កំពូលរថយន្ត Ford Ranger Raptor បានទទួលជ័យជំនះសារជាថ្មីម្តងទៀតហើយ!

July 22, 2024

កាលពីថ្ងៃទី10 ខែមិថុនា ឆ្នាំ2024 នៅឯប្រទេសអូស្រ្តាលី, កំពូលរថយន្ត Ford Ranger Raptor លេខរៀង 773 ដែលធ្លាប់បានទទួលជ័យជំនះក្នុងកម្មវិធី 2023 Finke Desert Race និងកម្មវិធី 2022 SCORE-International Baja 1000 បានវិលត្រឡប់មកវិញម្តងទៀតហើយ ដោយមានការរចនា និង រៀបចំថ្មីសម្រាប់ការប្រកួតក្នុងកម្មវិធី 2024 Finke Desert Race ក្នុងវិញ្ញាសាររក្សារថយន្តក្នុងសភាពដើមបំផុត និងគ្មានការកែឆ្នៃច្រើន ដើម្បីការពារពានរង្វាន់រថយន្ត 4WD ល្អឥតខ្ចោះប្រចាំឆ្នាំ 2024។

គួរបញ្ជាក់ផងដែរថា កំពូលរថយន្ត Ford Ranger Raptor គឺមាន DNA ជាកំពូលរថយន្ត Off-Road Performance ដែលមានសមត្ថភាពខ្ពស់ក្នុងការបើកបរគ្រប់កាលៈទេសៈ និងគ្មានឧបសគ្គអ្វីដែលជាកង្វល់សម្រាប់រថយន្ត Ford Ranger Raptor នោះទេ ដោយក្រោមការធ្វើតេស្តជាច្រើនពីក្រុមអ្នកជំនាញ Ford Performance គឺយើងទទួលបាននូវរថយន្តមួយដែលមានសមត្ថភាពយ៉ាងអស្ចារ្យនៅលើដងផ្លូវ រួមទាំងបំពាក់នូវយ៉ាន់កង់អាលុយមីញ៉ូម 17អ៊ីញបូករួមសំបកកង់ក្រាស់ប្រភេទ Off-Road ដែលអាចពុះពារគ្រប់ឧបសគ្គទាំងអស់ដែលមាននៅចំពោះមុខ។ កំពូលរថយន្ត Ford Ranger Raptor ត្រូវបានទទួលស្គាល់ពីអតិថិជនហ្វដជាច្រើនអំពីសមត្ថភាពរបស់រថយន្ត បច្ចេកវិទ្យាទំនើបៗដែលមានបំពាក់ក្នុងរថយន្ត និងកម្លាំងនៃម៉ាស៊ីនសាំង 3.0L Twin-Turbo V6 Ecoboost ភ្ជាប់ជាមួយប្រព័ន្ធចូលលេខដោយស្វ័យប្រវត្តនៃប្រអប់លេខអេឡិចត្រូនិច 10វគ្គអូតូ (E-Shifter) ដែលមានសមត្ថភាពជើងក្រោមដ៏ធន់រឹងមាំ ហាប់ណែន និងផាសុកភាពរបស់រថយន្តដោយមានការបំពាក់នូវបូម FOX 2.5អ៊ីញ Live-Valve Internal Bypass ដែលអាចកំណត់ការប្រើប្រាស់ទៅតាមស្ថានភាពផ្លូវនីមួយៗទាំងអស់។

ដោយសារតែសមត្ថភាពដ៏អស្ចារ្យរបស់រថយន្ត Ford Ranger Raptor និងក្រុមអ្នកជំនាញ Ford Performance ក្នុងការរៀបចំរថយន្តលេខរៀង 773 និងសិក្សាយ៉ាងម៉ត់ចត់សម្រាប់ការបើកបរលើទីលានប្រណាំងនេះ ទើបនាំអោយទទួលបានជ័យជំនះសារជាថ្មីម្តងទៀត ក្នុងកម្មវិធី 2024 Finke Desert Race ប្រទេសអូស្រ្តាលី ដែលបានរក្សាដំណែងដដែលជារថយន្ត 4WD ល្អឥតខ្ចោះប្រចាំឆ្នាំ 2024 និងអាចបញ្ចប់បេសកកម្មរបស់ខ្លួនល្អជាឆ្នាំមុនទៅទៀត ដោយការបើកបរក្នុងល្បឿនលឿន ពី 130km/h ទៅ 160km/h សម្រាប់ទីលានប្រណាំងផ្លូវឧបសគ្គដែលមានរយៈចម្ងាយរហូតដល់ 460km ដោយមានការចូលរួមពីគូប្រជែងមកពីគ្រប់ក្រុមហ៊ុនរថយន្តផ្សេងៗដែលបង្កភាពប្រកួតប្រជែងរវាងគ្នាទៅវិញទៅមកជាខ្លាំង ប៉ុន្តែសម្រាប់រថយន្ត Ford Ranger Raptor លេខរៀង 773 គឺអាចឆ្លងកាត់គ្រប់ឧបសគ្គទាំងអស់ រហូតដល់ទទួលបានជ័យជំនះ។

សម្រាប់មានអតិថិជនដែលចំណាប់អារម្មណ៍ក្នុងការបើកបរសាកល្បងទៅលើកំពូលរថយន្ត Ford Ranger Raptor សូមទំនាក់ទំនងផ្នែកលក់តាមសាខានីមួយៗ៖
 សាខាព្រះមុនីវង្ស 078 999 773
 សាខាទឹកថ្លា 095 939 939
 សាខាទូលសង្កែ 078 935 935
 សាខាជ្រោយចង្វារ 017 999 027
 សាខាភ្នំពេញថ្មី 011 255 229 ឬ 077 722 999
 សាខាបឹងបៃតង 099 999 747
 សាខាខេត្តសៀមរាប 077 666 357 ឬ 088 9 666 357
 សាខាខេត្តកំពង់ចាម 078 999 883 ឬ 088 3 999 883

