ប្រទេសស្កុតឡេន ៖ មន្ត្រីអង្គការការពារ និងថែទាំសត្វសមុទ្ររបស់ប្រទេសអង់គ្លេស (British Divers Marine Life Rescue) លើកឡើងថា បានទទួលសេចក្តីរាយការណ៍ថា មានត្រីបាឡែនព្រុយវែងជាច្រើនក្បាលត្រូវបានទឹករលកបោកបក់មកកាន់ឆ្នេរសមុទ្រមួយកន្លែងនៅប្រជុំកោះ Orkney ប្រទេសស្កុតឡេន កាលពីថ្ងៃទី១១ ខែកក្កដា ឆ្នាំ២០២៤ ។.jpg)
អាជ្ញាធរស្កុតឡេននិយាយថា ត្រីបាឡែនដែលត្រូវទឹករលកបោកបក់មកកាន់ឆ្នេរខ្សាច់នេះ សរុបទាំងអស់ស្មើនឹង៧៧ក្បាល ហើយពេលអាជ្ញាធរមកដល់ឆ្នេរសមុទ្រ គឺមានត្រីបាឡែនត្រឹមតែ១២ក្បាលប៉ុណ្ណោះ នៅមានជីវិត ។ ប៉ុន្តែទីបំផុត អាជ្ញាធរក៏សម្រេចចិត្តចាក់ថ្នាំសម្លាប់ត្រីបាឡែនទាំងអស់ ដោយសារពួកវារងរបួសធ្ងន់ធ្ងរ និងពុំអាចហែលទឹកទៅសមុទ្រវិញ ។ ទោះយ៉ាងណា អាជ្ញាធរពុំទាន់ជ្រាបពីមូលហេតុដែលបណ្តាលឱ្យកើតហេតុការណ៍នេះទេ ។.jpg)
ហេតុការណ៍នេះស្រដៀងគ្នានឹងឆ្នាំ២០២៣ ដែរ គឺពេលនោះ មានត្រីបាឡែនពូជដូចគ្នាចំនួន៥៥ក្បាល ត្រូវបានទឹករលកបោកបក់មកកាន់ឆ្នេរខ្សាច់ ហើយវាកើតឡើងក្នុងពេលវេលាដូចគ្នា ។ ត្រីបាឡែនទាំង៥៥ក្បាល បានដេកស្ងៀមនៅលើឆ្នេរខ្សាច់កោះ Isle of Lewis ហើយមានជីវិតតែ១ក្បាលប៉ុណ្ណោះ ។
ដូចគ្នានេះ ត្រឹមតែរយៈពេល១ខែ (គឺខែកក្កដា ឆ្នាំ២០២៣) មានត្រីបាឡែនចំនួន១.០០០ក្បាលទៀត បានដេកងាប់នៅលើឆ្នេរសមុទ្រប្រទេសនូវែលសេឡង់ និងអូស្ត្រាលី ។ រីឯអង្គការអភិរក្ស និងជួយសង្គ្រោះត្រីបាឡែន និងផ្សោត (Project Jonah New Zealand) និយាយថា វាគួរឱ្យសោកស្តាយណាស់ ដែលមានហេតុការណ៍បែបនេះកើតឡើងនៅប្រជុំកោះ Chatham ប្រទេសនូវែលសេឡង់ ។.jpg)
គួរបញ្ជាក់ថា ត្រីបាឡែនទាំងនេះ គឺជាពូជ Pilot Whales ដែលពួកវាចូលចិត្តរស់នៅជាក្រុម ឬហែលទឹកជាក្រុម ។ ហេតុនេះ បើក្នុងហ្វូងពួកវាមានត្រីបាឡែនណាមួយរងរបួស ឬមានជំងឺ រហូតដល់ហែលទឹកខុសទិសដៅបណ្តាលឱ្យជាប់នៅលើឆ្នេរខ្សាច់ គឺសមាជិកក្នុងហ្វូងផ្សេងទៀតនឹងហែលទឹកតាមដែរ ហើយទីបំផុត ត្រីបាឡែនទាំងអស់ក្នុងហ្វូងត្រូវបានទឹករលករុញមកកាន់ឆ្នេរខ្សាច់ ៕
