ថ្មីៗនេះតារាស្រី វ៉ាង ស្រីណូ បានធ្វើឱ្យមហាជនមានការចាប់អារម្មណ៍បន្ទាប់ពីគេបានឃើញរូបនាងបង្ហាញរូបថតពរពោះជិតគ្រប់ខែទាំងប្រកាសក្តែងៗថានៅ Single និងគ្មានដំណឹងពីទំនាក់ទំនងជាមួយបុរសណាឡើយ។ ទោះយ៉ាងណា មន្ទិលសង្ស័យរបស់អ្នកលេងបណ្តាញសង្គមត្រូវបានស្រាយចម្ងង់ដោយ វ៉ាង ស្រីណូ បញ្ជាក់ថាការពរពោះនេះគឺ «ចាក់មេជីវិត»។ ការប្រើជីវិតឯករាជ្យបែបនេះ វ៉ាង ស្រីណូ អះអាងថាមានក្តីសុខហើយប្តី នាងមិនដែលគិតចង់បាននោះទេ។

វ៉ាង ស្រីណូ តារាស្រីសម្តីចាក់ទឹកមិនលិចពុំសូវបានបង្ហាញខ្លួនញឹកញាប់លើអាជីពសិល្បៈនោះទេ ដោយយូរៗម្តងគេបានឃើញនាងចូលរួមកម្មវិធីសម្ភាសន៍មួយចំនួន ខណៈរូបនាងមមាញឹកនិងការលក់កាបូបតាមអនឡាញ។ ការលក់របស់កញ្ញា វ៉ាង ស្រីណូ ជារឿយៗត្រូវបានមហាជនចាប់អារម្មណ៍ដោយសារតែសម្តីលេងសើចចាក់ទឹកមិនលិចរបស់នាងជាមួយនឹងអ្នកគាំទ្រ។ វ៉ាង ស្រីណូ តែងតែបង្ហាញថាខ្លួននាងនៅ Single ពុំមានទំនាក់ទំនងស្នេហាជាមួយបុរសណាមួយឡើយគឺប្រើជីវិតបែបឯករាជ្យបែបនេះ។

ទោះយ៉ាងណា ថ្មីៗនេះ វ៉ាង ស្រីណូ បានធ្វើឱ្យមហាជនផ្ទុះការចាប់អារម្មណ៍ដោយសារតែនាងបានបង្ហាញរូបភាពពរពោះទាំងពុំធ្លាប់ប្រកាសទំនាក់ទំនងជាមួយណាសោះដែលនាំឱ្យមានការជីកឬសជីកគល់ពីបញ្ហាពរពោះរបស់ វ៉ាង ស្រីណូ យ៉ាងច្រើន។ ជាមួយគ្នានេះដែរ តារាស្រីរូបនេះបានចេញមកបញ្ជាក់ជូនសាធារណជនតែម្តងដើម្បីកុំឱ្យមានការសង្ស័យតទៅទៀតមានកូនតែគ្មានប្តី។ វ៉ាង ស្រីណូ បានសរសេររៀបរាប់នៅលើបណ្តាញសង្គមអរគុណចំពោះអ្នកដែលបានជូនពរនាងនិងកូន។

វ៉ាង ស្រីណូ ក៏បានរំលេចដែរថានាងទទួលបានសំណួរជាច្រើនទាក់ទងនឹងការពរពោះនេះថាមែនឬគ្រាន់តែជាការលេងសើច ព្រោះតែមិនបានឃើញនាងមានប្តី។

វ៉ាង ស្រីណូ បានបញ្ជាក់យ៉ាងច្បាស់លាស់ថា នាងពិតជាមានទម្ងន់ពិតមែន ហើយមិនមានប្តីនោះទេ នៅតែជាស៊ីងហ្គលដដែល អីឡូវក្លាយជាស៊ីងហ្គលមាំមី។ តារាស្រីរូបនេះក៏បានទម្លាយទៀតថានាងយកកូនតាមបែបវិទ្យាសាស្ត្រ (ចាក់មេជីវិត) ដែលពេលនេះអាយុផ្ទៃពោះ ៨ខែហើយមានគ័តតាំងពីខែមករា។ ក្នុងការពរពោះនេះ វ៉ាង ស្រីណូ ថានាងមានសំណាងព្រោះមិនចាញ់ សុខភាពរឹងមាំ អាចធ្វើដំណើរហោះហើរបានគ្រប់ប្រទេស ទាំងអាស៊ី អឺរ៉ុប អាម៉េរិក។ ជាមួយគ្នានេះ វ៉ាង ស្រីណូ ថាពេលនាងមានផ្ទៃពោះនាងរីករាយ មិនបាក់ទឹកចិត្តដូចម្តាយពរពោះមួយចំនួនធ្វើការបានធម្មតា ទស្សនិកជនដែលមើលឡាយនាងមើលមិនដឹងថានាងមានទម្ងន់ផង។

