នាវេលាម៉ោង៦និង៤៨នាទីព្រឹក ថ្ងៃទី២ ខែមេសា ឆ្នាំ២០២៦ គ្រោះរញ្ជួយដីយ៉ាងខ្លាំងក្លារហូតដល់កម្រិត៧.៤រិចទ័រ ជម្រៅ៣៥គីឡូម៉ែត្រ បានកើតឡើងនៅទីក្រុង Ternate បរិវេណសមុទ្រ Molucca ស្ថិតនៅភាគឦសានប្រទេសឥណ្ឌូណេស៊ី ដែលធ្វើឱ្យអាជ្ញាធរឥណ្ឌូណេស៊ីបញ្ជាឱ្យតាមដានស្ថានការណ៍យ៉ាងដិតដល់ និងព្រមានពីរលកស៊ូណាមិអាចនឹងកើតឡើងរហូតដល់ម៉ាឡេស៊ី និងហ្វីលីពីន ។

តាមការអះអាងរបស់ក្រុមអ្នកជួយសង្គ្រោះ គឺគ្មានមនុស្សរងរបួសក្នុងហេតុការណ៍រញ្ជួយដីទេ ប៉ុន្តែស្ត្រីម្នាក់អាយុ៧០ឆ្នាំ រស់នៅខេត្ត North Sulawesi បានស្លាប់ដោយសារអគារបាក់សង្កត់ ។

អាជ្ញាធរបានព្រមានពីរលកស៊ូណាមិអាចបង្កគ្រោះថ្នាក់នៅតាមឆ្នេរសមុទ្រ ដែលមានប្រវែងប្រមាណ៩៩៧គីឡូម៉ែត្រពីចំណុចកណ្តាលរញ្ជួយដី រួមទាំងមានរលកស៊ូណាមិនៅតំបន់មួយចំនួនរបស់ឥណ្ឌូណេស៊ី ម៉ាឡេស៊ី និងហ្វីលីពីន និងព្រមានពីកម្រិតស៊ូណាមិអាស្រ័យលើសណ្ឋានដីក្នុងតំបន់ ។ អាជ្ញាធរអំពាវនាវឱ្យពលរដ្ឋដែលរស់នៅតាមឆ្នេរសមុទ្រតាមដានសេចក្តីជូនដំណឹងជាផ្លូវការ ខណៈអាជ្ញាធរកំពុងវាយតម្លៃការខូចខាត ។

ទីក្រុងតូចធំដែលមានមនុស្សរស់នៅច្រើនរហូតដល់ជាង២សែននាក់ នៅភាគខាងកើតប្រទេសឥណ្ឌូណេស៊ី ដែលស្ថិតនៅក្បែរចំណុចកណ្តាលរញ្ជួយដីបរិវេណសមុទ្រ Molucca មានការប្រុងប្រយ័ត្នយ៉ាងខ្លាំង និងបារម្ភពីផលប៉ះពាល់បន្ទាប់ពីរលកស៊ូណាមិ ។ មជ្ឈមណ្ឌលផ្តល់ព័ត៌មានពីរលកស៊ូណាមីប៉ាស៊ីហ្វិកប្រកាសថា វាអាចនឹងកើតរលកស៊ូណាមិជុំវិញចំណុចកណ្តាលរញ្ជួយដីស្មើចម្ងាយ១,០០០គីឡូម៉ែត្រ និងកើតឡើងនៅតាមឆ្នេរសមុទ្រប្រទេសឥណ្ឌូណេស៊ី ម៉ាឡេស៊ី និងហ្វីលីពីន ។

គួរបញ្ជាក់ថា ឥណ្ឌូណេស៊ី គឺជាប្រជុំកោះដ៏ធំដែលមានពលរដ្ឋរហូតដល់ជាង២៨០លាននាក់ បានកើតរញ្ជួយដី និងផ្ទុះភ្នំភ្លើងជាញឹកញាប់ ដោយសារមានទីតាំងស្ថិតនៅលើខ្សែបន្ទាត់កោងភ្នំភ្លើង ។

