ម៉ាដាម និងគូស្នេហ៍ជាជនជាតិថៃដែលស្រលាញ់គ្នាស្ទើរលេបស្រាប់តែចេញមកប្រកាសបញ្ចប់ទំនាក់ទំនងក្រោយរួមសុខទុក្ខ៨ឆ្នាំធ្វើឱ្យមានការវែកញែកថាមកពីបញ្ហានេះបញ្ហានោះជាដើម។ ឃើញគេវែកញែករឿងខ្លួនពេក ម៉ាដាម ដា ថាចំណុចខ្លះមិនចង់និយាយហើយក៏ឆ្អែតដែរខ្លួនបានព្យាយាមអស់ពីកម្លាំងកាយចិត្តហើយ។ ងាកទៅកាន់ ប៉ាអយ ដែលជាអតីតគូស្នេហ៍អ្នកជំនួញរូបនេះវិញបានបញ្ជាក់អ្នកគាំទ្រថាខ្លួនមិនមែនជាអ្នកសុំបែកមុនឡើយ ម៉ាដាម ដា ជាអ្នកសុំបែកមុន។

វាបានក្លាយជាប្រធានបទមួយក្នុងចំណោមអ្នកគាំទ្រនិងក្នុងចង្កោមវិស័យអនឡាញបន្ទាប់ពីអ្នកនាង សៀន សូលីដា ហៅ ម៉ាដាម ដា ចេញមកប្រកាសជាសាធារណៈចែកផ្លូវស្នេហ៍ភេទដូចគ្នាជាជនជាតិថៃ ប៉ាអយ បន្ទាប់ពីឆ្លងកាត់ទុក្ខលំបាកភាពសប្បាយរីករាយរយៈពេល៨ឆ្នាំមកនេះ។ ម៉ាដាម ដា បានបញ្ជាក់ទៀតថាអ្នកទាំងពីរបានបែកគ្នាមួយរយៈធំមកហើយព្រោះចង់បែកស្ងាត់ៗមិនចង់ឱ្យថាបំពុលសង្គមប៉ុន្តែដោយសារតែមានសំពាធខ្លាំងពេកទើបសម្រេចចិត្តប្រកាសតែម្តង។

ទោះជាយ៉ាងណាក៏ដោយ ការចែកផ្លូវគ្នានេះមានអ្នកខ្លះក៏បានបង្ហាញការសោកស្តាយចំពោះទំនាក់ទំនងនេះ ចំណែកមួយផ្នែកទៀតលើកឡើងថាមកពីបញ្ហានេះ បញ្ហានោះទើបជីវិតគូដែលធ្លាប់តែមានភាពផ្អែមល្អែមប្រែមកជាប្រេះឆា។ ការលើកឡើងពីមតិយោបល់មួយចំនួននេះដែរ ម៉ាដាម ដា ចេញមកបង្ហោះសំណេរមួយទៀតថាចំណុចខ្លះនាងមិនចង់និយាយហើយក៏ឆ្អែតដែរ ខណៈខ្លួនបានប្រឹងព្យាយាមថែរក្សាទំនាក់ទំនងនេះអស់ពីសមត្ថភាពហើយ។
«ចង្កៀងផ្ទះអ្នកណា ភ្លឺផ្ទះអ្នកនឹង!!!មានបងប្អូន២ទៅ៣នាក់ គាត់បានCommentថា៖ « ម៉ាដាម ថតរឿងហើយ ក៏កើតជារឿងបែកគ្នា ប្រហែលមកពី… ខ្ញុំចង់បញ្ជាក់ថាពួកយើងបានបែកគ្នា មុនថតរឿងនឹងទៅទៀត តែពួកយើងនៅមានទំនាក់ទំនងធម្មតានឹងគ្នា។ ក្នុងទំនាក់ទំនងមួយនេះ ខ្ញុំបានព្យាយាមរក្សាអស់ពីកម្លាំងកាយចិត្តហើយ»។ នេះជាការឆ្លើយតបរបស់ ម៉ាដាម ដា។

