ប្រទេសស្កុតឡេន ៖ មន្ត្រីអង្គការការពារ និងថែទាំសត្វសមុទ្ររបស់ប្រទេសអង់គ្លេស (British Divers Marine Life Rescue) លើកឡើងថា បានទទួលសេចក្តីរាយការណ៍ថា មានត្រីបាឡែនព្រុយវែងជាច្រើនក្បាលត្រូវបានទឹករលកបោកបក់មកកាន់ឆ្នេរសមុទ្រមួយកន្លែងនៅប្រជុំកោះ Orkney ប្រទេសស្កុតឡេន កាលពីថ្ងៃទី១១ ខែកក្កដា ឆ្នាំ២០២៤ ។

អាជ្ញាធរស្កុតឡេននិយាយថា ត្រីបាឡែនដែលត្រូវទឹករលកបោកបក់មកកាន់ឆ្នេរខ្សាច់នេះ សរុបទាំងអស់ស្មើនឹង៧៧ក្បាល ហើយពេលអាជ្ញាធរមកដល់ឆ្នេរសមុទ្រ គឺមានត្រីបាឡែនត្រឹមតែ១២ក្បាលប៉ុណ្ណោះ នៅមានជីវិត ។ ប៉ុន្តែទីបំផុត អាជ្ញាធរក៏សម្រេចចិត្តចាក់ថ្នាំសម្លាប់ត្រីបាឡែនទាំងអស់ ដោយសារពួកវារងរបួសធ្ងន់ធ្ងរ និងពុំអាចហែលទឹកទៅសមុទ្រវិញ ។ ទោះយ៉ាងណា អាជ្ញាធរពុំទាន់ជ្រាបពីមូលហេតុដែលបណ្តាលឱ្យកើតហេតុការណ៍នេះទេ ។

ហេតុការណ៍នេះស្រដៀងគ្នានឹងឆ្នាំ២០២៣ ដែរ គឺពេលនោះ មានត្រីបាឡែនពូជដូចគ្នាចំនួន៥៥ក្បាល ត្រូវបានទឹករលកបោកបក់មកកាន់ឆ្នេរខ្សាច់ ហើយវាកើតឡើងក្នុងពេលវេលាដូចគ្នា ។ ត្រីបាឡែនទាំង៥៥ក្បាល បានដេកស្ងៀមនៅលើឆ្នេរខ្សាច់កោះ Isle of Lewis ហើយមានជីវិតតែ១ក្បាលប៉ុណ្ណោះ ។

ដូចគ្នានេះ ត្រឹមតែរយៈពេល១ខែ (គឺខែកក្កដា ឆ្នាំ២០២៣) មានត្រីបាឡែនចំនួន១.០០០ក្បាលទៀត បានដេកងាប់នៅលើឆ្នេរសមុទ្រប្រទេសនូវែលសេឡង់ និងអូស្ត្រាលី ។ រីឯអង្គការអភិរក្ស និងជួយសង្គ្រោះត្រីបាឡែន និងផ្សោត (Project Jonah New Zealand) និយាយថា វាគួរឱ្យសោកស្តាយណាស់ ដែលមានហេតុការណ៍បែបនេះកើតឡើងនៅប្រជុំកោះ Chatham ប្រទេសនូវែលសេឡង់ ។

គួរបញ្ជាក់ថា ត្រីបាឡែនទាំងនេះ គឺជាពូជ Pilot Whales ដែលពួកវាចូលចិត្តរស់នៅជាក្រុម ឬហែលទឹកជាក្រុម ។ ហេតុនេះ បើក្នុងហ្វូងពួកវាមានត្រីបាឡែនណាមួយរងរបួស ឬមានជំងឺ រហូតដល់ហែលទឹកខុសទិសដៅបណ្តាលឱ្យជាប់នៅលើឆ្នេរខ្សាច់ គឺសមាជិកក្នុងហ្វូងផ្សេងទៀតនឹងហែលទឹកតាមដែរ ហើយទីបំផុត ត្រីបាឡែនទាំងអស់ក្នុងហ្វូងត្រូវបានទឹករលករុញមកកាន់ឆ្នេរខ្សាច់ ៕

