វត្តភ្នៀតសិម្ពលី គឺជាអារាមស្ថានបុរាណមួយ ដែលមានប្រវត្តិជាង ៤០០ឆ្នាំមកហើយ តាំងពីសម័យលង្វែក ក្នុងរជ្ជកាលព្រះបាទចន្ទរាជា អតីតព្រះមហាក្សត្រខ្មែរដ៏មានរិទ្ធិអំណាចបារមីខ្លាំងពូកែមួយរូប (គ.ស.១៥១៦-គ.ស.១៥៦៦) ខណៈបច្ចុប្បន្ន វត្តនេះក៏មានបន្សល់ទុកនូវចេតីយបុរាណដ៏ធំស្កឹមស្កៃមួយផងដែរ។

វត្តភ្នៀតសិម្ពលី ដែលមានទីតាំងស្ថិតនៅក្នុងសង្កាត់ស្នោរ ខណ្ឌកំបូល រាជធានីភ្នំពេញ, វត្តដែលត្រូវបានគេជាក់ជាក់យ៉ាងមុតមាំថាបានកសាងឡើង តាំងពីសម័យលង្វែក ដែលមិនត្រឹមតែជាទីអារាមនៃព្រះពុទ្ធសាសនាប៉ុណ្ណោះទេ តែវត្តនេះក៏មានសេសសល់នូវសំណង់បុរាណ ដូចជា ចេតិយ ជាច្រើនកន្លែង។

នៅក្នុងទីអារាមវត្តភ្នៀតសិម្ពលីនេះដែរ គេបានប្រទះឃើញមានចេតិយដ៏ធំមួយ មានរចនាបថយ៉ាងល្អប្រណិត ស្ថិតនៅក្បែរព្រះវិហារ ខណៈវាត្រូវបានគេឲ្យដឹងថា ជាចេតីយដែលបានកសាងឡើងដោយព្រះបាទចន្ទរាជា។ យោងតាមការការលើកឡើងមួយចំនួនបានឲ្យដឹងថា ចេតីយនេះ គឺបានកសាងឡើងដើម្បីជាការលាបំណន់របស់ព្រះអង្គចន្ទរាជា ខ្លះទៀតថា ដើម្បីជាការឧទ្ទិសដល់លោកគ្រូរបស់ទ្រង់ ដែលជាចៅអធិការរបស់វត្តកាលពីជំនាន់នោះ។

ចេតីយបុរាណ ដ៏ធំស្កឹមស្កៃកំពូល៥ ដូចទៅនឹងរចនាបទប្រាសាទអង្គវត្ត កសាងឡើងដោយឥដ្ឋបូកថ្មបាយអ ទើបត្រូវបានជួសជុលរួចរាល់កាលពីខែកុម្ភៈ ឆ្នាំ២០២០ កន្លងទៅនេះ ដែលវាគឺជាភស្តុតាងបញ្ជាក់ថា វត្តភ្នៀតសិម្ពលី មានអាយុកាលរហូតដល់ជាង ៤០០ឆ្នាំ ផងដែរ។

បើយោងតាម ព្រះសិរីកោសល សុំ សុខា បានមានថេរដីកាបញ្ជាក់យ៉ាងដូច្នេះថា «ចំពោះប្រវត្តិរឿងរ៉ាវរបស់វត្តភ្នៀតសិម្ពលី វត្តនេះគឺមានអាយុកាលជាង៤០០ឆ្នាំមកហើយ ដែលបានកកើតសម័យសតវត្សទី១៦ ក្នុងគ្រាដែលព្រះបាទចន្ទរាជា ស្ដេចទ្រង់គ្រងនគរកម្ពុជានេះ ជាព្រះមហាក្សត្រ។ អតីតព្រះចៅអធិការជំនាន់ទី១ ត្រូវជាគ្រូរបស់ព្រះបាទចន្ទរាជាផ្ទាល់ ដែលបច្ចុប្បន្នមាននៅសល់ទីតាំងមួយគឺព្រះចេតិយបុរាណនៅខាងមុខព្រះវិហារដ៏ស្រស់ស្អាតនេះគឺជាមរតកនៃព្រះចន្ទរាជាដែលទ្រង់បានសាងថ្វាយចំពោះ ព្រះពុទ្ធសាសនា និង គ្រូរបស់ព្រះអង្គ»។

