អង់គ្លេស៖ ពិធីបុណ្យស្រា..ត Nudefest គឺជាពិធីដ៏ធំបំផុតមួយរបស់ចក្រភពអង់គ្លេស បានទាក់ទាញភ្ញៀវទេសចរទូទាំងពិភពលោក ដែលចំនួនភ្ញៀវចូលរួមគឺច្រើនជាងទ្វេរដងបើធៀបទៅនឹងឆ្នាំមុន។
Nudefest គឺជាពិធីបុណ្យរដូវក្តៅដែលមានភាពសប្បាយរីករាយ ញ៉ាំអាហារចម្រុះជួបជុំគ្នា និងសកម្មភាពបន្ធូរអារម្មណ៍។ ដោយព្រឹត្តិការណ៍នេះមិនមានសកម្មភាពលេងសើច ឬប្រមាថមើលងាយនោះទេ ព្រោះអ្នកចូលរួមទាំងអស់សុទ្ធតែមកពីសហគមន៍ដូចគ្នា និងបានចែករំលែកមតិដូចគ្នាចំពោះការចូលចិត្តអាក្រាតកាយ ព្រមទាំងចែករំលែកបរិយាកាសរីករាយ និងវិជ្ជមានឱ្យគ្នាទៅវិញទៅមក។

នៅក្នុងរោងមហោស្រព មនុស្សជាច្រើនបានអង្គុយស្តាប់បទបង្ហាញ ហើយនិយាយអំពីប្រធានបទទាំងអស់នៅក្នុងជីវិតរបស់ពួកគេ ខណៈអ្នកផ្សេងទៀតកំពុងអង្គុយនៅក្នុងសូណា និងអាងទឹកក្តៅ សម្រាក ឬលេងកីឡា ហើយក៏មានមនុស្សខ្លះទៀតដេកលើខ្នើយធំ ក្បែរនោះកំពុងធ្វើសមាធិ។ នៅខាងក្រៅគឺពោរពេញទៅដោយភ្ញៀវធ្វើដំណើរជុំវិញតំបន់ពិធីបុណ្យ ដោយអ្នកផ្សេងទៀតចូលរួមដំណើរទេសចរណ៍កសិដ្ឋាន cider ហើយយន្តហោះគ្មានមនុស្សបើកក៏បានហោះហើរដើម្បីកត់ត្រាព្រឹត្តិការណ៍នេះផងដែរ។ ព្រឹត្តិការណ៍ប្រចាំឆ្នាំសម្រាប់អ្នកចូលចិត្តស្រា..តត្រូវបានផ្តួចផ្តើមដោយលោក Andrew Welch អ្នកនាំពាក្យរបស់ British Naturism ក្នុងឆ្នាំ ២០០៧។

ដូច្នេះនៅឆ្នាំ ២០២៤ ពិធីបុណ្យនេះធ្វើឡើងនៅចុងខែមិថុនា ដែលមានរយៈពេលមួយសប្តាហ៍នៅក្នុងកន្លែងបោះជំរុំដ៏ធំដែលមានភ្ញៀវ ៧០០ នាក់នៅ Somerset County ដែលទីក្រុងជនបទមួយនៃប្រទេសអង់គ្លេស ដោយមានអ្នកចូលរួមមកពីទូទាំងប្រទេស និងភ្ញៀវទេសចរអន្តរជាតិ។ រាល់យប់នៃពិធីបុណ្យនេះ គឺមានសំឡេងដែលបញ្ចេញខ្លាំង និងរស់រវើកបំផុត ដោយមានក្រុមតន្រ្តីទាំងបុរាណ និងសម័យ ធ្វើការប្រគុំតន្ត្រី ហើយក៏មានការរាំឌីស្កូ ខារ៉ាអូខេ និងកម្រងសំណួរតន្ត្រីផងដែរ។ លោក Jeremy ដែលជាអ្នកមកទស្សនាពិធីបុណ្យនេះបាននិយាយថា លោកចូលចិត្តពីធីបុណ្យ Nudefest ណាស់ដោយសារតែមានឱកាសជួបមិត្តចាស់ និងបង្កើតមិត្តថ្មី។