ភ្លៀងធ្លាក់ខ្លាំងពេកបណ្តាលឱ្យបាក់ស្ពាន និងស្លា.ប់ មនុស្សនៅប្រទេសចិន

Lee Ek

July 22, 2024

ប្រទេសចិន ៖ កាលពីថ្ងៃទី២១ ខែកក្កដា ឆ្នាំ២០២៤ សារព័ត៌មានស៊ីនហួររាយការណ៍ថា ក្រោយពីភ្លៀងធ្លាក់យ៉ាងខ្លាំងបានបណ្តាលឱ្យមានទឹកជំនន់ និងបាក់ស្ពានមួយកន្លែងនៅប្រទេសចិន ។ រីឯអាជ្ញាធរចិននិយាយថា ភ្លៀងធ្លាក់ខ្លាំងនេះដោយសារមានខ្យល់ព្យុះបោកបក់ និងធ្វើឱ្យមនុស្សស្លា.ប់ អស់ចំនួន១២នាក់ ។ ពេលនេះ អាជ្ញាធរកំពុងតែព្យាយាមស្វែងរកមនុស្សបាត់ខ្លួនជាង៣០នាក់ទៀត ។

សារព័ត៌មានស៊ីនហួររាយការណ៍ថា ស្ពានមួយកន្លែងនៅទីក្រុង Shangluo ខេត្ត Shaanxi ស្ថិតនៅភាគពាយ័ព្យប្រទេសចិន បានបាក់ធ្លាក់កាលពីថ្ងៃទី១៩ ខែកក្កដា ឆ្នាំ២០២៤ ក្រោយពីភ្លៀងធ្លាក់យ៉ាងខ្លាំង និងមានទឹកជំនន់ភ្លាមៗ ។ បន្ទាប់មក នៅថ្ងៃទី២០ ខែកក្កដា ភ្នាក់ងារសង្គ្រោះបានរកឃើញសាកសពសរុបចំនួន១២នាក់ ដែលសាកសពទាំងនេះនៅជាប់ក្នុងរថយន្តចំនួន៥គ្រឿង ខណៈរថយន្តទាំងនេះធ្លាក់ចូលទឹកទន្លេពេលស្ពានបាក់ ។

បើតាមរបាយការណ៍បញ្ជាក់ថា មានមនុស្សបាត់ខ្លួនយ៉ាងហោចណាស់ ចំនួន៣១នាក់ទៀត ដែលអាជ្ញាធរពុំទាន់រកឃើញនៅឡើយ ។ បើតាមការស៊ើបអង្កេតជំហានដំបូងបង្ហាញថា មានរថយន្តចំនួន១៧គ្រឿងបានធ្លាក់ចូលក្នុងទឹកទន្លេ និងរថយន្តដឹកទំនិញ៨គ្រឿងទៀត ក៏បានធ្លាក់ចូលទន្លេដែរ ។

បុរសម្នាក់បានរួចផុតពីសេចក្តីស្លាប់ក្នុងហេតុការណ៍បាក់ស្ពាន រៀបរាប់ថា ពេលលោកបើកបររថយន្តមកដល់លើស្ពានត្រង់ ស្រាប់តែអ្នកបើករថយន្តផ្សេងទៀតស្រែកប្រាប់ឱ្យលោកបញ្ឈប់ការបើកបរជាបន្ទាន់ ។ ហេតុនេះ ទើបលោករួចផុតពីគ្រោះថ្នាក់ ប៉ុន្តែរថយន្តដឹកទំនិញនៅខាងមុខលោក ពុំព្រមឈប់ទេ ទើបធ្លាក់ចូលក្នុងទន្លេបែបនេះ ។

ក្រោយកើតហេតុ ប្រធានាធិបតីចិន លោក ស៊ី ជិនពីង បានបញ្ជាឱ្យអាជ្ញាធរពាក់ព័ន្ធប្រមូលកម្លាំងតាមស្វែងរកពលរដ្ឋបាត់ខ្លួន និងជួយសង្គ្រោះជនរងគ្រោះ ។ រីឯប្រព័ន្ធផ្សព្វផ្សាយ CCTV រាយការណ៍ថា មានមនុស្សបាត់ខ្លួនជាង៣០នាក់ទៀត កាលពីថ្ងៃទី២០ ខែកក្កដា នៅទីក្រុងយ៉ាអាន់ (Yaan) ខេត្ត Sichuan ស្ថិតនៅភាគនិរតីប្រទេសចិន ក្រោយពីមានខ្យល់ព្យុះ និងភ្លៀងធ្លាក់ខ្លាំងបណ្តាលឱ្យកើតទឹកជំនន់ ។

ក្រៅពីនេះ ក៏មានភ្លៀងធ្លាក់ខ្លាំងបណ្តាលឱ្យកើតទឹកជំនន់នៅខេត្ត Gansu ផងដែរ ខណៈទីតាំងភូមិសាស្ត្ររបស់ខេត្តនេះមានវាលខ្សាច់ពាក់កណ្តាល ។ រីឯបរិមាណទឹកភ្លៀងដែលអាជ្ញាធរបានវាស់វែងនៅទីក្រុង Nanyang ខេត្ត Henan កាលពីសប្តាហ៍ទី៣ ខែកក្កដា ឆ្នាំ២០២៤ គឺស្មើនឹងបរិមាណទឹកភ្លៀងធ្លាក់ពេញមួយឆ្នាំ ៕

កូរ៉េខាងជើង គ្រោងនឹងបើករមណីយដ្ឋានឆ្នេរដ៏ប្រណីតមួយ ត្រៀមស្វាគមន៍ភ្ញៀវទេសចរ

Lee Ek

July 22, 2024

កូរ៉េខាងជើង៖ រមណីយដ្ឋាន Wonsan-Kalma Beach Resort នឹងបើកជាផ្លូវការនៅខែឧសភា ឆ្នាំ ២០២៥ ដែលត្រូវបានចាត់ទុកថាជារមណីយដ្ឋាន “ធំបំផុត និងល្អបំផុត” របស់ប្រទេសកូរ៉េខាងជើង។
យោងតាម Business Insider រមណីយដ្ឋាននេះដំបូងឡើយគ្រោងនឹងបើកនៅឆ្នាំ ២០១៨ មកម្លេះ ប៉ុន្តែដោយសារខ្វះសម្ភារៈសំណង់ ផលប៉ះពាល់សេដ្ឋកិច្ច និង Covid-19 ទើបគម្រោងត្រូវជាប់គាំងជាច្រើនដង។ ទោះជាយ៉ាងណាក្នុងអំឡុងដំណើរទស្សនកិច្ចទៅកាន់រមណីយដ្ឋាន Wonsan-Kalma Beach Resort ពាក់កណ្តាលសប្តាហ៍មុន មេដឹកនាំកូរ៉េខាងជើងលោក Kim Jong Un ក៏បានប្រកាសថា រមណីយដ្ឋាននេះនឹងបើកដំណើរការជាផ្លូវការតែម្តង នៅខែឧសភា ឆ្នាំ ២០២៥ ដែលត្រៀមសម្រាប់ស្វាគមន៍ភ្ញៀវទេសចរ។

