បន្ទាប់ពីកីឡាករប្រដាល់គុណខ្មែរ Thiago Teixeira បានបង្ហោះសារប្រកាសសុំជំនួយពីសាធារណៈជននៅលើបណ្តាញសង្គមរួចមក ជាការឆ្លើយតប អតីតតារាចម្រៀងលោកម៉ៃ សុគន្ធ ក៏បានបញ្ចេញមតិរិះ.គន់វិញភ្លាមៗ ខណៈមហាជនក៏បានធ្វើការវែក.ញែកព្រោងព្រាត។

កាលពីថ្ងៃទី ២៧ ខែមិថុនានេះ នៅលើបណ្តាញសង្គមផ្លូវការរបស់ កីឡាករប្រដាល់ Thiago Teixeira គឺបានធ្វើការដាក់បង្ហោះសារមួយឃ្លា ក្នុងការស្វែងរកជំនួយឧបត្ថម្ភ ដើម្បីចូលរួម ផ្សព្វផ្សាយគុនខ្មែរ ខណៈគាត់គឺមិនមានថវិការគ្រប់គ្រាន់នៅក្នុងការដើរលើវិថីនេះម្នាក់ឯងទេ។ កីឡាកររូបនេះថា លោកចង់ទៅអាមេរិក និងទៅស្ថាប័ន UFC ហើយដាក់ខ្លួនប្រដាល់នៅទីនោះ ដើម្បីតំណាងអោយគុនខ្មែរ។ យ៉ាងណាមិញ សព្វថ្ងៃនេះ គាត់មិនអាចចិញ្ចឹមខ្លួនឯងនិងក្រុមគ្រួសារបានទេ បើគ្មានការងារធ្វើនោះ ហើយក្លឹបគុនខ្មែរក៏ទើបតែចាប់ផ្តើមដែរ។ ដូច្នេះហើយមានតែសុំចិត្ត សុំជំនួយពីបងប្អូនខ្មែរហើយ។

ជាការឆ្លើយតប អតីតតារាចម្រៀងលោកម៉ៃ សុគន្ធ ក៏បានលើកឡើងថា «អាសូរតែ ពិការដៃជើង រ.បួសពីការប្រកួត រឺ ធ្លាក់ខ្លួនឈឺធ្ងន់ធ្ងរទៅចុះ បានលើកដៃដាក់ QR សុំលុយមហាជន តែនេះកម្លាំងនៅមានដូចក្របី ស៊ីសុទ្ធតែ Pizza ប៊ឺហ្គើរ …ចេញលើកដៃសុំលុយពី ខ្មែរស៊ីប្រហុកទៅរួច អាសូរអើយអាសូរ។ មានអី ស្រួលដែរតាស មើល អ្នកបា..ញ់លុយ តាមខមិន ផុស ១ម៉ោង បានជិត២០០ដុល្លារដែរ ចុះទម្រាំ មួយខែពេញ ចំណូលប៉ុន្មានទៅ?»។

បន្ទាប់ពីការលើកឡើងរបស់លោកម៉ៃ សុគន្ធបែបនេះហើយ គឺឃើញថាមានមតិវែកញែកព្រោងព្រាតពីមហាជន ដោយអ្នកខ្លះក៏បានលើកឡើងថា «ខ្ញុំយល់ឃើញថាគាត់ហាក់បីដូចជាចង់កេងចំណេញនិងចង់បានផលប្រយោជន៍ជាងការដែលគាត់ពេញចិត្តជួយគុណខ្មែរ។ យើងមានធនធាននិងកីឡាករខ្មែរគ្រប់គាន់ហើយក្នុងការផ្សព្វផ្សាយ មិនចាំបាច់គាត់ជួយហើយយកផលប្រយោជន៍បែបនេះទេ»។

អ្នកខ្លះថា«ទើសខុសរបៀប! គាត់ធ្លាក់ខ្លួនដល់បែបនេះដោយសារអ្វីមានគិតអត់? គាត់ជួយគុនខ្មែរទាំងក្នុងស្រុកទាំងក្រៅស្រុក ជួយផ្សព្វផ្សាយចំណាយថវិការផ្ទាល់ខ្លួនរហូតធ្លាក់ខ្លួនដល់បែបនេះ»។ អ្នកខ្លះថា«គាត់ក៏បាន ផ្សព្វផ្សាយគុនខ្មែរទៅកាន់ អន្តរជាតិដែរបង បើគាត់លះបង់ដើម្បីគុនខ្មែរ ថវិកាតិចតួច ខ្ញុំគិតថាមិនអីទេបង»៕