គួរបញ្ជាក់ផងដែរថា វត្តភ្នៀតសិម្ពលី មានទំហំ ៣៣ហិចតា និង៣០អារ ខណៈបច្ចុប្បន្នបាននឹងកំពុងក្លាយទីតាំងដ៏ល្បីល្បាញបំផុត សម្រាប់សិក្សាពីធម៌ វិន័យរបស់ព្រះពុទ្ធ ក៏ដូចជា ជាកន្លែងពុទ្ធបរិស័ទ្ធមកពីទីជិតទីឆ្ងាយ មកធ្វើបុណ្យទានជាដើម។ ដោយសង្កេតឃើញថា វត្តនេះបាននឹងកំពុងមានការអភិវឌ្ឍជាហូរហែរ តែងមានរៀបចំពិធីបុណ្យព្រះពុទ្ធសាសនា ថ្នាក់ជាតិធំៗមិនដែលដាច់នោះឡើយ៕

ប្រទេសម៉ិកស៊ិក ៖ ប្រាសាទ Kukulcan ឬត្រូវបានគេស្គាល់ឈ្មោះថា ប្រាសាទ El Castillo គឺជាប្រាសាទពីរ៉ាមីតមួយ ដែលមានលក្ខណៈជាកាំជណ្តើរដ៏ល្បីល្បាញបំផុតនៅទីក្រុងបុរាណរបស់ម៉ិកស៊ិក ឈ្មោះ Chichén-Itzá ។ ប្រាសាទនេះបានទាក់ទាញចំណាប់អារម្មណ៍ភ្ញៀវទេសចរមកពីជុំវិញពិភពលោក ដោយសារមានការបង្ហាញស្រមោលសត្វពស់វារលើកាំជណ្តើរប្រាសាទ ។

ប្រាសាទដ៏ល្បីល្បាញនេះត្រូវបានកសាងឡើង ចាប់ពីសតវត្សរ៍ទី៩ ដល់ទី១២ ដើម្បីថ្វាយដល់ព្រះអាទិទេព១អង្គ ព្រះនាម Kukulcan របស់ជនជាតិម៉ាយ៉ា ។ ព្រះអាទិទេពអង្គនេះមានព្រះកាយស្រដៀងគ្នានឹងសត្វពស់ដុះសាប ។

អ្វីដែលធ្វើឱ្យប្រាសាទនេះមានភាពលេចធ្លោបំផុតនោះ គឺភាពជាក់លាក់ផ្នែកតារាសាស្ត្រ និងមានស្ថាបត្យកម្មដ៏ល្អប្រណីត ។ រីឯនៅផ្នែកទាំង៤ របស់ប្រាសាទ គឺមានកាំជណ្តើរសរុបចំនួន៣៦៥ជាន់ ដែលចំនួនកាំជណ្តើរ គឺស្មើគ្នានឹងចំនួនថ្ងៃក្នុងរយៈពេល១ឆ្នាំដែរ ។

ក្នុងអំឡុងពេលដែលពេលថ្ងៃ ដែលមានរយៈពេលស្មើគ្នាជាមួយពេលយប់ គឺស្រមោលចាំងនៅលើកាំជណ្តើរប្រាសាទនេះ នឹងបង្កើតជាស្រមោលសត្វពស់វារចុះពីលើប្រាសាទ ។ វាជារូបភាពមួយគួរឱ្យចាប់អារម្មណ៍ និងទាក់ទាញការចាប់អារម្មណ៍ពីភ្ញៀវទេសចរយ៉ាងច្រើនមកពីជុំវិញពិភពលោក ។

ភ្ញៀវទេសចរមកកម្សាន្តនៅទីក្រុងបុរាណ Chichén-Itzá របស់ប្រទេសម៉ិកស៊ិក ពួកគេអាចឡើងតាមកាំជណ្តើរទៅកាន់កំពូលប្រាសាទ ដើម្បីមើលទេសភាពនៅជុំវិញ និងស្របយកខ្យល់អាកាសផងដែរ ខណៈនៅទីនេះ ធ្លាប់ជាមជ្ឈមណ្ឌលវប្បធម៌ និងសាសនារបស់ជនជាតិម៉ាយ៉ា ។ ការឡើងលើកាំជណ្តើរប្រាសាទ ពុំត្រឹមតែបានបង្ហាញពីសមត្ថភាពប៉ុណ្ណោះទេ ប៉ុន្តែភ្ញៀវទេសចរហាក់បានធ្វើដំណើរទៅកាន់តំបន់ប្រវត្តិសាស្ត្រ និងវប្បធម៌ដ៏សំខាន់របស់សម័យបុរាណ ។