ធនាគារស្វីសគឺជាជម្រើសកំពូលសម្រាប់អ្នកជំនួញធំៗដែលចង់បើកគណនីអាជីវកម្មនៅបរទេស ហើយត្រូវបានគេស្គាល់ថាជា “ធនាគារដែលមានសុវត្ថិភាពបំផុតក្នុងពិភពលោក”។ ដូច្នេះហើយ តើហេតុអ្វីបានជាគេចាត់ទុកថាធនាគារស្វីសមានសុវត្ថិភាពបំផុតក្នុងលោក?
សម្រាប់មូលហេតុនោះគឺ៖
១.ធានាការសម្ងាត់អតិបរមា៖ អស់រយៈពេលជាយូរមក ធនាគារស្វីសត្រូវបានអតិថិជនជឿទុកចិត្តយ៉ាងខ្លាំង ដោយសារការអនុវត្តច្បាប់តឹងរឹង ដែលរក្សាការសម្ងាត់គណនីធនាគាររបស់អ្នកដាក់ប្រាក់បញ្ញើ។ ដូច្នោះហើយ អតិថិជនដែលប្រើប្រាស់សេវាធនាគារស្វីសនឹងមានលេខកូដប្រាក់បញ្ញើដាច់ដោយឡែក។ លេខកូដរបស់អតិថិជនបរទេសគឺខុសពីអ្នករស់នៅស្វីស។ ដូច្នេះមានតែបុគ្គលិកធនាគារម្នាក់ប៉ុណ្ណោះដែលដឹងលេខកូដអតិថិជន ហើយមានតែមេដឹកនាំជាន់ខ្ពស់ ៣ នាក់ប៉ុណ្ណោះដែលស្គាល់ឈ្មោះអតិថិជនប្រតិបត្តិការ។

២.នីតិវិធីបើកគណនីតឹងរឹង៖ ខណៈពេលដែលធនាគារផ្សេងទៀតអាចបើកគណនីអនឡាញបានយ៉ាងឆាប់រហ័ស និងចំណេញពេលវេលា ជាមួយនឹងធនាគារស្វីស អតិថិជនត្រូវតែមកដោយផ្ទាល់ និងបង្ហាញឯកសារអត្តសញ្ញាណមួយចំនួនដើម្បីបើកគណនីជោគជ័យ។

៣.ការអភិវឌ្ឍន៍ផ្អែកលើសេដ្ឋកិច្ចប្រកបដោយនិរន្តរភាព៖ កត្តាមួយទៀតដែលជួយធនាគារស្វីសទាក់ទាញប្រាក់បញ្ញើរបស់អតិថិជនគឺការអភិវឌ្ឍន៍របស់ពួកគេដោយផ្អែកលើនយោបាយស្ថិរភាព និងការអភិវឌ្ឍន៍សេដ្ឋកិច្ច។ ក្នុងរយៈពេល ២០ ឆ្នាំកន្លងមកនេះ អត្រាអតិផរណារបស់ប្រទេសស្វីសតែងតែមានកម្រិតទាបបំផុត ជាមធ្យម ០.៣២% ហើយមានបរិត្តផរណាច្រើនឆ្នាំ។ នេះជួយរក្សាប្រាក់បញ្ញើនៅក្នុងធនាគារស្វីស បំប្លែងទៅជាហ្វ្រង់ស្វ៊ីស ពីការបាត់បង់តម្លៃតាមពេលវេលា។

៤.គុណភាពសេវាកម្មល្អឥតខ្ចោះ៖ ដោយសារតែវាបម្រើដល់អ្នកមាន ធនាគារស្វីសផ្តោតលើលក្ខណៈសម្បត្តិរបស់បុគ្គលិករបស់ពួកគេតាមរយៈដំណើរការជ្រើសរើសយ៉ាងម៉ត់ចត់បំផុត។ ក្រៅពីជំនាញល្អ បុគ្គលិកធនាគារក៏ត្រូវចេះយ៉ាងហោចណាស់ ៤ ភាសាដែររួមមាន អង់គ្លេស អ៊ីតាលី បារាំង និងអាល្លឺម៉ង់។

