មិនត្រឹមតែមានរូបសម្រស់ស្រស់ស្អាតប៉ុណ្ណោះទេ ប៉ុន្តែកាយវិការរបស់ ពេជ្រ វត្តីសារ៉ាវឌ្ឍី Miss Grand Cambodia 2022 ទៅកាន់ហ្វេនដែលមានពិការភាពដែលនិយាយមិនកើតស្តាប់មិនបានគឺស្តែងឱ្យឃើញពីភាពកក់ក្តៅរបស់នាងទៅកាន់ហ្វេន។ ពេលឃើញវីដេអូនេះចែកចាយនៅលើបណ្តាញសង្គមហ្វេនៗជាច្រើនទៀតរបស់ ពេជ្រ វត្តីសារ៉ាវឌ្ឍី លើកឡើងថាពួកគេមើលនាងមិនខុសដែលយកនាងធ្វើជាអាយដល។

កាលពីរាត្រីថ្ងៃទី១២ ខែកក្កដា វគ្គផ្តាច់ព្រ័ត្រ Miss Grand Cambodia 2024 បានបញ្ចប់ដោយរលូនដោយរកឃើញម្ចាស់ជ័យលាភី ប៊ី សុធារី និងមានការសរសើរទៅកាន់អ្នករៀបចំកម្មវិធីដែលកាន់តែល្អឡើងៗពីមួយឆ្នាំទៅមួយឆ្នាំ។ ជាមួយនឹងចំណាប់អារម្មណ៍ទៅលើបេក្ខភាពនិងម្ចាស់ជ័យលាភីថ្មីគេបានចាប់អារម្មណ៍ទៅកាន់ ពេជ្រ វត្តីសារ៉ាឌ្ឍី Miss Grand Cambodia 2022 និងជាអនុប្រធានប្រតិបត្តិ Miss Grand Cambodia បន្ទាប់ពីឃើញវីដេអូមួយបង្ហោះនៅលើបណ្តាញសង្គម។

គណនីទិកតុកមួយជាឈ្មោះអ្នកគាំទ្រ ពេជ្រ វត្តីសារ៉ាវឌ្ឍី បានចែករំលែកវីដេអូ ពេជ្រ វត្តីសារ៉ាវឌ្ឍី ជួបជាមួយហ្វេនដោយបានចំណងជើងថា «ពេលដែលដឹងថាហ្វេននិយាយមិនបានស្តាប់មិនឮ អ្នកព្យាយាមរៀនធ្វើត្រាប់តាមពួកគាត់ដោយក្តីស្រលាញ់ ហេតុអ្វីអ្នកល្អអ្វីល្អយ៉ាងនេះ My Queen»។ នៅក្នុងវីដេអូដែលមានរយៈពេលជិត១នាទីគេបានឃើញ Miss Grand Cambodia 2022 រូបនេះត្រាប់កាយវិការរបស់ហ្វេនដែលបង្ហាញពីសេចក្តីស្រលាញ់ចេញពីបេះដូងពិតៗចំពោះគ្នាទៅវិញទៅមក។

មិនត្រឹមតែប៉ុណ្ណោះ ពេជ្រ វត្តីសារ៉ាវឌ្ឍី បានបង្ហាញកាយវិការដ៏កក់ក្តៅដោយបានសំពះអរគុណចំពោះហ្វេនដែលស្រលាញ់នាងនិងបានឱបហ្វេនមានពិការភាពនោះប្រកបដោយក្តីស្រលាញ់ជ្រាលជ្រៅ។

ឃើញវីដេអូនេះហើយហ្វេនៗដទៃទៀតរបស់ ពេជ្រ វត្តីសារ៉ាវឌ្ឍី បានចូលទៅបញ្ចេញមតិបង្ហាញថាពួកគេជ្រើសរើស ពេជ្រ វត្តីសារ៉ាវឌ្ឍី ធ្វើជាអាយដលមិនខកបំណងបើស្គាល់នាងកាន់តែយូរនឹងដឹងឃើញពីភាពស្រស់ស្អាតពីខាងក្នុងរបស់នាងរួមជាមួយមតិយោបល់ជាច្រើនទៀត៕