ក្រៅពីនេះ ទីក្រុងបុរាណ Chichén-Itzá ក៏ស្ថិតក្នុងចំណោមទីកន្លែងអច្ឆរិយៈថ្មីចំនួន៧ របស់ពិភពលោក ព្រមទាំងត្រូវបានអង្គការយូណេស្កូចុះបញ្ជីជាសម្បត្តិបេតិកភណ្ឌពិភពលោក ។ ហេតុនេះ វាកាន់តែធ្វើឱ្យទីនេះក្លាយជាតំបន់ទេសចរណ៍ពុំគួរមើលរំលងសម្រាប់ភ្ញៀវទេសចរ ដែលចាប់អារម្មណ៍ពីប្រវត្តិសាស្ត្រ និងវប្បធម៌បុរាណ ៕

ខេត្តសៀមរាបរបស់ប្រទេសកម្ពុជាយើងគឺបានជាប់ចំណាត់ថ្នាក់លេខ ៤ ជាគោលដៅទេសចរណ៍ដែលមានសុវត្ថិភាពបំផុតនៅអាស៊ីអាគ្នេយ៍ បន្ទាប់ពីសិង្ហបុរី ម៉ាឡេស៊ី និងវៀតណាម នេះបើយោងតាមការចុះផ្សាយរបស់ Lonely Planet ដែលជាគេហទំព័រមគ្គុទ្ទេសក៍ទេសចរណ៍ឈានមុខគេនៅក្នុងប្រទេសអូស្ត្រាលី។ កាលពីថ្ងៃទី១២ ខែកក្កដា ឆ្នាំ២០២៤ គេហទំព័រនេះបានប្រកាសបញ្ជីគោលដៅទេសចរណ៍ដែលមានសុវត្ថិភាពបំផុតសម្រាប់អ្នកដំណើរទោល ឬអ្នកដែលធ្វើដំណើរតែម្នាក់ឯង។

ក្នុងនោះប្រទេសសិង្ហបុរីជាប់ចំណាត់ថ្នាក់លេខ ១ ខណៈទីក្រុង Penang ប្រទេសម៉ាឡេស៊ីជាប់ចំណាត់ថ្នាក់លេខ ២ និងទីក្រុង Danang ប្រទេសវៀតណាមជាប់ចំណាត់ថ្នាក់លេខ ៣ ដោយខេត្តសៀមរាបរបស់ប្រទេសកម្ពុជាយើងជាប់ចំណាត់ថ្នាក់លេខ ៤ ។ ហើយសម្រាប់ទីក្រុងបាងកកប្រទេសថៃ និងទីក្រុងហាណូយប្រទេសវៀតណាម ក៏ដូចជាកោះបាលីប្រទេសឥណ្ឌូនេស៊ី គឺបានជាប់ចំណាត់ថ្នាក់លេខ ៥,៦,៧ រៀងគ្នា។ ហេតុនេះសម្រាប់អ្នកទេសចរដែលចូលចិត្តធ្វើដំណើរម្នាក់ឯង អាចមកទស្សនាកន្លែងទាំងនេះបាន ព្រោះជាគោលដៅដែលមានសុវត្ថិភាពបំផុតនៅអាស៊ីអាគ្នេយ៍។

ជាការពិតណាស់សៀមរាបគឺជាខេត្តមួយដែលមានសណ្តាប់ធ្នាប់ល្អ ប្រកបដោយសីលធម៌ និងមានរបៀបរៀបរយត្រឹមត្រូវបំផុត។ ខេត្តនេះបច្ចុប្បន្នកំពុងប្រែក្លាយទៅជាក្រុងទំនើបតាមរយៈកំណើនសណ្ឋាគារ ភោជនីយដ្ឋាន ហាងលក់ទំនិញ ដែលបម្រើឱ្យវិស័យទេសចរណ៍។ ខេត្តសៀមរាបគឺជាតំបន់ទេសចរណ៍ដ៏សំខាន់បំផុតមួយរបស់ប្រទេសកម្ពុជា ដោយសារខេត្តនេះមានប្រាសាទអង្គរវត្តដ៏ល្បីល្បាញ និងប្រាសាទបុរាណជាច្រើនផ្សេងទៀតបង្កប់ដោយប្រវត្តិសាស្ត្រស៊ីជម្រៅ។