អ្នកទេសចរម្នាក់ឈ្មោះ Richard ក៏បាននិយាយដែរថា លោកចូលចិត្តការរៀបចំព្រឹត្តិការណ៍ដែលមានសកម្មភាពជាច្រើនបែបនេះ។ រីឯភ្ញៀវទេសចរម្នាក់ទៀតឈ្មោះ Charley ដែលបានចូលរួមក្នុងពិធីបុណ្យនេះ ៣ ឆ្នាំជាប់ៗគ្នាបាននិយាយថា ពិធីបុណ្យនេះមានសុវត្ថិភាព មនុស្សគ្រប់គ្នាបានរកឃើញសេរីភាព រំដោះខ្លួន និងស្វែងរកមិត្តភាព។ ក្នុងពិធីបុណ្យស្រា..តនេះ មហាជនយល់ថា ពួកគេលែងខ្លាចធាត់ ឬស្គមទៀតហើយ ដោយពួកគេចាប់ផ្តើមសន្ទនាជាមួយអ្នកដទៃយ៉ាងងាយស្រួលដោយមិនខ្លាចការរើសអើង ដូច្នេះមនុស្សដែលចូលរួមពិធីនេះច្រើនយកចិត្តទុកដាក់តែលើជីវិតស្នេហាជំនួសឱ្យរូបរាង ឬទ្រព្យសម្បត្តិ៕

អាស៊ីអាគ្នេយ៍ ឬតំបន់អាស៊ានមានប្រទេសទាំងអស់ចំនួន ១១ ដែលប្រទេសនីមួយៗសុទ្ធតែមានឡាន ម៉ូតូគ្រប់ម៉ូត ដោយយានយន្តទាំងនេះគឺជាមធ្យោបាយធ្វើដំណើរទៅកាន់កន្លែងជាច្រើនយ៉ាងងាយស្រួលបំផុត និងជាមធ្យោបាយដឹកជញ្ជូនដ៏ល្អបំផុត។ ទោះជាយ៉ាងណាក្នុងចំណោមប្រទេសទាំង ១១ មានប្រទេសអាស៊ីអាគ្នេយ៍តែ ៥ ប៉ុណ្ណោះដែលមានប្រជាជននិយមជិះម៉ូតូច្រើនជាងគេ ពោលគឺមានម៉ូតូច្រើនជាងឡាន ដោយសារតម្លៃម៉ូតូសមរម្យ ងាយស្រួលធ្វើដំណើរតាមដងផ្លូវដែលមានការកកស្ទះ។ ដូច្នេះប្រទេសទាំង ៥ ដែលមានប្រជាជនជិះម៉ូតូច្រើនជាងគេរួមមាន៖

១.ប្រទេសថៃ៖ យោងតាមគេហទំព័រ Seasia ថៃគឺជាប្រទេសដែលមានម៉ូតូច្រើនជាងគេបង្អស់នៅអាស៊ីអាគ្នេយ៍ ហើយក៏ច្រើនជាងគេបង្អស់នៅលើពិភពលោកផងដែរ។ ដោយបច្ចុប្បន្នប្រទេសនេះមានប្រជាជនជិះម៉ូតូចំនួន ៨៧% ហើយម៉ូតូដែលចុះបញ្ជីមានរហូតដល់ ២០ លានគ្រឿង និងម៉ូតូដែលមិនទាន់បានចុះបញ្ជីមានរាប់លានគ្រឿងទៀត។