កញ្ញា រិទ្ធី លំអរពេជ្រ ហៅយូគី សហស្ថាបនិកបុណ្យភូមិនិងជា Director កម្មវិធី The Rapper Cambodia បានបញ្ចេញសារប្រតិកម្មក្រោយពីកម្មវិធីទូរទស្សន៍មួយលួចចម្លងតាំងពីឈ្មោះសូម្បីតែការផ្សព្វផ្សាយពីកម្មវិធី។ កញ្ញាបង្ហាញអារម្មណ៍ដោយការហួសចិត្តយ៉ាងខ្លាំងពេលឃើញមានការលួចចម្លងដោយមិនមានសេចក្តីអៀនខ្មាសបែបនេះ។ កញ្ញា យូគី ថាកម្មវិធី The Rapper Cambodia គឺពិតចំណែកឯកម្មវិធីមួយទៀតគឺចម្លង។

កាលពីល្ងាចថ្ងៃទី១៥ កក្កដា កញ្ញា យូគី មានគណនីហ្វេកប៊ុក Lomorpich Rithy
បានបញ្ចេញសារជាភាសាអង់គ្លេសមានអត្ថន័យជាភាសាខ្មែរថា «ខ្ញុំគ្រាន់តែមិនអាចឈរលើក្រុមហ៊ុនដែលហ៊ានថតចម្លងត្រង់ពីឈ្មោះរហូតដល់ការរចនា និងយុទ្ធនាការប្រព័ន្ធផ្សព្វផ្សាយសង្គម .. ចម្លងត្រង់អ្វីគ្រប់យ៉ាងសូម្បីតែចលនា VFX នៅលើចំណងជើងកម្មវិធី។ ចម្លងត្រង់ដើម្បីបំភ័ន្តទស្សនិកជនថាវាជាកម្មវិធីពេញនិយមរបស់យើង!មិនមែននិយាយពីការទិញទេពកោសល្យក្នុងកម្មវិធីចម្លងរបស់ពួកគេ! ពេលគេចម្លងពិធីបុណ្យរបស់ខ្ញុំ ដាក់ឈ្មោះបុណ្យរបស់យើងជាមួយនឹងម៉ាករបស់គេ ហើយលក់ស្រាបៀរនៅវត្តក្នុងរយៈពេល ៨ ឆ្នាំចុងក្រោយនេះ។ ឥឡូវគេធ្វើម្ដងទៀតជាមួយកម្មវិធីទូរទស្សន៍»។

កញ្ញា យូគី លើកឡើងទៀតថា «ខ្ញុំស្បថថាក្រុមហ៊ុនមិនខ្មាសគេទេ តែធ្វើអ្វីក៏បានលុយដែរ! ខ្ញុំសូមជូនពរឱ្យច្បាប់ IP របស់យើងតឹងរ៉ឹងជាងនេះ។ ខ្ញុំសូមជូនពរឱ្យទេពកោសល្យរបស់យើងដែលហៅខ្លួនឯងថា «សិល្បករ» ធ្វើបានល្អជាងនេះ ជាជាងចូលរួមកម្មវិធីចម្លងត្រង់។ ខ្ញុំយល់ពីលុយនិងកិត្តិនាម ប៉ុន្តែអ្វីដែលគួរឱ្យអាម៉ាស់ អ្នកណាដែលចូលរួមក្នុងកម្មវិធីនោះ ខ្ញុំសូមទោសដែលខ្ញុំមិនអាចឈរនៅបន្ទប់តែមួយជាមួយអ្នកបានទេ។ កិត្តិយសគឺជាតម្លៃស្នូលរបស់ខ្ញុំ។ ហួសចិត្ត លួចច្រើនដងហើយ លួចគ្រប់សព្វពេក អត់ខ្មាសសោះ The Rapper Cambodia គឺពិតមួយទៀតគឺចម្លង»។ ការលើកឡើងរបស់កញ្ញា យូគី គឺក្នុងនាមជា EP និង Director កម្មវិធី The Rapper Cambodia និងជាសហស្ថាបនិកនៃកម្មវិធី បុណ្យភូមិ។

គួរបញ្ជាក់ផងដែរថា កម្មវិធី The Rapper Cambodia បានបញ្ចប់រដូវកាលទី១របស់ខ្លួនរយៈពេលជិត៧ខែមកហើយ ខណៈ យូហៃ គឺជាម្ចាស់ជ័យលាភីថ្មីនេះជាកូនក្រុមរបស់ នរិទ្ធ។ កម្មវិធីនេះមានគ្រូបង្វឹកចំនួន៤នាក់គឺ ខ្មែរមួយជីវិត , នរិទ្ធ , Kingchi និង RuthKo និងមាន Producers ពីរនាក់គឺ វណ្ណដា និង ជូវី លីន។ កម្មវិធីប្រឡងចម្រៀងរ៉េបដ៏មានប្រជាប្រិយភាពនេះមានដើមកំណើតចេញពីប្រទេសថៃ (The Rapper) ហើយត្រូវបានទិញសិទ្ធយកទៅផលិតក្នុងប្រទេសវៀតណាមរួមជាមួយនឹងប្រទេសកម្ពុជាផងដែរ៕