កាលពីឆ្នាំ២០២២ ឥណ្ឌូណេស៊ីកើតរញ្ជួយដីយ៉ាងខ្លាំងកម្រិត៥.៦រិចទ័រ បណ្តាលឱ្យមនុស្សស្លាប់ចំនួន៦០២នាក់ នៅទីក្រុង Cianjur ខេត្ត West Java ខណៈមុននេះ កាលពីឆ្នាំ២០១៨ មានរលកស៊ូណាមិកើតឡើងសម្លាប់មនុស្សអស់ជាង៤,៣០០នាក់ ៕

ខេត្តចំនួន១៧ នៅភាគខាងជើងប្រទេសថៃ ជាពិសេស ខេត្តឈៀងម៉ៃ ឈៀងរ៉ៃ មេហុងសន តាក និងណាន កំពុងគ្របដណ្តប់ដោយខ្យល់ពុលខ្លាំងបំផុត និងផ្សែងអួរអាប់ជាច្រើនសប្តាហ៍បង្កហានិភ័យខ្ពស់ដល់សុខភាពពលរដ្ឋ ដោយសារការដុតរានព្រៃ និងដីស្រែចម្ការ ។ បន្ទាប់ពីខ្យល់ពុល PM 2.5 កើនឡើងខ្លាំង លោកនាយករដ្ឋមន្ត្រី Anutin Charnvirakul បានផ្តល់សិទ្ធិដល់អភិបាលខេត្តភាគខាងជើងប្រកាសអាសន្នពីគ្រោះម.ហន្តរាយខ្យល់ពុល និងបញ្ជាឱ្យមន្ត្រីក្រសួងមហាផ្ទៃចុះតាមតំបន់ជួយសង្គ្រោះពលរដ្ឋ ។

ពលរដ្ឋនៅភាគខាងជើងប្រទេសថៃបានរស់នៅជាមួយខ្យល់ពុលខ្លាំងប៉ះពាល់សុខភាពជាច្រើនសប្តាហ៍ ហើយបរិមាណខ្យល់ពុលបានកើនឡើងជាបន្តបន្ទាប់ ដោយសារការដុតរានព្រៃ និងដីស្រែចម្ការរបស់ពលរដ្ឋថៃ ។ កន្លងមក អាជ្ញាធរថៃចោទប្រកាន់ថា ខ្យល់ពុលបណ្តាលមកពីមីយ៉ាន់ម៉ាជាប្រទេសជិតខាងដុតព្រៃ ប៉ុន្តែខ្យល់ពុលលើកនេះកើតឡើងដោយសារពលរដ្ឋថៃខ្លួនឯង ។

នាវេលាម៉ោងជាង៩ព្រឹក ថ្ងៃទី១ ខែមេសា ឆ្នាំ២០២៦ លោក Anutin នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និយាយថា រសៀលថ្ងៃទី១ ខែមេសានេះ មន្ត្រីក្រសួងមហាផ្ទៃនឹងធ្វើដំណើរទៅកាន់ភាគខាងជើងជួយសង្គ្រោះពលរដ្ឋ ដោយលោកនឹងកោះប្រជុំមន្ត្រីស្ថាប័នពាក់ព័ន្ធជជែកពីបញ្ហាខ្យល់ពុល និងផ្តល់សិទ្ធិឱ្យអភិបាលខេត្តភាគខាងជើងប្រកាសអាសន្នពីគ្រោះមហន្តរាយខ្យល់ ។

កាលពីថ្ងៃទី៣១ ខែមីនា លោកបានបញ្ជាឱ្យលោក សុឆាតិ ឈុមក្លិន រដ្ឋមន្ត្រីក្រសួងធនធានធម្មជាតិ និងបរិស្ថាន ទទួលខុសត្រូវដោះស្រាយបញ្ហាខ្យល់ពុលនៅភាគខាងជើង ដោយការចុះពិនិត្យមើលនៅតំបន់ជាក់ស្តែងជាមួយមន្ត្រីប្រចាំការនៅទីនោះ ។

គួរបញ្ជាក់ថា លោក Anutin បានកំណត់ឱ្យខេត្តភាគខាងជើងចំនួន១៧ អនុវត្តច្បាប់ប្រឆាំងនឹងអ្នកដុតរានព្រៃ ព្រមទាំងប្រមូលកម្លាំងជួយកាត់បន្ថយខ្យល់ពុល រហូតដល់ស្ថានការណ៍ត្រឡប់មកធម្មតាវិញ បន្ទាប់ពីខ្យល់ពុលនៅខេត្តទាំងនេះកើនឡើងខ្លាំងឈានដល់កម្រិតគ្រោះថ្នាក់ពណ៌ក្រហម ។