២.ប្រទេសវៀតណាម៖ វៀតណាមក៏ជាប្រទេសដែលមានប្រជាជននិយមជិះម៉ូតូច្រើនជាងគេទីពីរនៅលើពិភពលោកផងដែរ។ ប្រទេសនេះមានម៉ូតូប្រហែល ៤៥ លានគ្រឿង ប្រមាណ ៨៦% នៃប្រជាជនសុទ្ធតែមានម៉ូតូជិះ។ យោងតាមរបាយការណ៍ បច្ចុប្បន្នការលក់ម៉ូតូនៅតែបន្តកើនឡើងឥតឈប់ឈរ ដោយផ្លូវភាគច្រើនក្នុងទីក្រុងហាណូយត្រូវបានកាន់កាប់ដោយម៉ូតូប្រហែល ៥ លានគ្រឿង។

៣.ប្រទេសឥណ្ឌូនេស៊ី៖ ជារៀងរាល់ថ្ងៃប្រទេសឥណ្ឌូនេស៊ីមានម៉ូតូប្រហែល ១៥ លានគ្រឿងធ្វើដំណើរឆ្លងកាត់ទីក្រុង ខណៈរថយន្តក្នុងប្រទេសនេះមានត្រឹមតែ ៥ លានគ្រឿងប៉ុណ្ណោះ។ ដោយជាទូទៅឥណ្ឌូណេស៊ី គឺជាទីផ្សារដ៏ធំបំផុតរបស់ពិភពលោកសម្រាប់ម៉ូតូ នេះបើយោងតាមការស្ទង់មតិរបស់ AISI បច្ចុប្បន្នឥណ្ឌូណេស៊ីមានម៉ូតូប្រហែល ៨០ លានគ្រឿងនៅក្នុងប្រទេស ហើយប្រជាជនដែលនិយមជិះម៉ូតូមានរហូតដល់ ៨៥%។

៤.ប្រទេសម៉ាឡេស៊ី៖ ប្រទេសម៉ាឡេស៊ីក៏មិនធម្មតាដែរ ដោយប្រទេសនេះមានម៉ូតូសរុបជាង ១៣ លានគ្រឿងស្មើនឹងចំនួនរថយន្ត។ ម៉ូតូគឺជាមធ្យោបាយធ្វើដំណើរដ៏ពេញនិយមបំផុតក្នុងប្រទេសម៉ាឡេស៊ី ដោយមានប្រជាជនប្រមាណ ៨៣% សុទ្ធតែនិយមជិះម៉ូតូ។

៥.ប្រទេសហ្វីលីពីន៖ ចំណែកប្រទេសហ្វីលីពីនវិញគឺជាប់ចំណាត់ថ្នាក់លេខ ៥ នៅអាស៊ីអាគ្នេយ៍ និងលេខ ១០ នៅលើពិភពលោក ដែលមានប្រជាជនជិះម៉ូតូច្រើនជាងគេប្រមាណ ៣២%។ រីឯប្រទេសផ្សេងទៀតដូចជាកម្ពុជា សិង្ហបុរី មីយ៉ាន់ម៉ា ឡាវ ទីម័រ និងប្រ៊ុយណេ គឺមិនមានចំណាត់ថ្នាក់នោះទេ ដោយសារប្រទេសទាំង ៦ នេះមិនសូវមានប្រជាជននិយមជិះម៉ូតូឡើយ។ នេះបើតាមការប៉ាន់ប្រមាណរបស់រដ្ឋាភិបាលកាលពីឆ្នាំ ២០២២ កម្ពុជាមានរថយន្តត្រឹមតែ ៩២០.០០០ គ្រឿង និងម៉ូតូ ៥.២ លានគ្រឿងប៉ុណ្ណោះ៕