អ្នកជំនួយអនឡាញល្បីឈ្មោះរូបនេះ បានបន្ថែមទៀតថា «ខ្លួនជាមនុស្សស្រីត្រូវខំធ្វើការរកស៊ី ជាជំហរនៃគ្រួសារ ទទួលបន្ទុកគ្រប់យ៉ាង។ ក្នុងគ្រួសារខ្ញុំជាស្រី ហើយក៏ជាប្រុសដែរ ខ្ញុំពិតជាពិបាកណាស់។ ចំណុចខ្លះ ខ្ញុំមិនចង់និយាយទេ តែគ្រាន់តែប្រាប់ថា ខ្ញុំក៏ឆ្អែតផងដែរ។ ចង្កៀងផ្ទះអ្នកណា ភ្លឺផ្ទះអ្នកនឹងបងប្អូនមិនអាចបន្ទោសខ្ញុំទាំងមិនដឹងការពិតបានទេគោរព និងស្រលាញ់បងប្អូនខ្លាំង»។

បើតាមការបង្ហោះរបស់ ប៉ាអយ នៅលើបណ្តាញសង្គមវិញបានបង្ហើបឱ្យដឹងថាការចែកផ្លូវគ្នានេះ ម៉ាដាម ដា គឺជាអ្នកសុំបែកមុន។ ប៉ាអយ ក៏បានបញ្ជាក់ដែរថា ខ្លួនតែងតែគោរពការសម្រេចចិត្តរបស់មនុស្សដែលខ្លួនស្រលាញ់ គ្មាននរណាម្នាក់ត្រូវ ឬខុសទេ ខណៈខ្លួនបានប្រឹងប្រែងអស់ពីសមត្ថភាពហើយ៕

បន្ទាប់ពីមានការបង្ហោះចែកចាយនៅលើបណ្តាញសង្គមជាហូរហែរមក បានបង្ហាញពីវត្តមានចម្លាក់ក្បាច់បុរាណខ្មែរ ជាពិសេសក្បាច់ដែលដកស្រង់ពីសម័យមហានគរ ក្រោមទឹកដៃដ៏ប្រណិតរបស់លោកតាម្នាក់ដែលរស់នៅក្នុងស្រុកពញាឮ ខេត្តកណ្តាល បានធ្វើមហាជនគ្រប់ៗរូបអត់សរសើរមិនបាន។

ចម្លាក់ស្ពាន់នីមួយៗដែលបានឆ្លាក់ចេញមកប្រកបដោយក្បូរក្បាច់រចនាយ៉ាងប្រណិត ជាក្បាច់ដែលដកស្រង់មកតាមប្រាង្គប្រាសាទនៃតំបន់អង្គរ និងកម្រមានអ្នកដែលអាចធ្វើបានណាស់។ វត្ថុជាប្រាក់ស្ពាន់បានលេចរូបរាងក្រោមស្នាដៃលោកតារូបនេះ គឺរួមមានដូចជាផ្តិលបុរាណ ដាវសម័យសង្គ្រាម កាំបិតបុរាណ ជើងពាន ពែង កំសៀវ និងគំនូរតាំងលម្អជារូបប្រាសាទអង្គរវត្តជាដើម។

ខណៈវត្ថុនីមួយៗដែលបានឆ្លាក់រួចរាល់ជាស្ថាពរហើយនោះ សុទ្ធតែបានភ្ជាប់មកជាមួយក្បូរក្បាច់រចនាយ៉ាងក្បាស់ក្រាល ល្អិតល្អន់ និងវិសេសវិសាលបំផុត។ យ៉ាងណាមិញ ចម្លាក់ស្ពាន់ផ្តិលមួយប្រភេទនេះ បើតាមការបញ្ជាក់ពីលោកតាគឺមានតម្លៃប្រមាណនឹង ២.៥០០ដុល្លារ។

បើក្រឡេកមកមើលព្រឹទ្ធិចារ្យផ្នែកចម្លាក់ប្រាក់និងស្ពាន់មួយរូបនេះ ដែលត្រូវបានគេស្គាល់ថា លោកតា ជា យុទ្ធា ក្នុងវ័យ៧០ឆ្នាំ ខណៈលោកតាចេះឆ្លាក់ចម្លាក់ក្បាច់បុរាណនេះតាំងពីអាយុ១២ឆ្នាំ អំឡុងឆ្នាំ ១៩៦៦មកម្លេះ។ គាត់ក៏បន្តជាអាជីពជាជាងចម្លាក់តាំងពីពេលនោះមករហូតមកដល់បច្ចុប្បន្ន ព្រោះតែទឹកចិត្តស្រលាញ់ ចង់អភិរក្សក្បាច់បុរាណខ្មែរ ជាពិសេសគឺក្បាច់អង្គរទុកនៅលើវត្ថុផ្សេងៗដែលធ្វើពីប្រាក់និងស្ពាន់ ដើម្បីឲ្យកូនខ្មែរជំនាន់ក្រោយបានចងចាំនិងរក្សាទុក។

