សហរដ្ឋអាមេរិក៖ កាលពីពេលថ្មីៗនេះ អតីតប្រធានាធិបតីអាមេរិកលោក Donald Trump ត្រូវបានគេប៉ុនប៉ងធ្វើឃា.ត ប៉ុន្តែមិនបានសម្រេចនោះទេ។ មិនយូរប៉ុន្មានភាគហ៊ុនរបស់ Trump Media ក៏បានកើនឡើងច្រើនជាង ៣០% ក្នុងមួយវគ្គ ដែលជួយឱ្យអតីតប្រធានាធិបតីរូបនេះ ត្រឡប់ទៅក្រុមអ្នកមានបំផុត ៥០០ នៅលើពិភពលោកជាមួយនឹងទ្រព្យសម្បត្តិសុទ្ធ ៦.៦ ពាន់លានដុល្លារ។

យោងតាម Forbes ការបិទវគ្គជួញដូរនៅថ្ងៃទី ១៥ ខែកក្កដា ឆ្នាំ២០២៤ ភាគហ៊ុនរបស់ក្រុមហ៊ុន Trump Media & Technology Group ដែលជាក្រុមហ៊ុនប្រព័ន្ធផ្សព្វផ្សាយរបស់អតីតប្រធានាធិបតីអាមេរិក Donald Trump បានកើនឡើងរហូតដល់ ៣២% ដែលនេះជាវគ្គកើនឡើងខ្លាំងទីបីសម្រាប់ភាគហ៊ុននេះក្នុងឆ្នាំនេះ។ ដូច្នេះបច្ចុប្បន្នលោក Trump កាន់កាប់ភាគហ៊ុន ៦៥% នៃភាគហ៊ុនរបស់ Trump Media ដែលស្មើនឹង ១១៤.៧ លានភាគហ៊ុន។

តម្លៃនៃភាគហ៊ុនទាំងនេះគឺបានកើនឡើងពី ៣.៥ ពាន់លានដុល្លារកាលពីសប្តាហ៍មុនដល់ ៤.៦ ពាន់លានដុល្លារនាពេលបច្ចុប្បន្ន។ ហេតុនេះទ្រព្យសម្បត្តិរបស់អតីតប្រធានាធិបតីអាមេរិកគឺមានចំនួន ៦.៦ ពាន់លានដុល្លារអាមេរិក ដែលជួយឱ្យគាត់ត្រឡប់ទៅជាកំពូលអ្នកមានបំផុតទាំង ៥០០ នៅលើពិភពលោក។ ការកើនឡើងនៃតម្លៃភាគហ៊ុនរបស់ Trump Media កាលពីម្សិលមិញបានបង្ហាញថាអ្នកវិនិយោគមានទំនុកចិត្តកាន់តែខ្លាំងឡើងថា Trump នឹងឈ្នះការបោះឆ្នោតខែវិច្ឆិកាខាងមុខនេះ។

វិនិយោគិនបច្ចុប្បន្នព្យាករណ៍ថា ការប៉ុនប៉ងធ្វើឃាតដែលបរាជ័យ នៅថ្ងៃទី ១៣ ខែកក្កដានឹងផ្តល់ឱ្យ Trump នូវឱកាសកាន់តែខ្ពស់ក្នុងការឈ្នះការបោះឆ្នោត។ អ្នកជំនាញនិយាយថា កណ្តាប់ដៃរបស់លោក Trump បន្ទាប់ពីការប៉ុនប៉ងធ្វើឃាតដែលបរាជ័យរបស់លោកត្រូវបានចាត់ទុកថាជាកាយវិការបង្ហាញពីភាពក្លាហាន និងសមត្ថភាពរបស់លោកក្នុងការគ្រប់គ្រងស្ថានការណ៍ក្នុងគ្រាលំបាក។

គួរបញ្ជាក់ដែរថា Trump Media ត្រូវបានបង្កើតឡើងក្នុងឆ្នាំ ២០២១ និងដំណើរការបណ្តាញសង្គម Truth Social ដែលបង្កើតឡើងដោយ Trump ។ នៅចុងខែមីនា ក្រុមហ៊ុន Trump Media ត្រូវបានចុះបញ្ជីនៅ Nasdaq (សហរដ្ឋអាមេរិក) តាមរយៈការរួមបញ្ចូលគ្នាជាមួយ SPAC (ក្រុមហ៊ុនគោលបំណងពិសេស) ដែលហៅថា Digital World Acquisition Corp. Trump Media បច្ចុប្បន្នមានមូលធននីយកម្មចំនួន ៧.៧ ពាន់លានដុល្លារអាមេរិក៕

