បន្ទាប់ក្រុមជម្រើសជាតិបាល់ទាត់អេស្ប៉ាញឈ្នះជើងឯក Euro 2024 បានធ្វើឱ្យប្រទេសនេះកាន់តែទទួលបានការចាប់អារម្មណ៍យ៉ាងខ្លាំងជុំវិញពិភពលោក។ យោងតាម National Geographic ដែលជាទស្សនាវដ្តីល្បីល្បាញមួយរបស់សហរដ្ឋអាមេរិក បានចុះផ្សាយពីរឿងដ៏គួរឱ្យចាប់អារម្មណ៍មួយចំនួននៅក្នុងប្រទេសអេស្ប៉ាញដែលអ្នកគួរតែដឹង៖ ប្រទេសអេស្ប៉ាញមានឈ្មោះជាផ្លូវការថា ព្រះរាជាណាចក្រអេស្ប៉ាញ ដែលកាន់របបរាជាធិបតេយ្យសភា ដោយមានទីក្រុងម៉ាឌ្រីដជារាជធានី និងមានប្រជាជនជិត ៤៨ លាននាក់ ហើយភាសាសំខាន់ៗក្នុងប្រទេសនេះគឺ អេស្ប៉ាញ កាតាឡាន និងកាលីសៀន។

យោងតាមទិន្នន័យពី Statista 2023 ភាសាអេស្ប៉ាញគឺជាភាសាដែលមានអ្នកប្រើច្រើនជាងគេបំផុតទី ៤ នៅលើពិភពលោក បន្ទាប់ពីអង់គ្លេស ចិន និងហិណ្ឌូ។ ប្រទេសអេស្ប៉ាញគឺជាប្រទេសអឺរ៉ុបតែមួយគត់ដែលមានព្រំប្រទល់ ជាប់នឹងទ្វីបអាហ្រ្វិក ជាប្រទេសដែលមានផ្ទៃដីជាង ៥០០.០០០ km2 ក្នុងចំណោមប្រទេសធំជាងគេនៅអឺរ៉ុប។ អេស្ប៉ាញកាន់កាប់ភាគច្រើននៃឧបទ្វីប Iberian របស់អឺរ៉ុប ដែលលាតសន្ធឹងពីភាគខាងត្បូងពី Pyrenees ទៅ Strait of Gibraltar ដោយបំបែកប្រទេសនេះចេញពីទ្វីបអាហ្វ្រិក។ នៅភាគខាងកើតនៃប្រទេសអេស្ប៉ាញគឺជាសមុទ្រមេឌីទែរ៉ាណេ និងកោះ Balearic ដែលជាគោលដៅទេសចរណ៍ដ៏ពេញនិយមបំផុតមួយរបស់ប្រទេស។

ផ្ទៃខាងក្នុងនៃប្រទេសអេស្ប៉ាញគឺជាខ្ពង់រាប ហ៊ុព័ទ្ធដោយភ្នំ មានទន្លេហូរចូលទៅក្នុងសមុទ្រ បង្កើតដីមានជីជាតិសម្រាប់ធ្វើកសិកម្ម។ ជនជាតិអេស្ប៉ាញគឺមានភាពល្បីល្បាញខ្លាំងណាស់ដោយសារការស្រឡាញ់សេរីភាព មិនសូវមានជម្លោះ ច្រើនញ៉ាំអាហារជុំ គ្រួសារ និងមិត្តភក្តិ ។ ម្ហូបបែបប្រពៃណីរបស់ប្រទេសនេះមានដូចជា tapas ឬ pintxos ដែលជាអាហារមានប្រជាប្រិយភាពបំផុត។ តន្ត្រី និងការរាំក្នុងតំបន់ដូចជា fandango និង flamenco គឺជាផ្នែកដ៏សំខាន់មួយនៃវប្បធម៌អេស្ប៉ាញ ក៏ដូចជាពិធីបុណ្យសាសនា ហើយបាល់ទាត់គឺកីឡាជាតិ។