រមណីយដ្ឋាន Wonsan-Kalma Beach Resort មានទំហំ ២៤៥ ហិចតា មានឆ្នេរមួយដែលមានទឹកពណ៌ខៀវថ្លា និងខ្សាច់ពណ៌សក្បោះ ជាមួយនឹងអគារប្រណីតៗរាប់រយ និងបន្ទប់សណ្ឋាគាររាប់ពាន់។ Wonsan-Kalma ស្ថិតនៅចំកណ្តាលអាកាសយានដ្ឋានថ្មីនៅឆ្នេរសមុទ្រខាងកើតនៃប្រទេសកូរ៉េខាងជើង។ យោងតាមទីភ្នាក់ងារសារព័ត៌មានកណ្តាលកូរ៉េ (KCNA) នេះជាលើកទីមួយហើយដែលលោក គីម ជុងអ៊ុន បានវិលត្រឡប់មកកាន់ទីតាំងនេះវិញក្នុងរយៈពេល ៥ ឆ្នាំ។ ក្នុងដំណើរទស្សនកិច្ចនេះ លោកបានប្រកាសថា ការសាងសង់បានចូលដល់ដំណាក់កាលចុងក្រោយហើយ។

ដូច្នេះកន្លែងនេះនឹងក្លាយជា “តំបន់ឆ្នេរដ៏អស្ចារ្យ និងជារមណីយដ្ឋានដ៏ធំ និងល្អបំផុតរបស់កូរ៉េខាងជើង”។ លោក គីម ជុងអ៊ុន បានសង្កត់ធ្ងន់លើសារៈសំខាន់នៃសកម្មភាពកម្សាន្ត រួមទាំងសួនកម្សាន្ត ដើម្បីផ្តល់នូវបទពិសោធន៍ទេសចរណ៍ដ៏ទូលំទូលាយ។ លើសពីនេះ ប្រព័ន្ធគ្រប់គ្រងកាកសំណល់ក៏ត្រូវបានចាត់ទុកថាជាអាទិភាពកំពូលផងដែរ។ អ្នកទេសចររុស្ស៊ីមួយចំនួនត្រូវបានគេនិយាយថានឹងមកលេងរមណីយដ្ឋាននេះ ទោះបីជាប្រទេសកូរ៉េខាងជើងមិនទាន់បានបើកទ្វារទទួលភ្ញៀវអន្តរជាតិភ្លាមៗក៏ដោយ។

ជាមួយនឹងការលើកកម្ពស់វិស័យទេសចរណ៍ រមណីយដ្ឋាន Wonsan-Kalma Beach Resort ត្រូវបានគេរំពឹងថានឹងក្លាយជាចំណុចស្នូលនៃឧស្សាហកម្មទេសចរណ៍ ដោយកូរ៉េខាងជើងក៏បានលើកឡើងពីផែនការដើម្បីស្តារវិស័យទេសចរណ៍នៅក្នុងតំបន់ភ្នំ Kumgang, Mount Chilbo, Majon, Kumya, Riwon និង Yombunjin ផងដែរ។ គួរបញ្ជាក់ដែរថា ក្នុងឆ្នាំ ២០១៩ ប្រទេសនេះបានស្វាគមន៍ភ្ញៀវទេសចរបរទេសប្រមាណ ៣០០,០០០ នាក់ ជាមួយនឹងប្រាក់ចំណូលពីទេសចរណ៍ចាប់ពី ៩០ ទៅ ១៥០ លានដុល្លារអាមេរិក៕

ព្រះកេសផ្សេង ព្រះកាយផ្សឹង កំពុងស្ថិតនៅក្នុងសារមន្ទីរប្រទេសថៃ ខណៈផ្ទុះចម្ងល់ដល់ជនជាតិខ្មែរ!

Lee Ek

July 22, 2024

រូបភាពចែកចាយពីបណ្តាញសង្គមបានបង្ហាញឲ្យឃើញពីទិដ្ឋភាពនៅក្នុងសារមន្ទីរមួយកន្លែងរបស់ប្រទេសថៃ ដាក់តាំងបង្ហាញសុទ្ធតែព្រះកេស(ក្បាល)របស់រូបបដិមាយ៉ាងច្រើនពោរពាស ខណៈវាក៏បានលេចឡើងជាចម្ងល់ក្នុងចំណោមជនជាតិខ្មែរ ស្របពេលដែលចម្លាក់បុរាណនៅក្នុងប្រទេសខ្មែរ ខ្លះបន្សល់ទុកត្រឹមតែដងខ្លួនប៉ុណ្ណោះ។

សារមន្ទីរមួយកន្លែងនៅក្នុងខេត្តប៉ាធុមថានី ប្រទេសថៃ ដែលមានដាក់តាំងបង្ហាញពីចម្លាក់បុរាណ រូបបដិមាផ្សេងៗពោរពាស។ យ៉ាងណាមិញ អ្វីដែលជាទីចាប់អារម្មណ៍នោះគឺ ដោយគេបានសង្កេតឃើញថា មានព្រះកេសរបស់បដិមាជាច្រើនដាក់តម្រៀបគ្នាជាជួរៗ ដោយមិនដឹងព្រះកាយនៅទីណានោះទេ។