ប្រទេសវៀតណាម ៖ នៅថ្ងៃទី១៦ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា វាពិតជាដំណឹងដ៏គួរឱ្យរីករាយមួយសម្រាប់ពលរដ្ឋវៀតណាម គឺវៀតណាមបានប្រកាសទិញអគ្គិសនីផលិតពីបន្ទះសូឡានៅតាមលំនៅឋានពលរដ្ឋ និងអគារការិយាល័យ ។

បច្ចុប្បន្ននេះ ប្រទេសនានានៅលើពិភពលោក កំពុងតែផ្តល់ភាពសំខាន់លើការប្រើប្រាស់ថាមពលស្អាត ក្នុងនោះក៏មានប្រទេសវៀតណាមផងដែរ ។ វៀតណាមបានប្រកាសថា នឹងទិញអគ្គិសនីដែលផលិតលើសពីបន្ទះសូឡាតាមលំនៅឋានពលរដ្ឋ ដើម្បីលើកកម្ពស់ និងជំរុញឱ្យពលរដ្ឋប្រើប្រាស់ថាមពលស្អាតឱ្យបានពេញលេញ ។

ក្រុមហ៊ុនផ្គត់ផ្គង់អគ្គិសនីជាតិវៀតណាមបញ្ជាក់ថា ក្រុមហ៊ុនបានរៀបចំគម្រោងទិញអគ្គិសនីដែលផលិតលើសពីបន្ទះសូឡាតាមលំនៅឋានពលរដ្ឋ និងអគារការិយាល័យ ។ វាជាការព្យាយាមលើកចុងក្រោយរបស់ប្រទេសវៀតណាម ក្នុងការជំរុញឱ្យពលរដ្ឋទាំងអស់ប្រើប្រាស់ថាមពលស្អាត ។

ឧបនាយករដ្ឋមន្ត្រីវៀតណាមថ្លែងថា ក្រសួងឧស្សាហកម្ម និងពាណិជ្ជកម្ម នឹងពន្លឿនផែនការទិញអគ្គិសនីលើសពីបន្ទះសូឡានៅលើដំបូលផ្ទះពលរដ្ឋ គឺនឹងទិញក្នុងតម្លៃ៦៧១ដុងក្នុង១គីឡូវ៉ាត់ម៉ោង ។ ដូច្នេះ បើផែនការនេះទទួលបានការអនុម័តនោះ វាជាតម្លៃមួយដែលក្រុមហ៊ុនផ្គត់ផ្គង់អគ្គិសនីជាតិវៀតណាមអាចទិញអគ្គិសនីពីពលរដ្ឋ ក្នុងតម្លៃថោកជាងជិតពាក់កណ្តាល បើធៀបនឹងការទិញអគ្គិសនីពីកសិដ្ឋានផលិតអគ្គិសនីពីបន្ទះសូឡាធំៗ ។

ប្រទេសវៀតណាមបានកំណត់គោលដៅឱ្យលំនៅឋានពលរដ្ឋ និងអគារការិយាល័យនានា ត្រូវតែប្រើប្រាស់ថាមពលស្អាតពីបន្ទះសូឡាឱ្យបានពាក់កណ្តាលនៅឆ្នាំ២០៣០ ស្ថិតនៅក្រោមគម្រោងអភិវឌ្ឍន៍ថាមពល ដែលទទួលបានការអនុម័តពីរដ្ឋាភិបាលវៀតណាម កាលពីខែឧសភា ឆ្នាំ២០២៣ ។

សារព័ត៌មានវៀតណាម VnExpress រាយការណ៍ថា បច្ចុប្បន្ន វៀតណាមមានគម្រោងដំឡើងបន្ទះសូឡានៅលើដំបូលលំនៅឋាន និងអគារការិយាល័យ ឱ្យបានដល់១០៣.០០០គម្រោង ។ កាលពីសប្តាហ៍ទី២ ខែកក្កដា ឆ្នាំ២០២៤ រដ្ឋាភិបាលវៀតណាមបានអនុញ្ញាតឱ្យរោងចក្រនានាអាចទិញអគ្គិសនីដោយផ្ទាល់ពីផ្នែកផ្គត់ផ្គង់ថាមពលស្អាត តាមរយៈកិច្ចព្រមព្រៀងទិញថាមពល ៕

