ប្រទេសឥណ្ឌា ៖ បើនិយាយពីអគារមានតម្លៃថ្លៃកប់ពពក មនុស្សភាគច្រើននឹងនឹកឃើញដល់វិមានធំស្កឹមស្កៃ មានគ្រឿងសង្ហារិម និងសម្ភារៈតុបតែងពាសពេញ ខណៈអ្នកខ្លះទៀតនឹកឃើញដល់ព្រះរាជវាំង ឬអគារធំៗ ។ ប៉ុន្តែសារព័ត៌មាន KBN នឹងនាំលោកអ្នកទៅស្គាល់លំនៅឋានមួយឈ្មោះ «Antilia» ដែលសាងសង់ឡើង
តាមលក្ខណៈទំនើបនៅទីក្រុងបុមបៃ ប្រទេសឥណ្ឌា និងជាប់ចំណាត់ថ្នាក់ជាលំនៅឋានមានតម្លៃថ្លៃបំផុតលើពិភពលោក ។

Antilia គឺជាលំនៅឋានមួយដែលគេចាត់ទុកថា មានតម្លៃថ្លៃបំផុតនៅប្រទេសឥណ្ឌា និងលើពិភពលោក ។ លំនៅឋាននេះជាកម្មសិទ្ធិរបស់មហាសេដ្ឋី និងជាអ្នកជំនួញឥណ្ឌាមានទ្រព្យសម្បត្តិស្តុកស្តម្ភម្នាក់ គឺលោក Mukesh Ambani និងភរិយា ដែលអ្នកទាំងពីរមានកូនចំនួន៣នាក់ ។ ក្រៅពីនេះ លោក Mukesh Ambani ក៏បានជាប់ចំណាត់ថ្នាក់ជាមហាសេដ្ឋីលំដាប់ទី១១ លើពិភពលោកផងដែរ ។

កាលពីឆ្នាំ២០១៤ គេបានវាយតម្លៃថា លំនៅឋានមានតម្លៃប្រមាណ២.០០០លានដុល្លារអាមេរិក ដែលជាតម្លៃខ្ពស់ជាងលំនៅឋានឯកជនផ្សេងៗ ។ ហេតុនេះ វាបានក្លាយជាកន្លែងទាក់ទាញចំណាប់អារម្មណ៍ពីពលរដ្ឋឥណ្ឌា និងជនបរទេស ។

លំនៅឋាននេះមានកម្ពស់សរុប២៧ជាន់ ប៉ុន្តែមានតែសមាជិកគ្រួសាររបស់មហាសេដ្ឋីឥណ្ឌា លោក Mukesh Ambani ប៉ុណ្ណោះ ដែលរស់នៅទីនេះ ។ ក្រៅពីនេះ មានបុគ្គលិកផ្នែកបោសសម្អាតអគារ និងបុគ្គលិកផ្តល់ការថែទាំគ្រួសាររបស់មហាសេដ្ឋីរូបនេះ រហូតដល់៦០០នាក់ ។ ក្រៅពីបុគ្គលិករាប់រយនាក់ ក៏មានក្រុមអង្គរក្ស និងរថក្រោះជាច្រើនគ្រឿងទៀតសម្រាប់ជួយការពារគ្រួសារនេះផងដែរ ។

នៅបរិវេណខាងក្នុង មានអាងហែលទឹកជាច្រើនកន្លែង, ចំណតឧទ្ធម្ភាគចក្រចំនួន៣, រោងភាពយន្តផ្ទាល់ខ្លួន ដែលមានកៅអីអង្គុយចំនួន៥០ ព្រមទាំងចំណតរថយន្តយ៉ាងធំទូលាយ ដែលអាចចតរថយន្តរហូតដល់១៦៨គ្រឿង ។ ក្រៅពីនេះ ក៏មានសួនច្បារ, មណ្ឌលសុខភាព, បន្ទប់ហាត់ប្រាណ, បន្ទប់ប្រជុំ, បន្ទប់ទទួលទានអាហារ និងបន្ទប់ជាច្រើនទៀត ។ រីឯការបុកគ្រឹះសាងសង់លំនៅឋាន គឺអាចទប់ទល់នឹងគ្រោះរញ្ជួយដី និងខ្យល់ព្យុះទៀតផង ។

ចំណែកមូលហេតុដែលលំនៅឋាននេះមានឈ្មោះថា Antilia គឺដើម្បីគោរពដល់កោះ Antilia ដែលមានប្រវត្តិពាក់ព័ន្ធនឹងរឿងនិទាន ។ កាលពីឆ្នាំ២០១០ លំនៅឋាននេះបានជាប់ចំណាត់ថ្នាក់ជា «លំនៅឋានឯកជនមានតម្លៃរាប់លានដុល្លារអាមេរិក» ជាលើកដំបូងលើពិភពលោក និងមានតម្លៃសាងសង់ក្រោមព្រះរាជវាំង Buckingham នៅទីក្រុងឡុងដ៍ ប្រទេសអង់គ្លេស តែបន្តិចប៉ុណ្ណោះ ។

