ប្រទេសចិន៖ សាលាមត្តេយ្យជាច្រើននៅតាមជនបទក្នុងប្រទេសចិននាពេលបច្ចុប្បន្នគឺមិនសូវមានសិស្សចូលរៀននោះទេ ដោយនាយកសាលាក៏បានសម្រេចចិត្តកែប្រែសាលាមត្តេយ្យទៅជាមជ្ឈមណ្ឌលថែទាំមនុស្សចាស់វិញ។
យោងតាម CNBC ប្រទេសចិននឹងបន្ថែមមនុស្សចាស់រាប់រយលាននាក់ក្នុងប៉ុន្មានទសវត្សរ៍ខាងមុខនេះ ដោយសារចំនួនប្រជាជនវ័យចំណាស់កើនឡើង និងការថយចុះយ៉ាងខ្លាំងនៃអត្រាកំណើត បានធ្វើឱ្យប៉ះពាល់ដល់វិស័យអប់រំ ដោយសាលាមត្តេយ្យសិក្សារាប់ពាន់ត្រូវបានបិទនៅទូទាំងប្រទេស។

ទោះជាយ៉ាងណាសាលាមត្តេយ្យខ្លះក៏បានបើកឡើងវិញដោយបំប្លែងទៅជាកន្លែងថែទាំមនុស្សចាស់វិញ។ នាយកសាលា Li Xiuling បាននិយាយថា លោកបានបិទសាលាមួយរយៈដោយសារគ្មានកុមារចុះឈ្មោះចូលរៀន ប៉ុន្តែបន្ទាប់មកលោកក៏បានបើកឡើងវិញដោយប្តូរទៅជាមជ្ឈមណ្ឌលកម្សាន្តសម្រាប់មនុស្សចាស់។ មិនយូរប៉ុន្មានសាលានេះក៏មានមនុស្សចាស់ជាច្រើនចុះឈ្មោះចូលរៀន ដោយសព្វថ្ងៃសាលាគឺមានបង្រៀនផ្នែកតន្ត្រី របាំ ម៉ូដែល និងមុខវិជ្ជាជាច្រើនទៀត។ ដូច្នេះការងារថែទាំ និងបង្រៀនមនុស្សចាស់គឺកំពុងមានការរីកចម្រើនខ្លាំងនៅក្នុងប្រទេសចិន។

បើយោងតាមទិន្នន័យរបស់រដ្ឋាភិបាលបានឱ្យដឹងថា សាលាមត្តេយ្យជិត ១៥,០០០ បានបិទកាលពីឆ្នាំមុន ខណៈដែលការចុះឈ្មោះចូលរៀនបានធ្លាក់ចុះចំនួន ៥.៣ លាននាក់កាលពីឆ្នាំ ២០២២។ ទោះជាយ៉ាងណាយោងតាមរបាយការណ៍ គ្រឹះស្ថានមត្តេយ្យសិក្សាជាច្រើនផ្សេងទៀតនៅទូទាំងប្រទេសចិនក៏ចាប់ផ្តើមបើកឡើងវិញ ហើយក៏ទទួលបានទទួលជោគជ័យដោយការផ្លាស់ប្តូរពីការអប់រំកុមារទៅបង្រៀនមនុស្សចាស់វិញ។

យោងតាមស្ថិតិផ្លូវការ ប្រទេសចិនបានឃើញការកើនឡើងគួរឱ្យកត់សម្គាល់នៃចំនួនប្រជាជនចាស់របស់ខ្លួនកាលពីឆ្នាំមុន ដោយបានបន្ថែមមនុស្សជិត ១៧ លាននាក់ដែលមានអាយុលើសពី ៦០ ឆ្នាំ។ ក្រុមអាយុនេះមានច្រើនជាង ២០% នៃចំនួនប្រជាជន ដែលសមាមាត្ររំពឹងថានឹងកើនឡើងដល់ជិត ១/៣ នៅឆ្នាំ ២០៣៥។ រដ្ឋាភិបាលប៉ាន់ប្រមាណថា ផលិតផល និងសេវាកម្មសម្រាប់ផ្គត់ផ្គង់ដល់មនុស្សចាស់ ចាប់ពីវិស័យទេសចរណ៍សម្រាប់មនុស្សចាស់ រហូតដល់ការថែទាំវេជ្ជសាស្រ្តផ្អែកលើបច្ចេកវិទ្យា អាចមានតម្លៃ ៣០ ពាន់ពាន់លានយន់នៅឆ្នាំ ២០៣៥៕

