ប្រទេសអ៊ីរ៉ង់បានបើកបង្ហាញជាសាធារណៈនូវមូលដ្ឋានទ័ពក្រោមទឹកថ្មីមួយ ដែលមានទីតាំងនៅក្រោមឈូងសមុទ្រពែរ្ស ជាមួយនឹងការសម្ញែងពីនាវា អាវុ.ធ និងមីស៊ីលទំនើបៗច្រើនប្រភេទ ហើយនិយាយថាខ្លួនអាចនឹងធ្វើច្រកសមុទ្រ Hormuz ក្លាយជាតំបន់លែងមានសម្រាប់ការដឹកជញ្ជូន ប្រសិនបើវាត្រូវបានវា.យប្រហារដោយសហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារ The Arab News។

យោងតាមវីដេអូ និងសេចក្តីថ្លែងការណ៍របស់អ៊ីរ៉ង់ មូលដ្ឋានទ័ពនេះរួមមានទូកល្បឿនលឿន និងយានជំនិះកងទ័ពជើងទឹកផ្សេងទៀត ដែលត្រូវបានរចនាឡើងដើម្បីបា.ញ់មីស៊ីលរយៈចម្ងាយឆ្ងាយ និងផ្លូវរូងក្រោមដីលាតសន្ធឹងរាប់រយម៉ែត្រពីក្រោមផ្ទៃទឹក។ មេដឹកនាំយោធារដ្ឋបានពិពណ៌នាអំពីស្មុគស្មាញនេះថា វាជាកន្លែងអាថ៌កំបាំងមួយក្នុងចំណោមកន្លែងជាច្រើនផ្សេងទៀត ដែលបង្ហាញពីសមត្ថភាពរបស់អ៊ីរ៉ង់ ក្នុងការការពារដែនទឹក និងឆ្លើយតបទៅនឹងការគំរាមកំហែងពីរដ្ឋដទៃមកលើខ្លួន។

មេបញ្ជាការកងទ័ពជើងទឹកនៃកងឆ្មាំបដិវត្តន៍អ៊ីស្លាម (IRGC) លោក Alireza Tangsiri បាននិយាយថា ផ្លូវរូងសម្រាប់មីស៊ីលទាំងនេះ ត្រូវបានត្រៀមទុកសម្រាប់ទប់ទល់នឹងកងកម្លាំងកងទ័ពជើងទឹកអាមេរិកដែលកំពុងប្រតិបត្តិការនៅក្នុងតំបន់ ដោយវាមានផ្ទុកមីស៊ីលរាប់រយគ្រាប់ ដែលអាចបា.ញ់បានចម្ងាយឆ្ងាយជាង 1,000 គីឡូម៉ែត្រ។

គួរឲ្យដឹងថា ការបង្ហាញទីតាំងនេះកើតឡើងចំពេលមានភាពតានតឹងផ្នែកភូមិសាស្ត្រនយោបាយកាន់តែខ្លាំងឡើង ជាពិសេសជាមួយសហរដ្ឋអាមេរិក និងអ៊ីស្រាអែល។ មន្ត្រីអ៊ីរ៉ង់បានបង្ហាញថា ការសាងសង់មូលដ្ឋានយោធា រួមទាំងមូលដ្ឋានក្រោមទឹកនេះ មានបំណងទប់ទល់នឹងការគំរាមកំហែងនៅក្នុងតំបន់ និងដើម្បីការពារផ្លូវទឹកយុទ្ធសាស្ត្រដូចជាច្រកសមុទ្រ Hormuz ដែលជាច្រកសំខាន់សម្រាប់ការដឹកជញ្ជូនប្រេងសកល។