លោកតាបានមានប្រសាសន៍ថា ចម្លាក់ស្ពាន់នីមួយៗគឺត្រូវឆ្លាក់ដោយដៃផ្ទាល់ និងត្រូវប្រើរយៈពេលយូរខែដើម្បីបញ្ចប់ អាចចន្លោះពី៤ខែទៅមួយឆ្នាំ ព្រោះថាក្បូរក្បាច់ចម្លាក់នីមួយៗពិតជាមិនងាយស្រួលឆ្លាក់នោះទេ ក៏ដូចជាត្រូវតែមានការតាំងចិត្តខ្ពស់ខ្លាំងណាស់ក្នុងការឆ្លាក់។ ចម្លាក់ស្ពាន់នីមួយៗគឺមានតម្លៃចាប់ពី១.០០០ដុល្លារ ដល់ ១០.០០០ដុល្លារ ទៅតាមទំហំតូចឬធំ ក៏ដូចជារយៈពេលឆ្លាក់ផងដែរ៕

រដ្ឋាភិបាល សម្រេចរៀបចំផែនការមេដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង ដែលជាត្រីវិស័យក្នុងការអភិវឌ្ឍខេត្តព្រះសីហនុឱ្យទៅជាប៉ូលសេដ្ឋកិច្ចដ៏សំខាន់។

ផែនការមេនេះ បានកំណត់អំពីចក្ខុវិស័យរយៈពេលវែងឆ្ងាយដើម្បីអភិវឌ្ឍខេត្តព្រះសីហនុទៅជាទីក្រុងធំមួយនៅក្នុងតំបន់អាស៊ាន និងជា ច្រកទ្វារអន្តរជាតិ។

ផែនការមេដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង ចែកជាពីរដំណាក់កាលគឺ៖

ដំណាក់កាលទី ១ “២០២៥-២០២៨”៖ ផ្តោតលើការធ្វើសមាហរណកម្មខេត្តព្រះសីហនុទៅក្នុងប្រព័ន្ធពាណិជ្ជកម្មក្នុងតំបន់

ដំណាក់កាលទី ២ “២០២៩-២០៣៨”៖ ពង្រឹងតួនាទីរបស់ខេត្តព្រះសីហនុជាច្រកទ្វារជាតិ និងជាទីក្រុងមជ្ឈមណ្ឌលក្នុងតំបន់ លើវិស័យហិរញ្ញវត្ថុ ពាណិជ្ជកម្ម ការអភិវឌ្ឍឧស្សាហកម្ម ការដឹកជញ្ជូន និងបច្ចេកវិទ្យា ព្រមទាំងអភិវឌ្ឍខ្លួនទៅជាទីក្រុងពហុមុខងារ សមស្របសម្រាប់សហគ្រិនភាព ទីក្រុងបៃតង និងទីក្រុងឆ្លាតវៃ៕

ជាការពិតណាស់ នៅក្នុងប្រទេសកម្ពុជាយើងគឺមានម្ហូបអាហារពេញនិយម និងសម្បូរបែបជាច្រើន ទោះជាយ៉ាងណាបើយោងតាម Taste Atlas ដែលជាគេហទំព័រមគ្គុទ្ទេសក៍ទេសចរណ៍តាមអ៊ីនធឺណិតមានបទពិសោធន៍សម្រាប់អាហារបែបប្រពៃណី និងអាហារបែបទំនើប បានរាយបញ្ជីមុខម្ហូបល្អបំផុតទាំង ៩ នៅក្នុងប្រទេសកម្ពុជាយើង ដែលម្ហូបទាំងនេះគឺមានការពិនិត្យយ៉ាងដិតដល់ពីអ្នកជំនាញផ្នែកធ្វើម្ហូប មេចុងភៅ អាហារដ្ឋានអន្តរជាតិ និងអ្នកស្រុក។ ដូច្នេះបញ្ជីចំណាត់ថ្នាក់គឺផ្អែកលើចំនួនផ្កាយដែលម្ហូបសម្រេចបាន រសជាតិនៃម្ហូប ប្រជាប្រិយភាពរបស់វានៅក្នុងស្រុក និងនៅលើផែនទីធ្វើម្ហូបពិភពលោក រួមទាំងតម្លៃអាហារូបត្ថម្ភ។ នៅក្នុងអត្ថបទនេះ KBN News នឹងនាំប្រិយមិត្តមកស្គាល់ម្ហូបល្បីៗ និងឆ្ងាញ់បំផុតចំនួន ៩ នៅក្នុងប្រទេសកម្ពុជាយើង៖