ស្របពេលដែលបានឃើញពីវត្តមានព្រះកេស(ក្បាល)របស់រូបចម្លាក់ជាច្រើន ស្ថិតនៅក្នុងប្រទេសថៃបែបនេះ វាក៏បានលេចឡើងជាចម្ងល់ក្នុងចំណោមជនជាតិខ្មែរគ្រប់ៗរូប ព្រោះថានៅកម្ពុជា គេក៏បានប្រទះឃើញរូបចម្លាក់មួយចំនួនសុទ្ធតែកំបុតក្បាលទាំងអស់ផងដែរ។

បើយោងតាមការលើកឡើងនៅលើបណ្តាញសង្គមដោយគណនីមួយបានឲ្យដឹងថា« រូបចម្លាក់ ប្រតិមា សិល្បៈបែបខ្មែរទាំងអស់នេះ ត្រូវបានយកចេញពីប្រាសាទរបស់ខ្មែរ បច្ចុប្បន្ន កំពុងដាក់តាំងនៅក្នុងសារមន្ទីរនៃខេត្ត ប៉ាធុមថានី ប្រទេសថៃ។ ក្នុងប្រាសាទខ្មែរជាច្រើនកន្លែង រូបចម្លាក់ កំបុតក្បាល(ព្រះសិរ) នៅសល់តែដងខ្លួន គឺដោយសារតែបែបនេះ។ ថៃ ប្រមូលខ្ទេច ប្រមូលខ្ទីពីខ្មែរ»។

ដោយហេតុថា កម្ពុជាគឺជាប្រទេសមួយបានឆ្លងកាត់សម័យសង្រ្គាមរាប់ភ្លេចទៅហើយ ដែលបណ្តាលឲ្យសម្បត្តិវប្បធម៌ វត្ថុបុរាណជាច្រើនបានបាត់បង់ទៅ ហើយនាពេលបច្ចុប្បន្ននេះ រូបចម្លាក់ខ្លះក៏បានលេចវត្តមាននៅឯសារមន្ទីរប្រទេសនានាលើពិភពលោក។ ដោយកាលពីពេលថ្មីនេះ រូបចម្លាក់បុរាណខ្មែរចំនួន១៤ ក៏ត្រូវបានសារមន្ទីររបស់សហរដ្ឋអាមេរិក ប្រគល់ជូនមកខ្មែរវិញតាមការស្នើសុំផងដែរ។
យ៉ាងណាមិញ ព្រះកេសរបស់រូបបដិមាជាច្រើនដែលបានដាក់តាំងបម្រៀបនៅឯប្រទេសថៃនោះ ត្រូវបានជនជាតិខ្មែរភាគច្រើនលើកឡើងថា វាគឺជាចម្លាក់ក្នុងរចនាបទខ្មែរ ដែលបានបាត់ទៅក្នុងសម័យសង្គ្រាម។ ទោះជាយ៉ាងណា ទាំងនេះគ្រាន់តែជាការលើកឡើងនិងសេចក្តីសន្និដ្ឋានខ្លះៗរបស់ជនជាតិខ្មែរប៉ុណ្ណោះ រីឯភស្តុតាងពិតប្រាកដនោះគឺនូវតែមិនទាន់មាននៅឡើយនោះទេ៕

ដំណឹងល្អ! 2NE1 នឹងរៀបចំការប្រគំតន្ត្រីជុំគ្នាជាលើកដំបូងនៅចុងឆ្នាំនេះ

Lee Ek

July 22, 2024

កូរ៉េខាងត្បូង៖ បន្ទាប់ពីបាត់មុខជាក្រុមអស់រយៈពេល ៧ ឆ្នាំ 2NE1 ស្រាប់តែប្រកាសត្រឡប់មកវិញជាក្រុមម្តងទៀតនៅឆ្នាំនេះ ថែមទាំងកំពុងរៀបចំការប្រគំតន្ត្រីជុំគ្នាជាលើកដំបូងនាពេលខាងមុខ ក្រោមការគ្រប់គ្រងរបស់ផលិតកម្ម YG Entertainment ធ្វើឱ្យអ្នកគាំទ្រ K-pop ភ្ញាក់ផ្អើល និងរំភើបចិត្តជាខ្លាំង។
បើយោងតាម Koreaboo ដែលបានចុះផ្សាយកាលពីថ្ងៃទី២១ ខែកក្កដា ឆ្នាំ២០២៤ ថាក្រុមចម្រៀង K-pop ជំនាន់ទីពីរនេះនឹងរៀបចំការប្រគំតន្ត្រី Global Tour នៅទីក្រុងសេអ៊ូលប្រទេសកូរ៉េខាងត្បូង រួមទាំងទីក្រុងតូក្យូ និងអូសាកាប្រទេសជប៉ុននៅចុងឆ្នាំនេះ ព្រមទាំងរៀបចំការប្រគំតន្ត្រីទេសចរណ៍ពិភពលោកនៅឆ្នាំ ២០២៥ ខាងមុខនេះផងដែរ។

ដំណឹងនៃការប្រកាសរបស់ផលិតកម្ម YG បានធ្វើឱ្យ Blackjack ភ្ញាក់ផ្អើល និងរំភើបចិត្តយ៉ាងខ្លាំង ដែលនេះគឺជាការវិលត្រលប់មកវិញជាផ្លូវការរបស់ 2NE1 ដែលគ្រប់គ្នាតែងតែទន្ទឹមរងចាំអស់ជាច្រើនឆ្នាំមកហើយ។ បើយោងតាមលោក Yang HyunSuk ម្ចាស់ផលិតកម្ម YG បាននិយាយថា សម្រាប់ការប្រគំតន្ត្រីរបស់ 2NE1 នឹងរៀបចំឡើងនៅខែតុលាខាងមុខនេះនៅទីក្រុងសេអ៊ូលប្រទេសកូរ៉េខាងត្បូង ហើយនៅខែវិច្ឆិកា និងខែធ្នូ នៃឆ្នាំ២០២៤ នេះ 2NE1 នឹងប្រគំតន្ត្រីនៅទីក្រុងតូក្យូ និងអូសាកាប្រទេសជប៉ុន។ លោក Yang HyunSuk បានបន្តទៀតថា ពួកគេនឹងធ្វើ Concert ទេសចរណ៍ពិភពលោកនៅទីតាំងផ្សេងៗទៀតដែលអាចនឹងប្រកាសជាបន្តបន្ទាប់រហូតដល់ឆ្នាំ ២០២៥។