ប្រទេសជប៉ុន ៖ កាលពីថ្ងៃទី១១ ខែសីហា ឆ្នាំ២០២៤ សារព័ត៌មានបរទេសរាយការណ៍ថា អាជ្ញាធរជប៉ុនបានស្នើឱ្យពលរដ្ឋចៀសវាងការទិញទំនិញចាំបាច់ផ្សេងៗស្តុកទុកច្រើន ដោយសារពលរដ្ឋបារម្ភថា ជប៉ុននឹងកើតគ្រោះធម្មជាតិរញ្ជួយដីយ៉ាងខ្លាំងនាពេលខាងមុខ ។ ហេតុនេះ វាជំរុញឱ្យតម្រូវការទិញឧបករណ៍ការពារគ្រោះមហន្តរា.យ និងទំនិញចាំបាច់ប្រើប្រាស់ប្រចាំថ្ងៃកើនឡើង នៅថ្ងៃទី១០ ខែសីហា ។

ការិយាល័យឧតុនិយមជប៉ុនបានប្រកាសថា ជប៉ុននឹងមានគ្រោះធម្មជាតិរញ្ជួយដីយ៉ាងខ្លាំងក្លានាពេលខាងមុខ ក្រោយជប៉ុនមានគ្រោះរញ្ជួយដីកម្រិត៧.១រិចទ័រ នៅតំបន់ភាគខាងត្បូងប្រទេស កាលពីថ្ងៃទី៨ ខែសីហា កន្លងមក ។ ហេតុការណ៍នេះបណ្តាលឱ្យពលរដ្ឋជប៉ុនរងរបួសជិត២០នាក់ ហើយធ្វើឱ្យពលរដ្ឋជប៉ុនសម្រុកទិញទំនិញយ៉ាងច្រើនស្តុកទុក ។

ហាងលក់ទំនិញមួយកន្លែងនៅទីក្រុងតូក្យូ បានបិទស្លាកសូមទោសអតិថិជនសម្រាប់ការខ្វះខាតទំនិញមួយចំនួន រួមទាំងខ្វះទឹកបរិសុទ្ធលក់ផងដែរ ។ ហាងនេះបញ្ជាក់ថា ការខ្វះខាតទំនិញលក់ឱ្យអតិថិជន ក្រោយការចុះផ្សាយព័ត៌មានរបស់ប្រព័ន្ធផ្សព្វផ្សាយអំពីគ្រោះរញ្ជួយដីធ្ងន់ធ្ងរ ។

កាលពីព្រឹកថ្ងៃទី១០ ខែសីហា គេហទំព័រដ៏ល្បីល្បាញមួយរបស់ជប៉ុនបញ្ជាក់ថា បង្គន់ចល័ត, ស្បៀងអាហារ និងទឹកបរិសុទ្ធ គឺជាទំនិញលក់ដាច់បំផុត ។ រីឯអាជីវករលក់ទំនិញរាយនៅតាមឆ្នេរសមុទ្រនិយាយថា តម្រូវការទិញឧបករណ៍ការពារគ្រោះមហន្តរាយ ក៏កើនឡើងដូចគ្នាដែរ ។

កន្លងមក នៅមហាសមុទ្រប៉ាស៊ីហ្វិកធ្លាប់កើតគ្រោះធម្មជាតិរញ្ជួយដីយ៉ាងខ្លាំងក្លា រហូតដល់កម្រិត៨រិចទ័រ ទៅ៩រិចទ័រ នៅរៀងរាល់១០០ឆ្នាំ ឬ២០០ឆ្នាំ ។ អាជ្ញាធរជប៉ុនក៏ធ្លាប់សន្និដ្ឋានថា រយៈពេល៣០ឆ្នាំទៀត គ្រោះធម្មជាតិរញ្ជួយដីយ៉ាងខ្លាំងនឹងកើតឡើងនៅជប៉ុន ហើយការសន្និដ្ឋាននេះមានភាពត្រឹមត្រូវរហូតដល់៧០% ។