១.ឡុកឡាក់សាច់គោ៖ គឺជាអាហារដ៏ពេញនិយមបំផុតរបស់ប្រទេសកម្ពុជាយើង ដែលភ្ញៀវជាតិ និងអន្តរជាតិមិនដែលរំលងឡើយ។ ម្ហូបនេះមានគ្រឿងផ្សំដូចជា សាច់គោ ពងមាន់ ប៉េងប៉ោះ សាឡាត់ ខ្ទឹមបារាំង ប្រេងខ្យង ទឹកស៊ីអ៊ីវ ស្ករ អំបិល ម្សៅស៊ុប ទឹកប៉េងប៉ោះ ម្រេចម៉ត់ ខ្ទឹមសចិញ្រ្ចាំ និងអំបិលម្រេចក្រូចឆ្មារ។

២.បុកល្ហុង៖ អ្នកណាមិនស្គាល់ បុកល្ហុងគឺអាហារដ៏ល្បីបំផុតមួយក្នុងប្រទេសខ្មែរយើង ដោយមានគ្រឿងផ្សំដូចជា ផ្លែល្ហុងខ្ចី អម្ពិល រំដែង និងប្រហុក ដែលជាប្រភេទត្រីផ្អាប់របស់ខ្មែរ។ បុកល្ហុងនេះក៏ដាក់ត្រីឆ្អើរ ឬក្តាមប្រៃផងដែរ ហើយជាធម្មតាវាត្រូវបានប្រើប្រាស់ជាមួយបាយចំហុយ និងសាច់អាំងដូចជាសាច់មាន់ជាដើម។ ភាពខុសប្លែកគ្នាដ៏សំខាន់មួយរវាងសាឡាត់ល្ហុងបៃតងបែបប្រពៃណីរបស់ឡាវ ហើយបុកល្ហុងបែបខ្មែរ គឺការប្រើប្រាស់ទឹកប្រហុកជំនួសឱ្យទឹកត្រី ដែលជាធម្មតាត្រូវបានគេប្រើកាលពីមុន។

៣.ហហ្មុក៖ គឺជាមុខម្ហូបតំណាងជាតិរបស់ប្រទេសកម្ពុជាយើងដោយមានគ្រឿងផ្សំដូចជា ត្រីស្រស់ផ្សំជាមួយគ្រឿង មានការពិបុក និងខ្ទិះដូងជាដើម ខ្ចប់ចំហុយ។ ហហ្មុក អាចធ្វើជាមួយត្រីរ៉ស់ ឬត្រីអណ្តែងដាក់ស្លឹកញជាដើម ប៉ុន្តែមកដល់ពេលបច្ចុប្បន្ន ចុងភៅខ្មែរបានផ្សែផ្សំជាមួយគ្រឿងឆ្ងាញ់ៗបន្ថែមទៀត ដើម្បីបង្កើនក្លិនឈ្ងុយ និងរសជាតិឱ្យកាន់តែឆ្ងាញ់ពិសា និងរំលេចនូវសោភ័ណភាពឱ្យកាន់តែទាក់ទាញផងដែរ។

៤.នំក្រឡាន៖ ក្រឡានគឺជានំរបស់ខ្មែរយើងដែលមានកេរ្តិ៍ឈ្មោះល្បីល្បាញទូទាំងអាស៊ីអាគ្នេយ៍ មិនថាភ្ញៀវជាតិ ឬអន្តរជាតិទេ គឺពួកគេតែងតែចូលចិត្តនំក្រឡានខ្មែរ។ នំនេះធ្វើពីអង្ករដំណើបច្រកចូលក្នុងបំពង់ឬស្សីព្រមទាំងបិទច្នុកដោយប្រើសំបកដូង ឬស្លឹកចេកហើយយកវាដុតរោលពីខាងក្រៅជុំវិញសំបកឬស្សី។ នំក្រឡានគឺមានលក់គ្រប់ទីកន្លែងក្នុងប្រទេសកម្ពុជាយើង។