យោងតាមស្ថិតិរបស់អង្គការយូណេស្កូ ប្រទេសនេះមានបេតិកភណ្ឌពិភពលោកច្រើនជាងគេលំដាប់ទី ៤ ដែលមានបេតិកភណ្ឌចំនួន ៥០ បន្ទាប់ពីប្រទេសអ៊ីតាលី (៥៩) ចិន (៥៧) បារាំង និងអាល្លឺម៉ង់ (ទាំង ៥២)។ ជាមួយនឹងទីក្រុងប្រវត្តិសាស្ត្រ រស់រវើក និងឆ្នេរដែលមានពន្លឺថ្ងៃ អេស្ប៉ាញបានទាក់ទាញអ្នកទេសចរកំពូលៗជាច្រើនរបស់អឺរ៉ុប បន្ទាប់ពីប្រទេសបារាំង។ នៅឆ្នាំ ២០២៣ ប្រទេសនេះបានស្វាគមន៍ភ្ញៀវទេសចរជាង ៨៥ លាននាក់ កើនឡើងជិត ២០% បើធៀបនឹងឆ្នាំ ២០១៩។

នៅឆ្នាំ ១៩៨៦ អេស្ប៉ាញបានចូលរួមជាមួយសហភាពអឺរ៉ុប (EU) និងបន្តធ្វើទំនើបកម្មសេដ្ឋកិច្ចរបស់ខ្លួន។ ក្រៅពីវិស័យទេសចរណ៍ ឧស្សាហកម្មសំខាន់ៗផ្សេងទៀតរួមមានគ្រឿងម៉ាស៊ីន ការសាងសង់កប៉ាល់ អាហារ ភេសជ្ជៈ និងវាយនភណ្ឌ។ ដូច្នេះទិសដៅល្បីៗដែលអ្នកគួរទៅទស្សនានៅពេលមកដល់ប្រទេសអេស្ប៉ាញ យោងតាម Lonely Planet រួមមានព្រះវិហារ La Sagrada Família និង Park Güell ក្នុងទីក្រុង Barcelona ដែលជាវិចិត្រសាលសិល្បៈឈានមុខគេរបស់ពិភពលោក Museo del Prado ក្នុងទីក្រុង Madrid និងផ្សារកណ្តាល Mercado ក្នុងទីក្រុង Valencia៕

សម្រាប់ភ្ញៀវទេសចរដែលមានបំណងចង់ទៅកម្សាន្តនៅក្នុងប្រទេសជប៉ុនដោយមិនប្រើទិដ្ឋាការ អាចធ្វើដំណើរបានតាមបែប “fly and cruise” ដោយអ្នកទេសចរនឹងហោះហើរទៅកាន់ទីក្រុងកំពង់ផែ Keelung នៃកោះតៃវ៉ាន់ជាមុនសិន ហើយបន្ទាប់មកបន្តដំណើរដោយការជិះកប៉ាល់ Norwegian Spirit ទៅកាន់កោះ Okinawa របស់ប្រទេសជប៉ុន។
fly and cruise គឺជាប្រភេទនៃការធ្វើដំណើរដែលរួមបញ្ចូលគ្នារវាងផ្លូវអាកាសនិងផ្លូវទឹក។ ដូច្នេះអ្នកទេសចរអាចទៅប្រទេសជប៉ុនដោយកប៉ាល់ទេសចរណ៍ ចូលចតនៅគោលដៅមធ្យម ដោយមិនចាំបាច់មានទិដ្ឋាការឡើយ។

យោងតាមក្រុមប្រឹក្សាទេសចរណ៍ជប៉ុន គោលនយោបាយនេះអនុញ្ញាតឱ្យភ្ញៀវដែលធ្វើដំណើរតាមបែប “fly and cruise” ត្រូវតែមានអាជ្ញាប័ណ្ណពីរដ្ឋាភិបាលចូលប្រទេសដោយមានលក្ខខណ្ឌនៃការត្រឡប់ទៅកប៉ាល់វិញក្នុងរយៈពេល ៧ ថ្ងៃ។ អ្នកទេសចរអាចជិះទូកទៅកាន់ប្រទេសជប៉ុនពីកំពង់ផែនៅតៃវ៉ាន់ ដោយទីក្រុងកំពង់ផែ Keelung ក្នុងកោះតៃវ៉ាន់ គឺជាកន្លែងដែលកប៉ាល់ទេសចរណ៍ល្បីៗជាច្រើនដូចជា Norwegian Spirit និង Royal Caribbean International ចូលចត។

