ភ្នំខ្នងក្រពើ គោលដៅទេសចរណ៍ស្រស់ស្អាតនិងទាក់ទាញ មិនចាញ់ខ្នងផ្សារ ស្ថិតនៅតាមជួរភ្នំក្រវ៉ាញ!

ភ្នំខ្នងក្រពើ ដែលមានទីតាំងស្ថិតនៅក្នុងឧទ្យានជាតិជួរភ្នំក្រវ៉ាញកណ្តាល គ្របដណ្តប់លើខេត្ត កោះកុង ខេត្តកំពង់ស្ពឺ និងខេត្តពោធិ៍សាត់។ ភ្នំខ្នងក្រពើនេះ គឺស្ថិតនៅក្នុងប្រភេទព្រៃភ្នំ, ឧទ្យានជាតិ, ទេសចរណ៍ធម្មជាតិ ដែលសាកសមបំផុតសម្រាប់ភ្ញៀវទេសចរណាដែលចូលចិត្តដំណើរកម្សាន្តបែបផ្សងព្រេង និងចង់ទទួលបាននូវបទពិសោធន៍ថ្មីនៃការឡើងភ្នំ។

បើយោងតាមប្រភព Fresh News បានឲ្យដឹងថា កាលគេដាក់ឈ្មោះថាភ្នំខ្នងក្រពើនេះ ព្រោះកាលពីដើមឡើយ ធ្លាប់មានក្រពើមួយក្បាលអស់បុណ្យជួបភ័យដល់ក្ដីមរណា ក៏បានកឿងជាប់លើខ្នងភ្នំនេះ ហើយក៏ប្រែទៅជាសិលាមានសណ្ឋានដូចទៅនឹងស្រកាខ្នងក្រពើ ទើបក្រោយមកទីនោះក៏ជាប់ឈ្មោះថា «ខ្នងក្រពើ» រហូតដល់ពេលបច្ចុប្បន្ន នេះបើតាមការបញ្ជាក់ពីមគ្គុទ្ទេសក៍សហគមន៍ទីនោះ។

នៅទីនោះ អ្នកទាំងអស់គ្នា អាចគយគន់នូវទេសភាពព្រៃភ្នំនិងព្រៃប្រឹក្សាដ៏ខៀវស្រងាត់ អមជាមួយនឹងវាលស្មៅបៃតងខ្ចី ផ្កានិងរុក្ខជាតិច្រើនប្រភេទ ទស្សនាថ្ងៃរះដ៏ស្រស់ស្អាតនៅពយច្រាំងដាច់ ថ្មដែលមានសណ្ឋានដូចក្រពើ ទឹកធ្លាក់អូរឆាំឆាដ៏ត្រជាក់ ខ្យល់អាកាសបរិសុទ្ធ បរិយាកាសស្ងប់ស្ងាត់ល្អ ជាមួយនឹងអាកាសធាតុត្រជាក់ មានអព្ទនៅជុំវិញខ្លួន ដែលធ្វើឱ្យយើងទទួលបានអារម្មណ៍ស្រស់ស្រាយ រំសាយអស់រាល់ទុក្ខកង្វល់នៅទីនោះ។

បន្ថែមពីនេះ ក៏នូវមានសកម្មភាពជាច្រើនទៀត ដូចជាទស្សនាថ្ងៃរះនិងថ្ងៃលិចនៃជើងភ្នំ, បទពិសោធន៍ឡើងភ្នំជាមួយនឹងមគ្គុទេស៍សហគមន៍ជំនាញ, ពិកនិច, ការបោះជំរុំ ឬ បោះតង់ជាដើម, ហើយក៏នៅមានកសិដ្ឋាននៅទីនោះផងដែរ។

ដើម្បីធ្វើដំណើរទៅកាន់គិរីឧទ្យាននេះ ភ្ញៀវទេសចរត្រូវទំនាក់ទំនងជាមួយមគ្គុទ្ទេសក៍សហគមន៍អេកូទេសចរណ៍តាំងបំពង់ជាមុនសិន ដែលមានទីតាំងស្ថិតនៅភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ ដើម្បីឱ្យពួកគាត់នាំផ្លូវក្នុងការឡើងភ្នំ ប្រកបដោយសុវត្ថិភាព។ នៅក្នុងដំណើរផ្សងព្រេងនេះដែរ ភ្ញៀវទេសចរត្រូវចំណាយពេលជិះគោយន្តប្រមាណពីរម៉ោង ហើយត្រូវបន្តដំណើរដោយថ្មើរជើងជាងប្រាំមួយម៉ោងទៀតដើម្បីឡើងដល់លើកំពូលភ្នំនេះផងដែរ៕