៥.អាពីងបំពង៖ គឺជាអាហារសម្រន់ដ៏ល្បីល្បាញ និងឈ្ងុយឆ្ងាញ់បំផុតមួយក្នុងប្រទេសកម្ពុជាយើង។ វាគឺជាស្តេចអាហារសត្វល្អិតប្រចាំទីប្រជុំជនស្គន់ ជើងព្រៃ ខេត្តកំពង់ចាម សម្រាប់ភ្ញៀវទេសចរដែលឆ្លងកាត់ស្រុកនេះគឺមិនដែលរំលងអាពីងបំពងឡើយ។

៦.សម្លការី៖ សម្លការី ឬការីសាច់មាន់គឺជាអាហារបែបប្រពៃណីខ្មែរដែលមានសាច់មាន់ គ្រឿងបុក (ស្លឹកគ្រៃ រមៀត ខ្ជាយ រំដេង ខ្ទឹមស ខ្ទឹមក្រហម សម្បកក្រូចសើច) រួមទាំងមានគ្រឿងការីគ្រប់មុខដូចជា (ផ្កាចាន់ ឈើអែម ម្សៅការី និងប្រេងគ្រាប់ការីក្រហម) លើសពីនេះក៏មានម្ទេសឆ្អើរចិញ្ច្រាំ ស្លឹកក្រូចសើច កាពិឆៅ ខ្ទិះដូង បន្លែការីគ្រប់មុខរួមមាន (ដំឡូងបារាំង ឬដំឡូងជ្វា ខ្ទឹមបារាំង សណ្តែកកួរ ត្រប់វែង) សណ្តែកដីលីង និងគ្រឿងផ្សំជាច្រើនទៀត។

៧.ត្រីចៀនចួន៖ គឺម្ហូបខ្មែរដ៏ពេញនិយមបំផុតមួយ ដែលគេច្រើនធ្វើសម្រាប់បរិភោគក្នុងគ្រួសារ ទទួលភ្ញៀវសំខាន់ៗ។ ដោយមានគ្រឿងផ្សំដូចជា ត្រីកែស ឬត្រីសណ្ដាយ ទឹកត្រី អំពិលទុំ ស្ករត្នោត ខ្ទឹមស ស្លឹកខ្ទឹម ឬស្លឹកគូឆាយ សៀង ខ្ញី (ហាន់ជាចំណិតតូចៗ) និងខ្លាញ់រាវ ០,៥០ ក្រាម។

៨.សម្លម្ជូគ្រឿង៖ ម្ជូគ្រឿងក៏ជាមុខម្ហូបដ៏ល្បីបំផុតមួយក្នុងប្រទេសខ្មែរយើងផងដែរ ដោយមានគ្រឿងផ្សំដូចជា សាច់គោ គ្រឿងបុក ម្ទេសក្រៀមត្រាំទឹកអោយរីកហើយចិញ្ច្រាំអោយម៉ត់ អំពិលទុំ ឬក្រសាំងក៏បាន ត្រកួតកាត់កង់ៗ ម្ទេសខ្មាំង 2-3ផ្លែ ស្លឹកក្រូចសើច ស្លឹកកន្ទ្រោប យកទៅរោលភ្លើង ហើយបេះតែស្លឹកទុក ប្រហុកចិញ្ច្រាំ ទឹកត្រី អំបិល ស្ករ និងម្សៅស៊ុប។

៩.នំបញ្ជុក៖ នំបញ្ជុកគឺជានំដែលគេយកម្សៅទៅស្ងោរ រួចហើយទើបគេស្រង់យកទៅបុកលាយទឹក បន្ទាប់មកយកទៅចាក់ក្នុងប៉ែន ទើបយកស្នូលឈើឆ្នុកសង្កត់ប៉ែន ដើម្បីធ្វើជាសសៃៗ រោយវា ទម្លាក់ទៅក្នុងទឹកក្ដៅពុះ ដើម្បីចំអិនសសៃម្សៅឱ្យឆ្អិនល្អ ក្រោយមកទើបគេស្រង់ដាក់ក្នុង ជាល កញ្ជ្រែង ឬ កញ្ជើល ដោយរៀបជាចង្វាយៗ ដើម្បីងាយស្រួលក្នុងការចាប់យកតាមបរិមាណ សមល្មមសម្រាប់ញ៉ាំ។ នំបញ្ចុក ជាប្រភេទនំចំអែតក្រពះ ឬហៅថា អាហារសម្រន់ ដែលពលរដ្ឋខ្មែរពេញនិយមបរិភោគ ជាអាហារពេលព្រឹក ឬជាអាហារសម្រន់ សម្រាប់ពេលរសៀល៕