ទោះយ៉ាងណា បណ្តាអ្នកជំនាញនិយាយថា បើទោះជាជប៉ុនប្រឈមនឹងគ្រោះរញ្ជួយដីខ្លាំងក្តី ប៉ុន្តែវានៅតែស្ថិតក្នុងកម្រិតទាប ខណៈក្រសួងកសិកម្ម និងនេសាទបានអំពាវនាវកុំឱ្យពលរដ្ឋទិញទំនិញស្តុកទុកច្រើនពេក ។ ពលរដ្ឋជប៉ុនចំនួន១២៥លាននាក់ បានរស់នៅតំបន់ដែលប្រឈមនឹងគ្រោះរញ្ជួយដីរហូតដល់១.៥០០លើកក្នុង១ឆ្នាំ ប៉ុន្តែគ្រោះរញ្ជួយដីភាគច្រើនមិនធ្ងន់ធ្ងរ ៕

នៅក្នុងសេចក្តីថ្លែងការណ៍មួយទៅកាន់ Dispatch នៅថ្ងៃទី៩ ខែសីហា ស្ថានីយ៍ប៉ូលិស Yongsan បាននិយាយថា ម៉ូតូអគ្គិសនីដែលបើកបរដោយ SUGA សមាជិក BTS មិនត្រូវបានគេចាត់ទុកថាជា «ឧបករណ៍ចល័តផ្ទាល់ខ្លួន» ប៉ុន្តែជាយានជំនិះ។ ឧបករណ៍ចល័តផ្ទាល់ខ្លួនត្រូវបានកំណត់ថាជាឧបករណ៍ដែលមានល្បឿនអតិបរមា ២៥ គីឡូម៉ែត្រក្នុងមួយម៉ោង និងទម្ងន់ក្រោម ៣០ គីឡូក្រាម។ ប៉ុន្តែឧបករណ៍ដែល SUGA កំពុងបើកបរត្រូវបានចាត់ថ្នាក់ជាកង់ម៉ូតូ ឬម៉ូតូអគ្គិសនី ដែលត្រូវបានគេចាត់ទុកដូចគ្នានឹងការប្រតិបត្តិការរថយន្តក្រោមច្បាប់កូរ៉េខាងត្បូង។

ប៉ូលិស Yongsan បាននិយាយថា «SUGA កំពុងដំណើរការម៉ូតូអគ្គីសនី។ បន្ទាប់ពីបានស៊ើបអង្កេតឧបករណ៍នេះ យើងបានរកឃើញថាវាមិនត្រូវបានបញ្ចូលក្នុងបញ្ជីឧបករណ៍ចល័តផ្ទាល់ខ្លួនទេ។ ប្រតិបត្តិការឧបករណ៍ចល័តផ្ទាល់ខ្លួននឹងនាំឱ្យមានវិធានការរដ្ឋបាល។ ម៉ូតូរបស់ SUGA មិនមែនជាឧបករណ៍ចល័តផ្ទាល់ខ្លួនទេ។ ដូច្នេះលោកអាចទទួលទោសព្រហ្មទណ្ឌពីបទបើកបរក្រោមឥទ្ធិពល»។ នេះបើតាមការចុះផ្សាយរបស់សារព័ត៌មាន all Kpop ។

ការស៊ើបអង្កេតរបស់ប៉ូលិសមិនទាន់ចាប់ផ្តើមនៅឡើយទេ ប៉ុន្តែនៅក្រោមច្បាប់ចរាចរណ៍ផ្លូវគោក ជនណាដែលបើកបរមានជាតិអាល់កុលក្នុងឈាមចាប់ពី០.០៨% ឡើងទៅ អាចប្រឈមនឹងការផាកពិន័យពី ៥ លានវ៉ុន (ប្រមាណជាង ៣០០០ដុល្លារ) ទៅ ១០ លានវ៉ុន (ជាង៧០០០ ដុល្លារ) ឬ ផ្តន្ទាទោសដាក់ពន្ធនាគារពី ១ ទៅ ២ ឆ្នាំ។ សមាគមកម្លាំងយោធាបានបញ្ជាក់រួចហើយថា SUGA ដែលបច្ចុប្បន្នកំពុងបម្រើយោធាជាកាតព្វកិច្ចរបស់លោកនឹងមិនទទួលទណ្ឌកម្មបន្ថែមពីយោធាទេ។