យោងមានប្រភពសារព័ត៌មាន The Korea Time ដែលបានចុះផ្សាយកាលពីថ្ងៃទី ១៤ ខែកក្កដា ឆ្នាំ២០២៤នេះបានឲ្យដឹងថា បច្ចុប្បន្ននេះនៅឯប្រទេសកូរ៉េខាងត្បូង ការដំឡើងប្រាក់ឈ្នួលអប្បបរមាកំពុងដាក់សម្ពាធកាន់តែខ្លាំងលើម្ចាស់អាជីវកម្មខ្នាតតូច ដែលបណ្តាលឲ្យពិបាកក្នុងការជួលកម្មករកាន់តែខ្លាំងឡើង រហូតដល់ប្រកាសក្ស័យធន ហើយកន្លែងខ្លះបានខកខានក្នុងការបើកប្រាក់ឈ្នួលដល់កម្មករផងដែរ។

យោងតាមសហព័ន្ធសហគ្រាសកូរ៉េ (KEF) បានបង្ហាញថា គិតត្រឹមខែឧសភាឆ្នាំ២០២៤នេះ មានការប្រកាសក្ស័យធនរហូតដល់ចំនួន ៨១០ ក្នុងចំណោមអាជីវកម្មខ្នាតតូចដូចជា ផ្នែកភោជនីយដ្ឋាន និងកន្លែងស្នាក់នៅតូចៗជាដើម។ យ៉ាងណាមិញ ការប្រកាសក្ស័យធននៅក្នុងឆ្នាំនេះ គឺបានកើនឡើងយ៉ាងខ្លាំង ប្រមាណ ៣៦.៨ ភាគរយ បើធៀបនឹងឆ្នាំ២០២៣។

ការដំឡើងប្រាក់ឈ្នួលអប្បបរមានៅក្នុងប្រទេសកូរ៉េខាងត្បូងនៅតែជាប្រធានបទដ៏ក្តៅគគុករយៈពេលប៉ុន្មានសតវត្សកន្លងមកនេះ ព្រោះថាវាផ្តល់ទាំងគុណសម្បត្តិនិងគុណវិបត្តិ។ ការតម្លើងប្រាក់ឈ្នួលអប្បបរមា មានន័យថាជាការតម្លើងប្រាក់ខែដល់កម្មករដែលមានប្រាក់ឈ្នួលទាបទូទាំងប្រទេស ដើម្បីផ្តល់ឲ្យពួកគេនូវកម្រិតជីវភាពកាន់តែប្រសើរឡើង ក៏ដូចជាជួយកាត់បន្ថយភាពក្រីក្រ។

ប៉ុន្តែស្របពេលដែលតម្លើងប្រាក់ឈ្មួលអប្បបរមានេះ វានឹងជះឥទ្ធិពលអវិជ្ជមានទៅកាន់ម្ចាស់អាជីវកម្មខ្នាតតូច ដូចជាកាត់បន្ថយការងាររបស់បុគ្គលិកឬក៏បញ្ឈប់បុគ្គលិកតែម្តងព្រោះតែមិនអាចទ្រាំទ្រនឹងការចំណាយផ្សេងៗ។ ការតម្លើងប្រាក់ឈ្មួលអប្បបរមា អាចនឹងធ្វើឲ្យមានការកើនឡើងតម្លៃសម្រាប់អ្នកប្រើប្រាស់ ព្រោះថាអាជីវកម្មខ្នាតតូចអាចនឹងត្រូវដំឡើងថ្លៃទំនិញ និងសេវាកម្ម ដើម្បីរ៉ាប់រងតម្លៃពលកម្មកាន់តែខ្ពស់ ដែលអាចនាំឱ្យអតិផរណាទូទាំងប្រទេស។