គួរបញ្ជាក់ដែរថា 2NE1 បានបង្ហាញខ្លួនដំបូងក្នុងឆ្នាំ ២០០៩ គឺជាក្រុមចម្រៀងនារី K-pop ដ៏មានឥទ្ធិពលបំផុតក្នុងផលិតកម្ម YG Entertainment។ ក្រុមនេះត្រូវបានគេទទួលស្គាល់ថា ជាក្រុមនារីដ៏ជោគជ័យបំផុតនៅក្នុងឧស្សាហកម្មតន្ត្រីកូរ៉េខាងត្បូង ហើយក៏បានក្លាយជាតារានាំមុខគេផងដែរ។ 2NE1 មានភាពល្បីល្បាញលើពិភពលោកសម្រាប់ស្នាដៃជាបន្តបន្ទាប់ដូចជា Go Away, Fire Lonely, I Am The Best, I Love You, Come Back Home ។ ក្នុងឆ្នាំ ២០១៥ ទស្សនាវដ្តី Billboard បានដាក់ចំណាត់ថ្នាក់ 2NE1 ជាក្រុមចម្រៀងនារី Kpop លេខមួយប្រចាំទសវត្សរ៍។

ប៉ុន្តែនៅឆ្នាំ ២០១៦ ដោយសារមានរឿងផ្ទៃក្នុងជាមួយផលិតកម្ម ពួកគេទាំងបួនក៏បានបំបែកគ្នា ហើយក៏បានចាកចេញពីផលិតកម្ម YG។ ទោះជាយ៉ាងណា បន្ទាប់ពីចាកចេញអស់រយៈពេលប៉ុន្មានឆ្នាំកន្លងមក ក្រុមនេះក៏មានបំណងរួបរួមគ្នាវិញក្រោមទ្រនំចាស់ ដោយថ្មីៗនេះផលិតកម្ម YG ក៏បានប្រកាសថាសមាជិកក្រុម 2NE1 នឹងវិលត្រលប់មកកាន់ផលិតកម្ម YG Entertainment សារជាថ្មីម្តងទៀត ដែលដំណឹងនេះពិតជាធ្វើឱ្យអ្នកគាំទ្រ K-pop ភ្ញាក់ផ្អើល និងរំភើបចិត្តជាខ្លាំង៕

បៃ ដិន ដកខ្លួនចេញពីបេក្ខភាពប្រជែងការបោះឆ្នោតប្រធានាធិបតី

Lee Ek

July 22, 2024

លោក ចូ បៃដិន បានសម្រេចចិត្តដកខ្លួនចេញពីការប្រកួតប្រជែង ក្នុងការបោះឆ្នោតប្រធានាធិបតីអាមេរិក ដែលគ្រោងនឹងប្រព្រឹត្តិទៅនៅខែវិច្ឆិកាខាងមុខនេះ

សម្រាប់ការដកខ្លួនរបស់លោក ចូ បៃដិន នេះ លោកស្រី Kamala Harris នឹងក្លាយជាបេក្ខជន ប្រធានាធិបតីតំណាងឱ្យគណបក្សប្រជាធិបតេយ្យ ក្នុងការប្រកួតតតាំងជាមួយលោក Donarld Trump ក្នុងការបោះឆ្នោតនៅថ្ងៃទី៥ ខែវិច្ឆិកា ឆ្នាំ២០២៤ផងដែរ។

ស្ថិតក្នុងវ័យ៨១ឆ្នាំ លោក ចូ បៃដិន មិនបានបង្ហាញខ្លួនជាសាធារណៈចាប់តាំងពីរូបលោកបានឆ្លងកូវីដ១៩ និងត្រូវធ្វើចត្តាឡីស័ក។

គួរបញ្ជាក់ផងដែរថា បៃដិន នឹងបន្តកាន់តំណែងជាប្រធានាធិបតីអាមេរិក រហូតដល់នខែមករា ឆ្នាំ២០២៥ បើទោះបីជាមិនឈរឈ្មោះជាបេក្ខភាពប្រធានាធិបតីទៀតក៏ដោយ៕

តារាសម្តែង Song Hye Kyo ធ្វើឱ្យមានការចាប់អារម្មណ៍ខ្លាំងទោះបីតែងខ្លួនសាមញ្ញបែបធម្មជាតិ

Lee Ek

July 22, 2024

កាលពីល្ងាចថ្ងៃទី១៩ ខែកក្កដា តារាសម្តែងដ៏មានប្រជាប្រិយភាពប្រចាំប្រទេសកូរ៉េខាងត្បូង Song Hye Kyoបានចូលរួមក្នុងកម្មវិធី Blue Dragon Series Awards ដែលជាព្រឹត្តិការណ៍ផ្តល់ពានរង្វាន់ដល់តារាភាពយន្ត និងទូរទស្សន៍ ខណៈនាងជាអ្នកប្រកាសពានរង្វាន់ធំ។ Song Hye Kyo បានជ្រើសរើសរ៉ូបវែងពណ៌ស និងការតុបតែងតាមបែបធម្មជាតិជាមួយនឹងសំឡេងស្រាលស្រទន់ស្វាគមន៍អ្នកក្នុងកម្មវិធី។ ដ្បិតតែបង្ហាញខ្លួនត្រឹមតែប៉ុន្មាននាទីមែនពិតតែតារាសម្តែងរូបនេះទទួលបានការចាប់អារម្មណ៍យ៉ាងខ្លាំងពីទស្សនិកជននិងអ្នកចូលរួមផ្ទាល់។

