូវនោះទេបើទោះបីជាប្រជាប្រិយភាពរបស់ នេន ទុំ ពីមុននិងឥឡូវខុសគ្នាយ៉ាងណាក៏ដោយ។

វាបានក្លាយជាទៅជាប្រធានជជែកវែកញែកបន្តបន្ទាប់ថែមទាំងរម្លឹករឿងចាស់របស់ ដេវិដ ក្រោយពីលោក នេន ទុំ បានចេញវីដេអូឆ្លើយតបទៅកាន់ពិធីកររូបនេះជុំវិញការចោទសួរទៅកាន់ម៉ាដាម សម្រេចយកលោកធ្វើជា BA ទាំងដៃគូអាជីវកម្មផ្សេងៗជ្រើសយកអ្នកមានភាពល្បីល្បាញ អ្នកមានឥទ្ធិពលជាដើម។ លោកថាលោកមានអារម្មណ៍មិនស្រួលភ្ញាក់ផ្អើលយ៉ាងខ្លាំងធ្វើដូចជាលោកគ្មានអ្វីទាល់តែសោះ ឬមោហ៍បាំងមិនឃើញតម្លៃលោកក្នុងអាជីពសិល្បៈ២០ឆ្នាំរបស់ខ្លួន។

បន្ទាប់ពីរឿងនេះត្រូវបានចែកចាយពេញបណ្តាញសង្គមពិធីករ ដេវិដ ត្រូវរងនូវមតិរិះគន់យ៉ាងខ្លាំងព្រោះតែបានចោទសំណួរដែលពួកគេគិតថាមិនបានផ្តល់តម្លៃទាល់តែសោះទៅកាន់ នេន ទុំ។ អ្នកលេងបណ្តាញសង្គមលើកឡើងស្រដៀងគ្នាថា គេស្គាល់ នេន ទុំ ជាយូរមកហើយតាំងពីនៅក្មេងៗមើលតាមទូរទស្សន៍ និងបានថាមិនស្គាល់ដេវិដ នោះទេ។ រឿងដ៏រសើបនេះអ្នកខ្លះថែមទាំងទាញរឿងអាស្រូវរបស់ ដេវិដ កាលពីចុងឆ្នាំ២០២២ត្រូវមហាជនរិះគន់ពេញប្រទេសដោយសារប្រើសម្តីមិនសមរម្យ។

ជាមួយគ្នានេះដែរ គណនីខ្លះថាការសួរសំណួរនេះពុំត្រឹមត្រូវនោះទេ ទោះបីជាប្រជាប្រិយភាពរបស់ តារាចម្រៀងរ៉េប នេន ទុំ មានកម្រិតណាក៏ដោយដែលហាក់ដូចជាមិនឱ្យតម្លៃលោកទាល់តែសោះ។ អ្នកខ្លះថា មិនគួរបន្ទោសទៅកាន់ ដេវិដ នោះទេគួរតែបន្ទោសអ្នករៀបចំកម្មវិធីវិញព្រោះពិធីករធ្វើការរៀបចំ។

គួរបញ្ជាក់ថា ដេវិដ បានផ្តល់សំណួរមួយទៅកាន់ម៉ាដាម ដា ដោយនិយាយថា «ឃើញដៃគូអាជីវកម្មផ្សេងៗគឺពួកគាត់យក BA មកប្រូម៉ូតផលិតផលជ្រើសរើសតារាល្បី អ្នកមានឥទ្ធិពល ដែលគេស្គាល់ច្រើន ប៉ុន្តែជាក់ស្តែងគឺគួរឱ្យចាប់អារម្មណ៍ ម៉ាដាម ដា ទើបតែយកលោក នេនទុំ មកធ្វើជា BA ដែលនេះជាហេតុធ្វើឱ្យមានចង្ងល់ហើយធ្លាប់បានឃើញខម្មិននេះច្រើន»៕

តារាចម្រៀងល្បីឈ្មោះប្រចាំប្រទេសកម្ពុជា ជី ដេវីត និង ទេព បូព្រឹក្ស ដែលកំពុងស្ថិតនៅលើទឹកដីទ្វីបអឺរ៉ុបបានធ្វើឱ្យអ្នកគាំទ្រចាប់អារម្មណ៍ជាថ្មីជាមួយការតុបតែងខ្លួនជាពិសេស ជី ដេវីត តែម្តងលេងស្ទាយ៍មួយទំហឹងមិនចាញ់តារាម៉ូដែល។ គូស្នេហ៍តារាល្បីមួយគូនេះចូលរួមកម្មវិធីធំ Paris Fashion Week តាមរយៈប៊្រេនដ៏ធំមួយហើយវត្តមានអ្នកទាំងពីរក៏ធ្វើឱ្យ camera Men នៅទីនោះមានការចាប់អារម្មណ៍សម្រុកថតពួកគេអំឡុងពេលទៅដល់កម្មវិធី។

កាលពីពេលថ្មីៗនេះ ជី ដេវីត និងទេព បូព្រឹក្ស ស្ថិតក្នុងរ៉ូបពណ៌សដ៏ស្រស់ស្អាតបានធ្វើឱ្យអ្នកគាំទ្រសរសើរថាស្រស់ស្អាតដូចជាទេវបុត្រ និងព្រះនាង បណ្តើរគ្នាយ៉ាងត្រសងនិងស្រស់ស្អាតទាំងគូចូលរួមកម្មវិធីនៅបារាំង។ នៅយប់ថ្ងៃទី២៦ មិថុនា នេះ ជី ដេវីត ក៏បានទម្លាក់វីដេអូខ្លីមួយ ចូលរួមកម្មវិធីតាមរយៈប្រ៊េនលំដាប់ពិភពលោកក្នុងកម្មវិធី Paris Fashion Week ជាមួយចំណងជើងថា «ELIE SAAB haute Couture Paris 2025»។

ក្នុងវីដេអូខ្លីនេះគេបានឃើញ ជី ដេវីត លេងស្ទាយ៍មួយទំហឹងមិនចាញ់តារាម៉ូដែលនោះទេជាមួយសំលៀកបំពាក់ពណ៌ខ្មៅ ចំណែក ទេព បូព្រឹក្ស វិញស្ថិតក្នុងរ៉ូបពណ៌ខ្មៅ មានឆ្នូតពណ៌មាស ទម្លាក់សក់ និងកាន់កាបូបដ៏តូចពណ៌ខ្មៅ។ អ្នកទាំងពីរបានដើរចូលរួមកម្មវិធីប្រកបដោយពន្លឺចែងចាំង និងទទួលបានការចាប់អារម្មណ៍ពី cameramen ថតរូបអ្នកទាំងពីរជាហូរហែ។ វីដេអូខ្លីនេះដែល ជី ដេវីត បានចែករំលែកជូនហ្វេនគេក៏បានឃើញពីការដើរម៉ូតដោយតារាម៉ូដែលជាមួយសំលៀកបំពាក់ដ៏ស្រស់ស្អាតប្រចាំរដូវកាលថ្មីរបស់គេ។

គួរបញ្ជាក់ថា ជី ដេវីត និង ទេព បូព្រឹក្ស ជាតារាចម្រៀងប្រចាំប្រទេសខ្មែរដែលជារឿយៗលេចមុខក្នុងកម្មវិធី Fashion Week នៅបារាំង និង អ៊ីតាលី សហរដ្ឋអាម៉េរិក ហើយពេលនេះចូលរួមកម្មវិធីដ៏ធំលក្ខណៈបែបនេះម្តងទៀតនៅប្រទេសបារាំង៕