ជាថ្នូរត្រឡប់មកវិញ កម្មករឬពលករដែលមានប្រាក់ចំណូលទាបទាំងនោះ គឺងាយប្រឈមមុខនឹងការបាត់បង់ការងារធ្វើ ព្រោះតែការកាត់បន្ថយកម្លាំងពលកម្មពីអាជីវកម្មខ្នាតតូចនានាផងដែរ។ ដូច្នេះហើយ ការស្វែងរកតុល្យភាពរវាងការដំឡើងប្រាក់ឈ្នួលអប្បបរមា និងការគាំទ្រដល់អាជីវកម្មខ្នាតតូច គឺជាបញ្ហាស្មុគស្មាញដែលទាមទារឱ្យមានការពិចារណាដោយប្រុងប្រយ័ត្ន និងសហការគ្នារវាងភាគីពាក់ព័ន្ធផងដែរ៕

ប្រទេសជប៉ុន ៖ សារព័ត៌មាន KBN សូមបង្ហាញលោកអ្នកនូវរូបភាពដ៏អស្ចារ្យមួយចំនួន ប៉ុន្តែរូបទាំងនេះពុំមែនជារូបថតនោះទេ គឺវាជាស្នាដៃរបស់វិចិត្រករជនជាតិជប៉ុនម្នាក់ ដែលពោរពេញទៅដោយបទពិសោធន៍ ។ បើទោះជាលោកអ្នកពិបាកជឿថា វាជារូបគំនូរគូរដោយមនុស្សក្តី ប៉ុន្តែនេះជាការបង្ហាញឱ្យឃើញពីភាពស្រស់ស្អាត, ស្នាដៃប្រកបដោយទេពកោសល្យ និងការហ្វឹកហាត់ជំនាញយ៉ាងពិតប្រាកដ ។

វិចិត្រករជនជាតិជប៉ុនដែលបានគូររូបគំនូរដ៏ល្អឥតខ្ចោះទាំងនេះ គឺលោក ខេ មីអេណុ (K Mieno) ហើយរូបគំនូររបស់លោកភាគច្រើន គឺលោកបានប្រើប្រាស់ថ្នាំពណ៌ទឹក និងពណ៌ប្រេង ។ ស្នាដៃសិល្បៈរបស់លោកត្រូវបានគេចាត់ទុកថា ស្ថិតនៅក្នុងប្រភេទ Hyperrealistic ។

លោក ខេ មីអេណុ បានបញ្ចប់ការសិក្សានៅសាកលវិទ្យាល័យ Hiroshima City University College of Art កាលពីឆ្នាំ២០០៧ ។ លោកស្រឡាញ់ការគូរគំនូរយ៉ាងខ្លាំង ហើយផ្ទាំងគំនូរជាច្រើនរបស់លោក ត្រូវបានដាក់តាំងបង្ហាញពាសពេញប្រទេសជប៉ុន រួមទាំងដាក់តាំងនៅសារមន្ទីររបស់ជប៉ុនផងដែរ ។ ក្រោយមក នៅឆ្នាំ២០១៧ លោកទទួលបានពានរង្វាន់ «Hoki Museum Grand Prize Award» ហើយឈ្មោះរបស់លោក ក៏ត្រូវបានបោះពុម្ពក្នុងស្នាដៃសិល្បៈជាច្រើននារយៈពេលប៉ុន្មានឆ្នាំមកនេះ ។

បើទោះជារូបគំនូរគូរឡើងដោយប្រើប្រាស់ថ្នាំពណ៌ប្រេងមានលក្ខណៈស្រដៀងនឹងរូបភាពពិតប្រាកដបានទាក់ទាញចំណាប់អារម្មណ៍ និងបង្កើតកេរ្តិ៍ឈ្មោះយ៉ាងខ្លាំងដល់លោក ខេ មីអេណុ ក៏ដោយ ក៏លោកជាវិចិត្រករម្នាក់ដែលចូលចិត្តថតរូបផងដែរ ។ ពេលទំនេរ លោកចាប់ផ្តើមគូរគំនូរផ្សេងៗដោយការប្រើប្រាស់ថ្នាំពណ៌ទឹក និងពណ៌ប្រេង ដើម្បីចែករំលែកសេចក្តីសុខដល់មនុស្សផ្សេងទៀតជាញឹកញាប់ ។