នៅក្បែរក្រុងសៀមរាបមានរមណីយដ្ឋានជាច្រើនដូចជារាជធានីអង្គរធំ ប្រាសាទអង្គរវត្ត ប្រាសាទបាយ័ន ប្រាសាទភ្នំបាខែង ប្រាសាទបក្សីចាំក្រុង ប្រាសាទបាពួន ប្រាសាទភិមានអាកាស ប្រាសាទបន្ទាយស្រី ប្រាសាទតាព្រហ្ម និងប្រាសាទរាប់រយផ្សេងទៀត។ តំបន់សៀមរាបអង្គរគឺជាគោលដៅចម្បងសម្រាប់ភ្ញៀវទេសចរទូទាំងពិភពលោក ហើយក៏ជាតំបន់ដែលសម្បូរទៅដោយសំណង់ប្រាសាទបុរាណតូចធំជាច្រើន ដែលជាទីស្ថានរបស់ពពួកអាទិទេពទាំងឡាយទាំងពួងផងដែរ៕

ប្រទេសចិន ៖ យោងតាមការស្ទង់មតិថ្មីមួយបង្ហាញថា ១ឆ្នាំទៀត ចិននឹងក្លាយជាប្រទេសនាំមុខគេលើពិភពលោក ផ្នែកប្រើប្រាស់បច្ចេកវិទ្យា AI បន្ទាប់ពីបច្ចេកវិទ្យានេះបានរីកចម្រើនគួរឱ្យកត់សម្គាល់នៅចិន ។ វាជំរុញដោយដំណើរការរបស់កម្មវិធី ChatGPT របស់ OpenAI នៅចុងឆ្នាំ២០២២ កន្លងមក ។

ការស្ទង់មតិនេះរៀបចំឡើងដោយក្រុមហ៊ុន AI និងក្រុមហ៊ុនវិភាគកម្មវិធីរបស់អាមេរិក (SAS) និង Coleman Parkes Research ដោយបានស្ទង់មតិបុគ្គលមានអំណាចសម្រេចចិត្ត ចំនួន១.៦០០នាក់ ។ បុគ្គលទាំងនេះធ្វើការក្នុងឧស្សាហកម្មផ្សេងៗលើពិភពលោក ហើយអ្នកឆ្លើយតបការស្ទង់មតិនៅចិន៨៣% និយាយថា ពួកគេប្រើប្រាស់ Generative AI ។

ចំនួននេះ គឺខ្ពស់ជាង៦៥% របស់ចំនួនអ្នកឆ្លើយតបការស្ទង់មតិមកពី១៦ប្រទេស និងតំបន់ផ្សេងទៀត ព្រមទាំងសហរដ្ឋអាមេរិកផងដែរនិយាយថា ពួកគេបានប្រើប្រាស់ Generative AI ហើយមធ្យមភាគសកល ស្មើនឹង៥៤% ។

ការស្ទង់មតិខាងលើបានសាកសួរមនុស្សធ្វើការក្នុងផ្នែកនានា ដូចជា ៖ ធនាគារ, ការធានារ៉ាប់រង, ការថែទាំសុខភាព, ទូរគមនាគមន៍, ការផលិត, ការលក់រាយ និងថាមពល ។ ការស្ទង់មតិបង្ហាញទៀតថា ស្ថាប័ននានានៅអាមេរិកបាននាំមុខគេផ្នែកយកបច្ចេកវិទ្យា Generative AI មកប្រើប្រាស់ទាំងស្រុង ស្មើនឹង២៤% ខណៈចិន ស្មើ១៩% និងអង់គ្លេស ស្មើ១១% ។

រយៈពេលប៉ុន្មានឆ្នាំកន្លងមកនេះ ការប្រើប្រាស់បច្ចេកវិទ្យា AI របស់ចិនបានទទួលជោគជ័យផ្នែកច្នៃប្រឌិតបច្ចេកវិទ្យា, ការផលិតទំនិញ, ការប្រើប្រាស់ក្នុងឧស្សាហកម្ម និងផ្នែកផ្សេងទៀត ។ ផ្នែកទាំងនេះបានបង្ហាញលក្ខណៈពិសេសថ្មី ព្រមទាំងការអភិវឌ្ឍបច្ចេកវិទ្យាថ្មីៗយ៉ាងឆាប់រហ័ស ។

កាលពីដើមខែកក្កដា ឆ្នាំ២០២៤ របាយការណ៍របស់អង្គការកម្មសិទ្ធិបញ្ញាពិភពលោក របស់អង្គការសហប្រជាជាតិបង្ហាញថា ចិនជាប្រទេសនាំមុខគេផ្នែកប្រកួតប្រជែងប៉ាតង់ GenAI ដោយបានចុះបញ្ជីប៉ាតង់រហូតដល់ជាង៣៨.០០០ច្បាប់ គិតចាប់ពីឆ្នាំ២០១៤ ដល់ឆ្នាំ២០២៣ ខណៈរយៈពេលដូចគ្នានឹង អាមេរិកស្មើត្រឹមតែ៦.២៧៦ច្បាប់ ។