វ៉ាង ស្រីណូ ថាកូននាងជាកូនស្រីត្រូវសម្រាលនៅខែកញ្ញា ហើយការមានកូននេះនាងមិនបានលាក់បាំងពីមហាជននោះទេព្រោះនាងមានកម្រោង៣ឆ្នាំមកហើយក្នុងការចង់បានកូនឆ្នាំរោង ប៉ុន្តែអាចថាអ្នកមួយចំនួនមិនបានចាប់អារម្មណ៍។ វ៉ាង ស្រីណូ ថានាងជាមនុស្សចូលចិត្តធ្វើអ្វីបើកចំហរ មានទំនួលខុសត្រូវជាមនុស្សវិជ្ជមានហើយ រឿងប្តី នាងមិនដែលគិតថាចង់បាន នាងជាមនុស្សមានម្ចាស់ការលើខ្លួនឯងមានក្តីសុខនឹងប្រើជីវិតឯករាជ្យបែបនេះ ព្រោះនេះជាសម័យស្រ្តីខ្លាំង។

តារាស្រីដែលហ៊ានបង្ហាញថាយកកូនតាមបែបវិទ្យាសាស្រ្តរូបនេះក៏បានលើកទឹកចិត្តឱ្យស្រ្តីខ្មែរ ចេះផ្តល់តម្លៃឱ្យខ្លួនឯង រឹងមាំឡើងកុំទន់ជ្រាយ រឿងអ្វីក៏ស្រ្តីអាចធ្វើបានដែរ ត្រូវជឿជាក់លើសមត្ថភាពរបស់ខ្លួន កុំបាក់ទឹកចិត្ត៕

អ្នកគាំទ្រមានការភ្ញាក់ផ្អើលទាំងយប់ដោយកញ្ញា ខាត់ ស្រីច័ន្ទ ហៅខេត ជា ND កម្មវិធី Miss Planet Cambodia បានប្រកាសជាផ្លូវការថានាងនិងក្រុមការងារដកខ្លួនចេញពីតំណែងអ្នកគ្រប់គ្រងកម្មវិធីនេះដោយរៀបចំកម្មវិធីបវរកញ្ញាមួយផ្សេងទៀតសាងដោយស្នាដៃខ្លួនឯង។ ជាមួយគ្នានេះកញ្ញាបានបញ្ជាក់ថាមិនត្រឹមតែហ្វេនទេដែលខកចិត្តហត់រង់ចាំមើលកម្មវិធីនេះតែត្រូវបានបញ្ឈប់ពាក់កណ្តាលទីគឺនាងហត់ ខកចិត្ត សេដលើសអ្នកគាំទ្រ៥០ដង។

នៅយប់ថ្ងៃទី២ សីហា ផេក Miss Planet Cambodia បានចេញសេចក្តីប្រកាសថា «នាងខ្ញុំ ខាត់ ស្រីច័ន្ទ សូមប្រកាសជាសាធារណៈថានាងខ្ញុំនិងក្រុមការងារបានសុំធ្វើការដកខ្លួនចេញពីតំណែង អ្នកគ្រប់គ្រងកម្មវិធីប្រកួតកញ្ញាឯកភពផែនដីនៃកម្ពុជាឆ្នាំ២០២៤ និងធ្វើការបញ្ចប់កិច្ចកុងត្រាដោយសន្តិវិធី ប៉ុន្តែនាងខ្ញុំ ខាត់ ស្រីច័ន្ទ នឹងនៅតែបន្តធ្វើការរៀបចំការប្រកួតកម្មវិធីកញ្ញាឯកថ្មីមួយនៅក្រោមឈ្មោះ Miss Mera Cambodia2024 ។
អាស្រ័យហេតុនេះ សូមបងប្អូនអ្នកគាំទ្រទទួលជ្រាបជាដំណឹងនិងនៅតែបន្តគាំទ្រកម្មវិធីថ្មីមួយនេះដែលនាងខ្ញុំ និងក្រុមការងារបានតាំងចិត្តយ៉ាងមោះមុតក្នុងការរៀបចំក៏ដូចជាក្នុងការនាំយកវិស័យបវរកញ្ញាកម្ពុជាឆ្ពោះទៅកាន់ភាពរីកចម្រើន»។