ប៉ុន្តែព្រះរាជវាំង Buckingham គឺជាព្រះរាជទ្រព្យរបស់ព្រះមហាក្សត្រប្រទេសអង់គ្លេស ទើបគេពុំអាចចាត់ចំណាត់ថ្នាក់ប្រៀបធៀបជាមួយលំនៅឋាន Antilia នៅប្រទេសឥណ្ឌាបានទេ ។

បើទោះជាលំនៅឋាននេះសាងសង់ឡើងដោយប្រាក់ និងកម្លាំងញើសឈាមរបស់មហាសេដ្ឋីឥណ្ឌាក្តី ប៉ុន្តែក៏មានមតិរិះគន់ពីមហាជន និងប្រព័ន្ធផ្សព្វផ្សាយឥណ្ឌាថា វាជាការសាងសង់លំនៅឋានចំណាយប្រាក់ខ្ជះខ្ជាយ និងចង់បង្ហាញឱ្យគេឃើញពីទ្រព្យសម្បត្តិប៉ុណ្ណោះ ។ មតិខ្លះទៀតថា ការសាងសង់លំនៅឋាននេះអាចប៉ះពាល់ដល់បរិស្ថាន និងប្រើប្រាស់អគ្គិសនីច្រើនលើសលប់ ។

បច្ចុប្បន្ន លំនៅឋាន Antilia បានក្លាយជាកន្លែងទាក់ទាញមួយនៅទីក្រុងបុមបៃ ដែលមានភ្ញៀវទេសចរបរទេសជាច្រើនបានមកថតរូបនៅបរិវេណខាងមុខលំនៅឋាន ។ បើទោះជាវាជាទីពេញនិយមរបស់ភ្ញៀវទេសចរក្តី ប៉ុន្តែលំនៅឋាននេះពុំអនុញ្ញាតឱ្យមនុស្សទូទៅចូលទៅបរិវេណខាងក្នុងឡើយ ៕

កាលពីថ្ងៃទី១ ខែកក្កដានេះ យោងតាមប្រភពសារព័ត៌មានថៃ The Nation បានឲ្យដឹងថា ការធ្វើយុទ្ធនាការណ៍រវាងក្រសួងទេសចរណ៍ថៃ និងក្រុមហ៊ុនតុក្កតាចិន Labubu ត្រូវបានគេរំពឹងថា នឹងអាចជួយប្រទេសថៃឲ្យសម្រេចបាននូវគោលដៅភ្ញៀវទេសចរចិនចំនួន ៨ លាននាក់នៅឆ្នាំ២០២៤នេះ។យុទ្ធនាការបង្ហាញវត្តមានតុក្កតា Labubu នៅឯអាកាសយានដ្ឋានសុវណ្ណភូមិប្រទេសថៃនឹងប្រព្រឹត្តិទៅរយៈពេល៤ថ្ងៃគឺពីថ្ងៃទី១ដល់ទី៤ ខែកក្កដានេះ ដោយសង្កេតឃើញតុក្កតា Labubu ក្នុងឈុតសម្លៀកបំពាក់ប្រពៃណីថៃ ទទួលបានការស្វាគមន៍យ៉ាងកក់ក្តៅពីថ្នាក់ដឹកនាំនិងសាធារណៈជនទូទៅ។

ប្រភពដដែលបានបញ្ជាក់ថា យុទ្ធនាការដែលបានរៀបចំដោយអាជ្ញាធរទេសចរណ៍ថៃ និងក្រុមហ៊ុនតុក្កតាចិន Pop Mart ដែលជាក្រុមហ៊ុនផលិតតុក្កតា Labubu នេះ គឺចំណាយទឹកប្រាក់ក្នុងទំហំប្រមាណ ១ លានដុល្លារអាមេរិក។

ជាមួយគ្នានោះ រដ្ឋមន្ត្រីទេសចរថៃមួយរូបបានលើកឡើងថា យុទ្ធនាការនេះនឹងជំរុញការមកដល់នៃភ្ញៀវទេសចរចិន ឆ្ពោះទៅរកគោលដៅដែលខ្លួនចង់បាន គឺ៨លាននាក់ក្នុងឆ្នាំនេះ។ ប្រទេសចិនគឺជាទីផ្សារទេសចរណ៍ដ៏ធំបំផុតរបស់ប្រទេសថៃ មុនពេលជំងឺរាតត្បាតប្រទេសថៃទទួលបានភ្ញៀវទេសចរចិនចំនួនជាង ១១ លាននាក់ក្នុងចំណាមភ្ញៀវទេសចរសរុប ៣៩ លាននាក់ក្នុងឆ្នាំ ២០១៩។