នេះគឺជាចំណុចចេញដំណើរសម្រាប់កប៉ាល់ទេសចរណ៍ទៅកាន់ប្រទេសជាច្រើន រួមទាំងប្រទេសជប៉ុន កូរ៉េ ចិន និងសិង្ហបុរី ជាមួយនឹងកាលវិភាគដ៏ងាយស្រួលសម្រាប់អ្នកទេសចរដែលមានអាយុច្រើន។ ទោះជាយ៉ាងណាដើម្បីចូលរួមក្នុងកម្មវិធី Fly cruise ភ្ញៀវត្រូវរៀបចំទិដ្ឋាការជាច្រើនសម្រាប់ការចូល និងចេញតាមជើងហោះហើរ និងរថភ្លើងរបស់តៃវ៉ាន់។ នៅពេលរៀបចំទិដ្ឋាការរួចរាល់ ក្រុមប្រឹក្សាទេសចរណ៍តៃវ៉ាន់ ស្នើឱ្យមានការជិះទូកកម្សាន្តរយៈពេល ៥ ថ្ងៃ ៤ យប់ ដែលសមរម្យសម្រាប់ភ្ញៀវទេសចរ។

ដូច្នេះនៅថ្ងៃទីមួយភ្ញៀវត្រូវតែជិះយន្តហោះនៅតៃប៉ិ រុករកទីក្រុងតៃប៉ិ-តៃវ៉ាន់។ បន្ទាប់មកនៅថ្ងៃទីពីរ ភ្ញៀវត្រូវធ្វើដំណើរទៅកាន់កំពង់ផែ Keelung ប្រហែល ៣០ នាទីដោយរថយន្តពីតៃប៉ិ ដើម្បីទស្សនា និងរុករកកន្លែងល្បីៗដូចជា ប៉ម Keelung ល្អាងទេពអប្សរ គុហាព្រះពុទ្ធជាដើម។ នៅថ្ងៃទីបី ភ្ញៀវត្រូវចេញដំណើរពីកំពង់ផែ Keelung ហើយត្រូវចូលឆែកឆេរដាក់អីវ៉ាន់ និងរុករកគ្រឿងបរិក្ខាររបស់នាវា។ រីឯនៅថ្ងៃទីបួនវិញ ភ្ញៀវក៏បានមកដល់កំពង់ផែ Naha នៃកោះ Okinawa ប្រទេសជប៉ុន ដើម្បីទស្សនា និងស្វែងយល់ពីវប្បធម៌ កន្លែងល្បីៗ និងម្ហូបនៅ Naha។

ចំណែកថ្ងៃទីប្រាំ ភ្ញៀវត្រូវចេញដំណើរពី Naha ទៅ Keelung វិញ ដើម្បីកក់ជើងហោះហើរពី Taipei ទៅប្រទេសកំណើតខ្លួនវិញ។ សម្រាប់តម្លៃដំណើរកម្សាន្តការគឺមានចាប់ពី ១ ទៅ ២ ពាន់ដុល្លារអាមេរិកអាស្រ័យលើរយៈពេលដំណើរកម្សាន្ត និងការធ្វើដំណើរ។ គួរបញ្ជាក់ដែរថា នាវាទេសចរណ៍ Norwegian Spirit អាចផ្ទុកភ្ញៀវបាន ២,០៣២ នាក់ ដែលនៅក្នុងនាវាទេសចរណ៍នោះរួមមាន៖ កាប៊ីនបន្ទប់គេងដែលមានទេសភាពសមុទ្រ អាងហែលទឹក កាស៊ីណូ មហោស្រព សួនកម្សាន្ត កន្លែងហាត់ប្រាណ ស្ប៉ា និងកន្លែងទិញទំនិញ។ ភ្ញៀវនៅលើ Norwegian Spirit ត្រូវបានបម្រើអាហារពេញ ៣ ពេលក្នុងមួយថ្ងៃ ជាមួយនឹងភោជនីយដ្ឋានជាច្រើនសម្រាប់ជ្រើសរើស៕

ប្រទេសចិន ៖ ផ្លូវឡើងលើភ្នំ ដែលមានប្រវែងជាង៧៥គីឡូម៉ែត្រ ស្ថិតនៅតំបន់ Xinjiang ភាគពាយ័ព្យប្រទេសចិន ត្រូវបានគេលើកឡើងថា គឺជាសុបិនអាក្រក់របស់អ្នកបើករថយន្ត និងអ្នកដំណើរដែលពុំចូលចិត្តផ្លូវកោង ។ ផ្លូវឡើងភ្នំនេះមានសភាពកោងខ្លាំងបត់បែនចុះឡើងៗដូចរាងអក្សរ U ហើយអក្សរ U នេះនៅជាប់ៗគ្នារាប់រយអក្សរឯណោះ ។