ខេត្តប៉ៃលិន គឺជាខេត្តមួយដែលមានសក្ដានុពលខាងវិស័យទេសចរណ៍ដ៏ល្បីល្បាញ ក្រៅពីមានរ៉ែត្បូង និងពេជ្រដ៏មានតម្លៃជាច្រើន ខេត្តនេះក៏សម្បូរទៅដោយធនធានធម្មជាតិ បូករួមជាមួយទស្សនីយភាពជួរភ្នំ ទឹកជ្រោះ និងព្រៃឈើផងដែរ។ ខេត្តប៉ៃលិនស្ថិតនៅខាងជើងជួរភ្នំក្រវាញ នៅភាគខាងលិចនៃប្រទេសកម្ពុជា ដែលមានចម្ងាយផ្លូវ ៣៧១ គីឡូម៉ែត្រ ពីរាជធានីភ្នំពេញ និង ៨៤ គីឡូម៉ែត្រ ពីទីរួមខេត្តបាត់ដំបង ដោយធ្វើដំណើរតាមកំណាត់ផ្លូវជាតិលេខ ៥៧។ ហេតុនេះដើម្បីលើកស្ទួយដល់វិស័យទេសចរណ៍ក្នុងស្រុក KBN News សូមណែនាំតំបន់ទេសចរណ៍ល្បីៗចំនួន ៥ នៅខេត្តប៉ៃលិនធានាថាសប្បាយទៅហើយមិនចង់មកវិញឡើយ៖

១.រមណីយដ្ឋានទឹកធ្លាក់អូរតាវ៉ៅ ឬទឹកធ្លាក់ភ្នំខៀវ៖ គឺជារមណីយដ្ឋានទេសចរណ៍ធម្មជាតិ ដែលមានទីតាំងស្ថិតនៅសង្កាត់អូរតាវ៉ៅ ខ័ណ្ឌប៉ៃលិន មានចម្ងាយ ៥ គ.មពីក្រុងប៉ៃលិន។ នៅទីនោះមានស្ទឹងធម្មជាតិទឹកថ្លា ក៏ដូចជាមានជ្រោះទឹកហូរធ្លាក់លើល្បាក់ថ្មដា យ៉ាងខ្ពស់ រួមជាមួយខ្យល់អាកាសត្រជាក់ដល់ក្រអៅបេះដូងដែលធ្វើឱ្យភ្ញៀវទេសចរជាតិ និងអន្តរជាតិ ទៅលេងយ៉ាងសប្បាយរីករាយ។ នៅរមណីយដ្ឋាននេះក៏មានខ្ចុះដើម្បីអង្គុយលេងនៅក្បែរមាត់ស្ទឹងអូរតាវ៉ៅជាច្រើនកន្លែង រួមទាំងមានខ្ចុះអង្គុយនៅខាងលើច្រាំង និងខាងលើកន្លែងចតឡាន សម្រាប់ភ្ញៀវទេសចររង់ចាំក្រុមគ្រួសារចុះទៅលេងទឹកជ្រោះធ្លាក់បែកផ្កាត្រែងទៀតផង។ ចំណែកកន្លែងទុកដាក់ឡានម៉ូតូវិញក៏មានទីធ្លាធំទូលាយផងដែរ មិនធ្វើឱ្យភ្ញៀវមានការព្រួយបារម្ភពីសុវត្ថភាពបាត់បង់អ្វីឡើយ។

២.ភ្នំយ៉ាត៖ នណាៗក៏ដឹងដែរថា «ភ្នំយ៉ាត» គឺជារមណីយដ្ឋានវប្បធម៌ប្រវត្តិសាស្ត្រមួយដ៏ស្រស់ស្អាតនៅក្នុងខេត្តប៉ៃលិន ដែលស្ថិតនៅជាប់ផ្លូវជាតិលេខ ៥៧ និងនៅក្បែរវត្តរតនសោភ័ណហៅវត្តកោងកាង កន្លែងទេសចរណ៍មួយនេះ គឺជាបេះដូងនៃខេត្តប៉ៃលិន។ ម្យ៉ាងវិញទៀត ប្រជាពលរដ្ឋ ភ្ញៀវទេសចរណ៍ និងអ្នកដំណើរទាំងឡាយ ដែលចេញ-ចូល មកខេត្តប៉ៃលិន តែងតែឆ្លងកាត់តាមជើងភ្នំយ៉ាត ដើម្បីគយគន់មើលសំណង់ប្រវត្តិសាស្ត្រមួយចំនួន ដែលនៅជាប់នឹងជើងភ្នំយ៉ាតតែម្តង ដូចជាប្រាសាទទ្វារ ៨ ទិស និងព្រះចូឡាមុនីចេតីយ។