យ៉ាងណាមិញ កំណើនចំនួនភ្ញៀវទេសចរចិនក្នុងបានធ្លាក់ចុះជាបន្តបន្ទាប់ក្នុងអំឡុងជម្ងឺរាតត្បាត កូវីដ១៩ ខណៈកាលពីឆ្នាំមុននៅត្រឹមតែ ៣.៥ លាននាក់ប៉ុណ្ណោះ ដែលជំរុញឱ្យរដ្ឋាភិបាលថៃដាក់ចេញនូវគោលនយោបាយលើកលែងទិដ្ឋាការអចិន្ត្រៃយ៍សម្រាប់ជនជាតិចិន។

យ៉ាងណាមិញ បើក្រឡេកមកមើលពីតុក្កតា Labubu របស់ក្រុមហ៊ុនចិន Pop Mart ខណៈទទួលបាននូវភាពល្បីល្បាញយ៉ាងខ្លាំងនៅជុំវិញពិភពលោកក្នុងអំឡុងពេលនេះ គឺព្រោះតែឥទ្ធិពលរបស់ Lisa សមាជិក Blackpink ដែលមានដើមកំណើតជាថៃ ដែលកាលពីគ្រានោះ Lisa គឺបានធ្វើការបង្ហោះរូបរបស់នាងជាមួយនឹងតុក្កតានេះនៅលើ story IG របស់នាង ធ្វើហ្វេនៗក៏ដូចជាអ្នកគាំទ្រភ្លុកទឹកភ្លុកដីសម្រុកទៅទិញតុក្កតាប្រភេទនេះ រហូតអស់ពីស្កុកនិងកើនឡើងតម្លៃទ្វេដង។

ជាមួយគ្នានោះ ក្រុមហ៊ុនចិន Pop Mart ក៏បានទទួលស្គាល់ថា ភាពល្បីល្បាញរបស់ Labubu ខ្លួនគឺបានកើតចេញពី Lisa ខណៈការលក់នៃតុក្កតានេះផ្ទុះឡើងយ៉ាងខ្លាំងនៅក្នុងប្រទេសថៃផងដែរ៕

ថ្មីៗនេះយោងតាមការស្ទង់មតិដោយក្រុមហ៊ុនប្រឹក្សាពហុជាតិ Deloitte បានបង្ហាញថា ចំណាប់អារម្មណ៍របស់អតិថិជនក្នុងប្រទេសអាស៊ីអាគ្នេយ៍ដូចជាឥណ្ឌូនេស៊ី ហ្វីលីពីន និងថៃក្នុងការទិញរថយន្តកូនកាត់គឺបានកើនឡើងយ៉ាងខ្លាំង ខណៈការទិញរថយន្តអគ្គិសនីនៅឆ្នាំនេះស្រាប់តែធ្លាក់ចុះទៅវិញ។ ការស្ទង់មតិនេះបានធ្វើឡើងតាំងពីដើមខែមករា មកដល់ពេលនេះ ដោយមានអ្នកចូលរួម ២៧,០០០ នាក់មកពី ២៦ ប្រទេស ក្នុងនោះមានអ្នកឆ្លើយតបចំនួន ៦,៩៣៩ នាក់មកពីអាស៊ីអាគ្នេយ៍។

នៅពេលវិភាគថាហេតុអ្វីបានជាអតិថិជនក្នុងប្រទេសអាស៊ីអាគ្នេយ៍ជ្រើសរើសការទិញរថយន្តកូនកាត់ច្រើនជាងរថយន្តអគ្គិសនី របាយការណ៍បង្ហាញថា ៧៣% នៃអ្នកឆ្លើយតប គឺពួកគេចង់សន្សំសំចៃលើថ្លៃប្រេងឥន្ធនៈ ក៏ដូចជាជួយសន្សំលើការចំណាយសម្រាប់ការថែទាំ។ លើសពីនេះទៀត ៦៨% មានការព្រួយបារម្ភអំពីផលប៉ះពាល់បរិស្ថាន និង ៣៧% ទៀតចង់កាត់បន្ថយធូលី ផ្សែង និងឧស្ម័នផ្ទះកញ្ចក់។ ទោះជាយ៉ាងណា សម្រាប់ប្រទេសអាមេរិក ជប៉ុន ចិន និងសិង្ហបុរី គឺពួកគេនៅតែគាំទ្ររថយន្តអគ្គិសនីដោយសារវាងាយស្រួលក្នុងការសាកថ្មឆាប់ពេញ ហើយវាមានគ្រប់ទីកន្លែង។