ដំណឹងនេះបានធ្វើឱ្យអ្នកគាំទ្រវិស័យបវរកញ្ញាផ្ទុះការភ្ញាក់ផ្អើលយ៉ាងខ្លាំងព្រោះពួកគេកំពុងតែទន្ទឹមរង់ចាំទស្សនាកម្មវិធីនេះ ប៉ុន្តែត្រូវបានខកខានបែបនេះមិនដឹងថាមានបញ្ហាផ្ទៃក្នុងអ្វីនោះទេដែល ខាត់ ស្រីច័ន្ទ ប្រកាសដកខ្លួនចេញពីកម្មវិធីនេះទៅវិញ។ បន្ទាប់ពីប្រកាសដំណឹងនេះជាសាធារណៈ ខាត់ ស្រីច័ន្ទ ក៏បាន Live នៅលើបណ្តាញសង្គមប្រាប់ពីគោលបំណងនៃការរៀបចំកម្មវិធីថ្មីដោយខ្លួនឯងដែលជាក្តីស្រមៃមួយរបស់នាង ហើយប្រសិនជាមានភាពជោគជ័យនាថ្ងៃអនាគតកម្មវិធីនេះនឹងបោះជំហានឈានដល់អន្តរជាតិ។

ខាត់ ស្រីច័ន្ទ បាននិយាយថា មិនត្រឹមតែហ្វេនទេដែលហត់ព្រោះទន្ទឹមរង់ចាំមើលកម្មវិធី Miss Planet Cambodia 2024 ដែលនាងរៀបចំបែរជាត្រូវបញ្ចប់វិញ នាងក៏ខកចិត្ត ហត់ពិបាកចិត្តជាងហ្វេន៥០ដង។ ជាមួយគ្នានេះ ស្រីច័ន្ទ ថានាងនឹងព្យាយាមរើសអ្វីដែលល្អសម្រាប់ហ្វេន ជាពិសេសបេក្ខភាពដែលបានដាក់ពាក្យមកប្រកួតដើម្បីផ្ញើវាសនានៅលើកណ្តាប់ដៃ នាង នាងធ្វើអ្វីដែលច្បាស់លាស់ ផ្លូវការ ជម្រើសដ៏ល្អរបស់នាងកុំឱ្យមានរឿងរ៉ាវកើតឡើងគឺដកខ្លួនចេញដោយសុំមិននិយាយពីបញ្ហា សុំបញ្ចប់ដោយសន្តិវិធីជាមួយម្ខាងទៀត។ អ្វីដែលគួរឱ្យចាប់អារម្មណ៍ កញ្ញា បានបង្ហាញថាកម្មវិធីថ្មីដែលនាងបង្កើតឡើងនេះមិនមានបំណងចង់ប្រកួតប្រជែងអ្នកនៅក្នុងស្រុកនោះទេមិនចង់ឈ្នះចាញ់ជាមួយប្អូនឯង តែចង់ប្រកួតប្រជែងជាមួយអ្នកជិតខាង។

ND Miss Mera Cambodia 2024 បានលើកឡើងថា នាងមិនប្រកាន់នោះទេបើសិនជាហ្វេននិយាយថាហត់ ឬនិយាយអ្វីផ្សេងតែចង់ឱ្យហ្វេនបើកចិត្តស្តាប់នាងជឿជាក់លើនាងថានាងជាមនុស្សបែបណា។ ស្រីច័ន្ទ ថាតាំងពីដើមមកនាងចូលចិត្តធ្វើអ្វីដល់ទីបញ្ចប់មិនដែលធ្វើអ្វីពាក់កណ្តាលទីនោះទេទោះបីជាមានព្យុុះមានភ្លៀងមានឧបសគ្គ មានរឿងអត់សប្បាយចិត្តតែនាងនៅតែសប្បាយចិត្តនៅតែធ្វើវាទាល់តែចប់ព្រោះវាជាការចាប់ផ្តើមរបស់នាង។ ប៉ុន្តែបើនាងធ្វើទៅមុខមិនបាន នាងមិនអាចធ្វើទៅបានកុំឱ្យខាតពេលកុំឱ្យខាតអ្វីផ្សេងៗបញ្ចប់ត្រឹមនឹងល្អប្រសើរជាង៕