នៅលើទំព័រហ្វេកប៊ុកក្នុងទ្វីបអាស៊ី ទស្សនិកជនជាច្រើនបានបញ្ចេញមតិថា រាល់ពេលដែលនាងចូលរួមក្នុងព្រឹត្តិការណ៍ណាមួយ Song Hye Kyo បានបន្សល់ទុកនូវអាកប្បកិរិយាស្ងប់ស្ងាត់ និងរូបរាងស្រស់ស្អាតរបស់នាង។ នាងកម្រនឹងតុបតែងមុខដិតៗណាស់ ប៉ុន្តែសម្រស់ធម្មជាតិរបស់នាង ធ្វើឱ្យអ្នកផ្សេងចង់មើលជាងការតុបតែងខ្លួនបែបខ្លាំងៗនិងដិតៗ។ នៅក្នុងព្រឹត្តិការណ៍នេះ Song Hye Kyo បានប្រគល់រង្វាន់ Daesang (Grand Prize) សម្រាប់ខ្សែភាពយន្ត Moving ។

ក្នុងរយៈពេលប៉ុន្មានឆ្នាំចុងក្រោយនេះ Song Hye Kyo បានលេចធ្លោទាំងក្នុងវិស័យភាពយន្ត និងម៉ូត។ កាលពីឆ្នាំ២០២៣ នាងបានឈ្នះពានរង្វាន់ជាតារាសម្តែងល្អបំផុតជាលើកដំបូងនៅក្នុងកម្មវិធី Baeksang Arts Awards ទៅលើខ្សែភាពយន្ត The Glory ។ តារាសម្តែងវ័យ៤៣ឆ្នាំរូបនេះគឺជាទូតសុឆន្ទៈនៃម៉ាកប្រណីតលំដាប់អន្តរជាតិជាច្រើន ហើយថែមទាំងផ្សព្វផ្សាយម៉ាកយីហោកូរ៉េជាច្រើនផងដែរ។

ចាប់តាំងពីលែងលះជាមួយតារាសម្តែង Song Joong Ki ក្នុងឆ្នាំ២០១៩ មកតារាសម្តែងរូបនេះពុំទាន់មានទំនាក់ទំនងស្នេហាម្តងទៀតនោះទេ ខណៈអតីតស្វាមីជិតបានកូនពីរទៅហើយ។ Song Hye Kyo បានចូលប្រឡូកក្នុងវិស័យសិល្បៈនៅអាយុ១៤ ឆ្នាំក្នុងនាមជាតារាបង្ហាញម៉ូតរូបថត ដែលល្បីល្បាញនៅអាស៊ីតាមរយៈខ្សែភាពយន្តជាច្រើនជាពិសេសភាពយន្តដែលសម្តែងគូជាមួយអតីតស្វាមីតែម្តង៕

ក្បាច់រាំក្នុងរឿង The Idol របស់ Jennie ត្រូវបានជ្រើសរើសតែងតាំងពានរង្វាន់ដ៏ធំមួយ

Lee Ek

July 22, 2024

«The Idol» ដែលផលិតដោយ HBO មានការសម្តែងពី The Weeknd , Lily-Rose Depp កូនស្រីរបស់ Johnny Depp និង Jennie សមាជិកក្រុម BLACKPINK ថ្មីៗនេះបានទទួលការតែងតាំងសម្រាប់ពានរង្វាន់ Primetime Emmy Awards លើកទី ៧៦នៅក្នុងប្រភេទនៃ «ក្បាច់រាំឆ្នើម»។

ក្បាច់រាំគឺជាទិដ្ឋភាពដ៏លេចធ្លោ និងចម្រូងចម្រាសនៃភាពយន្ត «The Idol» ដែលត្រូវបានចាត់ទុកថាមានភាពស្រើបស្រាលហួសហេតុ។ ជាពិសេស ឈុតឆាកសម្តែងរបស់ Jennie ជាមួយអ្នករាំប្រុសៗ និងសំលៀកបំពាក់ដ៏ស៊ិចស៊ីរបស់នាងក្នុងខ្សែភាពយន្តនេះ ត្រូវបានគេចាត់ទុកថាមានភាពទាក់ទាញ ធ្វើឱ្យអ្នកទស្សនាព្រឺសម្បុរ។ នៅពេលនោះ មនុស្សជាច្រើនបានចោទសួរថា ហេតុអ្វីបានជាតារាដ៏ល្បីដូចជា Jennie យល់ព្រមចូលរួមនៅក្នុងស៊េរីដែលបង្ហាញពីសារមិនច្បាស់លាស់បែបនេះអំពីឧស្សាហកម្មតន្ត្រី និងតួនាទីរបស់ស្ត្រី។

កាលពីមុន «The Idol» បានបង្ហាញខ្លួនជាលើកដំបូងគួរឱ្យភ្ញាក់ផ្អើលនៅឯមហោស្រពភាពយន្តកានក្នុងឆ្នាំ២០២៣ ដោយទទួលបានមតិអវិជ្ជមានជាច្រើនអំពីខ្លឹមសារភាពយន្តនេះ ។ នៅពេលដែលវាចាក់ផ្សាយតាមកញ្ចក់ទូរទស្សន៍ធ្វើឱ្យអ្នកទស្សនាមានការខកចិត្តកាន់តែខ្លាំងឡើង បង្កើតការជជែកដេញដោលយ៉ាងខ្លាំង។ អ្នកគាំទ្ររបស់ Jennie ក៏មានការខកចិត្តផងដែរចំពោះការសម្តែងរបស់នាង ។ ជាការឆ្លើយតបទៅនឹងប្រតិកម្មតបវិញ HBO បានសម្រេចចិត្តមិនផលិតរដូវកាលបន្ថែមនៃ “The Idol” ឡើយ ។

កម្មវិធី Primetime Emmy Awards លើកទី៧៦ “The Idol” នឹងប្រកួតប្រជែងជាមួយនឹងប្រជែងក្បាច់រាំផ្សេងទៀត បើទោះបៅជាបានត្រឹមការតែងតាំងពានរង្វាន់មិនបានឈ្នះពានក្តីអ្នកគាំទ្រថាក៏ជាភាពអស្ចារ្យមួយដែរដោយសារតែកម្មវិធីនេះជាការប្រគល់ពានរង្វាន់ដ៏ធំនិងត្រូវបានគោរពអស់ជាច្រើនទស្សវត្សរ៍ក្នុងវិស័យខ្សែភាពយន្តរបស់សហរដ្ឋអាម៉េរិក៕