ការស្ទង់មតិក៏បង្ហាញផងដែរថា ៧៤% នៃអ្នកប្រើប្រាស់រថយន្តកូនកាត់នៅអាស៊ីអាគ្នេយ៍ គឺពួកគេចាប់អារម្មណ៍ក្នុងការសាកល្បងម៉ាករថយន្តថ្មី ជាជាងរថយន្តបែបប្រពៃណី និងរថយន្តអគ្គិសនី ដោយសារពួកគេធ្លាប់បានប្រើប្រាស់រួចហើយ ខណៈរថយន្តកូនកាត់គឺពួកគេបានដាក់នៅកំពូលនៃឧស្សាហកម្ម។ អតិថិជនទាំងនោះបាននិយាយថា រថយន្តកូនកាត់មិនត្រឹមងាយស្រួលប្រើប្រាស់ប៉ុណ្ណោះទេ ពួកវាក៏មានរូបរាងស្អាតទាន់សម័យ តម្លៃសមរម្យ ងាយស្រួលបង់រំលោះ តម្លៃថែទាំទាប ទទួលបានបទពិសោធន៍ថ្មីតាមរយៈបច្ចេកវិទ្យាការពិតនិម្មិត និងមានចំណុចគួរឱ្យចាប់អារម្មណ៍ជាច្រើនទៀត។

គួរបញ្ជាក់ដែរថា ការយល់ដឹងពីទស្សនវិស័យរបស់អ្នកប្រើប្រាស់គឺអនុញ្ញាតឱ្យយើងយល់កាន់តែច្បាស់អំពីទិសដៅនៃការសម្របខ្លួនរបស់ឧស្សាហកម្មរថយន្តដែលនឹងជះឥទ្ធិពលដល់អាជីវកម្មដែលពាក់ព័ន្ធផងដែរដូចជាស្ថានីយ៍សាកថ្ម ហិរញ្ញវត្ថុ ទូរគមនាគមន៍ និងបច្ចេកវិទ្យាដែលពាក់ព័ន្ធ វិស័យទាំងអស់នេះត្រូវតែសម្របខ្លួនក្នុងពេលតែមួយ។ លើសពីនេះក្រុមហ៊ុនផលិតដែលអាចផ្តល់នូវដំណោះស្រាយប្រកបដោយប្រសិទ្ធភាព និងប្រសិទ្ធភាពក្នុងរយៈពេលវែងដល់អតិថិជន នឹងទទួលបានទំនុកចិត្ត និងគុណសម្បត្តិប្រកួតប្រជែងរយៈពេលវែង។ ម្យ៉ាងវិញទៀត អ្នកប្រើប្រាស់នឹងទទួលបានអត្ថប្រយោជន៍ពីការប្រកួតប្រជែងដ៏កាចសាហាវ មានជម្រើសកាន់តែច្រើនពីផលិតផល ចំពោះសេវាកម្មពាក់ព័ន្ធ៕

ប្រទេសឥណ្ឌា ៖ កាលពីថ្ងៃទី២ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ពលរដ្ឋឥណ្ឌារាប់រយនាក់បានមកចូលរួមក្នុងពិធីបុណ្យសាសនាមួយ ប៉ុន្តែនៅសុខៗ ស្រាប់តែមានខ្យល់ព្យុះបោកបក់យ៉ាងខ្លាំងបណ្តាលឱ្យមនុស្សម្នារត់ចេញពីពិធីនេះ ។ ចុងក្រោយ វាបានក្លាយជាហេតុការណ៍សោកនាដក.ម្ម ធ្វើឱ្យមនុស្សស្លា.ប់ ជាង១០០នាក់ ដោយសារការរត់ជាន់គ្នា ។

អាជ្ញាធរឥណ្ឌានិយាយថា ហេតុការណ៍នេះបានកើតឡើងក្នុងពិធីបុណ្យស័ក្តិសិទ្ធិមួយនៅរដ្ឋ Uttar Pradesh គឺអ្នកមកចូលរួមពិធីបុណ្យជាន់គ្នាស្លាប់ ចំនួន១១៦នាក់ ដោយចំនួនអ្នករងរបួស និងអ្នកស្លាប់នឹងកើនឡើងជាបន្តបន្ទាប់ ។ អ្វីគួរឱ្យរន្ធត់ខ្លាំងបំផុតនោះ គឺអ្នកស្លាប់ក្នុងហេតុការណ៍នេះភាគច្រើនជាស្ត្រី ។

ពេលមនុស្សម្នាជាច្រើននាក់កំពុងតែចូលរួមស្តាប់ធម៌ទេសនាក្នុងពិធី ស្រាប់តែមានខ្យល់ព្យុះបក់យ៉ាងខ្លាំង និងធ្វើឱ្យអ្នកស្តាប់ធម៌ភ្ញាក់ផ្អើល និងរត់ប្រសាចចេញពីពិធីបុណ្យព្រមៗគ្នា ។ អ្នកចូលរួមស្តាប់ធម៌ទាំងនេះគិតតែពីរត់យករួចខ្លួន និងរត់ជាន់មនុស្សចាស់បណ្តាលឱ្យដួលស្លាប់នៅនឹងកន្លែង រហូតក្លាយជាសោកនាដកម្ម ។

