តារារ៉េបនិងសម្តែង សញ្ជាតិអាមេរិក លោក Wiz Khalifa ម្ចាស់បទ «See You Again» ត្រូវបានគេរាយការណ៍ថា ត្រូវបានប៉ូ.លីសឃាត់ខ្លួនថ្មីៗនេះ នៅឯប្រទេសរ៉ូម៉ានី ដោយចោទប្រកាន់ថា លោកបានជ.ក់ក.ញ្ឆាអំឡុងពេលការសម្តែងក្នុងមហោស្រពតន្ត្រីនៅទីនោះ។ ស្របពេលដែលច្បាប់ក្នុងប្រទេសរ៉ូម៉ានីបានចែងថា ការប្រើប្រាស់ក.ញ្ឆាគឺជាការខុសច្បាប់ធ្ងន់ធ្ងរ។

កាលពីថ្ងៃទី ១៤ ខែកក្កដា នៅក្នុងសេចក្តីថ្លែងការណ៍ អង្គការរដ្ឋអាជ្ញាប្រឆាំងឧក្រិដ្ឋកម្មរបស់ប្រទេសរ៉ូម៉ានី បានឲ្យដឹងថា តារាចម្រៀងរ៉េបរូបនេះ បានជក់កញ្ឆានៅលើឆាកក្នុងអំឡុងពេលសម្តែងរបស់គាត់។

អាជ្ញាធរបានឲ្យដឹងទៀតថា “ក្នុងអំឡុងពេលសម្តែងនៅឯមហោស្រពតន្ត្រីនោះ ជនជាប់ចោទត្រូវបានគេរកឃើញថាមានថ្នាំញៀនជាង ១៨ ក្រាម និងបារីមូរមួយចំនួនទៀតផងដែរ។ ហើយបើយោងតាមច្បាប់របស់ប្រទេសរ៉ូម៉ានី កញ្ឆាត្រូវបានចាត់ទុកថាជា “ថ្នាំបង្កហានីភ័យខ្ពស់” ហើយប្រសិនបើ Khalifa ត្រូវបានកាត់ទោស គាត់អាចប្រឈមមុខនឹងការជាប់ពន្ធនាគាររហូតដល់ ១០ ឆ្នាំ។

នៅថ្ងៃបន្ទាប់ Wiz បានបង្ហោះនៅលើបណ្តាញសង្គម X ដើម្បីសុំទោសអ្នកគាំទ្ររបស់គាត់ ដោយបានគូសបញ្ជាក់ថា«កម្មវិធីយប់មិញពិតជាអស្ចារ្យខ្លាំងណាស់។ ខ្ញុំមិនមានន័យថាមិនគោរពប្រទេសរ៉ូម៉ានីនៅលើឆាកនោះទេ។ ពួកគេគោរពខ្លាំងណាស់ ហើយអនុញ្ញាតឱ្យខ្ញុំទៅ។ ខ្ញុំនឹងត្រលប់មកវិញឆាប់ៗនេះ»។

ទោះបីគាត់ត្រូវបានចោទប្រកាន់ក៏ដោយ ក៏គាត់ត្រូវបានដោះលែងភ្លាមៗដែរ។ យ៉ាងណាមិញ អាជ្ញាធរកំពុងតែបើកការស៊ើបអង្កេតទៅលើរឿងនេះបន្ថែមទៀត ខណៈដែលរូបភាពជាច្រើនរបស់លោកត្រូវបានផ្តោតលើកញ្ឆាផងដែរ៕

កូរ៉េខាងត្បូង៖ ភូមិបុរាណ Bukchon Hanok គឺជាកន្លែងទេសចរណ៍ដ៏ពេញនិយមបំផុតមួយរបស់ទីក្រុងសេអ៊ូល ដែលទាក់ទាញអ្នកទស្សនារាប់ពាន់នាក់ជារៀងរាល់ថ្ងៃ។ ទោះជាយ៉ាងណា ថ្មីៗនេះអាជ្ញាធរមូលដ្ឋានក្នុងភូមិនេះស្រាប់តែសម្រេចដាក់បម្រាមគោចរភ្លាមៗ ដោយស្វាគមន៍ភ្ញៀវទេសចរមានកំណត់។