ល្បីថា សុខ សារ៉ាវីតា និង នាង សម្បត្តិ ទាក់ទងគ្នាជាសង្សារពេលនេះដឹងច្បាស់ហើយ

Lee Ek

July 22, 2024

កញ្ញា សុខ សារ៉ាវីតា និង នាង សម្បត្តិ ត្រូវបានអ្នកគាំទ្រលើកឡើងថាពួកគេមានទំនាក់ទំនងស្នេហាបន្ទាប់ពីការប្រលងចម្រៀងចប់ក្រោយពីឃើញអ្នកទាំងពីរមានភាពសិ្នទ្ធស្នាលគ្នាជាពិសេសប្រៀបដូចជាគូស្នេហ៍។ ពាក្យចចាមអារ៉ាមនិងមានការផ្គូរផ្គងពីសំណាកហ្វេនៗនេះដែរ សុខ សារ៉ាវីតា ចេញមកបញ្ជាក់តែម្តងថាសម្ព័ន្ធភាពអ្នកទាំងពីរអ្នកគាំទ្រគិតបែបណាគឺបែបនោះតែអ្នកទាំងពីរគ្រាន់តែជាដៃគូធម្មតាទេ។

កញ្ញា សុខ សារ៉ាវីតា គឺជាអតីតកូនក្រុមលេចធ្លោនិងជាជើងខ្លាំងម្នាក់របស់អ្នកនាង ឱក សុគន្ធកញ្ញា អំឡុងពេលប្រកួតកម្មវិធីលំដាប់ថ្នាក់ពិភពលោក The Voice Cambodia រដូវកាលទី៣។ សារ៉ាវីតា មានទាំងសម្រស់ មានទាំងសមត្ថភាពចាប់តាំងពីបង្ហាញខ្លួនក្នុងការប្រកួតមកគឺធ្វើឱ្យមហាជនចាប់អារម្មណ៍តែម្តង។ ដ្បិតថានាងមិនបានគ្រងជាម្ចាស់ជ័យលាភីប៉ុន្តែការប្រកួតនេះធ្វើឱ្យទស្សនិកជនស្គាល់ សារ៉ាវីតា កាន់តែច្រើន។ បន្ទាប់ពីចប់ការប្រកួតអ្នកចម្រៀងរូបនេះលេចមុខតាមកម្មវិធីប្រគំតន្រ្តីជាហូរហែ តាមកម្មវិធីទូរទស្សន៍ រួមជាមួយកិច្ចសម្ភាសន៍នានា។

ជាក់ស្តែងកាលពីពេលថ្មីៗនេះ សុខ សារ៉ាវីតា បានចូលរួមក្នុងកម្មវិធី «Let’s Chat Don’t Cheat» ដោយបានទម្លាយប្រាប់ទស្សនិកជនថានាងកើតនៅក្នុងគ្រួសារសិល្បៈមានឪពុកជាតន្រ្តីករ មានម្តាយជាអ្នកចម្រៀង ចំណែកឯបងប្រុសទាំង៥នាក់គឺជាអ្នកសិល្បៈចំណែកនាងគឺជាកូនពៅហើយក៏ដើរលើវិថីសិល្បៈដូចគ្នា។

អតីតកូនក្រុមរបស់អ្នកនាង ឱក សុគន្ធកញ្ញា រូបនេះបានទម្លាយថារូបនាងចូលប្រឡូកសិល្បៈតាំងពីអាយុ៦ឆ្នាំហើយនិងឆ្លងកាត់ការប្រកួតប្រជែងលើវិស័យចម្រៀង៣ដងពីក្មេងម្តង និងធំឡើងចំនួនពីរដងទាំងកម្មវិធីប្រកួតចុងក្រោយនេះដែលមានការលើកទឹកចិត្តពីក្រុមគ្រួសារ។ មិនត្រឹមតែស្រស់ស្អាត ច្រៀងពីរោះ សុខ សារ៉ារីតា ក៏ចេះនិពន្ធបទចម្រៀងផងដែរដោយទើបបង្ហាញស្នាដៃរបស់ខ្លួនទៅលើបទចម្រៀង «ព្រមចុះចាញ់»។

ទន្ទឹមនឹងភាពលេចធ្លោលើផ្នែកចម្រៀង សុខ សារ៉ារីតា ក៏បានធ្វើឱ្យអ្នកគាំទ្រចាប់អារម្មណ៍ទៅលើរឿងផ្ទាល់ខ្លួនបន្ទាប់ពីនាង និង នាង សម្បត្តិ ដែលជាអតីតបេក្ខភាព កម្មវិធីជាមួយគ្នា បង្ហាញកាយវិការស្និទ្ធស្នាលប្រៀបដូចជាគូស្នេហ៍រហូតត្រូវបានអ្នកគាំទ្រ Ship អ្នកទាំងពីរនិងបានលើកឡើងទៀតថា The Voice ជួបស្នហ៍។

សម្ព័ន្ធភាពអ្នកទាំងពីរ ត្រូវបានលាតត្រដាងពេលចូលរួមនៅក្នុងកម្មវិធីខាងលើ ដោយ សុខ សារ៉ារីតា បាននិយាយថា ទំនាក់ទំនងអ្នកទាំងពីរគឺអាស្រ័យលើទស្សនិកជនអ្នកគាំទ្រជាអ្នកគិត មើលឃើញបែបណាគិតបែបនោះ ខណៈចុងក្រោយ សារ៉ារីតា ថាអ្នកទាំងពីរត្រឹមតែជាដៃគូដៃកង់ធម្មតាទេ៕

Jennie ជាតារាចម្រៀងល្បីខ្លាំងមានអ្នកតាមដានជាង៨៥លាននាក់តែតារាសម្តែងរូបនេះបែរជាមិនស្គាល់

Lee Ek

July 22, 2024

ជឿជាក់ថាអ្នកមួយចំនួនធំពេលនិយាយដល់ឈ្មោះ Jennie សមាជិក BLACKPINK ប្រាកដជាស្គាល់ភាគច្រើនមិនខានជាពិសេសអ្នកតាមដានវិស័យK-Pop តែម្តង។ ទោះបីជាមានឈ្មោះល្បីល្បាញគ្របដណ្តប់ស្ទើរតែទូទាំងពិភពលោកក្តីប៉ុន្តែតារាសម្តែងកូរ៉េ Shin Sung-woo ឆកល្វែងពុំស្គាល់ Jennie ដែលជាតារាជំនាន់ក្រោយលោកនោះទេរហូតមានការសម្របសម្រួលពីក្រុមការងារផលិតកម្មវិធីរម្លឹកពីឈ្មោះនាង។

