ប្រទេសវៀតណាម ៖ តើយើងធ្លាប់ឆ្ងល់ទេថា ហេតុអ្វី «ង្វៀន/Nguyen» បានក្លាយជានាមត្រកូលដែលពលរដ្ឋវៀតណាមប្រើប្រាស់ច្រើនបំផុត? នៅប្រទេសវៀតណាម ទោះជាយើងដើរទៅកន្លែងណា ក៏ជួបតែពលរដ្ឋវៀតណាមមាននាមត្រកូល «ង្វៀន» ដូចៗគ្នា ។ តើនាមត្រកូលនេះមានប្រភពមកពីណា?

ង្វៀន គឺជានាមត្រកូលដែលពលរដ្ឋវៀតណាមប្រើប្រាស់ច្រើនបំផុត គឺស្មើជាង៤០% នៃចំនួនពលរដ្ឋវៀតណាមសរុប ។ បើយើងឈរនៅចំណុចផ្លូវបំបែកជា៤ នៅប្រទេសវៀតណាម ហើយស្រែកថា «ង្វៀន!» ពេលនោះ ពលរដ្ឋវៀតណាមនៅលើផ្លូវបំបែកជា៤ ទាំងអស់នឹងងាកមើលមុខយើងគ្រប់ៗគ្នា ។

លើសពីនេះ នៅសហរដ្ឋអាមេរិក ក៏មានពលរដ្ឋវៀតណាមប្រើប្រាស់នាមត្រកូល «ង្វៀន» ផងដែរ គឺស្មើនឹង១លាន៨សែននាក់ ។ បើសរុបរួមគ្នានៅទូទាំងពិភពលោក គឺពលរដ្ឋវៀតណាមបានប្រើប្រាស់នាមត្រកូល «ង្វៀន» រហូតដល់៤០លាននាក់ ។

អ្នកជំនាញសន្និដ្ឋានថា កាលពីប្រមាណ១.៥០០ឆ្នាំមុន ជនជាតិចិនរស់នៅភាគខាងត្បូងបានចាប់ផ្តើមជម្លៀសមករស់នៅប្រទេសវៀតណាម ហើយជនជាតិចិនទាំងនេះប្រើប្រាស់នាមត្រកូល «ស៊ែហ្លួន» ហើយភាសាវៀតណាមអានថា «ង្វៀន» ។ ហេតុនេះ នាមត្រកូល «ង្វៀន» ត្រូវបានប្រើប្រាស់នៅវៀតណាមតាំងពីពេលនោះមក ប៉ុន្តែពុំមានចំនួនច្រើនទេ ។

ក្រៅពីនេះ ប្រទេសវៀតណាមត្រូវបានគ្រប់គ្រងដោយរបបរាជវង្ស ហើយពលរដ្ឋនឹងប្រើប្រាស់នាមត្រកូលតាមឈ្មោះរាជវង្សនាសម័យនោះ ។ នៅពេលរាជវង្សថ្មីចូលមកគ្រប់គ្រងប្រទេសជំនួសរាជវង្សចាស់ អាជ្ញាធរនឹងបង្ខំឱ្យពលរដ្ឋផ្លាស់ប្តូរនាមត្រកូល ដើម្បីកុំឱ្យពាក់ព័ន្ធនឹងរាជវង្សចាស់ ។ ហេតុនេះ វាធ្វើឱ្យពលរដ្ឋវៀតណាមដែលប្រើប្រាស់នាមត្រកូលផ្សេងៗគ្នា ត្រូវបង្ខំឱ្យប្រើប្រាស់នាមត្រកូល «ង្វៀន» កាន់តែច្រើនឡើង ។

រហូតដល់សតវត្សរ៍ទី១៩ រាជវង្សង្វៀន គឺជារាជវង្សចុងក្រោយ ដែលគ្រប់គ្រងប្រទេសវៀតណាម ។ រាជវង្សនេះបានគ្រប់គ្រងវៀតណាម តាំងពីឆ្នាំ១៨០២ ដល់ឆ្នាំ១៩៤៥ ហើយមានពលរដ្ឋវៀតណាមជាច្រើនឈប់ប្រើប្រាស់នាមត្រកូល «ង្វៀន» ដើម្បីបង្ហាញការស្រឡាញ់ស្មោះភក្តីដល់រាជវង្ស ។

