ប្រទេសថៃ ៖ នៅពាក់កណ្តាលខែកក្កដា ឆ្នាំ២០២៤ អ្នកប្រើប្រាស់បណ្តាញសង្គម TikTok ក្នុងប្រទេសថៃជាច្រើនបានចែកចាយវីដេអូនារីម្នាក់មានគណនីឈ្មោះ «sukanyapakin» ដែលនាងអង្គុយ Live បរិភោគសាច់ជ្រូកឆៅជាមួយបុកល្ហុង ។ ក្រោយពីវីដេអូនេះល្បីល្បាញក្នុងបណ្តាញសង្គម វាធ្វើឱ្យមានការបញ្ចេញមតិខុសៗគ្នា និងបារម្ភពីផលប៉ះពាល់សុខភាពរបស់នាងផងដែរ ។

នៅក្នុងវីដេអូ គេឃើញនារីរូបនេះអង្គុយ Live បរិភោគសាច់ជ្រូក៣ជាន់ឆៅជាមួយបុកល្ហុងដាក់នំបញ្ចុក និងយកបន្ទះសាច់ជ្រូកមករុំលើបន្លែ ដែលធ្វើឱ្យអ្នកមើលហៀរទឹកមាត់មិនតិចនាក់ រួចនាងនិយាយថា ៖ «ឆ្ងាញ់ណាស់ៗ» ។

លើសពីនេះ នាងថែមទាំងបានបបួលអ្នកមើលវីដេអូរបស់នាង មកបរិភោគសាច់ជ្រូកឆៅជាមួយនាងទៀតផង ។ នារីថៃរូបនេះទំពៀរឮខ្លាំងៗបណ្តើរ និងនិយាយបណ្តើរថា ៖ «វាមិនប្រៃទេ ឆ្ងាញ់ខ្លាំងណាស់! មកញ៉ាំបុកល្ហុងដាក់នំបញ្ចុក រុំសាច់ជ្រូកជាមួយគ្នា» ។

ក្រោយពីវីដេអូរបស់នាងត្រូវបានចែកចាយក្នុងបណ្តាញសង្គម វាធ្វើឱ្យអ្នកប្រើប្រាស់បណ្តាញសង្គមជាច្រើននាក់រិះគន់ភ្លាមៗ ហើយមនុស្សភាគច្រើនគិតថា វាជាសាច់ជ្រូកឆៅ ។ ពួកគេបារម្ភថា នាងនឹងកើតជំងឺផ្សេងៗដែលបណ្តាលមកពីការបរិភោគសាច់ឆៅ ជាពិសេស សាច់ជ្រូក ។ ជនជាតិថៃម្នាក់និយាយថា ៖ «បរិភោគបែបនេះ តើនឹងឆ្លងជំងឺរលាកត្រចៀកដែរឬទេ?» ។ ដូចគ្នានេះ នារីម្នាក់ទៀតថា ៖ «វាពុំមែនជា Ham ទេ ការបរិភោគសាច់ឆៅបែបនេះ នឹងឆ្លងជំងឺមានគ្រោះថ្នាក់ណាស់» ។

ក្រោយពីមហាជនរិះគន់ខ្លាំងៗរួចមក នារីជាម្ចាស់ TikTok ក៏បកស្រាយថា នាងពុំបានបរិភោគសាច់ជ្រូកឆៅទេ គឺវាជា Parma Ham ។ បន្ទាប់មក នាងក៏បង្ហាញ Parma Ham ជាច្រើនកញ្ចប់ឱ្យអ្នកមើលវីដេអូនាងបានឃើញ ។ នាងបញ្ជាក់ថា ៖ «ខ្ញុំសូមផ្តាំផ្ញើទៅអ្នកដែលនិយាយថា ការបរិភោគបែបនេះនឹងបណ្តាលឱ្យកើតជំងឺ ។ វាមិនមែនជា Bacon ទេ ប៉ុន្តែវាជា Ham» ។

