ប្រទេសវៀតណាម ៖ កាលពីថ្ងៃទី៥ ខែសីហា ឆ្នាំ២០២៤ សារព័ត៌មានបរទេសរាយការណ៍ថា យោងតាមទិន្នន័យជាផ្លូវការរបស់ប្រទេសវៀតណាមបញ្ជាក់ថា ក្នុងរយៈពេលត្រឹមតែ៧ខែប៉ុណ្ណោះ (គិតចាប់ពីខែមករា ដល់ខែកក្កដា ឆ្នាំ២០២៤) មានក្រុមហ៊ុនបើកថ្មីនៅវៀតណាម រហូតដល់ជាង៩៥.២០០ក្រុមហ៊ុន ។

សារព័ត៌មានស៊ីនហួរបានរាយការណ៍ពីទីក្រុងហាណូយ ប្រទេសវៀតណាមថា ការិយាល័យស្ថិតិទូទៅរបស់វៀតណាមបានរាយការណ៍ពីចំនួនក្រុមហ៊ុនទើបបង្កើតថ្មី ក្នុងរយៈពេល៧ខែដំបូងឆ្នាំ២០២៤ កន្លងមក គឺស្មើជាង៩៥.២០០ក្រុមហ៊ុន កើនឡើង៦,៣% បើប្រៀបធៀបពីមួយឆ្នាំទៅមួយឆ្នាំ ។ រីឯដើមទុនរបស់ក្រុមហ៊ុនចុះបញ្ជីសរុបស្មើជាង៨៥៤លានលានដុង កើនឡើង២,៤% បើធៀបពីមួយឆ្នាំទៅមួយឆ្នាំ ។

ចំណែកចំនួនក្រុមហ៊ុនបង្កើតថ្មីផ្នែកសេវាកម្ម កើនឡើង៦,៨% និងក្រុមហ៊ុនផ្នែកឧស្សាហកម្ម និងសំណង់ កើនឡើង៤,៨% ។ រីឯក្រុមហ៊ុនផ្នែកកសិកម្ម, ព្រៃឈើ និងនេសាទ ធ្លាក់ចុះ២,៨% បើធៀបនឹងរយៈពេលដូចគ្នាកាលពីឆ្នាំ២០២៣ ។

ទន្ទឹមនឹងនេះ មានក្រុមហ៊ុនជិត៤៤.៣០០ក្រុមហ៊ុន ដែលធ្លាប់ផ្អាកដំណើរការនាពេលកន្លងមក បានបើកដំណើរការអាជីវកម្មឡើងវិញ បើគិតចាប់ពីខែមករា ដល់ខែកក្កដា ឆ្នាំ២០២៤ ។ ប៉ុន្តែមានក្រុមហ៊ុនជាង១៧.៩០០ក្រុមហ៊ុន បានបិទដំណើរការអាជីវកម្មក្នុងរយៈពេល៧ខែ ឆ្នាំ២០២៤ ។

ប្រទេសវៀតណាមបានក្លាយជាគោលដៅសំខាន់មួយដែលក្រុមហ៊ុនបរទេសចាប់អារម្មណ៍វិនិយោគ ដោយសារវៀតណាមមានកត្តាទាក់ទាញជាច្រើន ដូចជា ៖ ថ្លៃឈ្នួលកម្លាំងពលកម្មថោក, ពលរដ្ឋគ្រប់អាយុធ្វើការច្រើន, វិធានការទាក់ទាញការវិនិយោគរបស់រដ្ឋាភិបាល, ទីតាំងល្អបើធៀបនឹងប្រទេសនានាក្នុងតំបន់អាស៊ាន និងស្ថិរភាពនយោបាយ ។

សេដ្ឋវិទូវៀតណាមលើកឡើងថា វៀតណាមជាប្រទេសមួយក្នុងចំណោមប្រទេសមានសេដ្ឋកិច្ចបើកចំហ និងទទួលបានផលប្រយោជន៍យ៉ាងច្រើនពីផ្នែកពាណិជ្ជកម្ម ហើយសេដ្ឋកិច្ចវៀតណាមនឹងកាន់តែលូតលាស់បន្ថែមទៀតនៅឆ្នាំ២០២៤ ។