លោកនិយាយថា ក្រៅពីការគូរគំនូរឱ្យមានលក្ខណៈល្អិតល្អន់ហើយ ការគូរស្រមោលរបស់រូបភាពក៏ចាត់ទុកថា ជារឿងសំខាន់ផងដែរ ពីព្រោះវានឹងធ្វើឱ្យរូបគំនូរទទួលបានការចាប់អារម្មណ៍កាន់តែខ្លាំងឡើង ។ លើសពីនេះ អ្វីដែលពុំអាចខ្វះខាត គឺការវិភាគពីអារម្មណ៍ពិតរបស់មនុស្ស ព្រមទាំងវិភាគពីបញ្ហាពូជសាសន៍ផងដែរ ពីព្រោះវាពាក់ព័ន្ធនឹងពណ៌សម្បុរស្បែក ។

ស្នាដៃសិល្បៈប្រភេទ Hyperrealistic របស់លោក តែងតែជំរុញឱ្យមានការជជែកគ្នារវាងមនុស្សពីរក្រុមនៅប្រទេសជប៉ុន គឺក្រុមមួយចាប់អារម្មណ៍យ៉ាងខ្លាំងចំពោះស្នាដៃសិល្បៈ ខណៈក្រុមមួយទៀតស្ទាក់ស្ទើរចិត្ត និងសួរថា តើវាពិតជារូបគំនូរឬក៏អត់?

នៅលើពិភពលោកនេះ មានវិចិត្រករជាច្រើនរូបដែលអាចគូរគំនូរដូចគ្នានឹងរូបភាពពិតប្រាកដ ហើយលោក ខេ មីអេណុ គឺស្ថិតក្នុងចំណោមវិចិត្រករដែលមានទេពកោសល្យទាំងនេះ ។ ចុះលោកអ្នកវិញយល់ឃើញយ៉ាងណាដែរ? តើរូបគំនូររបស់លោក ខេ មីអេណុ ដូចរូបភាពពិតប្រាកដដែរឬទេ?

យោងតាមក្រុមហ៊ុនស្រាវជ្រាវ IDC ដែលរាយការណ៍កាលពីថ្ងៃទី១៦ ខែកក្កដាថា ទីផ្សារស្មាតហ្វូនរបស់ពិភពលោកនាពេលបច្ចុប្បន្ននេះគឺបានកើនឡើងរហូតដល់ ៦.៥% ដល់ ២៨៥.៤ លាននៅក្នុងត្រីមាសទី ២ នៃឆ្នាំ ២០២៤ បើធៀបនឹងរយៈពេលដូចគ្នាកាលពីឆ្នាំមុន។ ដោយចំនួនទូរស័ព្ទដែលបានដឹកជញ្ជូនចេញរបស់ក្រុមហ៊ុនធំៗទាំង ៥ ក៏មានចំនួនច្រើនជាងមុនផងដែរ។

ហេតុនេះបើតាមរបាយការណ៍ Counterpoint Research បានកត់ត្រាតួលេខ ៦% ហើយបានវាយតម្លៃថានេះគឺជាការកើនឡើងប្រចាំឆ្នាំដ៏ល្អបំផុតចាប់តាំងពីត្រីមាសទីពីរនៃឆ្នាំ ២០២១ មក។ លោក Tarun Pathak នាយកក្រុមហ៊ុន Counterpoint បានមានប្រសាសន៍ថា “ការផលិតស្មាតហ្វូនគឺមានកម្រិតទាបបំផុតក្នុងរយៈពេលមួយទសវត្សរ៍ជាពិសេសគឺក្នុងឆ្នាំ២០២៣ ប៉ុន្តែនៅឆ្នាំនេះទីផ្សារកំពុងងើបឡើងវិញដោយសារការកែលម្អអារម្មណ៍អ្នកប្រើប្រាស់ និងស្ថានភាពសារពើភ័ណ្ឌ”។