ដោយឡែក ពេលជនជាតិបារាំងចូលមកគ្រប់គ្រងប្រទេសវៀតណាម និងព្យាយាមស្ទង់មតិពលរដ្ឋឃើញថា ពលរដ្ឋវៀតណាមភាគច្រើនមានជីវភាពក្រីក្រ និងជាកសិករ ហើយពួកគេពុំទាន់មាននាមត្រកូលទេ ។ កាលពីមុន មានតែពលរដ្ឋវៀតណាមមានជីវភាពធូរធា ឬឋានៈខ្ពង់ខ្អស់តែប៉ុណ្ណោះដែលមាននាមត្រកូលប្រើប្រាស់ ខណៈពលរដ្ឋធម្មតាគ្មាននាមត្រកូលទេ គឺមានតែឈ្មោះប៉ុណ្ណោះ ។

ហេតុនេះ អាជ្ញាធរបារាំងក៏បានយកនាមត្រកូល «ង្វៀន» មកឱ្យពលរដ្ឋវៀតណាមប្រើប្រាស់នាពេលនោះ ទើបយើងឃើញពលរដ្ឋវៀតណាមស្ទើរតែពាក់កណ្តាលប្រទេស ប្រើប្រាស់នាមត្រកូល «ង្វៀន» ដូចៗគ្នា រហូតមកដល់បច្ចុប្បន្ន ៕

អង់គ្លេស៖ ធ្លាប់តែកាន់ដំណែងជាប្រទេសដែលមានកន្លែងទេសចរណ៍ឈានមុខគេនៅអឺរ៉ុបអស់រយៈពេលជាច្រើនឆ្នាំ ប៉ុន្តែបច្ចុប្បនវិស័យទេសចរណ៍ក្នុងប្រទេសអង់គ្លេសគឺនៅទ្រឹងបន្ទាប់ពីស្តេច Charles ឡើងកាន់ដំណែង និងមេដឹកនាំគណបក្សការងារអង់គ្លេស Keir Starmer បានក្លាយជានាយករដ្ឋមន្ត្រី។
យោងតាម BBC កន្លែងទេសចរណ៍ល្បីៗជាច្រើនក្នុងប្រទេសអង់គ្លេស បច្ចុប្បន្នមិនសូវមានភ្ញៀវមកទស្សនាកម្សាន្តច្រើនដូចមុនឡើយ ដោយសារប្រជាជនមិនសូវរួសរាយរាក់ទាក់ ឆ្នេរដ៏ស្រស់ស្អាតជាច្រើនត្រូវបានបំពុល ហើយតម្លៃទិដ្ឋាការក៏ថ្លៃខ្លាំងទៀត ដែលនេះបានធ្វើឱ្យចក្រភពអង់គ្លេសបាត់បង់តំណែងជាកន្លែងទេសចរណ៍ឈានមុខគេរបស់អឺរ៉ុបបន្តិចម្តងៗ។

បើយោងតាមរបាយការណ៍ក្នុងឆ្នាំ ២០១៩ ប្រទេសអង់គ្លេសបានស្វាគមន៍ភ្ញៀវទេសចរណ៍ជិត ៤១ លាននាក់ ហើយនៅឆ្នាំ ២០២៣ នៅពេលដែលចំនួនអ្នកទេសចរកើនឡើងទូទាំងពិភពលោក ចក្រភពអង់គ្លេសមិនទាន់បានជាសះស្បើយពី Covid 19 ពេញលេញនៅឡើយទេដោយមានអ្នកទស្សនាជិត ៣៨ លាននាក់។ ហេតុនេះចំនួនភ្ញៀវដែលដាក់ពាក្យសុំទិដ្ឋាការគឺបានថយចុះ ១៩% បើប្រៀបធៀបទៅនឹងមុនការរីករាលដាល។ លោក Tom Jenkins នាយកប្រតិបត្តិនៃអង្គការទេសចរណ៍អឺរ៉ុបបានអត្ថាធិប្បាយថា នៅឆ្នាំនេះប្រទេសអង់គ្លេសគឺមានតម្រូវការច្រើនដើម្បីអភិវឌ្ឍឧស្សាហកម្មទេសចរណ៍បន្ថែមទៀតដែលជាហេតុធ្វើឱ្យវិស័យទេសចររបស់ប្រទេសនេះនៅទ្រឹង។