តាមរបាយការណ៍របស់ភ្នាក់ងារអភិវឌ្ឍន៍បច្ចេកវិទ្យាអាកាស និងភូមិសាស្ត្រ គឺបរិមាណធូលីតូចៗ PM 2.5 នៅភាគខាងជើងប្រទេសថៃបានឈានដល់កម្រិតពណ៌ក្រហម ឬធ្ងន់ធ្ងរ ប៉ះពាល់សុខភាពពលរដ្ឋយ៉ាងខ្លាំង ទើបលោក Anutin បារម្ភពីស្ថានការណ៍ខ្យល់ពុលក្នុងខេត្តទាំង១៧ ជាពិសេស ខេត្តឈៀងម៉ៃ ឈៀងរ៉ៃ មេហុងសន តាក និងណាន ។

ក្រសួងមហាផ្ទៃកំណត់ឱ្យខេត្តនានារាយការណ៍ពីវិធានការកម្ចាត់ខ្យល់ពុលជាប្រចាំរហូតដល់ស្ថានការណ៍ធូរស្រាល ព្រមទាំងសុំការសហការពីពលរដ្ឋទូរស័ព្ទផ្តល់ដំណឹងជាបន្ទាន់ ប្រសិនបើឃើញភ្លើងឆេះព្រៃ ឬត្រូវការសង្គ្រោះ ៕

ប្រធានាធិបតីអាមេរិក លោក Donald Trump បានផ្តល់សម្ភាសន៍ជាមួយកាសែត The Telegraph កាលពីថ្ងៃទី១ ខែមេសា ឆ្នាំ២០២៦ ដោយនិយាយច្បាស់ៗថា កំពុងពិចារណាដកអាមេរិកចេញពីអង្គការសន្ធិសញ្ញាអាត្លង់ទិកខាងជើង (NATO) ដោយសារមិនពេញចិត្តនឹងប្រទេសសមាជិកអង្គការនេះបដិសេធមិនបញ្ជូនកងទ័ពមកជួយអាមេរិកធ្វើសង្គ្រា.មជាមួយអ៊ីរ៉ង់ ជាពិសេស មិនព្រមជួយបើកច្រកសមុទ្រ Hormuz ដើម្បីឱ្យនាវាដឹកប្រេងឥន្ធនៈឆ្លងកាត់ ។

លោកប្រធានាធិបតី Trump ថា កំពុងពិចារណាដកអាមេរិកចេញពីអង្គការ NATO បន្ទាប់ពីបញ្ចប់សង្គ្រាមជាមួយអ៊ីរ៉ង់ លោកដឹងតាំងពីយូរហើយថា អង្គការនេះគ្រាន់តែជាខ្លាក្រដាសប៉ុណ្ណោះ ។ សមាជិកអង្គការ NATO ក្នុងនាមជាសម្ព័ន្ធមិត្តកងទ័ពជាមួយអាមេរិក បែរជាស្ទាក់ស្ទើរក្នុងការបញ្ជូនកងទ័ពទៅជួយបើកច្រកសមុទ្រ Hormuz នៅពេលអាមេរិកត្រូវការ ហើយប្រធានាធិបតីរុស្ស៊ី លោក Vladimir Putin ក៏បានដឹងច្បាស់ពីអង្គការនេះដែរ ។

សមាជិកអង្គការ NATO គួរតែបញ្ជូនកងទ័ពទៅជួយបើកច្រកសមុទ្រ Hormuz ដើម្បីឱ្យនាវាដឹកប្រេងនានាឆ្លងកាត់ ដែលអ៊ីរ៉ង់បិទច្រកដើម្បីសងសឹកនឹងការវាយប្រហារពីអាមេរិក និងអ៊ីស្រាអែល ។ នេះជាការរិះគន់លើកចុងក្រោយរបស់លោកប្រធានាធិបតី Trump ទៅលើសមាជិកអង្គការ NATO ។