យោងតាម CNN មូលហេតុដែលអាជ្ញាធរមូលដ្ឋានភូមិ Bukchon Hanok ដាក់បម្រាមគឺដោយសារបញ្ហាទេសចរណ៍ហួសប្រមាណបានរីករាលដាលពាសពេញទីក្រុង ទើបអាជ្ញាធរកូរ៉េខាងត្បូងបានប្រកាសការគ្រប់គ្រងយ៉ាងតឹងរ៉ឹងដើម្បីការពារភូមិប្រពៃណីប្រវត្តិសាស្ត្រនៅកណ្តាលទីក្រុងសេអ៊ូលឱ្យឆ្ងាយពីហ្វូងភ្ញៀវទេសចរ។ ដូច្នេះភូមិនេះត្រូវបានកំណត់ថាជា “តំបន់គ្រប់គ្រងពិសេស” ដំបូងបង្អស់របស់ប្រទេសក្រោមច្បាប់ផ្សព្វផ្សាយទេសចរណ៍របស់ប្រទេសកូរ៉េខាងត្បូង។

អាស្រ័យហេតុនេះ បម្រាមគោចរនឹងត្រូវអនុវត្តតែលើអ្នកទេសចរប៉ុណ្ណោះ ដោយស្វាគមន៍អ្នកទេសចរមានកំណត់ មានន័យថា ប្រសិនបើភ្ញៀវទេសចរចង់មកទីនេះ ភ្ញៀវត្រូវគោរពពេលវេលាចេញចូលតាមច្បាប់ ដោយបើកឱ្យភ្ញៀវចូលចាប់ពីម៉ោង ១០ ព្រឹកដល់ ៥ ល្ងាចប៉ុណ្ណោះ។ ហើយរថយន្តក្រុងទេសចរណ៍ក៏ត្រូវបានដាក់កម្រិតនៅក្នុងតំបន់មួយចំនួនផងដែរ ដើម្បីកាត់បន្ថយចរាចរណ៍ និងបង្វែរ Bukchon ទៅជាកន្លែងដើរ។ តំបន់ដែលមានកូដពណ៌ចំនួនបី គឺក្រហម ទឹកក្រូច និងលឿង ក៏នឹងត្រូវបានកំណត់ផងដែរ ដើម្បីអនុញ្ញាតឱ្យអាជ្ញាធរមូលដ្ឋានគ្រប់គ្រង ងាយស្រួលតាមដានហ្វូងមនុស្សនៅក្នុងតំបន់ដែលមានប្រជាជនច្រើនបំផុត។

ក្រុមមន្ត្រីបាននិយាយថា អ្នកបំពានក៏នឹងត្រូវពិន័យផងដែរ។ វិធានការរឹតត្បិតទេសចរណ៍ទាំងនេះនឹងត្រូវបានអនុវត្តនៅដើមខែតុលាឆ្នាំនេះ។ យោងតាមទិន្នន័យរបស់រដ្ឋាភិបាលកូរ៉េ ភ្ញៀវទេសចរក្នុងស្រុក និងបរទេសប្រមាណ ៦.៦ លាននាក់បានទៅទស្សនា Bukchon ក្នុងឆ្នាំ ២០២៣។ អស់រយៈពេលជាច្រើនឆ្នាំ ភ្ញៀវទេសចរតែងមកទីនេះច្រើនលើសលប់ និងបង្កបញ្ហាជាមួយប្រជាជនក្នុងតំបន់។ ការត្អូញត្អែរអំពីសំលេងរំខាន ការទុកដាក់សំរាម និងបញ្ហាឯកជនភាពនៅក្នុងសង្កាត់ក៏បានកើនឡើង ដែលនេះបណ្តាលឱ្យអាជ្ញាធរចាប់ផ្តើមចេញបម្រាមហាមឃាត់ភ្ញៀវទេសចរតែម្តង។