លោក Tom Jenkins បានបន្តថា ឧស្សាហកម្មទេសចរណ៍អង់គ្លេសនៅតែរងផលប៉ះពាល់ដោយឥទ្ធិពលនៃជំងឺរាតត្បាត។ ហេតុនេះដើម្បីធ្វើឱ្យចក្រភពអង់គ្លេស “អស្ចារ្យម្តងទៀត” យោងតាមអ្នកជំនាញ រដ្ឋាភិបាលថ្មីប្រហែលជាត្រូវប្រើទេសចរណ៍ជាគន្លឹះសេដ្ឋកិច្ច។ ភាពខ្លាំងនៃវិស័យទេសចរណ៍គឺអាចភ្ជាប់ទំនាក់ទំនងបានយ៉ាងឆាប់រហ័ស និងផ្សព្វផ្សាយទៅកាន់មនុស្សនៅពេលវេលាត្រឹមត្រូវណាមួយ។ យ៉ាងណាក៏ដោយ រដ្ឋាភិបាលត្រូវចាក់បញ្ចូលថវិកាផ្សព្វផ្សាយទេសចរណ៍ឱ្យបានច្រើនតាមដែលអាចធ្វើទៅបាន។

យោងតាម Patricia Yates របស់ VisitBritain ថវិការបស់ពួកគេគឺប្រហែល ២៣ លានដុល្លារក្នុងមួយឆ្នាំ។ ទន្ទឹមនឹងនោះ តួរលេខទេសចរណ៍នៅប្រទេសអៀរឡង់ជិតខាងគឺ ៨៥,៥ លានដុល្លារអាមេរិក។ ទោះជាយ៉ាងណា បច្ចុប្បន្នភ្ញៀវទេសចរដែលមកលេងប្រទេសអង់គ្លេសគឺបានធ្លាក់ចុះខ្លាំង ហើយសព្វថ្ងៃប្រទេសនេះគឺកំពុងខិតខំប្រឹងប្រែងដើម្បីលើកស្ទួយវិស័យទេសចរណ៍ឡើងវិញ៕

ហេតុការណ៍សោកនាដកម្មមួយដែលពិភពលោកពុំអាចបំភ្លេចបាន គឺកប៉ាល់ទេសចរណ៍ដ៏ប្រណីត «Titanic» បានជួបឧបទ្ទ.វហេតុ លិចក្នុងបាតមហាសមុទ្រអាត្លង់ទិក កាលពីឆ្នាំ១៩១២ (ឬប្រមាណ១១២ឆ្នាំមុន) ដែលបណ្តាលឱ្យមនុស្សស្លា.ប់ រហូតដល់១.៥១៧នាក់ ។ ក្រោយមក នាវាមុជទឹកឈ្មោះ Titan ក៏ជួបគ្រោះថ្នា.ក់ ដូចគ្នាដែរ ក្នុងអំឡុងពេលភ្ញៀវទេសចរលំដាប់សេដ្ឋីចំនួន៥នាក់ ជិះនាវានេះទស្សនាខ្មោ.ច កប៉ាល់ Titanic ។

វាបានធ្វើឱ្យមនុស្សជាច្រើននាក់សួរថា ហេតុអ្វីរកពុំឃើញបំណែកឆ្អឹងមនុស្សក្នុងមហាសមុទ្រ ខណៈមានមនុស្សស្លាប់រហូតដល់ជាង១.០០០នាក់? ប៉ុន្តែក្រុមអ្នកស្រាវជ្រាវបែរជារកឃើញសម្ភារៈប្រើប្រាស់ផ្សេងៗជាច្រើននៅតែមានសភាពល្អដូចដើម បើទោះជាសម្ភារៈទាំងនេះធ្លាក់ក្នុងទឹកជ្រៅក្តី ដូចជា ៖ ស្បែកជើង, គ្រឿងអលង្ការ, គ្រឿងសង្ហារឹម, ចានឆ្នាំង និងទ្រព្យសម្បត្តិមានតម្លៃយ៉ាងច្រើនមហាសាលក្នុងទឹកសមុទ្រដ៏ត្រជាក់ខ្លាំង ។

កប៉ាល់ទេសចរណ៍ Titanic បានលិចនៅក្បែរតំបន់ប៉ូលខាងជើង ដែលទឹកសមុទ្រមានជម្រៅរហូតដល់៣.៨០០ម៉ែត្រ ពីកម្ពស់នីវ៉ូទឹកសមុទ្រ ដោយសារកប៉ាល់នេះបើកទៅបុកភ្នំទឹកកក កាលពីឆ្នាំ១៩១២ ។ គេសន្និដ្ឋានថា មនុស្សនៅលើកប៉ាល់ ស្មើជាង១.០០០នាក់ ត្រូវបានស្រូបចូលក្នុងទឹកសមុទ្រក្នុងអំឡុងពេលកប៉ាល់លិចក្នុងសមុទ្រត្រជាក់ខ្លាំង ព្រមទាំងមានសាកសពនៅជាប់កប៉ាល់ផងដែរ ប៉ុន្តែបែរជាគ្មានបំណែកឆ្អឹងបន្តិចសោះនៅលើកប៉ាល់ ។