នាងបន្តទៀតថា ៖ «មនុស្សភាគច្រើនពុំធ្លាប់បានស្គាល់ Parma Ham ទេ ទើបពុំយល់បែបនេះ ហើយនិយាយថា វាជាសាច់ជ្រូកឆៅ និងពុំអាចបរិភោគឆៅបាន ។ ប៉ុន្តែ Parma Ham ដែលខ្ញុំបរិភោគនេះចម្អិនឆ្អិនហើយ ។ ដូច្នេះ អ្នកពុំដឹងរឿងនេះ គួរតែសិក្សាជាមុនសិន» ។

គួរបញ្ជាក់ថា Parma Ham ត្រូវបានគេសម្ងួតដោយប្រើប្រាស់អំបិលដើម្បីអាចរក្សាទុកបានច្រើនខែ និងជាអាហារមានកាឡូរីទាប ។ វាមានរសជាតិប្រៃ, ផ្អែមប្លែក និងផ្តល់នូវអាហារូបត្ថម្ភខ្ពស់ ។ ក្រៅពីនេះ វាសម្បូរទៅដោយវីតាមីន B1 និង B6 , អំបិលរ៉ែ និងសារធាតុផ្សេង ដូចជា ៖ ផូស្វ័រ, ប៉ូតាស្យូម, ជាតិដែក និងស័ង្កសី ។

Parma Ham ឬភាសារបស់អ៊ីតាលី គឺ Prosciutto di Parma មានប្រភពមកពីទីក្រុង Parma ស្ថិតនៅភាគខាងជើងប្រទេសអ៊ីតាលី ។ ប៉ុន្តែដោយសារអ៊ីតាលីមានអាកាសធាតុត្រជាក់ ទើបពលរដ្ឋអ៊ីតាលីបុរាណនិយមធ្វើអាហារបែបនេះទុកបរិភោគក្នុងរដូវរងា ។ ហេតុនេះ ការបរិភោគ Parma Ham បានបន្តពីជំនាន់មួយទៅជំនាន់មួយទៀតតាំងពីបុរាណមកម៉្លេះ ៕

ឬហៅថាម៉ារីម៉ាកាលពីពេលថ្មីៗនេះបានបង្ហាញខ្លួនក្នុងព្រឹត្តិការណ៍មួយនៃរដ្ឋធានីម៉ានីល ប្រទេសហ្វីលីពីន បានធ្វើឱ្យអ្នកសារព័ត៌មាន និងទស្សនិកជនជាច្រើនសរសើរមិនដាច់ពីមាត់អំពីរូបរាងដ៏លេចធ្លោរ និងសម្រស់ដ៏ទាក់ទាញរបស់នាង ទោះបីជាមានវ័យ ៤០ ក៏ដោយ ក៏តារាស្រីរូបនេះនៅតែជាប់ក្នុងបញ្ជីរាជនីសម្រស់ស្រស់ស្អាតបំផុតប្រចាំប្រទេស។

យោងតាមគេហទំព័រកម្សាន្ត Preview តារាសម្តែងស្រីជួរមុខដ៏មានឥទ្ធិពល Marian Rivera បានទាក់ទាញកាមេរ៉ាទាំងអស់នៅពេលចូលរួមក្នុងព្រឹត្តិការណ៍មួយកាលពីរសៀលថ្ងៃទី១២ ខែកក្កដាកន្លងទៅ។ ដោយនាងបានស្លៀកឈុតពណ៌ស អមដោយគ្រឿងអលង្ការគុជខ្យង ចងសក់ និងតុបតែងមុខបែបធម្មជាតិ ធ្វើឱ្យនាងមានភាពលេចធ្លោរខ្លាំងនៅក្នុងកម្មវិធីនេះ។ បន្ទាប់ពីទទួលបានការកោតសរសើរយ៉ាងខ្លាំងពីសំណាក់អ្នកគាំទ្រ ម៉ារីម៉ាក៏ត្រូវបានគេបោះឆ្នោតឱ្យជាប់ក្នុងបញ្ជីរាជនីសម្រស់ស្រស់ស្អាតបំផុតក្នុងប្រទេសហ្វីលីពីនផងដែរ។