បទចម្រៀងដ៏ល្បីមានចំណងជើងថា «Spot» ដែលសហការរវាង Zico និង Jennie
សមាជិក BLACKPINK ត្រូវបានតារាចម្រៀង Mina និង BoBo Cover ឡើងវិញធ្វើឱ្យមានការសរសើរយ៉ាងខ្លាំងពីអ្នកគាំទ្រ។ អ្នកគាំទ្របានបញ្ចេញមតិថា អ្នកទាំងពីរពិតជាឡូយCover បានល្អនិងមានភាពស៊ីចង្វាក់គ្នាដូចទៅនឹងម្ចាស់ដើម។

«Sport»បានទម្លាក់នៅលើឆាណែល HYBELABELS កាលពីថ្ងៃទី២៦ មេសា ដែលគិតមកទល់ពេលនេះរយៈពេលជាង២ខែដែលមានការស្តាប់ជាង៧៧លានដង។ បទនេះជាការរវាង Zico និង Jennie សមាជិក BLACKPINK បន្ទាប់ពី Jennie មិនបន្តកុងត្រាបុគ្គលជាមួយនឹងផលិតកម្ម YG ។ សន្ទុះនៃការគាំទ្របទនេះមានទូទាំងពិភពលោក សូម្បីក្មេងៗមួយចំនួនបានCover និងរាំបទនេះយ៉ាងគួរឱ្យទាក់ទាញមានការសរសើរព្រោងព្រាតជាមួយនឹងការរាំ challenge ពេញបណ្តាញសង្គមទិកតុក។

អ្វីដែលគួរឱ្យចាប់អារម្មណ៍ថ្មីៗនេះអ្នកគាំទ្រកម្ពុជាក៏បានចាប់អារម្មណ៍ទៅលើតារាចម្រៀង Mina និង Bobo ស្ថិតក្នុងផលិតកម្ម K’ve entertainment ជាមួយគ្នាបាន Cover បទខាងលើនេះ។ Mina បានបង្ហោះវីដេអូ [COVER] ZICO (지코) ‘SPOT! (feat. JENNIE)’ នៅពេលអ្នកទាំងពីរចូលរួមកម្មវិធីប្រគំតន្រ្តីមួយ។

ការ Cover បទកូរ៉េពីសំណាកតារាចម្រៀងល្បីឈ្មោះ Zico និង Jennie សមាជិក BLACKPINK រូបនេះ Mina និង Bobo ធ្វើបានយ៉ាងល្អទាំងការរាំនិងច្រៀងជាហេតុធ្វើឱ្យមានមតិសរសើរពួកគេផងដែរ។ អ្នកគាំទ្របានបង្ហាញពីការស្រលាញ់ទៅកាន់តារាចម្រៀងទាំងពីររូបនេះដោយបានដាក់សញ្ញាបេះដូង និងមតិខ្លះទៀតលើកឡើងស្រដៀងគ្នាថា ឡូយខ្លាំង មិនចាញ់ម្ចាស់ដើមឡើយ។

គេចាំបានថាកាលពីមុនតារាចម្រៀង Mina បានរាំ Cover បទ Solo និង You &Me របស់ Jennie ក៏ទទួលបានការសរសើរដូចគ្នា ខណៈក៏បានច្រៀង Cover បទ «COOL WITH YOU» របស់ក្រុមចម្រៀងកូរ៉េ New jeans រហូតមានការលើកឡើងថាបើមិនដឹងមិនស្គាល់ Mina ពីមុនមកនេះគិតថាជាជនជាតិកូរ៉េហើយ៕

«ជីវិតខ្ញុំរស់ដើម្បីភាពយន្តមិនបានផលិតភាពយន្តស្មើនឹងស្លាប់»នេះជាការលើកឡើងរបស់ផលិតករលោក
នៅលើបណ្តាញសង្គមស្របពេលដាច់ចិត្តដាក់បញ្ចាំងស៊ីក្លូតម្លៃ១លានដុល្លារយកត្រឹម១៥,០០០ដុល្លារនិងលោះវិញនូវទឹកប្រាក់ចំនួន៣ម៉ឺនដុល្លារ។