ទន្ទឹមនឹងនេះ លោក Nabila Popal នាយកស្រាវជ្រាវនៃក្រុមអ្នកតាមដានទូទាំងពិភពលោករបស់ IDC បានអត្ថាធិប្បាយថាទីផ្សារមាននិន្នាការនៃបុព្វលាភដោយ Apple និង Samsung កំពុងទទួលបានអត្ថប្រយោជន៍ច្រើនបំផុត។ លើសពីនេះ ស្មាតហ្វូនដែលមាន AI ជំនាន់ថ្មី ក៏ត្រូវបានគេរំពឹងថានឹងដណ្តើមបាន ១៩% នៃទីផ្សារនៅឆ្នាំនេះ ដែលជាការកើនឡើងលឿនបំផុតសម្រាប់ការច្នៃប្រឌិតទូរស័ព្ទដែល IDC មិនធ្លាប់មាន។ ខណៈពេលដែល Apple និង Samsung ផ្តោតលើផ្នែកដែលមានតម្លៃខ្ពស់ ក្រុមហ៊ុនផលិតស្មាតហ្វូនឈានមុខគេជាច្រើនរបស់ចិនក៏បានបង្កើនចំនួនផលិតផលនៅក្នុងផ្នែកដែលមានតម្លៃទាបផងដែរ ដើម្បីចាប់យកចំណែកទីផ្សារនៅក្នុងបរិបទនៃអ្នកប្រើប្រាស់កំណត់ការចំណាយ។

ដូច្នេះ Xiaomi គឺជាក្រុមហ៊ុនដែលរីកលូតលាស់លឿនបំផុតក្នុងចំណាត់ថ្នាក់កំពូលទាំង ៥ ជាមួយនឹង ២៧.៤% និងមានចំណែកទីផ្សារ ១៤.៨% នៅក្នុងត្រីមាសចុងក្រោយនេះ ដោយជាប់ចំណាត់ថ្នាក់លេខ ៣ នៅលើពិភពលោក ដោយសារភាពពេញនិយមនៃស៊េរី Redmi 13 និង Note 13 ។ ហើយក្រុមហ៊ុន Huawei ក៏ជាក្រុមហ៊ុនដែលមានការងើបឡើងវិញខ្លាំងបំផុតក្នុងចំណោមម៉ាកយីហោរបស់ចិនផងដែរ ដែលឈានដល់ ៦៩.៧% ធៀបនឹងរយៈពេលដូចគ្នាកាលពីឆ្នាំមុន។ ទោះជាយ៉ាងណាក៏ដោយ ទិន្នផលទូរស័ព្ទរបស់ក្រុមហ៊ុននេះគឺមិនមានទំហំធំល្មមនឹងស្ថិតក្នុងម៉ាកយីហោកំពូលទាំង ៥ នោះទេ៕

ប្រទេសវៀតណាម ៖ សារព័ត៌មានបរទេសបានរាយការណ៍កាលពីថ្ងៃទី១៥ ខែកក្កដា ឆ្នាំ២០២៤ ថា ក្រុមហ៊ុនផលិតរថយន្តអគ្គិសនីវៀតណាមឈ្មោះ VinFast ប្រកាសថា នឹងពន្យារពេលបើកដំណើរការរោងចក្រនៅសហរដ្ឋអាមេរិក រយៈពេល៣ឆ្នាំទៀត ព្រមទាំងកាត់បន្ថយគោលដៅលក់រថយន្តប្រចាំឆ្នាំផងដែរ ។