បច្ចុប្បន្នតារាស្រីរូបនេះគឺជាទូតសុច្ឆន្ទៈរបស់ម៉ាកយីហោល្បីៗជាច្រើនយ៉ាងហោចណាស់ ៥០ នៅក្នុងប្រទេស ហើយនាងក៏ជាតារា U40 ដែលរកលុយបានច្រើនជាងគេតាមរយៈការផ្សព្វផ្សាយផលិតផលនៅលើ Instagram ផ្ទាល់ខ្លួនផងដែរ។ នៅពេលដែលនាងស្ថិតក្នុងបញ្ជីរាជនីសម្រស់ មានអ្នកគាំទ្រជាច្រើនចោតសួរថា តើនាងមានវិធីសាស្ត្រអ្វីខ្លះ ទើបសម្រស់នាងនៅតែស្រស់ស្អាត និងក្មេងជាងវ័យបែបនេះ។ Marian Rivera បាននិយាយថា វិធីសាស្ត្រគឺសាមញ្ញដោយនាងគ្រាន់តែរឹតបន្តឹងរបបអាហារ និងបង្កើនការហាត់ប្រាណដើម្បីរក្សារាងប៉ុណ្ណោះ។

គួរបញ្ជាក់ដែរថា Marian Rivera ហៅម៉ារីម៉ា និង Dingdong Dantes ហៅសូជីអូបានរៀបការជាមួយគ្នានៅខែធ្នូ ឆ្នាំ ២០១៤ ដោយមានកូន ២ នាក់ស្រីមួយប្រុសមួយ។ អ្នកទាំងពីរធ្លាប់បានសម្តែងជាមួយគ្នាក្នុងរឿង Wild Dance, Mermaid Love Story, Horizon With You …ជាដើម៕

ប្រទេសឥណ្ឌូណេស៊ី ៖ ប្រទេសឥណ្ឌូណេស៊ីបានដំណើរការរោងចក្រផលិតថ្មរថយន្តអគ្គិសនីដំបូងគេនៅតំបន់អាស៊ីអាគ្នេយ៍ ក្នុងខេត្ត Java ស្ថិតនៅភាគខាងលិចប្រទេស ។ រោងចក្រនេះនឹងមានសមត្ថភាពផលិត Battery Cells ប្រចាំឆ្នាំ ស្មើនឹង១០ជីហ្គាវ៉ាត់ម៉ោង ហើយវានឹងអាចបំពេញតម្រូវការប្រើប្រាស់រថយន្តអគ្គិសនីនៅឥណ្ឌូណេស៊ី ស្មើប្រមាណ១៥ម៉ឺនគ្រឿង ។

កាលពីថ្ងៃទី១៣ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ការដំណើរការរោងចក្រនេះបានចំណាយថវិកាវិនិយោគរហូតដល់១ពាន់លានដុល្លារអាមេរិក និងជាការវិនិយោគទុនរួមគ្នាជាមួយក្រុមហ៊ុន Hyundai Motor Group, LG Energy Solution និង Indonesia Battery Corporation ។ វាជាកិច្ចខិតខំប្រឹងប្រែងរួមគ្នាដើម្បីធ្វើកំណែទម្រង់ផ្សេងៗ ។

ក្រៅពីនេះ រោងចក្រផលិតថ្មរថយន្តអគ្គិសនីខាងលើ ក៏បានសហការជាមួយរោងចក្រផលិតរថយន្តរបស់ Hyundai ផងដែរ ដើម្បីផលិតរថយន្តម៉ាក Kona ឱ្យបានចំនួន៥ម៉ឺនគ្រឿងក្នុង១ឆ្នាំ ។

