សហរដ្ឋអាមេរិក៖ ស្ថាបនិកក្រុមហ៊ុនយក្សប្រណីត LVMH គឺលោក Bernard Arnault បានបាត់បង់ទ្រព្យសម្បត្តិច្រើនជាងមហាសេដ្ឋីទាំងអស់នៅលើពិភពលោកក្នុងឆ្នាំ ២០២៤ ដោយធ្លាក់ចុះរហូតដល់ ២០ ពាន់លានដុល្លារអាមេរិក។
យោងតាមស្ថិតិពី Bloomberg ទ្រព្យសម្បត្តិរបស់ម្ចាស់អាណាចក្រទំនិញប្រណីត LVMH Bernard Arnault បានថយចុះចំនួន ២០ ពាន់លានដុល្លារ ចាប់តាំងពីដើមឆ្នាំមក ដែលនេះគឺជាការថយចុះដ៏ធំបំផុតនៅលើពិភពលោក គ្មានមហាសេដ្ឋីណាធ្លាក់ចុះទ្រព្យសម្បត្តិច្រើនជាង Bernard Arnault នោះទេ។

បច្ចុប្បន្នមហាសេដ្ឋីរូបនេះមានទ្រព្យសម្បត្តិសុទ្ធត្រឹមតែ ១៨៨ ពាន់លានដុល្លារអាមេរិកប៉ុណ្ណោះ ដែលនេះបានធ្វើឱ្យលោកបាត់បង់តំណែងជាអ្នកមានបំផុតនៅលើផែនដី។ កាលពីមុន Bernard Arnault ធ្លាប់ជាប់ឈ្មោះជាមហាសេដ្ឋីមានជាងគេលេខមួយនៅលើពិភពលោក ខណៈ Elon Musk លេខពីរ និងស្ថាបនិក Amazon លោក Jeff Bezos ឈរនៅលេខបី ប៉ុន្តែនៅពេលនេះមហាសេដ្ឋីវ័យ ៧៥ ឆ្នាំរូបនេះក៏បានធ្លាក់មកលេខ ៣ វិញ។ មូលហេតុដែលទ្រពសម្បត្តិរបស់លោកបានធ្លាក់ចុះច្រើនបែបនេះគឺដោយសារតែភាគហ៊ុន LVMH បានធ្លាក់ចុះយ៉ាងខ្លាំងរហូតដល់ ១៤% ក្នុងរយៈពេល ៦ ខែកន្លងទៅ បន្ទាប់ពីក្រុមហ៊ុនបានប្រកាសពីការខកចិត្តនៃលទ្ធផលអាជីវកម្មនៅត្រីមាសទីពីរ។

សព្វថ្ងៃម៉ាកយីហោប្រណីតកំពុងប្រឈមមុខនឹងការលំបាកដោយសារតែការធ្លាក់ចុះសេដ្ឋកិច្ចរបស់ប្រទេសចិន។ នេះគឺជាទីផ្សារអ្នកប្រើប្រាស់ដ៏សំខាន់នៃឧស្សាហកម្មទំនិញប្រណីតពិភពលោក។ សញ្ញានៃការធ្លាក់ចុះដ៏ច្រើនបែបនេះក៏បានមកពីសាជីវកម្មទំនិញប្រណីតផ្សេងទៀតគឺ Burberry Group (UK) និង Richemont (ស្វីស) ផងដែរ។ នៅក្នុងត្រីមាសទី ២ ប្រាក់ចំណូលរបស់ Richemont នៅក្នុងប្រទេសចិនបានថយចុះ ២៧% បើធៀបនឹងរយៈពេលដូចគ្នាកាលពីឆ្នាំមុន ដោយសារតែ “ទំនុកចិត្តអ្នកប្រើប្រាស់ទាប”។