ទោះយ៉ាងណា នាថ្ងៃអនាគត វៀតណាមនឹងប្រឈមជាមួយការខ្វះខាតកម្លាំងពលកម្មដូចប្រទេសនានាលើពិភពលោកដែរ ។ បើទោះជាវៀតណាមមានកម្លាំងពលកម្មច្រើនរហូតដល់៥៦លាននាក់ក្តី ប៉ុន្តែកម្លាំងពលកម្មវៀតណាមនៅតែតិចជាងចិន រហូតដល់១៤ដង ។ ហេតុនេះ វៀតណាមនឹងប្រើប្រាស់បច្ចេកវិទ្យាដើម្បីជំនួសកម្លាំងមនុស្ស (ឬ Automation) ដែលជាផ្នែកមួយសម្រាប់អភិវឌ្ឍន៍ទីផ្សារការងារ ព្រមទាំងគាំទ្រផ្នែកឧស្សាហកម្ម និងការផលិតក្នុងស្រុក ៕

ប្រទេសជប៉ុន ៖ វាបានធ្វើឱ្យពលរដ្ឋជប៉ុនរិះគ.ន់ ពេញបណ្តាញសង្គម ហើយពួកគេសួរថា តើជប៉ុនហាមឃាត់បុគ្គលិកធ្វើការក្នុងផ្នែកទាំងនេះពាក់វ៉ែនតា គឺជាការសមរម្យដែរឬទេ? អ្នកប្រើប្រាស់បណ្តាញសង្គមខ្លះនិយាយថា ការហាមឃាត់បែបនេះ គឺជាគំនិតមួយហួសសម័យ និងរំលោ.ភ សិទ្ធិផ្ទាល់ខ្លួនបុគ្គល ។

ប្រធានបទជជែកគ្នាក្នុងបណ្តាញសង្គមនេះ ក្រោយពីនារីរត់តុនៅភោជនីយដ្ឋានល្បីមួយនៅប្រទេសជប៉ុន បានសរសេរក្នុងបណ្តាញសង្គមថា នាងត្រូវស្លៀកពាក់ឈុតគីម៉ូណូ ហើយខាងភោជនីយដ្ឋានពុំអនុញ្ញាតឱ្យនាងពាក់វ៉ែនតាធ្វើការទេ ។ មូលហេតុ គឺវ៉ែនតារបស់នាងអាចជ្រុះក្នុងអំឡុងពេលលើកអាហារជូនភ្ញៀវ ហើយការពាក់វ៉ែនតានិយាយជាមួយភ្ញៀវ ហាក់មិនសុភាព ។ មូលហេតុមួយទៀតដែលភោជនីយដ្ឋានហាមនាងពាក់វ៉ែនតាធ្វើការ គឺឈុតគីម៉ូណូជាមួយវ៉ែនតា ពុំសាមសមជាមួយគ្នាយ៉ាងខ្លាំង ។

ប្រធានបទនេះធ្វើឱ្យអ្នកប្រើប្រាស់បណ្តាញសង្គមប្រកែកគ្នាជាច្រើនថា តើមូលហេតុបែបនេះរបស់ភោជនីយដ្ឋានសមហេតុផលដែរឬទេ? លើសពីនេះ មានប្រធានបទមួយទៀតដែលធ្វើឱ្យមានការជជែកគ្នាក្នុងបណ្តាញសង្គម គឺមិនមែនមានតែភោជនីយដ្ឋានតែមួយទេ ដែលពុំអនុញ្ញាតឱ្យបុគ្គលិកស្រីពាក់វ៉ែនតា ប៉ុន្តែនៅមានការងារចំនួន៣ប្រភេទទៀត ក៏ពុំអនុញ្ញាតដូចគ្នា រួមមាន ៖ នារីអាកាសចរណ៍, បុគ្គលិកលក់គ្រឿងសម្អាង និងបុគ្គលិកទទួលភ្ញៀវ ។