បច្ចុប្បន្ន ប្រទេសចិនមានក្រុមហ៊ុន AI ស្មើជាង៤.៥០០ក្រុមហ៊ុន ហើយទឹកប្រាក់វិនិយោគរបស់ក្រុមហ៊ុន AI នៅឆ្នាំ២០២៣ ស្មើប្រមាណ៧៩ពាន់៥រយលានដុល្លារអាមេរិក កើនឡើង១៣,៩% បើប្រៀបធៀបប្រចាំឆ្នាំ ។ នេះបើយោងតាមការដកស្រង់ពីទិន្នន័យផ្លូវការ ៕

ប្រទេសចិន៖ ចានសេរ៉ាមិចមួយកំពុងផ្ទុះការចាប់អារម្មណ៍យ៉ាងខ្លាំងនៅក្នុងប្រទេសចិន បន្ទាប់ពីវាត្រូវបានគេដេញថ្លៃរហូតដល់ ៤០ លានដុល្លារអាមេរិក។
យោងតាមសារព័ត៌មានបរទេស The Value ដែលបានចុះផ្សាយកាលពីថ្ងៃទី២១ ខែកក្កដា ឆ្នាំ២០២៤ ថាចានសេរ៉ាមិចមួយនេះត្រូវបានគេដាក់បង្ហាញនៅទីក្រុងហុងកុង ដោយទទួលបានការចាប់អារម្មណ៍យ៉ាងខ្លាំងពីសំណាក់មហាសេដ្ឋី ដោយសារចានសេរ៉ាមិចគឺជាវត្ថុបុរាណដែលមានអាយុកាល ១០០០ ឆ្នាំ។

វត្ថុបុរាណនេះត្រូវបានគេច្នៃឡើងក្នុងកំឡុងរាជវង្សសុង ខាងជើងពីឆ្នាំ (៩៦០-១១២៧) ដើម្បីបម្រើរាជវាំង ដែលវាមានពណ៌ខៀវអមជាមួយរូបរាងប្រេះស្រាំដូចជាត្បូង ទំហំ ១៣ សង់ទីម៉ែត្ររាងដូចចានរាក់។ នៅសម័យបុរាណ សេរ៉ាមិចប្រភេទនេះច្រើនតែប្រើសម្រាប់ដាក់ទឹកដើម្បីលាងជក់ ដោយអ្នកស្រាវជ្រាវជឿថាសេរ៉ាមិចនេះបានឆ្លងកាត់ប្រវត្តិសាស្រ្តអស់ជាច្រើនឆ្នាំមកហើយ។ ចានបុរាណដែលមានអាយុកាល ១០០០ ឆ្នាំគឺពិតជាមានប្រជាប្រិយភាពខ្លាំងណាស់សម្រាប់អ្នកដែលចូលចិត្ត និងស្រឡាញ់វត្ថុប្រវត្តិសាស្ត្រ។

ចាននេះត្រូវបានដេញថ្លៃដោយមហាសេដ្ឋីជនជាតិចិនម្នាក់គឺលោក Liu Ich Khiem ក្នុងតម្លៃ ៤០ លានដុល្លារអាមេរិក ដែលលោកគឺជាអ្នកប្រមូលទិញដ៏ល្បីមួយរូបរបស់ពិភពលោក តែងតែចូលរួមក្នុងការដេញថ្លៃវត្ថុបុរាណតាំងពីឆ្នាំ ១៩៩៣ រហូតមកដល់បច្ចុប្បន្ន។ លោកបានមានប្រសាសន៍ថា រហូតមកដល់ពេលនេះ ៩៩% នៃវត្ថុបុរាណរបស់ប្រវត្តិសាស្ត្រជាច្រើនសុទ្ធតែបានមកពីការដេញថ្លៃទាំងអស់ ដោយលោកបានថែរក្សាវាយ៉ាងល្អបំផុតនៅក្នុងសារមន្ទីឯកជនមួយរបស់លោក។