ថ្នាក់ដឹកនាំ ប្រជាជនគ្រប់ស្រទាប់ សិល្បករ សិល្បការិនី បានបង្ហាញនូវក្តីសោកស្តាយអាឡោះអាល័យចូលរួមរំលែកទុក្ខពេញបណ្តាញសង្គមចំពោះមរណភាពព្រឹទ្ធាចារ្យ គង់ ណៃ។ ក្នុងនោះឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈបានសម្តែងនូវក្តីក្តុកក្តួល សោកស្តាយឥតឧបមាចំពោះដំណឹងក្រៀមក្រំនេះ។

ឯកឧត្តម ហ៊ុន ម៉ានី បានសរសេរនៅលើបណ្តាញសង្គមថា «ខ្ញុំពិតជាមានសេចក្តីក្តុកក្តួលរំជួលចិត្ត និងសោកស្តាយឥតឧបមា ដោយបានទទួលដំណឹងមរណភាពរបស់ព្រឹទ្ធាចារ្យកោសល្យវោហារ គង់ ណៃ មរតកមនុស្សរស់ចាប៉ីដងវែង បានទទួលមរណភាពនាថ្ងៃសុក្រ ៧រោច ខែជេស្ឋ ឆ្នាំរោង ឆស័ក ព.ស. ២៥៦៨ ត្រូវនឹង ថ្ងៃទី២៨ ខែមិថុនា ឆ្នាំ២០២៤ ដោយរោគាពាធ ក្នុងជន្មាយុ ៨០ឆ្នាំ»។

«មរណភាពរបស់ព្រឹទ្ធាចារ្យកោសល្យវោហារ គង់ ណៃ គឺជាបាត់បង់នូវស្វាមី ឪពុក ជីតា ប្រកបដោយព្រហ្មវិហារធម៌ និងក្តីសណ្តោសប្រណី ក៏ដូចជាការបាត់បង់នូវធនធានមនុស្សល្អឆ្នើមមួយរូបដែលពោរពេញដោយឆន្ទៈមនសិការក្នុងការបម្រើបុព្វហេតុ ជាតិ សាសនា ព្រះមហាក្សត្រ គ្រប់កាលៈទេសៈ ព្រមទាំងបានរួមចំណែកយ៉ាងសកម្ម ក្នុងការលើកស្ទួយតម្លៃនៃវប្បធម៌ជាតិខ្មែរ និងខិតខំប្រឹងប្រែងអស់កម្លាំងកាយចិត្តរក្សាការពារ ផ្ទេរបន្ដនូវចំណេះដឹង និងបន្សល់ទុកសា្នដៃគួរកោតសសើរ និងចងចាំសម្រាប់កុលបុត្រកុលធីតាខ្មែរជំនាន់ក្រោយ ប្រកបដោយជំនាញវិជ្ជាជីវៈ និងស្មារតីទទួលខុសត្រូវខ្ពស់ជារៀងរហូតមក។
ជាមួយនឹងអារម្មណ៍ដ៏អាឡោះអាល័យបំផុតនេះ ខ្ញុំសូមចូលរួមរំលែកទុក្ខចំពោះក្រុមគ្រួសាររបស់ព្រឹទ្ធាចារ្យ និងសូមឧទ្ទិសបួងសួងគុណបុណ្យ ព្រះរតនត្រ័យ និងវត្ថុស័ក្តិសិទ្ធក្នុងលោក សូមឲ្យដួងវិញ្ញាណក្ខន្ធព្រឹទ្ធាចារ្យកោសល្យវោហារ គង់ ណៃបានទៅកាន់សុគតិភពកុំបីឃ្លៀងឃ្លាតឡើយ។ យើងខ្ញុំទាំងអស់គ្នាពិតជានៅចងចាំនូវស្នាដៃដែលលោកគ្រូព្រឹទ្ធាចារ្យបានបន្សល់ទុកជារៀងរហូត។»។ នេះជាការលើកឡើងរបស់ឧបនាយករដ្ឋមន្រ្តី ហ៊ុន ម៉ានី។

លោកតាគង់ ណៃ មានស្រុកកំណើតនៅខេត្តកំពតបានបន្សល់នូវស្នាដៃយ៉ាងច្រើនជូនអ្នកជំនាន់ក្រោយ។ លោកតាទទួលបានពានរង្វាន់ទាំងថ្នាក់ជាតិនិងអន្តរជាតិ និងទទួលបានគោរមងារថ្នាក់ជាតិជាមតរកមនុស្សរស់ដែលមាននាមថាកោសល្យវោហារ គង់ណៃ ក្នុងឆ្នាំ២០១២។ លោកតា មានកូន១០នាក់ក្នុងនោះកូនប្រុស៦នាក់និងកូនស្រី៤នាក់ក្នុងជីវិតអាពាហ៍ពិពាហ៍៦ទសវត្សរ៍ជាមួយលោកយាយ តាត់ ឆេន ៕