បើតាមទិន្នន័យបញ្ជាក់ថា ប្រទេសជប៉ុនពុំអនុញ្ញាតឱ្យនារីអាកាសចរណ៍ពាក់វ៉ែនតាទេ ដោយសារមូលហេតុសុវត្ថិភាពការធ្វើដំណើរតាមយន្តហោះ ។ ឧទាហរណ៍ បើនារីអាកាសចរណ៍ដ៏ស្រស់ស្អាតម្នាក់កំពុងតែស្វែងរកវ៉ែនតាជ្រុះរបស់ខ្លួន ខណៈនាងកំពុងនាំអ្នកដំណើររញ៉ៃរញ៉ៃជាច្រើននាក់ចុះពីយន្តហោះ វាជារូបភាពពុំល្អឡើយ ។

ចំណែកបុគ្គលិកលក់គ្រឿងសម្អាងដែលពួកនាងតំណាងឱ្យភាពស្រស់ស្អាត ហើយអតិថិជនតែងតែចង់ឃើញលទ្ធផលការប្រើប្រាស់គ្រឿងសំអាងនៅលើផ្ទៃមុខបុគ្គលិកផ្នែកលក់ ប៉ុន្តែវ៉ែនតាបែរជាបិទបាំងភាពស្រស់ស្អាតលើផ្ទៃមុខ ។

រីឯបុគ្គលិកទទួលភ្ញៀវ ក៏ជប៉ុនពុំអនុញ្ញាតឱ្យពាក់វ៉ែនតាធ្វើការដូចគ្នាដែរ ដោយសារការពាក់វ៉ែនតានឹងធ្វើឱ្យភ្ញៀវមកទំនាក់ទំនង ឬសាកសួរព័ត៌មានផ្សេងៗមានអារម្មណ៍ថា ពួកគេយឺតយ៉ាវជាងពេលបុគ្គលិកទទួលភ្ញៀវមិនពាក់វ៉ែនតា ។

ហេតុនេះ អ្នកប្រើប្រាស់បណ្តាញសង្គមជប៉ុនភាគច្រើនបានជជែកគ្នាពីបម្រាមទាំងនេះ ជាពិសេស អ្នកមិនឯកសារនឹងបម្រាមខាងលើយល់ឃើញថា នេះជាគំនិតមួយហួសសម័យ និងរំលោភសិទ្ធិផ្ទាល់ខ្លួន ។ ចុះលោកអ្នកវិញយល់ឃើញយ៉ាងណាដែរ ពាក់ព័ន្ធនឹងបម្រាមនេះ?

នៅលើភពផែនដីយើងនេះគឺមានតំបន់ទេសភាពស្រស់ស្អាតជាច្រើនរាប់រយកន្លែងឯណោះ។ ទោះជាយ៉ាងណាបើយោងតាម Condé Nast Traveler ដែលជាគេហទំព័រទេសចរណ៍បែបប្រណិតដ៏ល្បីល្បាញបំផុតមួយ បានឱ្យដឹងថា នៅលើពិភពលោកយើងនេះគឺមានតែ ៥ កន្លែងប៉ុណ្ណោះ ដែលត្រូវបានគេចាត់ទុកថាជាកន្លែងមានទេសភាពអស្ចារ្យបំផុតប្រៀបបានដូចជាឋានសួគ៌អ៊ីចឹង។ ប្រសិនបើយើងមើលត្រឹមរូបភាពគិតថាប្រហែលជាកាត់តហើយ ប៉ុន្តែកន្លែងទាំងនេះគឺពិតជាមែននៅលើផែនដី។