បរទេស៖ ចាប់ពីថ្ងៃទី១ ខែមករា ឆ្នាំ២០២៥ ខាងមុខនេះរថយន្តម៉ាស៊ូត នឹងមិនអាចចុះបញ្ជីស្របច្បាប់បានទៀតទេនៅក្នុងប្រទេសសិង្ហបុរី ដែលជាផ្នែកមួយនៃការជំរុញរបស់រដ្ឋាភិបាលក្នុងការឱ្យយានយន្តរត់លើដងផ្លូវទាំងអស់ប្រើប្រាស់ថាមពលស្អាតនៅត្រឹមឆ្នាំ ២០៤០។
យោងតាមសារព័ត៌មានបរទេស britcham ការផ្លាស់ប្តូរនេះត្រូវបានប្រកាសនៅក្នុងសភាតាំងពី ៣ ឆ្នាំមុនមកម្លេះ ហើយតាំងពីពេលនោះមកសមាមាត្រនៃការចុះបញ្ជីរថយន្តម៉ាស៊ូតថ្មីៗគឺស្ថិតក្រោម ១ ភាគរយនៃចំនួនរថយន្តចុះបញ្ជីសរុប។

ការហាមប្រាមនាពេលខាងមុខលើរថយន្តម៉ាស៊ូតកើតឡើងមុនពេលរថយន្តថ្មីទាំងអស់ ដែលបានចុះឈ្មោះនៅទីនេះតម្រូវឱ្យក្លាយជាគំរូថាមពលស្អាតជាងមុនចាប់ពីឆ្នាំ ២០៣០។ ដូច្នេះនៅពេលដែលម្ចាស់រថយន្តម៉ាស៊ូតដែលបានចុះបញ្ជីមុនថ្ងៃទី ១ ខែមករា ឆ្នាំ ២០២៥ នឹងអាចស្នើសុំលិខិតបញ្ជាក់ (COE) របស់ពួកគេបាន ប៉ុន្តែពួកគេនឹងត្រូវបង់ពន្ធផ្លូវខ្ពស់ជាងមុន ក្នុងគោលបំណងដើម្បីរារាំងការបន្ត។

នេះជាផ្នែកនៃគោលការណ៍ដែលមានស្រាប់ក្នុងការគិតថ្លៃបន្ថែមលើពន្ធផ្លូវពី ១០ ភាគរយទៅ ៥០ ភាគរយសម្រាប់យានជំនិះដែលមានអាយុលើសពី ១០ ឆ្នាំឡើងទៅ។ ទន្ទឹមនឹងនេះវាក៏ជាវិធានការទីមួយរបស់ប្រទេសក្នុងការបញ្ឈប់ការចុះបញ្ជីរថយន្តប្រើម៉ាស៊ីនម៉ាស៊ូតផងដែរ។ ចំណែកឯវិធានការបន្ទាប់ គឺចាប់ពីឆ្នាំ ២០៣០ តទៅ រថយន្តថ្មីៗដែលអាចចុះបញ្ជីបានគឺជារថយន្តដែលប្រើថាមពលស្អាត។

គួរបញ្ជាក់ដែរថា ការរឹតបន្តឹងលើរថយន្តប្រើម៉ាស៊ីនម៉ាស៊ូតនេះ គឺធ្វើឡើងចំពោះរថយន្តគ្រួសារ និងរថយន្តតាក់ស៊ី ដោយមិនគ្របដណ្តប់លើការនាំចូលរថយន្តចាស់ៗបែបក្លាស៊ីកនោះទេ។ ហេតុនេះគិតត្រឹមខែឧសភា ឆ្នាំ២០២៤ មានរថយន្តគ្រួសារ និងតាក់ស៊ី ចំនួនជិត ២ ម៉ឺនគ្រឿងរត់លើដងផ្លូវក្នុងប្រទេសសិង្ហបុរី ដែលប្រើម៉ាស៊ីនម៉ាស៊ូត។ ដូច្នេះក្នុងចំណោមរថយន្តទាំងអស់នៅសិង្ហបុរី គឺមាន ១៧% ដែលប្រើម៉ាស៊ីនម៉ាស៊ូត៕