ថ្មីៗនេះ មានករណីសត្វចម្លែកចូលសុីឆ្កែយ៉ាងច្រើនករណី ដែលកំពុងរាតត្បាតនៅស្រុកកំចាយមា ខេត្តព្រៃវែង និងនៅឃុំសំបួរ ស្រុករមាសហែក ខេត្តស្វាយរៀង គិតមកទល់ពេលនេះ មានឆ្កែជាង១៥ក្បាលហើយបានងាប់ជាបន្តបន្ទាប់ ខណៈសាកសពសាកមានសភាពស្រដៀងគ្នា ដោយត្រូវបានហែកសុីនៅត្រង់ឆ្អឹងជំនី។

ជុំវិញករណីនេះ សមត្ថកិច្ចប៉ុស្តិ៍រដ្ឋបាលឃុំស្មោងខាងត្បូង បានពួនស្ទាក់ចាប់បានសត្វកញ្ជ្រោងមួយក្បាល កាលពីយប់ថ្ងៃទី២៨ ខែមិថុនា ដោយសង្ស័យថាជាសត្វដែលហែកឆ្កែអ្នកភូមិ។

ថ្វីបើចាប់បានសត្វកញ្រ្ជោងនេះ ក៏ប៉ុន្តែសមត្ថកិច្ច ក៏ដូចជាអាជ្ញាធរ នៅតែមិនទាន់កំណត់មុខសញ្ញាថាជាសត្វកញ្រ្ជោងនេះ ដែលជាអ្នកសុីឆ្កែអស់ជិត១៥ក្បាលនោះយ៉ាងណានោះទេ ខណៈក្រុមជំនាញដែលបានធ្វើការពិសោធន៍មុខរបួសសត្វនោះបានសង្ស័យថា ជាសត្វខ្លាទៅវិញ។

សមត្ថកិច្ចក៏បានស្នើឱ្យពលរដ្ឋប្រុងប្រយ័ត្ន ព្រោះថាសត្វកញ្ច្រោងនេះ អាចមានទៀត មិនមែនមានតែមួយនេះនោះទេ៕

គម្រោងព្រែកជីកហ្វូណនតេជោ មានតម្លៃ១៧០០លានដុល្លារសហរដ្ឋអាមេរិក នឹងបើកការដ្ឋានសាងសង់ជាផ្លូវការនៅថ្ងៃទី៥ ខែសីហា ខាងមុខនេះ ចំថ្ងៃខួបកំណើតអតីតនាយករដ្ឋមន្រ្តីកម្ពុជា សម្តេចតេជោហ៊ុន សែន។

ចំណុចចាប់ផ្តើមសាងសង់ដំបូ នៃគម្រោងនេះ នឹងបើកការដ្ឋាននៅភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា។

គួរបញ្ជាក់ផងដែរថា ព្រែកជីកហ្វូណន-តេជោ មានប្រវែង ១៨០គីឡូម៉ែត្រ ដោយរាប់ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហុីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប៕

លោកតាគង់ ណៃ ដែលប្រជានជនខ្មែរស្គាល់ថាជា ព្រឹទ្ធាចារ្យចាបុីដងវែង ដ៏ល្បីនោះ បានទទួលមរណភាពហើយក្រោយធ្លាក់ខ្លួនឈឺធ្ងន់អស់រយៈពេលយូរមក។

ព្រឹទ្ធាចារ្យ គង់ ណៃ បានទទួលមរណភាព ដោយរោគាពាធ ក្នុងជន្មាយុ 80ឆ្នាំ នៅគេហដ្ឋានលោកតាឯស្រុកកំណើត។

សូមបញ្ជាក់ថា ព្រឹទ្ធាចារ្យ គង់ ណៃ គឺជាសិល្បករចាប៉ីដងវែងដ៏ល្បីល្បាញមួយរូបរបស់កម្ពុជាដែលមានគោរមងារថាជាព្រឹទ្ធាចារ្យកោសល្យវោហារ គង់ ណៃ។

ក្រៅពីមានគោរមងារថ្នាក់ជាតិជាមត៌កមនុស្សរស់ហើយនោះ ព្រឹទ្ធាចារ្យ គង់ ណៃ ក៏ជាធ្លាប់ទទួលបានពានរង្វាន់ទាំងថ្នាក់ជាតិ និងអន្តរជាតិជាច្រើនពានរង្វាន់ផងដែរ។