ក្រុមហ៊ុន VinFast បានប្រកាសថា នឹងពន្យារពេលបើកដំណើរការរោងចក្រផលិតរថយន្តអគ្គិសនីនៅរដ្ឋ North Carolina សហរដ្ឋអាមេរិក រយៈពេល៣ឆ្នាំទៀត គឺរហូតដល់ឆ្នាំ២០២៨ ។ ការសម្រេចចិត្តពន្យារពេលនេះឆ្លុះបញ្ចាំងពីបញ្ហាប្រឈមរបស់ក្រុមហ៊ុនវៀតណាម ក្នុងការក្លាយជាក្រុមហ៊ុនប្រេនលំដាប់ពិភពលោក ។

ក្រុមហ៊ុនបញ្ជាក់ថា ការពន្យារពេលបើកដំណើរការរោងចក្រនឹងជួយក្រុមហ៊ុនអាចគ្រប់គ្រងការចំណាយថវិការយៈពេលខ្លីឱ្យកាន់តែមានប្រសិទ្ធភាព និងផ្តោតទៅលើធនធានសម្រាប់គោលដៅរីកចម្រើនរបស់ក្រុមហ៊ុននាថ្ងៃអនាគត ។ ក្រៅពីនេះ ក្រុមហ៊ុនក៏បានកាត់បន្ថយគោលដៅលក់រថយន្តប្រចាំឆ្នាំផងដែរ គឺពីចំនួន១សែនគ្រឿង មកស្មើត្រឹម៨ម៉ឺនគ្រឿងប៉ុណ្ណោះ ។

Le Thi Thu Thuy ជានាយកគ្រប់គ្រងក្រុមហ៊ុន VinFast និយាយថា ក្រុមហ៊ុនបានកែសម្រួលទស្សនវិស័យដើម្បីសម្របតាមការប្រែប្រួលទីផ្សារ និងបញ្ហាប្រឈមដែលអាចកើតឡើង ។ ការពន្យារពេលបើកដំណើរការរោងចក្រនេះបង្ហាញថា VinFast កំពុងប្រឈមនឹងឧបសគ្គដើម្បីក្លាយជាក្រុមហ៊ុនផលិតរថយន្តអគ្គិសនីវាយលុកទីផ្សាររថយន្តអគ្គិសនីលើពិភពលោក ដែលបានធ្លាក់ចុះកាលពីឆ្នាំ២០២៣ ។

របាយការណ៍ Electric Vehicle Outlook របស់ BloombergNEF បានកាត់បន្ថយបរិមាណការលក់រថយន្តអគ្គិសនីលើពិភពលោក មកស្មើត្រឹមតែ៦លាន៧សែនគ្រឿង នៅត្រឹមឆ្នាំ២០២៦ ។ រីឯក្រុមហ៊ុនផលិតរថយន្តធំៗជាច្រើន ដូចជា ៖ Ford, General Motors, Volkswagen និង Tesla ក៏បានកាត់បន្ថយគោលដៅផលិតរថយន្តដូចគ្នាដែរ ។

ក្រោយពីបានចាប់ផ្តើមលក់រថយន្តអគ្គិសនីយ៉ាងលេចធ្លោនៅអាមេរិកកាលពីសីហា ឆ្នាំ២០២៣ តម្លៃភាគហ៊ុនរបស់ក្រុមហ៊ុន VinFast បានកើនឡើងខ្ពស់រហូតដល់ជាង+៧០០% ត្រឹមតែរយៈពេល២សប្តាហ៍ប៉ុណ្ណោះ ។ ប៉ុន្តែបច្ចុប្បន្ន តម្លៃភាគហ៊ុនរបស់ក្រុមហ៊ុនដែលពុំអាចស្វែងរកប្រាក់ចំណេញនោះ បានធ្លាក់ចុះរហូតដល់ -៩០% ពីចំណុចខ្ពស់បំផុត ។

ទោះយ៉ាងណា ក្រុមហ៊ុន VinFast បានរៀបចំគម្រោងផ្តោតទៅលើការចាប់យកឱកាសរយៈពេលខ្លីក្នុងទីផ្សារដ៏មានសក្តានុពល ដើម្បីគ្រប់គ្រងការចំណាយដើមទុន និងធនធានឱ្យបានត្រឹមត្រូវ ព្រមទាំងកាត់បន្ថយហានិភ័យយ៉ាងមានប្រសិទ្ធភាពផងដែរ ៕