កញ្ញា ប៊ី សុធារី Miss Grand Cambodia 2024 នាពេលថ្មីៗនេះបានបញ្ជាក់ច្បាស់ៗជុំវិញការផ្លាស់ប្តូរផ្នត់គំនិតក្នុងកម្មវិធី Miss Grand ដែលធ្លាប់តែមិនពេញចិត្តបែរជាមកប្រកួតកម្មវិធីនេះវិញរហូតមានគេយករឿងចាស់មកវាយប្រហារ។ ប៊ី សុធារី ថា មនុស្សយើងត្រូវដើរទៅមុខហើយកម្មវិធីនេះបានផ្លាស់ប្តូរពីមួយឆ្នាំទៅមួយឆ្នាំឱ្យតម្លៃស្រ្តីកាន់តែខ្លាំងឡើង បង្ហាញថា ប្រទេសនីមួយៗសុទ្ធតែមានតម្លៃ។ ពេលវេលានឹងផ្លាស់ប្តូរផ្នត់គំនិតដោយឯកឯង។

ចូលរួមក្នុងបទសម្ភាសន៍កម្មវិធី 3Fun ដែលបានចាក់ផ្សាយកាលពីយប់ថ្ងៃសុក្រ ទី២ សីហា ប៊ី សុធារី Miss Grand Cambodia 2024 និងលំដាប់រងផ្សេងទៀតបានជជែកនូវរឿងរ៉ាវជាច្រើន។ ក្នុងនោះដែរ ប៊ី សុធារី បានបញ្ជាក់ពីការផ្លាស់ប្តូរផ្នត់គំនិតរបស់នាងក្នុងកម្មវិធី Miss Grand ក្រោយការដឹកនាំដោយលោក ណាវ៉ាត់ ដែលជាជនជាតិថៃ។

បវរកញ្ញារូបនេះបាននិយាយថា កាលពីមុននាងក៏ធ្លាប់គិតអវិជ្ជមានកម្មវិធី Miss Grand ដែរពីព្រោះកាលពីមុននាងគិតថាកម្មវិធីរាងឆាល់ៗ ញិល គ្មានអ្វីដែលជានាងសោះព្រោះនាងជាមនុស្សម្នាក់ដែលម៉ឺងម៉ាត់ ធ្នឹងៗ គិតថាមិនស័ក្តិសមឱ្យបវរកញ្ញាតំណាងទៅប្រកួតទេ។ ប៉ុន្តែពីមួយឆ្នាំទៅមួយឆ្នាំ នាងសង្កេតឃើញថា Miss Grand International ព្យាយាមផ្លាស់ប្តូរកម្មវិធីរបស់ខ្លួនមានន័យថាតម្លៃស្រ្តីកាន់តែឡើងទៅៗ។ ថ្វីដ្បិតថាតែកម្មវិធីក្នុងស្រុកគាត់ធ្វើបែបផ្សេង ប៉ុន្តែនៅ International គាត់ព្យាយាមបញ្ចេញមកប្រទេសនីមួយៗសុទ្ធតែមានតម្លៃ ចឹងនាងក៏មើលឃើញពីការផ្លាស់ប្តូររបស់កម្មវិធី នាងក៏ចាប់ផ្តើមផ្លាស់ប្តូរផ្នត់គំនិតដែលអាចនិយាយបានថាមនុស្សយើងត្រូវដើរទៅមុខមិនអាចដើរថយក្រោយនោះទេ។
Miss Grand Cambodia 2024 បានបន្តទៀតថា «មានអ្នកខ្លះក៏ធ្លាប់លើកយករឿងនាងនិយាយកាលពីមុនយកមកជាន់នាងវិញក្រោយពេលប្រកួតចប់ ប៉ុន្តែនាងចង់និយាយថាមនុស្សយើងម្នាក់ៗគឺដើរទៅមុខ ថ្ងៃរះថ្មីមិនដែលថ្ងៃត្រលប់ថយក្រោយ។ មនុស្សដែលដើរទៅមុខ ពេលដែលយើងរៀនពីមួយថ្ងៃទៅមួយថ្ងៃយើងនឹងទទួលបាននូវចំណេះដឹងថ្មីៗយើងនឹងមានការផ្លាស់ប្តូរខ្លួនឯង ផ្លាស់ប្តូរផ្នត់គំនិតដោយឯកឯងតែម្តង»។

សុធារី ថានាងឧស្សាហ៍ចេញទៅស្រុកក្រៅនាងតែងតែមើលប្រទេសជុំវិញហ្នឹងហេតុអ្វីបានជាគេជឿនលឿនវិស័យបវរកញ្ញាស្រុកគេជឿនលឿនខ្លាំងដោយសារតែនាងគិតថា Miss Grand ជាកម្មវិធីដែលគេចាប់អារម្មណ៍ខ្លាំង យើងគួរតែពង្រឹង Miss Grand Cambodia យើងឱ្យខ្លាំងយកទៅវាយលុកនៅលើឆាកអន្តរជាតិដូចគ្នា៕