៥.ការគ្រប់គ្រងទ្រព្យសម្បត្តិប្រកបដោយប្រសិទ្ធភាព៖ យោងតាមអ្នកជំនាញធនាគារ វិធីសាស្ត្រគ្រប់គ្រងគណនីរបស់ធនាគារស្វីសគឺមានប្រសិទ្ធភាពណាស់។ ធនាគារស្វីសក៏បានទាញយកអត្ថប្រយោជន៍ពីផលប័ត្រអតិថិជនរបស់ខ្លួន ដើម្បីបង្កើនប្រសិទ្ធភាពធនធានវិនិយោគ ដោយភ្ជាប់ទំនាក់ទំនងការងារ និងសកម្មភាពអាជីវកម្មរបស់អតិថិជន។ នេះត្រូវបានគេចាត់ទុកថាជាលក្ខណៈទាក់ទាញមួយដើម្បីទាក់ទាញអតិថិជន និងបង្កើតបណ្តាញអាជីវកម្មសម្ងាត់ដែលមានប្រសិទ្ធភាពខ្ពស់៕

សហរដ្ឋអាមេរិក ៖ អ្នកដំណើរប្រុសម្នាក់បានប្រព្រឹត្រទង្វើពុំសមរម្យ និងដើររំខានអ្នកដំណើរផ្សេងទៀតនៅលើយន្តហោះរបស់ក្រុមហ៊ុនអាកាសចរណ៍ American Airlines ដែលបណ្តាលឱ្យមានភាពរញ៉េរញ៉ៃយ៉ាងខ្លាំង ទើបអាកាសយានិកបង្ខំចិត្តចុះចតយន្តហោះជាបន្ទាន់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១២ ខែកក្កដា ឆ្នាំ២០២៤ ។

សារព័ត៌មានរាយការណ៍ថា អ្នកដំណើរប្រុសរូបនេះបានផឹកស្រាបៀរ Jack and Cokes មុនពេលឡើងជិះយន្តហោះ និងក្នុងអំឡុងពេលប្តូរជើងយន្តហោះ រួចហើយក៏បង្កចលាចលតែម្តង ។ លើសពីនេះ អ្នកដំណើរប្រុសរូបនេះក៏បាន ស្រា.ត ខោរបស់ខ្លួនបង្ហាញអ្នកដំណើរផ្សេងទៀតពេញយន្តហោះ ហើយថែមទាំងបាញ់នោមលើផ្លូវដើរក្នុងយន្តហោះទៀតផង ។

ក្រោយពេលយន្តហោះចុះចត សមត្ថកិច្ចបានចាប់ខ្លួនលោក Neil McCarthy អាយុ២៥ឆ្នាំ មកពីរដ្ឋ Oregon សហរដ្ឋអាមេរិក ពីបទករណីប្រព្រឹត្តទង្វើពុំសមរម្យនៅលើយន្តហោះ American Eagle 3921 ដែលហោះហើរពីទីក្រុង Chicago សហរដ្ឋអាមេរិក ទៅកាន់ទីក្រុង Manchester ប្រទេសអង់គ្លេស ។ ប៉ុន្តែយន្តហោះនេះត្រូវបង្ខំឱ្យផ្លាស់ប្តូរគោលដៅទៅកាន់ទីក្រុង Buffalo រដ្ឋញូវយ៉ក ។ នេះបើតាមការបញ្ជាក់ពីអ្នកនាំពាក្យក្រុមហ៊ុនអាកាសចរណ៍ American Airlines ។

លោក Neil McCarthy បានសារភាពប្រាប់សមត្ថកិច្ចថា លោកចូលចិត្តផឹកស្រាបៀរ Jack and Cokes ហើយលោកបានផឹកអស់ជាច្រើនកែវ មុនពេលឡើងលើយន្តហោះនៅទីក្រុង Portland រដ្ឋ Oregon សហរដ្ឋអាមេរិក ។ បន្ទាប់មក លោកក៏បានផឹកស្រាអស់ជាច្រើនកែវទៀត ក្នុងអំឡុងពេលប្តូរជើងយន្តហោះនៅទីក្រុង Chicago ។

ចំណែកសមត្ថកិច្ចនិយាយថា អ្នកដំណើរផ្សេងទៀតបានយកទូរស័ព្ទដៃថតរូបភាពលោក Neil McCarthy ផ្ញើមកសមត្ថកិច្ច ហើយក្នុងរូបភាពនេះ គេឃើញលោកស្រាតខោរបស់ខ្លួនចេញ និងឈរបាញ់នោមនៅលើយន្តហោះ ។ ក្រៅពីនេះ សមត្ថកិច្ចក៏ទទួលបានសេចក្តីរាយការណ៍ពីភ្នាក់ងារសន្តិសុខ និងបុគ្គលិកអាកាសចរណ៍ផងដែរ ។