ដូចដែលបានរាយការណ៍ពីមុន BIGHIT MUSIC បានទទួលការរិះគន់បន្ទាប់ពីព័ត៌មាននៃការចោទប្រកាន់ DUI របស់ SUGA បានធ្វើឱ្យមានចំណងជើងព័ត៌មានសម្រាប់ការចោទប្រកាន់ថាព្យាយាម «បន្ថយ» ទំនាញនៃបញ្ហារបស់សិល្បករខ្លួននិងបានសូមអភ័យទោសចំពោះទង្វើមួយនេះរបស់ SUGA៕

ប្រទេសអ៊ីរ៉ង់ ៖ យើងសង្កេតឃើញថា បច្ចុប្បន្ន នៅបណ្តាប្រទេសនានាបានអនុញ្ញាតឱ្យស្ត្រីមានសិទ្ធិធ្វើការដូចបុរសដែរ ហើយមានក្រុមហ៊ុនខ្លះលើកទឹកចិត្តស្ត្រីឱ្យក្លាយជានាយិកាដឹកនាំក្រុមហ៊ុនទៀតផង ។ បើស្ត្រីមានចំណេះដឹង និងជំនាញគ្រប់គ្រាន់ ពួកនាងអាចដាក់ពាក្យចូលធ្វើការតាមក្រុមហ៊ុនឯកជន និងទទួលបានប្រាក់ខែស្មើបុរស ។ ប៉ុន្តែស្ត្រីនៅប្រទេសអ៊ីរ៉ង់ខុសប្លែកពីនេះ គឺពួកនាងអាចធ្វើការនៅកន្លែងណាមួយបាន លុះត្រាតែមានលិខិតអនុញ្ញាតពីស្វាមីជាមុន ។

អ្នកស្រី ណេដា បានបញ្ចប់ការសិក្សាថ្នាក់អនុបណ្ឌិតផ្នែកវិស្វកម្មប្រេង និងឧស្ម័ននៅប្រទេសអ៊ីរ៉ង់ និយាយថា ៖ «ពេលខ្ញុំមកសម្ភាសន៍ធ្វើការ គេទាមទារឯកសារអនុញ្ញាតធ្វើការដោយមានស្វាមីខ្ញុំចុះហត្ថលេខា ដើម្បីបញ្ជាក់ថា ស្វាមីបានអនុញ្ញាតឱ្យខ្ញុំធ្វើការ» ។ អ្នកស្រីមានអារម្មណ៍ខ្មាស់អៀនណាស់ ហើយប្រាប់ពួកគេថា ខ្ញុំជាមនុស្សធំ ហើយអាចសម្រេចចិត្តដោយខ្លួនឯង ។

អ្នកស្រី ណេដា មិនមែនជាមនុស្សតែម្នាក់ទេ ដែលជួបហេតុការណ៍បែបនេះ ពីព្រោះបើតាមច្បាប់របស់ប្រទេសអ៊ីរ៉ង់ចែងថា ស្ត្រីដែលរៀបការរួចត្រូវតែទទួលការអនុញ្ញាតពីស្វាមីជាមុនសិន មុនពេលពួកនាងចូលធ្វើការ ។ នេះគ្រាន់តែជាឧបសគ្គមួយប៉ុណ្ណោះក្នុងចំណោមឧបសគ្គផ្នែកច្បាប់ជាច្រើន ដែលស្ត្រីអ៊ីរ៉ង់គ្រប់រូបត្រូវប្រឈមក្នុងការងារ ។