ជាមួយនឹងការបង្ហាញខ្លួនភ្ជាប់ដោយវ៉ែនតាពណ៌ខ្មៅជានិច្ច លោកគឺជា តន្រ្តីករប្រពៃណីបុរាណ ដែលត្រូវបានគេស្គាល់ច្បាស់ និងល្បីល្បាញបំផុតនៅកម្ពុជានិងលើឆាកអន្តរជាតិ៕

ថ្មីៗនេះ យោងតាមការបង្ហោះនៅលើបណ្តាញសង្គម Tik Tok ដោយគណនីមួយដែលមានឈ្មោះថា Dalin បានបង្ហាញវីដេអូខ្លីមួយ តែបង្កប់នូវអត្ថន័យជ្រាលជ្រៅពីទឹកចិត្តម្តាយថ្លៃ ហ៊ានពុះពារជំនះគ្រប់ឧបសគ្គ មិនគិតថាខ្លួនឯងលំបាក គឺដើម្បីតែកូនៗនិងក្រុមគ្រួសារ។

តាមរយៈវីដេអូគឺបានបង្ហាញពីសកម្មភាពរបស់ស្រ្តីវ័យចំណាស់ម្នាក់ ទំនងជាកំពុងស្ថិតនៅរមនីយដ្ឋានកោះដាច់ ដោយសង្កេតឃើញថាស្រ្តីរូបនេះគឺជាអ្នកលក់ចំណីអាហារនិងបានធ្វើការដើរលក់ទាំងខ្លួនទទឹកជោគ ក្នុងទឹកតែម្តង។ ខណៈនៅក្បែរខ្លួនស្រ្តីវ័យចំណាស់នេះគឺមានបន្ទះស្នោរធំល្មមមួយ សម្រាប់បន្តុបឥវ៉ាន់ដែលគាត់លក់ មានដូចជាសាច់គោអាំងនិងគ្រឿងក្លែមមួយចំនួនទៀត ស្របពេលក៏មានចង្ក្រានសម្រាប់អាំងសាច់ អាំងបណ្តើរ ដើរលក់បណ្តើរ ក្នុងទឹកតែម្នាក់ឯង យ៉ាងគួរឲ្យអាសូរ។

ជាមួយគ្នានោះ មហាជនជាច្រើនក៏បានចូលទៅបញ្ចេញមតិផ្តល់កម្លាំងចិត្ត និងកោតសរសើរព្រោងព្រាងពីទឹកចិត្តអ្នកម្តាយរូបនេះ ដោយអ្នកខ្លះបានលើកឡើងថា «ផ្ទះគាត់នៅក្រោយផ្ទះខ្ញុំនៅកោះដាច់ ផ្ទះតូច មានកូនស្រីសសៃប្រសាទទៀត»។ អ្នកខ្លះថា«មិនដឹងគាត់ត្រជាក់ រងា ប៉ុនណាទេ សូមសសើរការតស៊ូររបស់គាត់ ដើម្បីកូន ដើម្បីជីវភាព»។ អ្នកខ្លះថា«នេះហើយជីវិត នគ្រប់រូបគួរតែគិត អាណិតណាស់ម្តាយយើងម្តាយគេ»។ ខណៈអ្នកខ្លះទៀតថា«ជីវិតអ្នកក្ររស់ដើម្បីអាហារបីពេល ហើយកុំមើលងាយអ្នកអោយសោះ»។

ឆ្លងតាមវីដេអូនេះ គឺជាសារអប់រំខ្លីមួយ ដែលបានឆ្លុះបញ្ចាំងពីទឹកចិត្តដ៏ធំធេងរបស់ម្តាយថ្លៃ ហ៊ានពុះពារជំនះ ទ្រាំស៊ូលំបាកគ្រប់បែបយ៉ាង ក៏មិនហ៊ានមាត់សូម្បីតែមួយមាត់ នេះក៏ដើម្បីតែផ្គត់ផ្គង់ជីវភាពគ្រួសារ និងឲ្យកូនៗខ្លួនបានរស់ស្រួល។ ដូច្នេះ កូនៗគ្រប់ៗរូបគឺគួរតែតបស្នងទៅកាន់គាត់វិញឲ្យសមនឹងអ្វីដែលគាត់បានលះបង់ចំពោះយើង។ កូនៗត្រូវខិតខំសិក្សារៀនសូត្រ និងធ្វើជាទំពាំងល្អ ដើម្បីដឹកនាំក្រុមគ្រួសារ និងសង្គមជាតិនាពេលខាងមុខ៕