៣.ទឹកធ្លាក់ក្បាលដំរី៖ រមណីយដ្ឋានទឹកធ្លាក់ក្បាលដំរី មានទីតាំងស្ថិតនៅសង្កាត់បយ៉ាខា ក្រុងប៉ៃលិន ខេត្តប៉ៃលិន ដែលមានចម្ងាយប្រហែល ៨ គ.មពីរូបសំណាកយាយយ៉ាត។ នៅកន្លែងនេះ ភ្ញៀវទេសចរអាចរីករាយនឹងការទស្សនាទឹកជ្រោះ ឬទឹកធ្លាក់, ដើរមើលទេសភាពព្រៃភ្នំ ទស្សនាកសិដ្ឋាននានា អាចហែលទឹកលេងយ៉ាងសប្បាយរីករាយ ស្រូបយកខ្យល់អាកាសបរិសុទ្ធ និងមានកន្លែងពិកនិចជាច្រើនទៀត។

៤.ទឹកធ្លាក់ភ្នំដំបង៖ គឺជារមណីយដ្ឋានធម្មជាតិដ៏ល្អបំផុត ដែលមានព្រៃភ្នំយ៉ាងស្រស់ស្អាតនៅជាប់នឹងច្រាំងស្ទឹង។ ដូច្នេះភ្ញៀវទេសចរអាចចុះងូតទឹកលេងបានព្រោះទឹកថ្លាឈ្វង់ ហើយត្រជាក់ ជាមួយនឹងថ្មធំៗជាច្រើន ដែលធ្វើឱ្យភ្ញៀវមានអារម្មណ៍ស្រស់ស្រាយជ្រះអស់ទុក្ខកង្វល់។ រមណីយដ្ឋានទឹកធ្លាក់នេះនៅជាប់ស្រុកសំឡូត ហើយក៏ជាព្រំប្រទល់រវាងខេត្តប៉ៃលិន និងបាត់ដំបងដែលហូរកាត់ភូមិក្រចាប់និងរមណីយដ្ឋាននានានៃតំបន់នេះទៅកាន់ស្ទឹងសង្កែផងដែរ។

៥.រមណីយដ្ឋានភ្នំកុយ៖ ភ្នំកុយគឺជាតំបន់ទេសចរណ៍ធម្មជាតិដែលមានសម្រស់ព្រៃប្រឹក្សា និងទឹកស្ទឹងមានលក្ខណៈធម្មជាតិពិតៗ ភ្ញៀវទេសចរអាចមកទីនេះដើម្បីស្រូបយកខ្យល់អាកាសបរិសុទ្ធ ទស្សនាសម្រស់ព្រៃប្រឹក្សា ដោយតំបន់នេះក៏សម្បូរទៅដោយដើមឈើវល្លិ៍ធំៗសម្រាប់ការសម្រាកលំហែរបស់អ្នកទេសចរផងដែរ។ រមណីយដ្ឋានភ្នំកុយមានចម្ងាយ ២០ គ.ម ពីក្រុងប៉ៃលិន តាមផ្លូវស្ទឹងកាច់ ស្ថិតក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន៕

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានឯកភាពចំពោះសំណើរបស់លោក គង់ បុរាណ កូនប្រុសរបស់ព្រឹទ្ធាចារ្យកោសល្យវោហារ គង់ ណៃ មានបំណងចូលបម្រើក្របខ័ណ្ឌរដ្ឋដើរតាមគន្លងឪពុក។ សម្តេចធិបតី បានប្រគល់ភារៈកិច្ចនេះជូនឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈនិងរដ្ឋមន្ត្រីក្រសួងវប្បធម៌ និងវិចិត្រសិល្បៈ។