ក្រុមហ៊ុនអាកាសចរណ៍ American Airlines បញ្ជាក់ថា យន្តហោះនេះត្រូវបានអាជ្ញាធរបញ្ជាឱ្យផ្លាស់ប្តូរគោលដៅភ្លាមៗ ដោយសារមានការរំខានពីអ្នកដំណើរ ។ សមត្ថកិច្ចបានចោទប្រកាន់លោក Neil McCarthy ពីបទបង្ហាញអវៈយវៈភេទរបស់ខ្លួននៅលើយន្តហោះ ហើយលោកនឹងជាប់ពន្ធនាគាររយៈពេល៦ខែ និងបង់ប្រាក់ពិន័យចំនួន៥.០០០ដុល្លារអាមេរិក ៕

បរទេស៖ អាតាកាម៉ាដែលជាវាលខ្សាច់គ្មានប៉ូលក្តៅបំផុតនៅលើភពផែនដី ស្ថិតក្នុងប្រទេសឈីលី ត្រូវបានគ្របដណ្តប់ដោយផ្កាពណ៌ស្វាយដ៏កម្រដែលរីកនៅពាក់កណ្តាលរដូវរងារ បានកំពុងទាក់ទាញការចាប់អារម្មណ៍យ៉ាងខ្លាំងពីភ្ញៀវទេសចរជុំវិញពិភពលោក។
យោងតាម IFL Science ដែលបានចុះផ្សាយកាលពីថ្ងៃទី១១ ខែកក្កដា ឆ្នាំ២០២៤ ថាអាកាសធាតុនៅទីនេះគឺមិនធម្មតានោះទេ ដោយសារតែវាលខ្សាច់គឺក្តៅបំផុតនៅលើផែនដី ធ្វើឱ្យផ្កានានាពិបាកនឹងរីកដុះដាលខ្លាំងណាស់ ទោះជាយ៉ាងណាវាហាក់ដូចជាចម្លែកដែលរុក្ខជាតិអាចរីកដុះដាលនៅកន្លែងដ៏អាក្រក់បែបនេះបាន។

នេះគឺជាបាតុភូតដ៏កម្រមួយដែលធ្លាប់បានកើតឡើងរៀងរាល់ពីរបីឆ្នាំម្តង។ កន្លែងដែលមានអាកាសធាតុដ៏អាក្រក់ និងមិនសូវមានអ្នកស្គាល់ ស្រាប់តែក្លាយទៅជាកន្លែងដែលមានផ្ការីកយ៉ាងស្រស់ស្អាត និងជាវាលខ្សាច់មួយដែលទាក់ទាញភ្ញៀវទេសចរបំផុត។ វាលខ្សាច់ដ៏ក្តៅនេះបានប្រែក្លាយទៅជាសួនផ្កា ២០០ ប្រភេទដែលលាតសន្ធឹងរាប់រយគីឡូម៉ែត្រ ដោយលក្ខខណ្ឌអាកាសធាតុនាពេលថ្មីៗនេះ ហាក់ដូចជាសមស្របជាចម្បងសម្រាប់ “ផ្កាពណ៌ស្វាយ” ខ្លាំងណាស់។

ការរីកដុះដាលរុក្ខជាតិនៅលើវាលខ្សាច់ជាធម្មតាកើតឡើងនៅខែកញ្ញាដល់ខែវិច្ឆិកា នៅពេលដែលភ្លៀង កំដៅ និងពន្លឺព្រះអាទិត្យរួមបញ្ចូលគ្នា។ ទោះជាយ៉ាងណាក៏ដោយ ការរីកដុះដាលនេះបានកើតឡើងខុសពីធម្មតា ហើយទំនងជា El Nino គឺជាមូលហេតុ។ El Nino គឺជាការប្រែប្រួលនៃសីតុណ្ហភាពទឹកនៅក្នុងមហាសមុទ្រប៉ាស៊ីហ្វិក មានឥទ្ធិពលលើពិភពលោក ចាប់ពីខ្យល់ សីតុណ្ហភាព ទឹកភ្លៀង រហូតដល់ឥទ្ធិពលព្យុះត្រូវបានប៉ះពាល់។ នៅពេល El Nino និង ENSO ប៉ះគ្នាសីតុណ្ហភាពផ្ទៃមហាសមុទ្រនឹងកើនឡើងនៅតំបន់ត្រូពិចកណ្តាល និងខាងកើតប៉ាស៊ីហ្វិក។ នេះបានបណ្តាលឱ្យមានភ្លៀងធ្លាក់កើនឡើងខ្លាំងនៅក្នុងតំបន់មួយចំនួន ហើយនាពេលថ្មីៗនេះភ្លៀងនៅវាលខ្សាច់ Atacama ក៏បានបង្កើតលក្ខខណ្ឌសម្រាប់ផ្ការីកខុសធម្មតាបែបនេះតែម្តង។