គួរបញ្ជាក់ដែរថា បន្ទាប់ពីការដេញថ្លៃជាង ៣០ ឆ្នាំមកលោក Liu Ich Khiem គឺបានក្លាយជាបុគ្គលដ៏សំខាន់បំផុតមួយនៅក្នុងទីផ្សារសិល្បៈវប្បធម៌ចិន។ លោក Liu Ichqian មានអាយុ ៦១ ឆ្នាំមកពីទីក្រុងសៀងហៃ ធ្លាប់ធ្វើការជាអ្នកបើកតាក់ស៊ី ប៉ុន្តែលោកក៏បានប្រែខ្លួនក្លាយជាមហាសេដ្ឋីដោយការលេងភាគហ៊ុន ជួញដូរអចលនទ្រព្យ និងឱសថ។ យោងតាមស្ថិតិពីក្រុមហ៊ុនស្រាវជ្រាវ Hurun មហាសេដ្ឋីរូបនេះគឺមានទ្រព្យសម្បត្តិសុទ្ធ ៣៤.៥ ពាន់លានយន់ (ប្រមាណ ៤.៧ ពាន់លានដុល្លារអាមេរិក)៕

ប្រទេសអូស្ត្រាលី ៖ លោក James Harrison (ឬត្រូវបានគេហៅថា Man with the Golden Arm) គឺជាបុរសជនជាតិអូស្ត្រាលី ដែលបានបរិច្ចាគឈា.ម ច្រើនបំផុតនៅលើពិភពលោក ។ លោកបានបរិច្ចាគឈា.ម រហូតដល់ចំនួន១.១៧៣លើក និងអាចជួយសង្គ្រោះជីវិតកុមា.រ ជាង២លាននាក់ ។ ហេតុអ្វីទើបលោកសម្រេចចិត្តបរិច្ចាគឈាមជាច្រើនលើកបែបនេះ?

កាលពីឆ្នាំ១៩៥១ នៅពេលលោក James Harrison មានអាយុ១២ឆ្នាំ លោកបានទទួលការវះកាត់នៅមន្ទីរពេទ្យមួយកន្លែង ។ ពេលនោះ គ្រូពេទ្យបានវះកាត់យកសួតរបស់លោកចេញពីក្នុងខ្លួន ដើម្បីជួយសង្គ្រោះជីវិតលោក ហើយធ្វើឱ្យលោកត្រូវសម្រាកនៅមន្ទីរពេទ្យរហូតដល់ទៅ៣ខែ ។ ពេលលំបាកនេះហើយ ដែលធ្វើឱ្យលោកអាចរៀនសូត្រថា លោកអាចរស់នៅបន្តទៀតបាន ដោយសារលោកទទួលឈាមយ៉ាងច្រើនពីអ្នកបរិច្ចាគ ។

ហេតុនេះ លោកក៏សម្រេចចិត្តថា នៅថ្ងៃណាមួយ លោកនឹងអាចបរិច្ចាគឈាមរបស់ខ្លួនជួយសង្គ្រោះជីវិតអ្នកដទៃដែរ ។ ប៉ុន្តែច្បាប់របស់អូស្ត្រាលីនាពេលនោះបញ្ជាក់ថា ពលរដ្ឋអាចបរិច្ចាគឈាមបាន លុះត្រាតែមានអាយុចាប់ពី១៨ឆ្នាំឡើងទៅ ។ ហេតុនេះ លោកត្រូវរង់ចាំរហូតដល់លោកមានអាយុគ្រប់១៨ឆ្នាំ ទើបអាចបរិច្ចាគឈាមលើកដំបូងបាន ។

ចាប់តាំងពីពេលនោះមក អស់រយៈពេលជាង៦០ឆ្នាំ លោកបានបរិច្ចាគឈាមរបស់ខ្លួនទៅឱ្យកាកបាទក្រហមអូស្ត្រាលី រហូតដល់ចំនួន១.១៧៣លើក ក្នុងនោះការបរិច្ចាគឈាមពីដៃស្តាំ ស្មើនឹង១.១៦៣លើក និងដៃឆ្វេង ស្មើនឹង១០លើក ។ កាកបាទក្រហមអូស្ត្រាលីបានបូកសរុបចំនួនមនុស្ស ដែលលោក James Harrison បានបរិច្ចាគឈាមជួយសង្គ្រោះជីវិត គឺស្មើរហូតដល់២លាន៤សែននាក់ ។

ជីវិតរបស់លោក James Harrison គឺលោកបានផ្តោតទៅលើការបរិច្ចាគឈាមជាចម្បង ពីព្រោះមិនត្រឹមតែលោកបានបរិច្ចាគឈាមច្រើនតែម្យ៉ាងទេ ប៉ុន្តែក្នុងឈាមរបស់លោកមានផ្ទុកនូវសារធាតុម្យ៉ាងពិបាកស្វែងរកបំផុត ។ នៅឆ្នាំ១៩៦០ ក្រុមគ្រូពេទ្យក៏បានយកឈាមរបស់លោកទៅធ្វើការពិសោធន៍ រហូតដល់អាចផលិតវ៉ាក់សាំងឈ្មោះថា «អេនទិប៊ី» ដោយជោគជ័យ ។