នាយករដ្ឋមន្រ្តី បានបញ្ជាក់នៅព្រឹកថ្ងៃទី១១ ខែកក្កដា ថា «ខ្ញុំបានឃើញសាររបស់ប្អូនប្រុស គង់ បុរាណ ដែលត្រូវជាកូនប្រុសបង្កើតរបស់លោកតា គង់ ណៃ ដែលប្អូនបានស្នើសុំចូលបម្រើក្នុងក្របខ័ណ្ឌរដ្ឋ ដើម្បីបានដើរតាមគន្លងរបស់លោកឪពុក ហើយជាពិសេសប្អូនមានជំនាញចាប៉ី ដែលអាចបន្តវេនពីលោកឪពុករបស់ប្អូន»។ «ខ្ញុំឯកភាពតាមសំណើរបស់ប្អូនប្រុស គង់ បុរាណ។ ខ្ញុំបានប្រគល់ភារកិច្ចជូនឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងលោកជំទាវ រដ្ឋមន្ត្រីក្រសួងវប្បធម៌ និងវិចិត្រសិល្បៈ ដើម្បីរៀបចំកិច្ចការងារនេះ។ សូមជូនពរប្អូនប្រុស ទទួលបានជោគជ័យក្នុងការបន្តវេនចាប៉ីពីលោកតា គង់ ណៃ។ នេះជាការបញ្ជាក់របស់សម្តេចធិបតី ហ៊ុន ម៉ាណែត។

សម្តេចធិបតី តបតាមការស្នើសុំនេះបន្ទាប់ពីលោក គង់ បុរាណ បានបង្ហោះសារមួយនៅលើបណ្តាញសង្គមយ៉ាងដូច្នេះថា «ខ្ញុំបាទឈ្មោះ គង់ បុរាណ កូនប្រុសតែម្នាក់គត់ក្នុងចំណោមបងប្អូន១០នាក់ដែលបានបន្តវេនចាប៉ី ពីលោកឪពុក គង់ ណៃ តែសព្វថ្ងៃខ្ញុំមិនទាន់មានក្របខណ្ឌរដ្ឋនៅឡើយទេ ខ្ញុំចង់បានក្របខណ្ឌរដ្ឋមួយកន្លែងដើម្បីជួយបំរើរដ្ឋដូចពុកខ្ញុំនិងជីវភាពសម្រាប់ថ្ងៃខាងមុខ។ ដូច្នេះសូមពុកម៉ែបងប្អូនអ៊ំយាយតាជួយស៊ែរផង ក្រែងដំណឹងនេះជ្រាបដល់ប្រមុខថ្នាក់ដឹកនាំរាជរដ្ឋាភិបាលលោកជ្រាបដំណឹង សូមអរគុណ និងអរព្រះគុណ»។

ក្រោយពីបំណងប្រាថ្នារបស់ខ្លួនបានសម្រេច លោក គង់ បុរាណ បានបង្ហាញអារម្មណ៍រំភើបចិត្តយ៉ាងខ្លាំងដែលទទួលបានក្តីសណ្តោសពីនាយករដ្ឋមន្រ្តី។ លោក បានរៀបរាប់ថា« ខ្ញុំបាទ គង់ បុរាណពេលបានទទួលដំណឹងនេះខ្ញុំបាទពិតជាសប្បាយរីករាយណាស់ ដែលសម្តេច ពេញចិត្តនិងស្រលាញ់អាណិតដល់រូបខ្ញុំជាសិល្បៈចាប៉ីដងវែង បន្តវេនពីឪពុក សូមដួងព្រលឹងពុកបានស្ងប់នៅដានលើ កូនបានសម្រេចបំណងប្រាថ្នាហើយ ហើយជាចុងក្រោយសូមជូនពរសម្តេចនិងលោកជំទាវព្រមទាំងក្រុមគ្រួសារជួបតែសំណាងល្អ សុខភាពល្អ គ្រប់ពេលវេលាជារៀងរហូត ក្រោមម្លប់សន្តិភាពជារៀងរហូត»។

គួរបញ្ជាក់ផងដែរថា ព្រឹទ្ធាចារ្យ គង់ ណៃ វីរសិល្បករចាប៉ីដងវែងមរតកមនុស្សរស់កម្ពុជាបានទទួលអនិច្ចកម្មក្នុងជន្មាយុ៨០ឆ្នាំដោយរោគាពាធនៅឯស្រុកកំណើតខេត្តកំពតកាលពីរសៀលថ្ងៃទី២៨ មិថុនា ឆ្នាំ២០២៤៕