ការដំណើរការរោងចក្ររថយន្តអគ្គិសនីនៅឥណ្ឌូណេស៊ី គឺជាផ្នែកមួយនៃយុទ្ធសាស្ត្រក្លាយជាប្រទេសផលិតថ្មរថយន្តអគ្គិសនីប្រភេទ EV 3 មុនគេលើពិភពលោក នៅឆ្នាំ២០២៧ ។ លើសពីនេះ ឥណ្ឌូណេស៊ីក៏បានកំណត់គោលដៅផលិត Battery Cells ឱ្យបានចំនួន១៤០ជីហ្គាវ៉ាត់ម៉ោងក្នុង១ឆ្នាំ នៅឆ្នាំ២០៣០ ដែលស្មើពី៤% ទៅ៩% របស់តម្រូវការពិភពលោក ។

ក្រៅពីនេះ ឥណ្ឌូណេស៊ី ក៏ជាប្រទេសមានទុនបម្រុងនីកែលច្រើនបំផុតលើពិភពលោកផងដែរ គឺស្មើប្រមាណ២១លានតោន ឬស្មើ២២% នៃទុនបម្រុងនីកែលលើពិភពលោក ។ បើទោះជាការប្រើប្រាស់នីកែលប្រមាណ៧០% ស្ថិតក្នុងឧស្សាហកម្មដែកអ៊ីណុកក្តី ប៉ុន្តែតម្រូវការក្នុងវិស័យផលិតថ្មបានកើនឡើងជាបន្តបន្ទាប់ ។

ក្រុមហ៊ុនផលិតរថយន្តអគ្គិសនីលំដាប់ពិភពលោក រួមទាំងក្រុមហ៊ុន BYD និង Wuling របស់ប្រទេសចិន បានចូលមកវិនិយោគនៅឥណ្ឌូណេស៊ីរួចហើយ ។ ក្រុមហ៊ុនទាំងនេះបានផលិតរថយន្តអគ្គិសនីនៅឥណ្ឌូណេស៊ី និងនាំចេញទៅកាន់ទីផ្សារពិភពលោក ។

បច្ចុប្បន្ន ឥណ្ឌូណេស៊ីកំពុងបង្កើតរោងចក្រចម្រាញ់ប្រេងលីចូម និងរោងចក្រផលិតសម្ភារៈអ៊ីណុក ដើម្បីបន្ថែមលើឧស្សាហកម្មថ្មនីកែល ។ ហេតុនេះ ឥណ្ឌូណេស៊ីគ្មានទុនបម្រុងលីចូមច្រើនទេ ប៉ុន្តែអូស្ត្រាលីបានផលិតលីចូមប្រមាណពាក់កណ្តាលនៃលីចូមសរុបលើពិភពលោក ហើយអាចនាំចេញរ៉ែប្រភេទនេះមកកាន់ឥណ្ឌូណេស៊ីទៀតផង ខណៈលីចូមភាគច្រើនរបស់អូស្ត្រាលីបាននាំចេញទៅចិន ៕

ប្រទេសចិន៖ សាលាមត្តេយ្យជាច្រើននៅតាមជនបទក្នុងប្រទេសចិននាពេលបច្ចុប្បន្នគឺមិនសូវមានសិស្សចូលរៀននោះទេ ដោយនាយកសាលាក៏បានសម្រេចចិត្តកែប្រែសាលាមត្តេយ្យទៅជាមជ្ឈមណ្ឌលថែទាំមនុស្សចាស់វិញ។
យោងតាម CNBC ប្រទេសចិននឹងបន្ថែមមនុស្សចាស់រាប់រយលាននាក់ក្នុងប៉ុន្មានទសវត្សរ៍ខាងមុខនេះ ដោយសារចំនួនប្រជាជនវ័យចំណាស់កើនឡើង និងការថយចុះយ៉ាងខ្លាំងនៃអត្រាកំណើត បានធ្វើឱ្យប៉ះពាល់ដល់វិស័យអប់រំ ដោយសាលាមត្តេយ្យសិក្សារាប់ពាន់ត្រូវបានបិទនៅទូទាំងប្រទេស។