ទោះជាយ៉ាងណា LVMH នៅតែជាក្រុមហ៊ុនប្រណីតធំបំផុតរបស់ពិភពលោក។ ក្រុមហ៊ុននេះមានម៉ាកសំលៀកបំពាក់ល្បីៗ និងគ្រឿងសំអាងចំនួន ៧០ ដូចជា Sephora, Tiffany & Co, Givenchy, Christian Dior, Dom Perignon និង Moët Hennessy ជាដើម។ នៅឆ្នាំ ២០២១ LVMH បានទិញក្រុមហ៊ុនគ្រឿងអលង្ការ Tiffany & Co ក្នុងតម្លៃជិត ១៦ ពាន់លានដុល្លារ។ នេះត្រូវបានគេចាត់ទុកថាជាកិច្ចព្រមព្រៀងធំបំផុតក្នុងឧស្សាហកម្មប្រណីតក្នុងពិភពលោក។ បច្ចុប្បន្ន Arnault គឺជានាយកប្រតិបត្តិ និងជាប្រធានក្រុមហ៊ុន LVMH ដែលលោកមានកូន ៥ នាក់សុទ្ធតែធ្វើការនៅ LVMH ទាំងអស់៕

ប្រទេសឥណ្ឌូណេស៊ី ៖ កាលពីថ្ងៃទី២៧ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា អាជ្ញាធរឥណ្ឌូណេស៊ីបានចាត់វិធានការក្តៅលើអ្នកលក់ សា.ច់ឆ្កែ អាំង ចំនួន៣នាក់នៅកោះបាលី ព្រមទាំងដកហូត សា.ច់ឆ្កែ អាំងចំនួន៥០០ចង្កាក់ និងសា.ច់ឆ្កែ ឆៅជាង៥០គីឡូក្រាម ។ អាជ្ញាធរបញ្ជាក់ថា ពួកគេនឹងជាប់ពន្ធនា.គារ ដោយសារល្មើសនឹងច្បាប់ហាមលក់ សា.ច់ឆ្កែ នៅកោះបាលី ។

សារព័ត៌មាន Straits Times និង AFP រាយការណ៍ថា អាជ្ញាធរនៅកោះបាលី ដែលជាតំបន់ទេសចរណ៍ដ៏ពេញនិយមរបស់ប្រទេសឥណ្ឌូណេស៊ី បានចាប់ខ្លួនអាជីវករលក់សាច់ឆ្កែ ចំនួន៣នាក់ ព្រមទាំងដកហូតសាច់ឆ្កែឆ្អិន ចំនួន៥០០ចង្កាក់, សាច់ឆៅរាប់រយគីឡូក្រាម និងសម្ភារៈផ្សេងទៀត ។

អាជ្ញាធរកោះបាលីនិយាយថា កោះបាលីបានអនុវត្តច្បាប់ហាមលក់សាច់ឆ្កែ តាំងពីឆ្នាំ២០២៣ មកម៉្លេះ ហើយអ្នករំលោភច្បាប់នេះនឹងជាប់ពន្ធនាគាររយៈពេល៣ខែ ព្រមទាំងត្រូវពិន័យជាប្រាក់ចំនួន៣.០៧៥ដុល្លារអាមេរិក ។ ប៉ុន្តែនៅតំបន់ផ្សេងទៀតរបស់ប្រទេសឥណ្ឌូណេស៊ី អាចលក់សាច់ឆ្កែបាន ។

លោក Deva Nyoman Rai Thammadi ប្រធានការិយាល័យសណ្តាប់ធ្នាប់សាធារណៈរបស់កោះបាលីនិយាយថា ក្រោយការត្រួតពិនិត្យទីតាំងលក់សាច់ឆ្កែនៅចុងខែកក្កដា ឆ្នាំ២០២៤ ឃើញថា មានអ្នកលក់សាច់ឆ្កែ ចំនួន៣នាក់ បានរំលោភច្បាប់ ។ ហេតុនេះ អាជ្ញាធរបានដកហូតសាច់ឆ្កែអាំង៥០០ចង្កាក់ពីអ្នកលក់ម្នាក់ និងសាច់ឆ្កែឆៅ៥៦គីឡូក្រាមពីអ្នកលក់ផ្សេងទៀតនៅស្រុកចេមប្រាណា ។