យោងតាមលោក Cesar Pizarro ប្រធានផ្នែកអភិរក្សជីវចម្រុះនៅមូលនិធិព្រៃឈើប្រទេសឈីលី (CONAF) បានឱ្យដឹងថា ភ្លៀងធ្លាក់ពី ១១ ទៅ ១២ មិល្លីម៉ែត្រក្នុងខែមេសា រួមផ្សំជាមួយនឹងពពកទាបក្រាស់ដែលគ្របដណ្ដប់លើដីជារៀងរាល់យប់។ ខណៈពេលដែលវាលខ្សាច់ក្តៅជាធម្មតាគ្របដណ្តប់លើផ្ទៃដី ១៥,០០០ គីឡូម៉ែត្រការ៉េ ផ្ការដូវរងានេះគ្របដណ្តប់ត្រឹមតែពីរបីរយគីឡូម៉ែត្រការ៉េប៉ុណ្ណោះ។ ទោះជាយ៉ាងណាក៏ដោយ ជាមួយនឹងភ្លៀងដែលរំពឹងថានឹងបន្តធ្លាក់ចុះ ផ្កាទំនងជារីកដុះដាលបន្ថែមទៀត៕

មនុស្សភាគច្រើនមានចម្ងល់ថា បើមានមនុស្សក្រៅភពពិតមែន ហេតុអ្វីពួកគេធ្វើដំណើរមកផែនដីរបស់យើង? រីឯចម្លើយបានលើកឡើងខុសៗគ្នាថា ពួកគេអាចមកតាមដានការរីកចម្រើនរបស់ផែនដី, អាចមកធ្វើកិច្ចព្រមព្រៀងជាមួយប្រទេសអភិវឌ្ឍ ឬមានគម្រោងគ្រប់គ្រងផែនដីនាថ្ងៃអនាគត ដោយសារមនុស្សក្រៅភពចង់រកភពថ្មីទៀតដើម្បីរស់នៅ ។

ខាងក្រោមនេះ គឺជាមូលហេតុធ្វើឱ្យមនុស្សក្រៅភពធ្វើដំណើរមកផែនដី រួមមាន ៖

១-មនុស្សក្រៅភពបានតាមដានការរីកចម្រើនរបស់ផែនដី ៖
មនុស្សក្រៅភពអាចធ្វើដំណើរមកផែនដីបាន ដោយសារពួកគេមានបច្ចេកវិទ្យារីកចម្រើនជាងមនុស្សយ៉ាងខ្លាំង ហើយមនុស្សយើងអាចត្រឹមតែជាមនុស្សព្រៃក្នុងក្រសែភ្នែកពួកគេ ។ ហេតុនេះ ពួកគេគ្រាន់តែចង់តាមដានយើងពីចម្ងាយដើម្បីដឹងថា តើផែនដីនឹងរីកចម្រើនដល់កម្រិតណា?

២-មនុស្សក្រៅភពមកស្រាវជ្រាវពីផែនដី ៖
ពួកគេអាចមិនត្រឹមតែសង្កេតមើលមនុស្សយើងតែម្យ៉ាងទេ ប៉ុន្តែពួកគេចង់ស្រាវជ្រាវពីយើងផងដែរ ។ កន្លងមក មានការចុះផ្សាយជាញឹកញាប់អំពីមនុស្សក្រៅភពចាប់មនុស្សពីផែនដី ឬស្មើរាប់ពាន់ករណី ហើយករណីនេះនៅតែគ្មានការបកស្រាយរហូតដល់បច្ចុប្បន្ន ។