កាលពីថ្ងៃទី៣១ ខែមីនា លោកប្រធានាធិបតី Trump ទើបតែប្រាប់ទៅប្រទេសនានាដែលខ្វះខាតប្រេងយន្តហោះដោយសារបិទច្រកសមុទ្រ Hormuz ថា ត្រូវតែក្លាហានបើកច្រក និងរៀនសូត្រពីការតស៊ូដោយខ្លួនឯង អាមេរិកមិនជួយទៀតទេ ដោយសារពួកអ្នកមិនគាំទ្រអាមេរិក ។ លោកសួរថា តើសម្ព័ន្ធមិត្ត NATO នឹងជួយដែរឬទេ ពេលអាមេរិកត្រូវការ? មិនគួរឱ្យជឿទេ ដែលពួកគេមិនព្រមជួយ ខណៈអាមេរិកជួយប្រទេសផ្សេងៗរហូតមក រួមទាំងជួយអ៊ុយក្រែនផងដែរ ទាំងដែលអ៊ុយក្រែនមិនមែនជាបញ្ហារបស់អាមេរិក ។

ក្រៅពីនេះ លោកក៏បានរិះគន់ខ្លាំងៗទៅលើនាយករដ្ឋមន្ត្រីអង់គ្លេស លោក Keir Starmer ដែលបដិសេធមិនឱ្យអាមេរិកប្រើប្រាស់មូលដ្ឋានកងទ័ពនៅប្រទេសអង់គ្លេស ព្រមទាំងចំអកកងទ័ពជើងទឹករបស់អង់គ្លេសថា មានតែនាវាផ្ទុកយន្តហោះចាស់ៗខូចខាត ។

សម្ព័ន្ធមិត្តអង្គការ NATO មិនយល់ពីគោលជំហររបស់មេដឹកនាំអាមេរិកទេ ដោយសារកន្លងមក សម្ព័ន្ធមិត្តអង្គការ NATO បានបញ្ជូនកងទ័ពទៅចូលរួមធ្វើសង្គ្រាមជាមួយអាមេរិកនៅប្រទេសអាហ្វហ្គានីស្ថាន រហូតដល់បាត់បង់ជីវិតកងទ័ពជាង១,១០០នាក់ ។

ចំណែកនាយករដ្ឋមន្ត្រីអង់គ្លេស លោក Keir Starmer បញ្ជាក់ថា អង្គការ NATO នៅតែជាសម្ព័ន្ធមិត្តកងទ័ពមានប្រសិទ្ធភាពបំផុតជាមួយអាមេរិក ប៉ុន្តែអង្គការ NATO នឹងមិនចូលរួមក្នុងសង្គ្រាមវាយប្រហារអ៊ីរ៉ង់ ៕

ថៃ និងប្រទេសជាច្រើនលើពិភពលោក កំពុងប្រឈមនឹងវិបត្តិថាមពល ដោយតម្លៃប្រេងឥន្ធនៈ ហ្គាស និងទំនិញឡើងថ្លៃកាន់តែខ្លាំង ដែលបញ្ហានេះប៉ះពាល់ដល់ពលរដ្ឋថៃគ្រប់រូប ។ កាលពីព្រឹកថ្ងៃទី២ ខែមេសា ឆ្នាំ២០២៦ សហព័ន្ធសាមគ្គីការងារថៃ, សហព័ន្ធកម្មករសហគ្រាសរដ្ឋ, គណបក្សសង្គមប្រជាធិបតេយ្យ ព្រមទាំងពលរដ្ឋជាច្រើននាក់ បានធ្វើបាតុកម្មតវ៉ានៅមុខក្រសួងថាមពល ដើម្បីប្រឆាំងនឹងការឡើងថ្លៃប្រេងឥន្ធនៈ អគ្គិសនី ហ្គាស និងទំនិញ ដោយទាមទារឱ្យរដ្ឋាភិបាលដោះស្រាយបញ្ហាជាបន្ទាន់ ។

សារព័ត៌មាន Khaosod រាយការណ៍ថា នាវេលាម៉ោង៩ និង៣០នាទីព្រឹក ថ្ងៃទី២ ខែមេសា សហព័ន្ធសាមគ្គីការងារថៃ, សហព័ន្ធកម្មករសហគ្រាសរដ្ឋ, គណបក្សសង្គមប្រជាធិបតេយ្យ ព្រមទាំងពលរដ្ឋជាច្រើននាក់ បានធ្វើបាតុកម្មនៅមុខក្រសួងថាមពលតាមបណ្តោយផ្លូវវិផាវ៉ាឌីរាំងស៊ីត ដើម្បីប្រឆាំងការដំឡើងថ្លៃប្រេងដែលបណ្តាលឱ្យទំនិញឡើងថ្លៃគ្រប់មុខប៉ះពាល់ដល់ជីវភាពរស់នៅ ។