អាជ្ញាធរបានធ្វើការព្រមានអ្នកលក់សាច់ឆ្កែម្នាក់ ដោយសារពុំធ្លាប់លក់ពីមុន ខណៈអ្នកលក់សាច់ឆ្កែ២នាក់ទៀត ធ្លាប់បានប្រព្រឹត្តខុសម្តងហើយម្តងទៀត ។ ហេតុនេះ អាជ្ញាធរក៏បានបញ្ជូនអ្នកលក់សាច់ឆ្កែ ទាំង២នាក់ទៅឱ្យតុលាការកាត់ទោសតាមច្បាប់ និងត្រៀមឡើងតុលាការនៅខែសីហា ឆ្នាំ២០២៤ ។

គួរបញ្ជាក់ថា មានប្រទេសតិចតួចប៉ុណ្ណោះនៅលើពិភពលោក ដែលអនុញ្ញាតឱ្យពលរដ្ឋអាចលក់សាច់ឆ្កែ និងឆ្មាបាន ប៉ុន្តែយុទ្ធនាការប្រឆាំងនឹងការលក់ ឬបរិភោគសាច់ឆ្កែ កំពុងទទួលបានការចាប់អារម្មណ៍កាន់តែខ្លាំងឡើង ។ ហេតុនេះ ធ្វើឱ្យទីក្រុងមួយចំនួន រួមទាំងទីក្រុង Semarang របស់ឥណ្ឌូណេស៊ី បង្កើតច្បាប់ហាមឃាត់ការលក់សាច់ឆ្កែ និងឆ្មា កាលពីប៉ុន្មានឆ្នាំមុន ៕

បរទេស៖ អត្តពលិកជនជាតិកាណាដាម្នាក់ឈ្មោះ Gregg Ernst បានបង្កើតកំណត់ត្រាសម្រាប់ការលើកវត្ថុធ្ងន់បំផុតដែលមានទម្ងន់សរុប ២,៤២២ គីឡូក្រាម ជាប់ឈ្មោះជាបុរសដែលខ្លាំងបំផុតក្នុងលោក។
នេះបើយោងតាមការចុះផ្សាយរបស់ Live Science កាលពីថ្ងៃទី២៩ ខែកក្កដា ឆ្នាំ២០២៤ ថាកាលពីមុនពិភពលោកទាំងមូលមានការភ្ញាក់ផ្អើលនៅពេលដែលកីឡាករលើកទម្ងន់ជនជាតិអង់គ្លេសម្នាក់ឈ្មោះ Eddie Hall បានលើកទម្ងន់រហូតដល់ ៥០០ គីឡូក្រាមក្នុងព្រឹត្តិការណ៍ World Powerlifting Championships ឆ្នាំ ២០១៦ ដោយលោក Hall គឺជាមនុស្សដំបូងគេដែលបានបំបែករបាំងទម្ងន់ ៥០០ គីឡូក្រាម។

បន្ទាប់មកនៅឆ្នាំ ២០២០ ក៏មានអ្នកលើកទម្ងន់ជនជាតិអ៊ីស្លង់ម្នាក់ឈ្មោះ Hafþór Júlíus Björnsson បានបង្កើតកំណត់ត្រាសម្រាប់ការលើកទម្ងន់ ៥០១ គីឡូក្រាមដោយជោគជ័យ។ ប៉ុន្តែទន្ទឹមនឹងនេះដែរ កំណត់ត្រាសម្រាប់វត្ថុធ្ងន់បំផុតមិនធ្លាប់មានក៏បានទៅលើអត្តពលិកជនជាតិកាណាដាវិញគឺលោក Gregg Ernst ដែលលោកបានលើករថយន្តពីរជាមួយអ្នកបើកបរនៅខាងក្នុងដោយមានទម្ងន់សរុប ២,៤២២ គីឡូក្រាម។ ទោះជាយ៉ាងណាទម្ងន់ប៉ុននេះ នៅមិនទាន់ឈានដល់កម្រិតអតិបរមានៃកម្លាំងសាច់ដុំនៅឡើយទេ។