ភ្នាក់ងារសង្គ្រោះបន្ទាន់បានជួយសង្គ្រោះអ្នករងរបួសភ្លាមៗនៅកន្លែងកើតហេតុ និងទំនាក់ទំនងទៅរថយន្តពេទ្យដឹកអ្នករងរបួសទៅមន្ទីរពេទ្យ ។ រីឯសាច់ញាច់សាកសព ផ្សេងទៀតអង្គុយយំតម្រៀបគ្នានៅបរិវេណខាងក្រៅ ។

នាយករដ្ឋមន្ត្រីឥណ្ឌា លោក Narendra Modi បានបង្ហាញការសោកស្តាយចំពោះហេតុការណ៍ដែលកើតឡើងនេះ ព្រមទាំងប្រកាសផ្តល់ប្រាក់ឧបត្ថម្ភដល់អ្នករងរបួសម្នាក់ៗចំនួន៦០០ដុល្លារអាមេរិក និងសាច់ញាតិសាកសព ចំនួន២.៤០០ដុល្លារអាមេរិក ។

លោក Yogi Adityanat អភិបាលរដ្ឋ Uttar Pradesh បានបញ្ជាឱ្យសមត្ថកិច្ចស៊ើបអង្កេតស្វែងរកមូលហេតុពិតប្រាកដយ៉ាងលម្អិត ។ រីឯពលរដ្ឋឥណ្ឌាមកចូលរួមពិធីបុណ្យបានចោទប្រកាន់អ្នករៀបចំកម្មវិធីថា គ្មានការរៀបចំគម្រោងឱ្យបានសមរម្យសម្រាប់ទទួលមនុស្សរាប់រយនាក់ពេលអាកាសធាតុក្តៅ ។

គួរបញ្ជាក់ថា ហេតុការណ៍ជាន់គ្នាស្លាប់នៅប្រទេសឥណ្ឌាបានកើតឡើងជាញឹកញាប់ ជាពិសេស ពេលធ្វើពិធីបុណ្យស័ក្តិសិទ្ធិ ដែលមានមនុស្សម្នាជាច្រើននាក់មកចូលរួមពិធី ។ ជាក់ស្តែង កាលពីឆ្នាំ២០១៦ មានហេតុការណ៍ជាន់គ្នាក្នុងពិធីបុណ្យចូលឆ្នាំថ្មី ដែលបណ្តាលឱ្យមនុស្សស្លាប់ ចំនួន១១២នាក់ ។

ដូចគ្នានេះ កាលពីឆ្នាំ២០១៣ ពលរដ្ឋឥណ្ឌាមកចូលរួមពិធីបុណ្យមួយបានជាន់គ្នាស្លាប់ ចំនួន១១៥នាក់ នៅលើស្ពានក្បែរវត្តមួយកន្លែងនៅរដ្ឋ Madhya Pradesh ។ រីឯនៅឆ្នាំ២០០៨ ក៏មានហេតុការណ៍ជាន់គ្នាស្លាប់ដែរ ក្នុងអំឡុងពេលធ្វើពិធីបុណ្យសាសនានៅវត្តមួយក្នុងទីក្រុង Jodhpur ស្ថិតនៅភាគខាងជើងប្រទេសឥណ្ឌា ៕

ប្រេស៊ីល៖ ក្នុងរយៈពេល ៦ ខែដំបូងនៃឆ្នាំនេះ ព្រៃអាម៉ាហ្សូនបានជួបប្រទះនឹងភ្លើងឆេះព្រៃចំនួន ១៣,៤៨៩ ករណីកើនឡើងជាង ៦១% ធៀបនឹងរយៈពេលដូចគ្នាកាលពីឆ្នាំមុន ដែលនេះគឺជាតួលេខដ៏អាក្រក់បំផុតក្នុងរយៈពេល ២០ ឆ្នាំចុងក្រោយនេះ។
យោងតាមទិន្នន័យផ្កាយរណបដែលបានចេញផ្សាយកាលពីថ្ងៃទី ១ ខែកក្កដា បានបង្ហាញថា មូលហេតុដែលព្រៃត្រូវបានភ្លើងឆេះឥតឈប់ឈរគឺដោយសារសកម្មភាពរបស់មនុស្ស ជាពិសេសការដុតព្រៃដើម្បីកាប់ឆ្ការដីកសិកម្ម រួមទាំងគ្រោះរាំងស្ងួតជាប្រវត្តិសាស្ត្រកាលពីឆ្នាំមុន ក៏ដូចជាការប្រែប្រួលអាកាសធាតុ ការកង្វះទឹកភ្លៀង ដែលកំពុងបង្កើនចំនួនភ្លើងឆេះព្រៃនៅក្នុងប្រទេសប្រេស៊ីល ជាហេតុបណ្តាលឱ្យបរិស្ថានស្ងួត និងងាយឆេះបែបនេះ។