ក្រុមអ្នកតវ៉ាទាមទារឱ្យរដ្ឋាភិបាលដោះស្រាយបញ្ហាដែលកើតឡើងនាពេលនេះ ព្រមទាំងឱ្យរដ្ឋាភិបាលទប់ស្កាត់កុំឱ្យហ្គាសឡើងថ្លៃផងដែរ តាមរយៈការដាក់លិខិតស្នើសុំជាច្រើនចំណុច ។ ពួកគេសង្ឃឹមថា រដ្ឋាភិបាលថៃ និងលោកនាយករដ្ឋមន្ត្រី Anutin Charnvirakul នឹងដោះស្រាយបញ្ហាទាំងអស់ដើម្បីជាប្រយោជន៍ជាតិ និងពលរដ្ឋគ្រប់រូបដែលកំពុងតែលំបាកបំផុត មិនថាការធ្វើស្រែចម្ការ ការលក់ដូរតាមផ្លូវនៅទីក្រុងតូច-ធំ ។

ក្រៅពីនេះ ក៏ទាមទារឱ្យលោក Anutin ប្រកាសប្រទេសស្ថិតក្នុងស្ថានភាពអាសន្ន មុនពេលបញ្ហារាលដាលកាន់តែខ្លាំង ដោយតំណាងអ្នកតវ៉ាថា ប្រទេសថៃបានរងផលប៉ះពាល់ដោយសារសង្គ្រាមមជ្ឈិមបូព៌ា និងកំពុងរងទុក្ខយ៉ាងខ្លាំង មិនខុសគ្នាពីកំពុងស្ថិតក្នុងសង្គ្រាម ដោយសារថៃចាំបាច់ត្រូវការថាមពលសម្រាប់រស់នៅ ។ នាយករដ្ឋមន្ត្រីធ្លាប់និយាយថា ថៃមានប្រេងបម្រុងគ្រប់គ្រាន់អាចប្រើប្រាស់ចំនួន១០៦ថ្ងៃ ប៉ុន្តែត្រឹមតែ១ខែសោះ ថៃខ្វះខាតប្រេង ជាពិសេស នៅតាមខេត្ត ដូច្នេះ រដ្ឋាភិបាលត្រូវដោះស្រាយបញ្ហាបន្ទាន់ កុំឱ្យខ្វះប្រេងពេលចូលឆ្នាំ ។

ក្រុមអ្នកតវ៉ាអំពាវនាវទៅកាន់ពលរដ្ឋថៃទាំងអស់រួមគ្នាបង្ហាញកម្លាំង និងគោលជំហររបស់ខ្លួន ដោយកុំបណ្តោយឱ្យក្រុមឈ្មួញទទួលបានផលចំណេញ ។ បន្ទាប់ពីពួកគេបានប្រគល់លិខិតតវ៉ាទៅឱ្យមន្ត្រីក្រសួងថាមពលរួចហើយ ក៏បន្តការធ្វើបាតុកម្មនៅវិមានរដ្ឋាភិបាលទៀត ដែលបាតុកម្មនេះ អ្នកចូលរួមបានកាន់បដាសរសេរអក្សរធំៗ ថែមទាំងបង្ហាញធុងហ្គាសដែលកំពុងតែឡើងថ្លៃ ៕

សញ្ញាគួរឲ្យបារម្ភ! ថ្មីៗនេះអ៊ីរ៉ង់បានបង្ហើបថាខ្លួនកំពុងពិចារណាដកខ្លួនចេញពីសន្ធិសញ្ញា ស្តីពីការមិនរីកសាយភាយអាវុធនុយក្លេអ៊ែរ- Non-Proliferation Treaty (NPT) ដែលជាចលនាមួយទប់ស្កាត់ការបង្កើនភាពតានតឹងលើកម្មវិធីនុយក្លេអ៊ែរ ដែលជំរុញឲ្យប្រទេសនានាមានការព្រួយបារម្ភយ៉ាងខ្លាំង ព្រោះប្រសិនបើអ៊ីរ៉ង់ធ្វើបែបនេះបានសម្រេចមែន ពិភពលោកនឹងប្រឈមជាមួយវិនា.សកម្មដ៏គួរឲ្យខ្លាចដោយចៀសមិនផុត។