នាពេលនោះ ស្ត្រីអូស្ត្រាលីជាច្រើននាក់បានសម្រេចចិត្តយកកូនចេញ ដោយសារទារកមានបញ្ហាខួរក្បាលបណ្តាលមកពីជំងឺមួយឈ្មោះថា «ឌុយសាស់ឌីសេស» ។ វាជាជំងឺកើតឡើងដោយសារក្រុមឈាមអាអេស ពុំដូចគ្នា ទើបធ្វើឱ្យឈាមរបស់ម្តាយបំផ្លាញគ្រាប់ឈាមទារក ដែលទទួលបានពីឪពុកមានឈាមអាអេស ខុសគ្នា ។

ហេតុនេះ វ៉ាក់សាំង «អេនទិប៊ី» បានជួយព្យាបាលជំងឺដ៏គួរឱ្យខ្លាចនេះ ហើយលោក James Harrison និយាយថា ៖ «ខ្ញុំនឹងបរិច្ចាគឈាមបន្តទៀត បើពួកគេអនុញ្ញាតឱ្យខ្ញុំបរិច្ចាគ» ។ ប៉ុន្តែបច្ចុប្បន្ន លោកពុំអាចបរិច្ចាគឈាមបន្តទៀតទេ ដោយសារលោកមានអាយុច្រើន ហើយអ្វីដែលលោកត្រូវធ្វើបន្តទៀតនោះ គឺថែទាំសុខភាពឱ្យបានល្អ ៕

នៅពេលដែលយើងប្រើប្រាស់ iPhone យូរទៅៗថ្មរបស់វានឹងប្រែប្រួលតាមពេលវេលា ដោយអ្នកប្រើប្រាស់អាចពិនិត្យមើលស្ថានភាពថ្មរបស់ iPhone ដោយចូលទៅកាន់ Settings រួចចុចលើពាក្យ Battery នោះអ្នកនឹងឃើញស្ថានភាពថ្មរបស់វាហើយ។ បើយោងក្រុមហ៊ុន Batteries Plus សុខភាពថ្មល្អបំផុតរបស់ iPhone គឺ ១០០% ប៉ុន្តែបើវាធ្លាក់ក្រោម ៨០% នោះមានន័យថាថ្មរបស់អ្នកនឹងខូចហើយ។ ទោះបីជាយ៉ាងនេះ វាមិនទាន់ហួសពេលទេប្រសិនបើអ្នកអនុវត្តវិធីសាស្ត្រដូចខាងក្រោម នឹងជួយពន្យារអាយុសុខភាពថ្មរបស់អ្នកឱ្យនៅឋេរ មានន័យថាថ្មរបស់អ្នកនឹងមិនធ្លាក់ចុះទៀតទេ ប៉ុន្តែប្រសិនបើអ្នកមិនធ្វើតាមការណែនាំ នោះថ្ម iPhone របស់អ្នកនឹងធ្លាក់ចុះជាបន្តបន្ទាប់។ ដូច្នេះដើម្បីថែរក្សាថ្មឱ្យនៅឋេរអ្នកគួរអនុវត្តវិធីទាំងនេះ៖

១.សាកថ្មឥតខ្សែ៖ ការសាកឥតខ្សែគឺមានភាពងាយស្រួល និងល្អបំផុតសម្រាប់ថែរក្សាសុខភាពថ្ម iPhone របស់អ្នកឱ្យនៅឋេរ ដោយអ្នកប្រើគ្រាន់តែដាក់ iPhone នៅលើកន្លែងសាកថ្មជាការស្រេច។ ទោះជាយ៉ាងណាអ្នកជំនាញក៏បានណែនាំឱ្យអ្នកប្រើប្រាស់កំណត់ការសាកឥតខ្សែ ហើយប្រើការសាកតាមខ្សែនៅពេលណាដែលអាចធ្វើទៅបាន មានន័យថាអ្នកត្រូវផ្លាស់ប្តូរការសាកថ្មទាំងមានខ្សែផង និងអត់ខ្សែផងទើបជាការល្អ។