ជាមួយគ្នានេះដែរ មន្ត្រីអ៊ីរ៉ង់បានបញ្ជាក់ថា «អ៊ីរ៉ង់មិនចង់បានសង្គ្រាមទេ» ប៉ុន្តែខ្លួនបានត្រៀមរួចជាស្រេច ដើម្បីឆ្លើយតបយ៉ាងម៉ឺងម៉ាត់ចំពោះការវាយប្រហារណាមួយ។ សេចក្តីថ្លែងការណ៍របស់ទីក្រុងតេអេរ៉ង់បានសង្កត់ធ្ងន់ថា ប្រសិនបើសហរដ្ឋអាមេរិក ឬសម្ព័ន្ធមិត្តណាមួយរបស់អាមេរិក ចាប់ផ្តើមសកម្មភាពយោធាប្រឆាំងនឹងអ៊ីរ៉ង់ នោះផលវិបាកអាចពង្រីកហួសពីទីក្រុងតេអេរ៉ង់ រហូតដល់តំបន់ និងទីផ្សារសកលលោកកាន់តែធំ៕

ប្រទេសឥណ្ឌា ៖ ឥណ្ឌានឹងសាកល្បងហាមឃាត់យុវជនអាយុក្រោម១៦ឆ្នាំប្រើប្រាស់បណ្តាញសង្គម ពីព្រោះបារម្ភពីផលប៉ះពាល់សុខភាពផ្លូវចិត្ត ដែលការហាមឃាត់នេះ គឺយកគំរូតាមអូស្ត្រាលី ប្រសិនបើអនុវត្តជោគជ័យ ឥណ្ឌានឹងហាមឃាត់យុវជនអាយុក្រោម១៦ឆ្នាំប្រើប្រាស់បណ្តាញសង្គមនៅទូទាំងប្រទេស ។

រដ្ឋ Goa ជារដ្ឋទេសចរណ៍ និងរដ្ឋ Andhra Pradesh នៅភាគខាងត្បូងប្រទេសឥណ្ឌា គ្រោងហាមឃាត់យុវជនអាយុក្រោម១៦ឆ្នាំប្រើប្រាស់បណ្តាញសង្គម ដោយសារបារម្ភពីផលប៉ះពាល់កាន់តែខ្លាំងលើសុខភាពផ្លូវចិត្តយុវជន ។ បច្ចុប្បន្ន ពលរដ្ឋឥណ្ឌាបានប្រើប្រាស់អ៊ីនធើរណេត ស្មើជាង១ពាន់លាននាក់ ក្នុងនោះអ្នកប្រើប្រាស់កម្មវិធី YouTube, Google និងបណ្តាញសង្គម X គឺជាយុវជនអាយុក្រោម១៦ឆ្នាំ ។

តាមការចុះផ្សាយរបស់សារព័ត៌មានបរទេសនៅថ្ងៃទី២៨ ខែមករា ឆ្នាំ២០២៦ ទោះជាប្រទេសឥណ្ឌាពុំទាន់មានច្បាប់គ្រប់គ្រងបណ្តាញសង្គម ហើយរដ្ឋាភិបាលឥណ្ឌាពុំទាន់ជំរុញឱ្យបង្កើតច្បាប់នាពេលឆាប់ៗ ប៉ុន្តែរដ្ឋ Goa និងរដ្ឋ Andhra Pradesh គ្រោងហាមឃាត់យុវជនអាយុក្រោម១៦ឆ្នាំប្រើប្រាស់បណ្តាញសង្គម ដែលនេះបង្ហាញនូវការប្តេជ្ញាចិត្តដោះស្រាយបញ្ហាយុវជនញៀនបណ្តាញសង្គម ។

