មិនថាបុរស ឬស្ត្រីនោះទេសុទ្ធតែចង់បានស្បែកមានសុខភាពល្អ។ ជាការពិតណាស់ សុខភាពស្បែកមានទំនាក់ទំនងយ៉ាងជិតស្និទ្ធជាមួយរបបអាហារដែលយើងញុំាជារៀងរាល់ថ្ងៃ ព្រោះវាអាចជួយឱ្យស្បែកយើងស្រស់ស្អាតចេញពីខាងក្នុងពេញទាំងរាងកាយតែម្តង។ ក្នុងនោះមានរបបអាហារមួយចំនួនដែលសម្បូរទៅដោយវីតាមីនជួយឱ្យស្បែកមានសុខភាពល្អ និងសស្អាតភ្លឺថ្លា។
១.ត្រីមានខ្លាញ់៖ ត្រីមានខ្លាញ់ដូចជាត្រីសាម៉ុង ត្រីម៉ាកែល និងត្រីសាឌីន គឺជាត្រីដែលអ្នកគួរជ្រើសរើសសម្រាប់ស្បែកភ្លឺថ្លា ដោយសារវាមានអាស៊ីតខ្លាញ់អូមេហ្គា ៣ ខ្ពស់ ត្រីទាំងនេះកាត់បន្ថយការរលាក និងផ្តល់សំណើមដល់ស្បែករបស់អ្នក។
២.ស្ពៃខ្មៅ៖ ស្ពៃខ្មៅសម្បូរទៅដោយសារធាតុចិញ្ចឹមដូចជាវីតាមីន A និង C ដែលជួយស្ដារកោសិកាស្បែក និងជំរុញការផលិតខូឡាជែន។ ស្ពៃនេះមានជាតិទឹកខ្ពស់ជួយផ្តល់សំណើមដល់ស្បែក ផ្តល់ឱ្យអ្នកមានសុខភាពល្អ ស្បែកភ្លឺថ្លាតាមធម្មជាតិ ក៏ដូចជាល្អសម្រាប់សុខភាពភ្នែកផងដែរ។
៣.ផ្លែបឺរ៖ ផ្លែបឺរគឺជាអាហារដ៏អស្ចារ្យមួយនៅពេលនិយាយអំពីសុខភាពស្បែក។ វាសម្បូរទៅដោយខ្លាញ់ដែលមានសុខភាពល្អ និងសារធាតុចិញ្ចឹមសំខាន់ៗជាច្រើន ជួយរក្សាភាពយឺតនៃស្បែក និងសំណើម។ ផ្លែបឺរគឺជាប្រភពដ៏សំខាន់នៃវីតាមីន E ដែលជាសារធាតុប្រឆាំងអុកស៊ីតកម្មដ៏មានឥទ្ធិពលជួយប្រឆាំងនឹងរ៉ាឌីកាល់សេរី និងការពារភាពចាស់មុនអាយុ។
៤.គ្រាប់ធញ្ញជាតិ៖ គ្រាប់ធញ្ញជាតិដូចជាអាល់ម៉ុន, Walnut, គ្រាប់ពូជ chia និងគ្រាប់ពូជ flax គឺជាអំណោយធម្មជាតិសម្រាប់ស្បែកភ្លឺថ្លា។ វាសំបូរទៅដោយអាស៊ីតខ្លាញ់សំខាន់ៗ ក៏ជាប្រភពដ៏ល្អនៃស័ង្កសី ដែលជួយដល់ការបង្កើតឡើងវិញនូវស្បែក និងជួយគ្រប់គ្រងការផលិតប្រេង និងកំចាត់មុនផងដែរ។
ត្រូវចាំថា ភាពស្រស់ស្អាតមិនមែនស្ថិតនៅលើផលិតផលថែរក្សាស្បែកប៉ុណ្ណោះទេ វាក៏ចាប់ផ្តើមពីអាហារដែលអ្នកជ្រើសរើសដើម្បីផ្តល់ថាមពលដល់រាងកាយរបស់អ្នកផងដែរ។ ដូច្នេះហើយ តាមរយៈការបញ្ចូលអាហារទំនើបទាំងបួនខាងលើនេះទៅក្នុងរបបអាហារប្រចាំថ្ងៃរបស់អ្នក នោះវានឹងអាចចិញ្ចឹមស្បែករបស់អ្នកពីខាងក្នុងចេញមកក្រៅ ដោយផ្តល់ឱ្យអ្នកនូវស្បែករស់រវើកដែលអ្នកតែងតែចង់បាន៕