បរទេស៖ ទោះបីជាកូរ៉េខាងត្បូងបច្ចុប្បន្នក្លាយជាប្រទេសអភិវឌ្ឍជឿនលឿនខ្លាំងក៏ដោយ ក៏ប្រជាជនវ័យចំណាស់រាប់រយពាន់នាក់នៅក្នុងប្រទេសនេះកំពុងប្រមូលដប និងក្រដាសដើម្បីរកប្រាក់ចំណូលបន្ថែម ក៏ដូចជាជួយកាត់បន្ថយបន្ទុកលើកូនចៅរបស់ពួកគេ។
ជាការពិតណាស់ ការប្រកបរបររើសអេតចាយគឺកំពុងទទួលបានការចាប់អារម្មណ៍ខ្លាំងពីសំណាក់មនុស្សចាស់ជនជាតិកូរ៉េ នេះបើយោងតាមស្ថិតិដែលចេញផ្សាយដោយក្រសួងសុខាភិបាល និងសុខុមាលភាពកូរ៉េ កាលពីពេលថ្មីៗនេះបានឱ្យដឹងថា ចាប់ពីខែកុម្ភៈ ដល់ខែឧសភា ឆ្នាំ ២០២៤ មានមនុស្សចាស់ជិត ១៥,០០០ នាក់បានប្រមូលដបសំរាម និងក្រដាសសំណល់នៅទូទាំងប្រទេសកូរ៉េ។

ដូច្នេះក្នុងចំណោមមនុស្សចាស់ ៦៥០ នាក់ដែលមានអាយុពី ៦៥ ឆ្នាំឡើងទៅគឺមានមនុស្សច្រើនជាងម្នាក់រើសអេតចាយ។ បើយោងតាមរបាយការណ៍ ទីក្រុងសេអ៊ូលគឺមានចំនួនមនុស្សចាស់ច្រើនជាងគេដែលកំពុងប្រកបរបររើសអេតចាយ ដែលមានចំនួន ២,៥០០ នាក់បន្ទាប់មកគឺខេត្ត Gyeonggi, South Gyeongsang និង Busan។ ហេតុនេះប្រាក់ចំណូលប្រចាំខែជាមធ្យមរបស់ពួកគេ រួមទាំងអត្ថប្រយោជន៍ និងប្រាក់សោធននិវត្តន៍គឺ ៧៦៦,០០០ វ៉ុន (ប្រមាណជាង ៥៥០ ដុល្លារអាមេរិក)។

ទោះយ៉ាងណា របាយការណ៍មិនបានបង្ហាញថាចំណូលនេះបានមកពីការរើសសំរាម ឬយ៉ាងណានោះទេ។ នៅឆ្នាំ ២០២៣ វិទ្យាស្ថានអភិវឌ្ឍន៍កម្លាំងពលកម្មកូរ៉េសម្រាប់មនុស្សចាស់ ដែលជាក្រុមហ៊ុនបុត្រសម្ព័ន្ធរបស់ក្រសួងសុខាភិបាល និងសុខុមាលភាព ក៏បានធ្វើការស្ទង់មតិចំនួន ១០៥ ក្នុងចំណោមហាងប្រមូលសំរាមជិត ៤,៣០០ នៅទូទាំងប្រទេស ដើម្បីប៉ាន់ប្រមាណចំនួនមនុស្សចាស់សរុបដែលចូលរួមក្នុងការប្រមូលសំរាម។

ការសិក្សាបានបង្ហាញថាអាយុជាមធ្យមនៃអ្នករើសអេតចាយគឺ ៧៦ ឆ្នាំ។ ក្នុងចំណោមពួកគេ សមាមាត្រនៃមនុស្សដែលរស់នៅតែម្នាក់ឯងមានច្រើនជាង ៣៦% ។ ជាមធ្យម អ្នកប្រមូលទាំងនេះធ្វើការ ៥.៤ ម៉ោងក្នុងមួយថ្ងៃ និង ៦ ថ្ងៃក្នុងមួយសប្តាហ៍ ហើយក្នុងមួយខែពួកគេរកបាន ១៥៩,០០០ វ៉ុន (ប្រមាណ ១១៤ ដុល្លារអាមេរិក) ដែលប្រាក់ចំណូលនេះគឺត្រឹមតែ ១២% នៃប្រាក់ឈ្នួលអប្បបរមាបច្ចុប្បន្នប៉ុណ្ណោះ។