២.កំណត់ការសាកថ្មលឿន៖ នៅពេលអ្នកប្រញាប់ ការសាកថ្មលឿនគឺជាដំណោះស្រាយដ៏ល្អបំផុតសម្រាប់ iPhone ដើម្បីទទួលបានថ្មពេញយ៉ាងឆាប់រហ័ស។ ប៉ុន្តែអ្នកប្រើប្រាស់ក៏ត្រូវកំណត់ផងដែរ ដោយសារការសាកថ្មលឿននឹងបង្កើតកំដៅច្រើនជាងការសាកថ្មធម្មតា ក៏ដូចជាដាក់សម្ពាធយ៉ាងខ្លាំងទៅលើសុខភាពថ្ម និងកាត់បន្ថយភាពធន់។ ហេតុនេះអ្នកប្រើគួរតែសាកថ្មលឿនក្នុងពេលមានអាសន្នប៉ុណ្ណោះ សម្រាប់ការសាកថ្មប្រចាំថ្ងៃ វិធីសាស្ត្រសាកថ្មយឺតគឺល្អបំផុត។

៣.ត្រូវទុកដាក់ iPhone នៅកន្លែងមានសីតុណ្ហភាពមធ្យម៖ ជាការពិតណាស់ iPhone មិនមែនចេះតែទុកដាក់ខុសរបៀបនោះទេ ប្រសិនបើសីតុណ្ហភាពខ្ពស់អាចបង្កើនល្បឿននៃប្រតិកម្មគីមីខាងក្នុង ដែលបណ្តាលឱ្យថ្មខូចកាន់តែលឿន ខណៈពេលដែលសីតុណ្ហភាពទាបកាត់បន្ថយដំណើរការ និងសមត្ថភាពថ្ម។ ដូច្នេះហើយ អ្នកប្រើគួរតែចៀសវាងការដាក់ iPhone ទៅនឹងពន្លឺព្រះអាទិត្យញឹកញាប់ ឬកន្លែងដែលមានប្រភពកំដៅខ្ពស់ ឬទាបពេក។

៤.សាកថ្មឱ្យពេញត្រឹមតែ ៨០%៖ យោងតាម Pocket-link ដែនកំណត់សមត្ថភាពល្អបំផុតនៃថ្ម iPhone គឺស្ថិតនៅក្នុងចន្លោះពី ២០ ទៅ ៨០% ។ ការសាកថ្មរហូតដល់ ១០០% ពេញជារៀងរាល់ថ្ងៃអាចដាក់ “សម្ពាធ” បន្ថែមលើថ្ម ដោយហេតុនេះកាត់បន្ថយដំណើរការ និងបង្កើនល្បឿនដំណើរការចាស់នៃថ្ម។ ដូច្នេះហើយ អ្នកប្រើប្រាស់គួរតែសាកថ្មទូរស័ព្ទរបស់ពួកគេឱ្យបានប្រហែល ៨០% ហើយបើកមុខងារ Optimum Charging ដើម្បីការពារ iPhone មិនឱ្យលើសពីកម្រិតនេះ។

ទោះជាយ៉ាងណាក៏ដោយ អេក្រង់ក៏ជាផ្នែកមួយដែលប្រើប្រាស់ថាមពលច្រើនបំផុតនៅលើទូរស័ព្ទផងដែរ។ ដើម្បីជួយឱ្យថ្ម iPhone ប្រើប្រាស់បានយូរ អ្នកអាចប្រើប្រាស់មុខងារ Auto Brightness ដើម្បីកែតម្រូវកម្រិតពន្លឺអេក្រង់ អាស្រ័យលើបរិយាកាសជុំវិញ។ ក្រៅពីនេះ អ្នកក៏គួរបិទមុខងារដែលស៊ីថ្មពេលមិនប្រើដូចជាទីតាំង, Bluetooth, ឬ Wifi ជាដើម។

ក្នុងករណីដែលសមត្ថភាពថ្មមានកម្រិតទាប ប៉ុន្តែមិនមានប្រភពសាកទេ មុខងារ Low Power Mode អាចត្រូវបានបើក។ សម្រាប់ iPhones ដែលមានអេក្រង់ OLED ការបើកមុខងារ Dark Mode ជួយសន្សំសំចៃថាមពលបានកាន់តែច្រើន ដោយសារបន្ទះ OLED ប្រើប្រាស់ថាមពលតិចនៅពេលបង្ហាញពណ៌ងងឹត។ លើសពីនេះ អ្នកប្រើប្រាស់ក៏ត្រូវបានណែនាំឱ្យធ្វើបច្ចុប្បន្នភាពទូរស័ព្ទ iPhone របស់ពួកគេឱ្យបានទៀងទាត់ ដោយសារការអាប់ដេតកម្មវិធីជារឿយៗរួមបញ្ចូលការបង្កើនប្រសិទ្ធភាពថ្មផងដែរ៕