១.តំបន់ Salar de Uyuni ប្រទេសបូលីវី៖ គឺជាផ្ទាំងអំបិលពណ៌សដ៏ធំបំផុតនៅលើពិភពលោក ត្រូវបានគេស្គាល់ថាជាតំបន់ឋានសួគ៌ ដោយសារវាមានទីធ្លាធំទូលាយ និងមានផ្ទៃមេឃពណ៌ខៀវភ្លឺស្រឡះល្អ អមដោយទេសភាពដ៏អស្ចារ្យបំផុតមានតែមួយគ្មានពីរ។ វាត្រូវបានគ្របដណ្ដប់ដោយសំបកអំបិលពីរបីម៉ែត្រ ដែលមានភាពរាបស្មើមិនធម្មតាជាមួយនឹងការប្រែប្រួលកម្ពស់ជាមធ្យមក្នុងរង្វង់មួយម៉ែត្រលើផ្ទៃដីទាំងមូលនៃសាឡារ។ Salar de Uyuni ស្ថិតនៅក្នុងខេត្ត Daniel Campos ភាគនិរតីនៃប្រទេសបូលីវី នៅជិតកំពូលភ្នំ Andes នៅកម្ពស់ ៣,៦៥៦ ម៉ែត្រពីលើនីវ៉ូទឹកសមុទ្រ។

២.តំបន់ Pamukkale ប្រទេសទួគី៖ គឺជាអាងទឹកដ៏ស្រស់ស្អាតបំផុតក្នុងលោកប្រៀបបានដូចជាឋានសួគ៌អ៊ីចឹង។ តំបន់នេះមានភាពល្បីល្បាញខ្លាំងដោយសារសារធាតុរ៉ែកាបូនដែលបានបន្សល់ទុកដោយលំហូរនៃទឹកនិទាឃរដូវ។ Pamukkale មានន័យថា “ប្រាសាទកប្បាស” គឺជាតំបន់ធម្មជាតិមួយនៅក្នុងខេត្ត Denizli ភាគនិរតីនៃប្រទេសទួរគី ដែលតំបន់នេះត្រូវបានទាក់ទាញអ្នកទស្សនាទៅកាន់ប្រភពទឹកកំដៅរបស់វាតាំងពីសម័យបុរាណមកម្លេះ។

៣.កោះ Vaadhoo ប្រទេសម៉ាល់ឌីវ៖ ឆ្នេរនៅកោះ Vaadhoo ក្នុងប្រទេសម៉ាល់ឌីវ បានទទួលការចាប់អារម្មណ៍យ៉ាងខ្លាំងពីសំណាក់ភ្ញៀវទេសចរនៅជុំវិញពិភពលោក ដោយសារទេសភាពនាពេលរាត្រីនៅកោះនេះមានពន្លឺខៀវភ្លឺចែងចាំងចេញពីផ្ទៃសមុទ្រយ៉ាងច្បាស់ល្អ មើលទៅដូចជាផ្កាយកំពុងរះនៅក្រោមបាតសមុទ្រអ៊ីចឹង ដែលបាតុភូតនេះត្រូវបានគេស្គាល់យ៉ាងច្បាស់ថាជា “សមុទ្រនៃផ្កាយ” ។

៤.ឧទ្យានជាតិ Lençóis Maranhenses ប្រទេសប្រេស៊ីល៖ ភូមិសាស្ត្រនៃឧទ្យានជាតិLençóis Maranhenses របស់ប្រទេសប្រេស៊ីលគឺដូចជាមិនមែននៅលើផែនដីអ៊ីចឹង ដោយសារទេសភាពនៃឧទ្យានជាតិនេះគឺមើលទៅពិតជាអស្ចារ្យខ្លាំងមែនទែន។ កន្លែងនេះប្រៀបបានដូចជាឋានសួគ៌ មានបឹងខ្សាច់ដ៏ធំល្វឹងល្វើយនៃវាលខ្សាច់ពណ៌សខ្ពស់ និងបឹងទឹកភ្លៀងតាមរដូវ ដែលស្រស់ស្អាតខ្លាំងមិនអាចពណ៌នាបាន។