Pamir Plateau Sky Road ឬ Panlong Ancient Road បានជាប់ចំណាត់ថ្នាក់ជាផ្លូវកោងខ្លាំងបំផុតលើពិភពលោក ដែលផ្លូវនេះត្រូវបានកសាងឡើងឆ្លងកាត់តាមជួរភ្នំឃុនឡុន ក្នុងតំបន់ Xinjiang ។ គេចាត់ទុកថា វាជាផ្លូវគួរឱ្យចាប់អារម្មណ៍យ៉ាងខ្លាំងសម្រាប់ភ្ញៀវទេសចរ ហើយបើមើលពីផ្នែកខាងលើឃើញថា វាមានរាងកោងដូចសត្វនាគយក្សពណ៌ប្រផេះ ដែលវារឆ្លងកាត់ជួរភ្នំ ។

រដ្ឋាភិបាលចិនបានប្រកាសឱ្យប្រើប្រាស់ផ្លូវនេះជាផ្លូវការ កាលពីខែកក្កដា ឆ្នាំ២០១៩ ដើម្បីផ្តល់លក្ខណៈងាយស្រួលដល់ពលរដ្ឋទាំងអស់ ដែលចង់ធ្វើដំណើរឆ្លងកាត់ជួរភ្នំឃុនឡុន ជាពិសេស កសិកររស់នៅក្នុងតំបន់ ។

ក្រោយពីរដ្ឋាភិបាលចិនប្រកាសឱ្យប្រើប្រាស់ផ្លូវនេះមិនយូរប៉ុន្មាន វាក៏ក្លាយជាតំបន់ទេសចរណ៍សម្រាប់ភ្ញៀវទេសចរដែលចូលចិត្តបើករថយន្តប្រកបដោយជំនាញខ្ពស់ ដោយសារភ្ញៀវទេសចរដែលមកសាកល្បងបើករថយន្តលើផ្លូវនេះ ត្រូវប្រឈមមុខនឹងការបើករថយន្តបត់ចុះ បត់ឡើង រហូតដល់៦០០ដង ។ ទោះយ៉ាងណា អ្នកមានសុខភាពខ្សោយពុំគួរធ្វើដំណើរតាមផ្លូវនេះទេ ។

ចំណែកចំណុចខ្ពស់បំផុតរបស់ផ្លូវ Panlong Ancient Road គឺស្ថិតនៅខ្ពស់ពីកម្រិតនីវ៉ូទឹកសមុទ្រ រហូតដល់៤.២៦៩ម៉ែត្រ ។ ពីដំបូង ផ្លូវកោងនេះមានប្រវែងត្រឹមតែ៣៦គីឡូម៉ែត្រប៉ុណ្ណោះ ប៉ុន្តែក្រោយមក អាជ្ញាធរក៏បានពង្រីកផ្លូវនេះជាបន្តបន្ទាប់ រហូតដល់ប្រវែង៧៥គីឡូម៉ែត្រ ។

ការធ្វើដំណើរនៅលើផ្លូវរាងដូចសត្វនាគមួយនេះមានគ្រោះថ្នាក់យ៉ាងខ្លាំង ជាពិសស នៅរដូវវស្សា ដែលមានភ្លៀងធ្លាក់បណ្តាលឱ្យផ្លូវសើម និងរអិលខ្លាំង ។ លើសពីនេះ វាគ្របដណ្តប់ទៅដោយផ្ទាំងទឹកកកពាសពេញ ហើយសូម្បីតែពេលអាកាសធាតុល្អ ក៏អ្នកធ្វើដំណើរតាមផ្លូវនេះត្រូវប្រុងប្រយ័ត្នដូចគ្នាដែរ ។

ទោះយ៉ាងណា បើតាមបច្ចេកទេសការកសាងផ្លូវ គឺវាពុំមែនជាផ្លូវមានគ្រោះថ្នាក់បំផុតនៅលើពិភពលោកទេ ។ ប៉ុន្តែដោយសារផ្លូវនេះកោងខ្លាំង និងបត់ចុះ បត់ឡើង រហូតដល់៦០០ដង គឺវាពុំងាយស្រួលទេសម្រាប់អ្នកបើកបររថយន្ត និងអ្នកដំណើរមានសុខភាពខ្សោយ ៕