សព្វថ្ងៃភាពក្រីក្រគឺកំពុងប៉ះពាល់ដល់ប្រជាជនវ័យចំណាស់នៅក្នុងប្រទេសកូរ៉េខាងត្បូង បើទោះបីជាប្រទេសនេះមានសេដ្ឋកិច្ចធំជាងគេទី ១៣ នៅលើពិភពលោក និងប្រាក់ចំណូលសម្រាប់មនុស្សម្នាក់ជិត ៣៣,៨០០ ដុល្លារដែលជាប់ចំណាត់ថ្នាក់ទី ២២ នៅទូទាំងពិភពលោកក៏ដោយ ក៏មនុស្សចាស់ជិត ៥៤% បាននិយាយថាពួកគេប្រមូលសំណល់អេតចាយដើម្បីចិញ្ចឹមជីវិត និងជាង ២៩% បាននិយាយថាពួកគេត្រូវការប្រាក់ក្នុងហោប៉ៅ។

យោងតាមអង្គការសហប្រតិបត្តិការសេដ្ឋកិច្ច និងអភិវឌ្ឍន៍ អត្រានៃភាពក្រីក្ររបស់កូរ៉េខាងត្បូងមានកម្រិត ៤០.៤% ក្នុងឆ្នាំ ២០២០។ តួលេខនេះគឺខ្ពស់បំផុតក្នុងចំណោមសមាជិក OECD ចំនួន ៣៧ និងខ្ពស់ជាង ២.៨ ដងបើធៀបជាមធ្យម ១៤.៤% សម្រាប់ប្រទេសដែលមានសេដ្ឋកិច្ចជឿនលឿនដូចជាសហរដ្ឋអាមេរិក ជប៉ុន អង់គ្លេស បារាំង និងអាល្លឺម៉ង់ផងដែរ៕

ប្រទេសថៃ ៖ សារព័ត៌មានថៃរាយការណ៍ថា មានការចែកចាយវីដេអូមួយក្នុងបណ្តាញសង្គម ដែលមានក្រុមអ្នករត់ម៉ូតូឌុបនៅឃុំប៉ាតង ស្រុកកាធូ ខេត្តភូកេត ប្រទេសថៃ បានព្រួតគ្នាវាយត.ប់ ភ្ញៀវទេសចរបរទេសម្នាក់ រហូតដល់សន្លប់នៅលើផ្លូវមុខហាងល្បីមួយកន្លែង ។ ហេតុការណ៍នេះបានកើតឡើងកាលពីវេលាម៉ោង៣ភ្លឺ ថ្ងៃទី១៥ ខែកក្កដា ឆ្នាំ២០២៤ ។

សមត្ថកិច្ចប្រចាំឃុំប៉ាតង និយាយថា សមត្ថកិច្ចបានទទួលសេចក្តីរាយការណ៍ពីពលរដ្ឋថា មានករណីឈ្លោះប្រកែកគ្នា និងធ្វើបាបរាងកាយនៅមុខហាង CENTRAL នៅផ្លូវរ៉ាជអុថីត ស្ថិតក្នុងឃុំប៉ាតង ដែលបណ្តាលឱ្យបុរសជនបរទេសរងរបួស ។ ហេតុនេះ សមត្ថកិច្ចក៏បញ្ជូនកងកម្លាំងចុះទៅត្រួតពិនិត្យនៅកន្លែងកើតហេតុ ប៉ុន្តែពុំឃើញជនរងគ្រោះទេ ពីព្រោះភ្នាក់ងារសង្គ្រោះបន្ទាន់បានបញ្ជូនទៅកាន់មន្ទីរពេទ្យប៉ាតង រួចរាល់ហើយ ។ រីឯជនរងគ្រោះឈ្មោះ លោក Turky Alazemi អាយុ៣០ឆ្នាំ សញ្ជាតិគុយវ៉ែត ។