ប្រទេសថៃ ៖ កាលពីថ្ងៃទី១៦ ខែកក្កដា ឆ្នាំ២០២៤ សារព័ត៌មានថៃរាយការណ៍ថា មានហេតុការណ៍មួយកើតឡើងបណ្តាលឱ្យភ្ញាក់ផ្អើលនៅកណ្តាលទីក្រុងបាងកក គឺបុគ្គលិកសណ្ឋាគារបានឃើញជនជាតិវៀតណាមចំនួន៦នាក់ ដេកស្លាប់ក្នុងបន្ទប់សណ្ឋាគារប្រណីតនៅតំបន់រ៉ាជប្រាស៊ុង ហើយក្នុងចំណោមនេះ សាកស.ព ២នាក់ មានសញ្ជាតិអាមេរិក ។ ជុំវិញហេតុការណ៍នេះ លោកនាយករដ្ឋមន្ត្រីថៃថ្លែងថា វានឹងពុំប៉ះពាល់ដល់វិស័យទេសចរណ៍ទេ ដោយសារមិនមែនជាករណីប្ល.ន់ ទ្រព្យសម្បត្តិ ។

នៅក្នុងបន្ទប់កើតហេតុ សាកសពជនជាតិវៀតណាមចំនួន៤នាក់ បានស្លាប់នៅបរិវេណតុអាហារ រីឯសាកសព២នាក់ទៀតស្លាប់ក្នុងបន្ទប់សម្រាក ។ ជំហានដំបូង សមត្ថកិច្ចថៃសន្និដ្ឋានថា មូលហេតុនៃការស្លាប់ គឺមានបុគ្គលផ្សេងទៀតលួចដាក់ថ្នាំបំពុលពួកគេក្នុងភេសជ្ជៈ ពីព្រោះគ្មានស្លាកស្នាមការវាយតប់គ្នា ឬអំពើហិង្សាក្នុងបន្ទប់ស្នាក់នៅទេ ។

សមត្ថកិច្ចបានបង្ហាញអត្តសញ្ញាណសាកសពជនជាតិវៀតណាមទាំង៦នាក់ រួមមាន ៖
១-អ្នកស្រី SHERINE CHONG អាយុ៥៦ឆ្នាំ សញ្ជាតិអាមេរិក
២-លោក HUNG DANG VAN អាយុ៥៥ឆ្នាំ សញ្ជាតិអាមេរិក
៣-អ្នកស្រី THI NGUYEN PHUONG LAN អាយុ៤៧ឆ្នាំ សញ្ជាតិវៀតណាម
៤-លោក HONG PHAM THANH អាយុ៤៩ឆ្នាំ សញ្ជាតិវៀតណាម
៥-លោក DINH TRAN PHU អាយុ៣៧ឆ្នាំ សញ្ជាតិវៀតណាម និង
៦-អ្នកស្រី THI NGUYEN PHUONG សញ្ជាតិវៀតណាម ។

លោកឧត្តមសេនីយ៍ឯក ធិទិ ស៊ែងសាវ៉ាង ស្នងការនគរបាលប្រចាំក្រុងបាងកក និយាយថា តាមរយៈការត្រួតពិនិត្យនៅកន្លែងកើតហេតុឃើញថា គ្មានស្លាកស្នាមការវាយតប់គ្នាទេ ហើយជនជាតិវៀតណាមទាំងនេះបានស្លាប់ក្នុងបន្ទប់តែមួយ ។ ពួកគេមានគម្រោង Check out ចេញពីបន្ទប់សណ្ឋាគារ នៅថ្ងៃទី១៦ ខែកក្កដា ឆ្នាំ២០២៤ ព្រមទាំងបានរៀបចំអីវ៉ាន់ដាក់វ៉ាលិសរួចរាល់ហើយ ។ ជំហានបន្ទាប់ សមត្ថកិច្ចនឹងធ្វើការពិសោធន៍សាកសពឱ្យបានលម្អិត និងត្រួតពិនិត្យភស្តុតាងពាក់ព័ន្ធទាំងអស់ ។