យោងតាមការចុះផ្សាយរបស់កាសែត Xinhua កាលពីដើមសប្ដាហិ៍នេះ អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei ថ្លែងនៅក្នុងសន្និសីទសារព័ត៌មានប្រចាំសប្តាហ៍នៅទីក្រុងតេអេរ៉ង់ថា ស្ថាប័នពាក់ព័ន្ធរបស់អ៊ីរ៉ង់ រួមទាំងសភា កំពុងពិចារណាដកខ្លួនចេញពីសន្ធិសញ្ញាមិនរីកសាយភាយអាវុធនុយក្លេអ៊ែរ (NPT) របស់ប្រទេសនេះ។ ជម្រើសនេះកំពុងស្ថិតក្រោមការពិនិត្យឡើងវិញ ខណៈដែលសម្ពាធកើនឡើងពីជម្លោះភូមិសាស្ត្រនយោបាយ និងជម្លោះជាមួយប្រទេសលោកខាងលិច។

លោក Baghaei បានគូសបញ្ជាក់ថា អ៊ីរ៉ង់មិនដែលស្វែងរកការអភិវឌ្ឍអាវុធនុយក្លេអ៊ែរទេ ហើយមិនមានបំណងធ្វើដូច្នេះទេតែដោយសារតែអ៊ីរ៉ង់រងភាពអយុត្តិធម៌ជាខ្លាំងពីការវាយប្រហាររបស់សហរដ្ឋអាម៉េរិក និងអ៊ីស្រាអែល និងគ្មាននរណាម្នាក់ចេញមុខថ្កោលទោសលើប្រទេសទាំងពីរនេះឡើយ។

គួរជម្រាបថា ប្រទេសអ៊ីរ៉ង់បានចូលរួមក្នុងសន្ធិសញ្ញាមិនរីកសាយភាយអាវុធនុយក្លេអ៊ែរ (NPT) កាលពីឆ្នាំ 1970 ដែលជាការចូលរួមដើម្បីទប់ស្កាត់ការរីករាលដាលនៃអាវុធនុយក្លេអ៊ែរ លើកកម្ពស់ការប្រើប្រាស់ថាមពលនុយក្លេអ៊ែរដោយសន្តិវិធី និងលើកទឹកចិត្តដល់ការលុបបំបាត់អាវុធ។ ដូច្នេះការចាកចេញពីសន្ធិសញ្ញានេះ នឹងអាចអនុញ្ញាតឱ្យអ៊ីរ៉ង់បង្កើនល្បឿនសកម្មភាពនុយក្លេអ៊ែរដ៏រសើបដោយគ្មានដែនកំណត់ ដែលបង្កើនការភ័យខ្លាចជាសកលជុំវិញការផលិតអាវុ.ធប្រល័យលោក។

ជាក់ស្ដែង ដូចជាប្រទេសកូរ៉េខាងជើង ដែលបានចាកចេញពីកិច្ចព្រមព្រៀងក្នុងឆ្នាំ 2003 ក្រោយមកបានពន្លឿនការអភិវឌ្ឍអាវុធនុយក្លេអ៊ែរដ៏ខ្លាំងក្លា ដែលរហូតមកទល់ពេលនេះកូរ៉េខាងជើងគឺជាការគំរា.មកំហែ.ងដ៏ធំមួយសម្រាប់ពិភពលោក និងបង្កើនហានិភ័យនៃការប្រណាំងប្រជែងសព្វាវុធនុយក្លេអ៊ែរកាន់តែទូលំទូលាយ។

ដោយឡែកចំពោះផែនការដកខ្លួនចេញពីសន្ធិសញ្ញា NPT របស់អ៊ីរ៉ង់ អ្នកវិភាគជាច្រើនបានយល់ឃើញថា ការសម្រេចចិត្តបែបនេះទំនងជានឹងបង្កឱ្យមានប្រតិកម្មខ្លាំងពីសហរដ្ឋអាមេរិក និងសម្ព័ន្ធមិត្តរបស់ខ្លួន ដែលអាចនាំឱ្យមានទណ្ឌកម្មកាន់តែធ្ងន់ធ្ងរ ឬឯកោផ្នែកការទូតបន្ថែមទៀត៕