លោក Robert Ballard អ្នកជំនាញផ្នែកស្រាវជ្រាវមហាសមុទ្រទឹកជម្រៅ និងជាអ្នករកឃើញខ្មោចកប៉ាល់ Titanic មុនគេកាលពីឆ្នាំ១៩៨៥ បានចេញមកបកស្រាយថា សមាសធាតុគីមីរបស់ទឹកសមុទ្រស្ថិតក្នុងជម្រៅជ្រៅបំផុតនោះ គឺវាជាកត្តាសំខាន់អាចរំលាយឆ្អឹងរបស់មនុស្សបាន ។ ហេតុនេះ ទើបគេរកពុំឃើញឆ្អឹងមនុស្សជាង១.០០០នាក់ ដែលបានស្លាប់ក្នុងហេតុការណ៍លិចកប៉ាល់ Titanic និងនាវាមុជទឹក Titan ។

នៅតំបន់នេះ ដោយសារទឹកសមុទ្រមានជម្រៅជ្រៅខ្លាំងពេក និងខ្វះសារធាតុកាល់ស្យូមកាបូណាតដែលជាសារធាតុផ្សំរបស់ទឹកសមុទ្រ គឺវាពុំដូចគ្នានឹងទឹកសមុទ្រស្ថិតលើផ្ទៃទឹក ដែលពោរពេញទៅដោយសារធាតុប្រភេទនេះទេ ។ សារធាតុកាល់ស្យូមកាបូណា គឺជាសមាសធាតុផ្សំដ៏សំខាន់របស់ឆ្អឹងមនុស្ស និងសត្វ ។ ដូច្នេះ នៅពេលមានមនុស្ស ឬសត្វ ត្រូវបានត្រីសមុទ្រស៊ីសាច់អស់នៅសល់តែឆ្អឹង ពេលនោះ ទឹកសមុទ្រនឹងរំលាយឆ្អឹងទាំងនេះអស់គ្មានសល់ ។

លោក Robert Ballard បន្តថា បើទោះជារកពុំឃើញបំណែកឆ្អឹងមនុស្សដើម្បីបញ្ជាក់ថា ធ្លាប់មានមនុស្សជាច្រើនធ្លាក់ក្នុងសមុទ្រជាមួយកប៉ាល់ Titanic ប៉ុន្តែក្រុមអ្នកស្រាវជ្រាវបានរកឃើញសម្ភារៈប្រើប្រាស់ផ្សេងៗ ដូចជា ៖ ស្បែកជើង និងវត្ថុមានតម្លស ។ នេះជាភស្តុតាងបង្ហាញថា ពួកគេធ្លាប់មានជីវិតនៅលើកប៉ាល់សោកនាដកម្មនេះ ៕

ប្រទេសថៃ ៖ វាធ្វើឱ្យមនុស្សជាច្រើនឆ្ងល់ថា តើមនុស្សក្រៅភពបញ្ជូន UFO មកវាយប្រហា.រ ផែនដី មែនទេ? ក្រោយពីនារីម្នាក់នៅខេត្តឧប៊ុនរ៉ាជថានី ប្រទេសថៃ ថតវីដេអូពន្លឺភ្លើងចម្លែកជាច្រើនលើមេឃ ស្រដៀងគ្នានឹង UFO បង្ហោះក្នុងបណ្តាញសង្គម ។ ប៉ុន្តែមិនយូរប៉ុន្មាន ពន្លឺភ្លើងទាំងនេះក៏បាត់ទៅវិញ ហើយធ្វើឱ្យមានការបញ្ចេញមតិផ្សេងៗគ្នាពាក់ព័ន្ធនឹងពន្លឺភ្លើងនេះថា វាអាចជាពួកមនុស្សក្រៅភព ខ្លះទៀតថា គឺជាពន្លឺភ្លើងចេញពីកម្មវិធីក្នុងវត្ត ។