ចំណែកជនល្មើសនៅចំណុចកើតហេតុមានគ្នាចំនួន៣នាក់ រួមមាន ៖
១-ឈ្មោះ ចតុផល ភេទប្រុស អាយុ៣៧ឆ្នាំ
២-ឈ្មោះ សៈយ៉ុមភូ ភេទប្រុស អាយុ២៥ឆ្នាំ និង
៣-ឈ្មោះ ថៈណាកន ភេទប្រុស អាយុ២៥ឆ្នាំ ។

សមត្ថកិច្ចក៏បានកត់ត្រាឈ្មោះ និងអាសយដ្ឋានរបស់ពួកគេទុកជាភស្តុតាង ប៉ុន្តែសមត្ថកិច្ចពុំទាន់ចាប់ខ្លួនជនល្មើសទាំង៣នាក់មកសាកសួរភ្លាមៗទេ ដោយរង់ចាំសាកសួរជនរងគ្រោះសិន មុនពេលហៅជនល្មើសមកសាកសួរតាមក្រោយ និងចោទប្រកាន់ពួកគេតាមផ្លូវច្បាប់បន្តទៀត ។ ជនបរទេសដែលត្រូវបានក្រុមម៉ូតូឌុបថៃព្រួតគ្នាវាយនេះ បានចេញពីមន្ទីរពេទ្យមកស្នាក់នៅក្នុងសណ្ឋាគារ និងពុំទាន់មកបង្ហាញខ្លួននៅស្ថានីយប៉ូលិសទេ ។

ក្រោយមក សមត្ថកិច្ចក៏បានហៅជនរងគ្រោះមកសួរនាំ ហើយជនរងគ្រោះនិយាយថា មុនកើតហេតុ ខ្លួនបានបើករថយន្តទៅចតនៅត្រង់ចំណតម៉ូតូឌុប ។ ពេលនោះ អ្នករត់ម៉ូតូហាមមិនឱ្យខ្លួនចតទេ ទើបខ្លួនថតវីដេអូពួកគេ ។ ប៉ុន្តែស្រាប់តែអ្នករត់ម៉ូតូឌុបទាំង៣នាក់ពុំពេញចិត្តនឹងខ្លួនថតវីដេអូ ទើបនាំគ្នាវាយខ្លួនតែម្តង ។

ហេតុនេះ សមត្ថកិច្ចក៏បានហៅជនល្មើសទាំង៣នាក់មកសាកសួរតាមក្រោយ ព្រមទាំងយកភស្តុតាងពីកាមេរ៉ាសុវត្ថិភាពមកឱ្យជនល្មើសមើលផងដែរ ។ សមត្ថកិច្ចបានចោទប្រកាន់ពីបទព្រួតគ្នាធ្វើបាបរាងកាយអ្នកដទៃរហូតរងរបួស ព្រមទាំងបញ្ជូនខ្លួនជនល្មើសទាំង៣នាក់ ទៅកាន់តុលាការខេត្តភូកេត នៅថ្ងៃទី១៦ ខែកក្កដា ។ ជនល្មើសសារភាពថា ដោយសារពួកគេខឹងនឹងភ្ញៀវទេសចររូបនេះចតរថយន្តនៅចំណតរបស់ម៉ូតូឌុប ថែមទាំងថតវីដេអូពួកគេទៀត ។

ហេតុការណ៍នេះធ្វើឱ្យមហាជនជាច្រើននាក់រិះគន់យ៉ាងខ្លាំងពីទង្វើពុំសមរម្យជាមួយភ្ញៀវទេសចរបរទេស ក្នុងនោះពលរដ្ឋថៃម្នាក់និយាយថា ៖ «ពិតជាលក់មុខមាត់ប្រទេសជាតិខ្លាំងណាស់! សមត្ថកិច្ចត្រូវចាប់ជនល្មើសដាក់ទោសដើម្បីកុំឱ្យប្រកបមុខរបរនេះទៀត ពីព្រោះវាធ្វើឱ្យអ្នកប្រកបរបរដូចគ្នាអាម៉ាស់មុខ» ។ រីឯពលរដ្ឋថៃម្នាក់ទៀតថា ៖ «ភ្ញៀវទេសចរបរទេសរូបនេះប្រហែលជារងរបួសមិនស្រាលទេ» ៕