ទោះជាយ៉ាងណាក៏ដោយ យោងតាមវិទ្យាស្ថានជាតិប្រេស៊ីលសម្រាប់ការស្រាវជ្រាវអវកាស (INPE) បានឱ្យដឹងថា បច្ចុប្បន្នការកាប់បំផ្លាញព្រៃឈើបានថយចុះបន្តិចហើយ អាស្រ័យហេតុនេះផ្ទៃដីកាប់បំផ្លាញព្រៃឈើក្នុងអំឡុងថ្ងៃទី១ ខែមករា ដល់ថ្ងៃទី២១ ខែមិថុនា ឆ្នាំនេះគឺបានថយចុះ ៤២% បើធៀបនឹងរយៈពេលដូចគ្នាកាលពីឆ្នាំមុន។ ព្រៃអាម៉ាហ្សូនត្រូវបានគេចាត់ទុកថាជា “សួតបៃតងនៃផែនដី” ដែលជួយកាត់បន្ថយការឡើងកំដៅផែនដីដោយការស្រូបយកឧស្ម័នកាបូនិក។ ក្នុងរយៈពេល ៦ ខែដំបូងនៃឆ្នាំនេះ ប្រព័ន្ធអេកូឡូស៊ីពីរផ្សេងទៀតនៅក្នុងព្រៃអាម៉ាហ្សូនភាគខាងត្បូង រួមទាំងវាលភក់ត្រូពិច Pantanal និង Cerrado savannah ក៏បានកត់ត្រាចំនួនកំណត់ត្រានៃភ្លើងឆេះព្រៃផងដែរ។

Pantanal គឺជាតំបន់សើមត្រូពិចដ៏ធំបំផុតមួយរបស់ពិភពលោក ដែលភាគច្រើនស្ថិតនៅក្នុងរដ្ឋប្រេស៊ីល Mato Grosso ខណៈដែល Cerrado savannah មានទីតាំងនៅប្រទេសប្រេស៊ីល។ នៅតំបន់ Pantanal ដែលជាផ្ទះរបស់ក្រពើ Caiman រាប់លានក្បាល សេក សត្វកណ្ដៀរ និងជាជម្រកនៃដង់ស៊ីតេសត្វខ្លាខ្ពស់បំផុតរបស់ពិភពលោក មានភ្លើងឆេះព្រៃចំនួន ៣,៥៣៨ នៅក្នុងឆមាសទីមួយនៃឆ្នាំនេះ កើនឡើងជាង ២,០០០% បើធៀបនឹងរយៈពេលដូចគ្នាកាលពីឆ្នាំមុន។

នៅក្នុងខែមិថុនាតែមួយ គឺមានភ្លើងឆេះចំនួន ២,៦៣៩ ត្រូវបានគេរកឃើញ ដែលជាចំនួនខ្ពស់បំផុតមិនធ្លាប់មាន ៦ ដង។ អ្នកជំនាញនិយាយថា ស្ថានភាពនេះគួរឱ្យព្រួយបារម្ភខ្លាំងណាស់ ព្រោះភ្លើងឆេះព្រៃតែងតែកើតឡើងនៅឆមាសទីពីរនៃឆ្នាំ ជាពិសេសខែកញ្ញា ជារៀងរាល់ឆ្នាំនៅពេលដែលអាកាសធាតុស្ងួតខ្លាំងបំផុត។ កាលពីសប្តាហ៍មុន រដ្ឋ Mato Grosso ក៏បានប្រកាសដាក់ប្រទេសក្នុងភាពអាសន្ន ហើយអាជ្ញាធរបាននិយាយថា ពួកគេត្រូវតែចល័តអ្នកពន្លត់អគ្គីភ័យមកពីតំបន់ផ្សេងទៀតដើម្បីពន្លត់ភ្លើង។ ទន្ទឹមនឹងនេះដែរ នៅតំបន់ Cerrado ដែលជាតំបន់វាលស្មៅដ៏ធំបំផុតមួយក្នុងពិភពលោក ក៏មានភ្លើងឆេះព្រៃចំនួន ១៣,២២៩ ត្រូវបានកត់ត្រាក្នុងរយៈពេល ៦ ខែដំបូងនៃឆ្នាំនេះដូចគ្នា ដែលស្ទើរតែស្មើនឹងចំនួនភ្លើងឆេះព្រៃនៅ Amazon ទាំងមូល៕