នៅក្នុងសង្កាត់ Jongno ក្នុងទីប្រជុំជនទីក្រុងសេអ៊ូល Bukchon នៅជិតកន្លែងសម្គាល់វប្បធម៌ផ្សេងទៀតដូចជាប្រាសាទបុព្វបុរសរាជវង្ស Jongmyo និងវិមានដ៏ធំ Gyeongbokgung និង Changdeokgung ។ តំបន់នេះធ្លាប់ជាកន្លែងសម្រាប់មន្ត្រីជាន់ខ្ពស់ និងពួកអភិជនក្នុងសម័យស្តេច Joseon ដែលគ្រប់គ្រងប្រទេសកូរ៉េពីទសវត្សរ៍ឆ្នាំ ១៣០០ ដល់ឆ្នាំ ១៩១០។ សព្វថ្ងៃនេះ តំបន់នេះមានប្រជាជនរស់នៅប្រហែល ៦,០០០ នាក់ ក៏ដូចជាអាជីវកម្ម ផ្ទះសំណាក់ ហាងសិប្បកម្ម និងហាងកាហ្វេ រួមទាំងទីតាំងថតរូបលេចធ្លោមួយចំនួន៕

ប្រទេសជប៉ុន ៖ នេះជាបន្ទប់ស្នាក់នៅក្នុងសណ្ឋាគារមានតម្លៃថោកបំផុតនៅប្រទេសជប៉ុន ដែលមានតម្លៃត្រឹមតែ១៣០យេនប៉ុណ្ណោះក្នុង១យប់ (ឬស្មើប្រមាណ៣.០០០រៀល) ប៉ុន្តែភ្ញៀវស្នាក់នៅត្រូវតែអនុញ្ញាតឱ្យសណ្ឋាគារផ្សាយផ្ទាល់ (Live) គ្រប់សកម្មភាពទាំងអស់របស់ភ្ញៀវពេលស្នាក់នៅក្នុងបន្ទប់ ។

សណ្ឋាគារនេះឈ្មោះ Business Ryokan Asahi ស្ថិតនៅពុំឆ្ងាយពីតំបន់កម្សាន្ត Tenjin, Fukuoka ហើយភ្ញៀវទេសចរនឹងចំណាយពេលធ្វើដំណើរត្រឹមតែ១៥នាទីប៉ុណ្ណោះ ។ ការស្នាក់នៅក្នុងសណ្ឋាគារនេះមានតម្លៃថោកបំផុត បើធៀបនឹងសណ្ឋាគារផ្សេងទៀតនៅប្រទេសជប៉ុន ប៉ុន្តែអ្វីដែលភ្ញៀវត្រូវយល់ព្រមមុនពេលចូលស្នាក់នៅនោះ គឺអនុញ្ញាតឱ្យសណ្ឋាគារផ្សាយផ្ទាល់ក្នុងបន្ទប់ស្នាក់នៅរបស់ភ្ញៀវគ្រប់ពេលវេលាក្នុងប្រព័ន្ធយូធូបរបស់សណ្ឋាគារ ។

ភ្ញៀវមកស្នាក់នៅក្នុងសណ្ឋាគារនេះ ពុំចាំបាច់ជាបុគ្គលល្បីល្បាញក្នុងសង្គម ឬ Influencer ឡើយ គឺភ្ញៀវគ្រាន់តែចូលស្នាក់នៅក្នុងបន្ទប់សណ្ឋាគារតាមធម្មតា និងកុំភ្លេចថា សណ្ឋាគារកំពុងតែផ្សាយផ្ទាល់ពីបន្ទប់របស់ពួកគេ ។ សណ្ឋាគារបញ្ជាក់ថា វាមិនពិបាកទេ សម្រាប់ភ្ញៀវដែលចង់ស្នាក់នៅក្នុងបន្ទប់តម្លៃថោកបែបនេះ ។