៥.ទឹកធ្លាក់ Victoria៖ គឺជាទឹកធ្លាក់នៅលើទន្លេ Zambezi ដែលមានទីតាំងនៅព្រំដែនរវាងប្រទេស Zambia និង Zimbabwe។ វាគឺជាទឹកធ្លាក់ដ៏ធំបំផុតមួយរបស់ពិភពលោក ដែលមានទទឹង ១,៧០៨ ម៉ែត្រ និងជាតំបន់រស់នៅរបស់រុក្ខជាតិ និងសត្វគ្រប់ប្រភេទ។ ទឹកធ្លាក់ Victoria ត្រូវបានគេស្គាល់ថាជាទឹកជ្រោះនៃឋានសួគ៌ ដោយសារទេសភាពដ៏អស្ចារ្យគ្មានពីររបស់វា និងកម្ពស់ទឹកដ៏សែនខ្ពស់របស់វា ធ្វើឱ្យទីនេះត្រូវបានគេប្រៀបដូចជាឋានសួគ៌៕

ប្រទេសកូរ៉េខាងត្បូង ៖ សារព័ត៌មានបរទេសរាយការណ៍ថា ក្នុងអំឡុងពេលរថយន្តអគ្គិសនីទំនើប១គ្រឿង ត្រូវបានម្ចាស់ចតនៅជាន់ក្រោមដីរបស់អាផាតមិន មួយកន្លែងនៅប្រទេសកូរ៉េខាងត្បូង ស្រាប់តែហុយផ្សែងទ្រលោម និងផ្ទុះឆេះដោយខ្លួនឯង ។ បន្ទាប់មក វាក៏ឆេះរាលដាលដល់រថយន្តជាង១៤០គ្រឿងទៀតដែលចតនៅក្បែរគ្នា ហើយធ្វើឱ្យមនុស្សក្នុងអាផាតមិន ជាច្រើននាក់រងរបួស និងបញ្ជូនទៅមន្ទីរពេទ្យ ។

កាលពីថ្ងៃទី៣ ខែសីហា ឆ្នាំ២០២៤ គេហទំព័រ Koreajoongangdaily រាយការណ៍ថា ហេតុការណ៍ដ៏រន្ធត់នេះបានកើតឡើងនៅប្រទេសកូរ៉េខាងត្បូង ក្រោយពីរថយន្តអគ្គិសនីទំនើប១គ្រឿង ផ្ទុះឆេះនៅចំណតរថយន្តក្រោមដីរបស់អាផាតមិន មួយកន្លែងនៅទីក្រុង Incheon កាលពីថ្ងៃទី១ ខែសីហា កន្លងមក ។ វាធ្វើឱ្យមានមនុស្សរងរបួសត្រូវបញ្ជូនទៅមន្ទីរពេទ្យ ចំនួន២៣នាក់ ប៉ុន្តែជនរងគ្រោះទាំងអស់ពុំមានគ្រោះថ្នាក់ដល់ជីវិតទេ ។

បើតាមរូបភាពក្នុងកាមេរ៉ាសុវត្ថិភាពបង្ហាញថា មានផ្សែងហុយចេញពីរថយន្តអគ្គិសនី១គ្រឿងពណ៌ស ដោយពុំដឹងមូលហេតុ ខណៈម្ចាស់របស់វាចតនៅចំណតក្រោមដី ។ បន្ទាប់មក ភ្លើងក៏ឆាបឆេះរថយន្តទាំងមូល និងរាលដាលទៅរថយន្តផ្សេងទៀតក្នុងរយៈពេលខ្លីបំផុត ។

អាផាតមិន នេះមានមនុស្សស្នាក់នៅចំនួន១.៥៨១គ្រួសារ ហើយវាធ្វើឱ្យអ្នកស្នាក់នៅទីនេះភ្ញាក់ផ្អើល និងទូរស័ព្ទប្តឹងសមត្ថកិច្ច ចំនួន១៩៧លើក ។ ក្រោយមក ភ្នាក់ងារពាក់ព័ន្ធក៏បានបញ្ជូនភ្នាក់ងារសង្គ្រោះមកកាន់អាផាតមិន ចំនួន១៧៧នាក់ ដើម្បីគ្រប់គ្រងស្ថានការណ៍ ។