ចំណែកលោកឧត្តមសេនីយ៍ទោ ធីរ៉ាឌេត ថាំសុធី មេបញ្ជាការផ្នែកស៊ើបអង្កេតប្រចាំក្រុងបាងកក និយាយថា សាកសពក្នុងបន្ទប់សណ្ឋាគារនៅទីក្រុងបាងកក គឺមានបុរស៣នាក់ និងស្ត្រី៣នាក់ ដែលពួកគេជាជនជាតិវៀតណាមទាំងអស់ ក្នុងនោះសាកសព២នាក់ មានសញ្ជាតិអាមេរិក ។ តាមការស៊ើបអង្កេតជំហានដំបូងឃើញថា ពួកគេអាចត្រូវគេលួចដាក់ថ្នាំបំពុលក្នុងទឹកតែ និងកាហ្វេ ។

បើតាមបុគ្គលិកផ្នែកបោសសម្អាតសណ្ឋាគារខាងលើនិយាយថា ដោយសារសង្ស័យ ខ្លួនក៏មកពិនិត្យនៅបន្ទប់កើតហេតុ ពីព្រោះជនជាតិវៀតណាមទាំងនេះដល់ពេលវេលា Check out ចេញពីបន្ទប់សណ្ឋាគារហើយ ប៉ុន្តែខ្លួនពុំឃើញពួកគេចាកចេញសោះ ។

បន្ទាប់មក នាយករដ្ឋមន្ត្រីថៃ លោក ស្រេតថា ថាវីស៊ីន ក៏បានធ្វើដំណើរមកកាន់សណ្ឋាគារកើតហេតុនៅតំបន់រ៉ាជប្រាស៊ុង ព្រមជាមួយមន្ត្រីរដ្ឋាភិបាលមួយចំនួនទៀត ហើយលោកថ្លែងថា បើពិនិត្យនៅទីតាំងកើតហេតុនេះ គឺគ្មានអំពើប្លន់ទ្រព្យសម្បត្តិ ឬអំពើហិង្សាកើតឡើងទេ ។ ការសន្និដ្ឋានជំហានដំបូង គឺអាស្រ័យលើការពិនិត្យសាកសពទាំងអស់ ព្រមទាំងពិនិត្យភស្តុតាងផ្សេងៗដើម្បីសន្និដ្ឋានថា តើពួកគេបានបរិភោគអ្វីដែរឬទេ? ទោះយ៉ាងណា យើងសូមបញ្ជាក់ថា ហេតុការណ៍នេះពុំពាក់ព័ន្ធនឹងអំពើប្លន់ធ្វើបាបរាងកាយទេ ។

លោកនាយករដ្ឋមន្ត្រីថៃបន្តថា បើតាមសន្និដ្ឋានរបស់សមត្ថកិច្ចថា គឺអាចមានជនជាតិវៀតណាមម្នាក់ទៀតពាក់ព័ន្ធនឹងហេតុការណ៍នេះ ហើយសមត្ថកិច្ចពុំទាន់រកឃើញនៅឡើយ ។ ដូច្នេះ វានឹងពុំប៉ះពាល់ដល់វិស័យទេសចរណ៍ប្រទេសថៃទេ ហើយមុននេះ លោកក៏បានជជែកជាមួយមន្ត្រីទូតវៀតណាមរួចហើយ និងបានជម្រាបព័ត៌មាននេះទៅមន្ត្រីទូតវៀតណាម ។

ក្រោយមក សមត្ថកិច្ចក៏បានរកឃើញភស្តុតាងបន្ថែមទៀត និងបង្ហាញម្ហូបអាហារនៅលើតុក្នុងបន្ទប់សណ្ឋាគារដែលជនជាតិវៀតណាមទាំងនេះកុម្ម៉ង់មកបរិភោគ ប៉ុន្តែពួកគេពុំទាន់បានបរិភោគអាហារនៅឡើយទេ មុនពេលស្លាប់ ៕