ពេលភ្ញៀវមកដល់បន្ទប់ បុគ្គលិកសណ្ឋាគារនឹងប្រគល់កូនសោរបន្ទប់ និងប្រាប់ថា ក្នុងបន្ទប់មានបំពាក់កាមេរ៉ាសម្រាប់ផ្សាយផ្ទាល់ពីសកម្មភាពភ្ញៀវគ្រប់ពេលវេលា ។ ចំណុចសំខាន់មួយដែលភ្ញៀវគួរតែចងចាំនោះ គឺហាមដោះសម្លៀកបំពាក់ក្នុងបន្ទប់ដាច់ខាត ។

បន្ទប់នេះមានលក្ខណៈស្រដៀងគ្នានឹងបន្ទប់ទទួលភ្ញៀវធម្មតារបស់ជប៉ុន ក្នុងនោះមានសម្លៀកបំពាក់, កម្រាលពូក, តុតូច, ទូរទស្សន៍, កាំសៀវដាំទឹក និងសម្ភារៈផ្សេងទៀត ។ វាជាបន្ទប់ស្អាត និងទទួលបានការថែទាំយ៉ាងល្អ ហើយវត្ថុប្លែកក្នុងបន្ទប់នេះ គឺភ្ញៀវអាចបោះលុយកាក់ក្នុងប្រឡោះម៉ាស៊ីនត្រជាក់ ដែលមានតម្លៃ៣.០០០រៀល ។

ចំណែកកាមេរ៉ាសម្រាប់ផ្សាយផ្ទាល់បានបែរមុខមកចំណុចកណ្តាលបន្ទប់សណ្ឋាគារ ប៉ុន្តែនៅទីនេះ គ្មានបន្ទប់ទឹកដូចបន្ទប់ស្នាក់នៅផ្សេងទៀតទេ គឺភ្ញៀវអាចទៅប្រើប្រាស់បន្ទប់ទឹករួមគ្នាជាមួយភ្ញៀវផ្សេងទៀត ។ បើទោះជាសណ្ឋាគារផ្សាយផ្ទាល់ពីសកម្មភាពរបស់ភ្ញៀវក្តី ប៉ុន្តែគ្មានការថតសំឡេងទេ ដើម្បីចៀសវាងការបើកចម្រៀងខុសកម្មសិទ្ធិបញ្ញា ។

សរុបមក តម្លៃស្នាក់នៅក្នុងបន្ទប់សណ្ឋាគារនេះ ស្មើត្រឹមតែ១៣០យេនប៉ុណ្ណោះក្នុង១យប់ (ឬស្មើប្រមាណ៣.០០០រៀល) ។ ចុះលោកអ្នកវិញ តើហ៊ានស្នាក់នៅក្នុងបន្ទប់សណ្ឋាគារនេះទេ ដើម្បីទទួលបានតម្លៃថោក?

ថ្មីៗនេះ កម្មវិធីប្រកួតរ៉ូបូតថ្នាក់ជាតិលើកទី១១ ដែលមានការចូលរួមពីនិស្សិតនៃសកលវិទ្យាល័យនិងវិទ្យាស្ថានធំៗចំនួន ៩ នៅកម្ពុជា បានប្រព្រឹត្តិទៅដោយរលូននៅឯពហុកីឡាដ្ឋានមរតកតេជោ ខណៈក៏បានរកឃើញម្ចាស់ជ័យលាភីលេខ១ គឺបានទៅលើសាលាតិចណូ ហើយជ័យលាភីលេខ ២ និង លេខ ៣ បានទៅលើសាលា NPIC។