សមត្ថកិច្ចបានជួយសង្គ្រោះមនុស្សចំនួន២៣នាក់បញ្ជូនទៅមន្ទីរពេទ្យ ដោយសារពួកគេស្រូបផ្សែង ។ អ្នករងរបួសម្នាក់ក្នុងចំណោមនេះ គឺជាភ្នាក់ងារពន្លត់ភ្លើងដែលមានអាការៈឈឺក្បាល ហើយ៧នាក់ទៀតជាកុមារអាយុក្រោម១០ឆ្នាំ ។ ក្រៅពីនេះ ភ្នាក់ងារសង្គ្រោះបានជម្លៀសមនុស្ស១០៣នាក់ចេញពីបរិវេណក្បែរនេះ និងជួយសង្គ្រោះមនុស្ស១០៦នាក់ទៀតនៅតាមជណ្តើរ និងយ៉ផ្នែកខាងមុខ ដែលរត់គេចពីផ្សែង ។

ក្រោយកើតហេតុ សមត្ថកិច្ចបញ្ជាក់ថា មានរថយន្តប្រមាណ១៤០គ្រឿងដែលចតក្បែររថយន្តអគ្គិសនីផ្ទុះបានខូចខាត ហើយរថយន្តចំនួន៤០គ្រឿងទៀតត្រូវភ្លើងឆេះខ្ទេច ។ អ្នករស់នៅក្នុងអាផាតមិន ចំនួន៤៨០គ្រួសាររងផលប៉ះពាល់ដោយសារដាច់ចរន្តអគ្គិសនី ហើយអាជ្ញាធរបានជម្លៀសមនុស្ស១២១នាក់ទៅស្នាក់នៅកន្លែងផ្សេង ។

សមត្ថកិច្ចបន្តថា រថយន្តបង្កហេតុជារថយន្តអគ្គិសនីប្រភេទ Mercedes-Benz ហើយសមត្ថកិច្ចនឹងស៊ើបអង្កេតរកមូលហេតុ ។ បើតាមរបាយការណ៍បញ្ជាក់ថា រថយន្ត Mercedes-Benz EQE ត្រូវបានដាក់លក់នៅកូរ៉េខាងត្បូងកាលពីឆ្នាំ២០២២ និងប្រើប្រាស់ថ្មប្រភេទ CATL គឺជាថ្មរបស់ក្រុមហ៊ុនផលិត និងអភិវឌ្ឍន៍ថ្មរថយន្តអគ្គិសនីលំដាប់ពិភពលោក មកពីប្រទេសចិន ។

ចំណែកក្រុមហ៊ុន Mercedes-Benz នៅកូរ៉េខាងត្បូងបញ្ជាក់ថា នឹងសហការយ៉ាងពេញទំហឹងជាមួយស្ថាប័នពាក់ព័ន្ធដើម្បីស្រាវជ្រាវរកមូលហេតុពិតប្រាកដ ប៉ុន្តែក្រុមហ៊ុនពុំបានបញ្ជាក់ចំណុចលម្អិតពីប្រភេទរថយន្តត្រូវភ្លើងឆេះ និងថ្មរបស់វាទេ ៕

ប្រទេសចិន ៖ កាលពីថ្ងៃទី៣ ខែសីហា ឆ្នាំ២០២៤ សារព័ត៌មានបរទេសរាយការណ៍ថា ចុងភៅ២នាក់ធ្វើការក្នុងសណ្ឋាគារមួយកន្លែងនៅខេត្ត Jiangsu ប្រទេសចិន ត្រូវបានតុលាការកាត់ក្តីឱ្យជាប់ពន្ធនា.គារ ក្រោយពីពួកគេលួចយកគ្រឿងផ្សំ (មានបន្លែ និងសាច់) ផុតសុពលភាពមកចម្អិនអាហារឱ្យភ្ញៀវបរិភោគ ។ បន្ទាប់មក ពួកគេក៏ដាក់ថ្នាំបាត់ឈឺពោះក្នុងអាហារ ព្រោះសង្ឃឹមថា នឹងជួយកាត់បន្ថយអាការៈពុលអាហាររបស់ភ្ញៀវ ។