ប្រទេសអូទ្រីស ៖ កាលពីថ្ងៃទី២៧ ខែមិថុនា ឆ្នាំ២០២៤ Economist Intelligence Unit (EIU) បានផ្សព្វផ្សាយរបាយការណ៍បង្ហាញពីសន្ទស្សន៍ភាពរស់នៅលើពិភពលោក (Global Liveability Index) បញ្ជាក់ថា ទីក្រុង Vienna របស់ប្រទេសអូទ្រីស បានជាប់ចំណាត់ថ្នាក់ទី១ ជាទីក្រុងគួរឱ្យរស់នៅបំផុតលើពិភពលោក ។ ទីក្រុងនេះបានជាប់ចំណាត់ថ្នាក់លេខ១ អស់រយៈពេល៣ឆ្នាំជាប់ៗគ្នា (ចាប់ពីឆ្នាំ២០២២ ដល់ឆ្នាំ២០២៤) ។

ការចាត់ចំណាត់ថ្នាក់នេះ គឺបានដាក់ពិន្ទុទីក្រុងចំនួន១៧៣ នៅលើពិភពលោក ដោយការដាក់ពិន្ទុនឹងផ្អែកទៅលើកត្តាសំខាន់ៗចំនួន៥ រួមមាន ៖ ផ្នែកសន្តិសុខ, ការថែទាំសុខភាព, វប្បធម៌ និងបរិស្ថាន, ការអប់រំ និងហេដ្ឋារចនាសម្ព័ន្ធ ។

ទីក្រុង Vienna បានទទួលពិន្ទុពេញចំនួន១០០ពិន្ទុ លើកត្តាចំនួន៤ ដូចជា ៖ ផ្នែកសន្តិសុខ, ការថែទាំសុខភាព, ការអប់រំ និងហេដ្ឋារចនាសម្ព័ន្ធ ។ រីឯកត្តាវប្បធម៌ និងបរិស្ថាន គឺទីក្រុង Vienna ទទួលបានពិន្ទុត្រឹមតែ៩៣.៥ពិន្ទុ ដោយសារទីក្រុងនេះពុំបានរៀបចំការប្រកួតកីឡាសំខាន់ៗ ។

ចំណែកចំណាត់ថ្នាក់ទី២ បានទៅទីក្រុង Copenhagen ប្រទេសដាណឺម៉ាក និងចំណាត់ថ្នាក់ទី៣ បានទៅទីក្រុង Zurich ប្រទេសស្វីស ។ រីឯចំណាត់ថ្នាក់ទី៤ គឺទីក្រុង Melbourne ប្រទេសអូស្ត្រាលី ខណៈចំណាត់ថ្នាក់ទី៥ គឺទីក្រុង Calgary ប្រទេសកាណាដា ។

របាយការណ៍របស់ Economist Intelligence Unit បញ្ជាក់ថា ប្រទេសនៅអឺរ៉ុបខាងលិច នៅតែជាប់ចំណាត់ថ្នាក់ជាតំបន់គួរឱ្យរស់នៅបំផុតលើពិភពលោក ប៉ុន្តែពិន្ទុស្ថិរភាពក្នុងប្រទេសបានធ្លាក់ចុះ ដោយសារមានការធ្វើបាតុកម្មកើនឡើងនៅប្រទេសផ្សេងៗ ដូចជា ៖ កំណើនពួកជ្រុលនិយម, គោលនយោបាយកសិកម្មរបស់សហភាពអឺរ៉ុប, ការប្រឆាំងនឹងជនអន្តោប្រវេសន៍, ជម្លោះភូមិសាស្ត្រ, វិបត្តិលំនៅឋាន និងអតិផរណា ។

រីឯចំណាត់ថ្នាក់របស់ទីក្រុង Tel Aviv ប្រទេសអ៊ីស្រាអែល បានធ្លាក់ចុះទាបជាងទីក្រុងផ្សេងៗ គឺធ្លាក់មកនៅលេខរៀងទី១១២ ដោយសារទីក្រុងនេះកំពុងប្រឈមនឹងស្ថានការណ៍ប្រយុទ្ធគ្នារវាងអ៊ីស្រាអែល និងក្រុមហាម៉ាស់ ។ ដូចគ្នានេះ ទីក្រុង Damascus ប្រទេសស៊ីរី បានខូចខាតដោយសារការធ្វើសង្គ្រាម ទើបទីក្រុងនេះទទួលបានពិន្ទុទាបជាងគេ ៕