ករណីមួយគួរឱ្យចាប់អារម្មណ៍បំផុត គឺបានកើតឡើងចំពោះប្រធានាធិបតីអាមេរិក លោក Dwight D. Eisenhower ពេលលោកកំពុងសម្រាកលំហែកាយនៅរដ្ឋកាលីហ្វ័រញ៉ា កាលពីឆ្នាំ១៩៥៤ ។ រឿងរ៉ាវនេះត្រូវបានគេនិយាយអស់រយៈពេលជាច្រើនឆ្នាំថា តើមនុស្សក្រៅភពនាំខ្លួនលោកទៅធ្វើអ្វី? ឬពួកគេត្រូវការធ្វើព្រមព្រៀងអ្វីម្យ៉ាងជាមួយអាមេរិកដើម្បីរក្សាពូជមនុស្ស ប៉ុន្តែត្រូវមានលក្ខខណ្ឌឱ្យពួកគេគ្រប់គ្រងដែនអាកាសរបស់អាមេរិក ។ វាជាកន្លែងដែលពួកគេអាចចាប់យកមនុស្សណាម្នាក់ទៅភពរបស់ពួកគេបាន ដើម្បីយកទៅសាកល្បងអ្វីម្យ៉ាង ។ ប៉ុន្តែមនុស្សទាំងនេះនឹងត្រូវលុបការចងចាំទាំងអស់ ក្រោយពេលមនុស្សក្រៅភពចាប់ខ្លួនយកទៅ ។

ចំណែកអ្វីដែលរដ្ឋាភិបាលអាមេរិកបានទទួល គឺអាចប្រើប្រាស់បច្ចេកវិទ្យារបស់មនុស្សក្រៅភព ហើយលក្ខខណ្ឌ១ក្នុងចំណោមកិច្ចព្រមព្រៀងជាមួយមនុស្សក្រៅភព គឺពួកគេចង់ឱ្យយើងបោះបង់អាវុធនុយក្លេអ៊ែរ និងបញ្ឈប់ការសម្លាប់គ្នាឯង ។ ប៉ុន្តែអាមេរិកពុំសូវពេញចិត្តនឹងលក្ខខណ្ឌមួយនេះប៉ុន្មានទេ ប៉ុន្តែគ្មានអ្នកណាដឹងរឿងនេះលម្អិតដូចប្រធានាធិបតីអាមេរិកទេ ។ លើសពីនេះ ការចាប់ខ្លួនប្រធានាធិបតីអាមេរិករបស់មនុស្សក្រៅភព ក៏មានមនុស្សជាច្រើននាក់បានឃើញហេតុការណ៍ដែលកត់ត្រាក្នុងប្រវត្តិសាស្ត្រនេះដែរ ។

៣-មនុស្សក្រៅភពអាចមកស្វែងរកធនធានធម្មជាតិនៅលើផែនដី ៖
វាដូចនឹងខ្សែភាពយន្តដែលបង្ហាញពីមនុស្សក្រៅភពមកស្វែងរកធនធានធម្មជាតិនៅលើផែនដី ដូចជា ៖ ធនធានរ៉ែជាច្រើនរបស់មនុស្ស ឬឧស្ម័នធម្មជាតិ ឬសារធាតុគីមី ឬធនធានមនុស្ស ។ មានភស្តុតាងជាច្រើនបង្ហាញពីការប្រទះឃើញ UFO នៅតាមកន្លែងផ្សេងៗ ដូចជា ៖ នៅកណ្តាលមហាសមុទ្រ និងលើជ្រលងភ្នំឆ្ងាយៗ ។ ហេតុនេះ គេសន្និដ្ឋានថា មនុស្សក្រៅភពកំពុងស្រាវជ្រាវពីធនធានលើផែនដី ។

៤-មនុស្សក្រៅភពចង់មកផែនដីដើម្បីផ្លាស់ប្តូរចំណេះដឹង ៖
មតិជាច្រើនលើកឡើងថា មនុស្សក្រៅភពកំពុងទំនាក់ទំនងជាមួយរដ្ឋាភិបាលអាមេរិកយ៉ាងសម្ងាត់ ដែលមនុស្សទូទៅពុំធ្លាប់ដឹងពីមុន ។ វាអាចជាការយល់ព្រមផ្លាស់ប្តូរអ្វីម្យ៉ាង ដូចជា ៖ ចំណេះដឹងផ្នែកវិទ្យាសាស្ត្រ, បច្ចេកវិទ្យា និងវប្បធម៌ផ្សេងៗរបស់មនុស្ស ។ ករណីនេះដូចគ្នានឹងការធ្វើដំណើរទៅក្រៅប្រទេស គឺភ្ញៀវទេសចរតែងតែដើរមើលស្រុកទេស, ម្ហូបអាហារ និងរៀនសូត្រវប្បធម៌របស់ពលរដ្ឋប្រទេសនោះ ។ យើងនឹងរំភើបខ្លាំងប៉ុនណា បើមានឱកាសធ្វើដំណើរទៅក្រៅភព គឺយើងចង់និយាយជាមួយពួកគេ ឬចង់ដឹងពីបច្ចេកវិទ្យានៅទីនោះ ។