បើតាមរដ្ឋមន្ត្រីក្រសួងព័ត៌មាន លោក Rohan Khaunte គឺមន្ត្រីកំពុងសិក្សាពីច្បាប់របស់អូស្ត្រាលីយ៉ាងលម្អិតពាក់ព័ន្ធនឹងការហាមឃាត់យុវជនប្រើប្រាស់បណ្តាញសង្គម ដើម្បីឈានដល់ការហាមឃាត់យុវជនឥណ្ឌាជាផ្លូវការ ។ រដ្ឋ Goa នឹងហាមឃាត់យុវជនអាយុក្រោម១៦ឆ្នាំប្រើប្រាស់បណ្តាញសង្គម ប្រសិនបើការហាមឃាត់មានប្រសិទ្ធភាព រដ្ឋ Goa ដែលមានមនុស្សរស់នៅប្រមាណ១លាន ៥សែននាក់ នឹងក្លាយជារដ្ឋដំបូងគេដែលហាមឃាត់យុវជនប្រើប្រាស់បណ្តាញសង្គម ។

ដូចគ្នានេះ រដ្ឋ Andhra Pradesh មានមនុស្សរស់នៅជាង៥៣លាននាក់ នៅភាគខាងត្បូងប្រទេសឥណ្ឌា ក៏គ្រោងហាមឃាត់យុវជនអាយុក្រោម១៦ឆ្នាំប្រើប្រាស់បណ្តាញសង្គមដែរ ដោយការបង្កើតគណៈកម្មការមានការចូលរួមពីមន្ត្រីជាន់ខ្ពស់ជជែកគ្នារយៈពេល១ខែ អំពីការហាមយុវជនប្រើប្រាស់បណ្តាញសង្គម បន្ទាប់ពីឈ្វេងយល់ពីច្បាប់អូស្ត្រាលីពាក់ព័ន្ធនឹងការហាមនេះ ។

រដ្ឋទាំងពីរគ្រោងហាមយុវជនប្រើប្រាស់បណ្តាញសង្គមដោយសារបារម្ភពីផលប៉ះពាល់សុខភាពផ្លូវចិត្ត គឺទទួលបានការគាំទ្រពីក្រុមហ៊ុន Meta ដែលតម្រូវឱ្យឪពុក-ម្តាយត្រួតពិនិត្យការប្រើប្រាស់បណ្តាញសង្គមរបស់កូនៗ ប៉ុន្តែក្រុមហ៊ុនបញ្ជាក់ថា ការហាមមិនឱ្យយុវជនប្រើប្រាស់បណ្តាញសង្គមមួយចំនួន គឺមិនអាចការពារបានទាំងអស់ទេ ពីព្រោះពួកគេបានប្រើប្រាស់កម្មវិធីអ៊ីនធើរណេតជាមធ្យម ប្រមាណ៤០កម្មវិធីក្នុង១សប្តាហ៍ ។ រីឯក្រសួងព័ត៌មានឥណ្ឌា ព្រមទាំងបណ្តាញសង្គម X និង Google មិនបាននិយាយអ្វីទេ ពាក់ព័ន្ធនឹងការហាមឃាត់នេះ ។

រដ្ឋ Goa និងរដ្ឋ Andhra Pradesh មានគម្រោងហាមយុវជនប្រើប្រាស់បណ្តាញសង្គម បន្ទាប់ពីអូស្ត្រាលីអនុម័តច្បាប់ហាមឃាត់យុវជនអាយុក្រោម១៦ឆ្នាំ ប្រើប្រាស់បណ្តាញសង្គម ដែលធ្វើឱ្យគណនីរបស់យុវជនអូស្ត្រាលីត្រូវបានបិទរហូតដល់៤លាន ៧សែនគណនី ។ ការហាមឃាត់របស់អូស្ត្រាលីធ្វើឱ្យប្រទេសជាច្រើនត្រៀមអនុម័តច្បាប់ហាមដូចគ្នាដែរ ដូចជា ៖ បារាំង ឥណ្ឌូណេស៊ី និងម៉ាឡេស៊ី ដែលឆ្លុះបញ្ចាំងពីមេដឹកនាំប្រទេសនានារឹតបន្តឹងការប្រើប្រាស់បណ្តាញសង្គមរបស់យុវជន ។