លោក E. Todd Schroeder សាស្ត្រាចារ្យផ្នែកព្យាបាលកាយសម្បទានៅសាកលវិទ្យាល័យ Southern California ដែលសិក្សាពីវិធីបង្កើនកម្លាំង និងម៉ាសសាច់ដុំបាននិយាយថា យើងមានការលំបាកក្នុងការវាស់ស្ទង់សមត្ថភាពសាច់ដុំអតិបរមារបស់មនុស្សម្នាក់ៗ ប៉ុន្តែយើងជឿថាមនុស្សអាចមានកម្លាំងខ្លាំងជាងនេះទៀតក្នុងការលើកទម្ងន់។ លោក E. Todd បានបន្តទៀតថា មធ្យោបាយតែមួយគត់ដើម្បីកំណត់កម្លាំងសាច់ដុំរបស់មនុស្សម្នាក់ៗគឺតាមរយៈការហ្វឹកហាត់ជាបន្តបន្ទាប់។ ដូច្នេះរាងកាយ សមត្ថភាពរបស់មនុស្សក្នុងការទទួលទម្ងន់គឺអាស្រ័យលើ actin និង myosin ដែលជាប្រូតេអ៊ីនពីរអនុញ្ញាតឱ្យសាច់ដុំចុះកិច្ចសន្យាជាមួយគ្នា។

ប្រូតេអ៊ីនទាំងនេះត្រូវបានរៀបចំនៅក្នុងប្រភេទផ្សេងគ្នានៃសរសៃសាច់ដុំ ហើយសមាមាត្រម៉ាសសាច់ដុំ និងសរសៃសាច់ដុំ គឺអាស្រ័យលើរបបនៃការបណ្តុះបណ្តាល ក៏ដូចជាកត្តាជីវសាស្ត្រ ដូចជាហ្សែន និងភេទ ដោយជាទូទៅម៉ាសសាច់ដុំកាន់តែធំ កម្លាំងកាន់តែច្រើនដែលអ្នកអាចផលិតបាន។ ហេតុនេះការលើកទម្ងន់ត្រឹម ២,៤២២ គីឡូក្រាមនៅមិនទាន់ឈានដល់កម្រិតកំពូលនៅឡើយទេ ទោះជាយ៉ាងណាបច្ចុប្បន្នអត្តពលិកជនជាតិកាណាដា Gregg Ernst គឺជាបុរសខ្លាំងបំផុតក្នុងលោក ដោយសារមិនទាន់មាននរណាម្នាក់អាចបំបែកកំណត់ត្រាសម្រាប់វត្ថុធ្ងន់បំផុតនេះទេ៕

បរទេស៖ ចំនួនជើងហោះហើរទៅកាន់ទីក្រុងប៉ារីសប្រទេសបារាំងមានការថយចុះខ្លាំងរហូតដល់ ៦០% ឯណោះ ដោយសារតម្លៃសំបុត្រខ្ពស់ពេក ធ្វើឱ្យអ្នកទេសចរអស់អារម្មណ៍ក្នុងការចូលរួមព្រឹត្តិការណ៍អូឡាំពិក។
នេះបើយោងតាមការចុះផ្សាយរបស់ CNBC បានឱ្យដឹងថា ចាប់តាំងពីថ្ងៃបើកព្រឹត្តិការណ៍អូឡាំពិកមក ភ្ញៀវទេសចរទាំងជាតិ និងអន្តរជាតិហាក់មិនសូវចាប់អារម្មណ៍ចូលរួមព្រឹត្តិការណ៍អូឡាំពិកក្នុងទីក្រុងប៉ារីសប្រទេសបារាំងនោះទេ ដោយសារតម្លៃសំបុត្រខ្ពស់ ហើយអ្នករៀបចំកម្មវិធីភាគច្រើនផ្តោតតែលើចំនួនមនុស្សដែលមានសំបុត្រចូលរួមប៉ុណ្ណោះ ដោយមិនអើពើនឹងចំនួនអ្នកទស្សនាផ្សេងទៀតឡើយ។