នៅយប់ថ្ងៃទី១៥ កក្កដា លោក ហ៊ុយ យ៉ាឡេង បានបង្ហោះរូបភាព២សន្លឹកអមដោយខ្លឹមសារថា «ខ្ញុំត្រូវការបញ្ចាំស៊ីក្លូដែលមានតម្លៃ១លានដុល្លារយកទៅថតភាពយន្ត ខ្ញុំយកតែ15000$ទេខ្ញុំយក៧ខែ ខែមីនា ២០២៥ខ្ញុំលោះយកស៊ីក្លូវិញដោយជូនប្រាក់លោះយកស៊ីក្លូវិញចំនួន30000$ បើមិនទុកចិត្តអាចដំកល់សែកជូនក៏បាន»។ ផលិតករ «ដើម្បីកូន» បានសង្កត់ធ្ងន់ថា «ជីវិតខ្ញុំរស់ដើម្បីភាពយន្តមិនបានផលិត ភាពយន្តស្មើនឹងស្លាប់ ទ្រព្យដែលមានតម្លៃក្នុងជីវិតខ្ញុំសល់តែស៊ីក្លូ១នេះទេ»។ ក្នុងនោះលោកក៏បានភ្ជាប់មកជាមួយលេខតេឡេក្រាមផ្ទាល់ខ្លួនផងដែរ។

ស៊ីក្លូ ដែលមានតម្លៃរហូតដល់១លានដុល្លារនេះត្រូវបានគេជីកសួរថាហេតុអ្វីបានជាស៊ីក្លូមួយនេះមានតម្លៃខ្ពស់បែបនេះ ខណៈលោកបានផ្ញើមកជាមួយការចុះផ្សាយពីស៊ីក្លូដែលមានតម្លៃ១លានដុល្លារនេះ។ កាលពីដើមឆ្នាំ២០២០ នាឱកាសបើកសម្ភោធខ្សែភាពយន្ត « ដើម្បីកូន » លោក ហ៊ុយ យ៉ាឡេង បានប្រកាសលក់ស៊ីក្លូកែច្នៃថ្មីក្នុងតម្លៃ ១លានដុល្លារ ដើម្បីយកថវិកាជូនដល់មន្ទីរពេទ្យគន្ធបុប្ផាទាំងស្រុងដោយចង់ឱ្យប្រជាជនខ្មែរមើលឃើញពីតម្លៃស៊ីក្លូ។ លក្ខណៈពិសេសរបស់ស៊ីក្លូនេះ គឺមានវ័យ៨០ ឆ្នាំឯណោះបើគិតមកទល់ឆ្នាំ២០២៤នេះមានអាយុ៨៤ឆ្នាំដែលត្រូវបានធ្វើឡើង ដោយស្នាដៃជនជាតិបារាំងម្នាក់។
លោក ហ៊ុយ យ៉ាឡេង គឺជាផលិតករម្នាក់ដែលពុះពារខ្លាំងលើវិស័យកុនខ្មែរដោយហ៊ានប្រកាសលក់ឡាន ផ្ទះ រួមទាំងទ្រព្យចុងក្រោយគឺជាស៊ីក្លូតម្លៃ១លានដុល្លារនេះមកផលិតកុនខ្មែរ។ ទោះជាយ៉ាងណា ទង្វើរបស់លោក ហ៊ុយ យ៉ាឡេង មានអ្នកខ្លះក៏បានកោតសរសើរទៅកាន់ទឹកចិត្តដ៏ធំធេងរបស់លោកប៉ុន្តែអ្នកខ្លះទៀតក៏បានរិះគន់លោកថាជាផលិតករ Drama ផងដែរ។

កាលពីកន្លងមកនេះលោក ហ៊ុយ យ៉ាឡេង បានទម្លាយប្រាប់ទស្សនិកជនថាលោកគិតចង់សម្លាប់ខ្លួនចំនួន៣លើកដោយសារតែវិស័យកុនព្រោះផលិតរឿងមកមិនសូវទទួលបានការគាំទ្រខាតឡុងចុង។ ជ្រកក្រោមវិស័យសិល្បៈជាង២០ឆ្នាំតាំងពីតួរ៉ាយរងរហូតក្លាយជាផលិតករស្នាដៃលេចធ្លោរបស់ លោក ហ៊ុយ យ៉ាឡេង មានដូចជា «ខ្មោចដើមចេកជ្វា», «ផ្ទះខ្មោចទិញ», «វិកលចរិត» រួមទាំងភាពយន្ត «ដើម្បីកូន»៕