កម្មវិធីនេះគឺធ្វើឡើងនៅក្នុងគោលបំណងប្រឡងប្រជែងរ៉ូបូត ដែលនិស្សិតកម្ពុជាទាំងអស់បានព្យាយាមផលិតវាឡើងតាមរយៈការបញ្ជារដោយប្រព័ន្ធអេអាយ និងដើម្បីយកទៅដាក់ប្រកួតនៅឯប្រទេសវៀតណាមនាខែសីហាខាងមុខ តំណាងឲ្យប្រទេសកម្ពុជា។ ខណៈដែលរ៉ូបូតទាំងនោះ អាចជួយការងារចំនួន៣ផ្នែកដល់កសិករគឺ ស្ទូងសំណាប. ច្រូតកាត់ស្រូវ និងការប្រមូលផលស្រូវយកទៅទុកដាក់។

ក្នុងការប្រកួតគឺមាននិស្សិតចំនួន៩សាលា ដែលបានផលិតរ៉ូបូតមកចូលរួម មានដូចជា៖វិទ្យាស្ថានបច្ចេកវិទ្យាកម្ពុជា (តិចណូ) , វិទ្យាស្ថានជាតិពហុបច្ចេកទេសកម្ពុជា (NPIC), សាកលវិទ្យាល័យជាតិគ្រប់គ្រង, បណ្ឌិតសភាបច្ចេកទេសឌីជីថលកម្ពុជា និង វិទ្យាស្ថានជាតិបណ្តុះបណ្ដាលបច្ចេកទេស. ជាដើម។

យ៉ាងណាមិញ យោងតាមការប្រកាសលទ្ធផលនាថ្ងៃទី ១៥ ខែកក្កដានេះបានឲ្យដឹងថា ម្ចាស់ជ័យលាភីលេខ១ នៃកម្មវិធីប្រកួតរ៉ូបូតឆ្នាំនេះគឺបានទៅលើក្រុម ITC-02 មកពីវិទ្យាស្ថានបច្ចេកវិទ្យាកម្ពុជា ខណៈជ័យលាភីលេខ ២ និង លេខ ៣ បានទៅលើវិទ្យាស្ថានជាតិពហុបច្ចេកទេសកម្ពុជា (NPIC)។ ជាមួយគ្នានោះ ក៏សូមកោតសរសើរនិស្សិតមកពីសាលាផ្សេងៗ នៅក្នុងកិច្ចខិតខំប្រឹងប្រែងយ៉ាងអស់ពីសមត្ថភាព ចូលរួមនៅក្នុងការប្រកួតរ៉ូបូតឆ្នាំនេះ បើទោះបីជាមិនទទួលបានលទ្ធផលជាទីគាប់ប្រសើរក្តី។

គួរបញ្ជាក់ដែរថា កម្មវិធីប្រកួតរ៉ូបូតនេះ មានការចូលដោយថ្នាក់ដឹកនាំកំពូលចំនួន៣ក្រសួងគឺ រដ្ឋមន្ត្រីក្រសួងព័ត៌មាន,រដ្ឋមន្ត្រីក្រសួងការងារ និងបណ្តុះបណ្តាលនិងវិជ្ជាជីវៈ និងរដ្ឋមន្ត្រីក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍។

ចំពោះនិស្សិត៣ក្រុមដែលឈ្នះការប្រកួតរ៉ូបូតថ្នាក់ជាតិលើកទី១១ ឆ្នាំ២០២៤នេះ មានឱកាស បន្តឡើងទៅប្រកួតប្រជែងរ៉ូបូតកម្រិតតំបន់ អាស៊ីប៉ាហ្វិក ក្នុងព្រឹត្តិការណ៍ ABU Robocon 2024 នៅប្រទេសវៀតណាម នាខែសីហា ឆ្នាំ២០២៤ ខាងមុខនេះទៀត ដែលតំណាងអោយនិស្សិតកម្ពុជា៕