ថ្មីៗនេះ រដ្ឋសភាជាតិបារាំងបានអនុម័តសេចក្តីព្រាងច្បាប់ថ្មីមួយស្តីពីការហាមឃាត់កុមារ និងក្មេងជំទង់អាយុក្រោម១៥ឆ្នាំពីការប្រើប្រាស់បណ្តាញសង្គម ដោយសារបារម្ភពីផលប៉ះពាល់សុខភាពផ្លូវចិត្ត ។ វិធានការនេះនឹងហាមឃាត់ការចូលប្រើប្រាស់ និងទស្សនា TikTok, Snapchat និង Instagram សម្រាប់យុវជនអាយុក្រោម១៥ឆ្នាំ ដែលជាការជំរុញគោលនយោបាយរបស់ប្រធានាធិបតីបារាំង លោក Emmanuel Macron ដើម្បីការពារយុវជនពីការចំណាយពេលច្រើនលើអ៊ីនធើរណេត ៕

ខេត្តឈៀងម៉ៃ ៖ យន្តហោះ AT-6 របស់កងទ័ពអាកាសថៃចំនួន១គ្រឿង សុខៗស្រាប់បានធ្លាក់ក្នុងអំឡុងពេលហាត់សមយោធានៅខេត្តឈៀងម៉ៃ បណ្ដាលឲ្យពីឡុតពីរនាក់បានស្លា.ប់ភ្លាមៗ។ នេះបើយោងតាមការចេញផ្សាយរបស់សារព័ត៌មាន Thairath។

នៅម៉ោង ១០:៣០ ព្រឹក ថ្ងៃទី ២៩ ខែមករា អ្នកយកព័ត៌មានបានទទួលដំណឹងពីកងទ័ពអាកាសថៃថា យន្តហោះយោធាប្រភេទ AT-6 មួយគ្រឿង បានធ្លាក់នៅភូមិ Ban Huai Fang ស្រុក Chom Thong ខេត្តឈៀងម៉ៃ ជិតស្រុក Ban Hong ខេត្ត Lamphun នៅខណៈពេលកំពុងបំពេញបេសកកម្មហោះហើរហ្វឹកហាត់។

ភ្លាមៗអាជ្ញាធរបានធ្វើដំណើរទៅកាន់កន្លែងកើតហេតុ ដើម្បីស៊ើបអង្កេត ហើយរបាយការណ៍បឋមបានបង្ហាញថា អ្នកបើកយន្តហោះពីរនាក់នៅលើយន្តហោះនោះបានស្លា.ប់ រីឯយន្តហោះស្ថិតក្នុងសភាពខូចខាតទាំងស្រុងដោយត្រូវភ្លើងឆាបឆេះក្រោយធ្លាក់ដល់ដី។

របាយការណ៍ពីកន្លែងកើតហេតុក៏បានបង្ហាញដែរថា ក្នុងអំឡុងពេលបំពេញបេសកកម្មហោះហើរហ្វឹកហាត់ យន្តហោះនេះបានបាត់បង់ការគ្រប់គ្រង និងបន្ទាប់មកត្រូវបានគេដឹងថាវាបានធ្លាក់នៅតំបន់សហគមន៍ដាច់ស្រយាលមួយដែលពិបាកទៅដល់។

បច្ចុប្បន្នអាជ្ញាធរកំពុងគ្រប់គ្រងស្ថានការណ៍ និងបើកការស៊ើបអង្កេតដើម្បីរកមូលហេតុលម្អិតនៃគ្រោះថ្នាក់នេះ ព្រមទាំងដើម្បីវាយតម្លៃលើការខូចខាតបន្ថែមទៀតផងដែរ។ មិនតែប៉ុណ្ណោះ ក្រុមការងារជាច្រើនត្រូវបានបញ្ជូនទៅកាន់កន្លែងកើតហេតុផ្ទាល់ ដើម្បីសម្របសម្រួលដំណើរការធ្វើកំណត់ហេតុ និងដឹកជញ្ជូនសា.កស.ពត្រឡប់មកផ្ទះវិញ៕