យោងតាមរបាយការណ៍ឆ្នាំ២០២៤ របស់ធនាគារពិភពលោក បានចាត់ចំណាត់ថ្នាក់ថា អ៊ីរ៉ង់ជាប្រទេសមួយក្នុងចំណោមប្រទេសអាក្រក់បំផុត ដោយសារមានរបាំងផ្លូវច្បាប់ទាក់ទងនឹងយេនឌ័រនៅកន្លែងការងារ ។ រីឯប្រទេសមានចំណាត់ថ្នាក់ទាបជាងអ៊ីរ៉ង់ រួមមាន ៖ ប្រទេសយេម៉ែន និងតំបន់ហ្គាសា របស់ប្រទេសប៉ាឡេស្ទីន ។

ដូចគ្នានេះ របាយការណ៍ «Global Gender Gap ប្រចាំឆ្នាំ២០២៤» របស់ World Economic Forum បញ្ជាក់ថា ប្រទេសអ៊ីរ៉ង់មានអត្រាការចូលធ្វើការរបស់ស្ត្រីទាបបំផុត ក្នុងចំណោមប្រទេសចំនួន១៤៦ ដែលបានស្ទង់មតិ ។ បើទោះជាមានស្ត្រីជាង៥០% ក្នុងចំណោមស្ត្រីចូលរួមការស្ទង់មតិ បានបញ្ចប់ការសិក្សានៅសាកលវិទ្យាល័យក្តី ប៉ុន្តែពួកនាងបានចូលធ្វើការត្រឹមតែ១២% ប៉ុណ្ណោះ កាលពីឆ្នាំ២០២៣ ។

ចំណែកបុរសអ៊ីរ៉ង់និយាយថា ពួកគេមានសិទ្ធិស្របច្បាប់ដើម្បីហាមឃាត់ភរិយាចេញទៅធ្វើការ ហើយមានបុរសជាច្រើននាក់បានប្រើប្រាស់សិទ្ធិនេះ ។ ក្រៅពីនេះ ច្បាប់របស់អ៊ីរ៉ង់បានធ្វើឱ្យក្រុមហ៊ុនជាច្រើនបដិសេធនារីពុំទាន់រៀបការចូលធ្វើការ ដោយសារក្រុមហ៊ុនបារម្ភថា ពេលពួកនាងរៀបការរួច ស្វាមីនឹងហាមឃាត់ភរិយាមិនឱ្យធ្វើការ ។ លើសពីនេះ បើទោះជាពួកនាងបានចូលធ្វើការក្តី ប៉ុន្តែនៅតែទទួលការរើសអើងនៅកន្លែងធ្វើការដដែល ។

តាមមាត្រា១១០៥ របស់ច្បាប់អ៊ីរ៉ង់បានកំណត់ឱ្យស្វាមីធ្វើជាមេគ្រួសារ និងជាអ្នករកប្រាក់ចំណូលសំខាន់ មានន័យថា បុរសមានតួនាទីសំខាន់ក្នុងការងារច្រើនជាងស្ត្រី ។ រីឯស្ត្រីតែងតែទទួលបានប្រាក់ខែទាបជាងបុរសជានិច្ច ។

សេដ្ឋកិច្ចអ៊ីរ៉ង់បានជួបវិបត្តិយ៉ាងធ្ងន់ធ្ងរ ដោយសារការដាក់ទណ្ឌកម្មសេដ្ឋកិច្ច និងការគ្រប់គ្រងប្រទេសមិនល្អរបស់មេដឹកនាំអ៊ីរ៉ង់ ។ របាយការណ៍របស់ IMF បញ្ជាក់ថា ការរីកចម្រើនសេដ្ឋកិច្ច គឺពាក់ព័ន្ធនឹងការចូលរួមចំណែករបស់ស្ត្រី ។ ប៉ុន្តែបើចំនួនការជួលបុគ្គលិកស្រីធ្វើការស្មើនឹងបុរស វានឹងធ្វើឱ្យផលិតផលក្នុងស្រុកសរុប (GDP) របស់អ៊ីរ៉ង់ កើនឡើងដល់៤០% ៕