ទោះជាយ៉ាងណាសាលាមត្តេយ្យខ្លះក៏បានបើកឡើងវិញដោយបំប្លែងទៅជាកន្លែងថែទាំមនុស្សចាស់វិញ។ នាយកសាលា Li Xiuling បាននិយាយថា លោកបានបិទសាលាមួយរយៈដោយសារគ្មានកុមារចុះឈ្មោះចូលរៀន ប៉ុន្តែបន្ទាប់មកលោកក៏បានបើកឡើងវិញដោយប្តូរទៅជាមជ្ឈមណ្ឌលកម្សាន្តសម្រាប់មនុស្សចាស់។ មិនយូរប៉ុន្មានសាលានេះក៏មានមនុស្សចាស់ជាច្រើនចុះឈ្មោះចូលរៀន ដោយសព្វថ្ងៃសាលាគឺមានបង្រៀនផ្នែកតន្ត្រី របាំ ម៉ូដែល និងមុខវិជ្ជាជាច្រើនទៀត។ ដូច្នេះការងារថែទាំ និងបង្រៀនមនុស្សចាស់គឺកំពុងមានការរីកចម្រើនខ្លាំងនៅក្នុងប្រទេសចិន។

បើយោងតាមទិន្នន័យរបស់រដ្ឋាភិបាលបានឱ្យដឹងថា សាលាមត្តេយ្យជិត ១៥,០០០ បានបិទកាលពីឆ្នាំមុន ខណៈដែលការចុះឈ្មោះចូលរៀនបានធ្លាក់ចុះចំនួន ៥.៣ លាននាក់កាលពីឆ្នាំ ២០២២។ ទោះជាយ៉ាងណាយោងតាមរបាយការណ៍ គ្រឹះស្ថានមត្តេយ្យសិក្សាជាច្រើនផ្សេងទៀតនៅទូទាំងប្រទេសចិនក៏ចាប់ផ្តើមបើកឡើងវិញ ហើយក៏ទទួលបានទទួលជោគជ័យដោយការផ្លាស់ប្តូរពីការអប់រំកុមារទៅបង្រៀនមនុស្សចាស់វិញ។

យោងតាមស្ថិតិផ្លូវការ ប្រទេសចិនបានឃើញការកើនឡើងគួរឱ្យកត់សម្គាល់នៃចំនួនប្រជាជនចាស់របស់ខ្លួនកាលពីឆ្នាំមុន ដោយបានបន្ថែមមនុស្សជិត ១៧ លាននាក់ដែលមានអាយុលើសពី ៦០ ឆ្នាំ។ ក្រុមអាយុនេះមានច្រើនជាង ២០% នៃចំនួនប្រជាជន ដែលសមាមាត្ររំពឹងថានឹងកើនឡើងដល់ជិត ១/៣ នៅឆ្នាំ ២០៣៥។ រដ្ឋាភិបាលប៉ាន់ប្រមាណថា ផលិតផល និងសេវាកម្មសម្រាប់ផ្គត់ផ្គង់ដល់មនុស្សចាស់ ចាប់ពីវិស័យទេសចរណ៍សម្រាប់មនុស្សចាស់ រហូតដល់ការថែទាំវេជ្ជសាស្រ្តផ្អែកលើបច្ចេកវិទ្យា អាចមានតម្លៃ ៣០ ពាន់ពាន់លានយន់នៅឆ្នាំ ២០៣៥៕

យោងមានប្រភពសារព័ត៌មាន The Korea Time ដែលបានចុះផ្សាយកាលពីថ្ងៃទី ១៤ ខែកក្កដា ឆ្នាំ២០២៤នេះបានឲ្យដឹងថា បច្ចុប្បន្ននេះនៅឯប្រទេសកូរ៉េខាងត្បូង ការដំឡើងប្រាក់ឈ្នួលអប្បបរមាកំពុងដាក់សម្ពាធកាន់តែខ្លាំងលើម្ចាស់អាជីវកម្មខ្នាតតូច ដែលបណ្តាលឲ្យពិបាកក្នុងការជួលកម្មករកាន់តែខ្លាំងឡើង រហូតដល់ប្រកាសក្ស័យធន ហើយកន្លែងខ្លះបានខកខានក្នុងការបើកប្រាក់ឈ្នួលដល់កម្មករផងដែរ។