៥-មនុស្សក្រៅភពមានគម្រោងគ្រប់គ្រងពិភពលោក ៖
យើងបានមើលឃើញពិភពលោកក្នុងផ្លូវវិជ្ជមាន ប៉ុន្តែចុះបើមនុស្សក្រៅភពមកគ្រប់គ្រងពិភពលោកវិញ ហើយពួកគេជាពួកចិត្តអាក្រក់ តើពិភពលោកនឹងក្លាយជាយ៉ាងណា? វាអាចទៅរួច ដែលមនុស្សក្រៅភពកំពុងស្រាវជ្រាវពីយើងដើម្បីគ្រប់គ្រងពិភពលោក នាថ្ងៃអនាគត ។

ស៊ីហ្វិន ហ័គីង ជាអ្នកវិទ្យាសាស្ត្រដែលមនុស្សទូទាំងពិភពលោកស្គាល់ ធ្លាប់និយាយថា បើមនុស្សក្រៅភពមានពិតមែន ពួកគេអាចពុំមែនជាអ្នកជិតខាងល្អរបស់យើងទេ ពីព្រោះពួកគេកំពុងស្វែងរកភពថ្មីណាមួយរស់នៅ ។ ពួកគេនឹងគ្រប់គ្រងពិភពលោក, ដណ្តើមយកធនធានធម្មជាតិ និងបង្កើតយានអវកាសឱ្យបានច្រើន ហើយគ្មានអ្នកណាដឹងពីគំនិតពួកគេទេ ។

យើងសាកស្រមៃថា បើមនុស្សក្រៅភពប្រើប្រាស់ធនធានធម្មជាតិរបស់ខ្លួនរហូតដល់អស់ និងពុំអាចរស់នៅលើភពពួកគេបន្តទៀត គឺពួកគេមានយានអវកាសធំៗដើម្បីជម្លៀសមនុស្សក្រៅភពយ៉ាងច្រើន និងស្វែងរកភពថ្មីទៀតរស់នៅ ហើយគ្មានកន្លែងណាល្អដូចផែនដីទេ ដែលពួកគេអាចរស់នៅបាន ។ ផែនដីស្រស់ស្អាត និងគួរឱ្យរស់នៅបំផុត ហើយពួកគេអាចមានបច្ចេកវិទ្យា និងអរិយធម៌ជឿនលឿនជាងយើងរាប់លានឆ្នាំ ។ តើពួកគេមានកម្លាំងខ្លាំងកម្រិតណា ហើយយើងគ្មានតម្លៃអ្វីលើសពួកគេទេ ។

ការលើកឡើងរបស់អ្នកវិទ្យាសាស្ត្ររូបនេះ គឺពុំលើសពីការពិតខ្លាំងពេកទេ ព្រោះបើយើងងាកទៅមើលប្រវត្តិសាស្ត្រកន្លងមកឃើញថា ជនជាតិដើមបានបាត់បង់ទឹកដីរបស់ខ្លួនទៅឱ្យអាមេរិក និងអូស្ត្រាលី ។ ដូច្នេះ ការលើកឡើងនេះជាមូលហេតុដែលអ្នកវិទ្យាសាស្ត្រជាច្រើន ពុំគាំទ្រឱ្យមនុស្សយើងតាមស្វែងរកមនុស្សក្រៅភពក្នុងចក្រវាឡ ជាពិសេស ការបញ្ជូនសេវាវិទ្យុពីផែនដី ដើម្បីកុំឱ្យមនុស្សក្រៅភពដឹងពីសេវាផ្កាយរណបរបស់យើង ហើយវាជាកំហុសឆ្គងមួយដែលយើងធ្លាប់ធ្វើកន្លងមក ៕