ហេតុការណ៍នេះបានកើតឡើងកាលពីថ្ងៃទី១៣ ខែកក្កដា ឆ្នាំ២០២៤ គឺមានអ្នកប្រើប្រាស់បណ្តាញសង្គម TikTok ម្នាក់ឈ្មោះ @sirilux197 បានបង្ហោះពន្លឺភ្លើងយ៉ាងចម្លែកនៅលើមេឃ ហើយនាងសរសេរថា ៖ «ខ្ញុំឃើញវាប្លែកៗ តើវាជាអ្វី? ខ្ញុំក៏ថតវីដេអូទុក ក្រែងលោគេថាកាត់ត ។ ដូច្នេះ ខ្ញុំក៏លើកដៃឱ្យមើលតែម្តង» ។

ក្នុងវីដេអូនេះ គេបានឃើញពន្លឺភ្លើងពណ៌ស ចំនួន៤ ហោះជុំវិញពន្លឺពណ៌ក្រហមនៅលើមេឃ រីឯពន្លឺពណ៌ស មួយទៀតហោះនៅខាងមុខ ហើយពន្លឺទាំងអស់នៅស្ងៀមមួយកន្លែង គ្មានចលនាទេ ។ ម្ចាស់វីដេអូថែមទាំងបានលើកដៃបង្ហាញទៀតផង ដើម្បីបញ្ជាក់ថា វីដេអូនេះបានថតពិតប្រាកដមែន និងគ្មានការកាត់តទេ ។

ក្រោយពីវីដេអូនេះបង្ហោះក្នុងបណ្តាញសង្គមរួចមកធ្វើឱ្យមនុស្សជាច្រើនបញ្ចេញមតិខុសៗគ្នា ហើយនារីម្ចាស់វីដេអូក៏បានឆ្លើយតបថា ៖ «សូមអរគុណ គ្រប់ការបញ្ចេញមតិទាំងអស់ គឺពន្លឺភ្លើងនេះកើតឡើងនៅខេត្តឧប៊ុនរ៉ាជថានី ។ ថ្ងៃនោះ នៅវត្តគ្មានកម្មវិធីអ្វីទេ ហើយការហែរទៀន ក៏ពុំទាន់ចាប់ផ្តើមដែរ ។ ខ្ញុំធ្លាប់ឃើញការរៀបចំកម្មវិធីកាកបាទក្រហម ក៏មានការបាញ់ពន្លឺឡើងលើមេឃដែរ ប៉ុន្តែមិនមែនពន្លឺបែបនេះទេ» ។

នារីរូបនេះបន្តថា ៖ «ប៉ុន្តែនៅថ្ងៃនោះ ពន្លឺទាំងនេះស្ថិតនៅភាគខាងត្បូង ។ វាមានរាងជារង្វង់មូលពណ៌ស ហាក់ដូចជាកំពុងត្រៀមចុះចត ។ ប៉ុន្តែបន្តិចក្រោយមក ស្រាប់តែបាត់ទៅវិញ ។ ខ្ញុំឃើញចម្លែកពេក ទើបថតវីដេអូទុក» ។

ចំណែកអ្នកប្រើប្រាស់បណ្តាញសង្គមភាគច្រើនគិតថា វាអាចជាពន្លឺចេញពីកម្មវិធីវត្ត ឬពន្លឺឡាស៊ែរបាញ់ឡើងលើមេឃ ។ ក្រោយមក ម្ចាស់វីដេអូក៏ឆ្លើយតបទៀតថា ៖ «ពីដំបូង ខ្ញុំក៏គិតបែបនេះដែរ តែថ្ងៃនោះ នៅវត្តគ្មានធ្វើកម្មវិធីអ្វីទេ ។ រីឯពន្លឺភ្លើងឡាស៊ែរខុសពីនេះ ហើយក្រោយពីយកទូរស័ព្ទមកថតតែមួយភ្លែតប៉ុណ្ណោះ វាក៏បាត់ទៅវិញ» ។

ក្រៅពីនេះ មនុស្សជាច្រើននាក់ទៀតជឿថា ពន្លឺភ្លើងដ៏ចម្លែកនេះ គឺជា UFO របស់មនុសក្រៅភព ខណៈអ្នកខ្លះទៀតបញ្ជាក់ថា ធ្លាប់បានឃើញពន្លឺបែបនេះពីមុនមក ។ រីឯមនុស្សផ្សេងទៀតនិយាយថា មនុស្សក្រៅភពកំពុងតែឈ្លានពានផែនដីរបស់យើង ៕