យោងតាមសហព័ន្ធសហគ្រាសកូរ៉េ (KEF) បានបង្ហាញថា គិតត្រឹមខែឧសភាឆ្នាំ២០២៤នេះ មានការប្រកាសក្ស័យធនរហូតដល់ចំនួន ៨១០ ក្នុងចំណោមអាជីវកម្មខ្នាតតូចដូចជា ផ្នែកភោជនីយដ្ឋាន និងកន្លែងស្នាក់នៅតូចៗជាដើម។ យ៉ាងណាមិញ ការប្រកាសក្ស័យធននៅក្នុងឆ្នាំនេះ គឺបានកើនឡើងយ៉ាងខ្លាំង ប្រមាណ ៣៦.៨ ភាគរយ បើធៀបនឹងឆ្នាំ២០២៣។

ការដំឡើងប្រាក់ឈ្នួលអប្បបរមានៅក្នុងប្រទេសកូរ៉េខាងត្បូងនៅតែជាប្រធានបទដ៏ក្តៅគគុករយៈពេលប៉ុន្មានសតវត្សកន្លងមកនេះ ព្រោះថាវាផ្តល់ទាំងគុណសម្បត្តិនិងគុណវិបត្តិ។ ការតម្លើងប្រាក់ឈ្នួលអប្បបរមា មានន័យថាជាការតម្លើងប្រាក់ខែដល់កម្មករដែលមានប្រាក់ឈ្នួលទាបទូទាំងប្រទេស ដើម្បីផ្តល់ឲ្យពួកគេនូវកម្រិតជីវភាពកាន់តែប្រសើរឡើង ក៏ដូចជាជួយកាត់បន្ថយភាពក្រីក្រ។

ប៉ុន្តែស្របពេលដែលតម្លើងប្រាក់ឈ្មួលអប្បបរមានេះ វានឹងជះឥទ្ធិពលអវិជ្ជមានទៅកាន់ម្ចាស់អាជីវកម្មខ្នាតតូច ដូចជាកាត់បន្ថយការងាររបស់បុគ្គលិកឬក៏បញ្ឈប់បុគ្គលិកតែម្តងព្រោះតែមិនអាចទ្រាំទ្រនឹងការចំណាយផ្សេងៗ។ ការតម្លើងប្រាក់ឈ្មួលអប្បបរមា អាចនឹងធ្វើឲ្យមានការកើនឡើងតម្លៃសម្រាប់អ្នកប្រើប្រាស់ ព្រោះថាអាជីវកម្មខ្នាតតូចអាចនឹងត្រូវដំឡើងថ្លៃទំនិញ និងសេវាកម្ម ដើម្បីរ៉ាប់រងតម្លៃពលកម្មកាន់តែខ្ពស់ ដែលអាចនាំឱ្យអតិផរណាទូទាំងប្រទេស។

ជាថ្នូរត្រឡប់មកវិញ កម្មករឬពលករដែលមានប្រាក់ចំណូលទាបទាំងនោះ គឺងាយប្រឈមមុខនឹងការបាត់បង់ការងារធ្វើ ព្រោះតែការកាត់បន្ថយកម្លាំងពលកម្មពីអាជីវកម្មខ្នាតតូចនានាផងដែរ។ ដូច្នេះហើយ ការស្វែងរកតុល្យភាពរវាងការដំឡើងប្រាក់ឈ្នួលអប្បបរមា និងការគាំទ្រដល់អាជីវកម្មខ្នាតតូច គឺជាបញ្ហាស្មុគស្មាញដែលទាមទារឱ្យមានការពិចារណាដោយប្រុងប្រយ័ត្ន និងសហការគ្នារវាងភាគីពាក់ព័ន្ធផងដែរ៕