កាលពីថ្ងៃទី១៨ កក្កដា កន្លងទៅនេះ កម្មវិធី «Dad is a Flower Boy» នៅលើ Channel A បានបង្ហាញពីលោក Kim Kwang-kyu ទៅលេងផ្ទះរបស់លោក Shin Sung-woo ។វីដេអូនោះត្រូវបានគេដឹងថាតារាចម្រៀងនិងសម្តែង Shin Sung-woo ត្រូវបានគេសន្មត់ថារៀនវិធីថែរក្សាសម្រស់ពី Kim Kwang-kyu ហើយអ្នកទាំងពីរបានធ្វើដំណើរទៅកាន់ហាងលក់ទំនិញថែរក្សាសម្រស់ដើម្បីទិញគ្រឿងសំអាង។

Shin Sung-woo វ័យ ៥៨ ឆ្នាំ ដែលទើបតែចាប់ផ្តើមថែរក្សាសម្រស់របស់ខ្លួនបានធ្វើដំណើរទៅកាន់ជ្រុងផលិតផលលាបសក់ ដែលថ្នាំពណ៌សក់នោះផ្សព្វផ្សាយដោយ BLACKPINK។ Kim Kwang-kyu កាន់ដបពណ៌សក់ជាមួយនឹងរូប Jennie នៅលើនោះបាននិយាយថា «ខ្ញុំច្រណែននឹងសក់នេះណាស់» រួចសួរថា «BLACKPINK… តើនេះជានរណា?» ទាំង Shin Sung-woo និង Kim Kwang-kyu បាននៅស្ងផមហើយសុំជំនួយពីក្រុមការងារដែលធ្វើឱ្យគ្រប់គ្នាភ្ញាក់ផ្អើល។

ដោយមានជំនួយពីក្រុមការងារកម្មវិធីទីបំផុត Shin Sung-woo បានចងចាំ ហើយនិយាយយ៉ាងប្រញាប់ថា «Ah, Jennie, Jennie» ដែលធ្វើឱ្យការសើចបានផ្ទុះឡើង។ Kim Kwang-kyu និយាយបន្ទរថា «ម៉េចមិនដឹងថាជាអ្នកចម្រៀង?» ខណៈ Shin Sung-woo ពន្យល់ថា «ខ្ញុំមិនស្គាល់អ្នកចម្រៀងបច្ចុប្បន្នទេ។ ខ្ញុំស្គាល់ Jennie»។ កម្មវិធី ‘Dad is a Flower Boy’ ដែលមាន Shin Sung-woo ចាក់ផ្សាយរៀងរាល់ថ្ងៃព្រហស្បតិ៍ វេលាម៉ោង ៩:៣០ យប់ នៅលើ Channel A។

ជាមួយគ្នានេះដែរ Jennie សមាជិកក្រុម BLACKPINK ដែលត្រូវបានគេស្គាល់ថាជាលំដាប់ថ្នាក់ពិភពលោករបស់នាង ថ្មីៗនេះបានប្រឈមនឹងភាពចម្រូងចម្រាសជុំវិញការបង្ហោះវីដេអូដែលបង្ហាញពីការជក់បារីអេឡិចត្រូនិចផ្លុំផ្សែងប៉ះចំមុខបុគ្គលដែលកំពុងផាត់មុខឱ្យនាងរហូត Jennie ចេញមកទទួលស្គាល់កំហុសរបស់ខ្លួននិងបានផ្ញើសារសូមទោសដោយផ្ទាល់ទៅកាន់ក្រុមការងារ៕

1...968969970...2,028 Page 969 of 2,028

Khmer Breaking News

កំពូលរថយន្ត Ford Ranger Raptor បានទទួលជ័យជំនះសារជាថ្មីម្តងទៀតហើយ!

ភ្លៀងធ្លាក់ខ្លាំងពេកបណ្តាលឱ្យបាក់ស្ពាន និងស្លា.ប់ មនុស្សនៅប្រទេសចិន

កូរ៉េខាងជើង គ្រោងនឹងបើករមណីយដ្ឋានឆ្នេរដ៏ប្រណីតមួយ ត្រៀមស្វាគមន៍ភ្ញៀវទេសចរ

ព្រះកេសផ្សេង ព្រះកាយផ្សឹង កំពុងស្ថិតនៅក្នុងសារមន្ទីរប្រទេសថៃ ខណៈផ្ទុះចម្ងល់ដល់ជនជាតិខ្មែរ!

ដំណឹងល្អ! 2NE1 នឹងរៀបចំការប្រគំតន្ត្រីជុំគ្នាជាលើកដំបូងនៅចុងឆ្នាំនេះ

បៃ ដិន ដកខ្លួនចេញពីបេក្ខភាពប្រជែងការបោះឆ្នោតប្រធានាធិបតី

តារាសម្តែង Song Hye Kyo ធ្វើឱ្យមានការចាប់អារម្មណ៍ខ្លាំងទោះបីតែងខ្លួនសាមញ្ញបែបធម្មជាតិ

ក្បាច់រាំក្នុងរឿង The Idol របស់ Jennie ត្រូវបានជ្រើសរើសតែងតាំងពានរង្វាន់ដ៏ធំមួយ

ល្បីថា សុខ សារ៉ាវីតា និង នាង សម្បត្តិ ទាក់ទងគ្នាជាសង្សារពេលនេះដឹងច្បាស់ហើយ

Jennie ជាតារាចម្រៀងល្បីខ្លាំងមានអ្នកតាមដានជាង៨៥លាននាក់តែតារាសម្តែងរូបនេះបែរជាមិនស្គាល់

EVEN MORE NEWS

Shin Hyun Bin ដើរដួលលើកម្រាលព្រំក្រហមក្នុងកម្មវិធីប្រគល់ពានរង្វាន់ដ៏ធំ

POPULAR CATEGORY