គ្រាប់ពេជ្រកម្ពុជា ល្អហួស បន្ទាប់ពីលេចធ្លាយដំណឹងថា មានផលិតកម្មភាពយន្តរបស់ឥណ្ឌូណេស៊ីជាច្រើន បានដាក់ពាក្យដណ្តើមគ្នាចង់បាននាងទៅសម្តែងក្នុងខ្សែភាពយន្តរៀងៗខ្លួនហើយ ខណៈការបញ្ជាក់ជាថ្មីបានឲ្យដឹងថា នាងកំពុងត្រៀមខ្លួនហោះទៅឥណ្ឌូណេស៊ី និងស្នាក់នៅទីនោះរយៈពេល ២០ ថ្ងៃ ដើម្បីត្រៀមសម្តែងខ្សែភាពយន្តខ្នាតធំលំដាប់ថ្នាក់អន្តរជាតិ ជាមួយនឹងតួឥណ្ឌូណេស៊ីល្បីៗជាច្រើនទៀត។
បវរកញ្ញាវ័យក្មេងកម្ពុជាមួយរូប ដែលកំពុងតែទទួលបាននូវភាពលេចធ្លោទាំងក្នុងនិងក្រៅប្រទេស គឺ យុវតី ជូរី ល្អហួស ម្ចាស់ជ័យលាភី Miss Preteen International 2024 ដែលមិនត្រឹមតែមានរូបសម្រស់ស្អាតប៉ុណ្ណោះទេ ប៉ុន្តែគឺជាក្មេងស្រីម្នាក់ ដែលពោរពេញដោយទេពកោសល្យខ្ពស់ ចេះទាំងច្រៀង រាំ សម្តែង (ទាំងបុរាណនិងសម័យ) ព្រមទាំងជាម្ចាស់ប្រេនមួយរូបផងដែរ។
យោងតាមការបញ្ជាក់របស់ លោក អ៊ិន វិចិត្រ នាយកប្រតិបត្តិក្រុមហ៊ុន Mediaload កាលពីថ្ងៃទី ២៨ ខែកក្កដានេះ បានឲ្យដឹងថា«Laor Hours ល្អហួស នឹងត្រូវចំណាយពេលថតភាពយន្តឥណ្ឌូនេស៊ីចំនួន ២០ ថ្ងៃ នៅទីក្រុង Jakarta ជាមួយតួល្បីៗរបស់ឥណ្ឌូនេស៊ី។ គាត់នឹងលេងជាតួខ្មោចឥណ្ឌូនេស៊ី នៅរឿងខ្នាតធំសម្រាប់ទីផ្សារឥណ្ឌូនេស៊ី និងអន្តរជាតិ។ គាត់នឹងក្លាយជាតារាសម្តែងខ្មែរដំបូង ដែលបានថតជាតួឯកក្នុងភាពយន្តអន្តរជាតិ ស្របពេលដែលឥណ្ឌូនេស៊ីជាប្រទេសដែលមានប្រជាជនជិត ៣០០ លាននាក់»។
គួរបញ្ជាក់ដែរថា ល្អហួស ក្នុងវ័យ១៦ឆ្នាំ ជាបវរកញ្ញាវ័យក្មេងកម្ពុជា បានគ្រងម្កុដពីកម្មវិធីប្រកួតលំដាប់ថ្នាក់អន្តរជាតិ Miss Preteen 2024 និងទទួលបាននូវការគាំទ្រយ៉ាងច្រើនផុសផុលក្នុងចំណោមជនជាតិខ្មែរនិងជនបរទេស ខណៈនាងបានបញ្ជាក់ថា «នាងនឹងចូលប្រឡូកក្នុងវិស័យ Miss Grand នាឆ្នាំ២០២៧» ផងដែរ៕
