តារាម៉ូដែលខ្មែរកាត់បារាំង មាលា ដែលមានសន្ទុះគាំទ្រខ្លាំងនារយៈពេលចុងក្រោយនេះ កំពុងធ្វើឱ្យមានការជជែកវែកញែកពីអ្នកលេងបណ្តាញសង្គមបន្ទាប់ពីបង្ហោះរូបភាពនិងវីដេអូបង្ហាញទិដ្ឋភាពនៅ China Town ក្នុងប្រទេសថៃដែលមាននៅក្នុង MV Lisa ។ រូបភាពរបស់ មាលា ធ្វើឱ្យមានការសរសើរច្រើននិងមានមតិរិះគន់ខណៈគណនីហ្វេកប៊ុកជនជាតិថៃចូលមកអរគុណនិងបង្ហាញពី Soft Power របស់ Lisa។
ជឿជាក់ថាសម្រាប់អ្នកតាមដានវិស័យសិល្បៈអាចនឹងស្គាល់តារាស្រី មាលា មិនខានដែលជាតារាម៉ូដែលកូនខ្មែរកាត់បារាំងដ៏ស្រស់ស្អាតនិងបានលេចមុខដើរតួក្នុងវីដេអូចម្រៀង វណ្ណដា និងរឿងខ្លីជាមួយតារាចម្រៀង ថេណា ដែលធ្វើឱ្យសន្ទុះប្រជាប្រិយភាពរបស់នាងហក់ខ្ពស់ត្រូវប៉ាន់លើទីផ្សារយ៉ាងខ្លាំង ខណៈ មាលា ត្រៀមចេញស្នាដៃដំបូងសម្តែងជាតួឯកស្រីក្នុងខ្សែភាពយន្តខ្នាតធំជាមួយតារាសម្តែងមីយ៉ាន់ បៃតាកន ក្នុងពេលឆាប់ៗខាងមុខនេះផងដែរ។ កន្លងមកនេះ មាលា ក៏ត្រូវបានជនជាតិថៃសរសើរថាមានមុខមាត់ដូចតារាសម្តែង Praya Lundberg ។
ថ្មីៗនេះ មាលា បានបង្ហោះរូបភាពនិងវីដេអូនៅ China Town ក្នុងប្រទេសថៃបន្ទាប់ពី Lisa សមាជិក BLACKPINK ទម្លាក់ MV Rockstar ដែល mv នេះថតនៅប្រទេសថៃដោយបង្ហាញរូបភាពនៅទីនេះដូចគ្នាដែលធ្វើឱ្យប្រជាជនថៃរំភើបចិត្តជាខ្លាំងព្រោះគេជឿជាក់ថាMV បង្ហាញពីកន្លែងទេសចរណ៍នេះនឹងកាន់តែទាក់ទាញភ្ញៀវទេសចរបន្ថែមកាន់តែច្រើនទៀតពីឥទ្ធិពលរបស់ Lisa នៅទូទាំងពិភពលោក។ ប្រការនេះធ្វើឱ្យមានការទទួលស្គាល់ថា Lisa ជាSoft Powerដ៏សំខាន់សម្រាប់ប្រទេសកំណើតរបស់នាង។
នៅពេលដែល មាលា បង្ហោះរូបភាពនៅទីនោះស្របពេលបទចម្រៀង lisa កំពុងល្បីខ្ទរខ្ទារ ធ្វើឱ្យអ្នកលេងបណ្តាញសង្គមមួយចំនួនបង្ហាញការមិនពេញចិត្ត ខណៈពេលអ្នកលេងបណ្តាញសង្គមថៃចូលមកអរគុណការបង្ហាញរបស់ មាលា ដែលមក China Town នៅប្រទេសរបស់គេ ថែមទាំងដាក់ចំណងជើង Baby I’m a Rockstar ទៀតធ្វើឱ្យពួកគេលើកឡើងពី Soft Power របស់ Lisa ដែលហាក់ដូចជាចង់សើចចំអកមកកាន់មាលាដូចគ្នា។
ទោះយ៉ាងណា អាចថានេះគ្រាន់តែជាការស្រលាញ់ទៅកាន់អាយដលប៉ុណ្ណោះ ព្រោះមិនថាតារា ឬទស្សនិកជនធម្មតានោះទេគឺសុទ្ធតែមានអាយដលនិងចំណង់ចំណូលចិត្តរៀងៗខ្លួន។ណាមួយនាងជាតារាម៉ូដែលដូច្នេះមិនថានៅប្រទេសកម្ពុជា ឬប្រទេសផ្សេងទេគឺនាងតែងតែមានរូបថតថ្មីៗជូនអ្នកគាំទ្រហើយ៕