បើយោងតាមអ្នករៀបចំកម្មវិធីបាននិយាយថា កីឡាអូឡាំពិកគឺសម្រាប់អត្តពលិក និងអ្នកចូលរួមដែលពាក់ព័ន្ធប៉ុណ្ណោះ មិនមែនសម្រាប់ភ្ញៀវទេសចរនោះទេ ដែលនេះផ្ទុយពីការគិតរបស់អ្នកជំនាញ ខណៈកាលពីមុនពួកគេធ្លាប់បានព្យាករណ៍ថា រដ្ឋធានីរបស់ប្រទេសបារាំង ប្រាកដជាមានការរីកចំរើនផ្នែកទេសចរណ៍ ទោះជាយ៉ាងណានៅពេលបើកព្រឹត្តិការណ៍ជាផ្លូវការស្រាប់តែមិនសូវមានភ្ញៀវទេសចរទៅវិញ។ ប្រធានអ្នកវិភាគនៃក្រុមហ៊ុនស្រាវជ្រាវអាកាសចរណ៍ OAG John Grant បាននិយាយថា “វាជាកំហុសមួយសម្រាប់ទីក្រុងម្ចាស់ផ្ទះអូឡាំពិក ដែលមិនស្វាគមន៍ភ្ញៀវទេសចរឱ្យមកចូលរួមព្រឹត្តិការណ៍ដ៏ធំនេះ”។

ទោះជាយ៉ាងណាលោក Grant បានបន្តថា មិនត្រឹមតែទីក្រុងប៉ារីសប៉ុណ្ណោះទេ កន្លងទៅទីក្រុងផ្សេងទៀតដូចជាទីក្រុងឡុងដ៍ Athens និង Atlanta នៅពេលពួកគេធ្វើជាម្ចាស់ផ្ទះ សុទ្ធតែបានឃើញការថយចុះនៃចំនួនភ្ញៀវទេសចរក្នុងអំឡុងព្រឹត្តិការណ៍អូឡាំពិក។ ហេតុនេះព្រឹត្តិការណ៍អូឡាំពិកមិនដែលសម្រេចនូវអ្វីដែលប្រទេសម្ចាស់ផ្ទះរំពឹងទុកនោះទេ។ កាលពីថ្ងៃទី ២៥ ខែកក្កដា ក្រុមហ៊ុន Air France បានប្រកាសថា ប្រាក់ចំណូលរបស់ពួកគេបានធ្លាក់ចុះពី ១៦០ ទៅ ១៨០ លានដុល្លារក្នុងត្រីមាសទី ៣ ដោយសារតែតម្រូវការអ្នកដំណើរមិនល្អទៅកាន់ទីក្រុងប៉ារីសនៅរដូវក្តៅនេះ។

ក្រុមហ៊ុនអាកាសចរណ៍ Air France បានបន្ថែមថា ចរាចរណ៍ទៅ និងមកពីទីក្រុងប៉ារីសកំពុងធ្លាក់ចុះបើប្រៀបធៀបទៅនឹងទីក្រុងធំៗផ្សេងទៀតនៅអឺរ៉ុប ដែលបង្ហាញពី “ភ្ញៀវទេសចរកំពុងជៀសឆ្ងាយពីទីក្រុងប៉ារីស”។ ជាមួយគ្នានេះក្រុមហ៊ុនអាកាសចរណ៍ Delta Air Lines ក៏កំពុងព្យាករណ៍ថានឹងខាតបង់រហូតដល់ ១០០ លានដុល្លារអាមេរិកផងដែរ ដោយសារតែការថយចុះចំនួនអ្នកដំណើរទៅកាន់ប្រទេសបារាំងក្នុងអំឡុងពេលកីឡាអូឡាំពិក។ ទន្ទឹមនឹងនេះសណ្ឋាគារជាច្រើនក៏កំពុងមានអារម្មណ៍ថាមានការធ្លាក់ចុះចំនួនភ្ញៀវដែរ ដោយសារបន្ទប់ទំនេរច្រើនមិនសូវមានអ្នកកក់។ ដូច្នេះបើយោងតាមការព្យាករណ៍ ភ្ញៀវទេសចរទាំងជាតិ និងអន្តរជាតិគឺបានថយចុះរហូតដល់ ៦០% ក្នុងរដូវក្តៅនេះ៕