នៅថ្ងៃទី ១ខែកក្កដា តារាសម្ដែងដ៏ល្បីល្បាញនិងស៊ីថ្លៃបំផុតនៅប្រទេសកូរ៉េខាងត្បូង Kim Soo Hyun ថ្មីៗនេះបានបង្ហោះរូបថតចំនួន ៤សន្លឹកនៅលើ Instagram របស់ខ្លួនដោយបានថតរូបក្នុងអំឡុងពេលកម្មវិធីជួបអ្នកគាំទ្រដំណើរកម្សាន្តនៅអាស៊ីរបស់ខ្លួន ប៉ុន្តែមានភាពដូចគ្នាខ្លាំងទៅនឹងរូបភាពតារាសម្តែង Kim Ji Won ដែលធ្វើឱ្យផ្ទុះពាក្យចចាមអារ៉ាមស្នេហា។

អ្នកនិយមលេងអ៊ីនធឺណិតបានកត់សម្គាល់ឃើញភាពស្រដៀងគ្នារវាងការបង្ហោះរបស់ Kim Soo Hyun និង Kim Ji Won ដែលបានបង្ហោះរូបភាពក្នុងសម្លៀកបំពាក់ពណ៌ខ្មៅនៅក្នុងព្រឹត្តិការណ៍ Dior នៅតៃវ៉ាន់។ នេះបានជំរុញឱ្យមានការរំពឹងទុកអំពីស្នេហាដែលអាចកើតមានដោយដាក់ឈ្មោះវាថា «Lovetagram» ដែលមានន័យថាការបង្ហោះគូស្នេហ៍ធ្វើឡើងដើម្បីបង្ហាញពីសេចក្តីស្រឡាញ់ចំពោះគ្នាទៅវិញទៅមក។ បន្ទាប់ពីមានការភ្ញាក់ផ្អើល Kim Soo Hyun បានលុបរូបថតភ្លាមៗ។

ទោះបីជាមានការរំពឹងទុកជាបន្តបន្ទាប់ក៏ដោយ ទាំងភ្នាក់ងាររបស់ Kim Soo Hyun និង Kim Ji Won បានរក្សាភាពស្ងៀមស្ងាត់ចំពោះបញ្ហានេះ។

Kim Soo Hyun និង Kim Ji Won ធ្លាប់សម្តែងជាគូស្នេហ៍នឹងគ្នាក្នុងរឿងភាគដ៏ពេញនិយមរបស់ទូរទស្សន៍ tvN មានចំណងជើងថា «Queen of Tears» ដែលទទួលបានអត្រាអ្នកទស្សនាបំបែកកំណត់ត្រា ២៤.៩% ដែលធ្វើឱ្យវាក្លាយជាកម្មវិធីដែលមានអត្រាខ្ពស់បំផុតក្នុងប្រវត្តិសាស្ត្ររបស់ tvN ។

មិនត្រឹមតែលើកនេះប៉ុណ្ណោះទេដែលអ្នកទាំងពីរធ្វើឱ្យហ្វេនៗសង្ស័យថាតារាសម្តែងទាំងពីររូបនេះទាក់ទងគ្នា ដោយកាលពីកន្លងមកនេះ Kim Soo Hyun និង Kim Ji Won ស្លៀកពាក់ស្រដៀងគ្នាសឹងតែដូចជាសំលៀកបំពាក់គូស្នេហ៍ជាហេតុពាក្យចចាមអារ៉ាមរបស់ពួកគេកាន់តែរីកសាយភាយបន្តបន្ទាប់។

Kim Ji Wonមានអាយុ ៣២ ឆ្នាំបានចូលប្រឡូកក្នុងវិស័យកម្សាន្តក្នុងឆ្នាំ ២០១៨ ហើយបានឡើងល្បីល្បាញយ៉ាងឆាប់រហ័សតាមរយៈការសម្តែងរបស់នាងនៅក្នុងរឿងភាគទូរទស្សន៍មួយចំនួនជាពិសេសចុងក្រោយនេះបានគ្រងតំណែងជាតួឯក។

Kim Soo Hyun មានអាយុ៣៦ឆ្នាំបានបង្ហាញខ្លួនជាលើកដំបូងលើកញ្ចក់ទូរទស្សន៍ក្នុងឆ្នាំ ២០០៧ ហើយចាប់តាំងពីពេលនោះមកបានក្លាយជាតួអង្គលេចធ្លោតាមរយៈរឿងភាគជោគជ័យជាច្រើន។ បច្ចុប្បន្ននេះ Kim Soo Hyun បានក្លាយជាតារាសម្តែងដែលរកចំណូលបានច្រើនជាងគេនៅក្នុងប្រទេសកូរ៉េខាងត្បូង ខណៈមានទ្រព្យសម្បត្តិសរុបប្រមាណ ១១៧ លានដុល្លារអាម៉េរិក ដែលរួមមានការកាន់កាប់អចលនទ្រព្យចម្រុះ រថយន្តទំនើប និងភាគហ៊ុននៅក្នុងក្រុមហ៊ុនផ្សេងៗ៕