នៅថ្ងៃទី៣០ ខែកក្កដា ការិយាល័យគ្រប់គ្រងទីផ្សារប្រចាំតំបន់ Chongzhou ក្នុងទីក្រុង Nantong ប្រកាសថា ចុងភៅ២នាក់ដែលធ្វើការក្នុងសណ្ឋាគារមួយ ត្រូវបានតុលាការកាត់ទោសឱ្យជាប់ពន្ធនាគារ និងតម្រូវឱ្យបង់ប្រាក់ពិន័យចំនួន១៦ម៉ឺនយាន់ (ឬស្មើ២១.៨៨៨ដុល្លារអាមេរិក) ដោយសារពួកគេយកអាហារប៉ះពាល់សុខភាពឱ្យភ្ញៀវបរិភោគ ។

ចុងភៅទាំង២រូបមានចេតនាយកគ្រឿងផ្សំផុតសុពលភាពមកចម្អិនអាហារឱ្យភ្ញៀវ បន្ទាប់មក ពួកគេក៏លួចដាក់ថ្នាំ Gentamicin Sulfate ចូលក្នុងអាហារ ដែលជាថ្នាំព្យាបាលការចុកពោះ ដោយសារពួកគេចង់កាត់បន្ថយគ្រោះថ្នាក់សុខភាពបណ្តាលពីការចុកពោះរបស់ភ្ញៀវ ។ បើតាមការស៊ើបអង្កេតរបស់សមត្ថកិច្ចបញ្ជាក់ថា កន្លងមក ចុងភៅទាំង២នាក់នេះធ្លាប់លួចដាក់ថ្នាំ Gentamicin Sulfate ក្នុងអាហារភ្ញៀវ មិនក្រោម១.៦១២ចានទេ ។

គេហទំព័រ 8World រាយការណ៍ថា បុគ្គលិកម្នាក់របស់សណ្ឋាគារ Guanyinshan Garden Hotel បានរាយការណ៍ពីទង្វើរបស់ចុងភៅទាំង២នាក់ ទៅកាន់ការិយាល័យគ្រប់គ្រងទីផ្សារឱ្យបានជ្រាប ។ បុគ្គលិកសណ្ឋាគាររូបនេះនិយាយថា ពួកចុងភៅបានលួចដាក់ថ្នាំ Gentamicin Sulfate ក្នុងចានអាហារ១ ក្នុងចំណោមអាហារលើតុ ដើម្បីឱ្យប្រាកដចិត្តថា ថ្នាំនឹងធ្វើការមានប្រសិទ្ធភាព ។

សមត្ថកិច្ចក្នុងទីក្រុង Nantong បានរកឃើញថ្នាំនេះក្នុងបន្ទប់ចុងភៅ ចំនួន១០១ប្រអប់ ។ បុគ្គលិកម្នាក់ឈ្មោះ Zhang បានកុម្ម៉ង់ទិញថ្នាំទាំងអស់នេះ គឺទិញម្តង១០០ប្រអប់ ដោយគ្មានវេជ្ជបញ្ជាពីគ្រូពេទ្យ ។

តុលាការកាត់ក្តីថា ចុងភៅទាំង២នាក់បានល្មើសច្បាប់ដោយចម្អិនអាហារមានមេរោគឱ្យភ្ញៀវ ព្រមទាំងកាត់ទោសឱ្យចុងភៅម្នាក់ជាប់ពន្ធនាគាររយៈពេល២ឆ្នាំ និងម្នាក់ទៀតជាប់ពន្ធនាគារ១ឆ្នាំ ៦ខែ ហើយអ្នកទាំងពីរត្រូវបង់ប្រាក់ពិន័យចំនួន២១.៨៨៨ដុល្លារអាមេរិ ។ សារព័ត៌មានចិន The Paper រាយការណ៍ថា វាជាបទល្មើសមួយដើម្បីបិទបាំងបទល្មើសមួយទៀត និងជាទង្វើដ៏ឆោតល្ងង់បង្ហាញពីភាពលោភលន់យ៉ាងខ្លាំង ៕